#لا_ياصديقي

#المحطة_الثانية

#بقلمي_سارة_المجيد

مساءكم معطراً بأريج القداح حبايبي
⚘⚘⚘⚘⚘⚘⚘⚘⚘⚘⚘⚘⚘

دخلنه المتوسطة و علاء بعدي يله دخل المتوسطة ..
كتلو لعلاء تعال ويايه اليوم بيت اهلي مسوين سفرة للجزيرة

علاء ..اهاا اي اجي ليش لا

شاهين .. اي والله كالوا امشوا نطلع سفرة .. جدي وابويا واهلي وهيج ع الجزيرة ..والله رحنه واخذت علاء ويايه .. وسوينه خيم نصبناها وهيج .. واني وياهم والغدة ومتونسين ..

لزكت على جدي اريد السيارة  اريد السيارة .. هوه سيارتو جانت اوتوماتيك .. وكتها جنت صف ثاني متوسط ف كال ميخالف افتر هنا لا تروح بعيد .. ف اني كيفت كشنت بلسيارة واسوق ع كيفي وفرحان وعلاء بصفي كاعد ومكيف .. والله ما اعرف شلون .. وجان اريد ادوس بريك ودست بانزين ..

وجان اطب بلخيمه الزغيره مال الطبخ واشيل الجداري ويايه والخيمه واطلع ..وعلاء يلطم ويصيح عليه بربك راح تموتنه اوكف انوب خبلني وانشدهت من ورا ..

و وره وين يله وكفت السيارة العالم تصيح واني انثولت بلزايد .. واخليهم بليه غدة .. وانكتل ونرجع ع بيت عزلت السفرة وعلاء بعد شوية ينجلط من الخوف 😂

ومرت الايام وبده الدوام
وانتقلنه لمستوى جديد من التفكير .. جنه نروح ونرجع سوية .. حسيت ان علاء .. وضعو مو طبيعي ..

كعدت احجي ويا واسولف .. طلع ضايج لان ما عندو ملابس جديدة .. وهو اهلو حالتهم على كدهم .. عاد كتلو لجدي وجدي بحجة ياخذنه اني ويا يشتريلنه ملابس ..

واخذنه واشترالنه ملابس ولفكسات لان كبرنه بعد ما نحط الكتب بجنط هههههه .. واني وعلاء كل ما تصير فرصة نكعد سوه ونسولف ...ف ذكرلي ..

ان جايبين وياهم طالب جديد .. وهذا الطالب معوق ذهني .. وراسب مادري شكم سنة .. بس اهلو جابو هنا بس حتى شوية يختلط ويا الطلاب .. كتلو امشي نروح نحجي ويا ..

علاء ..لا شاهين دخيلك .. والله انت تضوجة وهذا ما تنعرف تصرافتو ..

شاهين ..شبيك ول لتخاف شاهين وياك بس امشي ...ورحنه وكعدنه ويا هوه ضخم كلش .. يعني اني بطولي بذاك الوكت بكد ذراعو .. كعدنه نتشاقة ويا ..

واذا حباب وخوش ولد وكعدنه نتشاقة وهيج بداخل الصف .. هوه شسوه .. عود ديتشاقة ضربني براشدي ..

بس شنو من راشدي راد يخبلني خلاني افر بعيوني من شدة الضربة😂 ..

اني تخبلت كمت ضربتو براشدي .. شو هذا الفقير .. انكلب عليه اسد .. ركض لباب الصف وقفلو اني وعلاء بنهاية الصف 😂

علاء ..بربك انت شسويت راح يموتنه هذا .. وين انطي وجهي شوفو راح يفترسنة 😭

شاهين .. انتظر هسه اشوف شلون ... هذا اجه يركض وشنو يسحب الرحلات ويا .. لا يالله راح ياكلنه 😂 ...

اني وخرت لزم علاء وشالو ولزكو بلحايط .. اني ادحج يا ربي هذا شلون ويا شلون نتعامل ويا .. دحجت واذا بوري مال رحلة شلعتو من الرحله وانداريت علي ..

ضربتو واذا هذا الوحش كاعد بلكاع ويبجي .. طفرنه من الصف وخلينا .. وذاك يوم وهذا يوم ما داوم 😂

ومشت المدارس هشكل وننتقل من مرحلة لمرحلة .. وبدينه نلزم مدرسين حتى العصر نطلع ونروح سوه للمدرس ..

اصلا احنه لزمناهم لخاطر الطلعه .. واحد من المدرسين كان للفيزياء .. اني اروح مثلا ادرس ساعة ورايه علاء ساعة ونرجع سوه نتفق ويا المدرس هشكل ..

