#لا_ياصديقي

#المحطة_22___23

#بقلمي_سارة_المجيد

مساء السعادة ع متابعيني الاعزاء

🍒🍒🍒🍒🍒🍒🍒🍒🍒🍒🍒🍒

علاء ..وجان اشتم ريحة الغاز ..اتخبلت هاي تسويها متخاف من الله تالي تراجعت وطبيت للغرفة وسكتت
بقيت اندب حظي اشكد اهلي نصحوني شكد شاهين نصحني بس للاسف ماطاوعتهم ولا سمعت كلامهم ...

مشيت وره گلبي الطايح الحظ وبالتالي هاي النتيجة شرفي اتمرغل بالطين وسمعتي صارت بالوحل وراسي اتوطه بين الناس ...

غرور ..جنت مكرفصه نفسي وحاظنه بنتي وجسمي كلو يرجف من الخوف سديت الغاز وبقيت كاعدة اتسنطت شفت علاء سكت مالو صوت كعدت بالمطبخ مافتحت الباب ....
كلت خلي يهدأ وبعدين افتح الباب

#في_سجن_بوكا

شاهين ..بعد مرور 4 سنوات مثل معرفتوا بالقصة السابقه انو تم الافراج عن بعض المعتقلين الي مالكوا عدهم شي ومن ضمنهن اني ...

والله طلعت ورحت لتكريت وصلت الحمدلله ..
واهلي ماصدكوا عينهم من شافوني كلهم انصدموا بشوفتي ..
ماريد اعيد الاحداث لان اغلبكم تعرفوها شصار بذاك اليوم ..

والحمدلله هسه اني اتحررت من هل سجن والظلم الي اتعرضتلو ورجعت لديرتي ولاهلي وناسي

في مكان اخر ..

علاء ..بعد مرور اسبوع ع الحادثة كمت اني اطلع اجيب المسواك واقفل الباب ورايه
مجنت اكدر اطلكها لان تعرفون المؤخر الي كاتبي عليه يكسم الظهر بقيتها حالها حال اي كرسي او غرض بالبيت ...

والله وجان اسمع شاهين طالع من السجن مصدكت اوووويلي شاهين حبيبي واخوية وصديق عمري وطفولتي راح اشوفو مرة ثانية

ولكم ضمد جروحي هذا ..رغم مصيبتي وفاجعتي الواكع بيها حسيت بفرحة بداخلي وراحة نفسية وأمان رجعلي ...حسيت سندي رجع والله لو اكولكم الفرحة الحسيت بيها محاسها بعمري كلو ...

بذاك اليوم الي سمعت بي شاهين طالع من السجن حسيت ملكت الدنيا حسيت رجعلي حزام ظهري ومثل الي جنت غركان ببحر اظلم ولكيت شاطئ الامان ومثل الي تايه بصحراء ولكه ديرتو

طلعت من الشقة وقفلت الباب وراية وركضت لبيت عمي جاسم شفت الاهل كلهم متجمعين هناك

طبيت اول مدخلت للصالة صار شاهين بوجهي حسيت كلبي انتفض من مكانو مكدرت اتحرك عيوني غوركن هوه دار وجهو وجان يشوفني انتفض من مكانو وصاح علاااااااء وجان يركض عليه وحظني

واني طكيت بجي وحضنتو وكمت اشهك مثل النسوان ماتحملت الموقف مجنت امصدك ارجع اشوفو مرة ثانية ...ولك خيي ضمني ولمني لحظنك اتطشرت عكب عيناك 😭😭

شاهين ..شبيك يولو تراني جدامك عايش مامتت ول لتبجي كافي ههههههههه

علاء ..خيي فراكك جان مصيبة الي والله ممصدك عيوني اشوفك مرة ثانية اول ماسمعت من جماعتنه جيتك ركض

شاهين ..ههههه بعد اخوك دتعال سلم ع الجماعة واكعد سولفلي شصار مصار وياك هل 4 سنوات اريدك تحجيلي كوولشي ولتضم عليه حرف ..

علاء ..ماشي خيي ...والله طبيت سلمت ع عمي جاسم وعمي ابراهيم وع اخوة شاهين وخوالو ..وعمامو وع جليل جانوا كلهم ملتمين بعزومة ع سلامة رجوع شاهين من المعتقل ..

