#لا_ياصديقي

#المحطة_الثامنة_والعشرين
#ماقبل_الاخير

#بقلمي_سارة_المجيد

شاهين ..وكالي انتظر هسه راح تجي وانتظرت واجت هيه ..

علاء ..بصدمة وذهول سطرت راسو سطر 😳

شاهين ..وبقيت كاعد بره اسمع حجيهم ..خالد كام يجرجر بيها بلحجي وحجت كلشي لخالد .. يعني لا خالد معتدي عليها ولا مخدرها ولا مهددها بالصور ولا اكو هيج فلم .. هذا كلو مجرد خدعة ..

استعملتك مجرد اداة حتى تستمر بعملها .. انت مجرد غطاء لاعمالها الدنيئة والوصخة

وانت الغبي صدكتها ووكعت بحبها ورحت اتزوجتها وسترت ع فضيحتها لا وانوب خلفت منها
شكد نصحتك وشكد حجيت وياك ولا فاد بيك عارضتنه كلنه واتحديتنه كلنه ورحت اخذتها والنتيجة شنو ...

هاك شوف حالك هسه ..هذا الي جنه خايفين منو وفعلا صار وانت وحدك هسه دتدفع الثمن وخسرت بنتك وشرفك وسمعتك ...

علاء .. كل حجاية يحجيها شاهين جاكوج ويدك على راسي .. يعني انضربت براسي وما عاد اعرف شحجي .. كتلو وليش ما جيت كلتلي ليش شاهين ليش بقيت ساكت

شاهين ..وداعت خوتنه ماسكتت نويت اصارحك بالحقيقة والله وردت اواجهك وياها واخليها كدام الامر الواقع ...

بس اني مالحكت اضطريت اروح لبغداد من الغبشة ما لحكت اكولك وشائت الاقدار ان انسجن وانسجنت ويايه الحقيقه ...

بس من طلعت انصدمت بزواجك منها وعندك طفلة جماله ...انجبرت اسكت واضم بكلبي هل سر كلت عسى الله هاديها .. وما حبيت اخرب بيتك

علاء .. وره الحجي الحجى شاهين ما اعرف شكول .. بس نطقت بحجاية ما اعرف شلون نطقتها .. او شنو الخلاني اصلا انطقها .. كتلو شاهين اني احبها .. احبها ما اكدر اعيش بدونها
شاهين عيونو كامت تجدح .. حسيت راح يشيلني ويلكحني من الجامه ..

وكف على حيلو وصرخ بوجهي بعلو حسو

شاهين ... ولك انت ادمي انت بشر .. هي غيره سز .. وره هذا الكلتو لك كلو وبعدك تكول احبها .. زين عجل .. اسمع هاي .. تعرف حسن صديقي .. ابو الصيدلية .. تعرفو مو

علاء .. حسن شبي انوب

شاهين .. حسن مو ساكن بنفس الفرع مال اهل مرتك المصون .. بليلة الحنه مالتك عليها ... يول قبل عرسك عليها ..

كضبوها اهلها بلهيكل الي بسد بيتهم ويا خالد .. يا زمال  وكل الشارع والمنطقة شافوهم .. انت ليش اعمى  ليش ما تفتهم يعني بليلة عرسكم نايمة ويه غيرك ياغبي

علاء .. وره الي حجى شاهين ما اعرف شصار بيه .. لزمني المغص بس هل مره راد يموتني كمت اتلعبط بلكاع ما اعرف شصار بيه وخنكة لزمتني .. شالني شاهين وعلى المستشفى ..

ما صحيت الا واني بلمستشفى ما اعرف شجارلي .. طلعني شاهين .. وره ساعيتن ..

شاهين ..وضعك ما ينسكت علي بعد .. لازم اخذك على طبيب اخصائي .. حضر نفسك العصر اجي اخذك ونروح ..

علاء ..اجه اخذني .. ورحت للدكتور سوالي تحاليل واشعة .. اشكال ..الدكتور يكول لشاهين والله يا اخي ما مبين عندو مرض شي ..

بس هذا مرض الاعصاب وهذا بعيد كل البعد عن حالات المغص والتقيء دم .. ناضور قرحة سوينه وما بيها شي معدتو .. امرو عجيب .. رجعنه للبيت ..

شاهين .. شوف علاء .. اني راح التحق لدوامي .. حظر نفسك اسبوع الجاي اخذك على اربيل .. وابقى بلبيت مرتاح لا تحتك لا بمرتك ولا باهلها ولا حتى اهلك .. شتحتاج خابر واحد من اخوتي يجي الى يمك ..