ف شكالو لعلاء كالو اكو بنية راح تجي وياك تدرس هم خصوصي .. شتكول .. اني كبل كمزت بمكان علاء كتلو اي اي استاذ شكو بيها خلي تجي هلا بيها 😆 .. كال ماشي .. بلمحاضرة الجاية راح تجي ..

اني  كاعد خلصت محاضرتي .. وكاعد ع قنفات اجتي البنية وكعدت وعلاء كعد والاستاذ ..
البنية خجلانه وعلاء خجلان .. المدرس ديشرح وهذول داكين روسهم بلميز ..

كتلو استاذ .. هذول جايين يدرسون لو يعدون نمل 😂 .. الاستاذ طك ضحك .. همه انوب ماتوا خجل كول مادري شلون خلصت المحاضرة .. واني راجع ويا علاء واصنف علي واضحك وهو محمر وكذا ..

علاء ..يمعود انت شبيك فشلتني يم البنية صدك جذب

شاهين ..ول يابه انت الي شبيك تبقه مدمغ اكو واحد يمو بنية ويبقه مدنك راسو وخجلان ..
ادري شنو انت البنية لو هيه ...

علاء ..ادري يعني شتريدني اسوي اكعدها بحظني غير تاندرس ومنتبهين ع المدرس

شاهين ..يمعود درووح يامنتبهين انتوا كضيتوها اتعدون النمل الي ع الميز 😂

بقيت احشش عليه وهوه ايكمز .. والله بقينه نروح ونجي يمكن محاضرتين .. ف بده يقل التوتر بينهم .. وبلرجعه علاء يحجيلي عنها

علاء ..والله شوف هيه مبينه حبابة وخوش بنية ومؤدبة 🤔..

شاهين ..اني لطشتلو ها تحبها علاء .. تحبها 😂 ايا ملعون طلع نصك جوه الكاع 😏..ايباااه اتضم ع اخوك ..

هوه يسكت بيه ويحلف ما يحبها وهيج .. وبلمحاضرة الوراها .. همه كاعدين واني ادحج واضحك .. كتلو استاذ من رخصتك اذا تسمح بس اريد مي من البيت ..

طب يجيب اني صحتها للبنية .. كتلها اريد اكولج شي

البنت ..نعم تفضل ..

شاهين ..علاء يحبج 😂 ..
شو هاي اتكهربت .. وكامت وطلعت من المحاضرة .. اجه الاستاذ

الاستاذ ..ها ولكم وينها

شاهين ..والله استاذ شو طلعت مادري ليش ..

الاستاذ ..اخاف سويتولها شي ياملاعين

شاهين ...لا استاذ احنه شعلينه هيه شو ع غفله طلعت بدون سابق انذار مو هيه علاء خزرت علاء يعني كول اي 😡

علاء ...ها اي اي استاذ هيه طلعت 😓

شاهين ... والله كمل علاء محاضرتو والبنية وراها ما شفناها
وبالرجعة علاء خبلني شكتلها وشحجيت وهيج خليتها تطفر ومترجع بعد😂

وبقى الحال في الثانوية على هل وتيرة .. وكمنه اني وعلاء نكعد نتعلل سوه .. لان كبرنه .. وتعاليل لازم .. ف اني جنت مرتب وبالمنطقة البنات تسولف بيه .. ف جنت كل فتره اصادق بنية واعوفها وعلاء يدحج  .. اني اسئلو اكلو شبيك ما تتعرف على بنية يحظي ..

علاء ..هوه انت بقيت وحده ياهي الي احط عيني عليها تطلع منسق وياها وتطلع صاحبتك 😒

شاهين ..شسوي صديقك محبوب والبنات هنه يركضن وراه ويريدن ايصادقنه 😌

علاء ..اي خووش 😒..

شاهين ..ول يابه اضحك لتبقه امبوز ترا انفضك ابوكس اطيح اسنوك تعرفني اضوج من اشوفك امطنكر وضايج

علاء .. ههههه لا مضايج بس جوعان 😒

شاهين .. مال الثول 😂
دامشي نروح نتغدة يم نبع الحنان مسويه مجبوس دجاج يكتل ...

وراها مشت الايام .. اني ما جنت اعرف ان علاء اكو بقلبو غيره مني .. وهل غيرة راح تشمرو بذيج التهلكة الي دمرت حياتو .. راح تعرفون شنو هيه ان شاء الله بمرور احداث القصة ..