تغدينه والناس فرحانه .. واني
ادفع اللكمه بحلكي بلكوة .. احس الناس كلها دحج عليه بنظره احتقار وهو اصلا محد يدحج عليه لكن اني اتهيء هل شي ..

كمت اتصور اشك حتى بنفسي .. وضعيتي متخربطة .. فض الغدة والناس وكعدوا الناس يسولفون .. واني كاعد واسمع بس .. مسافة بيني وبين شاهين جاعد ويا ولد عمامو ..

وجان اسمع خال شاهين جاعد يسولفلهم عن هذا الفصل الي حاضرينو بغير عشيرة .. وشلون قصة الفصل رايحين همه حكام بي ..

الفصل بين زوجين زلمه ومرتو والمراة استغفرالله مادري اشايف عليها رجلها وضاربها رجلها وجاتلها ..

ف من ضمن الكلام كال ان الرجال متخبل وجاعد .. يحجي على مرتو ويكول اني اشك حتى الولد مو ابني .. اني من حجه هيج الحياة وكفت عندي انضربت براسي ..

كلت معقوله مريم هم مو بنتي .. اي ليش مو معقولة .. غرور الله يعلم من شوكت تروح على خالد ..

ارجع اكول لا ممعقول هيه جانت ما تطلع من البيت .. راسي احسو راح يطك من كثر التفكير راح ينفجر والله ..

كمت اريد امشي ترخصت منهم ..

شاهين .. ها وين ..

علاء ..والله هم يالله امشي اني ..

شاهين ..خوش انطي رقم تلفونك لواحد من الولد حتى نتخابر .. و اشوفك بلليل اريد اسولف وياك ..

علاء ..رقمي يم الولد يعرفوا ..

شاهين ..هاي هيه عجل تمام..

علاء ..وطلعت رحت لشقتي ..

شاهين .. طلع علاء وفضت العزيمه .. وكل من راح على بيتو .. وكعدت اسولف ويا اهلي وهيج ... وجان ابويا يكولي ما كتلك مو علاء رفيجك تزوج خطية وهسه عندو بنية ..

شاهين ..اني سكتت .. كتلو منين اخذ علاء ..

جاسم ..ناس غربة من المنطقة .. وصارت شكثر مشاكل هوه واهلو واخذها بلكوة ..

شاهين ..اني افتهمت كلشي بس سكتت .. وكلت بيني وبين نفسي .. ادفن الحجي السمعتو بصدري وانسى .. بعد ما ترهم الزلمه تزوجها بعد .. الله يستر عليهم ..

عليش اهدم حياتهم .. عسى الله يكون هداها ..مراح احجي شي اخلي هل سر مدفون بصدري الله يهني لصديقي ويستر عليهم ..

علاء .. رجعت للبيت راسي يريد يطك من الوجع وجسمي كلو يرجف .. وهملت دواية ونفسي ..

فتحت الباب وفتت .. هيه غرور من افوت على البيت هيه تركض للغرفة وتقفلها على نفسها ..

جيت وكفت وره الباب .. كتلها غرور .. اريد اسئلج سؤال .. ولو ادري جذابة .. بس لازم اسئلو الج .. هيه ساكته بس ادري بيها تسمعني .. كتلها  مريم بنتي يا غرور لو لا ..

هيه انهارت بلبجي .. وفتحت الباب تملخ بهدومها ونفسها ..

غرور ..والله العظيم بنتك .. وما خنتك اني لوما تعب حالنه وعيشتنه وكعت .. وركضت على القران جبتو و كعدت جوه رجليه .. وكلت وحق هذا القران بنتك ..

علاء ..اخذت منها القران كتلها لا تلمسين كتاب الله انتي وحدة نكسة مو نظيفه ..ودفرتها برجلي شمرتها بالكاع جانت تبجي بحركه وبقهر ..الموقف مانكر جدا هزني .. بين مصدكها بين مكذبها .. رجعت خطوتين ليورة .. بطني مغصتني حيييل وافترت الدنيا بيه ..

واذا اني امدد بلكاع وما ادري بكلشي .. صحيت لكيت نفسي بلمستشفى .. وغرور كاعدة بسدي ولازمه ايدي .. جريت ايدي منها بسرعة ..

لكيت امي هم واكفة .. غرور طلعت ما حجت شي .. كتلها امي شصار ..

ام علاء ..والله يا وليدي .. ما ادري دكت غرور مرتك كالت علاء تخربط .. وشلتو وركضت بي على مستشفى الحكوني .. خطية شايلتك على جتفها وجابتك على المستشفى .. كولي شبيك يا وليدي شصاير بحالك ليش هيج انت ..

