#سلاسل_العاشقين

نهوه خطفت احلامي وكادت إنهاء حياتي لولا رحمت ربي

#user65690873

مساء الخير ❤

#البارت_الأول

سلاسل العاشقين

،،،،،،،،،،،،،،،،،،،
رَّسمَتّ عٌيِّنِيِّګِ عٌلَى أوِرأّقِيِّ
بِقِلَمَ أّلَرصٌأّصٌ
رَّسمَتّهِمَأّ بِګلَ أشٍوِأّقِيِّ
وِبِګلَ أّخَلَأّصٌ
عٌيِّنِأّګ أّلَلَتّأّنِ
تّخَتّرقِأّنِ صٌدِريِّ ګأّلَرصٌأّصٌ
مَنِ أنِتِّ ؟
يِّأّمَنِ َّسلَبِ مَشٍأّعٌريِّ وِأحٌأَّّسيَِّّسيِّ
مَنِ أنِتِّ ؟
يِّأّمَنِ تّفِّجِر بِرګأّنِ شٍوِقِيِّ إلَيِّهِ
مَنِ أنِتِّ ؟
يِّأّمَنِ هِلَتّ مَدِأّمَعٌيِّ مَنِ إجِلَهِ
مَنِ أنِتِّ ؟
يِّأّمَنِ عٌجِزِّتّ أّلَروِحٌ نَِّسيِّأّنِهِ
مَنِ أنِتِّ ؟
يِّأّمَنِ جِعٌلَتِّّنِيِّ أّتّحٌَّسر أّلَمَأًّ
عٌلَى مَأّ مَضى مَنِ عٌمَريِّ بِدِوِنِګ
رحٌمَأّګِ َّسيِّدِيِّ ؟
رحٌمَأّګِ عٌلَى قِلَبٍِ يِّتّشٍطّر أّلَمَأًّ فِّيِّ غٌيِّأّبِګ
،،،،،،،،،،،،،،،،،،،

قبل مده من الزمن

المكان .. بغداد بوحده من مناطق الولايه

الوقت .. الرابعه عصرا

يمان ... يله يسر تلعبين

يسر....اي العب بس لتعيد التسوي يوميه وتدلي مكاني من اختل

اي اي والله توبه بس امشي

يسر .... بعدت كذلتي من وجهي فتحت البرده خليت ايدي بيده وطلعنه نركض لراس الفرع الجهال متجمعه تلعب ختيلان مسوين دائرة يتحاججون فتنه بنصهم وبدينه نلعب مثل كل يوم إلى أن وصل الدور اليه ولازم اختل الكل وكف سره وجهه عل حياط واني عيوني تدور وين اختل حتى ميلكوني

صارت عيني على عربانه ابو رمزي ليبيع دهينه خاله كبال باب بيته ركضت بعقلي الطفولي كنفذت وحصرت روحي بينها وبين الحايط وصحت حححححلال

واباوع عليهم من الزرف شلون تراكضو يدورن عليه ويمان واكف بلنص يفر براسه ايدي عل حلكي كاتمه ضحكتي واني اشوفهم شلون يدورن وره مبردات البيوت وره حاويه النفايات وره تيل الكهرباء اضحك اضحك وتلاشت ضحكتي من يمان صاح محرررروكه (معناه لكيته )

خزرته بغضب وكمت والدمعه بطارف عيني عود اني موصيته وهوه صديقي وابن خالتي بس كل عاده اثول وغبي

لتمو الجهال يصفكون ويصيحون لكيناه لكيناه وهوه مكشر والضحكه شاكه حلكه متر ستهضمت وهميت امشي سريع للبيت اصيح بطلت مالعب

يمان... تعاي مخبله وين رايحه

امشي ولي لتحجي وياي

ولج شلون يعني مترديهم يلكوج

اي انت بس تلصم والله ميلكوني

شلون بله

صديت عليه عيوني دم وهوه مكشر وضحكته الفطيره تارسه وجهه نترت.... الجهال يخافون من عمو ابو رمزي ميوصلون يم عربانته لان ذاك اليوم كلبوه وطلع كتلهم فمستحيل يدوروني يمها جان ضليت لليل مدوختهم لو ما انت الفاهي

