بارت العاشر
#لا_ياصديقي
#المحطة10
#بقلمي_سارة_المجيد
♨♨♨♨♨♨♨♨♨♨♨
علاء ..من كالي شاهين هشكل .. حسيت ان الدنيا بدت تضحك الي .. وبدت تنحل مشاكلي .. كلت ما بقى شي .. غير التنفيذ ..
وفتره قليلة .. افاتح اهلي بموضوع الزواج .. وما عدهم عذر بعد .. واني مجمع شكم فلس واذا احتاجيت زيادة اتداين من شاهين وارجعهن الو بعدين .. وبديت ابني احلام ..
لكن ما جنت اعرف شنو مضموملي .. مجنت اعرف الايام الجاية راح اتكون اسود ايام حياتي مع الاسف .. و ثاني يوم شاهين محاجي عمو ..
وعمو خطية كال اذا ل علاء .. ياخذو بنص ايجار .. وحصلت المحل بنص السوك .. وشاهين كالي اشتري البضاعة .. واترس المحل والفلوس اني راح اوصي ابويا ينطيك شكد تحتاج ..
تشكرتو هواي .. لان وكفلي بهاي محنتي وساعدني .. طبطب على جتفي
شاهين ..علاء احنه اخوه .. واذا قصدك على الفلوس .. تره الفلوس ما تشتري الرجال .. الرجال هيه الي تجيب الفلوس .. واني مخاويك اخو دنيا ..
علاء ..حضنتو وبوستو وتوكل راح للكلية هوه .. واني بلشت اسوي الديكورات اول شي .. وبلليل اخابر غرور احجيلها التفاصيل والي ديصير .. واكوللها انتي واني جنه خطئانين بموضوع شاهين .. شاهين خوش رجال .. وهسه محد واكفلي غيرو ..
وهيه احسها تتجنب موضوع شاهين ما جنت ادري شنو السبب .. و كملت ديكورات المحل .. والجامخانه والرفوف رتبتها بقت بس البضاعة .. رحت للموصل جبت مناك المسواك مال المحل ..
وترستو اشكال من المنزلية .. وتحفيات حتى كرستالات جبت .. وكتلهم لاهلي اني سويت محلي الخاص .. كلهم تعجبوا منين كدرت تسوي محل هلكد وهيج تترسو غراض .. كتلهم اني مجمع شكم فلس وسويتو ..
كالوا يعني شاهين مو شريك .. كتلها لا لا محد شريكي .. المحل ملكي اني وحدي .. بس شاهين فزعلي يم عمو حصلي المحل
بنص ايجار .. كلهم كيفوا .. وفرحوا بلمحل .. واختي كالت احم احم .. دحج امي شلون تتمضحك .. عبالك تريد تتزوج .. امي ضحكت كالت وليش ما اريدو يتزوج .. شاب مثل الگمر هوه .. اني ضحكت ..
شفتها فرصة .. افاتحهم بلموضوع بما ان كلهم كاعدين .. كتلهم امي وابويا .. اني جنت اريد ائجل هل موضوع شوية .. بس هسه بما ان الموضوع انفتح .. اني اريد اتزوج ..
كلهم فرحوا .. وامي كالت ساعة المباركة .. يا وليدي .. أشر واني اخطبها الك .. بنات عمامك وبنات خوالك هووواي .. اختار الي تريدها .. اني كتلها ونعم منهم .. بس والله يا امي .. اني بالي بنية .. وياريت تكون نصيبي بعد اذنكم ..
كلهم سكتوا ..
ابويا ..اي ليش لا .. اذا بنت ناس اجاويد ومن اصل معروفين شكو بيها .. كولي هيه بنت من .. ومنين اهلها ..
علاء ..والله يا ابويا .. اني مو كلش اعرف هيه بنت منو .. بس اعرف همه وين ساكنين .. واذا تردون تسئلون عليهم اسئلوا ..
ابويا ..اي بيها الخير وليدي .. هسه اصبر خلي نرتب امورنه .. البنية هم تحتاج خطبة ومهر وسياك .. وذهب .. اصبر شوية ..
علاء ..لا لا ابويا اني مجمع شكم فلس .. هسه بس اريد خطبة وراها ارتب اموري ونتزوج .. ضحكوا .. كالوا هاي شنو مستعجل هلكثر .. اني استحيت وسكتت .. كالوا ديله عجل الله كريم .. يصير خير ..
في مكان اخر ..
