ﺍﺳﻌﺪ ﺍﻟﻠﻪ ﺍﻭﻗﺎﺗﻜﻢ ﺑﻜﻞ ﺧﻴﺮ ﺍﺣﺒﺘﻲ ❤
ﺍﻧﺘﻈﺮﻭﻧﻲ ﺑﺒﺎﺭﺕ ﺍﺧﺮ ﻟﻴﻼ ..
‏( 3 ‏)
#ﺣﻜﻤـﺔ_ﺫﺋﺐ
# ﺑﻘﻠﻢ _ ﺷﻤﺲ _ ﺍﻟﺴﻌﺪﻱ
#الحكمه٣
ﻋﻨﺪﻣﺎ ﻳﺘﺤﺮّﻙ ﺍﻟﻜﻮﻥ ﻣﻦ ﺣﻮﻟﻨﺎ .. ﻳﺴﺘﻞّ ﺳﻜﺎﻛﻴﻨﻪ ﻳﺒﺎﻏﺘﻨﺎ ﺑﻄﻌﻨﺎﺕ .. ﻳﺠﺮّﺡ ﺃﺭﻭﺍﺣﻨﺎ .. ﻳﺤﻮﻟﻬﺎ ﺇﻟﻰ ﺃﺷﻼﺀ .. ﻳﺸﺘﻬﻲ ﺍﻟﻘﻠﺐ ﻟﻮ ﻳﺘّﺨﺬ ﻣﻦ ﻭﺟﻌﻪ ﺃﺟﻨﺤﺔ ﻭﻳﻬﺎﺟﺮ ﺇﻟﻰ ﻛﻮﻛﺐ ﻟﻴﺲ ﺑﻪ ﺑﺸﺮ !!
ﺟﺎﻧﺖ ﻋﻴﻮﻧﻬﺎ ﺍﻟﺒﻨﻴﺔ ﺍﻟﻤﺎﺋﻠﺔ ﻟﻠﺼﻔﺎﺭ ﺗﻨﻈﺮ ﺑﺮﻫﺒﺔ ﻭﺧﻮﻑ ..
ﺍﻟﺨﻮﻑ ﻣﻦ ﺧﺴﺎﺭﺓ ﺍﺣﺪ ﺍﺧﺮ ﻣﻦ ﺣﻴﺎﺗﻬﺎ .. ﺑﺸﺮﺗﻬﺎ ﺍﻟﺤﻨﻄﺎﻭﻳﺔ ﺍﺻﺒﺤﺖ ﺫﺍﺕ ﻟﻮﻥ ﺍﺣﻤﺮ .. ﺩﻣﻮﻋﻬﺎ ﺗﺘﺴﺎﻗﻂ ﻣﺜﻞ ﺍﻵﻟﺊ ﺩﻭﻥ ﻟﻤﺲ ﺧﺪﻳﻬﺎ ..
ﺗﺘﺴﺎﺋﻞ ﺑﺪﺍﺧﻠﻬﺎ ﻟﻴﺶ .. ﻟﻴﺶ ؟؟
ﻭﻛﺄﻧﻬﺎ ﺗﻠﻮﻡ ﺍﻟﻘﺪﺭ ﻋﻠﻰ ﺣﻴﺎﺗﻬﺎ .. ﻣﺜﻞ ﻃﻔﻠﺔ ﺗﻮﻫﺎ ﺗﺘﻌﻠﻢ ﺍﻟﻤﺸﻲ ﻭﺑﻜﻞ ﻟﺤﻈﺔ ﺗﮕﻮﻡ ﺑﻴﻬﺎ ﺗﻤﺸﻲ ﺧﻄﻮﺗﻴﻦ ﺗﻌﺜﺮ ﻭﺗﻮﮔﻊ ..
ﺣﻤﺪﻳﺔ ﺟﺎﻧﺖ ﺑﺲ ﺗﺼﺮﺥ ﻭﺍﻟﻨﺎﺱ ﻣﻠﺘﻤﺔ ﺣﻮﻟﻬﺎ .. ﺷﺎﻟﻮﻩ ﻟﻠﻤﺴﺘﺸﻔﻰ ﻭﻫﻲ ﻭﺭﺍﻩ ﺗﺎﻟﻲ ﺍﻟﺘﻔﺘﺖ ﺍﻟﺮﺿﺎﺀ ﺍﻟﺠﺎﻧﺖ ﺻﺎﻓﻨﺔ ﻭﻋﻴﻨﻬﺎ ﻋﻠﻰ ﻧﻔﺲ ﺍﻟﻤﻜﺎﻥ ﺍﻟﻲ ﺟﺎﻥ ﺍﺑﻮﻫﺎ ﻭﺍﮔﻊ ﺑﻲ
ﺳﺤﺒﺘﻬﺎ ﻣﻦ ﻣﻼﺑﺴﻬﺎ ﻭﺟﺮﺗﻬﺎ .. ﻭﺍﻟﺜﺎﻧﻴﺔ ﺗﻤﺸﻲ ﺑﻼ ﻭﻋﻲ ﻭﺭﺍﻫﺎ ..
ﺍﺟﺮﺕ ﺳﻴﺎﺭﺓ ﻭﺭﺍﺣﺖ ﻭﺭﺍﻫﻢ .. ﺍﻭﻻﺩ ﺍﻟﺤﻼﻝ ﻫﻮﺍﻱ ﻣﺎﺍﻧﺘﻈﺮﻭﺍ ﻭﺍﺧﺬﻭﻩ ﻗﺒﻠﻬﺎ .. ﻃﻮﻝ ﺍﻟﻄﺮﻳﻖ ﺣﻤﺪﻳﺔ ﺗﺪﻋﻲ ﻭﺗﺒﺠﻲ .. ﺷﻠﻮﻥ ﺗﺨﺎﺑﺮ ﺍﻫﻠﻬﺎ ﻭﺷﺘﮕﻠﻬﻢ ..
ﻧﺰﻟﺖ ﻣﻦ ﺍﻟﺴﻴﺎﺭﺓ ﻣﺜﻞ ﺍﻟﻤﺠﻨﻮﻧﺔ .. ﻋﺒﺎﺗﻬﺎ ﺑﺮﺍﺳﻬﺎ ﻭﺗﺮﻛﺾ ﻭﺭﺿﺎﺀ ﻭﺭﺍﻫﺎ ﺗﻤﺸﻲ ﺑﺠﺴﺪ ﻣﺎﺑﻲ ﺭﻭﺡ ..
ﺑﺬﺍﻙ ﺍﻟﺰﻣﻦ ﺍﻟﻘﻠﺔ ﺍﻟﻘﻠﻴﻠﺔ ﺗﻠﮕﻴﻬﺎ ﻣﺤﺠﺒﺔ ﺍﻭ ﻻﺑﺴﺔ ﻋﺒﺎﻳﺔ ..
ﻟﻜﻦ ﻋﺎﺋﻠﺔ ﺍﻟﺤﺠﻲ ﺧﻀﻴﺮ ﻋﻠﻤﻬﻦ ﻋﻠﻰ ﺍﻟﺤﺠﺎﺏ ﻣﻦ ﺍﻟﺼﻐﺮ .. ﻭﻧﺎﺩﺭﺍ ﻣﺎﻛﺎﻧﺖ ﺣﻤﺪﻳﺔ ﺗﻠﺒﺲ ﻋﺒﺎﻳﺔ ﺍﺫﺍ ﺭﺍﺣﺖ ﻟﻠﺴﻮﮒ ﺍﻭ ﻣﻜﺎﻥ ﻋﺎﻡ ﻭﺍﺯﺩﺣﺎﻡ ..