غابت ابتسامته عض شفته دنك رأسه همس ... هم صدك

باوعتله بغرور تخوصرت عيبتله.. هم صدك .. عفته ورجعت للبيت معصبه تليت البرده حيل خليته وره الباب وصفكت الباب خاف يدخل يمان الفاهي عل صوت الباب صاحت امي

هاي منوو

اني ماما اني

وشكو سديتي الباب راح تضل كل شويه مدكوكه

احسن عوفيها حتى ابن اختج الفاهي ميفوت البيت

ياااااا ولج هاي عليمن عل يمان

اي عل ضخمان

ليش يولي شسوالج

خل يولي اثول يوميه اعلمه اكله لادلي الجهال وين اختل وره شويه يوكف كبالي مثل الطرن يصيح محروكه

ولج ااامشي ام لسان عوفي الولد بحاله حتى بلعب سايكه عليه خلفله عليه يوميه يوديج ويجيبج للمدرسه وشايل جنطج على جتفه هاي فوكاه

اي خيولي

حجيته ورحت للحمام اغسل اديه وجليه تربو كملت ورحت كعدت بزاويه الغرفه باوعت عل ساعه راح تصير ب٦ اي هسه يطلع فلم كاروتون (كلنديزر)اتفرج وانسه السواه يمان

وصدك بدأ الكارتون وضليت صافنه اجوي اخواني صادق وعلي واختي حنين كعدو بصفي امي نطتنه شاميه ناكل ونتفرج إلى أن سمعنه صوت ابويه طفرنه نركض تلكينه للحوش دخل مبتسم والتعب تارس وجهه اديه كلها دهن اسود وبدلته الزركه مدمره ماكدر يحضنه حتى لايدمرنه كتفه يبوسنه واحنا لتهينه نفتش بلعلاليك الجايبهن أشكال الخضر والفواكه

امي نطتنه لنريده وبعده اخذته للمطبخ رتبت كلشي بمكانه وابويه دخل سبح واجه كعدنه داير مدايره نسولفه على يومنه وعل مدرسه

اني ثالث بتدائي صادق اول وعلي وحنين ممسجلين ابويه يشتغل سمكري سيارات وامي ربت بيت كاعدين بهذا البيت ايجار بيت صغير بولايه درابينه مليانه حنيه بكلوب اهله جيرانها طيبين من الله وبيبانه متنسد غير برده

ابويه المسكين معتمد عل نفسه لان ماعنده احد لاولد جبير يعينه ولا اخوه بيهم خير كلمن يكول ياروحي وعمام بس بلاسم مفديوم عترفو بينه ولادكو بابنه ولو اشوفهم بشارع ماعرفهم حتى عماتي نشوفهم بسنه مره رغم بيبي امهم عايشه يمنه لاكن للاسف حتى بيبي بحصرت شوفتهم

غير عن خوالي الي روحهم بينه يسكنون بنفس الولايه بس بغير منطقه منطقه زراعيه ماخذين بيها كيعان همه وخالتي وبانين ناس بصف ناس ولمتهم تجنن وبنفس الوقت حنينين يتعنون من بيتهم لبيتنه حتى يتواصلون ويانه واحنا هم عل فرغات ابويه وايام العطل والجمع نروح يمهم نتونس ونغير جو

خالتي ام يمان الاخت الوحيده والاقرب  الامي حيل ترب الامي وتحبنه وامي متضم عليه كلشي سرهن واحد وحده شايله الثانيه عده يمان وكمال وراشد والبنات خمسه نجلاء وشهلا جنان حلا فاطمه علاقتي بيهم حلو مثل علاقتي بجهال خوالي الباقين اله يمان

يمان يختلف شخصيه تبط القلب ولازك بيه فد لزكه موطبيعيه أكبر مني صف خامس ابتدائي بس عقله طفولي الاشوفهم بمدرستنه صف خامس ميتحاجه عود هوه رجال حتى عصابه طلاب مسوي ويمان لايهش ولاينش انطي بس شارك حلكه ويضحك

يتعنه من بيتهم لبيتنه حتى يأخذني وياه للمدرسه ويشل حتى الجنطه مني مرات انقهر عليه واستخطي بس هوه ميقبل يضحك ويكلي حتى متعبين منها يسكتني ونروح للمدرسه وبلحله يرجعني اله يرجع لبيتهم وميتعب يجي العصر حتى بس العب وياه

