Waqt beet rha tha, usi tarah hum sab ki zindgiyaan bhi. School ka safar khatam ho chuka tha. Aur sirf School hi nhi badla, balki aur bhi bahut kuch badal rha tha. Sameer Delhi chala gaya tha apne college ke liye, hostel mein rehne laga tha, ghar, parivaar, Munna Pandit sab chut gaya tha uska, mili thi toh bas ek aazaadi. Jahan Sameer apne shehar se 300 km durr chala gaya tha, vhi Naina bhi College jane lagi thi par sirf 3 km durr. Woh aaj bhi usi shehar mein thi jahan uski kahani shuru hui thi. Sirf shehar nhi badal rhe the, ya sirf school nhi chut rha tha, balki aur bhi bahut kuch hua. Ab is kahani mein ek aur entry hui thi. Jisne do bichde premiyon ke dil ki dhadkan ko phir se tezz kar diya tha. Yeh koi insaan nhi tha, na hi koi nayi situation jo inki life mein hulchul leke aayi balki yeh thi ek movie. Yeh Jawaani hai Deewani; ek film jisne sab badal ke rakh diya tha. Sameer Naina ke andar chal rhe toofaan ko ek diye ki roshni jo mil gayi thi.

Naina's VO
Hum sabki life mein koi na koi jaroor hota hai jise hum apna ideal maante hai, jo humari zindagi ke kisi na kisi mod par humari prerna banta hai. Meri aur Sameer ki zindagi mein bhi aisi hi ek prerna thi jisne hume aur huamre pyaar ko ek nayi disha di. Aur yeh prerna koi shaks nhi tha balki ek movie thi. Ek filmy kahani jisne humari asli prem kahani ki kahani hi badal di thi. Waise toh main yeh nahi manti ki filmon ki wajah se hi pyaar ko pankh mile hai kyuki filmein banne se pehle bhi pyaar kiya jata tha. Par humare pyaar mein ek film ne bahut bada role nibhaya hai, jisne hume ek umeed di, dobara milne ki umeed, dobara zindagi ko khul ke jeene ki umeed, dobara hasne ki umeed, dobara ishq karne ki umeed.
Hum mein se kise pata tha us time ki superhit film humari prem kahani ke liye bhi superhit saabit ho jayegi. Kise pata tha ki ek film Yeh jawaani hai deewani; Naina(Deepika Padukone) Bunny(Ranbir Kapoor) ki kahani, ek aur kahani ko inspire kar jayegi. Kise pata tha ki main Maine Pyaar Kiya ke Prem ko chodkar Yeh Jawaani Hai Deewani ke Bunny ke sapne dekhne lagugi, waise Sameer ke bhi dekhti thi. Kise pata tha ki Sameer ki life mein ek aur Naina entry maregi, main nhi film wali Naina. Kise pata tha ki us film ka har dialogue, har scene hume humari kahani ko dobara jeene par majboor kar dega.
Is film ne bahut kuch badla, Pehle sirf Sameer ko Salman Khan se problem hoti thi, par dheere dheere uski hit list mein bechara Ranbir Kapoor bhi shamil ho gaya tha.

In Delhi (Sameer's Hostel)
Sameer- Yaaro mera bilkul mann nhi hai yeh film dekhne ka.

Friend1- Chal na bhai aur uske baad Bar bhi chlege. Aaj full on masti karne ka plan hai.

Friend2- Han Sameer itna kya bhav kha rha hai.

Sameer- Woh baat nhi hai. Mujhe is romantic film mein koi interest nhi hai. Tum logon ko toh pata hai na ki na toh mujhse yeh pyaar bhari baatein suni jati hai aur na hi dekhi jati hai. Sab drama hai, pyaar jaisi koi cheez hoti hi nhi hai. I hate this love.

Friend1- Han Sameer pata hai kitna hopeless romantic insaan hai tu. Par bhai meri girlfriend ko yeh film dekhne jana hai. Woh toh film dekhegi par main toh bore ho jayuga. Isliye tum dono ko le jana chahta hoon apne sath. Ab tu apne dost ke liye itna toh kar hi sakta hai na

Friend2- Chal na bhai. Uske baad apni party bhi toh hai. Uske liye hi chal le.

Sameer- Tum log bhi na. Chalo.

Otherside in Rishikesh
Naina- Mummy Papa chalo late ho jayege. Film shuru hone hi wali hogi.

