#بارت 14

رواية...رحمة عاطف

نورا ناصر..نور سمو العراق...

💔💔💔💔💔💔💔💔💔💔

رحمة:..... قيد شفافي بشفافه ومنعني من الصريخ ، صرت ادفع بي بس هو ثكيل كلش ، سفطني ع الميز
صرت ارافس برجليه ، جتي وحدة من الرفسات بي توقف فجأة وظل يباوعلي وشكله منعس وتعبان حييل ، وكع ع الارض  انسند على ركبه
واني انهاريت وصرت اصرخ ...

خليت ايديه على حلكي مصدومة متفاجأة متوقعتها منك عاطف خذلتني ، صرت انزف الم انزف خيبة ...

بلحظة كلهم اللتموا حميد بسرعة طب عبالك جان منتظر اللحظة ..

نزل لعاطف وهو ع الكاع يباوع ميدري شكو  .
لزمه من ياخته وسحبه ليفوك وصار بمستواه وظل يعيط بوجهه ..
_ يا ساقط ياطايح الحظ انت شلون تسوي هيج لك هاي عرضك وشرفك ؟

دخلت ام عاطف وغفران بسرعة مصدومات ، مخروعات والنعاس بعده بعيونهم ..

واثنينهن بصوت واحد كالن ؛ خير شكو شنو صار شبيها رحمة ..
تقربن مني ، غفران حضنتني وام عاطف صارت تتفحصني ..
اريد احجي الكلام مديطلع بس اشهك واشر على عاطف وانشغ ..

جاوبهم حميد بعصبية؛ هذا عاطف الخسيس حاول يعتدي عليها شفته سافطها ع الميز ويبوس بيها وهيه ترافس ...

ام عاطف لطمت على وجهه وحجت بصدمة ؛ يا لااا عزا ابني ميسويها ..
تقربت من حميد واخذت عاطف من بين ايديه وصارت
تحجي بوجهه منفعلة ومصدومة والكلام يطلع منها مبحوح ..
_ عاطف ابني صدك الكلام الي دااسمعه ، عاطف متسويهه ابني كولي شبيك كولي لا ااا ممسوي هيج شي انت احجي عاطف شبيك مو طبيعي ؟

والتفتت الي لزمتني من زنودي وصارت تهز بيه وتحجي
_ رحمة صح هالكلام ؟ هو هيج سوا بيج ؟ احجي رحمة احجي ؟

ظليت اهز راسي بتأكيد وكوة جاوبتها وامسح بشفافي
وجسمي كله يرجف والدموع بللتني ..
ظليت اشر عليه واحجي وشفافي ترعش ؛ اي اي اي عمة هيج هيج سوا عاطف هيج سوة بيه ..
اريد اكمل مكدرت حسيت نفسي محتاجة اصرخ انتابتني نوبة صراخ هيستيرية حسيت نفسي توصخت ليش يا عاطف ردتك عون اليه تطلعلي فرعون ماعولت تعرف سالفتي جيت تريد تعتدي عليه ..
اتمنى اصرخ بصوت عالي واكول اكرهك اكرهك ..

ظلوا يحاولون يهدأون ، جتي غفران قربت مني مي بكلاص دفعته منها ، حضنتني وظلت تقرا عليه ...

ام عاطف عافتني و رجعت تقربت من عاطف تهزز بي وهو فاقد وميدري بالدنيا ..
كالت والله ابني ميسويها بس شوف شبي اليوم وليش هيج ريحته غريبة لا لا مستحيل معقولة عاطف يشرب هذا شارب ولك حميد وين وديته وين اخذته ليش هيج حالته حاله ليش ولك ليش ؟

حميد بتذمر ؛ خالة شسويله هو راد يشرب قابل هو طفل وامنعه مكدرت امنعه اصلا ..

_ والله انت السبب بكل شي والله عليك طلوعات الله لايوفقك ..
_ هسه شعليه اني وتسبيني هو ابنج جان عايش برة ومتعود ع الشرب لتدخليني بالموضوع لعد ماشربت اني ؟ مو هياتني كدامج ؟ ....

خزرته وحجت ؛ تعال اسنده ويايه خلي نروح نغسل اله بلكي يصحصح ..

