#صرخات_غير_مسموعه ج2

#بقلم ام غايب

#تكمله_البارت الحادي عشر

لتكولون قيصر ولتكولون مابي احداث لان هذا تكمله لذاك البارت

كرار اني ....اعرف منو

باوع عليه بصدمه ....شلوون يعني

ارتبكت حيل وتندمت بنفس اللحظه اذا سويتهه هسه وانعدم عمر شلون اكدر اكمل حياتي وانام الليل

يعني اكيد الي خطف شهد خطف جنات

وانتي شمدريج ب شهد انخطفت احنه مكلنه الاحد

شهد كالتلي بس لتكول .....كرار بلله مرجعو جنات اموت والله
لزم ايدي ......بيده وبأيده الثانيه. حضني .....كله بسببي اني صار هذا الشي جان مفروض مااخليكم تباترن بالبيت ....مااعرف شلون مخليت كامرا بالسطح امددداني اي والله

كل كلمه يحجيهه كرار خنجر تدخل بكلبي توجعني علي.....شلون كاعد اسوي بي هيج ....شحجي عليك يا اثير خليتني بابشع موقف ممكن تسوي المره

حليتني اطعن الرجال الي سندني وحماني ودوم ستر وغطه عليه شلون اعيش ويا واني هيج سويت بي
باسني من راسي وبسته بصدره

والله العظيم يا ربي بس ترجع جنات بالسلامه وعمر يشوفوله حل اخلي كرار بعيوني وماافكر بغيره ولا اغدره .....اخلص من تأنيب الضمير

اعرف ....اعرف اني بعيونك مو زينه وزانيه ...وكلشي
بس مالي غيرك

ساعدني يارب ورجعلي بتي والله كلبي مطكك عليهه
والله كلبي يوجعني

والله مردت شي .....صار صوت بجيتي مسموع
مسح على ظهري كرار ....اششش وداعتج وداعة هاي عيونج يصيرن سوالف وجنات ترجع الحضنج

صار موعد تسليم الفلوس كلشي ماشي تمام ومكدر احد يوصل للرقم الي اتصل منه اثير ....جان منظم كلشي
وبلغهم اذا بلغو الشرطه ميستلمون جنات وجان الاتفاق وياهم يستلمون الفلوس يالله يرجعون جنات
بالفعل سلموهم الفلوس وساعتين جنات ماكو اي خبر عنهه

اني ملشت شعري .......يعني بتي ماتتت .... يعني جنات مااتت

رحاب/ولج يمه شجاج ليش تفالولين عليهه

يمه وينهه لعد وينهه فهميني هاي صار ساعتين وهمه ماكو

معقوله سواهه بيه اثير وكتل بتي ....احجي بكلبي واصارع اوجاعي والنار البي وافكر احجي واكلهم اثير لو شسوي ......

كمت اهز براسي مثل المخبله ......مااكدر ماكدر بعد بتي .....ماما بتي والله بتي

بعاللحظه دخل جدو جنت منعاره حيل امي لازمتني وابجي اجاني جدو .....

مجيد/لتخافين بنتج رجعت الحضنج
باوعت بلهفه .....وعيون مورمه من البجي

والله ....يعني رجعوهه

هز راسه وشبكته حيل وكمت ابجي
بشهكه رفرح وحزن وكلشي اختلط وياي

عافني وطلع بدون حتى ميطببطب على ظهري
شكد احتاجيت بابا بهاللحظه لو موجود جان كلشي اختلف

لو موجود جان موصلنه الهالمرحله ابد هو حماني وجان بقه يحميني

كلهه كاعده وتنتظر وصول جنات
صارت جيتة جنات حلم بالنسبه الي

اجتي طيبه تركض كالت جابوو جنات

ركضت ركضه ووياهه صيحة بتتتتي

جان شايلهه كرار اخذتهه منه وحضنتهه حيل يمكن عصرتهه بوقتهه وهيه تضحك

كعدت بمكاني وهيه بحضني كمت اشبك بيهه وابوس بيهه وهيه تضحك ولا عبالك والي صحكني اكثر الكرون الي مسويهن اثير الهه الفرك مينوصف مخربط وبيدهه لعابه مكفشه
هاي منين اللعابه

فارس/هذا الخاطفهه يريد يحلل لكمته وجاب لعابه الهه لتلزمون اللعابه ابد بقوهه بيدهه وجيبولي جيس ورقي

خوله/وهذا منين نجيبه

اخذت امي جنات مني ووكعت اللعابه بالكاع
اني باوعت عليهه جان فارس يريد يشيلهه ويدور جيس
نزلت للكاع اخذتهه وبسرعه ذبيتهه بالنجانه

