പ്ലാനുകളും പാളിച്ചകളും no:1
     """""""""""""""""""""""""""
അഖിലും ശ്യാമും അന്ന് എന്റെ കൂടെ ട്രിപ്പ്‌ പോയതിന് ശേഷം പിന്നീട് എങ്ങോട്ടും ട്രിപ്പ്‌ പോവാൻ കഴിഞ്ഞിരുന്നില്ല. ഓരോ മാസം ഒരു ട്രിപ്പ്‌ എന്നതായിരുന്നു അഖിൽ അന്ന് ട്രിപ്പ്‌ കഴിഞ്ഞു പറഞ്ഞ പ്ലാൻ. പക്ഷെ അഖിലിന് പ്രളയം കഴിഞ്ഞു പണിക്കു കയറ്റിയ വണ്ടികളുടെ പണി തീർക്കാൻ പറ്റാതെ ഷോറൂമിൽ ഓട്ടം ആയിരുന്നു. ശ്യാമിനു ഒരു അലമാര ഉണ്ടാക്കുന്ന പ്രൊഡക്ഷൻ യൂണിറ്റ് ഉണ്ട്. പോരാഞ്ഞിട്ട് ഒരു കടയും കവലയിൽ ഉണ്ട്. അവന്റെ ചേട്ടനും അച്ഛനും എല്ലാവരും അത് വിജയിപ്പിക്കാൻ ഓട്ടത്തിലാണ്. രണ്ട് പേരും ബിസി. ഇടക്ക് ഗ്രൂപ്പിൽ വന്നു ട്രിപ്പ്‌ പോവാം എന്ന് പറയും. പക്ഷെ പിന്നെ മിണ്ടില്ല. തിങ്കളാഴ്ച ആണ് പോകുന്ന കാര്യം പറയുന്നത്. ഞായർ കഴിഞ്ഞു പണി ചെയ്ത് വെറുക്കുമ്പോൾ ഉള്ള തോന്നൽ. ശനിയാഴ്ച ആരും പക്ഷെ ട്രിപ്പ്‌ ന്റെ കാര്യം പറയില്ല. ഒരു ദിവസം കിട്ടുന്ന ലീവ് ഉറങ്ങി തീർക്കാൻ ആണ് തോന്നുക.

                   ഞാൻ ഇത് കുറേ കണ്ട് മടുത്തപ്പോൾ ഒരു ദിവസം എല്ലാരേയും കൂട്ടി ഒരു പോക്ക് പോകാം എന്ന് മനസ്സിൽ കണ്ടിരുന്നു. അഖിൽ ഒരു ഹിമാലയൻ വാങ്ങിയിരുന്നു. ശ്യാമിന് ഒരു ബുള്ളറ്റ് ഉണ്ട്. ഞങ്ങളുടെ ഗ്രൂപ്പിൽ ഒരുത്തൻ കൂടെ ഉണ്ട്. ക്രിസ്റ്റി... പാപ്പൻ എന്നാണ് വിളിക്കണേ. എന്റെ അനിയന്റെ കൂടെ പഠിച്ചതാണ്. അവനും സ്വന്തമായി ഒരു bullet ഉണ്ട്.  ഈ സമയത്തു ഞാൻ ഒരു പഴയ fz  വാങ്ങിയിരുന്നു.