ﻭﻫﻲ ﺑﺎﻟﻤﺴﺘﺸﻔﻰ ﺗﺴﺄﻝ ﻋﻠﻰ ﺍﺧﻮﻫﺎ ﻭﺗﺪﻭﺭ ﺑﺎﻟﻮﺟﻮﻩ ﻭﺍﻟﻐﺮﻑ .. ﻧﺴﺖ ﻧﻔﺴﻬﺎ ﻭﻋﺒﺎﻳﺘﻬﺎ ﻋﻠﻰ ﻣﺘﻨﻬﺎ ﻭﺗﺮﻛﺾ ..
ﺟﺎﻥ ﺑﺪﺍﺧﻠﻬﺎ ﻫﺎﺟﺲ ﺍﻧﻪ ﺍﺧﻮﻫﺎ ﺧﻠﺺ ﺭﺍﺡ ﻣﻨﻬﺎ ..
ﻟﺴﺎ ﺑﻌﺪﺓ ﻣﺎﺻﺤﻰ ﻣﻦ ﺟﺮﺡ ﻣﺮﺗﺔ ﻭﺍﺑﻨﻪ ﺍﻟﻲ ﻣﺎﺷﺎﻓﺔ ..
ﺳﺄﻟﺖ ﻋﻠﻴﻪ ﺑﺎﻟﻄﻮﺍﺭﺉ .. ﻭﺷﺎﻓﺖ ﺍﻟﻮﻟﺪ ﺍﻟﻲ ﺷﺎﻟﻮﻩ .. ﺍﺗﺠﻬﺖ ﺍﻟﻬﻢ ..
ﺟﺎﻥ ﻭﺟﻬﻬﻢ ﻳﺪﻝ ﻋﻠﻰ ﺟﻮﺍﺑﻬﻢ .. ﺍﺷﺮﻭﻟﻬﺎ ﺍﻟﺴﺘﺎﺭﺓ ﻭﺭﺍﻫﺎ ﺍﻃﺒﺎﺀ ﻭﺍﮔﻔﻴﻦ ﻭﺩﻧﮕﻮﺍ ﺭﺍﺳﻬﻢ ..
ﺭﻛﻀﺖ ﺗﺸﻮﻓﻪ ﻭﺳﻤﻌﺖ ﺍﻟﺪﻛﺘﻮﺭ ﻳﮕﻮﻝ ﺳﺠﻠﻮﺍ ﺳﺎﻋﺔ ﺍﻟﻮﻓﺎﺓ ﻭﺳﺒﺒﻬﺎ ﺳﻜﺘﺔ ﻗﻠﺒﻴﺔ ..
ﻣﺎﺍﺗﺤﻤﻠﺖ ﺣﻤﺪﻳﺔ ﻭﻫﺰﺕ ﺍﻟﻤﺴﺘﺸﻔﻰ ﺑﺼﻮﺗﻬﺎ ..
ﺭﻛﻀﺖ ﻋﻠﻴﻪ ﻭﺳﺤﺒﺖ ﺍﻟﺠﺮﺟﻒ ﻭﺗﺒﺠﻲ ﻭﺗﺤﺎﻭﻝ ﺗﮕﻌﺪﺓ
- ﺍﺧﻮﻳﺔ ﺍﺭﻭﺣﻠﻚ ﻓﺪﻭﺓ ﺍﮔﻌﺪ .. ﻻﺗﺮﻭﺡ ﻣﻨﻲ ﻳﺎﻟﺤﻨﻴﻦ ﻟﺴﺎ ﻭﺟﻊ ﺣﺴﻮﻧﻲ ﻣﺎﻃﺎﺏ ﻻﺗﻮﺟﻊ ﮔﻠﺐ ﺍﺧﺘﻚ ﻭﺍﺑﻮﻙ ..
ﺑﻨﺘﻚ ﻣﻨﻮ ﺍﻟﻬﺎ ﻳﺨﻮﻳﺔ .. ﺻﻐﻴﺮﺓ ﺑﻌﺪﻫﻲ ﻻﺗﻌﻮﻓﻬﺎ ..
ﺩﻧﮕﺖ ﺗﻬﻤﺴﻠﺔ ﻭﻋﺒﺎﻟﻬﺎ ﻳﺴﻤﻌﻬﺎ ﻭﻳﮕﻌﺪ ..
- ﺑﻨﺘﻚ ﺷﺮﻳﻔﺔ ﻭﺍﻟﻠﻪ ﺍﺑﻨﻬﺎ ﺑﺎﻟﺤﻼﻝ ﻭﻣﻦ ﺣﺴﻦ .. ﺍﮔﻌﺪ ﻳﺒﻌﺪ ﺍﺧﺘﻚ ﺍﮔﻌﺪ ..
ﺍﻟﺪﻛﺘﻮﺭ ﺣﺠﺔ ﻋﻠﻴﻬﺎ ﻭﮔﺎﻟﻬﺎ ﻣﺎﻳﺼﻴﺮ ﻫﻴﺞ ﺍﺧﺘﻲ ..
ﺭﺟﻌﺖ ﺗﺘﻮﺳﻞ ﺑﻲ .. ﺩﻛﺘﻮﺭ ﺍﻓﺤﺼﻪ ﻭﺍﻟﻠﻪ ﻣﺎﻣﻴﺖ ﺳﻮﻳﻠﺔ ﺷﻲ ﺍﺭﻭﺣﻠﻚ ﻓﺪﻭﺓ ..
ﺍﺗﻨﻬﺪ ﻭﻫﺰ ﺭﺍﺳﻪ ..
ﻻﺣﻮﻝ ﻭﻻﻗﻮﺓ ﺍﻻ ﺑﺎﻟﻠﻪ ﺍﻟﻌﻠﻲ ﺍﻟﻌﻈﻴﻢ .. ﺍﺧﺘﻲ ﺍﺧﻮﺝ ﻣﻦ ﺍﺟﺔ ﻟﻠﻤﺴﺘﺸﻔﻰ ﻫﻮ ﻣﺘﻮﻓﻲ ﺑﺴﻜﺘﺔ ﻗﻠﺒﻴﺔ .. ﮔﻠﺒﻪ ﻣﺘﻮﻗﻒ ﺍﻛﻴﺪ ﺻﺪﻣﺔ ﻗﻮﻳﺔ ..
ﺗﺮﻛﻬﺎ ﻭﺭﺍﺡ .. ﻭﻫﻲ ﺑﻘﺖ ﻣﺜﻞ ﺍﻟﺘﺎﻳﻬﺔ ﻭﺿﺎﻳﻌﺔ ﻣﺎﺗﻌﺮﻑ ﺷﺘﺴﻮﻱ .. ﻭﺍﻟﻮﻟﺪ ﺍﻟﻲ ﺟﺎﺑﻮﻩ ..
ﺳﺄﻟﻮﻫﺎ .. ﺧﻮﻳﺔ ﺧﺎﺑﺮﻱ ﻋﻠﻰ ﺍﻫﻠﺞ ﻳﺠﻮﻥ ﻳﻜﻤﻠﻮﻥ ﺍﻻﺟﺮﺍﺁﺕ ﻭﺍﺫﺍ ﻣﺎﻋﻨﺪﺝ ﺍﺣﺪ ﺍﺣﻨﺔ ﻫﻢ ﺍﺧﻮﺗﺞ .. ﻣﺎﺭﺩﺕ ﻭﮔﻌﺪﺕ ﺑﺎﻟﮕﺎﻉ ﺗﺒﺠﻲ ﻭﺗﻠﻄﻢ بيج قصص عراقيه حقيقيه من واقعنا.روعه الطائي
ﺭﺿﺎﺀ .. ﺩﺧﻠﺖ ﺑﻌﺪ ﻋﻤﺘﻲ ﻭﻣﺎﺍﻋﺮﻑ ﻟﻴﺶ ﻫﻴﺞ ﺻﺎﺭ ﻭﺍﺑﻮﻱ ﺑﺲ ﻻﻳﺼﻴﺮ ﺑﻲ ﺷﻲ .. ﺭﺟﻠﻴﺔ ﻣﺎﺗﺸﻴﻠﻨﻲ ﺣﺘﻰ ﺩﻣﻮﻋﻲ ﻳﺼﺒﻦ ﻣﻦ ﻏﻴﺮ ﻣﺎﻳﺠﻴﺴﻦ ﻭﺟﻬﻲ ﻣﻦ ﺍﻟﺨﻮﻑ ﻛﻠﺸﻲ ﺑﻴﻪ ﻳﺮﺟﻒ .. ﺑﺲ ﺩﺧﻠﺖ ﻟﻠﻄﻮﺍﺭﺉ ﺳﻤﻌﺖ ﺻﺮﺧﺔ ﻋﻤﺘﻲ .. ﻭﮔﻔﺖ ﻭﮔﻠﺒﻲ ﻳﺪﮒ ﺣﻴﻞ ..