ف المهم احنه نبات مرات بلمزرعة .. ونكعد نسولف وهيج .. وهو يدحج عندي خط ارضي بلمزرعة تلفوني ما يسكت ..

علاء ..ها شاهين احنه جايين نتعلل لو تحجي بتلفونك ترا ضجت ومليت 😒

شاهين ..ها ولك اني شعليه مو كدامك هنه يدكن ديله راح اعوفهن لخاطرك 😂.. عاد اني سديت التلفون وبقينه نسولف .. ف هوه سئلني سؤال ..

علاء ..اكول شاهين معقولة هذني كلهن انت تحبهن 🤔

شاهين .. هههههه يمعود اشتحجي انت ..اصلا ولا وحده احب منهن ..

علاء ..هاي شنو 😕

شاهين ..اي والله شبيك وداعتك

علاء .. زين هنه يعرفن ؟..

شاهين ..اي طبعا .. اني كايل الهن .. اول يوم اتعرف بي على اي بنية .. اكوللها اسمعيني يا بنت الناس .. اني لا احب ولا اتزوج .. يعجبج تبقين تحجين ويايه .. اهلا وسهلا .. ما يعجبج هم اهلا وسهلا ..

علاء ..اممممم عجل شلون يبقن وياك  🤔 ..

شاهين ..يا صديقي .. كل وحده منهن الها بنفسها غاية .. الي تحب من صدك .. والي تحب تتفيك على صديقاتها اني حبيبي فلان ..ابن فلان

والي تحب تكشخ عليهن والله حبيبي سيارتو كذا .. والي تحب تكول حبيبي هيج هيج شكلو وعضلاتو وهيبتو وتراويهن شاهين من يروح للمدرسة مالتها  .. ف كل وحده الها غاية مني ..

هنه يتصورن اني ما اعرف لكن اني اعرف كلش زين صاحبك مو غشيم عنهن 😏.. ف ضحك هوه وضحكنه .. كتلو زين اني اسئلك .. انت ما حبيت ..

علاء ..بلي حبيت مره وحده 😁..

شاهين .. اه يا شيطان .. وضام عليه .. تعال ولك اعترف تعال ... هوه يراوغ وهيج يريد يفلت من السؤال ..كتلو والله فلا اعوفك اله تكول منيه هاي الي حبيتها

علاء ..الا اكولك .. حبيت سونيا 🙈..

شاهين ..ولك سونيا منو يالله ..

علاء ..سونيا سونيا شبيك .. هاي الي تطلع بللعبة مال السيكة الشخصية ..

شاهين .. اني هنا وكعت بالكاع من الضحك 😂
كتلو ما تنجب يول .. شنو ناصب عليه ههههه ..

علاء ..والله ما اجذب .. اني احبها لهاي الشخصية ..

شاهين ..لا يالله متت كتلو زين وهاي منين نخطبها الك من ساسوكي لو من كرندايزر لو شلون 😂 .. عاد ضحكنه .. وكتلو نام نام .. والله انت مدمغ مو وجه حب

والله ومشت الايام واحنه بلعطلة كلها نكضيها بلمزرعة نبات بيها ونصبح ويا الخيل وكبرت المزرعة وصارت حلوة .. وعلاء ادمن على المزرعة ..

كام يبات ويصبح بيها .. والله وبيوم من الايام .. اني ادري علاء بايت بلمزرعة .. لان متعارك ويا اهلو ونايم بلمزرعة ..واني بلبيت نايم .. ف ضجت .. ساعة دحجت بل 12 ونص .. كلت يله اروح اكعد علاء ونتعلل اني ويا ..

والله ركبت سيارتي وطلعت .. وصلت المزرعة ذبيت السيارة بره ما بيه اطببها من الباب ههههه .. ف طبيت اتمشة .. ادحج الضوايات مال البيت مشتغلة .. كلت هاي شنو علاء كاعد ما نايم الى هسه .. شعندو 🤔..

والله طبيت اني اتسحب على كيفي وجان ادحج بلهول البنص ..  واحد متكمط بلبطانية ما طالع منو كلشي .. وادحج الواير مال تلفون طاب جوه البطانية .. كلت هذا علاء ديقرا بلتلفون  ..

هذا منسق وما يكولي .. اليوم اخبلو .. والله دورت حوالية دورت .. هل حجي هوه ما يدري بيه .. وجان اشيل تنكة مال دهن فارغة ..