ഒരു ബുദ്ധന്റെ പ്രതിമ ഉണ്ടാക്കാനുള്ള ഓട്ടത്തിൽ ആണ് അപ്പോൾ ഞാൻ. എന്റെ രണ്ട് സുഹൃത്തുക്കൾ ആണ് അതിന്റെ പണി ചെയ്യുന്നത്. സാമ്പത്തികമായി ഇത് ചെയ്യാനുള്ള  പ്രശ്നങ്ങൾ അറിയാവുന്നവൻ  ആണ് അതിൽ ഒരുത്തൻ. ഒത്തിരി ചെലവ് വരുന്ന ആ പരിപാടി അവർ  മൂന്നിലൊന്നു മുടക്കിൽ ചെയ്യാൻ തയ്യാറായി. സത്യത്തിൽ അവർക്ക് അതിൽ നിന്നു പണിക്കൂലി പോലും കിട്ടില്ല. എങ്ങനെ എങ്കിലും സംഗതി നടത്താൻ ഉള്ള ഓട്ടത്തിൽ ആണ് അപ്പോൾ. കലാകാരന്മാരായ അവർക്ക് യാത്രയിൽ നല്ല താല്പര്യം ഉണ്ട്. എന്നാൽ നമുക്ക് ഒരു ട്രിപ്പ്‌ പോവാം എന്ന് പണിക്കുള്ള സാധനങ്ങൾ വാങ്ങി ആര്ടിസ്റ്  ജെഫിന്റെ വീട്ടിൽ വച്ചു ഞാൻ പറഞ്ഞു. ലാൽബിൻ ആണ് രണ്ടാമത്തെ ആര്ടിസ്റ്. അവനും ഞാനും അടുത്ത് ആണ് താമസം. ഒന്നുമുതൽ ഒന്നിച്ചു പഠിച്ചതാണ്. അവർ ചെയ്തു തരുന്ന സഹായത്തിനു ഒരു യാത്രയും അന്നത്തെ ഫുൾ ചിലവും ഞാൻ എടുക്കാം എന്ന് പറഞ്ഞപ്പോൾ അവർ വലിയ സന്തോഷത്തിലായി. പിന്നെ പോകാൻ ഉള്ളസ്ഥലങ്ങൾ നോക്കി എനിക്ക് ഇപ്പോൾ ട്രിപ്പ്‌ പോണം എന്ന മൂഡ് ആയിരുന്നു.

ചാലക്കുടി ഭാഗത്തുള്ള കനകമല ആണ് ഒരു spot. അല്ലെങ്കിൽ വയനാട്, നെല്ലിയാമ്പതി അങ്ങനെ ചർച്ചകൾ പോയി. എനിക്ക് അന്ന് എങ്ങോട്ടേലും പോകണം എന്നായി. പക്ഷെ അപ്പോൾ കയ്യിൽ പൈസ ഇല്ല. സാധനങ്ങൾ വാങ്ങി ഞാൻ കാലിയാണ്.ട്രിപ്പ്‌  നമുക്ക് പിന്നേ പോകാം എന്ന് പറഞ്ഞു പ്രതിമയെ പറ്റിയുള്ള ചർച്ച ആയി ലാൽബിൻ.  പിന്നേ സമയം നോക്കിയപ്പോൾ 6 മണി. ഞാൻ ലാൽബിനെയും കൂട്ടി വീട്ടിലേക്കു പോന്നു.        
                   
                       അവനെ ഡ്രോപ്പ് ചെയ്ത് വീട്ടിലേക്കു വരുമ്പോൾ ആണ് അഖിൽ വിളിക്കുന്നത്‌. ഡാ നീ ശ്യാമിന്റെ കടയിലേക്ക് വാ... ഇന്ന് ട്രിപ്പ്‌ പോകുന്ന കാര്യത്തിന് ഒരു പരിഹാരം കാണണം. എനിക്ക് പിന്നെ അന്ന് വീട്ടിൽ കിടക്കാൻ ഉള്ള മൂഡ് തന്നെ പോയി. നേരെ വീട്ടിൽ വന്നു കുളിച്ചു ഡ്രെസ്സ് ഒക്കെ മാറ്റി നേരെ വിട്ടു ശ്യാമിന്റെ കടയിൽ. അവൻ അവിടെ ഇരിക്കുന്നുണ്ട്. പക്ഷെ അഖിൽ ചർച്ച വച്ച കാര്യം ഒന്നും അവൻ അറിഞ്ഞിരുന്നില്ല. എനിക്കന്നു എങ്ങോട്ടെങ്കിലും പോയേ പറ്റു.