سندوا واخذوا من المطبخ واني رحت ويا غفران للغرفة والشهكة مافاركت حنجرتي ابد حتى والرجفة بمل جسمي ، سعفة وضربها الهوا ، روحي مهترئة وجروحي مضاعفة ، جروح دفينة انفتكت اقطابها ، كسيرة روح واضلاع  ...

عاطف :.... كعدت الصبح راسي مصدع وصاير شكبره جريت نفس اريد اكوم احس نفسي ثكيل كُلش ..

دخلت امي للغرفة باوعتلها ، نظراتها كل عتب ومعصبة وتنفخ ..
مديت ايدي لراسي رفعت شعري وعيوني على امي ..
اريد احجي قاطعتني ..
حجت بحدية ؛ اكدر اعرف شنو الي سويته هذا عاطف؟

خنزرت وحجيت ؛ خير شكو هو شنو الي صار ..
_ يعني مسوي نفسك متعرف ؟
_ اي غير تحجين خل افتهم ؟
_ لك البارحة شلون تجي سكران ؟ هاا ..

كمزت من الفراش ونسيت كل التعب انصدمت من كلامها اخر شي اتذكره جنت بالكوفي ويا حميد ودخت ..

كتلها ؛ اني سكران بس اني ما اشرب انت ِ كُلش زين تعرفين هالشي امي احجي شصار ؟؟

_ اي جيت سكران شارب وحاولت تعتدي على رحمة دمرتها للبنية من البارحة لليوم وهيه حالتها حاله بالله هيه هاي سوايه تسويها اكو واحد طبيب مثقف يسوي هيج ؟
صيحت بوجهي بقسوة ..

كلامها وكع عليه مثل الصاعقة ...
انصدمت حييل حجيت باستغراب ؛ اني هيج سويت مستحيل مستحيل ووينها رحمة ؟
طلعت من الغرفة اركض ونسيت نفسي بس بالبنطرون وصدري عاري ..

ركضت لغرفة بيبي ادور رحمة مشفتها نزلت الدرج سويته بايتين واني اصيح رحمة وينج رحمة ، صارت مقابيلي بيبي ..
مستغربة ؛ شبيك عاطف شهالصياح من الصبح؟ رحمة بغرفة غفران ..

مجاوبت بيبي وركضت لغرفة غفران فتحت الباب بدون ما أدُكه ..
شفت رحمة كبالي جفلت من كامت من السرير تمشي وتوكع صارت ورة غفران ظلت تباوعلي ونظرات الاتهام بعيونها تذبحني ذبح  ..

تقربت منها ختلت كلها ورة غفران ..
كتلها رحمة اني !!! وانقطع كلامي مااعرف شلون ابرر الها وهيه خاتلة وخايفة مني وتصرخ بهستيريا ..
_ اطلع ما اريد اشوفك اطلع يا حقير ..

غفران ؛ اطلع عاطف اطلع رحمة تعبانة حييل خليها تهدأ وحاجيها ..

كتلها وخري عنها اريد احجي وياهه ..
صراخ رحمة بلحظتها جان يتسلل لروحي ويفتها فت

دخلت امي وبيبي سحبوني من يمها ...
يحجون وياي ويأمروني بان اطلع منا

واتركهه ..

طلعت مثل قائد طالع من حرب ويجر باذيال الهزيمة والخيبة مجاي اكدر استوعب اني الي سويته برحمة ردت اصير دوة لجروحها متوقعت يصير هيج شي ابد

واني طالع من غرفة غفران تذكرت الي صار البارحة اني مااشرب مستحييل اكيد حميد اله ايد بالموضوع
سحبت نفسي من امي وبيبي الي جانن لازمات ايديه ويجرن بيه حتى اطلع ..

تركتهن وصيحت بعلو حسي ولك حميد الساقد الحبان وينك !!!!

شفت حميد فوك واكف ع الدرج ويطل عليه ويحجي ببرود
_ خير شكوو ..

