Update ചെയ്യാൻ നല്ലത് പോലെ ലേറ്റ് ആയി എന്നറിയാം, നോമ്പിന് മൊത്തം കുറച്ചു തിരക്കിൽ പെട്ടുപോയി, പിന്നെ ഒന്നും എഴുതിയാനും കിട്ടുന്നുണ്ടായിരുന്നില്ല, അത് കൊണ്ടാണ് ഇത്രയും ലേറ്റായത്.

Double update ആണ് ഇപ്രാവശ്യം, പക്ഷേ കുറേ ആവശ്യമില്ലാത്ത കാര്യങ്ങൾ കുത്തിനിറച്ച ചാപ്റ്ററുകളാണ്, ലേറ്റ് ആക്കിയതിൽ സോറി....

°°°°°°°°°°°°°°°°°°°°°°°°°°°°°°°°°°°°°°°°

മൂന്ന് മാസങ്ങൾക്ക് ശേഷം,

Hayaathi's pov:-

ഒരു വർഷമാകാനായി ഇനി രണ്ട് മാസം കൂടി, അത് കഴിഞ്ഞാൽ മമ്മിയോട് പറഞ്ഞ അവധി തീരും, പിന്നെ മമ്മി മിക്കവാറും എന്നെ ഏതെങ്കിലും കോന്തനെ കൊണ്ട് കെട്ടിക്കാൻ നോക്കും... ഞാൻ ചിന്തയോടെ താടിക്ക് കയ്യും വെച്ചിരുന്നു.

ജോബ് കിട്ടിയ സന്തോഷത്തിൽ ഏതോ നേരത്ത് മമ്മി കല്യാണത്തെ കുറിച്ചു പറഞ്ഞപ്പോൾ അറിയാതെ പറഞ്ഞുപോയതാണ്, ജോലി ചെയ്യാൻ തുടങ്ങി ഒരു വർഷം കഴിഞ്ഞാൽ കല്യാണത്തിന് സമ്മതിക്കാം എന്ന്, പക്ഷേ അന്ന് കരുതിയിരുന്നില്ല ആ ഒരു വർഷം ഇത്ര പെട്ടെന്ന് കഴിയുമെന്നും, മമ്മി ഇത് പോലെ ഓർത്തു വെക്കുമെന്നും...

ഫാമിലി ഫ്രണ്ടിന്റെ മോൾ ആയത് കൊണ്ടാണോ അതോ പൂർവ്വ കാമുകിയയെ കണ്ടതിന് ശേഷമാണോ എന്നറിയില്ല അന്നത്തെ ആ ഗോവൻ ട്രിപ്പിന് ശേഷം എന്തായാലും ഹിറ്റ്ലർ അങ്ങനെ പണിയൊന്നും തരാറില്ല, ആവശ്യത്തിന് അല്ലാതെ വഴക്കും ഇല്ല, അത് കൊണ്ട് തന്നെ ഓഫീസ് ലൈഫ് ഒക്കെ നല്ല എൻജോയ് ചെയ്തു വരികയാണ്, അതിനിടയിലാണ് മമ്മിയുടെ ഈ ബോംബ്... ഇനി മമ്മി എന്റെ തലയിൽ കെട്ടി വെക്കുന്നയാൾ എന്നോട് ജോലി രാജി വെക്കാൻ പറഞ്ഞാൽ ഞാനെന്ത് ചെയ്യും!...

"ഔച്ച്‌" പെട്ടന്ന് തലയുടെ പിറകിൽ വന്നു എന്തോ വന്ന് വീണപ്പോൾ വേദനയോടെ ഞാൻ എന്റെ ചിന്തകളിൽ നിന്നുണർന്നു.

എന്താണ് തലയിൽ വീണതെന്നറിയാനായി ഞാൻ നിലത്തേക്ക് നോക്കി. ഒരു പേന നിലത്തു കിടക്കുന്നത് കണ്ടു. ഇത് കൊണ്ടു തലയിൽ എറിയാൻ ചാൻസ് ഉള്ള ഒരാളേ ഉള്ളു, ഞാൻ ആഷിയുടെ ഭാഗത്തേക്ക് നോക്കി.

