#لا_ياصديقي

#المحطة_الثالثة_عشر

#بقلمي_سارة_المجيد

شلونكم يالعمر كلووو وهذا البارت الاضافي تدللون عليه 😘😘

مامش #ريح
#تاخذني من اديّه لغير ديره
ارد اهج لصحرة تستوعب #حسرتي
#الحسرة البكلبي #چبيرة 💔

علاء ..شنو القدر المجهول الي منتظرني اااااااه يادنيا
شسوي هسه وين ادير وجهي والمن انشد ..
بقيت امشي
وجان اطب بمنطقه قديمه ..ازقتها كلش زغار بحيث سيارة ما تطب بيها .. واني امشي قريت غرف للايجار ..

الدنيا ليل صارت .. دكيت الباب طلعت مراة كبيرة بالعمر يسموها ام غايب .. سلمت عليها .. وكتلها كاتبين غرف للايجار .. كلتلي اي وليدي .. تفضل .. فتت شفت بيت قديم .. غرف فوك وغرف جوه ..

ام غايب ..تفضل وليدي كول ..

علاء ..اريد اأجر غرفة يمكم

ام غايب ..مايخالف .. ايجار الغرفة يومي .. لان هنا كل الساكنين خطية عمال وناس وضعيتهم تعبانه .. ف اجورهم يوميه ..

علاء ..ميخالف شكد الايجار ..

ام غايب ..شوف الغرفة وما نختلف ..

علاء ..شفت الغرفة .. حلوة وزغيرة ونظيفة ..

ام غايب ..وليدي انت مبين غريب عن بغداد ..

علاء ..اي والله خالة ..

ام غايب ..شجابك لبغداد ..

علاء ..والله يا خاله جيت ادور شغل واشوف رزقي بهل ارض عسى ربي يجبر بخاطري والكه شغل ..

ام غايب ..الله يسهل امرك وليدي ..

علاء ..واتفقنه على الايجار وكلشي تمام وطلعت المراة وبقيت بلغرفة امدد .. واكلب بافكاري .. ما اعرف الي سويتو غلط او لا ..

و حطيت راسي ونمت .. وثاني يوم كعدت لكيت المراة الجبيرة مسوية جاي وريوك .. وكعدت .. كتلها صباح الخير ..

ام غايب ..صبح النور .. تعال تريك وليدي ..

علاء ..لا خاله شكرا ..

ام غايب ..هاي تره من ظمن الايجار يمه .. اكعد اشرب جاي ع اقل واطلع وراها دور شغل ..

علاء ..والله كيفت لان جنت جوعان وراسي يوجعني كعدت شربت جاي واكلت لكمة وطلعت امشي وادور شغل ..

وين ما اروح محد يقبلني بسبب مرضي .. وحقيقا شنو يستفاد مني الي يشغلني ..

اني لا اكدر الزم شي ايديه ترجف لا اكدر اشيل شي جسمي ما يتحمل ..

واني اتمشى .. شفت تلفون .. كلت خلي اتصل بغرور وافهمها بكل الي صار ..اتصلت عليها واني ادعي الله تجاوب هيه لان اني ما متصل بيها الظهر .. جاوبت ..

كتلها هلو حبيبي .. اسمعيني اريد احجي شكم حجاية ع سريع .. وحجيت الها كل الي صار ..

غرور ..وهسه شلون علاء .. شلون ..ليش الامور كاعد تتعقد ويانه ليش ديصير هيج ويانه

علاء ..حبيبي اصبري الله كريم اني هسه بغداد ..

غرور ..يا .. وشتسوي بغدداد ..

علاء ..والله ادور شغل وارتب اموري وراها نشوف شلون ..بس وعد والله ما اتنازل عنج والا اتزوجج .. بس اصبري عليه ..

غرور ..علاء اني انتظرك للموت صدك ماخلي اي مخلوق يلمسني غيرك اني الك وبس ..

علاء .. هيه كالت هشكل .. اني صار عندي دافع اقوة اتمسك بيها .. وسديت التلفون ومشيت..

في مكان اخر ..

شاهين ..نزلت من دوامي كلت امر ع علاء اشوفو اشسوه لان اخر مرة شفتو حالتو مخربطه خفت عليه لايتهور ..

والله رحت ع بيتهم طلعلي اخو الاصغر منو سئلتو وين علاء ..كال تعال طب جوه ابوية يكولك

والله طبيت دخلني بالصالة كعدت وره اشوية اجه ابو علاء كمت حظنتوا وبوستو

ابو علاء ... اتفضل وليدي اكعد

شاهين ..تسلم عمي ..اجيت اسئل ع علاء وينو

ابو علاء ..اووووف ياشاهين شحجي وشكول ..من يوم الي رفضنه البنت الي اختارها حتى يتزوجها كام يعلي صوتو عليه ويعاند ويتحداني ...تالي طردتو من البيت ..