علاء ..اني ضليت ساكت .. شنو اريد اكوللها .. بلعت السالفة وسكتت .. ما طولت ساعتين وطلعت من المستشفى ع شقة .. غرور ساندتني .. وتمشي ويايه ..

مددت على السرير .. وراحت سوت شوربه وجابت علاجي وكعدت يمي .. اني داير وجهي عنها .. كامت توكلني بأيدها وتنطيني العلاج ..

ادحج بعيونها تبتسم .. اني اندار عنها .. بلليل .. دك عليه اخو شاهين .. عرفت هذا شاهين .. جاوبتو .. كالي ها يول وينك .. كتلو بلشقة ..

شاهين ..شعندك عاصي بلشقة يم المراة .. شدعوة ما تكدر تفاركها .. بضحك يحجي شاهين ..

علاء ..ضحكت كتلو ما تجوز من سوالفك انت .. بس مو هشكل والله شوية مريض ..

شاهين ..ايباه .. بس لا زودت بلثريد اليوم وصعد ضغطك ..

علاء ..اي والله يمكن .. ضحك شاهين .. كال عجل هسه راسك صاير دف من الوجع .. كتلوا اي ..

شاهين ..اي يابا خوش حجج هاي مال المتزوجين .. هوه كاعد يم المدام ويكول مريض .. ديله ما اريد ااخرك عن الحب .. خصوصا اليوم خميس 😉.. وجرها بضحكة هههههه ...

علاء ..اني ضحكت على ضحكتو .. وكتلو روح روح عزابي خلي اشوفك اذا تزوج هم اتكوم تتحجج ومنشوفك بعد وتبقه لاطش يمها 🙄

شاهين ...😂 ولك اكو احلا من الحب من تكعد يمك الحبيبة وتدحج عليها هيج هيه تضحكلك يمممه تسوه الدنيا 😍

علاء .. ههههههه عجل بعد لا تقلد علي يله روح روح باجر اشوفك اذا صرت زين ..

شاهين ..دروح روح .. شكلك اسبوع راح تظل مريض هههه .. ضحكنه وسدينه التلفون ..

علاء ..ما انكر تلفون شاهين رجعلي نص عمري .. حسيتو بعدو شاهين هوه نفسو .. نفس حجايتو نفس طبعو .. نفس ضحكتو ..

بلجي هوه الوحيد ما تغير بحياتي .. الي كلها تغيرت .. كالتلي غرور .. حبيبي هذا شاهين خطية طالع من السجن .. ما جاوبتها ..

غرور ..جاوبني حبيبي .. اني غلطانه والله والغلط راكبني من راسي لساسي .. بس والله احبك .. ومن حبي الك ولبتنه سويت هيج .. ومستعده اذبح روحي جوه رجلك بس ترضه عني ..

علاء ..اني ساكت وصاد وجهي عنها .. كامت وشوية واجت .. شايله سجينه .. وكعدت بسدي .. وجرت ايدي وخلت السجينه بايدي وحطتها على ركبتها ..

غرور ..حبيبي .. اذبحني واخلص مني .. انت ما تستاهل الي صار الك بسببي .. اذبحني بايدك .. اني احبك واعشقك ..

علاء ..تصرفها خله كلبي يلين وادحج عليها عيونها تجري دمع .. حسيت بصدق كلامها .. وحاطه الحافة مال السجين على ركبتها وضاغطة .. اني ساكت ..

غرور ..اساعدك حبيبي هسه ادفعها للسجين

علاء ..همت تريد تدفعها بركبتها اني جريتها وشمرتها بلكاع .. زتت نفسها بحظني وشبكتني حيل .. وكامت تبجي .. لفيت ايدي على راسها وطبطبت على ظهرها ..

تعدلت وكالت والله توبة اذا اطلع من شورك بعد او اسوي شي يغضب الله او يغضبك .. والله متندمه ..

وهاي ايدك ابوسها سامحني حبيبي .. وكامت تبوس بايدي .. وجان قلبي الفطير يسامحها .. حظنتها وكمنه نبجي اني وياها ..

كتلها غرور ..الى هنا الموضوع ينسد لا انتي تحجين بي ولا اني .. نعتبرو اصلا ما صاير .. وننسى فرد نوب .. لكن اريد منج شوية فتره الى ما جرحي يطيب .. لا تلحين عليه ..

