مساءكم معطر بأريج القداح الفواح اليوم نشرت البارت قبل الموعد حتى لتبقون تنتظرون اخاف اتأخر الظهر ....

🌸🌸🌸🌸🌸🌸🌸🌸🌸🌸🌸🌸🌸🌸

#لا_ياصديقي

#المحطة_20__21

#بقلمي_سارة_المجيد

علاء ..ومشت الايام واني وغرور عايشين حياتنه مرتاحين .. اطلع لشغلي ارجع الكاها مسوية الغدة نكعد نتغدة والعصر اطلع والليل اكيد يمها ..

عشت اجمل ايام حياتي اول اشهر زواجنه .. طبيعية حالنه حال كل المتزوجين تصير شوية مشاكل عادية ونرجع نتصالح .. عدت اول سنة من زواجنه ..

غرور ..جنت دانظف الشقه حسيت معدتي انكلبت ركضت للحمام استفرغت وجانت الدورة مالتي متأخره الها اسبوعين عرفت اني حامل لان اعراض الحمل دتبين عليه من الدوخه وعدم الشهية والاستفراغ ...

كلت خلي اروح للمختبر واحلل حتى اتأكد ..اتصلت ع علاء بالمحل كتلو اريد اروح للسوك ويه اختي مامنعني عادي كلي روحي ويمج فلوس بالكنتور اذا تحتاجين اخذي ...

والله اخذت فلوس ورحت لاهلي اخذت اختي كتلها اريد احلل يمكن حامل ...

خطية كيفت وفرحتلي والله رحنه للمختبر وحجيت ويه ابو التحليل كلي اكعدي حتى اسحب دم منج
كعدت وكشفت ع ذراعي سحب دم وكلي اتفضلي هسه نص ساعة واصيح اسمج

بقينه كاعدين ومنتظرين دورنه ..مر نص ساعة وجان يصحيون بأسمي ركضت لابو التحليل سئلتو شنو النتيجة ..

بشرني كال مبروووك خيتي انتي حامل
اني من فرحتي كمت اكمز وشايله الورقة مال التحليل بيدي اجتي اختي كالت ها بشري كتلها حامل ولج حامل ..باركتلي ورجعنه للبيت اهلي وبشرت امي

الكل فرحلي وكيفوا والله اخوية وصلني لشقتي والمغرب اجه علاء حبيت اسويلو مفاجئة بس بعد ما ينطيني الحلاوة ههههه

علاء ..كملت شغلي وعزلت المحل ورحت لشقتي ..اول ماطبيت تلكتني غرور والفرحة بعيونها

غرور ..مسويتلك مفاجئة بس ما اكولها الك .. الا توعدني بشي ..

علاء ..اهاااا .. يعني الا بمصلحة .. اني اعرف شنو المفاجئة اول

غرور .. هوه خبر .. بس خبر اني متأكده يعجبك

علاء .. امممممم .. اي كولي

غرور .. لا حبيبي .. توعدني الاول
علاء .. بشنو اوعدج

غرور .. نازلات اجهزة تلفون بدون واير اريد واحد حباب .. اهلي مشترين واحد يكولون تكدر تخابر بي شوكت ما تريد

علاء .. سمعت بيها بس ولج هذني غاليات ..

غرور .. الخبر يستاهل صدكني

علاء .. اووك نسمع الخبر اول ونحكم .. اذا يستاهل اوعدج اشتريلج هذا التلفون

غرور .. اوووك .. حبيبي ..الخبر هوووووه اني حاااااااااامل 😁

علاء .. شنوووو الله عليج تحجين صدك

غرور .. اي والله حبيبي .. رحت اليوم حللت بلمختبر اني واختي من كتلك رايحين للسوك .. وبشرني كالي حامل

علاء .. الحمدلله والشكر يا ربي .. الف الحمدلله والشكر .. تستاهلين هذا التلفون .. اليوم اجيبو الج لو شلون ما جان

غرور .. ايييييي حبيبي تسلم تسلم ياعمري ربي مايحرمني منك ..

علاء ..العصر طلعت لمحلي وبلطريق مريت على المحل الي يبيع هذني التلفونات .. اشتريت الها تلفون 3610 او طابوكة يسمو ..

جان سعرو 200 دولار ..والخط بوحدو سعرة 100 دولار .. وجبتو لحبيبتي وكيفت بي وشغلتو وكمت كل شكم يوم احط 10 دولارات رصيد .. هاي عبالها مثل الارضي تحجي ويا اهلها .. بعدين عاد بدت تقتصد ..

جانت متطلباتها هواي وكلشي تريدو اجيبلها ما حرمتها من شي ابد .. ومشت الاايام
وصار ع غرور 8 اشهر وبدينه نحظر تجهيزات الطفل واخذت سونار طلع بيها بنية كلنه الحمدلله جهزنه جهاز مال بنات كلو وردي

غرور ..بشهري التاسع حسيت بألام المخاض وبدت تنزل عليه مايات وكمت اطلك الوجع زاد ردت اموت حسيت روحي تريد تطلع مني اتصلت ع علاء كتلو الحكلي علاء راح اموت

علاء ..من سمعت غرور هيج حجت مثل المخبل طلعت عسريع قفلت المحل وركضت للشقه ...

