- الووو ازيك يا ليلي عامله ايه ؟
- ‏ بخير ياسلمي ..
المهم طمنيني عليكي انتي وحشتوني اوي اوي وبالأخص استاذ ياسين الصغنن دا ..
- سلمي :ممم ياسلام ياختي باين اوي أننا واحشناكي مبتسأليش وعامله فيها حضره المهمه بقا.
- ‏ليلي :معلش بجد انا مسحوله ف الشغل الايام دي بس هحاول اخد اجازه وانزلكم قريب.
- سلمي بسخريه : لا بجد انتي بتهزري صح ؟ ليلي عيد ميلاد ياسين بكرا ومصمم تيجي ..
- ‏ليلي بصدمه: يااا خبررر ..انا نسيت خالص .
* ‏ويقطع كلامنا احلي صوت طفولي ف العالم*...
- ‏خالتووو ليلي انا بحبك وحشتيني اوي .. مش هطفي الشمع من غيرك يا خالتو لو مجتيش هزعل منك .
- ‏ليلي بصوت كله حب : ياروح قلب خالتو وانا مقدرش مجيش عيد ميلاد اشطر كتكوت ف الدنيا.. بكرا هبقي عندك ياحبيبي.
- ‏سلمي :ياسلام ياسلام ياعم بقا هتنزل عشانك مخصوص وعشان اختها لا ماشي ياست ليلي مردوده .. ويلا انت كمان ع اوضتك ف مدرسه بكرا ..يلا قول لخالتو باي .
- ‏ياسين بصوت حزين: باي ياخالتو انا بحبك.
- ‏ليلي : باي ياروح قلبي وانا كمان بحبك اوي.. ويلا ياست سلمي انتي كمان ع مطبخك ورايا شغل ولما اشوف حوار السفر دا كمان .
- ‏سلمي بابتسامه : ماشي ياحضره المهمه سلام.
- ‏ليلي : بقولك استني هو عمرو جاي !؟
- ‏سلمي باستعباط : ها .. عمرو مين !؟
- ‏ليلي بنرفذه : سلمي بطلي تحوري ..عمرو اخو حازم جوزك .
- ‏ سلمي بتردد : اه اه عمرو ..لا ..لا معرفش هو جاي ولا لا .. بس هو قال إنه مسافر ..هو قال كدا لحازم.
- ‏ليلي بشك : ممم طيب تمام ..انا جايه بكرا سلام
- ‏سلمي وهي بتتنهد : تمام ماشي ..سلام.
------------------------------------------

-مالك يابنتي بتتنهدي كدا ليه !
-‏سلمي بخوف : اسكت ياحازم ليلي كانت هتقفشني وتعرف أن عمرو اخوك جاي عيد ميلاد ياسين.
-‏حازم بضيق : انا معرفش ليه الغبي دا عمل كدا مع أنه لسه بيحبها..وف الاخر مدبسني ف كل حاجه .
-‏ سلمي وهي بتمد أيدها لكتف حازم وبنبره صوت هاديه: اهدا ياحازم دا اخوك بردوه .. وانا لو مكنتش شايفه أنه لسه بيحب ليلي مكنتش هحاول اساعدك انت وهو كمان .

-‏حازم بنظره حب وماسك ايد سلمي : انا مش عارف من غيرك كنت هعمل ايه انتي مسنداني ف كل حاجه .. الوحيده اللي بروحلها وانا مهموم وتعبان وبتبقي قادره ترتبلي أفكاري ..قادره ف وقت عصبيتي وخنقتي تحتويني برغم كل التعب اللي انتي فيه و مسؤوليه البيت وياسين ومدرسته .. ربنا يباركلي فيكي يااحلي واجمل جاره وحب طفوله ف الدنيا..
-‏خلص كلامه مع قبله ع جبينها.
-‏سلمي بابتسامه لطيفه: ويباركلي فيك ياحبيبي ... واحلي حاجه انك مطلعتش زي اخوك .
-حازم وهو بيضحك : لا دا ربنا يعينه ع المهلبيه اللي ف دماغه.

-------------------------------------
*يوم عيد ميلاد ياسين..*

حازم : ايه ياست ليلي التأخير دا كله .. ياسين حالف ما يطفي الشمع من غيرك ..اتفضلي ادخلي بسرعه.
ليلي : انا اسفه بجد ..انتو لو تعرفوا انا اتشقلبت اد ايه عشان بس اعرف اخد اجازه مش هتقولي كدا..