شهلاء ..من اخذت سلسلة شاهين ردت انطيها لمراة فقيرة جانت تجي يمنه تاخذ الي قاسمو الله وماما اتجيللها مواد غذائية وملابس ومصرف وخطية تكيف لان عدها بنات ايتام ..
والله بذاك اليوم اجتي وكالعادة امي حملتها الغراض ...
من دتطلع ركضت وراها طلعت السلسلة مال صاحبة شاهين وكتلها اوكفي خاله هاج هاي السلسلة انطيها لبنتج
هيه انصدمت كالت شنو هاي يمه
كتلها سلسلة ذهب اخذيها لبنتج ...
كالت بس هاي غالية يابنيتي ماترهم
كتلها لا متغلى ع بنتج ادري انتي عندج بنات واكيد يعجبهن يلبسن ذهب اخذيها والف عافية عليها ..
لحد ماخذتها ممصدكه خطية فرحت وبوستني واتشكرتني كلتلي فدوة لعمرج بنيتي متقصرين هسه بنتي شكد تندعيلج والله لان عمرها ملابسة ذهب
كتلها الله يكون بعونكم ويفرحكم ياربي ..
طلعت المراة راحت واني خلصت من هم هل سلسلة الحمدلله ..
وراها صادف تخرج شاهين وسوولو حفلة اهلو بقاعة كبيرة واني اشتريتلو نجمات ذهب عيار 21 وعساس يعلنون خطوبتنه بنفس يوم حفلة التخرج واكيد اغلبكم تعرفون باقي الاحداث من القصة السابقه والي مايعرفها بهل يوم ببيتي وكعت علينه واتخربطت وخربت الخطبة ومانعلنت
واتأذينه بسبب وكعتها حالتي النفسية اتدمرت لان جنت احب بيبي هواي وصعبة اشوفها امدده بلا حراك هيج ..
مرضها اتأزم ومحد عرف علتها الى ان بيوم الدكتور كال طلعوها واخذوها لبيتكم لان ايسوا منها ....
وعمي جاسم اخذها يمه وبقينه نروحلهم كل وكت حتى نتعاون ع مداراتها بس بالاخير صار الشي الي مجنت امحسبتلو احساب وهوه فقدان جديتي بذاك اليوم حسيت صار زلزال بالبيت من الصدمة من شفتها لفضت انفاسها الاخيرة وع ايدي اتدمرت دمار وشاهين حظني وبقيت ادك والطم ...
والكل انثبر بوفاة جديتي وكان هل يوم هوه اخر يوم الها بالدنيا 😔
في مكان اخر
علاء ..والله اني كمت من يمهم الفرحة ترست قلبي .. اريد تجي ساعة 11 .. حتى اخابر حبيبتي افرحها .. والله اتصلت واكيد موووتني هل خط المشغول . شلع قلبي ... متت يالله جاوبت ..
كتلها هلووو حبيبي .. كالت هلووو .. كتلها حبيبي .. اني مشتاقلج حييل .. وانتي قسيتي عليه حرمتيني من شوفتج ..
غرور ..شسوي يا حياتي ... اخاف اعذرني مجبورة ..
علاء ..منا ورايح ان شاء الله بعد ما تخافين من احد ..
غرور ..ليش شنو راح يتغير ..
علاء ..تدرين شنو راح يتغير .. راح نلبس الحلقات .. وتصيرين خطيبتي .. وتطبين بعين اي واحد يفك حلكو وياج ..
هيه ضحكت ضحكة استغراب .. كالت جذب .. جذب علاء دتحجي صدك .. راح تخطبني .. كتلها اي يا روحي
راح اخطبج .. وفاتحت اهلي وما عدهم اعتراض ..
بس رادوا اسم والدج وشوية تفاصيل يعني من يا عشيرة وكذا .. وبيتكم اني اندله .. كالت اوووك حبيبي ... وردتلي اسم والدها وعشيرتهم .. همه غربة عن تكريت .. بس مو مشكلة ..
و بقت تسولف ويايه وتضحك .. واني فرحان وهيه فرحانه وتأخرنه لوقت متأخر نسولف ونضحك .. كتلها اليوم شعجب اخوج ما كبس علينه وسديتي بوجهي .. هيه انتبهت ..
غرور ..ها .. ههههه نسيت اخوية وكل اهلي .. بعد راح اصير خطيبتك .. وما يفتحون حلكهم ويايه بشي ..