شاهين ..لالا عمي ليش هيج مهما يكون هذا ابنك من صلبك ليش تطردو مايصير هيج خلونه نكدر نقنعو عسى ولو يعوفها لهاي البنت ..والله اني هناك بالدوام وكل بالي يمو وينو هسه ماعرفتوا

ابو علاء ..والله ياوليدي ماندري بي وين لان من طردتو طلع ومارجع بعد ..امه كلبت الدنيا عليه حتى اروح ادور عليه ..
والله كمت ادور يم اصدقائو محد الو علم بي ولا الو ذچر

شاهين ..وتالي راح تبقون ساكتين ع اختفائو غير تبلغ الشرطة حتى اتدور علي ..مو تدرون هوه مريض ومايكدر يعيش وحدو لازم احد يمو اخاف تجي الحاله ومحد بجانبو شلون بهل حالة

ابو علاء ..والله مادري يا ابني خفت من الفضايح ..اني اعرف علاء عنيد والي براسو لازم يسوي ..خلينه ننتظر شوية واشوف شلون تاليتها ويه رفيجك

شاهين ..ماشي عمي اي مساعدة تريدوها مني اني حاظر بالخدمة بس كول

ابو علاء ..تسلميلي وليدي ماتقصر كفو منك

شاهين ..يله عجل اني اترخص اودعناكم واي شي تسمعون خبر عن علاء بلغوني اول بأول

ابو علاء ..الله كريم وليدي

شاهين ..طلعت ورحت لبيتنه وبقيت افكر بعلاء شلون ويا ليش هيج متمسك بهل بنية شلون دولبت حالو والله عجيب امرو ..

ومرت الايام ومر ع اختفاء علاء شهر ومحد يدري عنو وين راح وامو اتدك وتلطم وابو علاء يهدي بيها وبدأ يدورون عليه بالمراكز والمستشفيات لاكن بدون فايدة علاء فص ملح وذاب

في مكان اخر ..

علاء ..بقيت على هل وضعية اروح وارجع يوميا .. وعده على هل وضع شهر وخلصت فلوسي .. و في مكان اخر .. اهلي كالبين الدنيا يدورولي .. ما مخلين بتكريت لا مستشفى لا مركز ماكو ..

امي يوميا تحط وتلطم .. وابويا يواسي بيها وهيه تكولو بسببك الولد ضاع مادري انتحر مادري شصار بي .. راح ولدي محد يدري بي وين ..

اني خلصت فلوسي ما ظل عندي ولا دينار .. منين اجيب ايجار لام الغرفة منين اجيب فلوس اكل بيها ..

شسويت بروحي اتبهذلت واتدمرت بس كلت ميخالف كوولشي يهون لعيون حبيبتي ..

نزلت على المراة لكيتها كاعدة بنص الحوش .. كتلها خاله اني باجر عايف الغرفة ..

ام غايب ..ليش وليدي وين تريد تروح ..

علاء ..والله يا خاله ما ظل عندي فلوس وشغل ما لكيت ..

ام غايب ..ميخالف يا وليدي اني مسامحتك .. ابقى ودور واذا لكيت شغل عود ردهن الي ..الدنيا مانكطعت ولساها بخير

علاء ..اني عزت عليه نفسي وما شفت امل بلشغل .. قررت ان اطلع ..كتلها رحم الله والديج خاله ماقصرتي ..

سلمت عليها وتشكرت منها على حسن الضيافة وطلعت امشي بلشارع .. ما اعرف وين اروح ومنين اجي انسان غريب بديرة غريبه ومحد عندي اروحلو يساعدني بس الله ..

دعيت ربي يعدل حالي ويساعدني بهل شدة لان تعبت .. رجعه لاهلي جنت مقرر ما ارجع للموت ..

امشي وامشي بهل شوارع واسئل الناس اذا احد يقبل يشغلني .. وصلت حديقة عامه .. وجان الدنيا ليل تصير .. رتبت جوه شجرة الاس مكان انام بي وحطيت تكرمون حذائي جوه راسي ومددت ونمت ..

كعدت الصبح .. واشوف مسطبه كعدت عليها وادحج على الناس .. كتلني الجوع وره الظهر .. دحجت ولد شاب يمشي .. وجان يشمر نص لفة بلحاوية مال الزبل ..

انتظرت لما راح بعيد .. ركضت للحاوية طلعت النص مال اللفة اكلتها .. واجه الليل واني ع هل نص اللفة .. والدوة مالي مال مرضي خلص ..

وكمت ما اسيطر على اعصابي .. رجفتي زادت .. تكرمون حتى تبول على نفسي ما عاد اكدر اسيطر .. وتكسف حالي .. وبقيت يوميا اطلع على حاويات الزبل اجمع الي الكا بقاية الخبز والاكل ..

واعيش نفسي عليها .. يوميا افتر على مزابل المنطقة وارجع جوه الاس اختل وانام .. و تجيني الحالة مثل حالة الصرع اضل ارفس بمكاني الى ان اصحى محد يمي ..