صعدت الدرج بسرعة ووصلت اله مدري شنو من قوة نزلت عليه فجأة سحبته من ملابسه لزمته قوي ، وعطت بوجهه ..
_ ولك شسويتلي البارحة هاا؟ انت الي وصلتني لهاي المرحلة ؟ انت خليتني ... مكدرت اكمل كلامي وجهت اله لكمة على وجهه وكع بالكاع ...
ظل يصيح ؛  لك يا ساقط يا سكيير انت الله مطيح حظك اني شكو تف عليك بيك خير مو تعتدي على طفلة ..

كلامه استفزني حييل نزلت عليه ضرب ضرب وكل هذا ميشفي غليلي الى ان حسيت بعمي يسحبني منه ويبعدني عنه ، ارتطمت بالحايط كرهت نفسي حييل شون امنت بي هذا الكلب وسوة سوايته ، اذيت رحمة خذلتها مجاي اكدر استوعب شون ارجعها الي مثل قبل تثق بي وتعتمد عليه !!

اجاني صوت عمو يصيح ..
_ طايحين الحظ ادبسزية شكو كل يومية عركة عبالك جهال شنو من بشر طلعتوني من طوري شسويلكم وتستجنون ...

باوعت لحميد كاعد بالكاع وخشمه ينزف دم وامه تنطي كلينكس ويمسح خشمه ..

وامي واكفة مناك وتعصر بيديها ....
وبيبي تعبانة وواكفة نص الدرج وتصيح
ولكم كافي مشاكل شون وياكم انتوا الجلطة من وراكم راح تجي والله راح تجلطوني الله واكبر عليكم ان شاءالله ...

عمو ؛ عاطف حميد ، اسمعوني اثنينكم هوسة هنا بعد ما اريد فاهمين ؟ كافي كل يوم صياح الجيران شيكولون علينه ؟

عفتهم ودخلت لغرفتي ، طبكت الباب بقوووة ، نزلت للكاع انسندت على ركبتي ، ياربي ممصدك خذلت رحمتي ممصدك ، خليت ايديه على رقبتي وراسي نزلته للكاع ، غمضت عيوني واجت صورة عيونها البريئة بخيالي ودموعها احسها تيزاب يحرك گلبي ...
شسوي هسه يربي شسوي!!!!!!

...........................

كنت كاعده بالحديقه اطكطك بفوني اليوم طلبت اجازه وما داومت اخابر رحمه وبس تبجي وتنحب مااعرف شنو البيها خبلتني...

كلتلها هسه اخابر عاطف يشوف حالتج هي عبالك مكلت عاطف كلت وحش ضلت تصرخ وتسب وتغلط سكتت وحاولت اهديها....

لذلك قررت اروح ازورها واخذت اجازه بس اني اخاف حسن ميقبل ولو هو ممهتم ولا اله شغل بيه مو مثل قبل بس مي خالف الحذر واجب...

سمعت صوت سيارة حسن كعدت عدل وهديت شويه هو دخل وجه ما يكصه السيف و راح بدون لا سلام ولا كلام.

هزيت ايدي وسكتت ورجعت اطكطك بالفون. .

شويه و وصلتني رساله مكتوب...انتي جذابه اليوم رحت الرئاسة القسم وبحثت عن اسمج بقسم الاجهزة الطبيه وماكو هيج اسم طالبه عندهم انتي منو دازج عليه احجي انتي منو لا قسما بذات لله اطلع حسابج من جوه الكاع واني حسن...

انصدمت صدمه قويه يبوو رايح باحث علئ اسم ياسمين لازم اتدارك الأمر وابين اله اني مو كذابه كتبت...حسن انت شنو دتحجي معقوله انت اني مجنت اثق بيك لذلك منطيتك اسمي الكامل حقيقي انت شلون تروح تدور من وراية...

كتب...شنو متثقين بيه راسله صورتج وبصمة صوتج ودكولين ما اثق خايفه علئ اسمج وما خايفه علئ صورتج انتي مو منطقيه اني شاك بيج احسج تلعبين عليه...

حسيت برجفه باصابعي كتبت...اي جنت ما اثق بس من تعرفت عنك ثقيت واسفه مااكدر احجي اكثر من هيج تعرف حالتي خطره وبعد لا ترسل رسائل اله اني اراسلك اوك لان اكثر الاحيان يكون الفون بيد اخويه او بابا تعرف مراقبه...