ﺍﺳﻤﻌﻬﺎ ﺗﺒﺠﻲ ﻭﺗﺼﺮﺥ ﻭﺗﮕﻠﺔ ﺧﻮﻳﺔ ﺍﺭﻭﺣﻠﻚ ﻓﺪﻭﺓ ﺍﮔﻌﺪ .. ﮔﻤﺖ ﺍﺑﺠﻲ ﺑﺼﻮﺕ ﻭﻋﻴﺖ ﻋﻠﻰ ﺭﻭﺣﻲ ﮔﻌﺪﺕ ﺑﻤﻜﺎﻧﻲ ﻭﺍﺑﺠﻲ ﺍﺭﻳﺪ ﺍﺭﻭﺡ ﺍﺷﻮﻓﺔ ﻭﺍﺧﺎﻑ ..
ﻣﺎﺍﺭﻳﺪ ﺍﺳﺘﻮﻋﺐ ﺍﻭ ﺍﺻﺪﮒ ﺍﻟﻲ ﺟﺎﻱ ﺍﺳﻤﻌﻪ .. ﺍﻟﺪﻛﺘﻮﺭ ﻳﮕﻠﻬﺎ ﻣﺎﺕ ﻭﺍﻧﻲ ﻣﺎﻣﺼﺪﮔﺔ .. ﻻ ﺍﺑﻮﻱ ﻣﺎﻳﻌﻮﻓﻨﻲ ﺍﺑﻮ ﺣﻨﻴﻦ ﻣﻮ ﻣﺜﻞ ﺍﻣﻲ .. ﻻ ﻳﺮﺑﻲ ﻻﺗﺨﻠﻴﻨﻲ ﺑﻼ ﺍﺏ ﻭﺍﻡ
ﻻﺗﺨﻠﻴﻨﻲ ﺍﺑﻘﻰ ﻭﺣﻴﺪﺓ ..
ﺍﺣﺲ ﺟﺴﻤﻲ ﻳﺮﺟﻒ ﻭﺣﻠﮕﻲ ﻧﺸﻒ ﻭﻭﻧﻤﺖ ﺑﺎﻟﮕﺎﻉ ﺑﺲ ﻋﻴﻮﻧﻲ ﻣﻔﺘﻮﺣﺔ ﻭﺍﻻﺿﻮﻳﺔ ﻣﺎﻝ ﺍﻟﻤﺴﺘﺸﻔﻰ ﺟﻨﻬﻦ ﺿﺒﺎﺏ ﺑﻌﻴﻮﻧﻲ .. ﺳﻤﻌﺖ ﺍﺻﻮﺗﻬﻢ ﺑﺲ ﺟﻦ ﺭﻭﺣﻲ ﻃﺎﻳﺮﺓ ﻭﺗﺤﻮﻡ ﻳﻢ ﺍﺑﻮﻱ .. ﺍﻟﺘﻤﺖ ﻛﻠﻬﺎ ﻋﻠﻴﺔ ﻭﺷﺎﻟﻮﻧﻲ ..
ﺍﺳﻤﻊ ﻋﻤﺘﻲ ﺻﻮﺗﻬﺎ ﺑﺄﺫﻧﻲ ﺗﺒﺠﻲ ﻭﺗﮕﻮﻝ ﻻﻳﺮﺑﻲ ﻣﻮ ﻛﻠﻬﺎ ﺑﻴﻮﻡ ﻭﺍﺣﺪ ﻣﺎﺍﺗﺤﻤﻞ ﻣﺎﺍﺗﺤﻤﻞ ﺍﻣﻮﺕ ..
ﺗﺼﺤﻲ ﺑﻴﻪ ﻭﺗﺒﺠﻲ ﻭﺩﻣﻮﻋﻬﺎ ﺑﻠﻠﻦ ﻭﺟﻬﻲ .. ﻭﻋﻴﺖ ﻋﻠﻰ ﺭﻭﺣﻲ ﻭﺍﻟﻤﻐﺬﻱ ﺑﻴﺪﻱ .. ﻭﻋﻤﺘﻲ ﻣﻨﺼﻴﺔ ﺭﺍﺳﻬﺎ ﻋﻠﻰ ﺭﺟﻠﻴﻬﺎ ﻭﺗﻮﻥ ..
- ﻋﻤﺔ ﺍﺑﻮﻱ ﻭﻳﻦ ﺍﺭﻳﺪ ﺍﺷﻮﻓﺔ .. ﺭﻓﻌﺖ ﺭﺍﺳﻬﺎ ﻭﺑﺠﺖ .. ﺍﺑﻮﺝ ﺍﺧﺬﻭﻩ ﻟﻠﻄﺐ ﺍﻟﻌﺪﻟﻲ .. ﻭﺟﺪﺝ ﻭﻋﻤﺎﻣﺞ ﺧﺎﺑﺮﺗﻬﻢ ﻣﻦ ﺍﻟﺒﺪﺍﻟﺔ ﺍﺟﻮ ﺑﺎﻟﻄﺮﻳﻖ ..
ﺑﻴﺖ ﺟﺪﻱ ﻣﺎﻋﻨﺪﻫﻢ ﺍﺭﺿﻲ ﺑﺲ ﺟﻴﺮﺍﻧﺔ ﺍﻡ ﻫﻴﺜﻢ ﺭﺟﻠﻬﺎ ﺻﺪﻳﻖ ﺟﺪﻱ ﻧﺨﺎﺑﺮ ﻣﺮﺍﺕ ﻣﻨﻬﻢ ﺍﻟﻌﻤﺘﻲ ﺣﻤﺪﻳﺔ ﻟﻮ ﻫﻲ ﺗﺨﺎﺑﺮﻧﺎ ..
ﺳﻤﻌﺖ ﺻﻮﺕ ﺟﺪﻱ ﻭﻫﻲ ﻳﺼﻴﺢ ﻣﺤﻤﺪ ﻣﺤﻤﺪ ﺑﻮﻳﺔ ﻭﻳﻨﻚ ﺍﺟﺎﻙ ﺍﺑﻮﻙ ﻳﺒﻌﺪ ﺍﺑﻮﻱ ﺍﻧﺖ ..
ﺭﻛﻀﺖ ﻋﻤﺘﻲ ﺍﻟﺔ ﻭﺗﺎﻟﻲ ﻣﺎﮔﺎﻳﻠﺘﻠﺔ ﺍﺑﻮﻱ ﺗﻮﻓﻰ .. ﺧﺎﻓﺖ ﻋﻠﻴﻪ ..
ﺣﻀﻨﺘﻪ ﻭﻫﻲ ﺗﺒﺠﻲ ﺭﺍﺡ ﺑﻮﻳﺔ ﺭﺍﺡ ﻣﺤﻤﺪ ﻋﺎﻓﻨﺎ ﻭﺭﺍﺡ ..
ﻫﻮ ﻣﻦ ﻳﻮﻡ ﺍﻟﺮﺍﺣﺖ ﻣﺎﻫﻴﻦ ﺭﺍﺡ ﮔﻠﺒﺔ ﻭﻳﺎﻫﺎ ﻭﻫﺴﺎ ﺭﻭﺣﺔ ﻫﻢ ﺭﺍﺣﺖ ..
