#رحمة_عاطف

نورا ناصر ، سمو العراق

#بارت 8

ابو رحمة : جنت بالمحل مالتي وطب عليه حميد ، تفاجأت بدخوله عليه وتسائلت بنفسي شيريد هذا!؟

المهم رحبت بي وفوته ليجوة ، كعدت كباله وسألته ع الاهل ..

بعد ما طمني انو هم بخير كال : اي ابو رحمة اشو ماجيت شفت بنتك ...
تفاجأت اكثر من مفاجأتي بجيته هو شمدري برحمة مو يمي ..
_ رحمة بنتي شبيهه؟
_ رحمة بنتك يمنه ليش ماعندك علم بهالشي ؟
_ وشسوي يمكم واني خليتها بمستشفى الامراض العقلية ؟
_ لا هيه يمنا جابهه عاطف ابن عمي لان هو الدكتور المشرف على حالتها وكال انك انت ماتريدها يا ابو رحمة ..

ابو رحمة ؛ ارتخيت بكعدتي على الكرسي وحجيت بنبرة جمود ؛ اي وشكو بيها مدام ابن خالها طلع دكتور خليها يمكم احسن عندي مترهم ..

حميد ؛ والله يا يعقوب اني ماادري شون انت عايف هالكنز هذا ..
بصدمة ؛ كنز!!!
_ اي كنز رحمة بنتك كنز ليش انتَ متدري هي الها حق تستورث امها ؟

_ لا والله ماادري هسه سمعت منك اني ..

كام حميد وهو يحجي ؛ اي عيني يعقوب رحمة عدهه ورث امها يُقدر بالملايين وهذا اني الي عندي كلته الك فمو من مصلحتك تبقى رحمة عدنا لان اكو من يريد ياكل حقها تعرف بعد بني ادم طماع واني احب فعل الخير ..

ابو رحمة ؛ حبيبي حمادة ماقصرت رحم الله والديك من گُتلي اني باچر يمكم ان شاءالله چان جيت هسه بس عندي شغل ..

حميد ؛ على راحتك المهم صار عندك علم اودعناك ابو رحمة ..
_ الله وياك ..

طلع واني ظليت افكر ، ورث !! ملايين !! وكُله لرحمة لا هاي سالفة ماينسكت عليها ابداً ، لازم اروح لبيت جِدهه واطيح حظهم واخذهه لعندي واضغط عليهم ينطونه الي واذا تطلب الوضع اشتكي عليهم ..

هسه خلي اقفل المحل واروح ابشر ضحاوي حبيبة قلبي خطية تريد تتعلم السياقة حتى اذا استلمت الورث اشتريلها شوون سيارة يستاهل الحلووو ..
احجي وافرك بأيديه ومتحمس وفرحان وماسايعتني السعادة كلها ..

رحمة : كاعدين بالغرفة اني وبيبي جانت دتسولفلي عن امي وتبجي بلحظة سمعت صوت عياط بابا ، جريت بيبي وظليت اصيح بالغرفة ...
_ اجه بابا اجه بابا .....

ضربت بيبي على فخذهه بقوة هم اله عين يجي ابو النسوان الي خبل امج وخلاها تنتحر ، وشمرج بالمستشفى وتخلى عنج ، شعنده جاي شيريد بلله ..

اخذتني ونزلنه جوة .. شفته واكف بالهول ويمه عاطف وخالو وخالة ..
بس شافني اجاني يركض رحمة بنيتي وظل يبوسني ....

عاطف ؛ والله ما اعرفتك مو نفسك انتَ الي شمرتها بالمستشفى شنو الي تغير هسه ؟

_ بنيتي والظفر ميطلع من اللحم شنو تحاسبني انت ..

بيبي ؛ امشي اطلع برة واتركهه مكافي تسبب بقتل امها ..

_ اني قتلت امها شهالحجي عندج دليل؟؟
_ اي انت يا ابو النسوان انت ياحقير تزوجت عليها وخبلتها امشي اطلع وعوف البنية ..

_ الله اكبر هسه صار الزواج الثاني جريمة شون حجي هذا الشرع حلل ٤ وبعدين انتِ ليش طرديني تردين الورث مالتها بس الج مو؟ شوف بني ادم شون طماع ..

ابو عاطف ؛ انت انسان فاشل وطايح حظ امشي اطلع برة بيتنا امشي طلعت حاط عينك على ورثها هاا!!

ابو رحمة ؛ اي طالع وراح اخذ بنتي وياي وغصباً عليكم تنطوها حقها من الورثة ...