وراتبك جاري معليك .. زين .. ارتاح ومن اجي اخذك على اربيل خوش

علاء .. تسلم اخوية شاهين بعد حتى الشكر ما ينفع ما ادري شكول اكثر

شاهين .. ديله خيي ما عندك غير العافية .. ورقمي عندك دك عليه كدام اي موقف خوش .. يله في امان الله

علاء .. مع السلامة خيي
وضليت اني بلبيت .. حجي شاهين يفتر بدماغي وكمت ارجع بلذكريات .. واقارن الكلام الي كالو شاهين .. جيت غرور متخبلة من شافت شاهين ..

معناها صحيح جان يعرفها وخافت يفضح سرها .. وكلام حسن ابو الصيدلية هم صحيح .. لان بيوم عرسي عليها جسمها جان كلو علامات زركه مال كدمات اذا تتذكرون من سئلتها ليش جسمج بي زراك جذبت عليه ..لان جانوا ضاربيها اهلها .. يالله .. شلون اني جنت اعمى عن كل هذا شلون ..

يا ربي سترك وعفوك ..ليش يا ربي رغم كووووووووووول هذا .. بعدني احبها ..شنو السر بلموضوع عقلي راح يطلع حتى من راسي ..

شنو الي كاعد يصير بيه .. وشنو هل مرض الي طلعلي فجئة والدكاترة ما كاعد يعرفون سببو .. يا ربي .. وبنتي هل طفلة ليش تروح .. بس يمكن احسن ..

احسن الها ماتت وخلصت .. اذا كبرت شتشوف .. ابوها الي يرجف ومثل الاثول .. لو امها الساقطة .. احسن الها ماتت ..
الحمدلله على كل حال .. ومشى الاسبوع ونزل شاهين من دوامو بلجيش ..

في مكان اخر .

شهلاء ..جنت يم اهلي اجه شاهين من الدوام كال يله حبيبي عسريع عندي شغل حظري نفسج دنرجع
كتلو خير شكو

شاهين ..من نرجع للبيت نحجي
شهلاء ..بدلت ملابسي وحظرت جنطتي وسلمت ع ماما وبابا وليث وطلعنه ..
وصلنه للبيت طبينه شفت شاهين مو ع بعضو ولا اخذني بحضنو مثل كل وكت من يرجع من دوامو ..كتلو حبيبي شصااير وياك احجيلي

شاهين ..اوووف حبيبي شحجي والله ميت قهر بداخلي

شهلاء ..اسم الله ياستار شكو احجي

شاهين ..علاء خطية مادري شبي وضعو معاجبني من بعد وفاة بنتو انتكس حالو واتدمر ومحد يعرف شبي

شهلاء ..اووي خطية الله يشافي

شاهين ..حبيبي هسه اريدج اتحظرلي جنطة ملابس لمدة 3 ايام او 4 اروح لاربيل

شهلاء ..عكدت حاجبي باستغراب كتلو ليش شعندك بأربيل

شاهين ..حبيبي مو كتلج علاء مريض كلت اخذو لمستشفيات اربيل احسن بيها اطباء اجانب ...
بلكت يعرفون علتو

شهلاء ..اتقربت منو ولفيت ايدي ع رگبتو كتلو بدلع حبيبي مو دتشوف صاير تهملني مو مثل قبل ما تتشوقلي من تجي ..هسه كلو ملتهي بعلاء واني مالي نصيب بيك 😢

شاهين ..حضنتها وبستها من ركبتها كتلها حبيبي انتي مريتي وحبيبة گلبي ماكو اغلا منج بهاي الدنيا بعد امي ..

بس هذا هم صديقي خطية واخو دنيتي مالو احد ومتعشم بيه لتنسين علاء صديق طفولتي ورفيق دربي ...وهسه هوه وكع بشدة ومحتاجني ولازم اوكف بجانبو

شهلاء ..صح جنت ضايجة لان ديبتعد عني شاهين بس كتلو ماشي حبيبي روح الله ينطيك ع كد نيتك وربي يقدرك ع فعل الخير ويجعلها بميزان حسناتك

شاهين ..تسلميلي يالغالية ..انتي هم حظري نفسج حتى اوديج يم اهلج خما تبقين هنا وحدج

شهلاء ..ماشي حبيبي صار ..

