#لا_ياصديقي

#المحطة_الرابعة

#بقلمي_سارة_المجيد

مساء السعادة والسرور ع اغلى متابعين
🌸🌸🌸🌸🌸🌸🌸🌸🌸🌸🌸🌸🌸

شاهين ...سئلت الولد كتلهم يابا علاء شو ما جا .. علاء شد التباريد لو لا .. عبالي ما شادهن ومغلس ما جا خاف لا احجي علي ..

كالوا لا شدهن ومكملهن كاملات .. كتلهم عجل هذا ليش ما جا عليه .. صاير عندك خشم اني انصب عليك واعلمك .. اتفقت ويا اخوتي ننصب على علاء .. ضحكوا كالوا ماشي ..

كتلهم واحد يروح علي على بيتهم ويخبصو .. يكولو شاهين نزل وراح شاف السبالت وانجن .. كال شنو هاي الزبايل .. علاء يريد يقشمرني .. واخبصوا خبص وكولوله يكول هسه تجيبوا الي للمزرعة ..

و فعلا راح واحد من الولد مخبلو .. اني شسويت .. اكو الدرج مال الطابق الثاني من نص الصالة يطلع فوك .. ف اني صعدت فوك .. عندي مسدس ابو البكرة .. وعندي طلقات مال اسفنج هاي تستعمل مال تنضيف للسلاح ..

حطيتهن بلمسدس ولبستو للمسدس بجناد جوه ابطي وتعكلت وكعدت انتظر علاء هههههههه .. والله اسمع الولد يصيحوني .. اني كتلهم ها .. جبتولي الجلب .. هوه وجها اصفر .. طلعت علي من فوك اباوع علي واكف جوه ويبلع برايكة ..

كتلو علاء .. تريد تبوكني علاء .. تجيب هاي النوعيات التعبانه وتحسبهن عليه غالي علاء .. وسفة عليك .. هيه هيج الخوة والعمر الطويل . بس اني مسوي نفسي معصب نار ..

علاء ..جنت ارجف وحلكي يبس من الخوفه شفتو معصب واحنه من يعصب شاهين محد يوكف كدامو لان يثرمو ثرم كلت اليوم نهايتي وموتي ع ايدو راح اتكون ..
ردت اهدئو كتلو شاهين اصبر بس افهمك ..

شاهين .. شتريد تفهمني ولك .. شتريد تكول شفت بعيني .. شنو تريد تفهمني اكثر .. يا حرامي .. ولك ما الله خلقو للي يبوك شاهين .. زين .. سحبت مسدسي و وجهتو علي ..

علاء ..غمضت عيني وجسمي صار مثل السعفه كتلو لا شاهين شدسوي .. لا شاهين فدوة خلي احجيلك ..

شاهين ..اسكت لك نذل .. ضربت طلقة من هاي الاسفنجية .. طلعت الاسفنجة وين لزكت ع رقبتو هههههههه ... هوه تخربط و وكع بلكاع عبالو مات 😂 ...

والله ضحكنه الولد كامو يصحون بي ولك اكعد ناصبين عليك يول هههه .. هوه فتح عيونو ... لزم رقبتو ما بيها لا دم ولا شي .. افتهم نصبة لان دنضحك وهيج .. وجان يتخبل ههههه ..

علاء ..من عرفت ديصنفون عليه من صدك احتركت وضجت ليش هيج يسوون بيه دحجت ع شاهين بغضب كتلو والله يا شاهين من هل لحظه .. اني بطريق وانت بطريق ..

شاهين ..انصدمت من ردت فعلو كتلو يمعود يا علاء دنتشاقة

علاء .. ابد هذا اخر يوم الي وياك خليت وطلعت ..

شاهين ..وهنا زعل علاء وطلع .. دزيت علي ناس .. ما يقبل يرضة .. رحت علي اكثر من مره ما يطلعلي .. زعل من صدك وخابر واحد من الولد انطى كل المتعلقات مال الشغل ..

ومفاتيح المزرعة وكلشي .. كتلهم عوفوا براحتو هوه يرضة .. اخذت واحد من الولد كلفتو بلشغل والمزرعة .. ورجعت لكليتي

و مشت الايام وعلاء زعلان .. ولا يقبل يرضة ولا يقبل يحجي وياي .. و خلص علاء سادس و قدم كليه لكن ما كدر يدرس لان حالهم المادي وكع ..

ابو تمرض وكعد بلبيت وامو مريضة وكومه ادوية يحتاجون .. وجانوا معتمدين على شغل علاء وياي .. وعلاء بطل .. ف سائت حالتهم ..