ﻭﮔﻊ ﺟﺪﻱ ﺑﺎﻟﮕﺎﻉ ﻭﻋﻤﺎﻣﻲ ﺩﺍﻳﺮ ﻣﺪﺍﻳﺮﺓ ﻳﺒﺠﻮﻥ .. ﺷﻮﻳﺔ ﻭﺍﻟﻤﺴﺘﺸﻔﻰ ﺍﻧﮕﻠﺒﺖ ﺑﺄﻫﻠﻨﺎ ﻭﮔﺮﺍﻳﺒﻨﺎ ..
ﺍﻧﻲ ﺍﺣﺲ ﺭﻭﺣﻲ ﺍﻧﺸﻠﻴﺖ ﺑﺲ ﺩﻣﻮﻋﻲ ﺗﺠﺮﻱ .. ﻣﺎﺍﻋﺮﻑ ﺍﺑﻮﻱ ﻟﻴﺶ ﻣﺎﺕ .. ﺑﺲ ﺍﻟﻲ ﺣﺴﻴﺘﺔ ﻭ ﻋﺮﻓﺘﺔ ﻣﻦ ﻧﻈﺮﺍﺕ ﻋﻤﺘﻲ ﺍﻧﻲ ﺍﻟﺴﺒﺐ ﺍﻱ ﺍﻧﻲ ..
ﺍﺟﺖ ﻋﻤﺘﻲ ﮔﻮﻣﺘﻨﻲ .. ﺟﺪﺝ ﻳﮕﻮﻝ ﺍﻣﺸﻦ ﻟﻠﺒﻴﺖ ﻭﺍﻧﺘﻲ ﺍﻟﺪﻛﺘﻮﺭ ﻛﺘﺒﻠﺞ ﻋﻼﺝ .. ﺷﻜﻞ ﻋﻨﺪﺝ ﺳﻜﺮ ﻻﺯﻡ ﺗﺪﻳﺮﻳﻦ ﺑﺎﻟﺞ ﻋﻠﻰ ﺭﻭﺣﺞ .. ﻭﻣﺎﺍﺭﻳﺪ ﺍﻟﻲ ﺻﺎﺭ ﻭﺍﺣﺪ ﻳﺪﺭﻱ ﺑﻲ ﺍﻟﻰ ﺍﻥ ﺗﺨﻠﺺ ﺍﻟﻔﺎﺗﺤﺔ ﻭﻧﺸﻮﻑ ﺷﻴﺼﻴﺮ ..
- ﻋﻤﺔ ﺷﻨﻲ ﻓﺎﺗﺤﺔ ﻳﻌﻨﻲ ﺑﻌﺪ ﻣﺎﺍﺷﻮﻑ ﺍﺑﻮﻱ ﺧﻠﺺ ﻣﺎﺕ .. ﻫﺰﺕ ﺭﺍﺳﻬﺎ ﻭﻣﺴﺤﺖ ﺧﺸﻤﻬﺎ ﻭﺩﻣﻮﻋﻬﺎ ﺑﻌﺒﺎﺗﻬﺎ ﻭﻫﻲ ﺗﺸﻬﮓ ﻣﻦ ﺍﻟﺒﺠﻲ ..
ﻫﻨﺎ ﻳﻠﺔ ﻭﻋﻴﺖ ﻋﻠﻰ ﺣﺎﻟﻲ .. ﺗﺨﺒﻠﺖ ﻭﮔﻤﺖ ﺍﻟﻄﻢ ﻭﺍﺑﺠﻲ ﻣﻠﺨﺖ ﺭﻭﺣﻲ ﺗﻤﻠﺦ ﻭﻫﻲ ﺣﺎﺿﻨﺘﻨﻲ ﻭﺗﻬﺪﻱ ﺑﻴﻪ ..
ﺍﺟﺔ ﺟﺪﻱ ﻭﻣﻬﺪﻱ ﻭﻳﺎﻩ .. ﺣﻀﻨﻲ ﻭﺑﺎﺱ ﺭﺍﺳﻲ ..
- ﺍﻭﻭﻭﻑ ﻳﺒﻨﺖ ﺍﻟﻐﺎﻟﻲ ﺗﻴﺘﻤﺘﻲ ﻭﺍﻧﺘﻲ ﺻﻐﻴﺮﺓ .. ﻻﺗﺒﺠﻴﻦ ﻳﺒﻌﺪ ﺟﺪﺝ ﺍﻧﻲ ﺍﺑﻮﺝ ﻭﻛﻞ ﻫﻠﺞ .. ﺭﻭﺣﻲ ﻭﻱ ﻋﻤﺘﺞ ﻟﻠﺒﻴﺖ ﻳﺎﺧﺬﻛﻢ ﻣﻬﺪﻱ ﺍﺭﻳﺪﺝ ﺳﺒﺎﻋﻴﺔ ﻻﺗﺨﻠﻴﻦ ﺍﺑﻮﺝ ﻳﺘﻌﺬﺏ ﻭﺗﺒﻘﻰ ﻋﻴﻨﺞ ﻋﻠﻴﻪ ..
ﺭﺩﺕ ﻋﻤﺘﻲ .. ﺍﻱ ﺑﻮﻳﺔ ﺍﺣﺠﻲ ﻭﻳﺎﻫﺎ .. ﻣﻦ ﺍﻟﻬﺒﻄﺔ ﺷﻜﻞ ﻋﻨﺪﻫﺎ ﺳﻜﺮ ﻭﺍﻟﺪﻛﺘﻮﺭ ﻳﮕﻮﻝ ﻣﻮ ﺯﻳﻦ ﻭﻫﻲ ﺑﻬﻴﺞ ﻋﻤﺮ ..
ﻟﻄﻢ ﻋﻠﻰ ﺭﺍﺳﻪ ﺟﺪﻱ .. ﺍﻧﺎ ﺍﺑﻮﻙ ﻳﻤﺤﻤﺪ .. ﻣﻨﻴﻦ ﻟﻮ ﻣﻨﻴﻦ ﺍﻟﮕﺎﻫﺎ ﻳﺎﺍﻟﻬﻲ ﺍﻟﻚ ﺑﻴﻬﺎ ﺍﺭﺍﺩﺓ ﻳﺎﺭﺑﻲ ﺍﻟﻌﺎﻟﻤﻴﻦ .. ﻓﻮﮒ ﻛﺴﺮﺓ ﺧﺎﻃﺮﻫﺎ ﻭﺍﺑﻮﻫﺎ ﺭﺍﺡ .. ﺩﻭﺭ ﻳﺼﻴﺮ ﺑﻴﻬﺎ ﺳﻜﺮ ..
ﺟﻦ ﻣﻜﺘﻮﺏ ﻋﻠﻴﻪ ﺍﻻﺧﺘﺒﺎﺭ ﺑﻮﺍﺣﺪ ﻭﺭﻯ ﺍﻟﺜﺎﻧﻲ .. ﻣﻮ ﻭﺟﻌﺔ ﺣﺴﻦ ﻟﺴﺎ ﺑﻴﻪ .. ﮔﺎﻡ ﻳﻨﺤﺐ ﻭﻳﺒﺠﻲ ﻭﻣﻬﺪﻱ ﺍﺧﺬﺓ ﻭﻭﺻﻰ ﻋﻤﺘﻲ ﻧﺠﻬﺰ ﺍﺭﻭﺍﺣﻨﺎ ..
ﮔﻮﻣﺘﻨﻲ ﻋﻤﺘﻲ ﻭﺳﻨﺪﺗﻨﻲ ﺭﻏﻢ ﺭﻭﺣﻲ ﺭﺍﻳﺤﺔ ﻭﻣﺎﺍﮔﺪﺭ ﺍﻣﺸﻲ .. ﺍﺳﻤﻊ ﺻﻮﺕ ﺟﺪﻱ ﻭﻫﻮ ﻳﻮﺻﻲ ﺑﻤﻬﺪﻱ ﻋﻠﻴﻪ ..