Bela- Jee chaliye, mujhe film ka ek scene bhi nhi chodna.

Anand- Chalo bhai nahi toh yeh dono maa beti mujhe ghar par koi aur hi film dikha degi.

In Theatre

Kabhi kabhi kuch baatein, humare yaadon ke kamre ki itni khidkiyaan khol deti hai, ki hum dang reh jaate hai.

Yaadein mitthai ke dabbe ki tarah hoti hai, ek baar khula toh sirf ek tukdaa nahi khaa payoge.

Naina(to herself)- Kitni shi baat kahi hai. Jaise mujhe yaad aati hai aaj bhi School ki, Doston ki, Preeti ki aur uski. Kitni pyaari hoti hai yeh yaadein.

Otherside
Sameer theatre mein so rha hota hai. Tabhi gaana bajta hai.

Friend1- Sameer dekh yaar Madhuri. Hayee kya lag rhi hai ghagra mein.

Uski baat sunkar Sameer ek aankh kholke Madhuri ko dekhta hai. Aur gaana khatam hone ke baad phir se sone lagta hai.

Bunny(Ranbir Kapoor)- Ayesha..right. Hum Tanya ki party mein mile the.

Naina(Deepika Padukone)- Naina..Naina Talwar.

Naina naam sunke Sameer jaag jata hai.

Sameer's VO
Hasi aati hai aaj bhi ki main film dekhne gaya hi kyon jab mujhe wahan jake sona hi tha. Par meri saari boriyat, saari neend bhaag gayi thi ek naam sunkar NAINA. Janta tha ki yeh woh Naina nhi hai, phir bhi woh naam hi mere liye kaafi tha. Uska naam sunne ke baad maine ek pal ke liye bhi apni palak nhi jhapkayi. Yeh jaduu tha Naina ka. Waise isme thoda haath Madhuri ka bhi tha. Chahe 1993 ho ya 2013 Madhuri ka jaadu humesha rahega hum jaise logon par. Pata nhi mere yeh dost mujhe kyu Hopeless Romantic bulate the, par main Romance mein kitna hopeless hoon, yeh toh sirf Naina hi bta sakti hai. Film wali Naina nhi, meri apni personal Naina.

22 tak padhai, 25 pe naukri, 26 pe chaukri, 30 pe bacche, 60 pe Retirement aur phir maut ka intezaar.. dhat aisi ghisi piti life thodi jeena chahta hoon.

Shaadi ke basic concept mein hi jhol hai.

Shaadi is Dal Chawal for pachaas saal till you die. Are life mein thoda bahut Keema Pav, Tangdi kabab, Hakka Noodles bhi hona chahiye na.

Sameer(to himself)- Bilkul shi baat boli hai Hero ne shaadi ke baare mein. Main khud aisi life kabhi nhi jeene wala. Mujhe bhi thoda keema pav aur haaka noodles chahiye.

Otherside
Bela- Dekh Naina, isme bhi Heroine ka naam Naina hai. Tu bhi bilkul iske jaisi lagti hai. Ek dum padhai mein doobi hui, chashma lagakar, meri bholi si Naina.

Naina(to herself)- Main aur yeh Naina ek jaisi. Nhi..nhi yeh toh ho hi nhi sakta.

Tumahri jaisi ladkiyaan flirting ke liye nahi, ishq ke liye bani hai. Aur ishq meri sehat ke liye accha nahi hai.

Sameer(to himself)- Meri sehat ke liye bhi bilkul acha nhi hai yeh Ishq vishq.

Teri smile kitni dangerous hai pata hai, mere pass dil hota toh pakka aa jata ispe.

Sameer(to himself)- Isko dekhke mujhe woh kyu yaad aa rhi hai baar baar. Shayad ek jaisa naam hai bas isliye.

Khud pe daya karna bandh karo, aur khud se pyaar karna seekho.

Sameer(to himself)- Woh bhi aisi hi darti ghabrati rehti thi humesha. Pata nhi ab kaisi hogi.

Main udhna chahta hoon, daudna chahta hoon, girna bhi chahta hoon, bas rukna nahi chahta.

Sameer(to himself)- Pehla shi dialogue bola hai Hero ne. Mera bas chale toh main khud apni life mein kabhi na ruku.

Woh din, woh raatein, woh hasi, woh masti, woh dosti, Bunny.

