Judaai ke daur ki shuruat ho chuki thi, par Sath abhi bhi baki tha.
Vishwas dagmaga rha tha, par ehsaas abhi bhi baki tha.
Ek udaasi si chah rhi thi, par ek khushi abhi bhi baki thi.
Zindagi tanhayi se bharne wali thi, par Ishq ka Rang abhi bhi baki tha.
Aur jab pyaar ke rang ke sath Holi ke rang ka milan hoga, tab do dilon ka milna toh tay hi tha. Aisa milan jo Sameer Naina ko ek bandhan mein bandh jayega. Benaam rishte se azaadi dilwayega, mohabbat ke jazbaato ko ek rishte mein jod jayega.

In Naina's House
Preeti- Mujhe nhi pata Naina tu bas kal holi ke liye school aa rhi hai, matlab aa rhi hai. Mai aur kuch nhi sunne wali.

Naina- Preeti meri baat toh samajh. Mera bilkul mann nhi hai.

Preeti- Tu hamesha aise kyu nakhre dikhati hai.
Acha aakhri baar meri baat maan le bas.

Naina(to herself)- Han, aakhri baar hi toh hoga yeh, kyuki iske baad toh hum dono saath rahege hi nhi Preeti. Mera toh sab choot jayega piche, tu bhi, yeh school bhi aur Sameer....

Naina- Thik hai Preeti main chalugi kal tere saath Holi khelne ke liye. Ab khush.

Preeti- Han bahut.

Next Day in Sameer's House
Munna- Dekh rha hai Ponga, apna bhai toh aaj bilkul hero lag rha hai.

Pandit- Han apni bhabhi ke liye ho rha hai yeh sab toh.
Waise bhai yeh sab karne ka koi fayda nhi hai.

Sameer- Kyu?

Mundit- Kyuki hum abhi tujhe rangne jo wale hai.

Sameer- Nahiiii..ruko..

Mundit- Kyu?

Sameer- Aaj sabse pehle rang mujhe Naina hi lagayegi. Tumse bhi pehle. Samjhe.

Mundit- Samajh gaye.

Dono gaana gaane lagte hai.    "Dost dost na rha.."

Sameer- Bas karo dramebaazo. Uske baad tum mujhe jitna marzi rang laga dena. Par main chahta hu ki aaj sabse pehle Naina hi mujhe rang lagaye.

Otherside in Naina's House
Bela- Kya Naina jab saare kapde rangne hi wale hai toh safed kapde kyu paye tune.

Anand- Bela sab log zyadatar safed rang le kapde hi pate hai Holi par.
Aur dekho kitni pyaari lag rhi hai humari Naina.

Bela- Ji woh toh hai. Nazar na lage meri bachhi ko kisi ki.
Aur Naina sun tujhe pata hai na kaise rang lagana hai sabko, khaskar bado ko aur ladko ko. Tilak karke.

Naina- Han mummy, pata hai mujhe. Chalo ab main ja rhi hu.

In School
Sameer- Yaar yeh Naina ab tak nhi aayi. Main kab se intezaar kar rha hu use rang lagane ke liye.

Mundit- Bhai woh ladki hai.

Sameer- Toh.

Mundit- Toh ladkiyaan time leti hai. Ab toh aadat daal le tu.

Sameer- Naina aisi nhi hai. Balki woh toh.. 

Tabhi Naina aati hai. Aur Sameer use dekhta hi reh jata hai.

Sameer (to himself)- Kitni pyaari lag rhi hai. Especially is white suit mein. Jab jab main tumhe white mein dekhta hoon, tab tab mujhe tumse aur pyaar ho jata hai. Us din teej par bhi aur aaj Holi par.

Otherside
Naina(to herself)- Yeh Preeti kahin dikh hi nhi rhi. Mujhe bulake khud gayab ho gyi.

Tabhi Preeti Naina ke peeche se aati hai aur use Rang laga deti hai.

Preeti- Holi mubarak ho Naina.

Naina- Tujhe toh aaj main chodungi nhi Preeti ki bachhi...

Naina apne hath mein rang leke Preeti ke peeche bhagti hai.

Naina- Preeti ruk ja main bta rhi hu.

Preeti- Naina tere bas ka nhi hai mujhe pakad pana.

Tabhi Sameer Bhagti hui Naina ke samne aa jata hai.

Naina- Umm..sorry..

Sameer- Naina aaj ke din koi sorry thodi bolta hai.

Naina- Toh kya bolte hai.

Sameer- Aaj..aaj ke din toh Happy Holi bolte hai.

Tabhi Sameer apne mutthi rang se bharke Naina ko lagane wala hota hai. Aur Naina darr ke maare aankhein bandh kar leti hai.
Aur Sameer bhi use bina rang lagaye sirf use dekh rha hota hai.

Sameer(to himself)- Bas yeh waqt yahin tham jaye. Aur main tumhe aise hi dekhta rahu. Tumhara yeh chehra rango ke bawjud sabse alag hai. Tumhari yeh aankhein bandh hone ke bawjud bhi bahut kuch keh rhi hai. Aur tumhari yeh masoomiyat darr ke bawjud bhi mere dil ko choo gayi hai Naina.

Sameer- Naina..naina aankhein toh kholo.

Naina- Tumne mujhe rang nhi lagaya..

Sameer- Tumne bhi toh nhi lagaya mujhe.

