#لا_ياصديقي

#المحطة_الثامنة

#بقلمي_سارة_المجيد

مساءكم عسل حبايب 🍯

غرور .. بضحكة ناعمه .. وعيون مليانه برائة .. صدك علاء تحبني .. اخير نطقت وحجيت .. اخيرا حسيت بقلبي ..

ايام واني الليل ما انامو افكر بيك .. بكل مكان صرت اشوفك بماعوني بمرايتي بوجوه الناس .. تصور اخوية اسمو فاضل جيت اصيحو صحتو باسمك .. شكد ما انت شاغل عقلي وتفكيري .. علاء اني احبك اموت عليك .. بسسسسسس

علاء .. غرور بدت تحجي واني صافن بعيونها واشوف البرائة بيها وشفايفها الوردية تتحرك وتحجي هذا الحجي الي مو سمعتو بأذاني لا ..

سمعتو بكلبي ..كلبي كام يدك سريع سريع .. حسيتو راح يكسر ضلوعي ويوكع بحظنها .. عركت من الحجي وهذا الحب الي دتكولو ..

ختمت كلامها بكلمة بسسسس اني انتبهت .. كتلها .. على كيفج بيه اني كلبي ما يتحمل هذا الحجي الحلو كلو .. بس كلتي بس وسكتي .. بس شنو ؟!

غرور .. حبيبي انت تستاهل انطيك عيوني وروحي .. اني شلون انسى مساعدتك الي و وكفتك بوجه خالد ..

ولك انت اخذت كلبي وتربعت بي .. اوووف لو اكدر اشوفك مكانك الي بكلبي حتى تصدكني ..بس علاء اني خايفة

علاء .. خايفة من شنو ..

غرور .. خايفة من شغلتين

علاء .. شنو هنه

غرور .. خايفة لا تعاملني بقسوة مثل خالد .. وخايفة لا سلمتك قلبي وتخذلني وراها .. خايفة هم كاعد تخدعني تريد تاخذ الي تريدو مني وتعوفني مثل خالد 😔..

علاء .. لا يا حبي .. والله اني ما مو مثل هذا الحقير .. والله اني احبج من كل قلبي .. و اوعدج ما المس شعرة من راسج اله بالحلال ..

غرور .. ريحتني حبيبي .. تسلملي

علاء .. اي وشنو الشي الثاني الخايفة منو

غرور .. حبيبي مو تفهمني غلط .. خجلانه منك

علاء .. شنو هل حجي يروحي .. احجي احجي شتردين تكولين كولي واني من ايدج هاي لايدج هاي

غرور .. حبيبي .. اني تعرف محد بحالي لا اهلي ولا احد بحالي .. واني جنت اخذ مصرفي من خالد .. وهسه خالد بعد ما يباوع بوجهي يخاف منك .. بهاي الحالة اني شلون

علاء .. ولا يهمج حبيبي .. شتردين تاخذين مني .. واني حاظر .. اني الي حطيتج بهذا الموقف واني الي اتحمل كلشي بي

غرور .. تسلملي يا عمري الله يرزقك وينطيك على كدي مو زايد .. تروح تبصبص منا ومنا على غيري .. تره اغار من هسه اكولك

علاء .. اووويلي حبيبتي تغار عليه .. لا حياتي كلو الج وشتحتاجين كولي ..

كعدت غرور سوت قائمه بلشغلات المحتاجتها .. وعلاء بلموعد الثاني جابلها كووول الي تريدو .. و بدت طلبات غرور تكثر وبدت فلوس علاء الي مجمعها تخلص .. وحس علاء بضيق ..

ما عاد يعرف شيسوي ..الوضع ماعاد ينسكت علي لازم يتصرف لازم يسوي شي قبل لا يخلصن فلوسو ويصير بموقف محرج كدام غرور الي فرهدتو 

علاء .. بديت اتضايق وما اعرف شسوي .. فلوسي بدت تخلص .. كمت اقصر على علاج امي وعلى علاجي .. وغرور متطلباتها كثرت .. مره ملابس مره اكسسورات ..

مره محتاجة اشتري عطور مره محتاجة ميك اب .. واني اجر وانطيها .. حرت ششتغل افتر ادور ماكو احد يشغلني بس يشوف وضع جسمي .. يعتذر ..

دحجت شفت ما عندي غير ارجع اشتغل يم شاهين .. بس هل يا ترى يقبل يرجعني .. بعد ما اني طردتو حتى من البيت ما طلعت علي من اجه يزورني ..

ما اعرف ردت فعلو شنو .. و بعدين اني اظمن جيتي وكعدتي بلمزرعة .. احسن ما اظل خايف لا ستار يلزمني .. يكولي شعندك هنا ..