شاهين ..زين تعالي اريدج بسالفه بالغرفة هسه 😉

شهلاء ..ههههههههه ماشي 🙈

شاهين ..اوووف امووت عليج يابعد عمري يامريحتني بحياتي يله خلي اكوم اسبح حتى اروح ع علاء اشوفو شلونو خطية

شهلاء ..ماشي يروحي

شاهين ..طبيت سبحت وطلعت بدلت واخذت شهلاء وصلتها لبيت عمي ابراهيم ورحت لعلاء

علاء ..جنت كاعد منتظر شاهين واجاني ..اني الحمدلله تحسن وضعي .. شافني .. كالي ما شاء الله هسه مبين عليك زين صرت ..

كتلو الحمدلله احسن احس روحي وهذا كلو بفضلك ..

شاهين ..دنجب يول محد اله فضل على احد .. هسه المهم متحظر لروحة باجر لاربيل ..

علاء ..يعني لازم نروح ..

شاهين ..اي لازم هناك طبهم زين واجهزتهم حديثة .. نفتهم شنو الي ديصير بيك .. واكو مستشفى هناك يكولون بيها اطباء المان جايين فترة ويروحون .. صح كشفيتهم غالية بس مو مشكلة ..

علاء ..هاي هيه خيي الي تشوفو سوي ..

شاهين ..عجل باجر الصبح بحيل الله نطلع من هين ..

علاء ..وطلعنه لاربيل ثاني يوم .. و دخلوني على الاطباء .. بمستشفى خاص و 3 اخصائيين اجانب ..

شاهين يعرف يتفاهم وياهم بلانكليزي وشرحلهم حالتي وشوفهم التقارير والتحاليل والاشعة مال تكريت ..

كالوا سوو من جديد اشعة وتحاليل .. بس وره 3 ايام يله تطلع التحاليل .. وبقينه باربيل متونسين ومغيرين جو .. وكذا .. ف هم حجينه بموضوع غرور ..

شاهين ..زين انت ليش دايخ .. طلكها ..

علاء ..جريت حسره كتلو شاهين شطلك وحاطين عليه مؤخر يكسر ظهري .. صفن شاهين .. كال زين .. الحل عندي .. كتلو اي شنو الحل ..

شاهين ..البسها .. هيه مو يم اهلها .. يطبها طوب .. خليها هناك ملكوحة مثل الجلب .. وانت رتب حياتك وره فتره تزوج ..

وكمل حياتك طبيعي هيه راح تكوم تجي تبوس ايدك تطلكها وتتنازل ..

علاء ..والله يا شاهين ما اتزوج بعد ابد .. وره الي شفتو من الزواج لو اموت ..

شاهين ..ضحكت كتلو وانت شلون تعيش بدون كتل .. لازم تصير عندك مراة تجر اذانك😂

علاء ..ضحكت وهو ضحك .. و خلصت ال 3 ايام ورحنه على الاطباء
.. لان هيه التحاليل والاشعة بنفس المستشفى .. شو كاموا يحجون بلانكليزي وشاهين يناقشهم ..

واني بس افر باذاني ..كلت يا ستار هذولي شلكو بيه هلكد حجوا وشاهين يأشر بايدي ويحجي وياهم ..

كلو بربربر بلانكليزي واني اطرش بلزفة ... والله خلصو بربره .. كتلو ها شاهين خير شكو شكاعد تحجون هلكد ..

شاهين ..والله يا علاء .. يكولون كلشي ما بيك ومتخبلن واني كاعد اناقشهم .. اكوللهم يعني شنو منين كاعد تصير بي هاي الاعراض .. والله يكولون ما نعرف تحاليلو واشعاتو وفحوصات كلها سليمه ونظيفه ما بيك شي ..

علاء ..طلعنه وثنينه دايخين بلي صار .. وهسه لازم نرجع لان شاهين عندو التحاق للجيش ..
رجعنه لتكريت ..

شاهين ..ها علاء ما نوي ترجع للشغل ..هم تلتهي بي احسنلك .. وهم اني اطمئن احسن ما اشغل دايح بليه راعي ..

علاء ..اي والله ان شاء الله من باجر ارجع ..

شاهين ..عفية .. يالله مع السلامة ..

علاء ..وراح
ثاني يوم رجعت اشتغل .. ورحت للمعمل اجوني العمال سلموا عليه ورجع الشغل طبيعي .. ومرت الايام على هل حال واني حالة الالم مال بطني بدت تزود اكثر ..

وما اعرفلها علاج ..وما عندي لا اتصال ولا اي خبر عن غرور ولا عن اهلها وفعلا قررت ان اهجرها وانساها .. بس كلبي يرف عليها كل فترة ..

و بديت الهي نفسي بلشغل واشغل حياتي بي .. وصار الشغل كل حياتي واهتمامي .. جان اكو رجال من اهل الله يجي يكعد يمي رجال جبير .. يجي يكعد شوية يمي بلمعمل ويشتري نص قالب ثلج ويشيله ويروح ..