غرور ..على راحتك حبيبي .. انت تأمر واني خادمتك ..

علاء ..وثاني يوم طلعت بس ما قفلت الباب .. ردت ارجع الثقى البينه من جديد .. طبعا اني اخذت تلفونها كسرتو والخط كسرتو .. كتلها غرور اني طالع .. تريدين شي ..

كالت سلامتك حبيبي .. طلعت رحت لبيت شاهين .. اكول بلكت شاهين يدبرلي شغلة شي .. هو ما يكعد الا يشتغل ..

هم لكيت الناس كاعدين يسلمون علي جايين .. سلمت .. ردت اكعد هوه صاحلي ..

شاهين ..ول يابه تعال هين هين ..

علاء ..كعدني بسدو .. هوه صح اكو زلم اكبر منو بالعمر .. بس هوه صاحب رأي بين عمامو وحكمو والو احترامو ف يكعد هوه بصدر الديوان .. كعدني بصفو ..

ادحج اني ع ناس .. استصغر روحي على الكعدة بهيج مكان اني كل عمري اكعد بلطارف .. جانوا جايين خطار علي من الموصل .. كاللهم هذا علاء .. خويي واخو دنيتي .. احسو من يعرف عني كدام الناس .. يعرف بفخر ..

والله يا شاهين لو تعرف بلي صار بحال رفيجك .. وشسوت بي الدنيا وراك .. اندار عليه وشاورني ..

شاهين ..هااا عليوي .. البارحة لبستني حتى تظل ويا الحب مو 😉..

علاء ..اني ضحكت وغلست ..

شاهين ..اي غلس غلس .. صاير وكيح وخطير يول .. طلعت مو هين يلعود مال الاسنان يغمز ..

علاء ..يقلد عليه لان ضعيف اني هههههههه .. كتلو شاهين ليش ما تجي تنام يمنه بلغرفة مو احسن ههههه ...

شاهين ..دنجب .. كاعد اتشاقة ويا وجهك المطعوج .. دحج على شكلك لحيتك هل علو وشعرك منكوش عبالك قرد ..

علاء ..اهووووو .. انت ما تبطل توصف الناس حيوانات ..

شاهين ..كلنه حيونات رب العالمين لا تنفخ اجرب وضحكت ..

علاء ..اني ضحكت على سوالفو .. وترخصت اريد اطلع كضبني من ايدي وجرني عليه شاورني ..

شاهين ..اليوم نتعلل سوه لووو عندك ضربات جزاء ترجيحية 🤔...

علاء ..طكيت ضحك ع سوالفو كتلو لا نتعلل نتعلل بس اسكت خرررب يومك .. ضحك كال خوش عجل اختفي هسه ههههه .. ورجعت ع البيت صدك كل الطريق اضحك على سوالفو ..

هذا شاهين رهيييب هل سجن 4 سنوات وهل تعذيب الي شايفو ما مغير منو شي ..

شنو انت الله منطيك هل قوة سبحان الله .. والله فلا ينلام من سماك ابو سرحان .. دواس الليل ..

جانت كنية شاهين ابو سرحان قبل من جنه زغار .. يسمونو على اسم الذيب .. لان قلبو قوي وقاسي وحقو ما يعوفو ويظل ورى للموت ..

ف لقبتو الناس هل لقب قبل لا يتزوج ويجي هيثم ابنو الله يحفظو ..

المهم رجعت للشقة اضحك ومرتاح .. ولكيت غرور طابخة الغدة الاكلة الي احبها .. ومكشخة ومعطرة ومكيجة .. والضحكة ع وجها ..

اني ارتخيت .. وكعدت .. وكعدت هيه يمي وتصبلي الاكل .. وتداريني .. كلت وينج من قبل هيج عابت وجهج .. من البداية صيري هيج حبابة .. هيه ضحكت ..

غرور ..حبيبي منا ورايح كلو من هذا الدلال .. شعندي غير ابو بنتي وحبيب قلبي ..

علاء ..ضحكت اني وكلت بقلبي .. اي شاهين شكلها ضربات جزاء صدك ههههههه .. تغدينه وفتنه للغرفة اني اتمددت جان تجي غرور تتمندل وتتموع بمشيتها وتتدلع كدامي جان تنزع الروب الي لابستو ع جسمها اني شفتها حسيت بروحي صخنت خررب كمت اتنفس سريع اجت يمي ع الجرباية وكامت اتمسد بشعر صدري ولعبت فلك بيه خلتني اشتعل بنار مو بس صخنت ..

