#لا_ياصديقي

#المحطة_الرابعة_والعشرين

#بقلمي_سارة_المجيد

مساء الخير والعافية ع قلوبكم الصافية
🍒🌱🍒🌱🍒🌱🍒🌱🍒🌱🍒🌱🍒

علاء ..رجعت للبيت بشرتها لغرور .. حجيتلها شلون شاهين وكفلي قبل جثير .. وشلون هسه عافلي الدين الي عليه .. و سوالي شغل وشغلني .. وشلون هيه جانت ظالمتو من تحجي علي ..

كالت اي صحيح .. كتلها زين .. بما ان هوه طالع من السجن .. وهاي افضالو هواي علينه .. ليش ما نعزمو ..

غرور .. ها .. نعزمو ..

علاء ..اي ..نعزمو .. هم يشوف بتنه وهم على الاقل نشكرو على مواقفو ويانه ..

غرور .. اي حبيبي بكيفك .. بس !..

علاء .. بس شنو .. شبيج من اجيب طاري شاهين انتي تضوجين

غرور .. مو يا علاء .. يكولون هذا صديقك شراني .. وصاحب مشاكل جثير وتكريت كلها صايحة الويل من بلاوية ..

وهم هسه طالع من السجن خاف الامريكان مراقبي واني اخاف عليك انت من حمل مشاكل شاهين

علاء .. هههههه لا حبيبتي لا تخافين .. شاهين صح وكح .. بس تره على الحق .. عمري ما شفتو اعتدى على احد بالباطل .. والناس كلها تعرف هذا الشي ..

وثاني شي الامريكان .. لو يدرون عندو شي .. ليش هدونه من الاساس هوه اصلا جان يمهم و 4 سنوات حتى بدون تهمه ملكوح هيج ..
ف لا تخافين حياتي ان شاء الله ماكو شي

غرور .. زين اكولك .. هوه شعجب الى هسه ما متزوج ..

علاء .. هوه يريد بنت عمو .. بس شوية مشاغل يريد يرتب امورو .. ف ما اتصور ينتظر اكثر يجوز فتره قليلة ويتزوج

غرور .. هنيالها لبنت عمو .. هم ضابط وهم شيخ وربعو تهابو .. وهم وكاحة .. وهم زنكين .. مبخته بنت عمو

علاء .. ها ها غرور .. شنو هل حجي هذا حسد علني ترا

غرور .. ههههههه اي حبيبي لا تزعل الحق ينحجة

علاء .. ديله اسكتي ام الحق وكومي نام .. باجر عندي كعده وشغل من الصبح .. وخلي بالج عكب باجر راح اعزم شاهين على الغدة .. اريد غدة مرتب مو تفشليني

غرور .. اووك حبيبي تدلل

علاء ..ونمنه .. وكعدت الصبح نشيط .. وشربت جاي وتريكت وطلعت .. رحت طلعت خططت الكاع وسويت خريطة للبناء مال المعمل ورحت لشاهين درستها للخريطة اني ويا ..

وتغدينه ورحت جبت عمال .. رتبت المزرعة ونظفتها وكملتها ..
ورجعت للبيت سبحت وارتاحيت شوية .. ورحت تعللت يم شاهين بلليل ..
كتلو شاهين اخوي باجر ان شاء الله غداك يمي بلبيت

شاهين .. اني بداخلي ما ردت اروح اله على البيت .. لان اني اعرف هاي مرتو شنو من شي .. وما اعرف بشنو ممكن تفكر .. ف كتلو ممنون حبيبي علاء غداك واصل ..