ف مره اني كاعد وهو كاعد كاعدين نسولف .. ف مغصتني بطني مثل كل مره وحيل لزمتي .. كالي ها وليدي سلامتك بيك شي .. كتلو والله حجي بطني كاعد تمغصني حيل احس مصاريني تتكطع ..

الرجل ..من شنو يعني بيك مرض شي ..

علاء ..والله يا حجي افتريت الاطباء كلهم ولاربيل رحت محد عرف شبية .. وهاي المغصة كل فتره تجيني تموتني من الوجع ..

الرجل ..زين وليدي رحت على سيد على احد يقرالك ..

علاء ..حجي اني ما اامن بهذني السوالف .. اذا الاطباء ما عرفوا علتي يريد سيد يعرفها ..

الرجل ..يا وليدي محد يعرف علاجو وين وعلى ايد منو .. اكو رجال طيب يرقي بلقران .. بلمنطقة الفلانية .. اذا حبيت روحلو ..

علاء ..ماشي حجي الله كريم ان شاء الله اروحلو ... وراح الحجي .. واني اصلا نسيت .. هيه مال ساده .. ومشى الوضع مثل ما هوه .. الى ما يوم من الايام ..

وجان يدك تلفوني .. دحجت رقم ام غرور ..ما جاوبتها .. دك مره ومرتين و 3 مرات .. ما جاوبت .. اجتني رسالة .. فتحتها .. ام غرور .. السلام عليكم وليدي .. بس ردت ابلغك ..

مرتك تعرضت لحادث وهسه هيه بين الحياة والموت .. رجعت للبيت واني مو بالي السالفة كلت هاي فلم من افلامهم الغبية .. والله نمت ثاني يوم طلعت للشغل طبيعي ..

ورجعت بلليل .. قريت قطعة على السياج مال الجامع .. انتقل الى رحمه الله الشهيد خالد ابن فلان ابن فلان .. وستقام الفاتحة اللخ ....

مادري شلون طكت بعقلي
كلت معقولة هاي غرور ويا وبحادث واحد .. مادري شلون اجت بالي هشكل ..

سحبت التلفون واتصلت على ام غرور .. كتلها شنو الموضوع كالت تعال على البيت وافهمك .. رحت لبيتهم كعدت .. كتلها شنو الموضوع ..

ام غرور ..والله يا وليدي .. انت حقك بكلشي .. وبنتي مو خوش ادميه .. وحجيك كلو صحيح ..

علاء ..اي هوه شصار شنو هذا الحادث ..

ام علاء ..هيه مادري شجابها على هذا خالد .. وبسيارة وحده جانوا .. وجان رتل كدامهم مال امريكان ..

ومنفجرة على الامريكان عبوة .. وانت تعرف الامريكان يكوم يضربون عامي شامي بكل الاتجاهات .. وسيارة الي بيها غرور جانت مباشرة وره الرتل ..

ومات الولد خطية .. وغرور وكعت بيها شكم طلقة وحده من الطلقات بلعامود الفقري مستقره .. والاطباء يكولون احتمال تنشل ..

علاء .. من سمعت حجي ام غرور .. صار عندي شعورين متضاربات بداخلي .. الاول مثل ما نكول اشتفيت بيها لان ظلمتني جثير وهاي حوبتي وربي اخذلي حقي منها .. والثاني انقهرت عليها .. المهم كتلها ماشي خاله ما عندها الا العافية ..

ام غرور ..ها وليدي ما تروح ويايه للمستشفى تزورها ..

علاء ..لا خاله .. ازورها وره كل الي سوتو بيه والى هسه كاعد تسوي .. والله لا ازورها ولا اشوف خلقتها ..

واني والله لو ما هل مؤخر الحاطي على ظهري انتوا .. والله من زمان طلكتها .. يله اني اترخص طالع .. وطلعت من البيت ..

((ذات يوم كُنت أريد إخبارك بأن الجميع خذلني
وبأني أصبحت أخاف من الجميع إلا أنت
ولكنك خذلتني قبل أن أُخبرك بذلك💔))

وللحكاية بقية ...

مابقه سوا ساعات قليلة تفصلنا ع النهاية التقيكم باجر ساعة ب2 الظهر ان شاءالله والبارت الاخير من نهاية القصة راح نشوف شلون حتكون نهاية غرور وعلاء انتظروني بالموعد تحياتي لكم

#يتبع ...

#سارة_المجيد🌹