അഖിലും ഞാനും ഇന്ന് നൈറ്റ്‌ ട്രിപ്പ്‌ പോകുകയാണ് എന്നും പാപ്പൻ ഞങ്ങളുടെ കൂടെ വരുന്നുണ്ട് എന്നും പറഞ്ഞു ശ്യാമിനെ മനസ്സ് കൊണ്ട് ഇന്ന് തന്നെ ട്രിപ്പ്‌ പോവാൻ പരുവപ്പെടുത്തി വച്ചു ഞാൻ. അഖിൽ വന്നപ്പോൾ ഞാൻ ചോദിച്ചു... ഡാ ഇന്ന് നൈറ്റ്‌ പോകാം എന്ന് പറഞ്ഞിട്ട് എങ്ങോട്ടാ പോവണ്ടേ എന്ന് നീ പറഞ്ഞിട്ടില്ലല്ലോ? അവൻ ഞാൻ ശ്യാമിനെ പറ്റിക്കാൻ പറഞ്ഞതാണെന്ന് ഓർത്തു  കൂടെ നിന്നു. രണ്ടും സെറ്റ് ആണെന്ന് ഉറപ്പിച്ചപ്പോൾ പാപ്പനെ ഞാൻ വിളിച്ചു... ഡാ ഞങ്ങളുടെ പ്ലാൻ ഇന്ന് നൈറ്റ്‌ ട്രിപ്പ്‌ പോവാൻ ആണ്. നീ ഇങ്ങു വാ... അവനും വൈകാതെ എത്തി.

ശ്യാമിന്റെ കടയിൽ വട്ടം കൂടി. ഇന്ന് നൈറ്റ്‌ മൂന്നാർ ടോപ് സ്റ്റേഷൻ പോകാം മോർണിംഗ് സൺറൈസ് കണ്ടു മൂന്നാർ ഒന്നു കറങ്ങി തിരിച്ചു വരാം. സംഗതി സീരിയസ് ആണെന്ന് അഖിലിന് മനസ്സിലായി. ട്രിപ്പ്‌ പലപ്പോളും പോകാം എന്ന് പറഞ്ഞു പോകാതിരിക്കുന്നത്  കൊണ്ട് പാപ്പൻ അപ്പോളും നിസ്സംഗനാണ്. ശ്യം ഇടി വെട്ടിയ പോലെ ഇരിക്കുന്നുണ്ട്. നാളെ ഒന്നുകിൽ കടയിൽ വരണം, അല്ലെങ്കിൽ ഒരു അലമാരയുടെ പണി ബാക്കി ഉള്ളത് ചെയ്യണം... രണ്ടിനും നിൽക്കാതെ ട്രിപ്പ്‌ പോയാൽ നഷ്ടം അല്ലേ. പക്ഷെ ട്രിപ്പ്‌ മിസ്സ്‌ ചെയ്യാൻ പറ്റുകയുമില്ല. അഖിൽ ഹിമാലയൻ വാങ്ങിയിട്ട് ഇതുവരെ ഒരു ട്രിപ്പ്‌ പോലും പോയിട്ടില്ല. കാർ പോർച്ചിനു ഒരു അലങ്കാരം മാത്രമായി അവൻ വീട്ടിലിരിപ്പാണ്. അതുകൊണ്ട് അവൻ വരാൻ ok ആണ്. പാപ്പൻ ഒരു മണിക്കൂർ കൊണ്ട് ട്രിപ്പ്‌ സെറ്റ് ആക്കിയ എന്റെ ആവേശം കണ്ടു പോകാം എന്ന് ഉറപ്പ് തന്നു. അഖിലിന്റെ കൂട്ടുകാരൻ ഒരാൾ മൂന്നാർ ഉണ്ട്. അവൻ വഴി ടോപ് സ്റ്റേഷനിൽ ഒരു റിസോർട് ബുക്ക്‌ ചെയ്യാം എന്ന് അവൻ പറഞ്ഞു. 
                      
                           അവൻ ബുക്ക്‌ ചെയ്യാൻ വിളിച്ചപ്പോൾ ശ്യാം കൂടെ വരാൻ ok പറഞ്ഞു. പാപ്പന്റെ thunder bird, അഖിലിന്റെ ഹിമാലയൻ... ഞങ്ങൾ ഓളം വെട്ടി കവലയിൽ നിന്നു കൂവി.