بختصار ماعنده شغل وعمل غير يسر حتى علاقته بخوتي موهيج عدت مرات اروح لبيتهم وانقهر من تصرفات إخوانه وخواته وياه لاغين وجوده فدنوب ولايعتبرو هوه الاصغر بلولد والاكبر بلبنات بس حتى البنات ميهتمله وهوه أكبر منهم يتجاوزن عليه يتعاركون  نار وتشب بكلبي اعوفهم وارجع للبيت مقهوره اكول بعد ماالعب وياه ولااخلي يوصلني هذا فاهي

وثاني يوم يجيني شارك الحلك يتلفت ضام المصاص لملون والقمر الدنين مجعوص بجيبه يكلي هاي حصتي مال اليل ابويه جابه وضميته الج

اباوع عليه انقهر اخذه مافشله اكل المصاصه والقمر الدين اذبه لان مباقي دين براسه يمكن نايم وهوه بجيبه

وعتني امي من صفنتي واني افكر بهل سوالف من كالت يمه افرشي لخوتج هزيت راسي اي وكمت رغم عمري الصغير بس دوم اساعد امي وهيه تشجعني وتعلمني وتتعمد تصخرني دكلي حتى تعنيني افرش لو اخلي التخته واغسل مواعين اضل لاساعه ولاساعتين علمود ينضفن زين وحتى امي دكلي عفيه احسن روحي ربحانه جائزه لو مسويه فد نجاز عضيم

فرشت وتمدنه اني وخواتي وحنين بصفي غفيت وكعدت عل صوت امي تندهني للمدرسه احب المدرسه كمت ركض غسلت وبدلت وامي بعده تنده بصادق يشلع كلبه اله يكوم للمدرسه ميحبه ابد فتحت ضفيرتي والمشط والقراصه بيدي انتضر امي تمشطلي

كعدت سوتلي الضفيره وريكتنه ندكت الباب يعني يمان اجه شلت جنطي وطلعت فتحت الباب صار بوجهي مكشر بتسمت

يمان .. صباح الخير

يسر .. صباح النور

اخذ الجنطه مني ومشينه صادق ميجي ويانه مدرسته من الفرع الثاني نضام مدارسنه غير مختلط امشي وباوع ليمان لابس جركز(حذاء مكشوف)واصابعه طالعه منه تدنيت يمه

يمان ليش هيج تطلع أصابعك من الحذاء

وكف لتفتلي باوع على رجليه بتسم ورجعهم.. هيج زين

اي بعد انتبه منضرهم مو حلو

ههههه اي صح .. تلفت .. انتي بعدج زعلانه مني مووو

عكضت.. لا بس بعد لتعيده

اي توبه بعد

بتسمتله.. يله نطيني الجنطه وصلت المدرسه

نداري البسه الج

خلاه بجتفي ونزل جنتطه فتحه طلع لفته خلاه بجيب الزغير ومثل كل يوم يكلي اكليه هزيت راسي اي ومشيت الوحله بيدي بباي فتت وكفنه صطفاف وبعده بلش الدوام من درس الدرس للضهر حلينه ميته تعب والحر يذبح طلعت اسحل بلجنطه ومن شفت يمان كلت فرجت تلكاني اخذه مني ورجعني للبيت وهوه راح لبيتهم وعلى هذا الحال مرت الايام متشابهه

ويمان لتغير من ثاني يوم حاجيته عل حذاء اليوم البعده اجه لابس بوتين ومن كمنه نلعب من يوصلي السره يمان يبطل يوكف عل صفحه حتى لايكشفني وازعل

أيام مرت حلوه بلعبنه ومرحنه وفكاهته تفوقت بلدراسه وصلت للخامس ويمان طلع لبتدائيه راح للمتوسطه صارت مدرسته حيل بعيده كمنه نروح اني وصادق يوصلني وبعدين يروح لمدرسته قلت جيات يمان وكمت احس بلفرق لااحد يشيل جنطي ولايوكف بسره الحانوت مكاني يوم بعد يوم عتمدت عل نفسي وكمنه نتشاوف بس بلعطل والمناسبات