كرار/احنه شكلنه هاااي ليش هيج سويتي

لان اخاف على بتي بلله رجعو اخذوهه ويه منو احجي
كرار اني مااريد بتي تروح مني

يجوز بيهه دليل ونلزمهم ليش هيج سويتي

اخذت جنات وصعدت فوك ....الحمدلله يا ربي من سويت هاي الخطوه ....يارب خفف الحكم على عمر وريحني وخليني اكمل حياتي مرتاحه
يارب تلطف بحاله والله مظلوم انت مو موصيهم بالدفاع عن الشرف احنه غير شرف
صعدت شهد يمي واخذت جنات مني .....وشبكتهه
ورجعت شبكتني

الحمدلله من رجعت والله هاي معجزه جنت الوب بداخلي واكول مستحيل يعوفوهه بعد يذبحوهه تعودنه على هالاخبار صارت حتى حياة الطفل مهدده
اووف يا شيرين يا حبيبتي الله يحبج والله رجعهه الج

اي والله الحمدلله ‏‏يالله حبيبتي إني اروح بعد
‏الحمد لله طمئينيا على جنات ‏وعليج

‏شبكتهه حيل وراحت ....مرتاحه حيل صح غدرت ب كرار بس الفلوس تتعوض بس روح عمر وشبابه ميتعوض وكرار هم مسؤل عن الي صار ب عمر

حضنتهه حيل ال جنات

جان تكلي ابع ....اتري ....اووح

ضحكت على سوالفهه جديده عبالك مو عشر ايام عبالك عشر سنين والله
ابد مكدرت عيوني تغفه وهيه بعيده عني .....وحتى مرات من انام هيج نومه ام ال١٠دقايق وافتح عيني واشوفهه ماكو
شويه وصعد كرار ورانه اول مدخل ابتسم وجنات صاحتلهه بابا وراحت علي تمشي
وهو فتح ايده اثنينهن وكلهه هله بروح بابا

كمت علي شكد مااشكره قليله بحقه .....

شكراً كرار

رفع حاجبه على شنوو لان دفعت فلوس لرجعت بتي هذا واجبي هاي بنيتي الصغيره ونزل جنات من ايده
وهسه نجي البنتي الجبيره حبية ابوهه

ضحكت

هز راسه وغمض عين بمعنى يكلي تعالي

حلفت اني بس تخلص هالمحنه اصير ال كرار مره بحق وحقيقي ....هذا هو راح ادفن حب عمر وان شاء هو هم يطلعه اثير متأمله يدفعون فلوس علمود يهربو ويكمل حياته يارب يصير هذا الشي توني رحتله وبشبكته الي دخلت لمى بدون متفتح الباب انصدمت
والله عرفتك ...عرفتك

كرار بملل ...والله بعدني ممرتاح ومالي خلك
وطلع وراهه

سديت باب الغرفه وكعدت وخليت جنات بحضني ابوس بيهه

جنونتي منو جابلج هذا

امووو ...امووو ....ددا ...أون أون وتضحك

اكو اطفال بعمر جنات يحجون وواضح بس هيه اللسانهه ثكيل شويه

وراهه سمعت كبت العيطه وكلام واضح شوويه

كااافي ....كااافي بعددددد مااتحمل هاي السوالف هاك جهالك بقيهم الك هذا موت بطيء الي .....مااتحمل

كاافي تعبتيني والله

فتحت الباب لان كوه اسمع
اني لو انت ....انت التعبتني انت الي كاعد تخوني

هيه مرتي

تتذكر كرار ....تتذكر من كتلي شكتلك ....كتلك هسه يجي اليوم الي من اوكف بوجهك واكلك هذا الكلام تكول هيه مرتي
تتهنا انت ومرتك

كااافي ر حمه الدينج كافي بس باوعي اكلج بشغله خل اكلك اصلا اني تقربت الشيرين بسببج

اكلج ماعندي شي وياهه

يوميه تكليلي تحبهه تجذب عليه انت اليوم متقربلهه انت اليوم كلت اسمهه مع العلم اني متأكد مااغلط بأسمج ابد خليتيني افكر بيهه وحتى من اريد انساهه
انتي تذكريني بيهه

ها جنت عدهه
ها خاف نمت وياهه
كمت حتى من ارجع من الحمل عركان مثل كل مره اسبح
تكليلي هااا لازم نمت وياهه
اذا انتظار..... هاااا. جنت تحجي وياهه

خبلتيني والله ....وحق الله الفوك راسي خبلتيني وتعبتيني

يعني متقرب الهه

ااااااي

حسبي الله ونعم الوكيل عليك والله يطلعهه بيك ان شاء الله واني عايفتلك الجمل بما حمل الك والهه بس والله يا كرار بعد ماارجعلك وكرهت اليوم الحبيتك بي

متقرب يللله شتريدين لج بابا هاي زوجتي حلالي اني مزاني

اذا تطلعين هسه من البيت بعد مالج رجعه اله

لمى/هو اني ماادخله بعد ...يلله وديني
واذا متريد توديني عادي اخابر بابا يجيني
لمى لعني الشيطان ممشي عليج الزهره
اني احبج وانتي تحبيني ماكو داعي نسوي مشاكل

