#لا_ياصديقي

#المحطة_السادسة

#بقلمي_سارة_المجيد

مساءكم معطر بأريج الورد وجمعة مباركة ع الجميع ان شاءالله

🌹🌹🌹🌹🌹🌹🌹🌹🌹🌹🌹🌹

علاء .. واني مدنك .. وافكر ما احس واذا باب السيارة انفتح .. دحجت واذا غرور .. ولبسها اليدوخ وشعرها .. وعطرها الفواح ..

غرور ..اسفة والله .. اعذرني .. تأخرت عليك .. صارت عندي ضروف واخرتني ..

علاء ..لا عادي .. مشيت .. بس ما اعرف وين اروح .. كتلها وين تحبين نروح .. لو نفتر بس بلسيارة ..

غرور ..والله ياريت لو مكان بعيد شوية ما اريد احد يشوفنه ..

علاء ..فكرت فكرت .. كلت ماكو غير اروح للمزرعة مال شاهين .. بس كلت ما ترهم عيب اني منا متزاعل ويا ومنا استغل مزرعتو ..

والله كلت يالله هسه محد اكو بيها هوه بلكلية واخوتو ما يجون .. واني اندل طريق يفوت للمزرعة من دون ما افتح الباب مال السياج ..

ولا من شاف ولا من دري .. ف وصلت المزرعة .. وطبيت من الطريق و وصلت البيت مال المزرعة ..

اندل نسخة مفتاح للباب مال البيت شاهين ضامو للطوارئ .. لان كلش هوه منظم وما ينطي اي مجال للخطئ ..

ف طبينه وكعدنه هيه تعجبت ع الاثاث والديكورات .. وشكل المزرعة والترتيب البيها .. كالت هاي تخبببل المزرعة هاي الك ..

اني استحيت ما اعرف شكول .. اضطريت اكذب حتى لا اطلع زغير بعينها .. كتلها ها .. اي هاي مزرعتنه شراكة بيها اني و صديق ..

غرور .. اممممممم .. مسويها للسهر والتعليلات الوكيحه 😉 ..

علاء ..احم لا لا بس للونسة شباب بينه وكذا .. تفضلي استريحي .. كعدنه .. واني بلطريق نسيت ما كتلكم اشتريت عشة وحلويات وكذا .. سويت بلضبط مثل ما يسوي شاهين ..

ف كعدنه نسولف .. وجان اسئلها كتلها اي .. شنو الموضوع الي تردين تحجين بي ويايه .. شو اني سئلتها .. هيه تخربط وضعها .. وكامت تبجي ..

غرور ..اووووف .. اسمع جرح كلبي خلي اشكيلك ..

علاء ..احجي واني اساعدج بلي اكدر علي .. صدكي ما اقصر ..

غرور ..شوف علاء خلي احجيلك قصتي ولا تقاطعني الى ان احجيلك حالي كلو ..

علاء ..ماشي صار تفضلي ..

غرور ..اني جنت مراهقة مثل كل المراهقات .. اداوم للمدرسة وارجع ويا صديقاتي واضحك واتشاقة .. وتعرف البنات يسولفن بيناتهن حبيت فلان وحبيت فلان .. وحبيبي عندو سيارة هيج .. حبيبي هيج شكلو يخبل يشبه المطرب فلان ..

وحبيبي من ال فلان .. واني اسمع منهن وانغار .. الى ما احد الايام .. صادفت شاب حلو .. راكب سيارة حلوة

.. ويفتر على الطلعة مال المدرسة .. هذا الشاب لزكلي .. يشمرلي حجي حلو .. ويفتر بسيارتو عليه واني امشي ع رصيف حاطة راسي بلكاع ..

وهذا لحكني الى باب بيتنه
و استمر على هل وضع شهر .. وصادفت عطلة نص السنة كل ما اطلع باب البيت اشوفو يفتر يم بيتنه ويأشرلي ويغمزلي .. اني قلبي طار من الفرحة بيني وبين نفسي ..

لان مراهقة وما اعرف شي .. كلت هذا فارس احلامي .. داومت بلمدرسة وسئلت علي صديقاتي حجيتلهن مواصفاتو وسيارتو ..

كالن اي هذا فلان ابن فلان معروفين زناكين .. كلت الله .. هم حلو هم زنكين هم ابن ناس معروفة ..

اوويلي الله .. وحده من البنات شكالت كالت هذا واحد لعوبي يلعب ع البنات وياخذ منهن الي يريدو ويشمرهن ديرن بالجن .. اني بيني وبين نفسي كلت هاي جذابة هاي تريد تاخذو الها .. وتبعد عيون ..