ف اضطر يشتغل يم ولد عندو معمل مال اثاث .. وترك الكلية و بده يشتغل هناك .. ومن هنا راح تبدي قصة مئساة علاء .. راح اسردها الكم ..

كام يشتغل علاء ويا صاحب هذا المعمل الي اسمو خالد .. ف صاحب المعمل كام يعتل علي .. يعني يشغلو شغل ثكيل .. هوه صاحب شغل ويريد انتاج شعلي بعلاء مريض ما يكدر ..

المهم علاء جان يشتغل بكل قوتو .. و هو مريض جسمو كلو يرجف .. ف خطية ما يشكي ويعتل ع ظهرو حتى يعيش اهلو ..

اني طبعا ما جنت ادري بهذا كلو لان هوه جان زعلان مني وما يقبل ان اتواصل ويا بأي طريقة كانت ..

ما اعرف اعتقد اني تجاوزت على كرامتو ..
او هوه حسها هل شكل .. بس اني والله مو قصدي الاهانه لان هوه عزيز عليه واشاقي .. جنت حاسبو مثل واحد من اخوتي ..

المهم هوه اختار طريقو .. ف علاء يوم عن يوم يوكع حالتو الجسدية .. ف اشتكه يم خالد ابو المعمل كالو اني هيج وهيج حالتي ..

اني مريض وجسمي ما يتحمل عتالة الخشب .. ياريت تشغلني شغلة اسهل .. ف شغلو على مكينه بلمعمل .. وبده يشتغل على هاي المكينه ..

و يسمع ابو المعمل يحاجي صديقاتو وكذا .. ويوميا حفلات الانس والسكر والعياذ بالله .. ف علاء ضاج من هل وضعية بس شيسوي .. مضطر يشتغل وياهم ..

و مرت الايام على هل حالة وعلاء هوه ديشتغل على هاي المكينه .. صار بيها عطل و طفر منها قطعة معدنيه ضربت علاء برجلو وكسرتها ..

وشالوا على المستشفى وجبسولو رجلو .. وتمرض .. وكعد بلبيت .. اني نزلت سمعت هيج صاير بي رحتلو للبيت .. ما قبل يطببني على غرفتو .. كاللهم كولوله نايم .. طبعا اني سمعت هشكل .. سحبت نفسي .. وناوشت امو خرجية بايدها .. كتلها خاله شتحتاجون .. شيلوا التلفون عليه وانطوني خبر .. يجيكم للبيت ..

تشكرتني امو وبوستني لان اني هم مثل ابنها ورابين سوه .. وطلعت .. بقى علاء مشمور بلفراش الى ما تعافة ورجع على ابو المعمل ..

بلاول ما قبلو لان شافو ما يفيدو .. وكعد علاء يتوسل بي ويشرحلو حالهم و وضعهم ..

كالو ماشي تشتغل يمي بلمكتب لان انت ما يفيد تشتغل جوه بلمعمل .. شغلو يمو سايق سيارة مال مسواك ..

وهم ينظف المكتب وهيج .. يعني جايجي ..
و بده علاء يشتغل ويا هذا ابو المعمل الي اسمو خالد بمكتبو .. ويوميا لازم يضل وياهم و سهراتهم .. ويكعد ينظف وراهم .. وياخذ صديقاتهم يجيبهن و يرجعهن بلسيارة ..

واكثر شي صديقة ابو المعمل .. بنية شكرة .. عيونها زرك بيضة .. يجيبها علاء ويرجعها .. ف صارت بينه وبينها سلام ومرحبا .. اسمها #غرور

وهسه راح انقل القلم ل علاء يقصلكم احداث قصتو .. ويوصلها الكم بصورة اوضح ..

علاء ..السلام عليكم ...
قصتي يمكن تكون غريبة وراح تكولون عني عديم الشخصية وانسان ماعندي مبادئ بس من تعرفوني راح تعذروني .. اني جنت اشتغل يم شاهين .. وشاهين سوه بيه هذا المقلب .. صح اني حسيت ان بي اهانه الي .. لكن اني جانت عندي غيره منو ..

ليش هوه دائما الناس تهابو واني لا.. ليش الله منطي القوة واني لا .. خلصت عمري اني امشي بظلو ..

ليش هوه عندو فلوس واملاك واني لا .. ليش هوه 20 بنية تتصل علي .. واني اول بنية عرفتها .. بلشقة مالتو طفرها ..

ف بدا الشيطان يحط بعقلي افكار هواي ويكرهني بشاهين .. وصارت هاي الحادثة وكلت لازم اني انتقم لنفسي ..

