#لا_ياصديقي

#المحطة_الحادي_عشر

#بقلمي_سارة_المجيد

علاء ...من نزل شاهين بأجازة كلت لازم احجي ويا ...والله بدلت ملابسي وطلعت عليه كلت محد يحلها غيرو ..

وابويا يستحي منو .. ويقدرو .. ركضت لبيت عمي ابو شاهين .. دكيت الباب طلعوا الولد .. كتلهم شاهين موجود ..

كالوا اي والله قبل شوية اجه من دوامو تعبان ونام .. كتلهم كعدوا الي رحمة لاهلكم .. والله موضوع مهم .. كالوا ماشي ماشي طب اكعد بلديوان وهسه نكعدو الك .. والله طبيت بس اني شلون واحد كاعد على جمر ... اريدو بس يجي ..

طب شاهين ..

شاهين ..هلوو علاء خيرك يمعود شكو شصاير قلقتني ..

علاء ..اني ما حسيت على نفسي جيتت على رجلو .. كتلو بالله داخل وبيك .. دخيلك ابو سرحان .. نزل عليه وباسني من راسني .. و وكفني على حيلي ...

شاهين ..وصلت .. بس اهدئ واحجيلي شبيك ..

علاء ..والله اني كعدت وشربت المي الي جابوا الي الولد من شافوني متهستر .. كتلو والله يا اخوي .. ابويا ما يقبل يزوجني .. هوه ضحك بس بتعجب ..

شاهين ..هههههه ليش لازم يريد يحجبك ..

علاء ..شاهين بله مو بحال مداهر اني ..

شاهين ...ماشي ماشي اريد اضحكك شوية .. كولي شبي ابوك ما يريد يزوجك ليش ..

علاء ..والله احب بنية .. وكتلو اخطبها الي .. شو كل ما احجي ويا هوه يتخبل عليه .. ويكوم يصيح .. راح اتخبل ليش مايقبل .. حتى ما يكولي السبب شنو ..

شاهين ..سهله سهله .. ارتاح هسه .. والعصر نروح اني وياك ان شاءالله مكضية ..

علاء ..هسه شاهين هسه نروح رحمة لاهلك ..

شاهين ..اصبر هسه ابوك نايم وين نروح بهل ظهاري .. اكعد نتغدة سوه اني وياك ونروح العصر .. واني افتهم من ابوك ليش هيج كاعد يسوي ..

علاء ..اسمع شاهين .. والله والله والله اذا ما اخذت هاي البنية .. والله العظيم انتحر واحرك البيت بلي بي ..

شاهين ..علاء .. انجب وهل حجي ما تعيدو افتهمت .. عيب هل سوالف .. وهاي قلة ايمان .. وما اقبل علي اني .. والله لو ما انت صديقي الا اسمعك حجي ما يسرك زين ..

اهدئ وبعدين نفتهم شنو القصة .. جابوا الغدة وكعدنه .. شفتو ما اكل امبين مقهور جثير .. كتلو شبيك ما تاكل ..

علاء ..ما الي نفس شاهين كلبي راح يطك مو بحال اكل والله ..

شاهين ..اكول ولك .. صاير وجه الغراب .. اكل لا تسوي سوالف البنات .. اوووي ما اشتهي ابو حلك الاعوج ..

علاء ..اي قلد قلد انت الله جابلك .. ضحك هوه وكال اكل اكل تخليني انتحر بلاكل كلو وحدي .. وكعد يفلسلي اللحم كدامي ..

خلاني اكل غصبا عني .. و ضلينه نسولف وهو اغلب الوقت يشاقيني ويضحك وهيج يريد يطلعني من جو الكئابة الي اني بي ..

بس اني اكو شي بداخلي غريب ما يخليني افكر بكلشي غير بغرور .. هفففففف شسويتي بيه ولج .. اشسويتي .. و صار العصر .. كتلو ها شاهين مشينه ..

شاهين ..اي بس خلي اصلي وابدل واجيك ..

علاء ..ماشي انتظرك ..

شاهين .. ليش انت ما تصلي ..