- ﺍﺧﺬ ﺑﻨﺖ ﻋﻤﻚ ﻭﻋﻤﺘﻚ .. ﻭﻭﺻﻴﻬﻢ ﻫﻨﺎﻙ ﻳﺨﻠﻮﻥ ﺑﺎﻟﻬﻢ ﻋﻠﻴﻬﺎ ﺑﻴﻦ ﻣﺎﻧﺮﺟﻊ ﻣﻦ ﺍﻟﺪﻓﻦ ..
ﻭﺍﻧﺖ ﻣﺎﺍﻭﺻﻴﻚ ﻳﺒﻮﻱ ﺭﺗﺐ ﺍﻣﻮﺭﻙ ..
ﻃﻠﻌﻨﺎ ﺍﻟﺒﻴﺘﻨﺎ ﻭﺍﻧﻲ ﻧﺎﻳﻤﺔ ﺑﺤﻀﻦ ﻋﻤﺘﻲ ﺍﻟﻲ ﻣﺎﺑﻄﻠﺖ ﺑﺠﻲ
ﺍﺗﺬﻛﺮ ﺑﺎﺧﺮ ﺍﻳﺎﻡ ﺷﻠﻮﻥ ﺭﺟﻊ ﻳﺪﺍﺭﻳﻨﻲ ﻭﻳﻨﺎﻡ ﻳﻤﻲ ﺑﺎﻟﻐﺮﻓﺔ
ﺭﻓﻌﺖ ﺭﺍﺳﻲ ﺍﻟﻌﻤﺘﻲ .. ﻋﻤﺔ ﺑﺴﺒﺒﻲ ﻣﺎﺕ ﻣﻮﻭﻭﻭ ..
ﺧﻠﺖ ﺍﺩﻳﻬﺎ ﻋﻠﻰ ﺣﻠﮕﻲ ﺑﺴﺮﻋﺔ ﻭﺳﻜﺘﺘﻨﻲ ..
ﻭﻣﻬﺪﻱ ﻋﻴﻮﻧﺔ ﻣﻦ ﺍﻟﺠﺎﻣﺔ .. ﺳﻤﻌﻨﺎ ﻻ ﻣﺎﺍﺩﺭﻱ ..
ﻭﺻﻠﻨﺎ ﻟﻬﻨﺎﻙ ﻭﺍﺷﻮﻑ ﺍﻟﻨﺴﻮﺍﻥ ﺩﺍﺧﻠﺔ ﻭﻃﺎﻟﻌﻪ ﻣﻦ ﺍﻟﺒﻴﺖ .
ﻣﺎﺻﺎﺭﻟﻨﺎ ﻫﻮﺍﻱ ﻣﻦ ﻧﺼﺒﻨﺎ ﻓﺎﺗﺤﺔ ﺣﺴﻦ ..
ﺩﺧﻠﺖ ﻭﻛﻠﻬﻦ ﺗﻠﮕﻨﻲ ﻳﺒﺠﻦ ﺣﺘﻰ ﻭﺩﺍﺩ ﻭﺳﺪﺍﺩ ﺣﻀﻨﻨﻲ ﻳﺒﺠﻦ .. ﻻﻥ ﺍﺑﻮﻳﺔ ﺟﺎﻥ ﺣﻨﻴﻦ ﻭﻳﺤﺒﻬﻦ ﻭﺷﻴﺠﻴﺒﻠﻲ ﻳﺠﻴﺒﻠﻬﻦ ﻣﺎﻓﺮﻕ ﺑﻴﻨﺎ ..
ﺍﻟﻨﺴﻮﺍﻥ ﻛﻠﻬﺎ ﮔﺎﺑﻠﺖ ﻋﻤﺘﻲ ﺣﻤﺪﻳﺔ ﻭﻳﻠﻄﻤﻦ .. ﻭﺍﻧﻲ ﺑﻌﺎﻟﻢ ﺛﺎﻧﻲ .. ﺍﺧﺬﺗﻨﻲ ﺭﺟﻠﻲ ﺍﻟﻐﺮﻓﺔ ﺍﻫﻠﻲ ..
ﺩﺧﻠﺖ ﻭﺟﻦ ﺍﺷﻢ ﺑﻴﻬﺎ ﺭﻳﺤﺔ ﺍﺑﻮﻱ .. ﺻﺎﺭﺕ ﻋﻴﻨﻲ ﻉ ﺍﻟﻨﻔﺎﻇﺔ .. ﺷﮕﺪ ﻳﺸﺮﺏ ﺟﮕﺎﻳﺮ ﺑﺎﺧﺮ ﻓﺘﺮﺓ ﻭﻳﺨﺎﻑ ﻣﻦ ﺟﺪﻱ ﻻﻳﺸﻮﻓﺔ .. ﻳﺸﺮﺏ ﺑﺎﻟﺒﻮﮔﺎﺕ ..
ﺻﻌﺪﺕ ﻟﻠﺠﺮﺑﺎﻳﺔ ﺗﻐﻄﻴﺖ ﻭﻧﻤﺖ ﺑﻤﻜﺎﻧﺔ .. ﻣﺎﺍﻋﺮﻑ ﻣﻦ ﺍﻟﻌﻼﺝ ﻣﺎﻝ ﺍﻟﻤﺴﺘﺸﻔﻰ ﺍﻭ ﻣﺎﺍﻋﺮﻑ ﺷﺒﻴﻪ ﺑﺲ ﺧﻠﻴﺖ ﺭﺍﺳﻲ ﻧﻤﺖ .. ﺣﻠﻤﺖ ﺑﺄﺑﻮﻱ ﻭﺟﺪﻱ ﺣﻜﻤﺔ ﻳﺼﻴﺮ ﺍﺑﻮ ﺟﺪﻱ ﺧﻀﻴﺮ ﻭﺍﮔﻔﻴﻦ ﺳﻮﺓ .. ﺍﺑﻮﻱ ﺿﺎﻳﺞ ﻭﻻﺑﺲ ﺩﺷﺪﺍﺷﺔ ﺑﻴﻀﺔ .. ﻭﺟﺪﻭ ﺣﻜﻤﺖ ﺗﻘﺮﺏ ﻭﻭﺟﻪ ﻳﺒﺘﺴﻢ ﺧﻠﻪ ﻃﻔﻞ ﺑﺤﻈﻨﻲ ﻭﻣﺴﺢ ﻋﻠﻰ ﺭﺍﺳﻲ ﻭﺭﺍﺣﻮﺍ ..
ﻭﺍﻧﻲ ﺧﻠﻴﺖ ﺍﻟﻄﻔﻞ ﺑﺎﻟﮕﺎﻉ ﻭﺍﺭﻛﺾ ﻭﺭﻯ ﺍﺑﻮﻱ ﺑﺲ ﺳﺤﺒﻨﻲ ﺟﺪﻭ ﺧﻀﻴﺮ ﻭﺭﺟﻌﻨﻲ ﻟﻠﻄﻔﻞ ﺍﻟﻲ ﻋﻔﺘﺔ ﺑﺎﻟﮕﺎﻉ ..
ﻓﺰﻳﺖ ﻣﺮﻋﻮﺑﺔ ﻭﺍﺑﺠﻲ .. ﮔﻤﺖ ﺍﺻﺮﺥ ﻭﺍﺻﻴﺢ ﺑﻮﻳﺔ ﻭﻳﻨﻚ ﺗﻌﺎﺍﺍﻝ ﻻﺗﻌﻮﻓﻨﻲ .. ﺑﻮﻳﺔ ﻻﺗﺨﻠﻴﻨﻲ ﻭﺣﺪﻱ ..
ﺩﺧﻠﺖ ﻋﻤﺘﻲ ﺣﻤﺪﻳﺔ ﺗﻤﺴﺢ ﻋﻠﻰ ﺭﺍﺳﻲ ﻭﺗﻘﺮﺃ ﺍﻳﺎﺕ ..