അവൾ എന്നോട് പുറത്തേക്ക് വരാൻ ആംഗ്യം കാണിച്ചു. എന്തിന് എന്നർത്ഥത്തിൽ ഞാൻ കയ്യുയർത്തി, വാ എന്നും പറഞ്ഞു അവൾ പുറത്തേക്ക് നടന്നു.

ഞാൻ തിരിഞ്ഞ്‌ ഹിറ്റ്ലറുടെ ക്യാബിനിലേക്ക് നോക്കി. ആൾ പ്രതാപ് സാറുമായി എന്തോ ചർച്ചയിലാണ്, ഇന്നലെയും കൂടി വഴക്ക് കിട്ടിയതാണ് അത്യാവശ്യ സമയത്ത്‌ എന്നെ ഇവിടെ കാണില്ല എന്നും പറഞ്ഞു. ഞാൻ പുറത്ത് പോകുന്നത് കണ്ടിട്ടാണോ ഇയാൾക്ക് എന്നെ കൊണ്ടുള്ള ആവശ്യം വരാറുള്ളത് എന്ന് പലപ്പോഴും തോന്നാറുണ്ട്, ഇപ്പോൾ എന്തായാലും മുങ്ങാൻ പറ്റിയ ചാൻസാണ് അയാളുടെ ശ്രദ്ധ മുഴുവൻ അവിടെയാണ്. ഞാൻ അവിടെ നിന്നും എഴുന്നേറ്റു ആഷിയുടെ അടുത്തേക്ക് നടന്നു.

" നീ എന്തിനാടി ദുഷ്ട്ടെ എന്റെ തലയിൽ പേന വെച്ചു എറിഞ്ഞത്!" അവളുടെ അടുത്തെതിയതും ഞാൻ അവളുടെ കൈ പിടിച്ചു പിറകിലേക്ക് തിരിച്ചു കൊണ്ടു ചോദിച്ചു.

"ആഹ്, കൈ വിടടീ..." ഇതും പറഞ്ഞു അവൾ കൈ വിടുവിച്ചു. " ഒന്ന് രണ്ട് തവണ വിളിച്ചിട്ടും നീ ചിന്താവിഷ്ടയായ ശ്യാമളയെ പോലെ ഇരിക്കുന്നത് കണ്ടപ്പോളാണ് എനിക്ക് ആയുധം പ്രയോഗിക്കേണ്ടി വന്നത്..." അവൾ സ്വന്തം കൈ തടവിക്കൊണ്ട് എന്നെ നോക്കി.

ഞാൻ അവളെ ദേഷ്യത്തോടെ  ഒരു നോട്ടം നോക്കി മുന്നോട്ട് നടന്നു.

" അതേ മാഡം, എന്തായിരുന്നു അവിടെ ഇരുന്നു കാര്യമായി ചിന്തിച്ചു കൊണ്ടിരുന്നത്?" അവൾ എന്റെ കൂടെയായി വന്നു.

" nothing, ചുമ്മാ കുറേ ആവശ്യമില്ലാത്ത കുറേ കാര്യങ്ങൾ..." ഞാൻ മുന്നോട്ട് നോക്കി തന്നെ പറഞ്ഞു.

"നിന്റെ മുഖം കണ്ടപ്പോൾ ആവശ്യമില്ലാത്ത കാര്യങ്ങൾ ചിന്തിക്കുന്നത് പോലെയല്ലാലോ തോന്നിയത്?"

" അത് നിനക്ക് വെറുതെ തോന്നിയതാവും..." ഞാൻ ഒഴുക്കൻ മട്ടിൽ മറുപടി പറഞ്ഞു.

" സത്യം പറഞ്ഞോ എന്താടി നീ ചിന്തിച്ചത്?" പെട്ടന്ന് അവൾ എന്നെ പിടിച്ചു അവളുടെ നേരെ നിർത്തി.

" ഒന്നും ചിന്തിച്ചില്ല, അതെങ്ങനെയാ ചിന്തിക്കാൻ തുടങ്ങുന്നതിന് മുമ്പേ നീ പേന വെച്ചു എറിഞ്ഞില്ല!?" ഞാൻ ദേഷ്യം നടിച്ചു അവളെ നോക്കി.

" ആണോ എങ്കിൽ നന്നായി പോയി..." അവൾ എന്നെ നോക്കി പുച്ഛിച്ചു.

ഞാൻ അവളുടെ പിടുത്തം വിടുവിച്ചു മുന്നോട്ട് നടന്നു.