تحجبت بطلب من ابويه كلي انتي كبرتي والحجاب صار لازم بسرعه قتنعت ولبسته وكل شويه اباوع بلمرايه اشوف نفسي حلوه لو لا من غير شالات امي وربطاته كمت البس واذب

واليوم مثل كل يوم بعد مخلصت واجبي مشطت وردت اطلع صاحت امي

وين

اللعب يمه

ممنوع

شنووو

اني شحجيت ممنوع لعب بعد ماكو

برطمت... يمه ليش

ماما انتي كبرتي شوفي شطولج صرتي تركضين بشارع شنو

يمه كبرت شنو والله ماعليه اموت غير

لاتموتين ولا ابد ابوج هم حذرني كال ممنوع الكاه بعد بره

كعدت بعتبت الباب ابجي لازمه البرده كل شويه امد راسي اشوف الجهال تلعب اصرخ أكثر وامي مامهتمه تشتغل وترتب بلبيت حنجرتي نبحت وصرت بس اون واتل بلبرده ادفر برجليه ومسح بدموعي لحد منتلت البرده مني رفعت راسي يمان

هاي شكو كاعده هنا وتبجين

يمان ميخلوني اطلع العب

ليش

يكولون انتي كبرتي

ضحك سنونه بينت خزرته ... انت ليش تضحك هااا تضحك عليه مووووو

وجهه ذبل ملامحه فهت ... لا مواضحك عليج بس كلامهم صح انتي كبرتي ميصير تطلعين بشارع

وانت شعليك انت مثلهم والله ماعليه اله اطلع اليوم ليش حنين بشارع صادق وعلي هم ليش اله اني

ثنى لمستوايه يشرلي بيده اصبري.. شوفي حنين صغيره صادق وعلي ذوله ولد عادي يطلعون بس انتي بنيه وصرتي جبيره عيب اطلعين

صفنت بوجهه دفعته رتد للخلف مسحت دموعي وكمت ليم امي بلمطبخ وبقيت مستمره ابجي يمان فات سلم على امي وهيه تسئله على خالتي واهله يجاوبه وكله تسولف وممهتمه عفتهم ورحت للغرفه كعدت ابجي

أيام مرت واني من كل عقلي ابجي عل شارع والعب إلى أن تاقلمت وصرت صدك ماطلع غير للمدرسه واشتري من المحل لبصفنه وارجع بديت افتهم اني كبرت واقارن نفسي بلبنات لشوفهم لحد مقتنعت اني صرت جبيره موبس بشكلي حتى بعقلي

دخلت المتوسطه وصادق بطل فدنوب من المدرسه شكد امي حجت وتعبت تقنعه قفل وفضل يروح يوميه ويه ابويه للمحل ماكدرناله وسوه لبراسه رغم زغير بس  سبع شال المحل وابويه صار ميكدر بلياه

اني جان كل فكري واهسي بلدراسه المواد صعبه والحاله متساعد اخلي مدرسين كامت ماما تطلب من يمان يدرسني وبدأ يجي للبيت يوميه ساعتين نكعد يقري ويشرحلي إلى أن افتهم الماده كم مره اشوفه صافن بوجهي مفهي اخزره يهز رأسه يوعي نفسه ويرجع يقريني

اني موصغيره ثاني متوسط ومن خلال المدرسه والبنات كمت اعرف هاي النضرات ليباوعلي بيها يمان بلحضته اتنرفز اكول هذا يضحك عل روحه لو يبقى آخر واحد ماباوع بوجهه اصفن اصفن واكف كدام المرايه اباوع لروحي واشوف شكد اني كبرانه ومتغيره واتذكر امي شلون تشدد عليه مراقبته وتعاين شكلي لان هواي يجذب النضر وكامت معالمه تبرز

اني بشهاده الكل حلوه بس من اباوع لروحي اشوفه عاديه بيضه وعيوني سود كبار كلش شفايفي وخشمي عاديات وشعري لااسفل ضهري شي واحد ضايجه منه والناس كله متخبله بي شامات ثنين بنفس المستوى ونفس المكان أسفل شفتي واعلاه تجيني ساعات اسئل امي