Naina- Bunny nhi, Sameer.

Bela- Kuch kaha tune.

Naina- N..nh..nhi..mu..mummy.

Nahi bol payi..bas nahi bol payi, Mujhe usse jitna pyaar tha, usse kahin zyada use apne khwabon se tha.

Woh apne khwabon ki aur itni tezi se dauda, ki palak jhapakte gayab ho gaya.

Naina(to herself)- Kitna dard hua tha tab bhi aur ab bhi, ise bhi aur mujhe bhi. Main bhi nhi bol payi thi use. Kitna chahti thi use phir bhi nhi keh payi thi. Pata nhi ab kahan hoga woh, kaisa hoga, kya karta hoga.

Kahin par pahunchne ke liye kahin se nikalna bahut jaruri hota hai. Sahi waqt pe kat lena chahiye, nahi toh gile-shikwe hone lagte hai.

Sameer(to himself)- Acha hua maine bhi woh shehar shi waqt par chod diya. Nhi toh pata nhi kon kon mujhse apni umeedin jod leta. Mummy, Papa, Munna, Pandit aur uski yaadein sab ko chodkar yahan Delhi aana mera sabse shi decision tha.

Badtameezi ek bimaari hai ..Aaisi bimaari joh dheere dheere waqt ke saath budhape mein badal jaati hai..Main kehta hoon jab tak budhapa nahi aata..Thodi badtameezi hi kar lete hai.

Sameer- Shi film hai yaar, mujhe toh laga tha poori romantic film hogi.

Friend2- Bhai abhi dekhta ja, abhi toh pakka tu apni statement badalne wala hai.

Tum pehle bhi itni khoobsurat thi ya waqt ne kiya koi haseen sitam.

Friend1- Sameer dekh yeh bhi teri tarah flirt kar rha hai ladkiyon se.

Sameer- Tu mujhe chod aur apni bagal wali par concentrate kar.

Kuch waqt do, sab theek ho jayega.

Naina(to herself)- Shayad waqt dene se hi sab theek ho jaya karta.

Ek hi shehar ke, ek hi ghar ke, ek hi kamre mein tu apni saari life kaat degi..Soch ke darr nahi lagta?

Sameer(to himself)- Kon aisi life jee sakta hai.

Jitna bhi try karo, life mein kuch na kuch toh chootega hi. Isliye yahi isi pal ka mazaa lete hai.

Naina(to herself)- Mujhe bhi yehi karna chahiye. Aakhir kab tak main apne past mein hi uljhi rahugi. Janti hu hum dono kabhi ek nhi ho sakte. Par iska matlab yeh nhi ki main baki sab ko chod du.

Kuch logon ke sath rehne se hi sab thik ho jata hai.

Sameer(to himself)- Sab bakwas baat hai.

Mujhe tumse pyaar ho jayega..phir se, Aur tumhe nhi hoga..phir se.

Bela- Naina..beta tu rone kyu lagi.

Naina- Mummy woh bas..aise hi.
(to herself)- Tumhe bhi nhi hua tha Sameer, na tab aur na kabhi phir se hoga.

Janti hu Bunny, samjhti hu main tumhe, pata hai tumhare sapne kya hai, ki tum zindagi se kya chahte ho.

Sameer(to himself)- Koi kisi ke sapne nhi samajh sakta. Ek ladki toh kabhi nhi aur khaskar jiska naam Naina ho woh toh kabhi kisi ko nhi samajh sakti hai.

Waqt kisi ke liye nahi rukta, beetta waqt hai lekin kharch hum hote hai. Aur iske pehle ki main poora kharch ho jayu, tere saath kuch waqt beetana chahta hoon.

Friend1- Sameer tu ro rha hai.

Sameer- Pagal hai kya..main royunga. Tu bhi na pata nhi kya kya sochta rehta hai.
(to himself)- Main bhi kharch ho rha hoon, par main kisi ke sath apna waqt nhi bita sakta. Kyuki jiske sath mujhe apna waqt bitana tha woh toh bahut pehle hi mujhe chod ke chali gayi thi. Aur uski yaadon ko chodkar main chala aaya usse durr.

In Rishikesh
Theatre se bahar aate hue kuch ladkiyaan baatein kar rhi thi Naina ke baare mein.

Girl1- Look that Behanji.

Girl2- Han apni family ke sath aisi film dekhne aayi hai.