دفعتها ع ظهرها كتلها خررب عشيرتج موتيني اله انتحر بيج اليوم هيه طكت ضحك واجيت فوكاها وهجمت عليها مثل الوحش افترستها 😂..ووووووووو وكمت رحت للحمام سبحت ونمت كعدت الوكت وره المغرب ..

يبوووو عزززة العزاني كلت هسه شاهين يفضحني ... هاي شنومني هل جثر .. طلعت غسلت وبدلت ..

غرور ..شبيك تركض شصاير ..

علاء ..يمعودة شاهين يريدنه نتعلل وراح يفضحني يولي ههههه ...

غرور ..اصبر هسه بس بدل على كيفك .. بهل اثناء دك التلفون شاهين ... جاوبتو ..

شاهين ..ردت احجي كتلو ها يلبطل .. تجي تتعلل لوووو خخخخخخخ ..

علاء ..كتلو لا لا اتعلل جاييك هههههههه ..

شاهين .. ههههه خوش عجل اني بلسوك هسه ارجع ..

علاء وهوه ويطلع من الباب مال الشقه وينطي بوسة طيارية لغرور كتلو لشاهين عجل تعال اخذني ..

شاهين ..خوش عجل اطلع ع شارع امر عليك ..

علاء ..نزلت كتلو ماشي .. طلعت واجه اخذني ورحنه نتعلل بديوانهم .. كعدنه اني وشاهين بصفحة الولد يتعللون يلعبون دومنه وصياحهم وهوستهم .. احنه تكترنه وحدنه خلصنه من الهوسة

شاهين .. اي علاء .. سولفلي .. شلون كضيت هاي 4 سنوات .. اريد تحجيلي بلتفصيل كلشي صار ولا تضم ع اخوك شي

علاء ...

((‏ربما لا أخبرك بشعوري تجاهك لكن أنا
محظوظ لأن الله اختارك لي أنت بالذات
لتكون صديقي"♥️"))

#لا_ياصديقي

#المحطة_الثالثة_عشر

#بقلمي_سارة_المجيد

علاء .. والله يا شاهين تبهذلت بهاي 4 سنوات الراحت .. انشك حلكي باختصار الدنيا ذبت غضبها عليه

شاهين .. ايباااه .. اكول ليش حلكك كبران .. ثاري مشكوك ههههه

علاء .. دبطل شقاك وخلي نحجي بجدية شوية

شاهين .. ديله احجي .. لا تزعل بس تعرفني خيي من اشوفك مقهور گلبي ماينطيني يوجعني وداعتك واحب اخفف عنك بهل شقه هههههه

علاء ..ادري والله عجل ليش اني احبك وباقي لحد هسه وياك وماتركتك لانك انسان نظيف من الداخل وقلبك ابيض وزلمه حوك وشهم وابن حمولة

شاهين ..الله يخليك الي يا اعز صديق عندي يله خيي فضفض لاخوك واحجيلو الي بگلبك

علاء ..شوف خيي .. وبديت احجيلو من بداية ما نزلت من الجزيرة وشلون صارت الخطبة وكل المشاكل الي صارت ..
 
شاهين .. اي

علاء .. اي وراها انتظرت نعرف عنك شي ما ردت اتزوج وانت ما موجود والله يا اخوية

شاهين .. اي والله شسوي كعدت بلسجن وافر بسبحتي لا ماچل ولا شارب هههه

علاء .. بس اريد اكولك على شي وما تزعل

شاهين .. احجي .. شعندك بلوة

علاء .. جيت اريد اتداين من عمي جاسم فلوس على مود اكطع مهر .. وجذبت علي كتلو شاهين واعدني بيهن

شاهين .. امممممم .. اي ادري ادري كالي ابويا .. بس ليش جذبت

علاء .. والله استحيت اكول لعمي اريد اخطب وانت ما يعرفون عنك شي شفتها فشلة

شاهين .. اي فهمتك .. كمل

علاء .. اي .. ومشت الدنيا عدل وياي .. الى ان احترك المحل مالي وراح كلشي

شاهين .. ايباااه .. محلك راح .. حرامات والله

علاء .. اي والله .. ورحت يم اهلي وصارت مشاكل همه ومرتي .. ورجعت طلعت

شاهين .. اي .. وعجل هسه شنو جاعد تشتغل

علاء .. والله جاعد لا شغل ولا عمل

شاهين .. ومنين عايش عجل

علاء .. صارت عندي غصة شكبرها .. بس خجلت احجي شكول لشاهين .. كتلو والله غرور تاخذ من اهلها وتصرف على البيت الى ما الله يفرجها ومرات اهلي هم يدزولي