ﺟﺎﻧﺖ ﻣﺎﺗﻌﺎﻳﻦ ﺑﻮﺟﻬﻲ ﺩﺍﻳﺮﺓ ﻭﺟﻬﺔ ﻭﺗﻘﺮﺃ ﺍﻳﺎﺕ ..
ﺳﻮﻟﻔﺘﻠﻬﺎ ﺍﻟﺤﻠﻢ ﻭﺍﻧﻲ ﺍﺑﺠﻲ ..
ﺍﺧﺬﺕ ﻧﻔﺲ ﻃﻮﻳﻞ .. ﻛﻠﺸﻲ ﻣﻔﺴﺮ ﻭﻭﺍﺿﺢ .. ﺍﻟﻄﻔﻞ ﺍﻟﻲ ﺑﺒﻄﻨﺞ ﻭﻟﺪ ﺍﻟﻈﺎﻫﺮ ﺭﺍﺡ ﺗﺸﻮﻓﻴﻦ ﺍﻟﺒﻼﻭﻱ ﺑﺲ ﻻﺗﺨﺎﻓﻴﻦ ﺍﺑﻮﻱ ﻳﺮﺟﻌﺞ ﻭﻳﺴﻨﺪﺝ ﺍﻧﺘﻲ ﻭﺍﺑﻨﺞ ..
ﺭﻓﻌﺖ ﺭﺍﺳﻲ ﺍﻟﻬﺎ .. ﻋﻤﺔ ﻃﻔﻞ ﺷﻨﻮ ﺍﻧﻲ ﻣﺎﺍﺭﻳﺪﺓ ﺍﺭﻳﺪ ﺍﺭﻭﺡ ﺍﻻﺑﻮﻱ .. ﻋﻠﻴﺖ ﺻﻮﺗﻲ ﻭﻟﺰﻣﺖ ﺣﻠﮕﻲ ..
ﺣﺴﺞ ﻭﻟﺞ .. ﻋﺪﻱ ﺫﻧﻲ ﺍﻻﻳﺎﻡ ﻋﻠﻰ ﺧﻴﺮ ﻭﺍﺳﺘﺮﻱ ﻋﻠﻴﻨﺎ .
ﻭﺍﻟﻠﻪ ﻟﻮ ﺩﺭﺕ ﻟﻤﻴﻌﺔ ﺗﺨﻠﻴﻨﺎ ﻋﻠﺞ ﺑﺤﻠﮓ ﺍﻟﻌﺎﻟﻢ ..
- ﺑﺲ ﻋﻤﺔ ﻣﺎﺍﺭﻳﺪ ﻫﺬﺍ ﺍﻟﻄﻔﻞ ﺍﺧﺬﻱ ﻣﺎﺍﺭﻳﺪﺓ ..
- ﻭﻟﺞ ﺷﺒﻴﺪﻱ ﻋﻠﻴﺞ .. ﻣﺎﺍﻋﺮﻑ ﺷﺄﺣﺠﻲ ﺻﺎﺭ ﺷﮕﺪ ﺑﺤﺴﺮﺓ ﺍﻟﻄﻔﻞ .. ﻭﻫﺴﺎ ﺍﻧﺘﻲ ﺗﺒﺠﻴﻦ ﻣﺎﺗﺮﺩﻱ ﻭﻧﺤﺎﻭﻝ ﻧﺴﺘﺮ ﺍﻟﺴﺎﻟﻔﺔ .
ﺑﻌﺪﻫﺎ ﮔﺎﻣﺖ ﺗﺴﺘﻐﻔﺮ .. ﮔﻮﻣﻲ ﺍﻟﺒﺴﻲ ﺩﺷﺪﺍﺷﺔ ﻋﺮﻳﻀﺔ ﻭﻟﻮ ﺑﻄﻨﺞ ﺻﻐﻴﺮﺓ ﺑﺲ ﺍﻟﻨﺴﻮﺍﻥ ﻋﻴﻮﻧﻬﻦ ﺩﺍﻫﻴﺔ ﻳﻠﻔﮕﻦ ﺍﻟﻔﻀﺎﻳﺢ ﻟﮕﻒ ..
ﻃﻮﻝ ﻓﺘﺮﺓ ﺍﻟﻔﺎﺗﺤﺔ ﻛﻞ ﺷﻮﻳﺔ ﺍﺗﺨﺮﺑﻂ ﻭﺍﻭﮔﻊ ﻭﻋﻤﺘﻲ ﺣﺎﻳﺮﺓ ﺑﻴﻪ .. ﺗﺎﻟﻲ ﻭﺻﺘﻨﻲ ﻣﺎﺍﻃﻠﻊ ﻣﻦ ﺍﻟﻐﺮﻓﺔ ﺍﺑﺪ ﺑﻴﻦ ﻣﺎﺗﺎﺧﺬﻧﻲ ﺑﺄﻗﺮﺏ ﻭﻛﺖ ﻟﻠﺪﻛﺘﻮﺭﺓ ﻭﺗﺸﻮﻓﻠﻲ ﺟﺎﺭﺓ ..
ﻛﻞ ﺗﻔﻜﻴﺮﻱ ﻳﻢ ﺍﺑﻮﻱ ﻟﻮ ﺍﻣﻲ ﺍﺫﺍ ﺩﺭﺕ ﺷﺮﺍﺡ ﺗﺴﻮﻱ ﻫﻢ ﺗﺒﺠﻲ ﻋﻠﻴﻪ ﻟﻮ ﺗﻠﻮﻡ ﺣﺎﻟﻬﺎ ﻭﺗﺘﻨﺪﻡ .. ﺟﺪﻱ ﻣﺎﻋﺎﻓﻨﻲ ﺍﺑﺪ ﻛﻞ ﻳﻮﻡ ﻳﺠﻲ ﻳﺨﻠﻲ ﻗﺮﺁﻧﻪ ﻭﻳﻘﺮﺃ ﻓﻮﮒ ﺭﺍﺳﻲ ..
ﻋﻤﺘﻲ ﺑﺜﻴﻨﺔ ﻋﺒﺎﻟﻬﺎ ﻓﺎﺗﺤﺔ ﺣﺴﻦ ﻭﺗﺨﺒﻠﺖ ﺍﻛﺜﺮ ﺍﻟﻰ ﺍﻥ ﺍﺧﺬﻫﺎ ﻋﻤﻲ ﺍﻻﻫﻠﻬﺎ ﺑﻴﻦ ﻣﺎﺗﺨﻠﺺ ﺍﻟﻔﺎﺗﺤﺔ ..
ﺑﺪﻳﺖ ﺍﺣﺲ ﺑﺸﻲ ﺩﺍﺧﻠﻲ ﻳﻨﺒﺾ .. ﻫﻨﺎ ﺗﻐﻴﺮﺕ ﻧﻀﺮﺗﻲ ﻟﻠﺤﻴﺎﺓ .. ﻣﺎﺍﻧﻜﺮ ﺧﻔﺖ ﻭﺍﺗﻤﻨﻴﺖ ﻫﺬﺍ ﺍﻟﺸﻲ ﺍﻟﻲ ﺑﺪﺍﺧﻠﻲ ﻳﺨﺘﻔﻲ .. ﻣﻦ ﻳﻨﺒﺾ ﺍﺧﺎﻑ ﻭﺍﺑﺠﻲ .. ﻭﺧﺎﺻﺔ ﻣﻦ ﺍﺷﻮﻑ ﻋﻤﺘﻲ ﺣﺎﻳﺮﺓ .. ﺳﺎﻋﺔ ﺗﮕﻮﻝ ﻟﻮ ﻣﺎﻓﺎﺭﺱ ﺑﺎﻟﺠﻴﺶ ﺟﺎﻥ ﮔﻠﺖ ﺣﺎﻣﻞ ﻭﺍﺧﺬﺝ ﻳﻤﻲ ﻭﻣﻦ ﺗﺠﻴﺒﻴﻦ ﺍﺧﺬﻩ ﺍﺭﺑﻲ ﺍﻧﻲ
ﻭﺳﺎﻋﺔ ﺗﮕﻮﻝ ﻻ .. ﺧﺎﻑ ﺗﺠﻴﺞ ﺧﻄﺎﺑﺔ ﻭﺗﻨﻜﺸﻔﻴﻦ ﻭﻋﺒﺎﻟﻬﻢ ﺍﻧﺘﻲ ﻣﻮ ﺷﺮﻳﻔﺔ .. ﻻﺯﻡ ﺍﺑﻮﻱ ﻳﻌﺮﻑ ﻭﺑﻌﺪﻳﻦ ﺍﻧﺘﻲ ﺣﺴﻦ ﺭﺟﻠﺞ ﻭﻋﺎﻗﺪ ﻋﻠﻴﺞ ﻭﺍﻟﻄﻔﻞ ﺍﺑﻦ ﺣﻼﻝ ﺑﻌﺪ ﻟﻴﺶ ﺧﺎﻳﻔﻴﻦ ﺍﻱ ﻟﻴﺶ ﻧﺨﺎﻑ ..