Naina unke pass jaati hai.

Naina- I am Sorry..but I think aapne mere baare mein kuch kaha hai. Aap log apne friends ke sath yeh film dekhne aayi hai iska matlab yeh nhi ki har koi aisa kare. Shayad aap logon ko sharam aati hogi family ke sath kahin jane mein. Par mujh jaisi behanji ko nhi. Waise mujhe yeh bataiye aap rehti toh apni family ke sath hi hai na aur yeh paise jisse yeh film dekhne aa saki hai woh bhi family ke hi honge. Hope Am I clear to you.

Anand- Naina beta woh...

Naina- Papa maine kuch galat kiya kya.

Anand- Nhi beta tumne kuch galat nhi kaha. Par mujhe toh pata hi nhi tha ki meri Naina kabhi aise kisi se jhagda bhi sakti hai.

Bela- Kya aap bhi. Chalo abhi mandir bhi jaana hai na.

Naina's VO
Pata nhi mujhe kya ho gaya tha. Maine isse pehle kabhi aise kisi se baat hi nhi ki thi. Manti hoon ki waqt badal rha tha par iska matlab yeh nhi ki hum apne rishte bhi badal de. Pyaar ya doston ko apnaya jaye Parivaar ki keemat par, yeh toh galat hai. Us din woh film dekhne ke baad ek nayi Naina ne janam liya tha jo apno ke liye jhuk bhi sakti hai aur kisi ke samne khade hone ki himmat bhi rakhti hai. Pehle wali Naina toh jeena bhul gayi thi, hasna bhul gayi thi, sirf dikhave ke liye jee rhi thi. Mere dil aur dimag mein sirf Sameer tha, jab jab uske baare mein sochti thi toh mujhe sirf pyaar ka dard hota tha. Par us din ke baad se main Sameer ko yaad karti thi par ek hasi ke sath. Koi banavti hasi nhi balki ek sachi hasi. Us din ke baad se mera woh Pyaar ka kadva dard meetha aur pyaara jo ban gaya tha.

Otherside in Mumbai
Friend1- Aur Sameer ab bta kaisi lagi film.

Sameer- Han achi thi..mera matlab hai itni buri bhi nhi thi.

Friend2- Shukar hai kuch toh pasand aaya bhaisahab ko. Waise yaar kuch bhi kaho Heroine badi mast thi. Naina..kya ladki thi, yaar badi hi shi item thi. Kaash us kissing secene mein main hota us Naina ke sath.

Yeh sunke Sameer uska collar pakad leta hai.

Friend1- Sameer chod use. Kya kar rha hai tu.

Sameer- Sorry. Par ainda zara soch samajh ke mooh khola kar.

Sameer wahan se gusse mein chala jata hai.

Friend1- Chal ab use mana jake. Phir apni drinks bhi toh intezaar kar rhi hongi.

Sameer's VO
Us din 3 ghante ki film dekhne ke baad ek naye hi Sameer Naina theatre se bahar aaye the. Main jise pichle kuch saalon mein kuch acha nhi lagta tha, use ek romantic film achi lagi, itni achi lagi ki main baki sab bhool gaya tha. Tabhi toh film dekhne ke baad jab mere doston ne film wali Naina ke liye kuch bola, mera dil aisa jala tha jaise mano meri Naina ke liye kuch bola gaya ho.
Woh film dekhne ke baad main bahut badal sa gaya tha. Shayad mera thoda gussa jo nikal gaya tha Naina par, film wali Naina par. Apni wali Naina par toh kabhi nikal hi nhi sakta. Gusse ke sath sath woh dard bhi jo aansu banke film ki ending par nikal gaye the. Itne saalon ka dard tha 3 ghante mein uski bharpai nhi ho skati thi, phir bhi badlaav toh aaya tha mujh mein. Kyuki us film ki happy ending dekhke ek nayi umeed jo jaag gayi thi mujh mein. Woh umeed jo kahin na kahin mujhe mera future dikha ke gayi thi, meri aane wali zindagi aur us mein Naina ka sath.

Yeh sach hai ki kahin baar choti choti baatein humari zindagi mein bade bade badlaav le aati hai. Tabhi toh ek choti si film Sameer Naina ki badi si zindagi ko itna bada U-turn de gayi thi. Aisa U-turn jo phir se do dilon ko milne mein kargaar saabit hoga.

।तेरे लिए।