مساءكم هيل وزعفران حبايب لكثرة الطلبات بأن اكتب بارت اضافي ولبيت طلبكم تدللون عليه بس شوية ع كيفكم ويايه تعرفون بيه مريضه بعدني لاكن متهونون عليه وكتبتلكم هل بارت القصير هدية مني الكم  😘😘😘

#لا_ياصديقي

#المحطة_الخامسة_عشر

#بقلمي_سارة_المجيد

🌹🌹🌹🌹🌹🌹🌹🌹🌹🌹🌹

علاء ..بقينه لليل تعشينه بيتهم .. وركبنه بلليل وصعدنه على الجزيرة .. ودخلنه للبيت نضفتو وكذا .. وكعدنه نتعلل اني وشاهين ..

شاهين ..اي علاء .. احجيلي شنو موضوع هاي البنية .. كل ما اسئلك ما تحجيلي عنها .. شنو السر البيها الي هيج انت متخبل عليها ..

علاء .. سكتت ما اعرف شلون اجاوبو بس لابد ان احجيلو بلكت يساعدني بشي ..

كتلو شوف شاهين .. وكعدت احجيلو قصتي ويا غرور من اول لحظه شفتها بيها الى اليوم ..
هوه بقه صافن ..

شاهين ..بيني وبين نفسي الاسم تذكرتو بس معقولة هيه نفسها مو معقولة اكيد تشابه اسماء فكتلو معقولة هذا كلو صاير زين ليش ما جيتني ليش ما كتلي .. اساعدك اني .. ما دافهم ليش ..

علاء ..اني تلعثمت .. كلت بقلبي خومو اكولك هيه ما تقبل احجيلك .. كتلو ها هوه ما صار رهام اكولك .. و ع عموم شاهين انت باجر مو نازل لتكريت ..

شاهين ..اي ..

علاء ..اريدك تروح لبيت اهل غرور .. ادليك العنوان وتروح عليهم لان اني اكيد هسه ابويا واخوية مراقبيني ومراقبين البيت واخاف يلزموني ..

وتبلغها ان اني بعدني على الوعد وياها ومهما كانت الضروف اني اتزوجها وتكوللها لازم اشوفها ضروري .. خلف دائرة البريد الجديده ..

شاهين ..زين شوكت ..

علاء ..باجر ..

شاهين .. باجر ما اكدر ما الحك .. لان عندي شغل ابغداد لازم اروح .. وانت شينزلك منا من الجزيرة حتى سيارات ماكو ..

علاء ..زين .. شوكت ترجع ..

شاهين ..بعد 4 ايام .. بس اشوف وضع بيتي واصرف شكم غرض ع اقل الثكيلة منهن ابيعهن بيش ما جان احسن ما يتفرهد البيت ..

علاء ..بس امانة باجر تروح تنطيها الخبر يجوز هسه بالها عليه وهاي شكم فلس تنطيها الها ..

ضحك هوه وكال شنو هل رومانسية ابو رومانسية .. والله ومددنه ونمنه .. كعدت الصبح لكيت شاهين طالع .. واني بقيت بلبيت كاعد ..

شاهين .. اني نزلت لتكريت .. وبنفس اليوم العصر كلت اخلص من امانة علاء الي ذبها بركبتي .. رحت للعنوان .. واني كلبي كلو شك ..

واتعوذ من الشيطان .. قريت العنوان شفت غير عنوان شوية اطمئن كلبي ان شاءالله مو هيه غرور الي جنت امصادقها قبل .. وصلت زين شسوي ادك الباب اذا احد يطلعلي شكولو .. والله يا علاء ورطتني ..

اني واكف طلع ولد زغير .. كتلو تعال عمو .. اجه كتلو عمه غرور هنا .. كالي خاله غرور كتلو اي اي .. كالي اي .. كتلو روح كوللها خطار يريدها .. ركض الولد طب جوه واني على اعصابي كاعد اخاف شو منو يطلعلي .. واتحسب على علاء بس لا تصير مشكلة بسببك ..

طلعت غرور واني وياها وجه بوجه .. هيه تفاجئت واني انصدمت بيها ..بهتت بمكاني كلت لا يالله هيه هاي يول علاء الي كاتل نفسك عليها .. هاي غرور اصلا صديقتي .. واصلا اني عفتها لان عرفتها مو خوش .. بس تدراكت الموقف وما حسستها ان اني تفاجئت بيها .. سويت نفسي ما اعرفها او ما اتذكرها ..يعني غلست

غرور .. اني جنت ارتب بملابسي بلغرفة اجه ابن اختي يركض يصيحني يكولي اكو خطار .. طلعت ما اشوف وااذا شاهين بوجهي .. كهرباء ضغط عالي لزمت جسمي .. حسيت ان كلشي سويتو راح ..كمت ارجف اريد احجي لساني اتربط اوووف يالله شراح اسوي

شاهين .. مرحبا

غرور .. اهلا وسهلا

شاهين .. حظرتج غرور

غرور .. اي تفضل

شاهين .. شلونج .. شلون صحتج ست ..اني جايج من طرف علاء .. محملني رسالة الج

غرور .. تفاجئت من كالي ست .. معقولة ما عرفني .. كتلو اهاا .. اي والله ياريت لان كلبي نار علي

شاهين .. ضحكت .. بس بكلبي كتلها سهله غرور عايشة الدور .. تضحكين على هذا المسكين .. اني دواج مو غيري اذا ما عرفتج انو الله حق فلا اتسمه ابن ابوي بسيطة .. كتلها يكول علاء .. كيت وكيت وكيت .. ويكول لازم اشوفج وره البريد وره 4 ايام ..