بيبي ؛ ماتاخذها وامشي اطلع برة لا والله اشتكي عليك مالك شي يمنه وحقها انه اضمنه انت معليك ..

رحمة .. ظل يجرجر بيه صرخت وادفع بي وختلت بحضن بيبي ..
ظل يباوعلي متصنع الحنية
_ يلله بنتي امشي وياي مبينة صحتج زينة هسه امشي ارجعي وياي معززة مكرمة محد يدوسلج على طرف بعد هذا وعد مني ..

خليت ايديه على اذني وظليت اصرخ ما ما ما اروح وياك مااريد مااريد ..

تقربوا منه  خالو وعاطف وجروا من كدامي ويردون يطردوا برة ، نفضهم منه بقوة وظل يصيح ..
_ وخروا اني طالع منا بس خلي يصير عدكم علم كل شهر اخذهه اروح استلم راتب الرعاية مالتها واخذه لاعبالكم تحضون بي الراتب هذا هم ..

عاطف ضحك باستهزاء ؛ هه بين معدنك امشي اطلع برة قبل لا ابلغ الشرطة عليك ..

ظلوا يدفعون بي لحد ما طلعوا برة ..
اخذتني بيبي وصعدتني فوك ، كعدت ع السرير وتذكرت شون جان ياخذني بين كل شهرين استلم راتب الرعاية وبس نرجع يحطه بيد ضحى كله ..

واتذكر بيوم اخذني استلمنا راتب الرعاية ومن رجعنا للبيت شفنا ضحى بالحديقة تقرب منها ..
وطلع الفلوس من جيبه وخلاهن بيده
همس الها ؛ هاج هذا راتب رحمة الج حبيبتي اشتري بي الي يعجبج كبل لاتجي ناهدة وتشوفه ..

اخذته ضحى وضمته بصدرها وتعدل بملابسها وترهن وراحت تركض دخلت جوة ودخل وراها هو ..

خلاني وراه عباله مجنونة وما افهم ماخاف الله بيه ابد كعدت بالكاع واسمعه يتلاغى ويا نهاد وصياحهم ليوين واصل ..

نهاد ؛ انت مو كلت راح تستلم راتب الرعاية وينه مااستلمته ؟
_ منين اكو ماكو بعده ماجاي ..
_ شنو ماكو لعد اني منين اجيب اشتريلها علاج وهاي صار جم شهر ماكو راتب الها شنو من دولة ..
_ شمدريني روحي سأليهم ، صاعد ارتاح اني ..
_ تعال اريد فلوس اشتري لجهالك ملابس ومستلزمات للمدرسة ..
_ ماعندي دبري روحج ..
صعد وهيه ظلت تصيح وتعيط ...
_ انت كول البومة مرتك لاغفة كل فلوسك لاتكول ماعندي شون اني ويا هالرجال يربي شوون !!

رجعت من ذاكرتي ظليت اعصر بيديه مرة واحطهم بحلكي مرة ثانية واعض بيهن مااريد ارجع ويا مااريد ، شوكت تنعدل حياتي شوكت ، احس ضايعة ضايعة ومحد كادر ينتشلني اذا ابوي يسرق حقي وطمعان بيع منو الي بهالدنيا هذي وبيبي اكيد مادايمتلي وهذول بيت خالي مو كلهم يحبوني لعد اني شنو مصيري تعبت وتعبت حتى انفاسي ويايه ماكو غير الموت ينتشلني ويخلصني من الوحوش الي تحوم حولي  .....

انتشلني من تفكيري عاطف ودخوله المفاجىء للغرفة
بس شفته فات كمت على حيلي مثل المخروعة ..

لاحظ صدمتي وارتباكي رفع ايديه بحركة يهدأ روعي ..
كال ؛ شبيج فزيتي ترة دكيت الباب بس انتِ مبينة جنتِ سرحانة ..

جاوبته ؛ اريد بيبي وين بيبي ؟

اجه وكعد ع السرير  بهدوء واني بقيت واكفة واعصر بيديه ، سحبني وكعدني على كيفه ..
اندار عليه ولزمني من اكتافي ..
كال ؛ اهدي شبيج اني اخر واحد أذيج خلي ابالج هالشي ..

اباوعله مخنزرة وما ابديت اي ردة فعل ، ظل يباوعلي ثواني وعبالك بعيونه شي ، غمضت عيوني وحاجيت نفسي مراح الكى عنده غير الشفقة وبس ..
نفضت نفسي وهو وخر ايديه مني ..

وكال ؛ خو مخفتي اليوم من ابوج ؟
بس هزيت راسي بحركات عشوائية ..