" അതേ മാഡം അവിടെ ഒന്ന് നിന്നേ," അവൾ വീണ്ടും എന്റെ പിറകിൽ വന്നു.

ഞാൻ അവളെ കാര്യമാക്കാതെ മുന്നോട്ട് തന്നെ നടന്നു.

" സത്യം പറ നീ നിന്റെ കല്യാണത്തിനെ കുറിച്ചല്ലേ ചിന്തിച്ചത്?"

അവളുടെ ആ ചോദ്യം കേട്ടതും ഞാൻ നടത്തം നിർത്തി, അതെങ്ങനെ ഇവൾക്ക് മനസ്സിലായി! ഞാൻ തിരിഞ്ഞു അവളെ നോക്കി.

" അതെങ്ങനെ നിനക്ക് മനസ്സിലായി?"

അവളുടെ ചുണ്ടിൽ ഒരു പുച്ഛം നിറഞ്ഞ ചിരി വിടർന്നു. " അത് കണ്ടുപിടിക്കാൻ വലിയ ഷേർലോക്ക് ഹോംസ്‌ ആവണം എന്നൊന്നും ഇല്ല മോളെ... നിന്റെ താല്പര്യമില്ലായ്മ കണ്ടപ്പോഴേ ഊഹിച്ചു, എന്ത് പറ്റി ജെസിയാന്റി വല്ല ആലോചനയും കൊണ്ട് വന്നോ?"

" ഒരു ആലോചന വന്നതായിരുന്നു പക്ഷേ മമ്മി തന്നെ അവരോട് താല്പര്യമില്ല എന്നു പറഞ്ഞു..." ഞങ്ങൾ രണ്ടുപേരും മുന്നോട്ട് നടന്നു.

" ആഹാ... താല്പര്യമില്ല എന്ന് ആന്റി തന്നെ പറഞ്ഞില്ലേ? പിന്നെ എന്താ പ്രശ്‌നം?" അവൾ എന്നെ നോക്കി.

" അവിടെയാണ് മോളെ വലിയ പ്രശ്നം, മമ്മി ആ ആലോചന വേണ്ട എന്ന് ഒന്നും ചിന്തിക്കാതെ പറഞ്ഞു എന്ന് കേട്ടപ്പോൾ ഞാൻ സന്തോഷിച്ചു, മമ്മി എന്റെ കല്യാണക്കാര്യം വിട്ടു എന്നു കരുതി, പക്ഷേ ജെസ്സിക്കുട്ടിയുടെ അടുത്ത ഡയലോഗോടെ ആ സന്തോഷമൊക്കെ എവിടെക്കൊയോ ഒലിച്ചുപ്പോയി..."

" എന്താ ആന്റി പറഞ്ഞത്?"

" ഞാൻ നിന്നോട് പറഞ്ഞിട്ടില്ലേ അന്ന് ഇന്റർവ്യൂന് സെലക്ഷൻ കിട്ടിയപ്പോൾ മമ്മിയുമായി വഴക്ക് ഉണ്ടാക്കിയിരുന്നു എന്ന്, അന്ന് എന്റെ മണ്ടത്തരത്തിൽ ഞാൻ മമ്മിയോട് അറിയാതെ പറഞ്ഞിരുന്നു ജോലി കിട്ടി ഒരു വർഷം കഴിഞ്ഞാൽ മമ്മി എനിക്ക് വേണ്ടി ചെക്കനെ കണ്ടു പിടിച്ചോ എന്ന്..." ഞാൻ സങ്കടത്തോടെ പറഞ്ഞു.

" അടിപൊളി..." ആഷി പൊട്ടിച്ചിരിച്ചു.

" ഒരു വർഷമാകാൻ ഇനിയും രണ്ട് മാസം കിടക്കുന്നില്ലേ എന്നു ഇന്നലെ പറഞ്ഞപ്പോഴാണ് ഞാൻ അങ്ങനെ ഒരു കാര്യം മമ്മിയോട് പറഞ്ഞിരുന്നു എന്നു ഓർക്കുന്നത് പോലും..."

" ഹഹഹ, ആന്റി ആള് കൊള്ളാം മൊത്തം പ്ലാനിങ്ങിൽ ആണ് കാര്യങ്ങൾ കൊണ്ട് പോകുന്നത്."