شفت غرور تتوجع ودتلوب شافتني كامت اتصارخ الحكلي حموت ركضت عليها كضبت ايدها كالت جيب الجنطة مال الملابس

رحت اخذتهن وسندتها وطلعنه نزلنه الدرج كوه وصلنه للشارع اخذت تكسي وعسريع كتلو للمستشفى رحمه لاهلك ..

والله وصلنه نزلت وكضبتها نزلتها وكمت اصيح ع الممرضين اريد سديه والله جابولنه وحدة نيمت غرور عليها واخذوها لصالة الولادة ...

بقيت انتظر بالممر جسمي كام يرجف خفت لايصير عليها شي لو ع بنتي والله وره نص ساعة طلعت الممرضه كالت مبرووك اجتك ابنية بس انطيني ملابسها اني حييل فرحت وحمدت الله وشكرتو

نطيت الجنطه الها ودخلت وراها طلعوها لغرور وجها اصفر وتعبانه حيل ..وجان يجيبون بنتي سميتها مريم .. وكيفنه بيها .. وحياتنه الى هنا مستقرة ..

بس بيها مشكلة ان خالد وين ما يشوفني يشمرلي حجي . حيل ضوجني .. بس اتأقلمت ويا الوضع واني هم ابتعد ما التقي بي ..

وبدت بنتنه تكبر ..الى ما اجه ذاك اليوم المشؤوم هذا اليوم الي دمر حياتي .. يوم اني نايم صوت الباب مال البيت يندك قوي ادحج الساعة 6 الصبح .. خير ياربي منو اجانه بهيج وقت ..

طلعت اركض فتحت الباب .. واذا الولد ابو الفلافل الي براس الفرع يم محلي يكولوي الحك محلك احترك ..

والليل كلو النار بي ومحد يكدر يطلع يطفي بسبب الحظر التجوال ..

اني ركضت بدون وعي بلبجامه مالت النوم .. طلعت للمحل لكيت المحل رمااااااد صاير ..

ما باقي بي كووولشي كلو محترك .. عبارة عن تراب .. حطيت وكعدت الطم .. حالي ومالي راح ..

منين اعيش اني وبنتي ومرتي .. انوب مو هنا .. انوب ابو الجملة يطلبني .. شاهين يطلبني من البداية مال المحل .. وانوب اخذت منهم من رحت خطبت غرور ..

اوووووف يا ربي شهل بلوه الي ما الها حل .. رجعت للشقة الطم .. غرور تلكتني .. شبيك شكو شصاير ..

كتلها راح المحل احترك ولج كل حلالي راح..

غرور ..صخام الصخمك علاء .. منين راح تدفع الاجار مال الشقة منين راح نعيش

علاء ..جنت بدوامه وادك ع راسي كتلها والله ما ادري كارثة و وكعت ع راسي ..كتلها راح اروح ع اهلي هسه اجي بدلت ملابسي وطلعت مهضوم وحالتي حالة البيه للكافر حرام ..

رحت على ابويا حجيتلو بلكت يدايني بلكت شي .. كالي والله ما عندي .. كتلو ابوية اني عندي ايجار وعندي عايلة والله ما اعرف شلون اعيشهم .. صفن ابويا ..

ابو علاء ..ابني اذا تضايقتوا حيل .. تعال هنا يمنه بيتنه انت ومرتك وبنتك عيشوا ..

علاء .. طبعا من تزوجتها لغرور الى هاي الساعة لا غرور طابة بيت اهلي ولا اهلي طابين بيتي ..

حتى مريم بنتي .. اخذتها الهم شافوها ورجعتها لامها .. كتلو ان شاء الله ابويا الله كريم ..

رجعت حجيت لغرور الكلام الي دار بيني وبين ابويا ..هاي تخبلت ..

غرور ..ما اكعد يم اهلك اني ومريم لو تنكلب الدنيا ..

خلي هسه مو عندك شكم فلس مجمعيهن .. نصرفهن الى ما نشوف شلون تلكالك شغلة تشوف حل للمحل ..

علاء ..مكدرت اغصبها واخذها انعيش يم اهلي ..بقيت بالشقة وما طولت الفلوس الي مجمعها وبدت تتناقص وشغل ماكو .. اني اصلا اعرف محد يشغلني منو يشغل واحد جسمو ما يتحمل ..

بغداد بوكت الخير ما احد شغلني .. هسه اريد الكه احد يشغلني .. وبدت غرور احسها تتغير تصرفاتها وياي ..

يوميا تتذمر ويوميا المشاكل بينه بدت تكبر ..كمت اني اطب البيت تشتغل رحمة الله ..تكعد تعد وتصف ودردم على كلشي ..

لدرجة حتى بدت تهملني وبدت حتى الملابس كوه تغسلهن .. قررت اكعد وياها واقنعها ان نسكن يم اهلي شوية بلكت شوية نكدر نوفر بلمصروف وهم بلكت ابويا اخوية يدورون ويايه على شغل ..