غرور .. ان شاء الله اكون بلموعد .. كول لعلاء هشكل

شاهين .. يالله في امان الله

غرور .. الله وياك

شاهين .. ركبت سيارتي ومشيت اني بين صدمه وبين ذهول من الي شفتو .. و كلت لازم اعرف الحقيقة .. رجعت للبيت بدلت وتعشيت .. وصفنت ويا نفسي .. كلت لازم ابدي من يم خالد .. خالد هوه العندو الجواب اليقين واني اعرف خالد خوش رجال وما راح يكذب عليه ..

ركبت وطلعت على خالد لان اني ثاني يوم لازم اطلع لبغداد .. ف رحت لخالد .. لبيتهم كالوا بلمعمل ديرتبو لان مبيوكة منو غراض .. طلعت للمعمل نزلت للمكتب الي بلمعمل .. مسدود

دكيت الباب طلعلي خالد .. الرجل رحب بيه هواي .. وتحمد على سلامتي وكعدنه اني ويا نستذكر سوالف قبل .. كتلو خالد جايك بموضوع ..

خالد ..امرني ابو سرحان اني عيوني الك ..

شاهين ..ما يأمر عليك ظالم .. بس اريد اسئلك عن موضوع بنت تعرفها انت اسمها غرور ..

خالد اي ..

شاهين ..شنو قصتها ..

خالد ..والله ما عدها قصة .. اني كل مره تطلع وياي بفلوسها .. حالها حال اي بنية تعبانه .. وحتى مو بس اني وفلان وفلان وفلان .. تروح يمهم بفلوسها ..

شاهين ..يعني خالد مو انت او احد اعتده عليها .. وهددها بصور ..

خالد ..شاهين صدك يعني كل عقلك .. انت مو تعرفني .. اني اهدد بنية بشرفها .. هذا يمين الله ..

شاهين ..وكام جاب القران واني جلبت بي .. وحط ايدو ع القرأن وحلف

خالد ..هذا يمين الله اذا اني لامسها مو برضاها ..وهيه الي تريد لان طماعة تريد فلوس وتبيع نفسها علمود الفلوس

شاهين ..اني من حجه هيج صدك اقتنعت لان كالي ع ناس هم دتطلع وياهم .. اكدر اروح اسئلها .. ورجع

خالد ..خووووش .. اسمع شاهين هيه شوية انوب راح تجي ..

شاهين ..اتخبلت من هيج كال لا يالله هذا علاء ديمشي وراح يوكاع بالهاوية ومحاس ع نفسو ..كتلو يعني بعدك تتواصل وياها ..

خالد ...اي والله وداعتك داكولك بفلوسها ..

شاهين ..تمام من تجي خليني اني اطلع بره واسمع حجيها ..

خالد ..خوش كلام ..

شاهين ..وره شوية اجتي سيارة .. كالي اجت .. اطلع وره البيت .. طلعت وادحج .. واذا غرور نازلة وتتمندل بمشيتها وتتمضحك ..

وطبت وكعدت ويا خالد .. وبده خالد يسولف وياها .. ويسئلها على صدقانها فلان وفلان .. وهيه تضحك وتجاوب

غرور ..يمعود عفتو مو مثلك يدلل الوحدة 😉

خالد ..اكييد ادللج انتي تخلين الواحد يطير لغير عالم ياحلوة 😉
غرور ..عجل يله شوفني الدلال وينو 😌

خالد .. صااار يدلل الحلوو 😉

شاهين ...الي شفتو وسمعتو خلاني انصرع جسمي كلو كزبر لا مستحيل اخلي علاء يخطي هل خطوة ويتزوج هل انسانة الوصخه علاء صديقي لو تموت ماخليها تضحك عليه ...

لان تأكدت ١٠٠% هاي ضاحكة ع علاء .. ومدمرتو .. درت وجهي ومشيت .. ما كدرت اطلع ع جزيرة فوك لان الوكت تأخر .. والامريكان نصبوا سيطرة ع طريق ..

وثاني يوم اني لازم الغبشة اطلع لبغداد .. ف نمت وطلعت لبغداد .. واني مقرر ما اتأخر ارجع حتى ابلغ علاء بلي صار وافضح هل خبيثه كدامو حتى اضع حد للي ديصير لان مستحيل اخلي يوكع هل وكعه ..

اكولو لا ياصديقي ما اسمحلك تدمر نفسك بيدك ...لاكن للاسف دائما تجري الرياح بما لاتشتهي السفن ..