" മിക്കവാറും രണ്ട് മാസം കഴിഞ്ഞാൽ ജെസ്സിക്കുട്ടി ഏതെങ്കിലും കോന്തനെ കൊണ്ട് എന്നെ കെട്ടിക്കും..." ഞാൻ സങ്കടത്തോടെ പറഞ്ഞു.

" chill yaar, ഇനിയും രണ്ട് മാസം കിടക്കുകയല്ലേ ഇതൊക്കെ അപ്പോൾ നോക്കിയാൽ പോരെ, നീ വാ നമുക്ക് ഒരു ജ്യൂസ് കുടിച്ച് ഈ ടെൻഷൻ ഒക്കെ ഒന്ന് കളയാം..." ആഷി എന്നെയും പിടിച്ചു വലിച്ചു ലിഫ്റ്റിന് നേർക്ക് നടന്നു.

°°°°°°°°°°°°°°°°°°°°°°°°°°°°°°°°°°°

വൈകുന്നേരം,

സ്കൂട്ടി പാർക്ക് ചെയ്യുമ്പോഴാണ് വിക്കി മുന്നിൽ നിന്ന് എന്നെ നോക്കി ഇളിച്ചു നിൽക്കുന്നത് കണ്ടത്.

" നീ ഇതെവിടെ പോകുന്നതാ?" ഞാൻ സംശയത്തോടെ അവനെ നോക്കി.

" എവിടെ പോകാൻ ഞാൻ ദീദിയെ കാത്തുനിൽക്കുകയായിരിന്നു."

" എന്നെയോ?" ഞാൻ ബാഗ് എടുത്തു വീടിനുള്ളിലേക്ക് നടക്കുന്നതിനിടയിൽ അവനെ നോക്കി.

" യെസ്, ദീദി ഇന്ന് വരാൻ ലേറ്റ് ആയോ?" അവനും എന്റെ കൂടെയായി വന്നു.

" ഇല്ലാലോ, എപ്പോഴും വരാറുള്ള ടൈം തന്നെയാണല്ലോ..." ഞാൻ ഗൗരവത്തോടെ പറഞ്ഞു.

" ആണോ എന്നാൽ എനിക്ക് തോന്നിയതാവും..." അവൻ സൈക്കളിൽ നിന്നും വീണ ചിരി ചിരിച്ചു.

മമ്... ചെറുക്കന് എന്നെ കൊണ്ട് എന്തോ ആവശ്യമുണ്ട് അതാണ് ഈ സോപ്പിടൽ, വരട്ടെ ആവശ്യം എന്താണെന്ന് അവൻ തന്നെ പറയട്ട്... ഞാൻ ചിരിയോടെ മുകളിലേക്ക് കയറി.

ഫ്രഷായി താഴേക്ക് വരുമ്പോൾ വിക്കി എന്തോ ചിന്തിച്ചു കൊണ്ടു താഴെ സ്റ്റെപ്പിനടുത്തായി നിൽക്കുന്നത് കണ്ടു, എങ്ങനെ കാര്യം പറയാം എന്ന് ചിന്തിക്കുന്നതാവും, ഞാൻ അവനെ മൈന്റ് ചെയ്യാതെ കിച്ചണിലേക്ക് നടക്കാനായി തുനിഞ്ഞു.

" ദീദി..." പക്ഷേ അവൻ എന്നെ തടഞ്ഞു.

ഞാൻ എന്താ എന്ന ഭാവത്തിൽ അവനെ നോക്കി.

" കോഫി ഉണ്ടാക്കാനാണോ കിച്ചണിലേക്ക് പോകുന്നത്? ദീദിക്ക് വേണ്ടി ഞാനുണ്ടാക്കിയിട്ടുണ്ട് നല്ല വിക്കി സ്‌പെഷ്യൽ കോഫി..." ഇതും പറഞ്ഞു അവൻ കിച്ചണിലേക്ക് ഓടിപ്പോയി കോഫി നിറച്ച ഒരു കപ്പുമായി തിരിച്ചു വന്നു എനിക്ക് നേർക്ക് നീട്ടി.