وبيدي الثانية عصاية مال ماسحة .. وشمرت التنكة ليفوك حيل .. انضربت ع كاشي طلعت صوت كلش قوي هوه ع صوت انرعص فز كعد على حيلو ويا ما كعد اني شسوي ضربتو ع راسو بلعصاية مال الماسحة .. هذا كام يعيط من كلبو عبالو احد فات ع بيت ما عاد يشوفني 😂 ..

انشمر .. اني جيتت وراها ع وجها وغطيتو بلبطانية هذا كام يدافر يريد يطلع يكولي منو انت منو ...اني ما احجي 😂 ... خطية والى ان سلم للموت هههه ..

وراها شلت البطانية عنو .. هوه شافني راد ياكلني .. المهم ضحكت وكذا .. انتبهت الخط بعدو مفتوح .. شلت السماعة حطيتها على اذني .. هذا الصوت اعرفو 😕😕😕 ..

كتلها يولي .. انتي مو سوسن .. هيه جمدت .. كتلها كاعد تحجين ويا علاء .. اليوم اطيح حضج وحظو .. كالت بس اسمعني .. كتلها شسمع .. اني ادحج على علاء وعيوني تجدح ..

علاء تصركع بمكانو ..لا يشيل ولا يحط .. كتلها احجي .. كالت والله مو اني جنت احجي ويا .. كتلها منو عجل .. كالت خالتي .. كتلها خالتج الجكمة فلانه .. كالت اي ..

انداريت على علاء .. كتلو وانت عفت كل نسوان الكوكب رحت على هاي الجكمة .. يول من موس زيان يزين لحيتك .. عاد سديت التلفون وضلينه نتعلل وهو مطنكر .. 😂

ومرت الايام

وبيوم جان عندي صديق .. اروح مرات اكعد يمو كدام البيت .. نشرب جاي ومرات نقرأ .. ف كمت اروح عليهم اكثر من مره .. ف عرفت ان هوه عندو علاقة ويا بنت جيرانهم الي هيه كدامها كعد يحجيلي عنها وهيج

نزار .. اكولك شاهين .. ليش ما اعرفك باختها ..

شاهين ..اني جنت مراهق وكلشي اسحك .. كتلو اي ليش لا ..

نزار ..هسه اكتبلها رسالة واكوللها ..

شاهين ..ثاني يوم رحت عليهم سئلتو شنو الاخبار

نزار .. جاوبت ياشرس 😉..
وكالت اختي معجبه هم بي .. وهيج اذا يريد اليوم ساعة بل 8 بلليل راح تنتظرو بلباب .. تريد تنطي رسالة ..

شاهين ..اني بقيت انتظر الى ان صارت ساعة 8 .. وفتحت الباب و وكفت بلباب دحجت شفتها البنية اتجنن شنو من خلقه العين زرك الشعر اصفر بيضه كطن بقيت صافن عليها ....

وراها كلت خووش لكطه هل ابنية 😆 بقيت واكف بالباب  اشاير وضحك اني وياها واشرتلي رحت تمشيت خلت بايدي رسالة .. كاتبة بيها هيه اسمها #غرور وهيج معجبة بيه من فترة .. وكذا .. وتريد رقم تلفوني ..
اني كتبت رقمي مال الارضي وانطيتو الها وكتبت تتصل ساعة 11 بليل .. وبدت علاقتي ويا غرور(( هيه نفسها البنت الي راح تقلب حياة صديقي علاء راح اتشوفون شلون تكدر تلف حبالها عليه بالاحداث الجاية للقصة))

جانت غرور تخابرني واخابرها .. وتطلع ويايه وتحاول تغريني بس اني مجنت احب اسوي شي وياها لان من صغري اني اصلي واقراء قران ماسوي شي حرام ....جنت بس اطلع وياهن واشتريلهن ونتونس نفتر
وهاي هيه ...بس هاي جانت حركه وخفيفه حييل ...

ما طولنه اسبوع هاي حسيتها تريد تستغلني بدايتها كامت تريد كاسيتات واغاني وراها كامت تريد اشتريلها ملابس وراها كامت تريد انطيها فلوس .. اني كشت نفسي منها .. وضجت منها .. خصوصا اني من بديت اسئل عليها ..

شو ياهو الي اسئلو من منطقتهم يكول اووووو هاي مصادقها .. شو طلعت تعرف كل شباب المنطقة اني لعبت نفسي منها هنا ....

كتلها عيني اني وياج ما نرهم .. لا اني كمش واكعد اصرف عليج ولا انتي ترهمين الي .. ف الى هنا ..

والله يستر عليه وعليج .. وسديت التلفون .. دكت حاولت عالجت اني كل ما اسمعها اسد التلفون ..