ശ്യാം കട ഇട്ടപ്പോൾ തന്നെ ഞാൻ ഒരു പ്ലാസ്റ്റിക് ബാസ്കറ്റ് വാങ്ങിക്കാൻ വരുന്നുണ്ടെന്നു പറഞ്ഞിരുന്നു. അതവൻ കയ്യോടെ ഏല്പിച്ചു. ബില്ല് പിന്നേ തരും. ഞാൻ അത് ഒറ്റയ്ക്ക് കൊണ്ടുപോകാൻ വയ്യാത്തത് കൊണ്ട് കടയിൽ നിന്ന ശ്യാമിന്റെ കസിൻ ചെക്കനെ കൂടെ കൂട്ടിയാണ് വീട്ടിൽ പോയത്. ശ്യാമിന്റെ മനസ്സ് മാറാതെ ഇരിക്കാൻ ഞാൻ 9മണിക്ക് അടക്കുന്ന അവന്റെ കട 8 മണിക്ക് എല്ലാവരെയും കൂട്ടി സാധനങ്ങൾ എല്ലാം പെറുക്കി അകത്തു വച്ചു അടപ്പിച്ചു. ഞാൻ പോയി ജാക്കറ്റ് എടുത്തിട്ട് ഇവിടെ വരും. എല്ലാവരും പോയി റെഡി ആയി ഒരു 9.30 ക്ക് വരാൻ പറഞ്ഞു. അടിമാലി ചെല്ലുമ്പോൾ നല്ല തട്ടുകട ഉണ്ട്. ഫുഡ് അങ്ങനെ കഴിക്കാം എന്നായി. ഞാൻ ബാസ്‌ക്കറ്റും ചെക്കനും ആയി വീട്ടിൽ എത്തി. 
                          
                     അന്ന് അച്ഛൻ കൊട്ടാരക്കരയിൽ പണിക്കു പോയിരിക്കുകയാണ്. അമ്മയും അനിയനും മാത്രം... അനിയൻ CA പഠിക്കാൻ കോച്ചിംഗ് നോക്കുകയാണ്. നാളെ ഞായർ ആയിട്ടും അവനു കൊച്ചിയിൽ ക്ലാസ്സ്‌ ഉണ്ട്. ഞാൻ അമ്മയ്ക്ക് ബാസ്കറ്റ് കൊടുത്തു. എന്നിട്ട് ഇന്ന് ഒരു ദിവസത്തേക്ക് ഉറക്കം മൂന്നാർ ആകുകയാണ് എന്ന് പറഞ്ഞു. ഇതിടക്കു പറയാറുള്ള വാക്കാണ്.