كال ؛ اي احجيلي شونج هنا خو ماكو احد مأذيج بس كوليلي ؟ وعلاجج مستمرة عليه دتاخذيه ؟
استمر يحجي واني مجاوبته ..
كال ؛ اعرف شعورج اليوم خفتي من ابوج لياخذج بس صدكيني مراح يكدر ياخذج منا بعد وانتِ هنا ويانا بأمان واي ازعاج يصير الج من قبل حميد بس كوليلي واني اتصرف ماشي ؟

رفعت عيوني بس اباوعله ، مد ايده لراسي ويبعثر شعري الطالع من الشال ، وخرت عنه بسرعة ودرت وجهي منه وضميت وجهي بيديه .

واسمع ضحكه عليه ، احس بداخل روحي صدى لضحكته ، مشاعر ما اكدر حتى افسرها لان اول مرة احس بيها وما اكدر افصح عنها حتى لنفسي ..

وكانه قرأ افكاري ..
كال يلله رحمة اني اروح واي شي حابة تكولي ومتكدرين كولي لبيبي اوكي ؟ مممم هم متسويها اعرفج متحجين وعندي الج فكرة ثانية ..

كام من مكانه توجه لدولاب وطلع كراس الرسم ووياهه الاقلام وخلاهم بحضني ..
كال ؛ ارسمي اي شي يدور ببالج واني راح اعرف شنو تردين ...

بقيت بس صافنة عليه وملامحي مزعوجة ، لاوية شفتي ومخنزرة عيوني ..
ابتسم وطلع بهدوء ...
بعد مرور 12 يوم خابرت رحمه الدكتور انطاني رقمها مشتري الها ايباد تلعب بي

وكال..احجي وياها وخليها صديقتج...

صدوك خابرتها وحجيت وياها جانت جامده حييل ومتحجي وتجاوب علئ كد السؤال تعبتني..

كلتلها مرتاحه ...

كالت..اي عاطف حباب وبيبي تحبني بس اني اخاف من حميد

كلتلها...ليش تخافين حبيبتي عاطف يمج يطيح حضه

جاوبت بحزن...هو ميحبني ذاك اليوم طلعت من المطبخ ضربت بي ضل يغلط عليه يكول ام الجنيه ماتشوفين عميه

وضليت ابجي حيييل...اني شسوي حتئ حميد ما يضوج مني ويطردني...

انقهرت حيييل كلتلها...لا تسووين شئ مو مجبوره يطبه نعال يرضئ بيج غصبا عنه...

كالت..اخاف يشمرني بالمستشفى

تنهدت كلتلها..تثقين بعاطف

جاوبت بتوتر وارتباك..اءء اي اثق هو حباب واحسن واحد بالدنيا

جاوبتها بحنان..اوك حبي ثقي بي لا حميد ولت غيره يكدر ياذيج

وهسه كوليلي انت شنو الي خلاج حالتج تستاء

سكتت مجاوبت...

حاولت وياها واستدرجها بس جانت حيل حذره مجاوبت على اي سؤال..

بس افتهمت منها ان هي تكره نسوان ابوها حيل وخاصه ضحئ وكالت هنه سبب دمارها...

وهي حاولت الانتحار اكثر من مره ...

ضجت عليها حيل من خلال كلامي وياها مبينه مجروحه ومتنطي لنفسها فرصه تتشافه...

قفلته منها وخابرت الدكتور وكتله عن كلامها كال..ضلي علئ تواصل وياها لحد ما توصلين لرأس الخيط ...

بس لا تضغطين عليها ما اريدها تتعب اريدها تثق بيج وتحجيلج...

كتله..اوك ان شاء الله قفلته

ورحت انام..شفت رساله جايه من حسن كاتب شلونج حبي مشتاقلج بكد حر البصره...

ضحكت وما رديت عليه لازم ابدي بخطه جديده

طبعا اني وحسن صارت علاقتنا كوولش حلووه يموت عليه يراسلني ويرسلي صور والحب كبر بينه...

بس هو لطش اله يشوفني واني مااكدر لذالك اني قررت ما احجي وياه منا للدوام..

وبس يرجع الدوام اكوله بطلت لان اهلي لزموني وياك وكتلوني وبطلوني واخبله ههههههه

كنت كاعده علئ التخم والهتفون بااذاني واهز ركبه علئ أنغام اغنية نور الزين...

دخل حميد باوع عليه ضربني بالمخده كال بعصبية...طايحة لحظ ادب سز متستحين تتمركصين كدامي...