شاهين .. باطل عليك علاء .. والله ما هكوتي بيك هيج .. ولك المال من يصير بيد المراة .. تكسرك .. باطل عليك .. ليش ما جيت على اهلي وكتلهم ..

علاء .. شسوي يا اخوية .. والله ما عندي جان حل .. وهذا دينك بركبتي ما ناسي والله ..

وبس الله شوية يفتحها ليه  ارجعهن الك والله .. والله هم ابو الجمله بعدو يطلبني شوية وخطية ساكت عليه ما حجه شي من عرف بمصيبتي

شاهين .. لا علاء .. تعذرني .. انت كذبت على ابويا واخذت فلوس بليه حق .. واني ما ارضه هيج ..

بعدين اني هسه طالع من السجن محتاج فلوس اريد اعيد شغلي .. درهم ما املك واريد الم ديوني

علاء .. انصدمت من حجه هشكل .. جيت اريد تدمع عيوني .. لان حجاها بنبره حاده ..

حقو شكد سنين هاي هوه سكت .. مناك 5 ملايين مال المحل ومنا 3 ملايين يا ربي منين اجيبهن الو

كتلو شاهين منين اجيبهن والله ما عندي هسه .. قسطهن عليه يا اخوية .. فدوة اروحلك

شاهين .. زين علاء ماشي اني شكثر اطلبك

علاء .. 5 ملايين مالات المحل وال 3 الي اخذتهن من عمي

شاهين .. زين اسمع راح انطيك اقتراح .. وحلكك اشكو اذا فتحت حلكك وعارضت شي افتهمت

علاء .. كلبي وكف من صيحتو .. اعرف شاهين من يعصب ما يرحم .. كتلو اسمع اسمع كول

شاهين .. شوف يول .. ال 5 ملايين مالات المحل .. اني منطيهن لمريم بنت اخوية .. هديه ميلادها .. وال3 ملايين الثانية ..
اني منطيهن لك ومرتك هدية زواجكم ..

زايدات عليك انت ومرتك ال 3 ..ذيج مريم بنت اخوية الغالية تستاهل ال 5 هدية الها .. وضحكت

علاء .. من كال هيج .. ما اعرف مشاعر الفرحة مادري الصدمه لان اني جنت متوقع يكول غير شكل .. كمت حظنتو وبستو
من راسو لان جبل شال من صدري ..

شاهين .. كام علاء يريد يبوسني من راسي .. ودفعتو وكعدتو .. كتلو يول علاء .. كل عقلك اني اخذ الفلوس منك ..

ولك شنو هنه الفلوس جدام صداقتنه وخوتنه .. ولك هاي كلها زبل دنيا .. انت الاصل بيها .. و سالفة ابو الجملة الي يطلبك .. هاي عود نشوفلها حل .. بس اريد انطيك هسه عرض

علاء .. والله يا اخوي ابوس ايدك مو بس ابوس راسك .. خيرك مغطيني ودافني .. جمايلك حاير شلون اردها الك .. والله حاير والله ..

شاهين .. هسه ليش ما تنجب وتخليني احجي هههههههه

علاء .. هسه ليش الا ترزل .. وبعدين اني هسه اب .. عيب تكولي انجب 😒

شاهين . ايبااااه كبران ابو صماخ .. لا شو تنجب وانت الممنون شتكول هسه 🤔🤔

علاء .. ضحكت .. كتلو هسه ماشي انجبيت .. احجي ههههههه

شاهين .. اي عفية ههههه هسه تمام .. اسمع .. اني عندي قطعة كاعد بمنطقة هنا بصلاح الدين .. مو بتكريت .. بس خارج تكريت .. اريد اسويها مشروع ..

وحاير .. شنو اسويها .. مره اكول ابنيها محلات وااجرها .. مره اكول اسويها معمل ثلج .. شنو رأيك🤔

علاء .. هسه تاتكول انت مفلس .. منين تريد تسوي المشروع 😂

شاهين .. دولي ..ولك ابني جيب الاسد عمرو ما يفرغ ههههههه

علاء .. والله اشوف معمل الثلج .. يجيب ذهب بلصيف الكهرباء حيل مو زينه ..

