يسعد مساكم حبايب اعتذر عن تأخير تنزيل البارت صارت عندي شوية ضروف
🌹🌹
#لا_ياصديقي

#المحطة_السادسة_عشر

#بقلمي_سارة_المجيد

علاء ..ويا ما طلعت جان اشوف تكسي وكفت دحجت وجان اشوف غرور نزلت .. ما حسيت على نفسي من الفرحة ..

بقيت انتظرها بلفرع .. اجتي تمشي شفتها واني كلبي كمز من السعادة وهيه جاية ...
وصلت يمي اريد اسلم عليها
كتلها هلا حبيبتي مشتاقلج والله هواي شلونج يالعمر كلو

غرور .. هاي دكة تسويها علاء

علاء .. انصدمت من ردها .. حتى ما سلمت عليه .. كتلها ليش حبيبتي شسويت اني

غرور .. شنو شسويت ... دازلي شاهين .. واني حلفتك ما تجيب طاريي لاحد .. ليش هيج انت ..اثاري طلعت مو كد المسؤولية للاسف كم مرة كتلك ماريد شاهين يعرف بيه حبيبتك تالي اتدزه الي

علاء .. تلعثمت بالكلام ما عرفت شلون ارد عليها ..

غرور .. اي هذا انت بس تمتمت .. شنو الي وعدتني بي وصار .. انتي مو احسن من خالد كلكم الزلم نفس الشي ونفس الطبع ..

تضحكون على البنات ..هاي اني وياك وانتظرك سنين ..شنو السويتو الي ..بس وعود وكذب كلو

علاء .. حبيبتي بس خليني افهمج

غرور .. شنو تفهم مني بعد اشو حتى وعودك تكذب بيها .. وحلفتك ما تكول لشاهين انوب ادزو عليه لبيتي ..

شنو انت غيره سز اني مرتك المستقبلية داز صاحبك عليه شنو ما تستحي انت

علاء ..صدمتني بتجاوزها عليه والمصيبة اني لساني متربط ماكدر اردها مادري ليش

((علاء جان السحر طاغي عليه ومتدمغ من وراه ..وغرور خلتو مثل المحبس بيدها ))..كتلها مضطر .. خليني بس اشرحلج حبيبي ..

غرور .. لا تشرحلي ولا اشرحلك .. علاء لازم تشوف حل وبأسرع وقت .. اني ما اكدر انتظرك اكثر ..

واعتبر كل الي بينه انتها زين .. وبعدين شنو دازلي هاي الفلسينات بيد صاحبك . كاعدة اجدي منك اني ..
اني بحكم خطيبتك وغصبا ما عليك تصرف عليه ..والله يالله

علاء .. ما اعرف شنو الي يعكد لساني .. رزلتني وما اكدر حتى ادافع عن نفسي .. يا ربي شسوي ..

كتلها حبيبي تدللين كل الي تردي يصير ..والله ..وها صدك خلي اكولج ترا شاهين خلص اختفه محد يدري بي بعد .. يعني ما راح يحجي لاحد ..

(( رغم كل المواقف الي وكف بيها شاهين ويا علاء ..شوفوا بشنو ديجازي ..كاعد يرضيها ..بموت صديقو الي سندو ووكف ويا وكفة الاخ مايوكف لاخو هيج ))

"‏وكُنتُ أُطعمهُ قمحَ فُؤادي براحتي عجبًا
كيفَ باتَ يُرضيهِ فُتاتُ الطريقِ."
|

غرور ... ليش وين وله هذا

علاء .. داكولج اختفه ومحد يعرف بي بغداد .. مستحيل يطلع على هل وضع التعبان .. ما الو وجود اعتبري انتها وخلصنه منه

غرور .. كل عقلك هذا شاهين مثل ما سمعانه ب سبع ارواح .. ما تشوف واذا كامزلنه ومخرب عيشتنه

علاء .. هسه عوفج من شاهين كاعد اكولج راااااح .. خلينه بحبنه .. اشتاقيتلج يا روحي

غرور .. دروح .. وين اصرفها لشتاقيتلج اني ششتري بيها قلم حمره لو اشتري بيها شيشة عطر .. صدك بطران

علاء .. جريت الفلوس الي خلاها الي شاهين مصرف .. كتلها مو تدللين حبيبي هاي خرجية مشي نفسج بيها ..

غرور .. اي هسه انت حبيبي وروحي .. فدوة شعندي غيرك اني بعد عمري

علاء .. ارتاحيييييييت بشكل من كالت هشكل .. كتلها تدللين غاليتي انتي
سولفنه شوية جنت طاير بيها من الفرح حسيت حاضن الدنيا كلها

غرور ..اني راح اروح اتاخرت .. وعلاء لازم تستعجل بموضوعنه .. ما اعرف شوف احد من كرايبك وتعال تقدم الي .. شوفلك حل .. اني ما انتظر اكثر تره .. يله باي

علاء ..ومشت غرور واني كمت انوب ما اعرف شسوي .. شلون سالفة يا ربي شنو البيدي شسوي .. والله دمرت

ومرت الايام وبقيت وحيد بهل دنيا لاصديق لا اهل لا حبيبة تسندني وتصبر ويايه ..