يوم ذولي مينشالون

ياااا تحجين صدك غير يخبلن علين ولج ام شامه اكعدي راحه الناس كامت دكهن دك حتى يتحلون بيهم

اسكت واضل افرك بيهن اريد امحيهن احسهن نشاز وام شامه راح يصير عليه لقب واني اتخبل بس شسوي مابيدي شي

البنات وياي بلمدرسه اصغر مني بمرحله عدهم سوالف مال أكبر مني بسنين كله حب وغزل وصداقات وين اهلهم عنهم وين الامهات مادري اشو اني امي شرطي وفوك راسي اربعه وعشرين ساعه كم مره شافو يمان يصدف امي دزه يجيبني لان صادق عنده شغله من يشوفو يضلون يضحكون

يمان رغم كبر وصار بلعداديه لاكن بعده مخربط اني شلته من بالي وكمت ماعلق وانتقده مثل قبل هوه مو صغير ومرات استحسف ليش هيج شكله اتمنى احاجي وبعدين أتراجع اكول اني شعليه جان ابيض وجهه طولاني شعره اسود ممهتم بي دوم لابس شفقه (قبعه)
عيونه سود واللحيه والشوارب توه خاطه مطشره ممرتبه بشهاده كل بنات المدرسه حلو بس مخربط

ملابسه شي وشكله غير شي القميص معقج مسموط سمط والبنطرون كذالك مره اجاني واني توني طالعه من المدرسه امشي ومندمجه اضحك و سوالف وياه البنات وحده منهم دقتني

حور ... يسر اجه الكائن الفضائي المن زمن الواق واق

انجبي هاي عليمن

هههههه ابن خالتج المصون غير

رفعت راسي يمان كبالي واكف مجتف ايده والضحكه بوجهه غمضت عيني قبضت ايدي اباوع عل شكله القميص منعول اهله والبنطرون صاعد ونازل والكارثه الأكبر جاي بنعال صديت عل بنات يتبشبشون يالله هوه حلو بس رايدله فرمته تنفست بعمق شديت لزمت ايدي عل كتابي دنكت همست اترخص اني

عفتهم ورحت بتجاه تلكاني

هلو يسر

هلو يمان

انطيي الجنطه عنج

لااشكرك ميحتاج ليش متعب نفسك جان اني جيت

لا ماكو تعب خالتي وصتني اجيبج

تسلم

دنكت امشي سريع وهوه بصفي اخجل ارفع راسي ماريد احد يحس هذا وياي واني امشي وياه هوه حتى يلحك بيه صار يمشي أسرع ونعاله يطرك واني اكرض بصابعي

وصلنه بيته للباب وراح  جنت مفوله من القهر شمرت الجنطه حيل بلكاع باوعت امي

شبيج يولي شلون هيج تشمرين الجنطه موبيهه كتاب الله

دنكت فتحته طلعت ماده القرآن ستغفرت ربي بسته وخليته عل كصتي رجعته للجنطه وعاينت عل امي بعده تباوعلي بشك تريد تعرف شبيه برطمت

يمه اريد خط

خطيش

خطيش يعني خط سياره يوديني ويجيبني للمدرسه

وهاي توج تذكرتي سنين ترحين وتجين مشي شجاج هسه

اني اكلج شجاني اني كبرت ومال يوميه دازتلي صادق لو ابن اختج هاي السالفه تعبت منها خلولي خط حالي حال البنات

وليش هاي المصاريف يابنتي هاي وينها المدرسه

لعد لدزين يمان عليه بعد يمه خزاني لخاطر ربج مدكللي شكد مخربط ادري اختج متباوع عليه من يطلع

ضحكت جانت مدنكه تحوك  ... يولي خطيه هذا من اهل الله و الله يسوه الف واحد من ذوله الهتليه لبشارع صايم مصلي لايهش ولاينش شتردي فارك شعره ولا بس بنطرون مصرصر ساعته دكولين هذا ابن خالتي واتباه بي

يمه موهيج بس لويشل الشفقه موشعره حمض ويبطل يلبس قميص هسه شجابره يلبسه معقج خل يلبس تشيرت

وانتي شحارك كلبج بله

صفنت واصبعي بطرف شفتي ... هم صدك اني شحارك كلبي يمه صدك اني ماعليه بس بعد لادزي للمدرسه ولا اني اقبل ارجع وياه و الله