اني ما اريد اكلفك واعرف وضعك شلون .. وهم اني هسه ملتزم بشغلي اريد ارتب اموري وان شاء الله اتزوج .. ف ممنون منك

علاء .. ليش يا اخوي لا تفشلني

شاهين .. لا والله مو اريد افشلك .. زين اجلها هسه لوكت بعدين لغير وكت .. اطلب عزيمه لا تخاف اطلعها منك ههههههه

علاء .. ماشي يا خوي .. انت هيمته ما يصح الك .. كولي وتدلل

شاهين .. ممنون وبارك الله بيك وتسلم كدها انت وكدود

علاء ..رجعت من التعليله وفتت للبيت كعدت ويا غرور شوية .. كتلها يابا غدة باجر انلغه

غرور .. اهااا .. ليش

علاء .. والله شاهين اعتذر يكول هسه مشغول وكاعد يرتب لزوجو .. وكال ان شاء الله على غير وكت

غرور .. اممممممم .. لا عيني انت ما تعرف

علاء .. هوه شنو الي ما اعرفو هذا هم بيها شي

غرور .. اي بيها شي .. هذا صاحبك عود يستصغرنه واحنه مو كد مقامو ما يطب بيتنه .. والله يالله شلون نفسيات .. قحط

علاء .. اهوووووو .. شبيج انتي دائما تفكيرج سيء بلرجال .. شكد وكفلنه وانتي تحجين علي .. و بعدين اني وشاهين اصدقاء من احنه جهال ..

طول عمرنه ناكل بماعون واحد .. ما يوم بحياته استنكف او ضاج .. سنين اني ابيتهم عايش اكل واشرب وانام يمهم مابيوم حسسني ان هوه اعلى مني

غرور .. اووووي واني شعليه .. انت وصاحبك مشكلتك بعد

علاء .. اي بس فكي ياخة من الرجال ذبحتي
وكمنه وفتنه نمنه
وبقيت على هل حال فتره .. وكملت المعمل وكام يشتغل الحمدلله ..

وكمنه ننتج والخير صار جثير .. وراتبي صار زين .. وسددت ديني لابو الجملة مال المحل ..

وصرت اشتغل اطلع من الصبح ما ارجع لليل .. وارجع كبل انام من التعب ..

وره شكم شهر ..شاهين تزوج بنت عمو ..وسوه عرس كبير يخبل .. وعزمني ورحت على العرس .. ودبجنه وضحكنه ..

اني ترخصت وطلعت من العرس من وكت .. لان جانت مريم مصخنه ورجعنه للبيت .. بعدني توني مدد .. ودك عليه شاهين

شاهين ..علاء ..هسه ترجع للقاعة .. بسرعة وبدون تأخير ..  ..

علاء ..استغربت شبي شاهين سديت التلفون
يا ستار يا ربي .. شكو شصاير .. ركضت غرور تكولي شبيك ..

كتلها ما ادري شاهين خابرني متخبل .. يكول هسه هل لحظة تجيني ..

وركض نزلت ع شارع .. اني شاهين اخذلي سيارة زغيره لشغل المعمل وشغلي .. ركبت وطلعت بساع .. وصلت .. لكيت الولد مجتفين جليل ابن عم شاهين ..

شاهين ..دكيت ع علاء مرة ثانية سئلتو وين انت كال بره القاعة توني وصلت كتلو تمام علاء ابن عمي جليل بالكرفان طلعو الحرس يمك حطو بلجنطة مال السيارة ..

وتودي هسه ع بيت المزرعة .. وما تنزلو تخلي بلجنطة الا اني اجي عليك ..

علاء ..اني انصدمت وشويه هم خفت .. كلت هذول عمام .. وناس وكح مو هينين .. اني ليش شاهين يحطني بلنص .. صاح بيه شاهين .. بصوت راد يخطف روحي ..

شاهين ..الووو تسمع الي كتلك علي لو لع ..

علاء ..فززني كتلو اي اي ماشي .. حطيتو بلجنطة مال السيارة .. جليل ريحت المشروب طالعه منو تكتل .. وطلعت على المزرعة ..

وكعدت هناك انتظر .. كاعد يم السيارة .. اسمع جليل بلجنطة يون .. انقهرت علي .. حاجيتو من وره الجنطة .. كتلو جليل تسمعني ..

هوه شو يصيح طلعني ما طلعني .. كتلو جليل .. شطلع منك والله شاهين يذبحني .. وانت تعرف ابن عمك من واحد يخالف كلامو ..