مر ع اختفاء شاهين شهرين حسيت مثل الضايع بدونو شكد جنت محاس بقيمتو ووجدو بحياتي ..

رحت لبيت عمي جاسم ردت اشوف شصار عليه وصلت يم البيت شفت سيارات يمهم ياستار شصاير ..

والله دكيت الباب طلعلي ستار دخلني جوه لان اني يعتبروني ابنهم وماين عليهم متربي وياهم من الصغر

سلمت وردوا السلام شفت الشيخ حازم عم شاهين ديحجي بجهاز ويه شخص ديسئل ع اخبار شاهين ..

وهنا جانت الطامة الكبرى عرفنه شاهين مهجوم بيتو واكعه عليه طيارة امريكيه وهوه مختفي مموجود ويمكن معتقلي الامريكان ...
حسيت بطعنه بنص كلبي انوب خطية خطيبتو شهلاء وكعت وانهارت من الصدمه واخذوها للمستشفى العالم انسبو سباية

رجعت ركبت تكسي ورجعت على بيت الجزيرة .. ومددت صافن بضيمي وبكلام غرور .. اكول .. والله راح تروح مني وما راح اكدر اسوي كلشي اذا ابقى على اهلي والله ما راح اكدر اسوي شي ..

وبقيت اكلب بلسالفة يمنه ويسرة ما اعرف شسوي وشنو الخطوة الي اسويها .. نمت واني افكر بلموضوع ..

وكعدت الصبح والموضوع بعقلي ما ديروح من دماغي .. اريد الكالي حل يا ربي والله تعبت ..

طلعت اتمشى .. كعدت على الساكية مال المي .. وافكر .. وجان استرجع كلامنه .. كلت لحظه ..

غرور كالت اجيب اي احد من كرايبي .. يعني اهلها ما عدهم مانع اي شخص يجي يتقدم .. مو شرط ابو او امو ..

خصوصا همه اكيد يعرفون بلمعاناة الي عانيتها .. ما الي الا عمي .. ابو خليل
.. هذا يمشي شلون ما جان .. حياتو كلها من البطل اليسكر بي وجاي .. انطي شكم فلس واخذو ويايه ..

بس شيجيبو من الحويجة يبووووو .. انوب احتاج فلوس ارتب وضعي .. فلوس الي مجمعها بلبيت يم اهلي و شيطلعها وبعدين ما تكفي نص المصاريف .. جان شاهين حلال لكل مشاكلي بس هسه اختفه ومدري وين صاب بي الدهر

اووووووووف يا ربي .. كل ما اطلع من بلوة اوكع بلوة .. خلي اروح للبيت بلوقت الي ابويا طالع بي .. واخذ فلوسي وافلت .. انتظرت الى ثاني يوم ..

رحت وكفت بعيد عن البيت وادحج انتظر ابويا يطلع ... طلع ابويا وطلع اخويا .. ركضت للبيت طبيت ..

تلكتني اختي .. شهكت ... كالت علاء .. وين جنت علاء .. كتلها وخري .. ما راجع اني الكم .. وخري .. ودفعتها حيل ... انضربت بلحايط وكامت تبجي ..

ركضت للسرير مالتي اني مسوي من الداخل جيب سري ومسوي بي سحاب .. كلبت الفراش طلعت فلوسي ... وامي لاكتني بلباب اني طالع .. جلبت بيه

امي ..

كتلها امي انسوني .. انتوا حاربتوني بكلشي .. حرابتوني بلمراة الي اريدها .. حاربتوني حتى برزقي محلي وكسرتوا .. شتردون مني انوب عوفوني اعيش حياتي بسلام .. ودفعتها وطلعت من البيت ...

رحت للبيت وصلت الجزيرة .. فرشتهن بلكاع وكعدت احسبها.. شفتهن ما يسون شي ...

يالله شلون طركاعة هذني شيردن يسوون يالله .. كلت انتظر شكم يوم بلكت الله تهدئ الامور واروح اتداين من ابو شاهين ..

وهم اكولو بلكت يحجي ويا ابويه ينطيني مفتاح المحل .. وكعدت انتظر كل يوم يمر على جمر اخاف لا غرور تروح مني .. يا ربي صبرك ..

ما طول اسبوع .. وركبت ونزلت لتكريت هم محتاج شوية مونه خلصت مونتي وهم اروح لعمي جاسم اكولو يدايني بلكت اقلها انطيها مال مقدم وفلوس الذهب الله كريم ..

وصلت بيت عمي جاسم اشوفو كئابة ..خطية مكسورين بغيبة شاهين .. واني جاي اتداين منهم فلوس ..

هفففففف والله ثجيلة اكوللهم اريد تداينوني فلوس حتى اخطب وهمه ابنهم ما يعرفون عنه طيب لو ميت ...

دكيت الباب .. طلعلي ستار سلمت علي وكتلو اريد عمي ابو شاهين

ستار ..طالع والله ماموجود فوت انتظره جوه ..

علاء ..لا اني رايح للسوك اجيبلي شكم غرض .. وارجع ..