وكطعت علاقتي بي ..ومثل ما انذكر فوك شلون تبهذلت بلمعمل ويا صاحب المعمل ..بديت اوصل غرور واجيبها وارجعها .. وبده يصير بينه بلبداية سلام ومرحبا ..

وراها اني جايبها مره .. كالتلي بس اوكف يم محل .. تريد تشتري غراض ف وكفت اني ونزلت هيه تشتري .. ورجعت ركبت ..

غرور ..اني اعتذر منك اخرتك ..

علاء ..احم لا عادي ..

غرور ...انت شنو اسمك ..

علاء .. دحجت عليها بالمرآية الامامية صدن عيني بعينها ..اتخردلت بلون عيونها بووية تذبح كتلها اني اسمي علاء ..

غرور ..عاشت الاسامي ..

علاء ..اني ما تجرئت اسئلها عن اسمها .. استحيت .. ف وصلتها وبقت ساعتين يم خالد وراها رجعتها .. وبلطريق كامت تحجي ويايه

غرور ..انت شعجب ما سئلتني عن اسمي ..

علاء ..اني تلعثمت بلكلام .. ما عرفت اجاوبها ..

غرور ...انت مبين كلش حباب وتستحي .. اني اسمي غرور ..

علاء ..واني حتى ما كدرت اجاوبها .. وسكتنه ثنينه .. وصلتها للمكان الي هيه تنزل بي ورحت .. وره يومين هم دزني ابو المعمل عليها ورحت جبتها .. وهيه اول ما ركبت ..

غرور ..هلو علاء .. شلونك ..

علاء ..اني كتلها اهلا زين الحمدلله .. هيه ضحكت

غرور ...ههههه شبيك مستحي مني تره اني ما راح اكلك ..

علاء ..سكتت ومشيت .. وصلتها ورجعنه بلطريق محد حجة .. و توالت الايام واني كل شكم يوم تجي وتنزل وما اعرف شيدور جوه وتطلع وتركب ويايه ..

الى ان يوم طلعت هيه ضايجة وجها احمر .. ركبت وسدت الباب بقوة .. كالت امشي .. مشيت اني ..

غرور ...ما تكولي شلون متحمل هذا الحيوان الحقير ..هففففف الله ينتقم منو حسبي الله ونعم الوكيل بي

علاء .. استغربت منها شو تحجي ع خالد وكعدت تتحسب علي ..ماعرف شمسويلها

غرور ..اكول علاء خومو تكولو ..

علاء ..ها .. لا لا اني شعليه بينكم ..

غرور ..اي عفية انت مبين حباب وخوش ولد ..

علاء ..اشكرج بقيت ادحج عليها صفنت بجمالها سبحان الخالقها ..والله وصلتها ورجعت ع البيت وراها بشكم يوم هم رحت عليها ..

طلعت اول ما ركبت كالت هلو علاوي مشتاقين .. اني من هل الحجاية حسيت نفسي معت .. كتلها هلو هلو شلونج ..

غرور .. اني ضحكت كتلو هيج شلونج من غير مشتاقين .. احنه اشوق شدعوة عليك يا بذات .. صار شكم يوم ما متشاوفين ..

علاء ..اني ضحكت ومشيت وصلتها للمعمل ورجعت هم تحجي وضايجة وتتحسب ..

غرور ..والله يا علاوي اني بس اشوفك افرح اكول الدنيا بعدها بخير .. انت احد كايلك قبل ان انت حلووو وتجنن 😉..

علاء ..اني ادحج عليها بلمراية غمزت .. اني دولبت .. شنو هل وجه شنو هل عيون شنو هل خلقة .. وصلتها رجعت للبيت مددت .. وعقلي كلو يفكر بيها ..

اتكلب بفراشي ما اكدر انام منين ما اندار اشوف وجها .. هاي الجمال كلو ليش هيج ديسوي ليش هيج طابة بهيج امور .. ضليت افكر وما نمت الليل .. صرت انتظر شوكت استادي يكولي روح جيبها ..

كمت اطير من الفرح من يكولي روح جيبها .. ومن ارجعها ابقى ادحج عليها وعلى مشيتها .. شنو من شنو الله خالقج ..

حتى كمت اروح وارجع ع منطقة الي تنزل بيها هيج لمجرد حتى اتذكر مكان نزولها .. ارجع بلبيت اكول شبيك علاء هاي شبيك معقوله حبيتها ..

لا لا ..شحب منها دحج شلون وضعها .. والى ان يوم استادي تأخر ما عاد يدز عليها يوم يومين 5 ايام .. واني الوب .. شلون بيه شبيك يمعود ..