جليل ..اي .. شاهين تخافون منو كلكم .. بس اني وكفت بعينو وخربت عرسو ..

علاء ..كام يضحك مثل المسودن كتلو جليل خيي .. هذا شي بينك وبين ابن عمك رجائاً لا دخلني بي .. ولا تسوولي مشاكل ..

جليل ..هاي هيه عجل وخر انت ..

علاء ..سكتت اني وهو سكت ظل كاعد بلجنطة .. شوية انوب اسمعو العفو كام يستفرغ ..

انوب راح تندمر السيارة .. والله شو انقهرت علي .. جيت فتحت الجنطة لكيتو منتهي ..

سحلتو سحل سحل .. فوتو بلبيت جوه كعدتو رشيت على وجهو شوية مي .. شربتو مي .. كالي اني اشكرك .. كتلو لا العفو انت هم حسبت اخوية ..

جليل ..والله يا علاء .. والله .. خويك ظلمني .

علاء ..باطل عليك جليل .. شاهين والله حيشا من الظلم ..

جليل ..مثل ما اكولك سلب روحي مني ..

علاء ..جان يخطرف بالكلام كتلو توكل بالله واستهدي بالرحمن هذا ابن عمك واكبر منك ..

واجب عليك تحترمو .. وهو خوش زلمه محد ينكر هل شي ..
كالي تمام تمام ..

شوية انوب شو دك عليه شاهين .. كلت لا يالله هذا شنو العريس .. شو يخابر هسه .. جاوبتو .. كالي ها .. جليل يمك بلمزرعة .. كتلو اي ..

شاهين ..عجل تعال مر عليه حتى نروح يمو  ..

علاء ..انصدمت منو هذا عايف حرمتو بليلة عرسو صدك جذب ...كتلو ويييين تجي تخبلت انت .. انت عريس وعيب تطلع هسه ..

شاهين ..ما تولي .. عيب ايش يول .. تعال ولا تلغي جثير .. وسديت التلفون ..

علاء ..والله مكدرت احجي بعد شغلت السيارة ورحتلو للبيت اخذتو من الباب وديتو للمزرعة .. طبينه سوا للبيت ..

اني كعدت بصفحة اتكترت .. بس ضليت اتابع الموقف .. اخاف واحد منهم يتهور ويأذي الثاني .. كلت اتدخل .. كام شاهين وسحلو كعدو

شاهين ..علاء جيبلي سطلة مي هذا بعدو سكران صاير خروف راح علاء جابلي سطل مي بارد رشكتو بوجه جليل صحى زين ..

علاء ..بقيت واكف بس وراها شاهين كلي اوكف انتظرني بره كتلو صار خيي راح انتظرك بالسيارة وصار بينهم حجي وصياح وعياط ..

واني باقي بره طلعت جكارة دخنت وراها طلعوا .. وكالي روح اخذو وصلو لاهلو .. كتلو ماشي .. انت ارجع للبيت عيب انت عريس ..

كال ديله روحوا .. طلعنه وهوا راح على البيت .. اني وصلت جليل لبيتهم ورجعت على بيتي وفتت للشقة .. لكيت غرور كاعدة ..

غرور ..ها يمعود شأخرك الى هسه ورى حظر التجوال .. شبي شاهين ..

علاء ..هيج يمعوده مشاكل عائليه بيناتهم ..

غرور ..اي اي شنو هيه المشاكل .. احجيلي ..

علاء ..كتلها وانتي شعليج جاعد اكولج بيناتهم .. لو انتي تموتين على العلوم ..

غرور ..اي اي اخرب على العلوم .. هسه احجي لا تصير حقنه ..

علاء .. اوووف والله صار كيت وكيت ... وفتهمت ان جليل جان هم يريد بنت عمو ومشاكل ويا شاهين على هل اساس ...

غرور ..غير مسعدة هاي مبخخخخته والله ... شلون اثنين ولد شيوخ .. متذابحين عليها شلون حظ ..