ﺗﻮﺻﻞ ﻟﻠﺒﺎﺏ ﻭﺗﺮﺟﻊ ..
ﻛﻞ ﻳﻮﻡ ﻧﻔﺲ ﺍﻟﺤﺠﻲ ﺗﺤﺠﻴﻪ ﻭﺗﺎﻟﻲ ﺗﺘﺮﺍﺟﻊ .. ﺣﺘﻰ ﺣﺰﻧﻬﺎ ﻋﻠﻰ ﺍﺑﻮﻱ ﻧﺴﺘﺔ ﺑﺴﺒﺐ ﺗﻔﻜﻴﺮﻫﺎ ﺑﻴﻪ ..
ﺟﺎﻧﺖ ﺳﺎﻋﺔ ﺗﻠﻮﻡ ﺑﻴﻪ ﻭﺳﺎﻋﺔ ﺗﺤﻀﻨﻲ ﻭﺗﺒﺠﻲ ﻟﻮ ﺗﻠﻮﻡ ﺍﻣﻲ ﺍﻟﻌﺎﻓﺘﻨﻲ ﻭﻣﺮﺍﺕ ﺗﻠﻮﻡ ﺣﺎﻟﻬﺎ ﻻﻥ ﻣﺎﻭﻋﺘﻨﻲ ﻭﺳﻮﻟﻔﺖ ﻭﻳﺎﻱ ..
ﺧﻠﺖ ﺍﻳﺪﻫﺎ ﻋﻠﻰ ﺧﺪﻫﺎ .. ﺍﻭﻭﻭﻑ ﻳﺎﺣﺴﻦ ﻟﻮ ﻋﺎﻳﺶ ﺟﺎﻥ ﻋﻠﻤﺘﻚ ﺷﻠﻮﻥ .. ﻭﻟﻮ ﺳﻮﺩﺓ ﻋﻠﻴﻪ ﺷﺒﻴﺪﺓ ﺟﺎﻥ ﻳﺨﺎﺑﺮﻧﻲ ﻭﻳﺘﻮﺳﻞ ﺑﻴﻪ ﺍﻗﻨﻊ ﺟﺪﺓ ﺣﺘﻰ ﺗﺘﺰﻭﺟﻮﻥ ﺑﺲ ﺍﻧﻲ ﺟﻨﺖ ﺍﺣﺠﻲ ﻋﻠﻴﻪ ﻭﻣﺎﺍﻗﺒﻞ ﺍﮔﻠﻪ ﺍﻟﺒﻨﻴﺔ ﺑﻌﺪﻫﻲ ﺻﻐﻴﺮﺓ ﺧﻠﺺ ﻋﺴﻜﺮﻳﺘﻚ ﻳﻠﺔ .. ﺍﻭﻭﻭﻭﻑ ﻟﻮ ﺍﻟﺰﻣﻦ ﻳﺮﺟﻊ ..
ﻣﺮﺕ ﻋﺸﺮ ﺍﻳﺎﻡ ﻋﻠﻰ ﻭﻓﺎﺓ ﺍﺑﻮﻱ .. ﻭﻋﻤﺘﻲ ﻣﺎﻓﺎﺭﮔﺘﻨﻲ ﻭﻻﺩﻗﻴﻘﺔ .. ﻭﻛﻠﻤﺎ ﺗﺤﺠﻲ ﻋﻤﺘﻲ ﻟﻤﻴﻌﺔ ﻭﺗﺮﻳﺪ ﺗﺸﻐﻠﻨﻲ ﻣﺎﺗﻘﺒﻞ ﺣﺠﺘﻬﺎ ﻋﻨﺪﻱ ﺳﻜﺮ ﻭﺧﺎﻑ ﺍﻭﮔﻊ ..
ﺻﺎﺭﺕ ﻭﻫﻮﺍﺳﻴﺔ ﻭﻛﻞ ﺿﻨﻬﺎ ﺍﻃﻠﻊ ﻭﺗﺸﻮﻑ ﺑﻄﻨﻲ ﻭﺗﺤﺲ ﺑﻴﻪ ..
- ﺍﻱ ﻟﻤﻴﻌﺔ ﺷﻴﻄﺎﻧﺔ ﻭﺭﺑﻲ ﺗﻠﮕﻔﻬﺎ ﺑﺴﺮﻋﺔ ﻭﺗﺎﻟﻲ ﺷﻤﺪﺭﻳﻬﻢ ﺍﻧﺘﻲ ﺣﺎﻣﻞ ﻣﻦ ﺣﺴﻦ ﺗﻔﻀﺤﺞ ﻓﻀﻴﺤﺔ ﻭﻳﻤﻜﻦ ﺗﺤﺮﺽ ﻋﻠﻰ ﻛﺘﻠﺞ ﻫﻢ ..
ﺍﻧﻲ ﺑﺲ ﺳﺎﻛﺘﺔ ﻣﺎﺍﻋﺮﻑ ﺷﺄﺣﺲ .. ﺍﻭ ﻳﻤﻜﻦ ﺍﻧﻌﺪﻡ ﺍﻻﺣﺴﺎﺱ ﻋﻨﺪﻱ .. ﻣﻦ ﺗﮕﻮﻝ ﺗﻤﻮﺗﻴﻦ ﻟﻮ ﻳﻜﺘﻠﻮﺝ ﻣﺎﺍﺧﺎﻑ ﺍﺭﻳﺪ ﺍﺭﻭﺡ ﻳﻢ ﺍﺑﻮﻱ ﺍﺷﺘﺎﻗﻴﺘﻠﺔ ..
ﺑﺲ ﺗﻜﺴﺮ ﺧﺎﻃﺮﻱ ﻋﻤﺘﻲ ﻣﻦ ﺍﺷﻮﻓﻬﺎ ﺷﺎﻳﻠﺔ ﻫﻤﻲ . ﻣﺎﺍﻋﺮﻑ ﺍﻟﻮﻡ ﺭﻭﺣﻲ ﻟﻮ ﺍﻟﻮﻡ ﺣﺴﻦ ﻟﻮ ﺍﻟﻤﻦ ﻣﺎﺍﻋﺮﻑ
ﺑﻴﻮﻡ ﻋﻤﺘﻲ ﺭﺟﻌﺖ ﺍﻟﺒﻴﺘﻬﺎ ﻻﻥ ﻣﻦ ﻳﻮﻡ ﺍﻟﻲ ﺩﺯ ﻋﻠﻴﻬﺎ ﺍﺑﻮﻱ ﺍﺟﺖ ﺑﻼ ﻣﻼﺑﺲ ﻭﻏﺮﺍﺿﻬﺎ ﻫﻨﺎﻙ .. ﮔﺎﻟﺘﻠﻲ ﻣﺎﺍﺗﺄﺧﺮ ﺑﺲ ﺍﺟﻴﺐ ﻏﺮﺍﺿﻲ ﻭﻣﻼﺑﺲ .. ﻣﻠﻴﺖ ﻣﻦ ﻣﻼﺑﺴﻲ ﻫﻦ ﺩﺷﺪﺍﺷﺘﻴﻦ ﺍﻏﺴﻠﻬﻦ ﻭﺍﻟﺒﺴﻬﻦ .. ﻭﺻﺘﻨﻲ ﻣﺎﺍﻃﻠﻊ ﺍﺑﺪ ﺍﻟﻰ ﺍﻥ ﺍﺟﻲ ﻭﺍﺫﺍ ﺣﺠﺖ ﻟﻤﻴﻌﺔ ﺳﻮﻱ ﺭﻭﺣﺞ ﻧﺎﻳﻤﺔ ﻭﺍﻧﻲ ﮔﻠﺘﻠﻬﺎ ﺍﻧﺘﻲ ﻣﺘﺨﺮﺑﻄﺔ ﻭﻧﺎﻳﻤﺔ ..