قفلته بدون ما اشوف الرد...

ورحت بدلت وغسلت وحطيت شويه مكياج طلعت وكلت الجدو يوصلني للسيارات وفعلا اخذني وركبت ورحت البيت رحمه...

مسافة الطريق وصلت دكيت الباب وفتح بيبيتها رحبت بيه وكالت..همزين اجيتي رحمه تخبلت علينه مااعرف شبيها بس تبجي وتخاف ومتاكل وراسها والف سيف ولا احد يجيب اسم عاطف خبلتني...

جريت نفس ودخلت عليها شفتها متكوره علئ نفسها وحاضنه دفتر الرسم وتبجي وتنحب بألم...

كسرت خاطري مسكينه مااعرف شبيها حطيت ايدي علئ كتفها صرخت مرعوبه وهي دكول...لااا لااا

حضنتها بحنان وهمست...رحمة لا تخافين اني سفانه اجيت اشوفج لا تخافين حبيبتي اني يمج ..

حضنتني حييل وكأنها تريد تدخل داخل صدري همست ببكاء...حقييير كلب عرف اني رخيصه تماده اكثر اكرهه الله ينتقم منه ويحرك كلبه مثل ما حرك كلبي...

بعدتها عن صدري شويه وحضنت وجهها بكفوفي تساءلت..حبيبتي منوو الي وياج منو هو الحقير

بلعت ريكها وماردت بس تبجي خفت اسأل عن عاطف وتنهار حاولت افهم السالفه مقبلت تحجي بس حقير كلب رخيصه هذا الفهمته...

سحبتها للحمام غسلت وجهها وخليتها تتوضه ودخلتها للغرفه فتحت القران بالموبايل علئ صورة البقرة ...وخليتها تستمع الها...هدئت شوويه...

دخلت غفران شايله عصير ولابسه تشيرت عريض بنص بزونه وستريت بنفسجي والتشيرت رصاصي وتسريحتها القديمه الكعكعه مدري شسموها...

ابتسمت يربي معقوله غفران تلوك الحسن ما بينهم اي ترابط غفران قزمه وضعيفه ولسان وحسن ضخم وطويل بس هماتين السان...

كالت بحزن...رحمة حالتها حاله بس تبجي وتصرخ لج والله حتئ صرت اتخيل صوت بجيها شكد حاولت اهديها بس متت متقبل

سالتها..ليش هو شنو الصار حتئ هيج تازمت اشو من اجتكم ارتاحت وصارت مثل الورده هسه شبيها؟

شفت غفران تلعثمت بالكلام كالت...هاا اءء موو هاا هي هذا عاطف راد يضربها ابره وهي تخبلت صارت تكره واتعاركو...

باوعتلها بغموض مااعرف حسيتها غير صادقه بس تغاضيت عن كلامها لان مو من حقي أحقق وياهم....

ضليت تقريبا ساعه كامله حسيت شويه ارتاحت بس شويه ترجع الحالتها كلتلها نطلع بالحديقه مقبلت

اتصل بيه حسن كال وين انتي ...جاوبته اني بيت الدكتور عاطف مو بنت عمته مريضه ضل يسب ويغلط كال هسه تجين...

كتله بزعل...اوك

بعدين كال..اوصفي الي المكان وجايج

وصفته اله علئ السريع وهو بيتهم ميتيه ابد ...كال اوك جايج...

حضرت نفسي بسرعه وضليت احجي ويه رحمه واطمنها ..

غفران جنت افتر بتوتر بالصاله ولحد الان طابع موقف عاطف بداخل مخيلتي ياربي شكد جنت احبه واحترمه كرهته حيل مسكينه رحمه وكعت بيده...

بس هو جان سكران مبين لان مستحيل عاطف يكون صاحي ويعتدي علئ رحمه مو من اخلاقه ولا مبادئه...

جريت نفس اعرف سوالف حميد اخويه الهتلي اوف يربي ترئ متربيه من حميدو ليوم الدين...

اندك الباب لبست شالي وفتحت الباب كلت منوو محد رد..رجعت كلت منوو محد رد...

بس الدك مستمر عطت بصوت عالي منوووو...