احسن شي احاول من ينزل شاهين اراضي هوه قلبو طيب وما يزعل عليه .. بس شلون .. غرور ما تقبل احجي ويا شاهين .. ولا اراضي .. خلي من نتشاوف احاول اقنعها ..

واجه الموعد المعتاد طبعا كل يومين والثالث نتشاوف .. وكتلها حبي غرور .. اريد اكولج على شي ولا تزعلين تفهميني بلاول وراها نتناقش

غرور .. اي حبيبي احجي خير صاير شي

علاء .. لا لا حبي ما صاير شي .. بس اني تعرفين كاعد بليه شغل .. وفلوسي الظامهن بدت تخلص .. ودورت بكل مكان محد يشغلني ..

وانتي محتاجة مصرف هواي واني محتاج وامي ادوية .. ف شنو رأيج ارجع اشتغل ويا شاهين .. فلوس زينه .. وهم اجيبلج كل الي انتي تتمني .. شكلتي

غرور .. اني من جاب اسم شاهين تكهربت .. خفت لا يعرف اني جنت على علاقة بي ... بس وراها صفنت كلت خلي اكولو لا يجيب طاريي يم شاهين ..

ومنين يريد شاهين يعرف بعد .. وبعدين اني شسوي بهذا الاثول بلية فلوس .. خلي يرجع يشتغل ويا
كتلو زين حبيبي .. اريد منك طلب

علاء .. امريني يلغالية عيوني جوه رجليج

غرور ..ههههه تسلم عيونك حبيبي ..اريدك هسه تكوم تتوضه وتحلفلي على ذاك المصحف محد يعرف بيه .. ولا تجيب سيرتي يم احد وخصوصا شاهين

علاء .. استغربت من طلبها .. وشمعنه ركزت على شاهين .. كتلها حبيبي حاظر اني .. بس ليش ركزتي على شاهين

غرور ..ها مو حبيبي اني سمعت منك شلون جنتوا اصدقاء .. واني بنيه واخاف على سمعتي .. وما احب احد يجيب طاريي بلموزين .. حقي لو مو حقي حبيبي .. حجيت بدلع

علاء .. ها حبيبي .. اي حقج حقج .. بس عوفي الحلف ع قران .. اوعدج وعد والله ما اخلي شاهين ولا غيرو يعرف بيج

غرور ..ماشي حبيبي اني موافقة ترجع تشتغل ويا شاهين .. واكيد اثق بوعدك الي

وطلعنه كلمن راح لبيتو .. واني بقيت انتظر الخميس يجي حتى شاهين ينزل من الكلية

في مكان اخر .

شاهين ..بعد ماخلصت التدريب بالكلية وبعد التعب والمجهود القاسي ..اجتي اجايزنه ونزلنه لبيوتنه ...
اني متعود اول مانزل بس ارتاح شوية اسبح واتغدة واروح لبيت عمي ابراهيم ..

بس هل مرة جنت حييل تعبان مكدرت اروح سبحت وتغديت وكتلهم راح اصعد انام بالليل عود اروح ....

والله صعدت اتمددت بغرفتي مكدرت انام بقيت اتكلب لان جنت مشتاق لغزالتي كلت اقل خلي اسمع صوتها حتى اصبر نفسي لليل ههههه

اخذت التلفون الارضي الخط الخصوصي مالتي ودكيت ع شهولتي طلعتلي شيماء عسريع كتلها بدون محد يحس خلي شهلاء تحجي ويايه

شيماء ..اي دسلم كول شلونكم كبل صيحي شهلاء شدعوة عيني

شاهين ..هههههه وجع ..ولج مشتاقلها شسوي يله يابه شلونج عيني شلون صحتج

شيماء ..هههه تسلملي الحمدلله زينه يله اروح اصيحها الك انتظر ع الخط .. صعدت فوك رحت لغرفة شهلاء فتحت الباب لكيتها نايمة التنبل شيكعدها هاي بله يبووو ..صيحت عليها كتلها ولج كومي شاهين اجه وخطبج من اهلي هسه يريدج تنزلين

شهلاء ..من سمعت هل حجاية كمزت مثل المخبلة ع الجرباية بقيت افتر اختل عقلي كتلها ولج شدتحجين انتي

شيماء ..😂 اي شسوي متكعدين اله بهل طريقة

شهلاء ..الله يطيح حظج ياحيوانه لو مجلوطة شلون ها شتكولين لاهلج ..حسبي الله عليج ..رجعت نمت

شيماء ..ولج كومي شاهين يريدج منتظر ع الخط خطية

شهلاء ..واذا جذب والله ادفنج بالحديقه

شيماء ..هههههه لا والله خطية توه نازل من دوامو وخابرنه ..مشتاقلج العاشق الولهان عيني 🙄

شهلاء ..كمزت من فراشي ونزلت ركضت شلت السماعة وكلت الووو

شاهين ..اوويلي خررب شيب اهلك شاهين ع هل صوت شلونج يالغالية

شهلاء ..هههههه هلا حبيبي الحمدلله زينه انت شلونك ..