علاء ..ديله حبيبي باجر عندي هوايه شغل .. صدك كتلج اني شغلت عامل بلمحل .. لان ما عندي وقت تعرفين شغل شاهين كله بركبتي .. يادوب الحك علي ..
غرور ..اوووووف يا هل شاهين الي مشاركنه بحياتنه ..
علاء ..ميخالف حبيبي وكفلنه هواي .. لازم نخليها بعيونه ..
غرور .. ماشي الله كريم ..
علاء ..وسديت التلفون ونمنه .. وكعدت الصبح نشيط ومكيف واضحك .. لكيت كل اهلي كاعدين على الريوك .. سلمت عليهم وكعدت ..
كتلو صدك ابويا .. اسم ابوها فلان الفلاني .. من العشيرة الفلانيه .. وبيتهم ب فلان مكان .. ابويا صفن شوية ..
ابويا ..ما سامع بهيج عشيرة هناك بتكريت ..
علاء ..اي همه غربة عن تكريت ..
ابويا ..الله كريم .. بس انت لا تصير عجول هاي الامور ما تصير بلعجلة ..
علاء ..ماشي .. اني طالع ..طبعا الحمدلله شاهين اتخرج من الكلية ومراح يداوم شهرين لحد مايداوم بالوحدة مالتو ..
وراح استفاد منو للتحظير للخطوبة وهاي الشغلات .. رحت كضيت النهار كلو اني افتر على الشغل ما رجعت لليل هلكان من التعب .. طبيت للبيت كعدت وياهم تعشيت .. ونمت ..
واستمريت على هل حال .. مرات اخابر غرور ومرات لا .. وهيه تسئلني شوكت تجون شو صار اسبوع من كتلي .. كتلها اصبري شوية غير ابويا يفرغ ..
غرور .. هففففف .. علاء بس لا دتقشمرني ..
علاء ..لا والله اقشمرج شنو .. انتظري اصبري ..
غرور ..الله كريم ..
علاء ..طبعا اني كل ما احاول افتح الموضوع ويا اهلي .. احس ابويا ينعقج .. وامي تسد الموضوع .. هاي شنو .. شبيهم .. والله كلت خلي تعدي شكم يوم .. وارجع احاجيهم ..
والله عدت الايام .. وهم كل ما اسئلهم يراوغون .. والله ويوم بليل .. كلت اليوم ما منها .. اريد افتهم شنو شبيهم .. والله كاعدين نتعلل اني واهلي ..
كتلو اي ابويا .. ما كتلي سئلت على اهل غرور .. ابويا دحج بنظرة .. اول مره اشوف بعينو هذا الزعل ...
ابويا ..غرور مو ..
علاء ..اي ابويا اسمها غرور ..
ابويا ..اسمع وليدي .. هاي البنية ما ترهم لا الك ولا النه عوفها ..
علاء ..اني من كال هيج وكفت على حيلي .. كتلو شنو ابويا شنو ما ترهم .. ما اشوف الا ابويا بعلو صوتو .. كال كاعد اكولك ما ترهم .. وهذا العندي وما اريد اسمع بعد هذا الموضوع .. اني انهاريت .. رجعت طبيت للغرفة ... ومددت .. وكلت ليش هيج ديحاربوني ..
ليش ما يخلوني اخذ حب حياتي .. ليش هيج دتسوون بيه .. وبقيت حابس نفسي بلغرفة لا اطلع ولا اشوف احد 5 ايام .. حتى غرور ما عاد اخابرها .. شريد اكول الها .. والله ابويا ما يقبل ما تكولي ليش ..
واني كل ما اسئلو اكولو بس فهمني ليش .. هوه يصيح بيه ويطردني .. والله سمعت شاهين نازل من دوامو لان هل سنة جانت اخر سنة الو بالكلية واتخرج وصار ضابط ..وكام يداوم ببغداد ركضت ..
لبيتهم انصدمت شفت جادر بالباب ناصبين كلبي انخطف لايالله هاي منو ميت عدهم ...
وصلت سئلت ولد هناك واكف كتلو شنو السالفه المن هل جادر منو متوفي من بيت ابو شاهين ..
كال ام جاسم اتوفت اول بارحة ..انقهرت ع الجدة لان جانت حييل تحبني وتداريني ...
والله طبيت للجادر سلمت ردوا السلام ..شفت شاهين واكف ولابس دشداشة سودة وامبين عليه الحزن شافني وحضني وبوسني وكعدنه وقدمولي كهوة شربت ..استحيت اكولو ع طلبي مكدرت بيا حال هوه ...