وسبحان الله شائت الاقدار واتدمر البلد وصار الاحتلال وتم اعتقالي ابغداد وتروح الحقيقة ويايه 4 سنوات ...

بقيت بسجن بوكا وگلبي مشتعل نار ع اهلي وع حبيبتي وع صديقي الي مضحوك عليه جنت الوب الليل كلو افكر بس لايتزوجها واني مو يمو شلون ياربي ...

في مكان اخر

علاء .. بقيت انتظر شاهين يجي حتى يردلي منها شي شي يطمني عنها .. ثاني يوم اجه اعرف شاهين راح لبغداد عن مود بيتو ..

ومشى اليوم عادي واني كاعد بهل صحراء .. ما ادري بلدنيا .. ثالث يوم اجه وهم شاهين ما بين ..

بقى يوم ع موعد مالي ويا غرور .. خررررب ببليسك شاهين يعني ما تصبرلك يومين .. اقلها مر عليه فهمني شصار ...

رابع يوم كلت ما بيها مجال اني لازم انزل لبيت شاهين اشوف شصار ..

ومناك اروح انتظر غرور واشوفها بنفس المكان الي اتفقنه علي اني وشاهين و اكيد وصلو الها .. طلعت امشي باتجاه الشارع العام ..

بلكت تفوت سيارة بلكت احد يفوت شي .. يشيلني ويا .. السيارات تطب ومحد يوكف .. حقها الناس تخاف الوضع تعبان والفرهود بكل مكان .. والدنيا ضايعة ..الخراب عم البلد

بقيت انتظر ع شارع ساعتين .. وجان صدفة ينزل فلاح من فلح جد شاهين .. شافني و وكف ..

عرفني .. كالي ها علاء .. شو واكف هنا شجابك .. كتلو قصة طويلة .. انت نازل لتكريت .. كالي اي .. كتلو اخذني وياك .. والرجال خطية مشه ..

الرجل ..وين رايح ..

علاء ..لبيت ابو شاهين ..

الرجل ..يالله اني هم رايح هناك .. خطية يكولون شاهين ابنهم مختفي .. والله حرامات هذا الزلمه الزين يروح ..

علاء ..درت وجهي علي انصدمت من كال هشكل قطرة دم ما بقى بيه .. كتلو شدتحجي انت شمدريك ..

الرجل ..مو اني جنت يمهم البارحة وكالبين الدنيا علي .. وهسه اني نازل اريد اسئلهم شصار ما صار .. تعرف احنه من زمان يمهم نشتغل ومثل الاهل ..

علاء ..اني على هل حجي سكتت .. انضربت براسي .. لا يالله شنو الصاير شاهين وين رايح شصاير بي .. يا ربي سترك .. وصلت يمهم لكيت الزلم كاعدين بلديون سلمت وكعدت ..

سئلت واحد من الولد اخوتو  كتلو شنو القصة حجالي عاد كالي هناك بغداد واختفه .. ودنحاول نوصلو ما نكدر ..

بقيت كاعد يمهم شوية .. بس عيني على الساعة ... اريد الحك على غرور .. قبل الوقت ب ساعة تقريبا كتلهم اني اترخص

ابو شاهين ..وين وليدي ابقه ع العشه

علاء ..تسلملي عمي دايم متقصر بس عندي موعد ويه صديق ولازم هسه اروح

ابو شاهين ..ماشي وليدي الله وياك سلملي ع الوالد

علاء ..الله يسلمك يوصل ..وان شاءالله ربي يبرد قلبكم ع شاهين ونسمع عنو اخبار تفرحنه

ابو شاهين ..اميين يارب

علاء ..طلعت من بيت عمي جاسم .. وركبت تكسي ورحت انتظرها بنفس المكان وره دائرة البريد الجديدة .. ضليت اتمشى وانتظرها ..

اتمشى وانتظرها ..عبر الوقت ما اجتي بدت امالي تروح .. شاهين راح واختفه مالو اثر صديق عمري راح من ايدي وغرور ما عاد تجي شصاير بلدنيا يا ربي ..

واني رايح جاي بهل شارع الضيك .. لعبت حتى نفسي .. ضجت ...

كمت اريد اطلع ع شارع العام اخذ تكسي .. ويا ما طلعت جان اشوف تكسي وكفت دحجت وجان اشوف ....

.............

وبدأ علاء مسيرة حياتو وحدو بدون مساندة من صديقو راح نشوف الخذلان منو لشاهين والطعنه الي غرزها بضهرو .....
وراح انشوف شلون راح يخبص بدون وعي وتفكير منو لان الي وكعتو حصلت مبتاغها والاسد انسجن وانربط وراح تلعب بكيفها وتسحب علاء لجرف الهاوية

كل هذا باجر انشوفو في بارت 16

#وللحكاية_بقية

دخيلك يا حزن ...خليني مره ارتاح

خل مره بحياتي ...أفرح بروحي

جبت اسنين عمري ..ونه
اصب دموع

أشد جروح غيري ...وتنزف جروحي 💔

يتبع ...

#سارة_المجيد🌹