الليل ما انامو .. لا اكدر اسئلو لا اعرف طريقها وين .. والله وره اسبوع صاحلي كالي روح جيبها ..

اني ركضت مثل المخبل دفرت الجاي وطشيتو .. كلي شبيك انثولت مال الثول .. كتلو العفو استادي هسه من ارجع انضفو

خالد ...امشي ولي .. هسه اخلي واحد من العمال يجي ينظفو .. ولي ..

علاء ..اني ركضت شغلت السيارة مثل المجنون وصلت دحجت عليها وعلى لبسها ومشيتها .. ركبت عطرها طب بخشمي فقد عقلي ..

غرور ...هلوو علاوي اشتاقيتلك كوووومه كووومه .. بداعتي عليك ما اشتاقيتلي ههههههههه ..

علاء ...اي عجل شلون اشتاقيتلج هواي .. وكلت وينها هل غيبة خفت صاير شي .. لا اكدر اسئل استادي لا اكدر اوصلج ...

غرور ...ضحكت كتلو لا ماكو شي لا تخاف شوية ضروف .. بسسسسسسسسس ... احسك تريد تاخذ رقمي 🙄 ..

علاء ..ها لا لا لا .. رقمج شنو هههه .. لا لا .. ضحكت هيه كالت امشي امشي هههه .. رحنه وصلتها .. اشتعل اني بنار حتى تطلع من المكتب ..

اكول بيني وبين نفسي شبيك امداك كمت تغار .. شعليك انت .. انت مريض ومحد بحالك وفكر الذيب .. شسوي بيك .. طلعت هيه .. ركبت وابتسامتها اكيد ع وجها ..

مشينه وهيه تشاقيني وتضحك .. وتكولي ها علاوي تريد ترقمني .. ها علاء .. تريد ترقمني .. وصلنه المنطقة ..

ونزلت واندارت عليه من الشباك مالي هيه تركب طبيعي ليورة ..

غرور ...انطيني ايدك اريد اسلم عليك

علاء ..اني مديت ايدي حتى تسلم عليها واني فاتح حلكي .. ع جمالها ..

سلمت عليه وخلت بيدي ورقة .. اني دحجت عليها حطت اصبعها ع حلكها .. كالت اششششش لا تحجي لاحد اووك ...

وغمزتلي .. مشت هيه ... واني فتحت الورقة واذا رقم تلفونها .. اويلي الله

هيه انطتني الرقم .. ومشت .. واني جسمي كلو كام يرجف .. يا ربي هسه وكت الحالة تجيني .. ف دورت العلاج مالتي اخذت حباية وهدئت شوية .. رجعت للبيت ..

واني خايف ومتردد اتصل بيها ما اتصل بيها .. بقيت الليل كلو اني مكابل التلفون وكاعد .. وخايف ان اتصل .. نمت وثاني يوم نفس الروتين

مال الشغل والكنس والمسح .. والاهانة ..
بس متحمل اريد اعيش .. و عقلي كلو مشغول بغرور .. ما عاد افكر بشي بحياتي غير بيها ..

و بعد يومين رحت كلعادة اجيبها .. وصعدت سلمت .. بس سلامها من وره خشمها .. كلت شبيها هاي ..

ما حجت كلشي مشينه وصلتها ومن طلعت ركبت هم وجها ثكيل عليه .. سئلتها ..

كتلها ليش اليوم وجهج ثكيل عليه .. بدر مني شي ضوجج او زعلج مني ..

غرور ..شدعوة يا بذات صار يومين انطيتك الرقم ما تخابرني .. اني ارتاحيتلك واريد افضفضلك الي بكلبي .. اووووف يا علاء لو تدري شكو بكلبي ..

علاء ...اخاف اسببلج ازعاج او احراج ..

غرور ..لا لا تخاف من ساعة 11 بلليل و ورة اتصل عادي ..

علاء .. رجعت للبيت وغسلت وبدلت وكعدت انتظر ساعة 11 .. اريدها بس تجي صارت ساعة 11 ودقيقة ع اساس اريد اثكل شوية ..

ما تحملت اتصلت .. الرقم مشغول 😕😕 .. سديتو وره 5 دقايق اتصلت .. ايضاً مشغول .. وبقيت اتصل الى ما عبرت الساعة 12 ونص والرقم مشغول ..

وجان اكول هذا اخر اتصال اتصل اذا مشغول بعد ما اتصل .. دكيت وجان يدك التلفون ..

اني تعدلت على حيلي كعدت عدل .. جاوبت هيه الوو .. اني بقيت ساكت .. استحي ..