والثلج بهاي المنطقة ماكو معمل الناس تجي لتكريت طريق طويل حتى تاخذ الثلج وترجع ..
راح يصير كتل عليك

شاهين .. امممممم والله عجل هاي هيه اني هم مقتنع بلمعمل
من باجر تجهز نفسك .. انت تراجع وتكمل المعمل وتشغلة .. وانت المسؤول كدامي ..

المعمل عهدتك .. اريدو بأسرع وقت يشتغل ..زين ..وانت تدير المعمل بمكاني ماشي .. وراتبك من باجر يبدي .. تمام

علاء .. الله اكبر .. انت وين جنت عني كل هاي السنين

شاهين .. جنت طالع رحلة استجمام بشرم الشيخ ابو حلك😂 غير جنت نايم بلسجن واتصفن 😂

علاء .. الحمدلله طلعت من السجن ونقذتني والله ..

شاهين .. واريد اكلفك بشغلة ثانية ..

علاء .. كول عيوني تشلعها

شاهين .. ههههه تعيش .. بس اريد المزرعة ترتبلي البيت مالها وهيج لان متروكة وتجيب فلح يرتبون البستان وكذا .. نرجع نتعلل بيها وهم اخوك هسه مخبوص يريد يجهز لعرسو 😉

علاء ..اهاا ياعمي الف مبروك عليك وع خيتي شهلاء ههههه بس ها نتعلل بس ما نتأخر لان هسه حظر تجوال مو مثل قبل

شاهين ..الله يبارك بيك ههههه  هااااا .. نسيت انت عندك مراة هسه ولازم ترجع للبيت من المغرب .. ايباااه 😂

علاء .. لا تكوم تشمر عليه يجيك يوم وخيتي شهلاء تخنكك  😒😒

شاهين ..😂 هسه ما حجيت شي رتب المزرعة والله كريم هههه

علاء .. يله عجل اترخص خاف يصير حظر تجوال

شاهين .. خخخخخخ روح روح يلمتزوج روح

علاء .. ههههه يله في امان الله

شاهين .. ياهلا

علاء ..وطلعت واني كمت اشوف الدنيا رجعت تتفتح الي ورجعت الحياة الي من جديد .. يا رب فرجك .. يا الله

في مكان اخر ..

شهلاء ..ماما متروحين للسوك

زهور ..شكو شعندج

شهلاء ..شاهين كال تعالي لمحلنه الي بالسوك حتى تاخذين غراض مال النيشان الج محتاجه مكياج وعطورات وشامبوات وملابس داخليه وسيتات نوم قبل العرس اريد اشتريهن

شيماء ..اي ماما اني هم ستار كال تعالي اخذي من محلنه لتروحون لغير محل يغلبوكم ترا

زهور ..ماشي حبيباتي عجل العصر اخذجن ونروح ان شاءالله

شهلاء ..صار العصر بدلنه ورحنه للسوك

في مكان اخر ..

شاهين ..رحت العصر للسوك شفت عبدالرحمن بالمحل سئلتو ماجوي البنات

عبدالرحمن ..منو يابنات

شاهين ..شبيك يولي منو يعني غير شيماء وشهلاء حتى ياخذن غراض النيشان من يمك

عبدالرحمن ..اهاا لا والله ماجوي

شاهين ..اتاخروا مدري ليش بقيت منتظرهم وجان بهل لحظة اتطب سما عزززة العزاك يحظي المصخم شجابها هاي

سما ..هلوو شاهين شلونك

شاهين ..احم هلو سما الحمدلله

عبدالرحمن ..اني رايح لولد صديقي هسه اجي

شاهين ..يمعود تعال وين وليت صدك جذب راح اخوية وبقيت وحدي ويه سما اوويلي الله هسه تجي شهلاء واتصخم

سما ..طبعا متدري شكد مشتاقتلك شاهين 4 سنوات مشايفتك ردت انجن شكد سئلت وردت احد يطمني عنك بالاخير سمعت كالوا مسجون يم الامريكان ...