حلت المدرسة وطلعنه للبيت شفتو يفترلي .. اني هل مره تجاوبت ويا وضحكت ويا .. هوه كبل اجه بسيارتو طبك كدامي وبقى واكف على طريقي ..

اني خفت وبقيت امشي ومدنكه راسي .. فتت من يمو هوه مشة بصفي .. وفتح ايدي وخله بيها ورقه ورجع ع سيارتو ع السريع ..

اني رأسا خليت ايدي بجيبي وعاصرتها على الورقة .. وصلت البيت وركضت لغرفتي فتحت الورقة لكيت مكتوب بيها احبج وقلب حب مرسوم ..

وجوه رقم تلفون واتصلي ساعة 10 بلليل انتظرج .. اني متت ما اعرف اضحك ما اعرف خايفة ماعرف فرحانه مشاعر متخربطة ..

اجه الليل وكملت واجباتي .. وكعدت اتصل ما اتصل .. اتصل .. ما اتصل .. خفت ونمت ما اتصلت .. ثاني يوم داومت وهم من طلعنه شفتو ويأشرلي .. اتصلي يعني .. اني دنكت راسي وضحكت .. اجه بلسيارة يمشي يمي ..

كالي بس خابري اليوم خابري وافهمج كلشي .. بس خابري .. وصلت البيت وايضا درست الدروس الي ما تخلص ..

وكعدت كابلت التلفون اهلي كلهم ناموا .. سحبت التلفون للغرفة وطلعت الرقم اتصلت .. اول دكه .. وجان ينرفع الخط كبل ..

شلون واحد منتظر على جمر .. كال الووو .. اني ساكته .. كال احجي عيني شدعوة .. اني كتلو الوو .. ها شلونك .. انت ردت تفهمني .. كالي على كيفج شبيج مستعجلة .. خلي نتعرف اول شي .. انتي شسمج كتلو غرور انت شسمك .. كال فلان

علاء دقيقه .. زين انتي ما كلتي منو فلان .. كله فلان وفلان ..شنو اسمو وضحي ..

غرور ..اسمو خالد .. صاحب شغلك ..

علاء ..اني انصدمت بس سكتت ونغزني گلبي حسيت اكو مصيبة وره هل خالد النذل ..كتلها كملي ..

غرور ..اوك .. و بده يحجيلي عن حبو وتولعو بيه من اول ما شافني .. وبدينه نسولف اني ويا ..

وشلون انعجب بيه وسائل عني .. وهيج .. واني ما تجاوبت ويا بقيت ساكته خجلانه من حجيه ..

وبقينه نسولف الى ساعة 2 بالليل كتلو لازم انام عندي دوام باجر باي باي .. وسديت التلفون ما انكر كلبي يدك من الفرحة .. اني بديت احب ولكيت شخص يحبني ..

لكن خايفة بنفس الوقت .. واستمرينه على هاي الاتصالات شهر كامل يوميا بلليل نحجي .. وهو مهتم بيه بشكل ..

واني بديت اتجاوب ويا .. والى ان كالي غرور اني احبج وما اكدر اعيش بدونج هنا اني من كال احبج كمز كلبي .. كتلو واني هم احبك ..

خالد ...لازم نلتقي اريد ادحج بعيونج .. اريد اسرح بجمالج ..

انتي خطفتي گلبي شكد عرفت بنات بس ابد ماكدرن يحركن شعرة مني بس انتي غير انتي خليتيني احبج غصبا عني ...

كمت حتى بليلي احلم بيج واذا يوم ماشوفج انجن فدوة غرور لازم اشوفج لازم التقي بيج مشتاقلج والله

غرور ..بقه يسفط كلام معسول ومن هل حجي .. اني بذاك الساع ما جنت اكدر ارفضلو طلب لان جنت مراهقة ومندفعة .. ترددت بلبداية لكن هوه لح لح عليه .. و افقت ..

وتواعدنا ثاني يوم ياخذني ويا كتلو عندي مدرسة خصوصي ما اروح عليها اجي وياك ساعة وترجعني .. واخذني وطبينه للمعمل كتلو شعدنا هنا كال اخاف عليج لا الناس تشوفج ..

انتي مرتي بلمستقبل .. اني دخخخخت بس كال هشكل .. كعدنه وبقى يسولفلي بهذا الكلام المعسول ..

وعشت بغيييير عالم .. هوه بلبداية حاول يلزم ايدي لكن اني تهربت .. هوه ما اصر .. وكمنه هم نحجي بلليل وهم كل  يومين نتشاوف .. هملت دراستي وهملت مدرستي شفت مستقبلي يم خالد ..