മുഖത്ത് അത്യാവശ്യം ഗൗരവം വരുത്തിച്ചുക്കൊണ്ട് ഞാൻ ആ കോഫി കപ്പ് അവന്റെ കയ്യിൽ നിന്നും വാങ്ങിച്ചു. സംഗതി സോപ്പിടൽ ആണ് ഉദ്ദേശമെങ്കിലും അവൻ ഉണ്ടാക്കുന്ന കോഫിക്ക് ഒരു പ്രതേക ടേസ്റ്റാണ്, എന്നെക്കാളും എത്രയോ നന്നായി കോഫിയുണ്ടാക്കും, ഞാൻ കോഫിക്കപ്പ്‌ ചുണ്ടിനോടടുപ്പിച്ചു.

" മമ്മി വന്നില്ലേ?" ഞാൻ സോഫയിൽ ഇരുന്നുകൊണ്ട് അവനോടായി ചോദിച്ചു.

" ഇല്ല, മമ്മിയും പപ്പയും സുമയാന്റിയുടെ വീട്ടിൽ പോകും എന്ന് പറഞ്ഞിരുന്നു..."

"മമ്..." ഞാൻ ഒന്ന് പതുക്കെ മൂളി.

" ആഹ്, ഞാൻ പറയാൻ വിട്ടു പോയി..." ഇതും പറഞ്ഞു അവൻ എന്റെയടുത്തായി വന്നിരുന്നു. " ദീദിയോട് മമ്മി കുറച്ചു ഡ്രസ്സ് അയൺ ചെയ്തു വെക്കാൻ പറഞ്ഞിട്ടുണ്ട്..."

മറുപടിയെന്ന മട്ടിൽ ഞാൻ പതുക്കെ തലയനക്കി.

" പക്ഷേ ദീദി ചെയ്യേണ്ട ആവശ്യമില്ല, ഞാനത് already ചെയ്തു കഴിഞ്ഞു."

ഞാൻ തലച്ചെരിച്ചു അവനെ നോക്കി. എന്നെകൊണ്ട് സമ്മതിപ്പിക്കേണ്ട കാര്യം എന്തോ വലുതാണ് അതാണ് ഇങ്ങനെ സ്നേഹിക്കുന്നത്, ഇല്ലെങ്കിൽ ഒരു കോഫിയോടെ തന്നെ അവസാനിക്കേണ്ടതാണ്...

" എന്താടാ നീ സ്കൂളിൽ ഒപ്പിച്ചു വെച്ചത്?" ഞാൻ അവന്റെ മുഖത്തേക്ക് നോക്കി ഗൗരവത്തോടെ ചോദിച്ചു.

" എന്ത് ഒപ്പിക്കാൻ?" അവൻ കാര്യം മനസ്സിലാവാതെ എന്നെ നോക്കി.

" എന്നെക്കൊണ്ട് എന്തോ കാര്യം സാധിപ്പിച്ചെടുക്കാൻ വേണ്ടി മോൻ കുറേ നേരായി എന്നെ സ്നേഹിക്കുന്നില്ലേ? ആ കാര്യം എന്താണെന്ന്?" ഞാൻ വിജയഭാവത്തിൽ അവനെ നോക്കി ചിരിച്ചു.

" ദേ ദീദി എന്റെ സ്നേഹത്തെ ഇങ്ങനെ സംശയിക്കരുത്! അന്ന് സ്കൂളിൽ പ്രിൻസിപ്പൾ ഗാർഡിയനെ കൂട്ടി വരാൻ പറഞ്ഞപ്പോൾ മമ്മിയറിയാതെ ദീദിയെ സോപ്പിട്ട് കൂട്ടിപ്പോയത് ഒക്കെ ശരിയാണ്, പക്ഷേ എന്ന് കരുതി അത് പോലെ എന്നും എന്റെ നിഷ്കളങ്കമായ സ്നേഹത്തെ അഭിനയമായി കാണരുത്..." അവൻ സങ്കടം അഭിനയിച്ചു കൊണ്ടു എന്നെ നോക്കി പറഞ്ഞു.

" മോനേ വിക്കീ, നീ ജനിച്ചത് മുതൽ കാണാൻ തുടങ്ങിയതല്ലേ ഞാൻ... നീ എങ്ങോട്ട് തിരിഞ്ഞാലും അത് എന്തിന് വേണ്ടിയാണെന്ന് എനിക്ക് മനസ്സിലാവും അത് കൊണ്ട് ഓവറാക്കാതെ മോൻ കാര്യം പറയ്..."