قطع كلامنا ياسين وهو بيجري عليا ويحضني ..وكأن انا اللي كنت محتاجه الحضن دا مش هو ..اد ايه كان حضنه وحشني اوي وحتي ملامحه الجميله وخدوده الحمرا دايما وشعره الاسود الكثيف وعيونه العسلي اللي بتقتلني ولا غمازته لما يضحك... وحشتني اوي ياسين انت وحضنك ولعبنا سواا...ساعات بستغرب ازاي ف حد بيحبني كدا ! ازاي طفل عمره 7 سنين فيه كميه الحب والحنيه دي ؟
ياسين دا كل اللي ليا دلوقتي ..برغم أن يوم عيد ميلاده ليا ذكري مأساويه معاه .. بس اللي حصل ف كفه وعيد ميلاده ف كفه تانيه .. مجرد ضحكه منه بتنسيني اي حاجه وحشه..

*قطع الحضن الجميل صوت*
سلمي وهي بترحب بيا: حمد لله ع السلامه يا ليلي يلا عشان نطفي الشمع.
ليلي بحماس : يلاااا

واتلمينا حوالين الترابيزه والنور أطفي وبدأو ويولعوا الشمع واشتغل ف الخلفيه اغاني الاعياد الميلاد..كنت مبسوطه جدا وانا اخيرا وسط عيلتي بعد 3 سنين سفر ..3 سنين وانا لوحدي وف بلد غريبه عني ..كانت ماما وسلمي دايما يتحيلو عليا ارجع بس مكنتش بقدر غير يوم واحد بس اطمن عليهم وارجع .. النهارده حاسه براحه نوعا ما اني بقيت وسطهم حتي لو يوم ...

ويقطع سرحاني دا النور اللي ولع فجأه .. والناس بدأت تعيد ع ياسين ..

كل سنه وانت طيب يا مااان....
ليلي وهي بتبوس ياسين ع خده: كل سنه وانت طيب ياحبيبي ..
وفجأة سمعت صوت هز قلبي قبل جسمي ..صوت انا عارفاه كويس اوي وكنت ماصدقت نسيته.

كل سنه وانت طيب ياياسين.. دي الطياره اللي كان نفسك فيها.
- ياسين وهو بياخد الهدية منه وبيضحك : شكرا ياعمو عمرو .
- ‏عمرو بتردد : ازيك يا ليلي ..حمد لله ع السلامه.
- ‏ليلي بوجه خالي من التعابير: الله يسلمك .. ياسين هي مامي راحت فين .
- ‏ياسين وهو بيشاور ف إتجاه الباب : اهي واقفه مع تيتا نجوي .

-إحم ...زيك يا طنط نجوي .
-‏نجوي : ليلي !! عامله ايه حمد لله ع السلامه..
-‏ليلي : الله يسلمك معلش هاخد سلمي دقيقه..
-‏نجوي: طبعا طبعا اتفضلو يابنتي .
-‏شديت سلمي من ايديها ودخلنا المطبخ من غير ما حد ياخد بالو .

-‏ليلي بنفعال: هو انتي مش قولتي أن عمرو مسافر .
-‏سلمي بتردد: ما .. ماانا لو كنت قولتلك مكنتيش هتيجي ياليلي ..وبعدين عمرو ساب خطيبته خلاص.
-‏ليلي بعصبيه: أه تروحي تحطيني قدام الأمر الواقع صح ؟ .. وبعدين انا مالي ..انا مالي سابها ولا لا أنا عمرو اتمسح من حياتي ومبقاش ليه اي رصيد عندي لا حلو ولا حتي وحش جوايا ياسلمي ..عمرو رجع غريب ولنقطة الصفر ويمكن الغريب يبقا ليه فرصة يقربلي عنه كمان بس هو لا وخلاص كدا انتي سمعاني .. انا ماشيه.
-‏سلمي بضيق : ياليلي استني يابنتي طيب..

نزلت وانا بجري بس حسيت بنغزه شديده ف قلبي ..وكأن جرح زمان حالف مايدواش بعد السنين دي كلها أعدت ع السلم وغصب عني دموعي غلبتني وافتكرت ازاي انا وعمرو كنا بنحب بعض من ايام الطفوله وخصوصا اننا جيران واد ايه عاش الحب دا لحد ما وصلنا الجامعه سوا واخيرا اعترافلي بحبه ليا ويوم خطوبتنا وازاي سابني بطريقه موجعه عشان واحده تانيه وهان عليه تعبي .. استجمعت قوتي من تاني وقومت وكملت طريقي لعربيتي ..وقبل ما اركب العربيه ...حد حط أيده ع الباب ..بصيت باستغراب...عمرو!!!