ما عندي هاي الجرائة احجي ويا بنية .. هيه تصيح الووو الوو احجي .. عاد اني شجعت نفسي وشوية تا احجي .. كلت الوووو ..

غرور ...نعم منو حظرتك ..

علاء ..اني علاء ..

غرور ..هلوو عيني البذات .. شدعوا عيني الا نعاتبك يله تتصل بايع ثكل علينه ..

علاء ...لا شرحتلج الموقف ههههه .. ومن 11 اني اتصل والى هسه يله حصلت .. كلو مشغول مشغول .. هيه مثل الي ارتبكت شوية ..

غرور ..احم ها .. هاي اختي تحجي ويا حبيبها شالعين كالبي .. معلينه بيهم .. شلونك اخبارك ..

علاء ...الحمدلله شلونج انتي ..

غرور ...اني مو زينه ..

علاء ...ليش يا ستار شكو ..سكتت شوية وتنهدت ..

غرور ..علاء .. ما اعرف شلون احجيلك الي اني عايشتو ..

علاء ..صوتها صار بي غصة .. كتلها على كيفج احجي .. كوليلي الي تحبي ..واني كلي اذان صاغية الج ..

غرور ..اوك ..بس علاء اريد اسئلك امك عدلة لو متوفية ..

علاء ..عدله بس ليش ..

غرور ..احلفك بداعت امك ونظرها .. شتسمع مني سر بيني وبينك .. اني هواي سئلت عليك خالد .. وهواي بقيت اراقبك وشفتك ولد تستحق الثقة ..

علاء ..ماشي .. حلفت ..

غرور ..اوك .. علاء اني مو بنية تعبانه مثل ما تتصور .. اني بنت ناس لكن .. اااااه من الزمن الي سوه بيه هيج ..

علاء ..شلون ..

غرور ..اني تورطت .. واكعة بورطة .. وما اعرف شلون اطلع منها .. وكمت ابجي ..

علاء ..شفتها انهارت بالبجي اني كمت اهدي بيها .. و بهاي الاثناء سدت التلفون ..

دكيت ما جاوبت .. ورجع الخط انشغل وره شوية .. كلت اووو هاي اختها رجعت لزمت التلفون ..

اني بقيت افكر ليش هيج حجت .. وشنو الي صاير بيها .. وثاني يوم رجعت بلليل وهم اتصل اتصل بلموت دك .. وجاوبت .. كتلها هلوو مساء الخير .. اني علاء ..

غرور ..هلوو علاء شلونك .. اعذرني البارحة اخوية راد يشوفني احجي بلتلفون وسديتو بوجهك ..

علاء ..لا عادي ما صار شي ..

غرور ..اي شلونك اخبارك سولفلي عنك ..

علاء ..اني الحمدلله بلشغل والله كريم ..

غرور ...عفية عليك .. علاء اريد اسئلك سؤال بس ما اعرف شلون ابدي ..

علاء ..اسئلي الي تحبي .. اني بهاي الاثناء معت ودخت بصوتها .. و لو تكولي اقتل امك وابوك اقتلهم ..

غرور ..علاء .. جاوبني بصراحة .. انت تحب ..

علاء ..اني ارتبكت من سؤالها .. كتلها لا والله لا والله العظيم ما احب ولا حاب بحياتي .. هيه ضحكت

غرور ..ههههه على كيفك على كيفك بلحلف امصدكتك ..

علاء ..ضحكت اني ضحكة خجولة ..

غرور ..يمه فدوة للضحكات الزغيرونات المستحيات ..

علاء ..بوووية خررب عمي مكدرت اسيطر ع نفسي ماتحمل كمت ابلع برياكي .. اريد اغير الموضوع كتلها انتي انتي يمكن ردتي تحجين البارحة شي ..

غرور ..والله يا علاء صعبة .. داحاول احجيلك بس ما داعرف شلون .. ورجعت العبرة تخنكني ..

علاء ..اني كمت احس العبرة بصدري مو بصدرها .. كتلها احجي عاد وكعتي كلبي ..

غرور ..اووووووف اووووف يا كلبي ..

#وللحكاية بقية ..

الاحداث المشوقه بدت شتتوقعون شنو فلم غرور 😉

اذا شفت تفاعل قوي انزل بارت اضافي ..لان التفاعل ضعيف مداشوفو مثل قصة العنودية مادري ليش معقولة ماعجبتكم القصة كولوا عادي حتى لا اتعب واكتب حبايب اذا متريدون اوقفها مو مشكلة عياني 😘😘

يتبع ...

#سارة_المجيد🎀