പക്ഷെ അമ്മ പോകേണ്ട എന്ന് പറഞ്ഞു... ഏഹ്... അതെന്താ ഇന്ന് പോയാൽ... നാളെ പറമ്പിൽ കപ്പ പറയ്ക്കാൻ  ആള് വരും. ഉണ്ണിക്ക് നാളെ 7 മണിക്ക് എറണാകുളം പോകണം. നീ പോയാൽ പിന്നേ കപ്പ പറിക്കാൻ ആര് പോവും... ഞാൻ പോണോ...
സബ്ബാഷ്. എന്റെ ദൈവമേ... ഞാൻ ദേ വരുന്നേ.... എന്നെ കാത്തോളണേ... ഈ അവസ്ഥയ്ക്ക് ഒരു ഉപമ പറയാൻ പറ്റുന്നില്ല. എനിക്ക് തലക്ക് ചുറ്റും മൂളക്കുരുവി കൂവി പറന്നു  നടക്കുന്ന ഫീൽ ആയിരുന്നു.ഞാൻ എന്ത് വന്നാലും പോകും എന്ന് പറഞ്ഞു... അനിയൻ തെണ്ടി വാ പൊത്തി അടുത്തിരുന്നു ചിരി അടക്കാൻ നോക്കുന്നുണ്ട്. അമ്മ ചിരവതടിയോ വിറകു കോലോ എടുക്കാൻ വേണ്ടി അടുക്കളയിലേക്കു പോയി. ഒപ്പം വന്ന ചെറുക്കൻ പുറത്ത് നിൽക്കുന്നുണ്ട്. ഒറ്റയ്ക്ക് ഓടാൻ പോയാൽ അനിയൻ പിടിച്ചു നിർത്തും. അവനു നാളത്തെ ക്ലാസ്സ്‌ മുടക്കാൻ പറ്റുമോ എന്ന് കെഞ്ചി ചോദിച്ചു. അവനെ ട്രിപ്പ്‌ നു കൊണ്ടുപോകാറില്ലാത്തതു കൊണ്ട് അതൊരു പാഴ് ചോദ്യം ആയിരുന്നു. കയ്യിൽ കിട്ടിയ ഒന്നിനും വലിപ്പം പോരാതെ കണ്ട് അമ്മ എന്റെ അടുത്തേക്ക് വന്നു. ശ്യാമിനെ അമ്മക്ക് വല്യ ഇഷ്ടം ആണ്. നീ അവനെ വിളിക്കു... ഞാൻ കാര്യം പറയാം... അപ്പോളേക്കും കൂടെ വിട്ട ചെക്കനെ കാണാഞ്ഞിട്ട് അവൻ എന്നെ വിളിച്ചു. ഞാൻ ദേ വരുന്നു എന്ന് എങ്ങനെയോ പറഞ്ഞൊപ്പിച്ചു.

അമ്മയോട് അവനെ തിരിച്ചു ആകിയിട്ട് വരാം എന്ന് പറഞ്ഞു ഇറങ്ങി. തിരിച്ചു വന്നില്ലെങ്കിൽ കാല് തല്ലിയൊടിക്കും എന്ന് ആ ചെക്കന്റെ കേൾക്കെ അമ്മ പറഞ്ഞപ്പോൾ സംഗതി കൈവിട്ട കേസാണ് എന്ന് ഉറപ്പായി. അച്ഛനെ വിളിച്ചാലും കാര്യം ഇല്ല. ബൈക്കിൽ ചെക്കനേയും കൂട്ടി പോകുമ്പോൾ ഒരു പ്ലാൻ കിട്ടി. ശ്യാമിനോട് ഞാൻ കാര്യം പറഞ്ഞു. നമുക്ക് കുറച്ചു കൂടി വൈകി പോകാം ഞാൻ പോയി കപ്പ പറിച്ചു ഇട്ടിട്ട് പോയാൽ പിന്നേ ok ആണ് എന്ന് പറഞ്ഞു.
                    