وما قنعتها الا بلموت وحطيت على ظهري 1000 وعد و يمين .. و بلغت اهلي ان اني راح اشيل يمهم حتى يفرغولي الغرفة ..

وراها بشكم يوم خلص اجار الشقة وفرغتها وانتقلت للعيش بيت اهلي .. طبعا اهلي استقبلونه .. حتى غرور رحبوا بيها ..

وكلشي ماكو ولا صاير شي .. وكلت يا الله بلكت تتحسن الامور .. اطلع اني يوميا اكعد بكهوة .. وهم اتسئل على شغل .. من الصبح وارجع ع غدة واطلع العصر وارجع بلليل ..

اول شهر هدوء ما سمعت غير بس غرور تزن .. كل ما ارجع للبيت يا كالت امك يا كالت اختك يا سوت امك يا سوت اختك ..

واني بس اهدي بيها وميخالف وتحملي والله كريم وهانت .. شلعت قلبي نعلت موتاية .. وره الشهر بده تذمر امي هم ..

تكولي مرتك لا تشتغل لا تحط ايدها بلبيت .. لا تساعد .. تكعد من النوم ساعة 12 .. تتغدة وتطب لغرفتها ..

تطلع تاكل وتطب حتى ما تحجي ويانه ..حتى ملابسك تزتهن ويا ملابس اخوك نغسلهن احنه ..

اي حتى بنتك ما نشوفها .. ما يصير يا وليدي احجي وياها .. وانوب كعدت اهدي امي واهدي غرور ..

اريد بس الحياة تمشي وعده شهر الثاني .. والامور بدت تتأزم بين غرور واهلي ..

غرور ..شوفلي حل اني تعبت عيشتيش هاي اني ما اكدر البس براحتي ما اكدر اكل براحتي .. حتى طلعة ما اكدر اطلع .. موتوني حابسيني .. وامك على كل شي تنقنق

علاء ..غرور رحمة لاهلج بس اصبري عليه شبيدي اني هسه دتشوفين حالي لا شغلة ولا عمله منو يلفينه استري عليه ..

كوه اهدي غرور انوب امي تلزمني تكول هاي مرتك احشمها .. ما تلبس الا مشلح ومدلع .. ابوك واخوك بلبيت ما تستحي .. ما تحط ايدها بلبيت شنو خدم الخلفوها احنه ..

وعلى هل رنة طحينج ناعم صارت اللغاوي يوميه .. الى ما يوم رجعت وطبيت للغرفة .. لكيت غرور شابة ناااااار .. كتلها ها حبيبي شبيج .. اني كلتلها هيج هيه تخبلت ..

غرور ..امك .. تغلط عليه .. تكولي حيوانه .. اني حيوانه ..

علاء ..حبيبي على كيفج هيه ما تقصد يجوز .. يجوز زعلانه ..

غرور ..واذا زعلانه .. والله امك هيه الحيوانه وهيه الكلبة بنت كلب ..

علاء ..اني من كالت هيج تخبلت كتلها غرور عيب هل حجي احترمي نفسج ..

غرور ..تدافع لأمك لك ابو رجفة لك انت منو تاخذك مو زين اني رضيت بيك ولك اني دفنت شبابي ويه واحد خركة ..

علاء ..من سمعتها هيج حجت اني ما تمالك نفسي شلت ايدي اريد اضربها .. هيه انجنت ..

كامت وعلى وجهي وتملخ باضافيرها ملختلي وجهي .. وضربتني على راسي ودفعتي وطلعتني من الغرفة .. لزمتني الرجفة مال المرض .. امي شافت هيج حالي تخبلت عليها ..

ام علاء ..لج حقيرة ياساق.... مو زين ابني ستر عليج وملفيج منو بحالج انتي ..

الديرة كلها تسولف بشرفج ياطايحة الحظ كوم يمه كوم هاي الي عاديت اهلك وعشيرتك علمودها شفت معدنها شلونه هذا الي جنه خايفين منو ....

علاء ..كمت من فشلتي من اهلي مدري وين ادير وجهي انوب هاي غرور واذا جامعة غراضها ومحظرة كلشي وجان تطلع من البيت واخذت البنية وطلعت على الشارع ركبت تكسي وعلى اهلها ..

بقيت اندب حظي وهل حال التعبان الي اني بي .. وضعف بنيتي مراة تسوي بيه هيج .. وتملخني ..

بقيت حابس نفسي بلغرفة ما اكدر اطلع استحي من اهلي ومن العالم يشوفون حالي ..
ياربي شبيه ليش هيج ديصير بيه شنو هل ربط الي متربطو اني عبالك واحد مجتفني بحبل ...

((علاء مكرود السحر دمرو وسوا بي سواية سودة ووكع بوادي اظلم مالو قرار منعرف شنو الي راح يكون نهاية هل سحر ومنو الي راح يخلصو منو ..نتابع احداث القصة الى النهاية ))

"‏أسوأ شيء قد يفعله الإنسان في نفسه ، عدم قدرته على إتخاذ قرار بالإبتعاد عن كل من يسبب له أذى نفسي ويستمر على أمل أنه سيتغير يوماً ما"