وبده يتقربلي كل طلعة .. يتقربلي اكثر .. واني بحلم زوجي المستقبلي ولازم ما اضوجو .. ويتقربلي اكثر الى ان يوم من الايام .. بده يبوسني زيادة واني اموع جوه ايدو .. ويتحسس جسمي كلو ويكولي باذاني احبج ام جهالي .. هنا حسيت بثقل ودوخه عبالك اتخدرت الى ان فقدت ..

ما اشعر بروحي .. اني كل ما نروح متعودين نشرب عصاير يجيب عصاير فرش وكذا .. صحيت وره ساعتين ..

لكيت نفسي ملابسي كلها مو عليه ومشمورة ع قنفة وخالد كاعد بصفحة راسي دايخ .. كتلو خالد شصار .. شنو شكو شلون نمت اني ..

خالد ..حبيبتي جان لازم نتوج حبنه ولازم جان يصير هل شي 😏..

غرور ..اني لطمت على خدي كتلو خالد شسويت احجي شصخمت ولك كول .. شفت اثار جواية .. كتلو خالد شسويت كمت اصارخ ...  كتلو خالد اني امنت بيك شسويت .. وكعدت ادك والطم واملخ بروحي .. وهو يهدي بيه

خالد ..ركضت عليها وحضنتها وكتلها اشششش على كيفج على كيفج .. انتي مرتي وما اعوفج شبيج اهدي اهدي ..

غرور ..جان يقشمر عليه بهل كلام النذل واني الغبية صدكتو ..هدئت ورحت للبيت مكلوبة خلقتي لكيت اهلي ينتظروني لان تأخرت كتلهم ماكو شي بلطريق تعرضت لحادث وشوية دخت بلشارع وهسه صحيت ..

رجعت لغرفتي بقيت ابجي .. على الي سويتو .. بس اامل نفسي ان حبيبي ما راح يخذلني وراح يتزوجني .. وثاني يوم ايضا اتصل بيه .. وكعدت اكولو خالد شوكت تتزوجني ..

خالد ..بكلبي طكيت ضحك هاي من كل عقلها ياهو الياخذ وحدة طالعه ويا بمكان ولاعب بيها شكد ثولة كتلها احم ميخالف والله كريم .. واكيد ما اخذلج اني ابن ناس وكذا .. ومن هل حجي ..

غرور ..اني كلت بعد ما اطلع ويا ابد .. خاف انوب احبل وتصير مصيبة .. هوه يلح عليه كل يوم يريدني اطلع ويا واني ارفض الطلعة .. وجنت الح علي شوكت تتقدملي وشوكت تتقدملي .. وهو يراوغ .. الى ان بيوم .. لحيت علي زايد وتعاركت ويا بالتلفون ..

كتلو انت تجذب عليه انت ما تريد تتزوجني .. انت ما تحبني .. هوه ضحك ..

خالد ..هههههههههههههه انتي كل عقلج .. اني اتزوج وحده طلعت ويايه وكل يوم سهرانه ويايه من كل عقلج شاب ياخذ وحدة مصادقها ونطت نفسها بكل سهولة .. روحي بابا الله يسهلج ..

غرور ..هنا حسيت رجلي بادت جسمي ثلج كمت ارجف شاغت روحي كتلو والي سويتو خالد  شسوي وين انطي وجهي ..

خالد ..غلطة وطيش .. ومحد ضربج ع ايدج وكالج تعالي 🙄..

غرور ..كمت اعيط واصرخ كتلو  انت خدرتني خالد ونموتني .. الله ينتقم منك وهو يضحك .. لزمت وسديت التلفون وكعدت الطم وما اعرف شسوي .. اوووووووف يا ربي .. ابتليت يالله ابتليت شسوي بحالي .. قررت ان انتحر ..

درت بانزين بلغرفة كلها نكعتها ... وشعلت البردات واني كاعدة بنصها اباوع النار تركض دقائق واذا الغرفة كلها احتركت ..

واني ابجي .. ما احس واذا الباب اندفر واخوية طاب للغرفة ويصيح غرور وينج غرور .. اني كمت ابجي بصوت عالي .. ركض عليه وشمر بطانية منكعة وشالني ع جتفو واني اضرب بي اريدو يعوفني ..

يتركني بلنار خلي اموت .. طلعوني وطفوها للنار .. وكعدوا يكولون شلون الحريق صار وكذا .. خفت اكول اني السبب لا يعرفون ليش ..

سكتت وابجي بس .. كالوا هاي يجوز من وره الكهرباء .. ومشت الايام واني وضعي ونفسيتي تدمرت .. اروح للمدرسة اسحل بروحي وارجع اسحل بروحي ..