علاء ..ها .. لا ما اصلي من فترة ..

شاهين ..ليش علاء .. احنه من زغرنه نصلي .. واعتمادنه كلو على رب العالمين ..وسفه عليك

علاء ..اني خجلت من هيج عاتبني .. كالي كوم توضه وهسه اني وياك نصلي .. كمت اريد اتوضة اشو اني احط المي ع جسمي احسه يجكجكني .. يا ربي شلون ..

بس هيج مسحت نفسي شلون ما جان .. جيت وكفت وشاهين مقابيلي كاعد يصلي .. اني وكفت على السجادة .. بس نويت الصلاة جسمي كلو كام يرجف مثل السعفة ... وعيوني احسها تروح يمنه ويسره ..

ما احس واذا اني كاعد بلكاع .. الولد ركضوا عليه .. عبالهم هاي الحالة اجتني مال مرضي .. بس اني اعرف حالتي مو هشكل تجيني ..

والله شالوني الولد كعدوني وغسلولي وجهي حسيت جسمي صخن مثل الواحد ومضروب ع راسو من الوجع ..

شاهين ..كملت صلاتي شفت علاء مو تمام كتلو ها علاء خيي خيرك شبيك احجي

علاء ..ها لا مابيه شي بس شوية حسيت بدوخه

شاهين .. اهاا عجل يالله مشينه ..

في مكان اخر

شيماء ..شدسوين ولج

شهلاء ..وجع قطعتي عليه حبل افكاري امداج

شيماء ..وشسوينالج عيني اوووي ..احجي شدتكتبين

شهلاء ..قصة شكتب يعني رسايل غرام مثلا

شيماء ..شو خليني اقراء شوية حبابة

شهلاء ..مو هسه خلي اكملها بعدين اقريها

شيماء ..ماشي ...زين احجيلي شخبارج ويه شاهين شو اشوفو مشغول هل ايام مديجي يمنه اخاف ولج وحدة ضاحكة عليه وديمشي وياها 😨

شهلاء ..اووي وجع انتي ماعندج حجاية بيها خير شو كومي من يمي كومي الله يطيح حظج حركتيلي دمي ...شلت الدفتر وركعتو براسها ..

شيماء ..اااخ شبيج خررب يومج وجعتيني هاي فوك ما نبهج اخاف يحب عليج 😏

شهلاء ..اتطمني شاهين ميشوف غيري ولا يكدر يحب غيري ..روحي شوفي ستوري الي عايفج ولايدري بيج اخاف هوه يطلع يحب عليج وحدة 😏

شيماء ..لا عيني ستوري حبيبي كتوم وفقير وحباب مو مثل شاهينج مفضوح و وكح الله ميجرعو ههههههه

شهلاء ..هههههه يمممه اروح فدووة للوكح مالي امووت ع ربو فديتو ...هوه غير مصفي بنات المنطقه سمعت 😂

شيماء ..يممه ولا تغار هاي لو اني اموت واحرك روحي

شهلاء ..لان واثقه من شاهين يحبني بس اني ..واما ذنيج مجرد نزوات وعلاقات عابرة مو حب 😌😌

شيماء ..اي عيني الله يهني سعيد بسعيدة شعلينه ههههههه المهم كومي دنحظر العشة صار المغرب هسه يجي بابا

شهلاء ..صدك وين راح بابا

شيماء ..راح لبيت عمو جاسم دز عليه علمود الورث مال جدتنه الله يرحمها يريد ينطي حصتو

شهلاء ..اهاا خطية عمو
يله تعالي شيلي هاي الصينية حبابة دالم الاقلام والدفاتر مالتي ..

شيماء ..هيه تاكل واني ابتلي كومي امري لله ..

في مكان اخر

علاء مشيت اني وشاهين .. ورحنه على ابويا طبينه للبيت لكيت ابويا هستوه يريد يطلع .. شافني جايب شاهين وخزرني .. اني دنكت .. ابويا استقبل شاهين .. ورحب بي وكعدنه .. اني وابويا وشاهين واخوية الازغر مني اسمو ضياء ..