" ഹിഹിഹി, ദീദിക്ക് ഇത്രയും ഉറപ്പുള്ള സ്ഥിതിക്ക് ഞാൻ കാര്യം പറയാം, നമുക്ക് ഒരു സിനിമയ്‌ക്ക് പോയാലോ?" അവൻ എന്നെ നോക്കി ഇളിച്ചു കൊണ്ടു ചോദിച്ചു.

" സിനിമയ്ക്കോ?"

" മമ്...നല്ലൊരു സിനിമയുണ്ട്, ഹിറ്റ് ആണ്, എന്റെ ഫ്രണ്ട്‌സ് എല്ലാവരും കണ്ടിട്ട് അടിപൊളിയാണെന്നാണ് പറയുന്നത്," അവൻ ആവേശത്തോടെ പറഞ്ഞു.

ഒരു സിനിമയ്ക്ക് പോകാനാണെങ്കിൽ ഇവൻ ഇത്ര സ്നേഹം കാണിക്കാൻ ചാൻസ് ഇല്ലാലോ! ഇത് കാരണം വേറെ എന്തോ ആണ്...

"ഏത് സിനിമ?" ഞാൻ സംശയത്തോടെ അവനെ നോക്കി.

" അത്...അത് ദീദിക്ക് അറിയാൻ ചാൻസ് ഇല്ല..." അവൻ പരുങ്ങി കളിച്ചു.

" ഹിറ്റ് സിനിമ എന്നല്ലേ പറഞ്ഞത്?"

എന്തോ ചുറ്റിക്കളിയുണ്ടല്ലോ...

" ഓക്കെ പറഞ്ഞു ഓവർ ആകുന്നില്ല, ഒരു ഹൊറർ മൂവിയാണ് ദീദി..."

" ഹൊറർ മൂവി, അതും എന്റെ കൂടെ... ഒന്ന് പോടാ..." ഇതും പറഞ്ഞു ഞാൻ സോഫയിൽ നിന്നും എഴുന്നേൽക്കാൻ നോക്കി.

" ദീദി പ്ലീസ്..." അവൻ എന്നെ പിടിച്ചു വെച്ചു.

" നടക്കില്ല മോനേ... നിനക്കറിയില്ലേ ഈ പണിക്ക് എന്നെ ഒരിക്കലും കിട്ടില്ല എന്നത്!!"

" എനിക്കറിയാം, ദീദിക്ക് ഹൊറർ മൂവി കാണാൻ പേടിയാണെന്ന്..."

" പേടിയോ! ആർക്കാ പേടി, എനിക്കിഷ്ടമല്ല അത് കൊണ്ടാണ് കാണാതത് "

" ഓക്കെ ദീദിക്ക് ഇഷ്ടമല്ല, പക്ഷേ ഇന്ന് എന്റെ കൂടെ ഒന്ന് വന്നോടെ? പ്ലീസ്... ദീദി ടിക്കറ്റ് പോലും എടുക്കേണ്ട..." അവൻ അപേക്ഷിക്കുന്ന മട്ടിൽ എന്നെ നോക്കി.

" ടിക്കറ്റ് എവിടുന്ന് കിട്ടി നിനക്ക്?"

" അത്...എന്റെ ഒരു ഫ്രണ്ട് ബുക്ക് ചെയ്തിരുന്നു... ദീദി വരാം എന്ന് സമ്മതിക്ക്, പ്ലീസ്..."

"മമ്... വരാം..." വേറെ വഴിയില്ലാതെ അവസാനം ഞാൻ സമ്മതിച്ചു.

" താങ്ക്സ് ദീദി..." അവൻ സന്തോഷത്തോടെ എന്നെ കെട്ടിപ്പിടിച്ചു.

പണ്ട് ഒരു ഹൊറർ മൂവി കണ്ടിട്ട് സ്വപ്നം കണ്ട് രണ്ട് ദിവസം പനി പിടിച്ചു കിടന്ന അന്ന് തൊട്ട് തൊട്ട് തുടങ്ങിയതാണ് ഹൊറർ മൂവി കാണാൻ ഉള്ള പേടി, ഇതിപ്പോൾ എന്തോ ആവോ എന്തോ...