حجيته ورحت غسلت وبدلت تغديت ونمت ماكعدت للعصر صليت وبديت اقره لليل اجه ابويه وامي كلتله عل خط وافق حيل فرحت وخليت صادق يأخذني لبيت صديقتي حور براس الفرع حتى اسجل بخط كرايبهم لياخذهه من سمعت حور ضلت تكمز وتخطط نصعد سوه ونكعد بنفس المكان ومنتفارك جانت حيل مقربة مني رجعت للبيت عبالك مشي المدرسه هم ونزاح من كلبي

يومين ردتلي خبر حور صاحب الخط موافق بلشت اروح وياه ودفعت اجره اول شهر ماكو هيج راحه نطلع اني وحور ركض من تصير الحله نكعد بسياره بلاخير نضل نكص بطلاب والطالبات نضحك ونحشش ويوميه عل هاي الرنه كم مره شفت يمان يم المدرسه اخنس ودنك راسي حتى ميشوفني وحور تحجي عليه

طاح حضج خطيه يولي شوفي شلون واكف يتلفت يدور عليج

اسكت مااحجي ويفوت الخط من يمه واني مدنكه مرتين تلاثه سواهه وختفه بعد مشفته ولااجه حتى البيتنه أيقنت خلصت منه وبعد ماشوفه وفعلا هذا الصار ما وصل بعد ابد

شهر شهرين الامتحانات قربت واني احتاجه يقريني ولا اتجره اكول الامي جربت مره كتله وزمخت بيه تعيبين عليه وتنتقدي وتردي خادم الج يقري ويشرح ويتعنه مناك لهنا وتالي تحجين عليه حيري بنفسج وقري روحج

اتذمر واعصب اضل افتر ومافهم الماده واريد يوم الجمعه يجي حتى نروحلهم واجه يوم الجمعه بدلنه واني اخذت جنتطي وصلنه خوالي كعدنه وتسحبت شلت الجنطه ورحت لبيتهم دكيت الباب فتحته جنان اقرب وحده بنات خالتي اليه وبعمري هم شافتني حضنتي تبوس واخذت جنطي تمشي قبلي رديت الباب ندرت الحديقه بضهري يمان واكف وبيده المكص الكبير يقلم بلياس شافني ذبه نفض ايده وتقدم مبتسم واني مبتسمه من زمان مشايفه هاي الضحكه مدلي ايده باوعت عليه كله تراب غابت الابتسامه وهوه حس سحبها حك طرف شعره كال

هلو يسر فوتي فوتي اغسل واجي

همست .. هلو بيك عفته ودخلت للبيت سلمت عل كل وخالتي سئلتني عل امي كتله بيت جدي جرت عباته من التعلاكه لبسته وراحت عليه كعدنه اني والبنات داير مدايري طلعت كتبي فات يمان يمسح ايده بقميصه من المي بحركه يصعده وينزله كعد ليغاد بنطرونه مكفوف من جوه مادري شكم طبكه وطرف اصابعه طين من الحديقه

بقيت مدنكه اكلب بلكتب واكلهم عندي متحان واجيت اقره اشرلي تعاي ودك عل مكان لبصفه كمت كعدت اخذ الكتاب والقلم بده يحوط الملخصات المهمات واني اباوعله يهز براسه يخلي القلم بحلكه لو يحك طرف شعره البنات نسحبو مدري داخو من الشرح والصوت شكد مافاهي بس يشرح بلباقه واني افتح عيني واذاني احس الماده تفوت بعقلي

كل شويه يكلي فتهمتي اهز راسي هوه يخلي القلم بطرف شعره من يم اذانه يحك بي نقره نقراه ندمج وكعت الشفقه بين شعره اسود مجعص عبالك دايسته تريله الشفقه ساحكته رفعت راسي اركز عليه ضلينه عين بعين فاتح حلكه قابض ايده عل قلم دنكت همس

يسر ليش خليتي خط بس حتى متشوفيني و صديقاتج يضحكون

عليه
.
.
.
.
.
.
.

يتبع

هذا بارت لحماسكم وتشجيعكم وبعدنه على الوعد نكمل  عل عطله

احبكم اختكم رفل الكناني ❤❤❤