بده الحجي وشاهين سئل ابويا .. كالو اي عمي ابو علاء .. علاء جاني يكول ابويا ما يقبل يزوجني المراة الي اريدها .. ما جاعد تكول شنو سبب رفضك الها او ليش هاي العرضة .. سكت ابو علاء شوية ..

ابو علاء ..والله يا وليدي يا شاهين .. اني اكول الله امر بالستر .. وخلي رفيجك يعوف هل بنية احسن الو والنه .. واني جدامك يا بنية يريدها اروح باجر اخذها الو ..

شاهين .. ماشي عمي بس فهمنه شنو سبب رفضك .. تنهد الرجال وكال .. ما زال تلحون حتى تعرفون .. ماشي عجل اسمع مني ..

شاهين ..اي عمي نسمع ..

ابو علاء .. جاني علاء كالي بنت فلان الفلاني .. واهلها من الفلانين .. وبيتهم ب فلان مكان ..

علاء ..((طبعا ابويا ما ذكر لا اسماء ولا عنوان ..كلو حرفياً فلان و فلان))

ابو علاء .. اني تفاجئت ما سامع بعشيرتهم ..

شاهين ... واذا يا عمي عشيرة مو من الديره شنو البيها عادي هواي ناس هنا مو من ديرتنه وخوش ناس ..

ابو علاء ..ادري يا وليدي خليني اكمل ..

شاهين ..العفو عمي كمل ..

ابو علاء .. ورحت على عنوانهم اسئل عليهم عندي هناك اصدقائي .. سئلت اول واحد كتلو يابا بيت فلان تعرفوهم بمنطقتكم ..

شو هذا كبل كال اوووو عوذة .. غدي .. شنو هذول شجابك عليهم تسئل عليهم .. هذول والعياذ بالله سيرتهم وسيرت بناتهم بكل المنطقة ..

علاء .. احنه كلنه اندهشنة ..
من كال هيج ابويا .. ضلينه واحد يدحج بوجه اللخ .. كمل ابويا .. وكال

ابو علاء ..كلت ميخالف .. خلي اسئل غير هذا يجوز هذا مفتهم غلط .. يجوز كلشي يصير .. وداعتكم يا ولدي .. واسئل 5 بيوت عنهم .. والكل كال عنهم هشكل الناس عليهم سمعه مو زينه وبناتهم معروفات بالمنطقه مشيهن باطل ..

ف يا وليدي شاهين .. احنه ناس مستورين .. وما يرهمولنه هيج ناس .. والشرف عدنه اهم من الهوه ..

شاهين ..والله عمي ونعم من اصلكم .. واشوف بعد كلامك ماكو كلام ..

ابو علاء .. عجل عقل رفيجك وفهمو ..

شاهين ...ان شاء الله عمي يصير خير .. يالله اني اترخص ..

علاء ..طبعا كلام ابوي مثل الضربة القاضية ع راسي بقيت بصدمه ماكدرت احجي شي حتى فشلت من شاهين هسه شلون ادحج بوجهو ...

وطلع شاهين واني مجلب بي ..

شاهين ..طبعا هذا صديقي واكع وع حافة الهاوية مديشوف المصير الي منتظرو لو اخذ هاي البنية معقولة علاء هيج ...طلعت جان يجلب بيه كتلو تعال اركب علاء خلي نسولف ...

علاء ..ركبت ويا وروحي مفرفحه اريد احد يسمعني تعبت مديحسون بالنار الي بداخل صدري ياناس احبها مو بيدي ..

شاهين ..علاء سمعت ابوك شكال .. يعني الموضوع مستحيل .. ف يا خويي راح اكولك لا ياصديقي عوف هل بنية مو من ثوبنه .. و لو ما ابوك كايل هيج .. وابوك متأكد و واثق من كلامو .. والله جان قنعت ابوك شلون ما جان ..