شاهين ..صرت زين من سمعت صوتج يابعد روح حبيبج ..مكدرت امرلكم لان تعبان والله كلت بالليل اجي اتعلل يومكم

شهلاء ..اممممممم زعلت اول مرة تسويها من تنزل متجي تشوفني 😒

شاهين ..صحيح والله اعذريني حبيبي لو تدرين بالتدريب شسووا بينه جان عذرتيني ..بس مكدرت انام وماسمع صوتج كلت اخابرج وبالليل اجيكم

شهلاء ..هههه ماشي يروحي معذور يله نام وارتاح حتى اشوفك بالليل لان مشتاقتلك كووومات 😊

شاهين ..يمممه يمممه خررب عشيرتك ابراهيم بنتك دولبتني ولج ماتحمل هل حجي رحميني انتي ميبستها عليه وتخليني بنار كولي خطية هل مكرود وين ينطي وجها 😭

شهلاء ...يبوووو ولاتبطل سوالفك عبالك مراهق بعدك ...كتلك وارجع اعيدها عليك ..ماخليك تنول مني شي اله من اصير حلالك 😏

شاهين ..امداج يله روحي اريد انام سديتي نفسي ..هيه ضحكت وكالت يله باي ..سديت الخط ..
وحطيت راسي ونمت ..

وره شوية سمعت الباب اندكت صحت منو

ستار ..اني اني ..اكولك هذا علاء اجه كاعد بالديوان يريدك بشغلة مهمة ..

شاهين ..انتفضت من فراشي خفت صاير شي ع صديقي لان ميسويها ويجي بعد العملة الي سويناها بي اله الشديد القوي ..
لبست دشداشتي ولفيت اليشمغ ع راسي ونزلت

علاء ..طبعا بقيت انتظر شاهين ينزل .. واني ما اعرف ردة فعلو وره هل اشهر الي اني تركتو بيها .. وهذا الخذلان الي سببتو الو ..

الصراحة ما اعرف ردة فعلو لان هوه شخص اصلا ما تنحزر تصرفاتو .. والصراحة هم خايف من انفعالو .. وخصوصا هوه ذكي وراح يعرف اني راجعلو مو بسبب صداقتنه ..

بسبب ان مصلحة الي يمو .. بس عندي امل بطيبة قلبو .. وامل بحنيتو وهذا صديق عمري .. واعرفو ما يفشل احد بحياتو .. ما اعتقد يفشلني ..

انتظرت يوم الخميس بتردد وخوف وترقب .. سمعت ان شاهين نازل وبيت اهلو .. بدلت وطلعت اني خطوة ليكدام وخطوة ليورة .. اعذروني يلقراء يمكن راح تصنفون عليه شوية ..

بس انتوا ما تعرفون شراستو .. لو تعرفوا حق جان عذرتوني .. اني ويا سنين واعرفو كلش زين .. المهم وصلت بيتهم دكيت الباب .. طلعلي اخو ستار

الولد انصدم .. كال اهلا علاء .. تفضل .. كتلو شلونك اخبارك .. ان شاء الله بخير .. بس جيت اسلم على شاهين موجود
كالي كل الهلا بيك .. اي موجود تفضل تفضل ..

وطببني للديوان كعدت وكالي هسه اصيحة الك .. راح .. واني عيني ع باب ما اعرف شلون راح يدخلي شاهين .. وشنو راح يكولي ..

انفتح الباب .. وجان يطب شاهين .. واكف بلباب .. اني من طب وكفت على حيلي ... فات لابس دشداشة بيضة ولاف على راسو جراوية .. يشمغ اسود .. بس ما تقدم بقى واكف بلباب ودحج بعيونو عتب عليه ..

اني مشيت باتجاهو ومديت ايدي للسلام .. ردت شوية اخفف من زعلتو .. هوه شسوة .. ضربها لايدي و وخرها ..

اني انصدمت 😨.. ما اعرف فشلت .. ما اعرف شنو الي راح يسوي وره هل حركة .. ممكن يضربني .. بس اني بديوانو ما اعتقد يضربني .. بس هوه ردت فعلو عنيفة ما راح يفكر اصلا ..

كل هذا داور بفكري بلحظات .. ما احس واذا شاهين جرني .. وحظني .. اني هم حظنتو .. والصراحة دمعت عيني ..