علاء ..هيه كالت هيج فار دمي كلت خلي الصمها ع حلكها .. لان لحت بلحجي وداست زايد .. كتلها اي حقها ..

لان هيه هم بنت شيوخ وعايشة بلخارج .. خوما بلخرايب مال تكريت .. هيه انعقجت .. كالت شتقصد .. كتلها ما اقصد شي خلي ننخمد احسن .. كالت اي احسن .. ونمنه

ومر على زواج شاهين شهر .. هل مره كلت لازم اعزمو .. ما ترهم بعد .. يعني تزوج لازم اعزمو ..

كتلها غرور .. هل مره لازم اعزم شاهين .. لان هسه تزوج وعيب ما اعزمو

غرور .. شبيك انت تريد كل مره تفشل روحك .. هم راح يرفض وراح تفشل مره اللخ

علاء .. لا هل مره الح علي حيل واذا رفض والله ازعل علي من صحيح ..

غرور .. ماشي بكيفك ..

علاء .. زين اليوم حظري نفسج .. نروح عليهم نبارك الهم وناخذ ويانه طلي هدية .. عيب لازم نزورهم ونباركلهم

غرور .. كل عقلك .. طلي .. شدعوة .. الطلي نسوي غدة ونعزمهم علي .. شنو طلي يمه

علاء .. يبوووو .. زين شنو ناخذ الهم .

غرور .. امممممم .. ننطيهم ٢٥ الف فلوس مو احسن

علاء .. بله اسمع الفكرية شتحجي .. ولج همه بحاجة ٢٥ الف مالتج .. تريدين تضحكيهم علينه

غرور .. يبوووو .. هسه احجي شناخذ الهم انت كول

علاء .. اني اكول ناخذ الهم شوية تحفيات حلوة وهيج ... هذول ناس يحبون هذني الاشياء

غرور .. راح يجلطني هذا .. بابا فلوسنه ليش هيج نضيعهن

علاء .. ولج كافي اسكتي .. هذول صاحبين فضل علينه ولو شكد ما ننطيهم ما نجازي فضلهم ..

خلي اطلع اشتري التحفيات وانتي تحظري ارجع اخذج ونروح عليهم ..

غرور .. عبالي اجي وياك صار شكد محبوسة اهلي ما شايفتهم

علاء .. تستاهلين .. ولا تخليني احجي اكثر

غرور .. بداعتي .. بداعت مريومه حبيبتك .. خليني اروح على اهلي مرات اضوج النهار كله مكابله الحيطان

علاء .. هسه الله كريم .. خلي اروح اشتري وارجع

غرور .. ماشي .. الله وياك

علاء ..طلعت للسوك اشتريت شكم تحفية حلوة .. وغلفتها يم المكتبة ورجعت للبيت اخذت غرور ورحنه على بيت شاهين ..

شاهين ..جنه كاعدين اني وشهلاء متحظرين ع جية علاء وغرور بس بيني وبين نفسي مجنت مرتاح لجية هل غرور هاي استغفر الله من ذنبها ...شسوي علمود صديقي ماردت اكسر بخاطرو اضطريت استقبلهم ابيتي ...

المهم شكد ما اكدر اخلي شهلاء بعيدة عنها ماريدها تختلط بيها مو خوفاً من شي بس ماحب زوجتي تعاشر هيج نماذج قذرة ...

شوية والله وجان يندك الجرس رحت فتحت الباب طب علاء سلمت عليه وجان اتطب غرور شايلة بنتها صدت عينها بعيني عبالك شايفه جني جانت عيونها بيها خوفة مني ....
بس سويت نفسي ماعرفها مثل ذيج المره غلست دخلتهم جوه ...

علاء .. طبينه لبيت شاهين وفتنه بلاستقبال مرتب و بيت كبير ما شاء الله .. سلمنه وكعدنه .. اني وشاهين .. وغرور طبت على زوجة شاهين بلهول الثاني ..