عمرو بصوت مخنوق: ليلي لو سمحتي ممكن تسمعيني ..من غير ما تتكلمي ..انا عارف انتي مش طايقه تسمعي حتي اسمي ..بس ارجوكي لاخر مره اسمعيني أنا بقالي 3 سنين بحاول اوصلك كفايه هروب واسمعيني ... انا لسه بحبك ومش قادر انسي اللي بينا مقدرتش اكمل من غيرك ياليلي كنت فاكر نفسي هعرف اكمل واعيش واخطب عشان اعرف إنساكي بس مقدرتش بقيت شايفك ف كل حاجه ..انتي كل حاجه ليا ..مكنتش اعرف اني بحبك اوي كدا وحقيقي كنت غبي لما ضيعتك من ايدي انا اسف ..تعالي نرجع وهعوضك عن كل حاجه فاتت ياليلي ارجوكي أنا بتعذب طول 3 السنين والله ولما عرفت أنك سافرتي وقررتي تنفصلي عن اهلك حسيت انك بتقطعي كل حاجه بينا..انا مش وحش اوي كدا ياليلي .. ومستاهلش منك كل قسوه القلب دي ..انتي عمرك ماكنتي كدا قلبك دايما ابيض عمرك معرفتي تستقوي كدا ..عارف اني وجعتك وجع كبير واديني جاي وكلي ندم وبعتذرلك وبقولك نبدأ من جديد ... ارجوكي سامحيني.

ليلي بعصبيه ممزوجه بعياط:
كان نفسي متسبنيش وتمشي... كان نفسي تحس بخوفي ونبره صوتي المهزوزه  وسط الكلام وانا بترجاج متسبنيش محتجالك ..كان نفسي تحس مسكتي لايدك وانا متبته فيها وخايفه يجي يوم وتسبني ..كنت حاسه أنه جاي بس متوقعتش يجي بالسرعه دي وكل حاجه تخلص بشكل الموجع دا .. انت مشيت وسيبت جوايا مليون سؤال كان نفسي تبقي موجود عشان تجاوبني .. ليه عملت كدا فيا ..ليه انت كنت الأمان ليا وقولتلك انت الحاجه الوحيده اللي بستقوي بيها ع الدنيا ومشيت بعد ما ضمنت وجودي وأن مقدرش اعمل حاجه من غيرك ..مشيت وسبتني تايهه وسط زحمه الدنيا ..انت عارف انا بشكرك كل يوم ازاي .. اه بشكرك عشان إديتني درس عمري ما هنساه وهيفضل معلم جوايا مدي الحياة والأهم من دا كله اني عرفت اني مينفعش احب ...
أنا شخص لسه جواه طفل بيتعلق ويحب بجد ومن قلبه ولو طال يدي اللي بيحبهم عنيه هيحصل .. بس المقابل اللي بياخدو هو كسر قلبه وخاطره ..ويفضل سنين يعاني ويعافر عشان يقوم من تاني بس للاسف هو هيفضل مهما عمل ويحاول يستقوي قلب الطفل الطيب ومهما حصل دي طبيعته كدا ...غلبان ومسالم ودا مش ضعف هو مجرد أنه بيخاف ..بيخاف ع اذيه اللي حواليه ..خايف يأذي قلب حد ويدوق من المرار اللي هو داقه ..كسره القلب وحشه اوي ..كان نفسي تحس خوفي وسرحاني الكتير لما نكون سوا .. انت كنت الامان ليا فجأه بين يوم وليله اختفي وبقيت لوحدي .. كان نفسي تحس بس .. فاكر دايما لما كنت تسألني مالك لما افضل ساكته ..فاكر ردي عليك بايه أن مافيش حاجه بس خايفه الوقت الحلو دا يعدي وميجيش تاني .. ياريتك يومها اخد كلامي بجد ، وفعلا عدي ومرجعش وانت كمان مشيت معاه وحبيت غيري ، انا مسمحاك  بس عشان منتقابلش تاني حتي بعد الموت ...عمرنا ما هنرجع ياعمرو سلام.

ركبت عربيتي وانا معرفش انا قولت كل الكلام دا ازاي بس حسيت أن ف حجر كبير اتشال من علي قلبي ؛ ووقتها جت ف بالي مقوله كنت قريتها صدفه "ماذا لو عاد معتذرا" ؟؟
ليلي بتنهيدة طويلة :

"لا مكان له ..ولو جاء بثقل الأرض نادماً". 💛

_____________________________________ 

اتمني يعجبكم اول قصه من الكتاب وهو هيبقي عباره عن مجمع روايات وقصص قصيره بعضها هيناقش احداث بتحصل لينا احنا كأشخاص أو بتحصل لناس حوالينا ، وبعضها بيبقي من وحي خيال .. ف اتمني فعلا يعجبكم ، والاقي دعم ، وبعتذر عن أي أخطاء إملائية.
وهستني التعليق ع الفقرات ..وڤوت وكومنت كتييير
"شكرا" 💙💙💙💙