شاهين ..متحملت اشوف اخوية وصديق عمري كبالي وماحضنو جنت مشتاقلو حييل مد ايدو يريد يصافح ايدي ردت اكثر من مصافحة ردت حضنو الي حرمني منو اشهر واني انتظر هل لحظة جريتو وحضنتوا بقوة ..كتلو شدعوة يا علاء .. شدعوة نسيت خوتنه ..

شاقيتك اني لان حاسبك واحد من اخوتي .. ليش هيج تزعل .. وجيتك برجلي للبيت وما طلعتلي .. هاي جزاتي ..

علاء ..اني من فشلتي .. تخيلت الموقف شلون اني عاملتو من اجاني وشلون هوه ردها الي بطيب .. جان يكدر يكوللهم اشمروا بره ..

وما يطلع حتى عليه .. كتلو والله يا اخوي الشيطان لعب بعقلي ..عاد تعدلنه وكعدنه .. كاللهم صبولوا ل علاء كهوة .. وهسه تضيفوا احسن ضيافة ..

صبولي كهوة وشربت .. وجابولي طبلة خلوا عليها اشكال والوان .. الفواكه والبقلاوة والحلويات .. وكعد شاهين مقابيلي .. اشوف عيونو تضحك .. كتلو شاهين يا اخوية .. اني غلطت وياك .. وغلطت من ما طلعتلك من جيتني .. وجاي اني اعتذر منك ..

شاهين ..باطل عليك .. تعتذر مني .. ليش تعتذر مني .. هوه من يا وكت بين الاخوة اعتذارات .. وبعدين انت خويي وصديق عمري ..

علاء ..وجان يضحك ويحشش تحشيشتو المعتادة .. كال هيه خوتنه خوه لو زوج جواريب .. ويضحك .. اني هم ضحكت والولد ضحكوا .. وكمنه نتشاقة ونضحك .. يمكن خلال ربع ساعة كل الزعل والمشاكل راحت ..
ورجعنه مثل قبل ..

شاهين ..سئلتو كتلو شلون الدنيا وياك يا علاء .. شغلك شلونه .. مرتاح سولفلي ..

علاء ..اني دنكت راسي .. كتلو والله يا شاهين صارت امور جثير .. واتبهذلت وانهانيت .. وبطلت من شغلي صار هسه تقريبا شهر .. وكاعد ..

شاهين ..باطل ..وليش ما جيت كتلي مضوجيك بلشغل والله اشك حلوكهم ..

علاء ..انت تعرف الصار ..

شاهين ..مازال هشكل .. اذا تحب .. وبعدك رايد .. ارجع لشغلك يمي .. وكلشي ما تغير .. تلزم شغلي والمزرعة .. اذا انت تحب واذا ما تريد بكيفك ..

علاء ..اني انوب تفاجئت من كرمو .. يا اخي هل رجال ما اعرف شنو .. كتلو والله ياريت ..

شاهين ..ستار هسه تنطي المفاتيح مال المزرعة لعلاء .. وتبلغهم بلشغل منا ورايح علاء المسؤول عليهم .. وانت تشيل ايدك ..

ستار ..حاظر خيي صارر 

علاء ..كمت حضنتو لشاهين وبوستو واتشكرت منو لان افضالو مانساها الو ..واخذت المفاتيح مال المزرعة .. ورجعت اخذت السيارة .. ورجعت لشغلي ويا شاهين ..

كملت التعليلة وياهم وطلعت للبيت فرحان .. ومتونس وطاير من الفرح .. واريد ابشر حبيبتي ان اني رجعت اشتغل .. خابرتها وبشرتها ..

وهيه هم فرحت .. وكتلها لازم نتشاوف وراها كمنه نتشاوف عادي .. مره الصبح ومره بلليل المزرعة صارت بكيفي وشاهين بلكلية ما ينزل كل اسبوع يوم .. لعبت لعب .. والفلوس زينه ..

وكثرت مطاليب غرور .. حتى ذهب اشتريت الها .. والي يسئل على الشغل الي جنت اشتغلة الو .. هوه جانت عندو وكالة مال حنطة يشتري من الفلاحين الحنطة او الشعير ويبيعها للدولة .. وفلوسها خير من الله الربح .. وجانت عندو اشغال اخرى .. همه الناس الله رازقهم ومفضل عليهم

.. وشاهين من احنه زغار يشتغل ويتعلم الشغل من جدو الله يرحمو .. المهم اني جنت لازم كل اشغالو .. وعشنه حياة سعيدة ..

الى ان يوم من الايام .. كاعد اني وغرور بلحديقة الي كدام البيت مال المزرعة ودنسولف نضحك .. ما احس واذا سيارة شاهين بلباب مال المزرعة 😨

#وللحكاية_بقية

#يتبع .....

#سارة_المجيد🌹