°°°°°°°°°°°°°°°°°°°°°°°°°°°°°°°°°°°°°°°

" നീ ഇതാരെയാണ് നോക്കുന്നത് വിക്കീ??" തിയേറ്ററിൽ കയറിയപ്പോൾ തൊട്ട് ചുറ്റോടും നോക്കുന്നത് കണ്ട വിക്കിയെ നോക്കി ഞാൻ ചോദിച്ചു.

" ഹേയ്, ആരുമില്ല...ഞാൻ വെറുതെ, അറിയുന്ന ആരെങ്കിലും ഉണ്ടോ എന്ന് നോക്കുകയാ..."അവൻ എന്നെ നോക്കി ചിരിക്കാൻ ശ്രമിച്ചു.

എന്തോ ഉണ്ടല്ലോ...

" പോപ്‌കോൺ വാങ്ങിച്ചോ?" അവൻ എന്നോടായി ചോദിച്ചു.

ഞാൻ കയ്യിലിരിക്കുന്ന പോപ്‌കോൺ അവന് നേർക്ക് നീട്ടി.

" എന്നാൽ വാ, നമുക്ക് അകത്തേക്ക് കയറാം..." അവൻ അതും വാങ്ങിച്ചു കൊണ്ട് തിരിഞ്ഞു നടന്നു.

അവന്റെ കൂടെ പോകുകയെല്ലാതെ വേറെ വഴിയില്ലാത്തതിനാൽ ഞാനും അവന്റെ പിറകിലായി നടന്നു.

" നീ കുറേ നേരമായല്ലോ നോക്കാൻ തുടങ്ങിയിട്ട്? വേറെ ആരെങ്കിലും വരും എന്ന് വല്ലതും പറഞ്ഞിരുന്നോ?" സീറ്റിൽ ഇരുന്നിട്ടും അങ്ങോട്ടും ഇങ്ങോട്ടും തിരിഞ്ഞു കളിച്ചുക്കൊണ്ടിരിക്കുന്ന വിക്കിയെ നോക്കി ഞാൻ ചോദിച്ചു.

" ഞാൻ പരിചയമുള്ള ആരെയെങ്കിലും കാണുമോ എന്ന് നോക്കിയതാണ് ദീദി..." അവൻ എന്നെ നോക്കി ഇളിച്ചു.

" പിന്നെ ഇനി പരിചയക്കാരുടെ കുറവ് മാത്രമേ ഉള്ളൂ..." ഞാൻ ഇതും പറഞ്ഞു പോപ്‌കോൺ അവന്റെ കയ്യിൽ വെച്ചു കൊടുത്തു.

എന്നിട്ട് എന്റെ ബാഗ് തുറന്ന് ഫോണും ഇയർഫോണും പുറത്തേക്കെടുത്തു.

" ദീദി ഇത് എന്ത് ചെയ്യാൻ പോകുകയാ? മൂവി ഇപ്പോൾ തുടങ്ങും,"

" മൂവിയൊക്കെ നീ ഒറ്റയ്ക്ക് കണ്ടാൽ മതി, ഞാൻ പാട്ടും കേട്ട് ഇവിടെ ഇരുന്നോളാം..." ഞാൻ അവനെ നോക്കി ഇളിച്ചു കൊണ്ടു ഇയർഫോൺ ചെവിയിൽ തിരുകികയറ്റി.

" വയസ്സ് പത്തിരുപത് കഴിഞ്ഞു എന്നിട്ട് ഇപ്പോഴും ഹൊറർ മൂവി കാണാൻ പേടി, വേറെ ആരും അറിയേണ്ട കേട്ടോ..." അവനെന്നെ കളിയാക്കി.

" നീ പോടാ..." ഞാൻ അവനെ പുച്ഛിച്ചു.

തിയേറ്ററിലെ ലൈറ്റ് ഓഫായി, മൂവി തുടങ്ങാൻ പോകുകയാണ്, അപ്പോൾ എന്റെ പണി തുടങ്ങാം... ഞാൻ മൊബൈൽ കയ്യിലെടുത്തു മാക്സിമം ശബ്ദത്തിൽ മ്യൂസിക്ക് ഓൺ ചെയ്തു കണ്ണുമടച്ചു സീറ്റിൽ ചാരി ഇരുന്നു.