وصدفة اني راجعة اشوف خالد واكف ع طريقي .. جيت اريد اكلو باسناني بس اخاف افضح نفسي ..

وصلت يمو كالي شلونج غرور .. ما رديت وكملت طريقي .. كالي دحجي لج .. فتح جنطتي وحط بيها ضرف .. كالي شوفي الضرف شنو بي من توصلين البيت .. وانتظر اتصالج مثل كل يوم ومشه هوه ..

اني كلت اشحاطلي بهذا الضروف .. ياربي مليت من هل حياة وصلت البيت وطبعا احنه الغرفة ديصلحوها لان محروكة كاعدين بغرفة اخوية ..

فتحت الجنطة طلعت الضرف وهنا جانت الصدمة .. صور الي .. واني متمددة على القنفة .. وبدون ملابس .. لطمت ع وجهي حيييييييل ... متت ..

وكاتبلي بورقة اتصلي احسن الج .. بس هاي العبارة .. اووووف يا ربي شسويت بدنيتي .. اووويلي يالله .. صار اليل واتسحبت ع استقبال حتى اتصل اتصلت وجاوب كتلو يا ادبسز وقليل غيرة وناموس ..

ولك مصورني ..ولك ليش ما عندك عرض ما عندك خوات ..ولك ليش دتسوي بيه هيج اشسويتلك اني يانذل .. هوه قاطعني كال اششششششش ولج لا اطيح احظج ..لا تزودين الحجي ..اريدج تجين الي باجر ..

والا عكب باجر اطبع 1000 نسخة من صورج الحلوة .. وانشرها بمنطقتكم .. وتعرفين الشباب يكيفون يدحجون هيج صورة .. وتعرفين اكثر اذا اهلج شافوا الصورة شيصير ..

غرور ..اني انصدمت .. هذا شنو هذا خالد الحبيتو .. هذا الي امنت بي هذا الي جان يكول انتي عرضي وانتي مرتي ..

عززة العزاج غرور وين شمرتي روحج ..وكعت بالكاع وانتهيت حسيت الدنيا كلها انهارت كدامي واسودت بعيني حياتي اتدمرت واتحطمت ..

ومن يومها وكمت اروح وارجع اله مثل هسه ما دتشوف انت .. مجبرة خوف على سمعتي علاء انت املي علاء ما اعرف المن اطلع الي بكلبي يا علاء .. انقذني ..

دبرني طلعني من هذا الجحيم ..علاء وشلت روحي وشمرتها بحظنو .. ودفنت راسي بصدرو وكمت ابجي وادك على صدرو ..

علاء ..طبعا يمكن حسيتوا بالي صار بيه هسه يعني حبيبتي الي تمنيتها من الدنيا طلعت مو بنية ومغتصبها هل نذل بقيت ساكت ومصدوم من هول الي كالتو .. وشلون راح اتصرف و شسوي ..

بس هيه تملخ بروحها وشو تملخ بيه هم .. تجرني من شعري .. وتشكشك ملابسي تهسترت .. بقيت اهدي بيها واكوللها ان شاء الله خير .. وسهله والله كريم ونشوف شلون نحلها ..

ومشى الوقت وما حسيت بي ورجعتها لمكانها .. ورجعت اني لبيتنه واني عقلي دايخ ما اعرف شنو الي اسوي .. مضروب براسي ..سطرتني بقصتها

في مكان اخر ..

غرور .. فكرت كلت اني بوضعي هذا .. محد راح يقبلني وينتشلني غير واحد اهبل وفطير مثل علاء .. لازم اجر رجلو .. واوكعو ..لان هوه السبيل الوحيد لخلاصي من هل عار الي لاحكني .. و من اول يوم شفتو .. واني اخطط شلون اوكعو .. بس .. الظاهر ما راح يوكع 🤔.. خططت ان لازم اسويلو سحر .. ورحت لهاي السحارة الي حجتلي عليها صديقتي ..

كالت من عيوني ..اجيبو الج يزحف والله واخلي يمشي ويحجي ويه نفسو وميشوف غيرج .. بس اريد منج تجيبيلي شي من اثرو ..

غرور ..كتلها شنو يعني

وللحكاية بقية ..

للاسف علاء وكع وكعه راح يتدمر من وراها كلو بسبب غبائو وفطارتو الي راح تشمرو بالهاوية

يتبع ...

انتظروا بارت مفاجأ بالليل وعندي حجاية وياكم انتظروني ساعة بل10 بالليل ان شاءالله

#سارة_المجيد🎀