والله اخذت من خاطرو وعزيتو بوفاة جديتو بقيت لليل يمهم عاونتهم شوية بالجادر لان العالم مكلوبة يمهم ...
شاهين ..يول علاء شو اشوفك مو ع بعضك شبيك صاير شي وياك
علاء ..ها ..لا خيي مو وكتو خليها لغير وكت عود احجي وياك ..
شاهين ..احجي ول لاتبقي بگلبك شي
علاء ..مو موضوعي مو مال هيج وضع انت بوضع مايسمحلك تسمع مشكلتي البيك مكفيك
شاهين ..ماشي عجل بالليل من تخف العالم نكعد ونسولف واحجيلي كوولشي تراني اخوك مو بس صديقك لاتضم عليه شي ماشي ...
علاء ..والله ونعم من اخوي وصديقي ادري بيك ماتقصر بعد اخوك ..ان شاءالله احجيلك البيه ..
شاهين ..صار الليل ومشت العالم وخف البيت شوية كتلو تعال علاء نروح للحديقه نكعد نسولف واحجيلي موضوعك
علاء ..ماشي خيي يله امشينه
شاهين ..طبينه شفت شهلاء واكفه ويه اختها خزرتها يعني طبن جوه
شهلاء ..جنه كاعدين اني وشيماء اختي بالمرجوحه بالحديقه لان جنت مخنوكه وطالعه روحي بسبب وفاة بيبي الله يرحمها ماشوف اله شاهين بوجهي ويا علاء طبوا وجان يخزرني بعيونو يعني طبوا ..
كتلها كومي يمعودة خلي انطب جوه اجه شاهين لايذبحنه ..
شاهين ...اي استاد علاء احجي هسه وحدنه وماكو احد يمنه
علاء ..داحجي توني وجان يجون زلم معكلين الضاهر اقاربهم من غير محافظة سكتت مكدرت احجي ..لان شاهين كام ع حيلو وراح استقبلهم ودخلهم للديوان ...
والتها بيهم ..عاد اني كتلو خيي اني راح ارجع للبيت سلمت عليه وطلعت كلت غير مرة اروحلو ..
ومر كم يوم وشاهين التحق للوحدة مالتو الي ابغداد واني حالتي اتدمرت حسيت راح اخسر حب عمري بسبب اهلي وماعرف ليش ...
لازم انتظرو يرجع من دوامو ياربي ليشوكت ابقه بهل ضعف والجبن تعبت ...انوب غرور ماكدر اخابرها شكولها ابويا مقبل عليكم اوووووف ربي فرجها عليه ...
هنا كمشني مغص قوي حست مصاريني كاعد تتكطع ....
وراها راح رأسا ..ماعرف شنو الي ديصير بيه يالله
اوووف وينك شاهين شوكت ترجع منتظرك ع نااار
في مكان اخر ..
شاهين ..صدر امر اجتماع للضباط من قبل القائد مالنه
.. ورحنه كعدنه 3 ضباط جنه ..
وهو القائد مجتمع بينه .. واحنه دناقش بلاجتماع دك تلفونو .. ابو البدالة .. كالو زوجتك ع الخط .. ما صرفها ..
كالو حولها الي وكعد يسولف وياها وعاف الاجتماع ..واحنه بقينه واحد يدحج ع الثاني شنو الفلم شو كعد يسولف ويه زوجتو واحنه عدنه هل شي عيب ومايصير اشو هوه مادار بال وبقه يحجي وياها وكذا ..
وره شكم يوم واحد ما عرفنه منو من الكاعدين كاتب بي تقرير لوزارة الدفاع .. والضاهر همه عدهم خبر قديم علي .. وانحال ع التقاعد ...
قبل جان نظام العسكرية محد يكدر يلعب بي والساري ع الجندي ساري ع الضابط والقائد النظام يسري ع الكل ...
لان الجيش مابي اي مجال للمجاملة والا يضيع ...
اجه وكت نزولي حظرت غراضي بالجنطة ورجعت لتكريت ...
في مكان اخر .
علاء ...من نزل شاهين بأجازة كلت لازم احجي ويا ...والله بدلت ملابسي وطلعت عليه كلت محد يحلها غيرو ..
...........
في الحقيقة ياصديقي ليس دائما الطيور على أشکالها تقع فالحياة أوقعتنا على غير أشکالنا وأجبرتنا على الکثير من الوجوه التي لا تشبهنا أبدا
Bạn đang đọc truyện trên: Truyen247.Pro