مرار وذلة ما بعدها ذلة .. و عدت شهرين .. واني على هل وضع الكسيف ... وقلبي محروك على حبيبة گلبي ..

اخاف تنساني . بس اكول لا غرور ما تسويها .. والا اشوف حل وارجعلها .. اووووف كلبي طك عليها ...

شكد مشتاقلها اتذكرت ايامنه جنه نلتقي ونسولف ونضحك ااااه شوكت احضى بيها شوكت والله نفسيتي اتدمرت ... جنت اتمشى بلشارع وملابسي وصخة وصخة .. حسيت بنفسي مو تمام ..

وجان بلشارع تجيني الحالة مال الصرع .. وكعت وتكومت بالكاع .. اجوني الناس تركض وشالوني وللمستشفى .. ولد طلع جنسيتي ..

اني من قبل كاتب رقم اهلي .. بورقة ولازكة على الجنسية .. اخاف اتخربط حتى يخابروهم ..

وهذا الولد كبل دك عليهم ..جاوبتو امي .. الو ..
الولد .. مرحبا .. هذا بيت مؤيد ابو علاء

امي .. اي نعم تفضل

الولد .. حجية هذا ابنكم تخربط وهسه بلمستشفى

امي ..بصدمه وذهول يا ولد تقصد .. منو شسمو

الولد .. اسمو علاء ..

امي .. بقيت ما اعرف شحجي .. ابني صار 3 اشهر محد يدري بي وين .. كتلو فدوة لعمرك يمه يا مستشفى الله يخليك بساع

الولد .. سجلي خالة العنوان .. كذا كذا .. بغداد

امي .. كلت بكلبي بغداد .. شوداك يا علاء لبغداد .. بعدين كتلو وليدي اذا يصحة بس لهي خاف يطلع من المستشفى وما يعرف وين يروح تره مريض وعقلو مو شي لا تكولو اني بلغت اهلك فدوة لگلبك وليدي

الولد .. ماشي خاله راح ابقى يمو

امي .. خابرت ابو علاء .. وطلعتو من شغلو و بوجهنا طلعنا لبغداد .. وصلنه واذا علاء ديحجي ويا الولد ..

من طبينه تفاجئ بينه
راد ينهزم كوه لزمنا وهدئنا .. ادحج علي وصخ وشعرو طويل ولحيتو ورايح ملامحو مكلوبة ..

علاء .. اني دامشي بلشارع وكعت .. ما حسيت بحالي الا واني بلمستشفى .. و ولد يمي كالي اني جبتك شفت وضعك مو زين .. وبقى يسولف وياي .. واني كل عقلي اكولو عندك شغل الي .. وهو يكولي اي اكيد .. تدلل وكعد يشرحلي .. يمكن ساعة ..

ما احس واذا امي وابويا ع راسي .. انصدمت ردت انهزم لزموني .. بقيت اصيح عوفوني .. اني اكرهكم .. وهمه يهدئون بيه .. كتلهم حرمتوني من الي احبها وطردتوني لحكتوني الى هنا شتردون مني بعد ..

ابو علاء ..اهدأ وليدي ماشي الي تريدو يصير .. صار .. تدلل نزوجك هاي البنية .. تدلل ..

علاء ..ماصدكت كتلهم تقشمروني والله .. ما ارجع .. ابويا حلف .. وابويا من يحلف معناها انتهت .. بديت اقتنع ..

ام علاء ..وين رحت يمه 3 اشهر روحي فرفحت عليك ليش هيج سويت بأمك .. والله عبالنه خسرناك .. والحمدلله الله رجعك النه .. وما مستعدين نخسرك بعد ..

علاء ..اعذريني يمه والله ماكدرت اتحمل اخسر حب عمري انتوا اتشوفوا سهل بس عندي مستحيل هل شي موتي اهون من ان اخسرها لحبيبتي

ابو علاء ..الله كريم ابني يله مشينه ..

علاء ..ومشينه و اشترولي العلاج .. وبلطريق كعدوني بمطعم .. من شفت الاكل كمت ابلع بدون شعور .. عبالك اول مره اشوف الاكل بحياتي ..

ورجعت للبيت واني مو ندمان على البهذلة والاذية الي صارتلي .. حبيبتي راح تصير الي .. تستاهل حبيبة قلبي كل هاي التضحية .. حياتي جوه رجليها اذا تطلبها ...
المهم كدرت اخلي اهلي يقبلون ع غرور ويوافقون ع زواجنه 😍😍

وللحكاية بقية

مندري اهل علاء كانوا صادقين بكلامهم وبقرارهم لو هذا كان تخدير لاعصاب علاء حتى يرجع ويرضخلهم ... للاسف علاء جان مغمض ومايشوف الي جدامو وراح يغلط غلطت عمرو الي تشمرو بالوادي الاظلم ... بعد ما يختفي شاهين من حياتو

انتظروني باجر ان شاءالله بنفس الموعد وراح انشوف جواب لهذي الاسئلة ...

يتبع ....

#سارة_المجيد🎀