وكعدنه نسولف ونضحك .. كتلو هاااا شاهين .. هسه انت هم تزوجت .. وما عاد تطلع تتعلل ..

شاهين ..ضحكت من هيج كال ..كتلو اي لا منو كالك ما اطلع اتعلل .. انت خيي ما تجي تتعلل .. عاصي بلبيت هههه

علاء .. كتلو المهم اسمع اني باجر عازكم يمي على الغدة .. انت واهلك

شاهين .. هسه مو كتلك ممنون و واصلة عزيمتك يا علاء ليش تلح

علاء .. والله يا شاهين اذا هل مره رفضت والله ازعل وياك .. وما نتحاجة بعد طول العمر .. شدعوة ..
يعني احنه مو كد مقامكم وتستنكف تجي

شاهين .. علاء احرجني بهذا الحجي .. اني ما اريد شهلاء تختلط ويا هاي المراة لان استغفر الله ماكدر اشيل ذنبها ..

وبعدين هوه علاء حالو على كدو مو حمل عزايم .. وهذا يلح عليه .. واحرجني حيل .. كتلو ماشي ماشي .. عندي اقتراح الك

علاء .. اي بله كول اقتراحك

شاهين .. شوف .. ناخذهم للنسوان ونروح على المزرعة .. هم سفرة ونغير جو الجو هسه طيب ..

وانت اهلك يسوون اكلات شوية واهلي يسوون اكلات .. وهم نطلع شوية وهم همه يغيرون جو خطية ..

علاء .. امممم يعني هيج انت تشوف

شاهين .. اي يمعود .. عوفك من هذا الروتين وهل ارتباطات واعزك وتعزمني .. بابا احنه اصدقاء وخوة دنيا

علاء .. هاي هيه .. شوكت ناخذهم ..

شاهين .. اليوم بلليل انطيك خبر .. لازم اتشاور ويا الداخلية ههههه

علاء .. ايبااااه ... صاير تاخذ اذونات .. وينك وين جروخك قبل تكمز عليه 😏

شاهين .. بله ما تنجب .. اني كتلك اخذ اذونات من عابت هل اذان .. جاعد اكولك اتشاور على الوقت الي يرهم ..

علاء .. ههههههههه ديله عجل .. كوم انطيهم خبر خلي تطلع ام مريم نمشي

شاهين .. وين رايحين اكعد اكعد اليوم نتعشة سوة

علاء .. لا يابا ما اكعد اريد اروح هسه انام باجر تدري عندي شغل .. خوما مثلك عريس ونايم لل 12 الظهر😏

شاهين .. تنام من هسه .. اي صدكتك .. 😉😉

علاء .. اهوووو .. كوم صيحلها خلي اولي

شاهين .. ههههههه ماشي ..

علاء ..كام شاهين انطاهم خبر .. وطلعت غرور ورجعنه للبيت وهيه كوووول الدرب تحجي ..

ومبهوووورة بلبيت وبلاثاث وشلون مرت شاهين تكعد شلون تلبس وشلون تاكل الفاكهة وشلوت تلزم الشوكة .. وشلون تسولف ومنغارة غيرة .. تريد تمووووت ..

يعني حتى بلكلاصات مال العصير متعجبة .. تكول هاي شنو الكلاصات من جوه رفيعة ومن فوك مفتوح حلكها .. تقصد الي على شكل كأس 😂 ..

وحتى بلبيت ما تسكت .. ددددددد ... كتلها كافي يمعوده خلي نام .. مو كتلج هاي عايشة بلخارج مو من اهل الخرايب .. شبيج متعجبة عبالك ما شايفة كلاص 😂 .. هاي انوب تخبلت وبقت اتدردم ونامت ..

#وللحكاية_بقية ..

إن كان الطريق على ما يرام احذر فاعلم أنك في كمين ".
- مقولة عسكرية.
.. فــــعلا 👌

هل ضحكات مال علاء راح تطلع من خشمو تابعو البارتات الاخيرة من القصة

يتبع ...

#سارة_المجيد🌹