ولو اهلها ما انطوها لك .. والله اخذها منهم بالرصاص .. بس هل سالفة والله يا علاء ما الها لا طب ولا دوه ..عوفها خيي وشوف غيرها

علاء .. اني من حجة هيج شاهين احتركت واني اغلي من حجي ابويا اسودت الدنيا بعيني ماعاد اعرف شلون احلها صار عليه ضغط مو طبيعي قهر بداخلي فتت گلبي

.. وجان انفجر بلحجي .. كتلو ابويا ما يحجي الصدك .. ابويا ما يريدني اتزوجها لان غريبة ..

هاي العقلية بعدها بروسكم .. وحتى انت طبكت ويا ابويا .. شسويلكم .. خررب انه شسوي برووووحي .. ما احس واذا طراق .. راشدي فرلي وجهي فر ..
واذا شاهين عيونو واكفة براسو ..

شاهين ..ولك علاء .. تحجي على ابوك من وره مراة .. وتسب ابوك وتكول علي جذاب من وره مراة .. والله يخسه شاربك .. وهذني مو سوالف الرجال ..

والله وسفه ماجنت هيج علاء شكلب حالك وهيج صرت شسوتلك هل غمة هاي حتى تتطاول ع ابوك الي رباك وكبرك وتعب عليك ها ..فهمني شسوتلك ...

ولك ابوك لو مو بيها شي البنية مايوكف ضدك كل اب يريد سعادة ابنو ...

علاء ..اني من الراشدي والكلام شلون شوية صحيت على نفسي .. اعتذرت من شاهين وكتلو شاهين اعذرني بس اني احبها مو بيدي

شاهين ..ماكنالك لاتحب يول بس حب البنت الصح البنت الي نسبها يشرف لان هذولي راح يكونون اهل اولادك هم ليش بس تفكر بالحب ماتفكر بنسب ...

هسه اني كدامك شكد سويت علاقات ويه بنات وع ايدك خو ..شفتني حبيت وحدة شفتني ردت وحدة زواج ...

لا ياصديقي والله مو شاهين يتزوج وحدة حاجتو ورخصت نفسها وطلعت وطبت ويا لو ع جنازتي ...وتدري من ردت اتزوجت المن اختاريت والمن حبيت ...

ردت اتكون ام لاولادي بنت الاصول وبنت الشيوخ معروف اصلها ونسبها مثل عين الشمس مو وحدة العالم كلها يحجون عليها وع اهلها ...

استغفر الله ياربي اتخلي الواحد كوه يحجي واني ماحجي ع عرض العالم ...استغفر الله ...

علاء ..دنكت راسي وجريت نفس عميق حسيت اختنكت كتلو شاهين نزلني هنا .. ونزلني بلشارع وراح

اني بعد ما نزلت من السيارة وشاهين مشه وخلاني .. اعتقدت ان اني صحيت على نفسي .. بس المصيبة اني كل ما امشي احس شلون صوت يحاجيني بداخلي ..

ويكولي لازم تتمسك بغرور .. لازم ما تخذلها .. ورجعت على البيت واني ما اعرف شنو اسوي .. اخاف اخابرها واكوللها .. شكول ..

اكول ابويا يكول عليكم كذا كذا .. واكيد هذا خالد طلع عليهم هاي الاشاعة حتى يبتز غرور .. والله حاير ..

كلت خلي اخابر غرور واكوللها ان اني ابويا شوية مشغول هل فترة .. ع اقل احصل فرصة اعيد الطلب من اهلي .. اتصلت عليها .. جاوبتني ..

غرور ..هاي وينك صدك جذب صار شكم يوم ما اتصلت

علاء ..ما اعرف ليش .. كتلها مو اني شوية مستحي منج ..

غرور ..ليش شنو الصاير ..

علاء ..مو اني كتلج راح نجي نخطبج ..

غرور ..انكمش كلبي كتلو .. بس لا تكولي غيرت رأيك .. اترجاك علاء لا تكولها .. سد التلفون وروح .. لا تكولها لان اني حطيت كل امالي بيك .. وما اتحمل خذلان منك .. صدكني اموت ..

علاء ..ها .. لا لا على كيفج بس ابويا شوية مشغول هل فتره .. وما راح نكدر نجي ..

غرور ..اهاا .. اي ميخالف وكعت گلبي .علاء ما تعرف اني شكد متعلقة بيك .. ما تدري شنو يصير بيه اذا انفصلنه .. صدك جنازتي تطلع ويا فراقك ..