نزلت الهتفون وجاوبته...ديالله عساس هسه انت ابو القاسم الخوئي خليني ساكته ريحة اخلاقك واصله لابو ضبي

زمخ بوجهي كال...انجبي طايحة حظ

سكتت شلون اخ تافهه وسرسري باوعتله بنص عين...حميد احترمني ترئ اسرارك كلها بجيبي لذالك كلمه مني اوديك وره الشمس...

هو هجم عليه ورفعني من شعري كال ..لج زباله كلمه وحده ادفنج وانتي عايشه فتحي حلكج بكلمه وشوفي

ضحكت بااستهزاء وجاوبته...محد يموت قبل يومه

ركز بوجهي وكال...ليش ما تحفين شواربج جنج زلمه

ضحكت كتله...شفت ماكو زلم قررت استرجل..

ضربني براشدي قووي طير ملامح وجهي...

بلعت ريكي ولفيت وجهي عار من بين الاخووه ...للاسف اني غفران اخت حميد السافل ابو الملاهي...

يوميه مخلص فلوسه علئ النسوان والشرب وكل هذا هو ابو الراهي...

الشئ الي خله حميد يتفرعن هي ماما لان جانت تشوفه يغلط وتصفگ اله...

وخلته يستفحل علينه...

اشوف فرق كبير بين تربيتة وتربية عاطف ...عاطف انسان مثقف واعي والكل يحترمه...

اما حميد عنده اهم شئ الفلوس وامي تزن براسه البيت بيتك وعاطف لازم يسافر وانت تستارث العائله وعلئ هل رنه طحينج ناعم...

خلته كره الكل بحيث يستولي علئ كووولشي...

لزمني من تشيرتي وطردني...

ضليت اتنفس بغضب ...زمال اني الك اله افضحك فضيحه..

ضليت اباوع عليه واتصنت لكلامه بدوون علمه

شفته فتح تليفونه وهو يجري اتصال

سمعته يكول...لك اني ما اعرف اتكلم اللغه الانجليزيه اي لازم اكو واحد يعرف يحجي

وكمل...لا هي مو امريكيا هي اوكرانيا...بس اريد اخليها تكتشف عاطف يخونها واريدها تسحبه الأوكرانيا لازم يسافر ويتزوج...

لان اذا ضل هو خطر على حياتي...

اي اريد واحد قوي بالإنكليزية اخليها يطير شعورها وتطلب يجي الها...

تنهدت لا يعار ليش تريد عاطف يسافر اي يمكن يريد يطرد رحمه من البيت شكد نذل...

مشيت خطوتين واجت امي بهمه وعبالك يركضون وراها انصدمت بيها

كالت..وخري شكد ططوه

ضحكت اني بيه طبيعه من واحد يسبني ما اتاثر اكول الغلطه ترجع عليه ههههه جيل الطيبين...

شنسوي نصبر نفسنه بهاي السوالف...

رحت وره امي من النوع الفضوليه كوولش اني شفتها دخلت لحميد وكفت اتصنت عليهم...

اسمعها دكله..لك حميد الحك

كلها باستغراب...خيير خير شكوو

كلتله...لك هاي رحمه ورث امها هوواي لازم تاخذها

هو جاوبها ..شلون اخذه اروح للنفوس واسحب اموالها كونها مخبله

امي جاوبته بغضب...انجب ولك مخبله شنو عاطف كاتب بيها تقرير ويكول مابيها شئ مجرد حاله نفسيه

حميد ..وشسوي يعني

امي..لتسوي تتزوجها

اني انصدمت خطيه لبنيه مريضه وصغيره وحميد كلب اكيد يموتها ويمرضها بالزايد

سمعت حميد يكلها...شنووووووووووو؟

كلتلها...اي ولك تزوجها واكييد باجر عكبه تموت لو تنتحر مثل امها وتموت وانت تاخذ الاول والتالي...

هو كلها..شنو استارثها

جاوبته بمكر...لا ولك بس تتزوجها وتطلب ايدها وتتودد الها هي مراح تفهم اخذها وخليها تتنزل عن املاكها

كلها..بس هاي مخبله شلوون اعيش وياها

ضحكت بصوت عالي..وشنو يعني نرتبها ونعدلها الك هم انت تستمتع وهم تاخذ ورثها

هو رجع ضحك وجاوبها بخبث..اي فعلا اببد ما خسران وترئ هي حليوه عيونها خضر

ام حميد...هسه شقررت

حميد...اتزوجها

نهاية البارت...يتبع

كونوا انتم كونوا بخير..انحبكم

نور سمو العراق...نورا ناصر