Naina- Woh main...

Sameer- Ab laga do.

Naina Sameer ko tilak karti hai.

Naina- Happy Holi Sameer.

Sameer- Bas..ho gaya.
Itna sa rang. Kya Naina.

Naina- Humare mein aise hi rang lagate hai.

Sameer- Par humare mein aise rang nhi lagate balki..

Usi waqt Preeti aati hai aur Naina ko dhakka lagta hai. Aur Sameer ke hath ka laal rang Naina ke sir aur maang mein lag jata hai.
Aur Naina ke hath ka rang Sameer ki Shirt par apni chhap chod deta hai.

Sameer(to himself)- Yeh kya ho gaya mujhse. Naina ki maang...

Sameer- Naina woh Sorry..

Naina- Sorry nhi, Happy Holi.
(to Preeti)- Aur tu Preeti tune phir se mujhe daraya. Tu ruk ab.

Sameer(to himself)- Pata nhi Naina jab apni maang mein rang laga hua dekhegi, toh kya sochegi.

Mundit- Aur bhai ab toh bhabhi ne rang laga diya, ab toh hume bhi lagane de.

Sameer- Han lagaya na.

Pandit- Dikh toh rha nhi yaar.

Sameer- Yeh tilak lagaya hai na.

Mundit(laughingly)- Bhai bhabhi ne toh bahut zyada rang laga diya hai. Chal koi na hum kasar pooro kar dege.

Sameer- Ek minute.

Munna- Ab kya.

Sameer- Meri yeh shirt mat kharab karna. Ispe Naina ki ungliyon ke nishan hai.

Mundit- Ohh..hoo.. bhabhi ka  nishaan..

Otherside
Naina- Preeti main abhi washroom hokar aayi.

Wahan jake Naina apne aap ko aaine mein dekhti hai.

Naina(to herself)- Yeh rang meri maang mein?

Tabhi use Preeti ko wajah se jo dhakka laga tha aur Sameer ka hath uske sir par laga tha yaad aata hai. Aur woh apni maang ko chuti hai aur uski aankh se aansoo aata hai.

Naina(to herself)- Sameer! Usne meri maang bhar di. Gannu ji yeh kya ho gaya, Jitna main usse dur hone ki koshish kar rhi hu, utna uske kareeb aa rhi hu. Kyu ho rha hai aisa.

Woh apni maang mein laga hua rang baalon se dhakti hai aur bahar jati hai.

Naina's VO
Us din maine kahan socha tha ki woh din meri zindagi ke khaas dinon mein se ek ban jayega. Mere aur Sameer ke benaam rishte ko meri maang mein laga rang humare pyaar ki gawaahi dega. Uski shirt par mere hath ka nishaan humare pyaar ka saboot banega. Mera pehli baar kisi ladke ko rang lagana woh chahe use tilak lagana hi kyu na ho; humare pyaar ka sabse bada ehsaas hoga. Us ek pal mein main Sameer ki ban gyi thi. Jahan main usse hamesha ke liye judaa hona ka soch rhi thi, vhi ek rang ne hume ek dusre ke sath baandh diya tha; galti se hi shi meri maang us din bhari thi mere pyaar ne, Sameer ne.
Us din ke baad se hi toh Holi mera favourite festival ban gaya tha. Afterall, tab main Sameer ki jo ho gyi thi. Par Sameer ke liye woh shayad uski aakhri holi thi, kyuki uske baad main jo nhi thi uske sath. Tab tak usne woh tyohar nhi manaya tha jab tak main us tyohar mein main uske sath shamil nhi thi. Hazaaro sawaal uth rhe the mere mann mein jo main Gannu ji se puch rhi thi ki aakhir kyu woh humare sath aisa kar rhe hai. Par in sab sawaalon ka jawab ek hi tha, humara pyaar humara vishwaas aur humara saath. Jise main dekhke bhi samajh nhi pa rhi thi.

Sameer's VO
Us din bina soche samjhe humne ek rishte ko jodne wali kahin reete-raasmein kaari thi, anjaane mein hi shi par tab hum ek dusre ke ho hi gaye the. Us din ki yaadgir ki taur par aaj bhi woh shirt mere pass hai jispar Naina ke nishaan hai, woh sirf uske hath ki chaap nhi thi balki humare pyaar ki chhap thi. Woh shirt mujhe us din jeeye hue har pal ki yaad dilati hai. Chahe woh Naina ka white suit pehankar mere pyaar ke rang mein rang jana ho, ya phir uska aankhein bandh karke ghabrana ho. Chahe uska mere kareeb aakar mujhe chukar tilak karna ho ya phir uske hathon ki chuhan mere dil par lagna ho.
Un sab yaadon ko maine us shirt ki hi tarah apne dil ke pass sahej ke rakha hua hai.

Kya ek rang inke pyaar ko majboot bana payega. Us ek laal rang mein itni taqaat hogi ki woh inki judaai ko rok payega. Kya woh rang inhe ek dusre se hamesha ke liye baandh payega. Sawaal bahut se the par jawab tha sirf Pyaar.
Woh ishq ka laal rang inhe jode rakhna chahta tha, par woh jude rehne ke liye kya judaai hona zaruri tha. Ek rang ek nayi prem kahani likh sakta tha, par kya uske liye purani kahani ka anth hona jaruri tha.

।तेरे लिए।