                          വീട്ടിൽ വന്നു ഞാൻ അലറി...ആ തൂമ്പ എവിടെ.... എനിക്ക് കപ്പ പറിക്കാൻ കൈ തരിക്കുന്നു... അമ്മ നിയന്ത്രണം വിട്ട് ഓടി പുറത്ത് വന്നു. നട്ട പാതിരായ്ക്ക് കപ്പ പറിയ്ക്കാൻ പോകാൻ നിനക്ക് പ്രാന്താണോ... നാട്ടുകാര് കള്ളനാണെന്നും പറഞ്ഞു കൈട്ടം തരും. അങ്ങനെ ആരേലും വന്നാൽ തൂമ്പക്കു അടിക്കും ഞാൻ...നാടകത്തിനു  കുരിശിൽ ഏറ്റിയ കർത്താവിന്റെ വേഷം ചെയ്യുന്നവന്റെ  പാന്റിൽ കട്ടുറുമ്പ് കയറിയ അവസ്ഥയാണ് എനിക്ക്. എടാ കപ്പ ഇന്ന് രാത്രിയിൽ വെട്ടി തിരിച്ചിട്ടാൽ രാവിലെ ആകുമ്പോൾ കറുപ്പ് വീഴും. പിന്നേ അത് ആരും വാങ്ങില്ല. സ്ഥിരം കൊടുക്കുന്ന കടക്കാരൻ പോയാൽ പിന്നേ ആരാ ഇത് വാങ്ങണേ?... അന്നേരം ആണ് അഖിലിന്റെ കാൾ... ഡാ നീ ഞാൻ തരുന്ന അക്കൗണ്ടിലേക്കു ഒരു 500 ഇടണം. റിസോർട് ന്റെ അഡ്വാൻസ് കൊടുക്കാൻ ആണ്... കിണറ്റിൽ ചാടണോ അതോ കുളത്തിൽ ചാടണോ...മാഡം എനിക്ക് നാളെ വരാൻ പറ്റുകേല... നാളെ എന്റെ പറമ്പിൽ അടയ്ക്കാ പറിക്കൽ ആണ് എന്ന് പറഞ്ഞ ഷാജി പാപ്പന്റെ ധൈര്യം എടുത്തു ഞാൻ കാര്യം പറഞ്ഞു... അവൻ എന്തായാലും വഴക്ക് പറയാതെ സമാധാനിപ്പിച്ചാണ് ഫോൺ വച്ചത്. ശ്യാമിനെയും പാപ്പനെയും നീ വിളിച്ചു പറയണം എന്ന് ഞാൻ അവനോട് പറഞ്ഞു. അവരോട് എന്നെ നോക്കണ്ട പൊക്കോളാൻ ആണ് പറഞ്ഞത് എങ്കിലും ട്രിപ്പ്‌ അഖിൽ ക്യാൻസൽ ചെയ്തു. നാളെ കടയും തുറക്കാം പണിയും മുടക്കേണ്ട എന്ന് കണ്ട ശ്യാം ഇതിപ്പോ ലാഭം ആയല്ലോ എന്ന സന്തോഷത്തിൽ ആയിരുന്നു... പക്ഷെ പാപ്പൻ മമ്മിയുടെ കയ്യിൽ നിന്നു പൈസയും പിടിച്ചു പറിച്ചു ഒടുക്കത്തെ ഡയലോഗ് അടിച്ചു വീട്ടിൽ നിന്ന് ഇറങ്ങി കഴിഞ്ഞിരുന്നു. തിരിച്ചു ചെല്ലാൻ ഉള്ള മാനക്കേട് കൊണ്ട് അവൻ അന്ന് രാത്രിയിൽ എറണാകുളത്തുള്ള കൂട്ടുകാരന്റെ വീട്ടിൽ പോയി കിടന്നുറങ്ങി, പിറ്റേന്ന് രാവിലെ മൂന്നാർ നിന്ന് വരുന്ന പോലെ വീട്ടിൽ പോവേണ്ടി വന്നു. അഖിൽ ഹിമാലയന്റെ കുറേ ഫോട്ടോ insta യിൽ ഇട്ടു സമാധാനപ്പെട്ടു.
                         
                  ആ രാത്രിയിൽ ഉറങ്ങാൻ ഞാൻ ഒത്തിരി കഷ്ട്ടപ്പെട്ടു. എങ്കിലും ഒരാവശ്യത്തിന് വീട്ടുകാരുടെ കൂടെ നിക്കാതെ ട്രിപ്പ്‌ പോകുന്നത് ശരിയല്ല എന്ന കാര്യം ഞാൻ ഉൾക്കൊണ്ടു. അവര് കാരണമല്ലേ ഞാൻ ഈ ലോകം കണ്ടത്. സ്വയം ഇങ്ങനെ സമാധാനിപ്പിച്ചെങ്കിലും ഇനി എങ്ങനെ വീടിന്റെ പുറത്തിറങ്ങും എന്നത് ഒരു വലിയ ചോദ്യമായിരുന്നു... പാപ്പൻ എന്നെ കിട്ടിയാൽ അപ്പൊ തട്ടും. അവൻ സ്റ്റാറ്റസ് വരെ ഇട്ടെന്നാണ് കേട്ടത്. Messenger ൽ ഒരു മാസത്തേക്ക് കേറിയില്ല. We all are villans in someone's story...