علاء ..اوووف ياحبيبتي هلكد تحبيني ..لا يا روحي .. صدكيني ما اخذلج .. واني مستعد اتحدى العالم كلو واخذج .. مهما كانت العوارض ..

و بقيت اسولف وياها شوية وسديت التلفون .. ورجع المغص الي يكطع بأحشائي .. بس ما طول .. وخليت راسي ونمت .. واني على امل ان اكدر اغير فكرة ابويا ..

في مكان اخر

شهلاء ..ماما شنو اليوم بيت عمو جاسم مسوين ثواب لجديتي

زهور ..اي يمه ولازم انروح من وكت عيب حتى انعاونهم

شيماء ..كرصت شهلاء كتلها يعني راح انشوف الحب اليوم 😍
شهلاء ..اي افرحي راح اتشوفين روميو ياجوليت زمانج هههههههه

شيماء ..عجل اروح البس شي حلوو لتكولولي لبسي جبة اتخبل والله احس نفسي عجوزة

زهور ..لبسن تنورة طويلة الكيلوت لتلبسون قصيرة ترا ولد عمكم يخزوكم هناك

شهلاء ..ماشي ماما صار ..صعدنه اني وشيماء لبسنه تنانير كيلوت وقميص فوكاها ورهمنه شال عليهن ونزلنه ..
وراها اخذنه بابا لبيت عمو جاسم ..

شاهين ..جنت نايم تعبان كعدت رحت للحمام سبحت وبدلت ونزلت شفت اهلي مخبوصين سئلت شكو اليوم

ام شاهين ..والله ابوك مسوي ثواب لجديتك وعازم بيت عمك ابراهيم

شاهين ..اتعدلت نفسيتي من سمعت بيت عمي ابراهيم هلا يعني حبيبة گلبي اليوم راح تنور بيتنه ..يالله بلكت اكدر اختلي بيها ميت ع حظنها بنت اللذين دولبتني
شوية وجان اسمع سيارة طبكت بالباب ..رحت فتحت

ابراهيم ..ها ياسيادة الضابط شاهين كيف الاحوال

شاهين ..ههههه هلا عمو زين الحمدلله اتفضلوا اتفضلوا

شهلاء ..ها عيني شلونك يالمختفي ولا نشوفك

شاهين ..هلا حبيبي شسوي غير دوام وشغل مدالحك والله

شهلاء ..اي كول عندي خطيبة اسئل عنها

شاهين ..ادري والله مقصر بس هسه عندي شغلة ويه صديقي خطية واكع بمشكلة ويه اهلو

شهلاء ..منو

شاهين ..علاء صديقي تعرفي انتي
شهلاء ..اهاا خطية شبي

شاهين ..شغلة هيج ..ديله طبوا وبهل لحظة اجه علاء للباب ..كتلها شهلاء طبي جوه اني راح اطلع

شهلاء ..اهاا خووش يابه روح بس شوف منو بعد يجيكم ..زعلت وطبيت

شاهين ..اوووف هسه منين اتلكاها ..طنكرت تعال الي يكدر يصالحها
...
علاء ..ثاني يوم رحت على شاهين جان بره همزين لحكت عليه اخذني وطلعنه بره صعدنه بالسيارة ..كعدت يمو .. كتلو اني اعتذر منك شوية انفعلت وحجيت البارحة بالسيارة ..

شاهين ..لا اني اعتذر خاف ضربتك .. بس لازم جنت اضربك حتى شويه تنتبه لكلامك .. والدك رجال طيب وما يستحق هذا الكلام ..

علاء ..جنت متوتر وافرك بأيدي كتلو زين شاهين دبرني .. شنو اسوي .. هاي البنية اني اريدها ..

شاهين ..زين .. دليني على بيتهم ونروح اني وياك نسئل عليها هناك ونتأكد من الموضوع اذا كان صدك او كذب ونسمع بأذانه ...

وللحكاية بقية ..

#يتبع ...

#سارة_المجيد🌹