مو شاهين الي تستغلو بنية ...شكد رادت توكعني مكدرتلي عبالها انطرح زوج
متدري شاهين يلعب ع 60 وحدة مثلها 😏
المهم وراها انقطعت لان ماردت اشوفها بعد ..عفتها

رحت لبيتنه واتمددت بغرفتي شوية وجان يدك تلفون الارضي شلتو واذا ابن عمي جليل ..

جليل ..ها ابن عمي ماتجي تعال اريدك بشغلة

شاهين ..خير خما اكو شي

جليل ..لا ماكو شي خير ان شاءالله بس تعال تعرف شغلة تفيدك ههههه

شاهين ..اهااا يالله جاييك عجل مادام شغلة تفيدني ههههه

((جليل الله يرحمو .. تعرف على بنية .. ذبحني ذبح .. يوميا يكعد يلغي وياها على الارضي مالهم .. ويجي يكعد يمي يضل يسفطلي عنها شلع كلبي)) ..

ف يوم من الايام .. كالي ان صاحبتو واهلها نازلين على الشاطي سفرة .. وكالي خلي نروح نشوفها .. توسل بيه .. اني مشلوع كلبي وهذا لازكلي ..  وكوه مشيت ويا .. رحنه نزلنه للشاطي ...

شفناهم كاعدين واحنه كعدنه يمهم مسافة .. اندحج عليهم .. شفت  طالعين ناس سفرة.. وينها يابا جليل اشرلي عليها .. كتلو زينه بيها مجال .. هوه انعقج ههههه .. وشفت وياهم بنية اني شايفها بس ما اعرف وين ..

كامن يتبسبسن ويضحكن بيناتهن وكذا احنه كعدنه .. وتغدينه وطلعنه همه طالعين ورانه .. بلليل طالعين نتعلل اني وجليل وعلاء  .. كالي جليل اكولك .. كتله كول ..

جليل ..عرفت منو هذولي الطالعين ويا اهل صديقتي ..

شاهين .. لا منو ؟؟

جليل .. شبيك ما تركز .. ذولي جوارينكم ..

شاهين ..اه شجابهم وياهم ..

جليل ..هذا اخوها ماخذ بنتهم .. وهاي البنية الي جانت ويا صديقتي هاي سما بنتهم ..

شاهين .. عدلت كعدتي كتلو اي بله

جليل .. سما كايله لصديقتي .. هذا شاهين موتني .. احبو من طفولتي وهو ما يدري حتى بيه ولا معبرني لو بضحكة ..

شاهين ..اهاا اي بله وبعد ..

جليل ...تكول سما .. الى هسه اتذكر اشترة نساتل مدعبلة محشية بندق تخبل ومن دون كل الي واكفين انطاني بس الي من جنه جهال .. وكالت ما زال صارت فرصة اريد رقمو .. اريد احجي ويا ..

شاهين .. اني بلاول ترددت .. وبعدين كلت خلي احجي وياها وافتهم شنو فلمها .. كتلو شوف جليل لا تنطيها هسه الرقم مالي .. خليها .. خلي نشوف اذا بقت تلح تريد الرقم انطيهيا ..

جليل ..خوش ..

شاهين .. يوميا يجيني جليل الله يرحمو .. بلليل ياكل كلبي .. هاي هيج تكول وسما هيج تكول .. واني اكولو ميخالف خليها هسه .. اني صديقاتي جنت حاير بيهن انوب سما فوكاهن ..

وتمشي الايام وهذا يوميا يوز ع راسي .. و علاء يكولي اكو احد يعوف النعمة هههههههه ..

ليش تتبطر البنية قافلة عليك .. وجان بيوم اديح ديحة رسمي .. عفت صديقاتي كلهن صفرت وصفيت ولا وحدة ضجت وجان اضل بلليل الوب ..

كتلو ل جليل انطيها رقمي هسه .. كال خووووش .. والله ثاني يوم بلليل دك التلفون جاوبت .. اسمع وحده مشغلة اغنية 😕.. كتلها الووو الووو .. ما ترد .. اني شلون عرفتها بنية .. تتنهد بس .. المهم سديت التلفون .. ورجعت دكت وهكذا اول ليلة جانت بس تسمعني اغاني واني ع حس الاغاني نمت 😂

وللحكاية بقية ...

وتستمر مغامرات شاهينوو ابو الدكايك 😏
باجر ان شاءالله راح انشوف اشلون صارت علاقة سما بشاهين افندي 😤

يتبع ...

#سارة_المجيد🎀