فتحت الباب منزعجه وعيوني بكصتي اول مفتح الباب وطلع بوجهي واحد يمااااي ابو شهاب بشبابه عكييد يموت شحلاته ضليت مرتبكه وصافنه بس بسرعه رجعت...

هو دفع الباب كال...ياسمين ياسمين انتي

رجعت استغربت..ياسمين منو انت غلطان اخوويه

هو بسرعه نزل عيونه وجر نفس كال...بيت دكتور عاطف

هزيت راسي بأي

كال..صيحي سفانا...ياسمين...

دخلت جوه واني متفاجئه ياسمين منو شبي هذا خبل ...

صحت سفانا وهو بعده واكف وكل شويه وباوع عليه واني مستغربه كووولش منه..بس الحمد لله اول واحد يحسسني اني انثئ هههههاي

.......................

عاطف ...

بعد الي صار ويايه والموقف الي تعرضت اله سودة الدنيا بعيني رحمه ثقت بيه وحجت عن مأساتها واني للاسف كسرتها ودمرتها...

وهي كل ضنها ان اني استغلها لان هي متعرضه الموقف قديم وان اني احسسها برخص...

مع العلم اني مو هيج واتمنئ تفقد ذاكرتها وتنسئ الموقف لكن صدمتني حيييل بعدم قبولها وخوفها مني..

صرت اتردد ادخل للبيت ...وحميد الكلب من يشوفني ينهزم كله بسببه ...

جريت نفس ابوها العار دازلي رساله كاتب ضحئ اشرف من الشرف واني ثاق بيها ومحد يكدر يغير رأيي...واكيد واحد مندس وغيران مني لان متزوج وحده صغيره وطفله..

مسحت علئ لحيتي بغضب واحد عار لو يشوف ضحئ ويه واحد ميصدك مدمغته تدمغ...

اني لو ما خاطب جان خطبت رحمه بس مااكدر اكسر خطيبتي وحتئ لو...

رحمة مستحيل توافق بعد الضرر والهجوم المباغت الصار..

لذالك اني قررت السفر...

فيزت جوازي وخبرت نيكول عند موعد قدومي لعاصمتها وهي بدورها فرحت وتفاجئت..

حزمت الجنط وكل اغراضي ... درت داخل غرفتي يعز عليه الفراك بس لازم ابتعد هذا احسن حل بلكي تنسه شوويه..

طلعت ودعت كل اهلي امي مقبلت اسافر وحتئ،بيبي بس لازم اروح...

باوعت لغرفتها بقهر تحمل طفله مسكينه منتهكه براءتها واني مقصرت للاسف زيدت الطين بله...

جنت اتمنئ ادخل عليها واطيب خاطرها واعتذر منها بس للاسف ما الي وجه بمقابلتها...

بس اكيد اترك الها رساله تعبر عن اعتذاري وشوگي الها ...

رجعت الغرفتي وهواجس بداخلي وعصارات دمرتني متضايق ومجروح اكثر من رحمه شلون هيج صار وشلون استسلمت حسيت تقيدت مااعرف شنو اسووي...

خليت ونمت كعدت الفجر كملت اغراضي وسبحت طلعت من البيت ...

كتبت رساله...رحمة اني اعتذر عن الي صار بس والله مو قصدي الي صار غصبا عني والله غصبا عني جنت مو بوعيي انتي لو ناطيتني مجال جان شرحت الصار  الي اريده منج بس ان تسامحيني عن الصار لان اني راح اسافر واكيد ما انساج واعتذر مره لخ وثقي بالله اني مو مثل ما انتي متصوره لا بالعكس اني حيل اعتز بيج واحترمج واقدرج وان شاء لله الله يكون بعونج..مع السلامه.. عاطف...

طلعت من البيت وركبت للمطار مرة تقريبا ساعه كامله واجراءات السفر ركبت بالطيارة وحلقت بالجو واني مودع اهلي وناسي...

نهاية البارت...يتبع...

كونوا انتم كونوا بخير...انحبكم😍

نورا ناصر ..نور سمو العراق..💔

بنات باجر ماكو نشر لان معزومه كثرت العزايم ويه القصص 😀😀...