°°°°°°°°°°°°°°°°°°°°°°°°°°°°°°°°°°°°°°°°

കയ്യിൽ ആരോ തട്ടുന്നത് പോലെ തോന്നി, കൂടെ തന്നെ വിക്കി എന്നെ വിളിക്കുന്ന ശബ്ദവും, ഞാൻ കണ്ണ് തുറന്നു അവനെ നോക്കി. ഇതിനിടയിൽ ഞാൻ എപ്പോൾ ഉറങ്ങി!!! പാട്ടും കേട്ട് കണ്ണടച്ചു ഇരുന്നത് മാത്രം ഓർമയിലുണ്ട്!

" എഴുന്നേൽക്ക്, മൂവിയൊക്കെ കഴിഞ്ഞു." അവൻ എന്നെ നോക്കി.

"കഴിഞ്ഞോ?"ഞാൻ അവനെ നോക്കി ഇളിച്ചു കൊണ്ട് ചെവിയിൽ വെച്ചിരുന്ന ഇയർഫോണിനായി പരതി.

" ദീദി നല്ല ഉറക്കിലായപ്പോൾ ഞാനത് ഓഫ് ചെയ്തു ദീദിയുടെ ബാഗിൽ വെച്ചിട്ടുണ്ട്," എനിക്കുള്ള ഉത്തരം എന്ന മട്ടിൽ അവൻ പറഞ്ഞു. " ഒരു ഹൊറർ മൂവിക്ക് വന്നിട്ട് തിയേറ്ററിൽ വെച്ചു ഉറങ്ങിയ ആദ്യത്തെ ആൾ ദീദിയായിരിക്കും..." അവൻ എന്നെ കളിയാക്കി.

ഞാൻ അവനെ പുച്ഛിച്ചു കൊണ്ടു അവിടെ നിന്നും എഴുന്നേറ്റു. ബാഗ് എടുക്കാനായി പിറകിലേക്ക് തിരിഞ്ഞപ്പോഴാണ് എന്റെ അടുത്തുള്ള സീറ്റിൽ ഒരാൾ തലയും താഴ്ത്തി ഫോണിൽ നോക്കിയിരുന്നത് കണ്ടത്.

കണ്ടിട്ട് പരിചയമുള്ള ആരെയോ പോലെയുണ്ട്, ആ ഇരുത്തവും തല പൂഴ്ത്തിയുള്ള ഫോണിലേക്കുള്ള നോട്ടവും ഒക്കെ കാണുമ്പോൾ ഹിറ്റ്‌ലറെ പോലെയുണ്ട്, ഇനി ഹിറ്റ്ലറായിരിക്കുമോ ഇത്? ഏയ്, ഹിറ്റ്ലർ എങ്ങനെ ഇവിടെയെത്താനാണ്?! അയാൾ ഒന്ന് തല ഉയർത്തിയെങ്കിൽ മുഖം കാണാമായിരുന്നു. പെട്ടന്ന് എന്റെ മനസ്സ്

വായിച്ചെടുത്തത് എന്ന പോലെ അയാൾ തലപൊക്കി എന്നെ നോക്കി.

"അയ്യോ ഹിറ്റ്ലർ..." അയാളുടെ മുഖം കണ്ടതും ഞാനറിയാതെ നിലവിളിച്ചു.

ഇയാളെങ്ങനെ ഇവിടെ! ഇനി ഇത് സ്വപ്നമായിരിക്കുമോ! ഞാൻ എന്റെ കയ്യിൽ തന്നെ പതുക്കെ ഒന്ന് നുള്ളി നോക്കി. വേദനിക്കുന്നുണ്ട് അപ്പോൾ സ്വപനമല്ല, ഹിറ്റ്ലർ ശരിക്കും എന്റെ മുന്നിലായി ഇരിക്കുന്നുണ്ട്, ഞാൻ അയാളുടെ മുഖത്തേക്ക് തുറിച്ചു നോക്കി, എനിക്കുണ്ടായ ഞെട്ടലൊന്നും പക്ഷേ ആളുടെ മുഖത്തില്ല! സാധാരണ മട്ടിൽ എന്നെ തുറിച്ചു നോക്കുന്നുണ്ട്...

☺️°°°°°°°°°°°°°°°°°°°°°°°°°°°°°°°°°☺️

വോട്ടിന്റെയും കമന്റിന്റെയും കാര്യം പ്രത്യേകം എടുത്തു പറയേണ്ടത്തില്ലാലോ അല്ലേ😉....