شكد دعيتلك الله يفرج عنك وترجع بالسلامة والحمدلله ربنه استجاب دعائي الف الحمدلله ع سلامتك

شاهين ..احم الله يسلمج ..بس ممكن تطلعين هسه لان شهلاء واهلها ع وصول راح تجي تاخذ غراض النيشان ..اترجاج ارجعي لبيتكم ..

سما ..ايبااااه هيج اتخاف منها ماهكيتك هيج عمرك ماخفت من بشر شاهين

شاهين ..اكضبي السانج سما واحترمي نفسج تعرفيني ماخاف من اكبر واحد ..بس من الي خلقني

سما ..عجل شتسمي هل رجفه هاي وانت تخاف شهلاء اتشوفني يمك وحدنه ..

شاهين ..ماخاف منها بس اخاف ع زعلها ماريدها تزعل وهل رجفه هيه حب الي مكدرتي انتي توكعيني بي ..بس شهلاء كدرت تخليني احبها واعشقها ..وهسه من غير مطرود رجاءا اطلعي من الكوزمتك

سما ..شاهين ارحم كلبي الي عشكك اريدك ترجعلي مداكدر انساك والله حموت

شاهين ..ول يابه شبيج اتخبلتي انتي هسه مراة مزوجه ع ذمة رجال حرام هيج اتسوين ..

سما ..صحيح اتزوجت بس  زوجي يمتلك جسدي وبس اما روحي وگلبي يمك انت شاهين ..

شاهين ..دحجت ع الشارع شفت شهلاء واهلها نزلوا من التكسي لا يالله لزمت سما من ايدها وكتلها اطلعي بره وارجعي لبيتكم واياني وياج اتخطين عتبة هل محل بعد افتهمتي لا اطيح حظج يله ..

طلعت وعفتها ورحت لشهلاء واهلها كتلها تعالي خلي اشتريلج موبايل من محل ابن عمي طارق
قبل لاتشترين نيشانج

شهلاء ..حبيبي خرعتني شبيك مخبوص شصاير مو عساس اخذ النيشان من محلكم

شاهين ..ها .اي اي بس اول شي خلي اخذلج موبايل هسه و وراها نروح لمحلنه ..بكلبي كتلها دمشي من خرب حظي اذا شفتي سما يم محلنه هسه اتدكين وتلطمين ..

كوه جريتها من ايدها وامها وشمياء يصيحون تعالوا اوكفوا وين رايحين

كتلهم تعالوا لذاك المحل مال موبايلات حتى انتي هم تاخذين واحد ستار وصاني

شيماء ..اهااا اي عجل يله يله 😁

شاهين ..والله طبينه لمحل طارق كل وحدة اخذتلها تلفون وشريحة وكتلو بالليل اجيبلك الفلوس ..كال ماشي ابن عمي براحتك

دحجت ع محلنه جانت سما رايحه مموجودة عاد اخذتهن وطبينه للمحل اجه عبد الرحمن كام يساعدهن ويطلعلهن الغراض الزينه حتى ياخذن منها ...وبهل لحظ طب علاء سلم

علاء ..السلام عليكم

الكل وعليكم السلام

علاء ..شلونج خالة ام ليث عمي ابراهيم شلونو

زهور ..الحمدلله الله يسلمك وليدي كلنه بخير

علاء ..شلونج خيتي شهلاء الف مبروك ع الخطوبة وعقد القران

شهلاء ..اشكرك خيي الله يبارك بيك عود جيب زوجتك بعرسنه نعزمكم مو متجون حتى اتعرف عليها ونصير صديقات هههه

شاهين ..كلت بكلبي دسكتي رحمة لاهلج شيجيب كل عقلج اعزم هل حثالة بعرسي واخليها تقابلج ليش يمة ماعندي شرف اخليج تلتقين بغرور خانم وتصير صديقتج هه ...

علاء ... اي ان شاءالله نجي ونجيب هدية تلوك لابو سرحان ههههههه

شاهين ..احم يله بنات كملتوا حتى اوصلكم بطريقي

علاء ..حسيت بشاهين يريد يبعد شهلاء عن زوجتي وميريدها تتقرب الها بس بطريقة غير مباشرة ...ماردت ابقه اكثر اترخصت وطلعت ...وبكلبي غصة شلعت صدري شلع

#وللحكاية_بقية ...

”لقد كنت تعلمُ النهاية منذ البداية، لِمَ
أصرّيتَ على الخوضِ في طريقٍ لا طائل
لك منهُ سوى الألم؟.”

يتبع ...

#سارة_المجيد🌹