صدك يعني تريدني اقبل بهذا الوضع لو اموت لو يبقه اخر يوم بحياتي هم متابقه الواحد خاني ومو بس خيانه جسديه خيانه فكريه يعني كمت تفكر بغيري كرار

كرار اذا متطلك شيرين اني ماابقه بعد والله اني حدي خلص بعد كلش مااتحمل ولتخابرني اله اذا مطلكهه

كرار/لمى لعني الشيطان

ماالعنه اليوووم كاافي اكلك تعبت انت شنووو متحس
شنووووو فهمني عاجبك تصير سي سيد ونسوانك داير مدايرك بس مو اني من ضمنهم اني الاحبه لو ملكي وحدي لو مااريده

شيرين/والله ما بيدي شي اني ....اني بس اريد اعيش بسلام ....اريد خيمه تحميني وتحمي بتي لا اريد رجال ولا خبره

دخلت الغرفتي اخذت حسره .....نومت جنات عل جرباي مال طيبه لان رجعنه ننام بالغرفه بس اكيد كرار هسه يجيب غرفتنا
مشت حياتي وراهه طبيعي ولمى متقبل ترجع وعافت جهالهه وراحت .....كرار متوتر طول الوقت ....

نصب غرفتنا بعرفة الجهال وحول غرفتهم الغرفة حسن ....بس شنو الجهال تدمرت نفسيتهم يبجون على امهم وانوب موسم دراسه واني ميقبلون ادرسهم خاصه حيدر حتى يخزر بيه ولاعبالك طفل عنده رفعة الحاجب المجيديه .......وانوب كرار ماعنده وقت دوام والعصر محل وباقين مستواهم ديقل

نزلت مثل يوميه على صيحه من عمه ....كرار جان نايم وجنات بصفه عفتهم ونزلت

انتي متنزلين عيوني ....شنووو متشبعين من الرجال ....مممم من مالت علي بسوالفج فارته فر العقله

سكتت مالي خلك رحت عل مواعين وتمن مطشر طيبه وحيدر من ماكلين لاعبين لعب اجتي وكفت ورايه

حنان/بشرفج هذا منظر بيت بي بنيه حديثه

عمه شيوي يعني غير الجهال

حبيبتي ذولي ولد رجلج ولد المكروده الي بكتي حياتهه
عمه كافي من فدوه اروحلج كافي تعبت

انوب هيه تعبت ....مرت الايام واني على نفس اسطوانتي القديمه ويه عمه ....

مااعرف اي اخبار عن عمر

اما البيت بعد ماباعه كرار أجره من الي اشترا منه
هو طلع الرجال مشتري استثمار ...ينخفق كلبي من اشوفه دايخ اما جدو شويه صار سلام بيناتنه كام يستقبل سلام مني

بيومهه عمه اجتي تركض ..... حافيه ولك كررار الحك الجدك

طلع كرار يركض .....حافي واحنه ورا
جان جدو متخربط كرار توتر حيل خابر على الولد وخابر على عمو سعد وودو

...................................

لتكول ألزمن غدار ويخون
زمانك ماغدر وانته أغدرتني
لجلك حاربت كل أهلي والكون
كلت ماريد غيرك يل عفتني
ولا يحتاج أكلك طبعك أتخون
تعرف نفسك أنته أشكد خنتني
حبيتك صدك حب طفل مجنون
وانطيتك حياتي وموتت
يالخاينه شلونج مرتاحه تغفالج عين تنامين براحه وضمير
ميألمج كلبج عليه
مكلتي هذا المسكين جان بس رايد باب ينسد علينه

مكلتي هذا السافل الي هسه مشمور شمرة الجلاب بالسجن شلون ينام وهو مغدور

عوفج من كل الغدر وكل الناس بس ركزي بغدرج حلفتي وكلتي مااخون الوعد وهاي انتي هسه بحضنه
ولج انتي شنووو فهميني

يلله عادددي طبج مرض

اليوم قافل عليج اي قافل شعبالج لعد اليووم شو كلبي محترك اكثر من كل يوووم

اليوم كلبي مووجوع على اخويه لذلك كارهج اكثر من كل يوم

حلمت بي مريض ....وتعبان .....وظهره بيهه حدبه جبيره
وكوه يمشي منهه

فسرته بدماغي اني الحدبه واني الكسرة ظهره وخليته محني
......................
شيرين /جنت كاعده بالفاتحه باوعت وحده تباوع عليه ابد منزلت عينهه مني

بقيت اباوع تعرفني لو مشتبهه بيه لان نظراتهه مو طبيعيه

مااحس اله كامت ....واجتي باتجاهي ........

يتبع

احتمال هذا اخر بارت ....انشره ام غايب عادت بالسلامه
اذا منشرت احب اودعكم بوساتي الكم جميعاً
واذا بعدهي تعبانه اكمل وياكم