ستار ..ماشي براحتك ..

علاء ..رحت للسوك تسوكت وكذا .. واذا ال ١٠ الاف يصرفوها ب ٧ الاف .. هلووووو انوب هاي طركاعة اللخ .. يا ربي شنو هل مصايب على راسي ..

رحت اخذت تكسي مشيت من يم بيت غرور بلكت تطلع اروح وارجع بلشارع .. كلت اكوللها خلي تنتظرني هل شكم يوم راح اجيها خطابة .. وانطيها شكم فلس بلكت تصبر ..

واروح وارجع وجان اشوف اختها شافتني شو هاي طبت للبيت تركض .. وصاحت غرور ..

كلت هلووو هاي كلهم يعرفوني ... طلعت غرور اشرتلي يعني فوت بلحوش .. طبيت .. كالتي شجابك ..

كتلها اشتاقيتلج وهم جيت اكولج .. لكيت حل لموضوعنه .. ان شاء الله هل شكم يوم اجي اخطبج .. بس انتي متأكدة اهلج يرضون .. اذا جبت عمي ..

غرور ..اي احد يمعووود شبيك انت بس تعال ومعليك الباقي عليه اني ..

علاء ..خوووش تمام .. هاج شكم فلس اشتري ملابس وشغلات اريدج بيوم الخطوبة تكطعين 😉😉😉 .. ضحكت كالتلي راح انتظر على احر من الجمر حبيبي ..

طلعت وبوجهي ع بيت عمي ابو شاهين .. دكيت الباب .. لكيتو موجود وطبيت كعدت سلمت على عمي جاسم .. كتلو شلونك عمي شلون صحتك شنو اخبار شاهين

جاسم .. والله يا وليدي ما نعرف شي فص ملح وذاب

علاء ... الله يرجعو بلسلامه .. عمي شاهين ذيب ما ينخاف علي .. مرجلة ... ويطلع من جوه النار

جاسم .. الله كريم وليدي .. كول .. كالولي جاي سائل عليه

علاء .. والله يا عمي ما اعرف شلون افاتحك بلموضوع هسه بهذا الضرف

جاسم .. اي وليدي احجي انت بغلاة الولد محتاج شي

علاء .. والله يا عمي .. اني جايك بشغلتين

جاسم .. اي شنو هنه

علاء .. اني شاهين جان واعدني ب 5 ملايين ع مود ازود شغلي .. والشغلة الثانية .. اريد بس تحجي ويا ابويا بس على مود يرجعلي المحل اريد ارجع اشغلة

جاسم .. والله يا وليدي هذا المبلغ هسه صعب بهاي الضروف ..
بس اكدر انطيك هسه 3 ملايين .. وموضوع ابوك هذا سهل اني احجي ويا تدلل ..

علاء .. تسلم عمي ما تقصر واني ممنون منك

جاسم .. تدلل وليدي انت والله بغلاة شاهين عندي .. عكب باجر تعال عليه .. واخذ الفلوس واكون حجيت ويا ابوك

علاء .. ان شاء الله عمو .. اني اترخص

جاسم .. وين وليدي اكعد تعشة

علاء .. لا عمي ممنون .. يالله مع السلامة
وطلعت ..

بلمناسبة .. شاهين ما جان واعدني بكلشي بس اني اضطريت ان اكذب .. ما اعرف بيا وجه اكولو محتاج دين حتى اتزوج ..

و بعدين هوه كلو دين .. ومنو كال اصلا شاهين يجي بعد ورجعت انتظرت يومين .. ورجعت على عمي جاسم .. وطبيت وكعدت شربت الجاي .. واجه عمي جاسم

جاسم .. هاك وليدي هاي 3 ملايين .. الي كتلك عليهن

علاء .. شكرا عمي .. ما تقصرون وياي دوم افضالكم على راسي

جاسم .. لا باطل انت واحد من الولد

علاء .. زين عمي والمحل

جاسم .. اي صدك .. هاي مفاتيح المحل .. بس ابوك حيل زعلان منك .. ما يصير تزعل اهلك وليدي هذول ربوك وتعبوا عليك .. وابوك خوش رجال ..

علاء .. ليش عمي ابويا شكالك

جاسم .. والله يا وليدي ما اعرف شكولك .. بس كالي تكولو هل كلمتين

علاء .. شنو عمي كول عادي ولا يهمك

جاسم .. كالي كولو اذا ناوي يسوي الي براسو لا ابني هوه ولا اعرفو .. ولا يفوت بيتي ولا افوت بيتو الى يوم القيامة

علاء .. والله كلام ابويا حيل قهرني واذاني .. كتلو ماشي عمي اني اشكرك وماقصرت

جاسم .. هلا وليدي

علاء ..طلعت ورحت على الحويجة على عمي ابو خليل .. وصلت بيتهم .. دكيت الباب طلعت مرت عمي ..

وللحكاية بقية ..

"‏في حياة كل إنسان هناك خطأ فادح،
يكتشفه عند فوات الآوان، يقضي حياته
بعد ذلك في محاولة إصلاحه إلى أن
يموت.."

#يتبع ...

#سارة_المجيد🌹