ﻟﻠﻈﻬﺮ ﻭﻋﻤﺘﻲ ﻣﺎﺍﺟﺖ ﻭﺍﻧﻲ ﻣﺎﺋﻴﺘﻲ ﺧﻔﻴﻔﺔ ﻣﺎﺍﻋﺮﻑ ﻟﻴﺶ ﻻﺯﻡ ﻛﻞ ﺳﺎﻋﺔ ﺍﺭﻭﺡ ﻟﻠﺤﻤﺎﻡ .. ﻣﺘﺖ ﻭﺑﻌﺪ ﻣﺎﺍﺗﺤﻤﻞ ﻃﻠﻌﺖ ﺑﻮﺟﻬﻲ ﻟﻠﺤﻤﺎﻡ .. ﻛﻤﻠﺖ ﺻﺎﺭﺕ ﺑﻮﺟﻬﻲ ﻋﻤﺘﻲ ﻟﻤﻴﻌﺔ ..
- ﻭﺍﺧﻴﺮﺍ ﻃﻠﻌﺘﻲ ﻣﻦ ﮔﺒﺮﺝ .. ﻣﻮ ﻛﺎﻓﻲ ﺩﻻﻝ ﺻﺎﺭﻟﺞ ﺷﮕﺪ ﻣﻨﻄﻤﺮﺓ ﺑﻐﺮﻓﺘﺞ .. ﻳﻠﺔ ﺗﻌﺎﻱ ﺳﺎﻋﺪﻳﻨﺎ ﺟﺪﺝ ﺭﺍﺡ ﻳﺠﻲ ﻭﻋﻤﺎﻣﺞ ﻳﺘﻐﺪﻭﻥ ..
ﻣﺎﺣﺠﻴﺖ ﻭﺧﻔﺖ ﺗﺼﻴﺮ ﻣﺸﻜﻠﺔ ﮔﻤﺖ ﻭﻳﺎﻫﻦ .. ﺍﮔﻠﺞ ﺍﺑﻮﺝ ﺷﻠﻮﻥ ﻣﺎﺕ ..
ﻫﺎﺍﺍﺍ ﺻﻔﻨﺖ ﺑﻮﺟﻬﻬﺎ ..
ﺷﺒﻴﺞ ﺻﻔﻨﺘﻲ ﺍﺑﻮﺝ ﻣﻮ ﻃﻠﻊ ﻣﻨﺎ ﻛﻠﺸﻲ ﻣﺎﺑﻲ ﻟﻴﺶ ﺻﺎﺭﺕ ﺑﻲ ﺳﻜﺘﺔ .
ﺑﺎﻟﮕﻮﺓ ﻭﺍﮔﻔﺔ ﻋﻠﻰ ﺭﺟﻠﻲ ﻭﺩﻭﺭ ﻫﻲ ﺳﺄﻟﺘﻨﻲ ﺑﻌﺪ ﻣﺎﻋﺮﻓﺖ ﺷﺄﺣﺠﻲ ..
ﻣﻨﺎ ﻭﺩﺍﺩ ﻭﺳﺪﺍﺩ ﻳﻨﻈﻔﻦ ﺍﻟﺨﻀﺮﺓ ﻭﻋﻴﻨﻬﻦ ﻋﻠﻴﻪ .. ﺯﺍﺩ ﺧﻮﻓﻲ ﻭﺣﺘﻰ ﺍﻟﻲ ﻣﺎﻳﺤﺲ ﺣﺴﺴﺘﺔ .. ﻟﺰﻣﺖ ﺑﻄﻨﻲ ﻣﻦ ﺍﻟﺨﻮﻑ .. ﻭﺭﺩﺕ ﺍﻃﻠﻊ ﻣﻦ ﺍﻟﻤﻄﺒﺦ ..
ﺻﺎﺭﺕ ﺑﻮﺟﻬﻲ ﺑﺘﻮﻝ .. ﻭﻳﻦ ﺷﺒﻴﺞ ﻭﺟﻬﺞ ﺍﺻﻔﺮ ..
ﺷﻬﮕﺖ ﻋﻤﺘﻲ ﻟﻤﻴﻌﺔ .. ﻟﻴﺶ ﺧﻔﺘﻲ ﻭﻟﺞ ﺑﺲ ﻻﻣﺴﻮﻳﺘﻠﺞ ﻋﻤﻠﺔ ..
ﺍﺭﺗﺒﺎﻛﻲ ﻭﺧﻮﻓﻲ ﻭﺍﺿﺢ ﻭﺯﺍﺩﻫﻦ ﺷﻚ ﻟﻤﺎ ﺑﺠﻴﺖ ﻭﻣﺎﺍﺗﺤﻤﻠﺖ ﻋﻴﻨﻲ ﻉ ﺍﻟﺒﺎﺏ ﻭﺍﺩﻋﻲ ﻋﻤﺘﻲ ﺗﺪﺧﻞ .. ﺟﺮﺗﻨﻲ ﻋﻤﺘﻲ ﻟﻤﻴﻌﺔ ﻣﻦ ﺍﻳﺪﻱ .. ﺗﻌﺎﻱ ﻟﻬﻨﺎ .. ﺷﺒﻴﺞ ﺧﺎﻳﻔﺔ ﺍﺣﺠﻲ ﻻ ﺍﮔﻮﻝ ﺍﻟﺠﺪﺝ ﻭﻋﻤﺎﻣﺞ ﻳﺬﺑﺤﻮﺝ ..
- ﻭﺍﻟﻠﻪ ﻣﺎﻣﺴﻮﻳﺔ ﺷﻲ ﻣﻮ ﺍﻧﻲ ﻣﻮ ﺍﻧﻲ ..
ﺿﺤﻜﺖ ﺑﺘﻮﻝ .. ﻫﻬﻬﻬﻬﻪ ﻫﺎﻱ ﺷﺒﻴﻬﺎ ﺍﻧﺨﻄﻒ ﻟﻮﻧﻬﺎ ﻋﻤﺔ ﺳﺎﻟﻔﺘﻬﺎ ﻣﻮ ﺧﺎﻟﻴﺔ ﺗﻮﻗﻌﺞ ﺻﺤﻴﺢ ﻋﻤﻲ ﻣﺤﻤﺪ ﻣﻮﺗﺔ ﻣﻮ ﻃﺒﻴﻌﻴﺔ ..
ﻭﺩﺍﺩ ﺭﺩﺕ . ﺧﺎﻑ ﻣﺴﻮﻳﺘﻠﻬﺎ ﻋﻤﻠﺔ ﻭﻋﻤﺘﻲ ﺣﻤﺪﻳﺔ ﺗﺴﺘﺮﻟﻬﺎ ..
ﻋﺎﻳﻨﺖ ﻋﻠﻴﻬﺎ .. ﻻ ﻭﺍﻟﻠﻪ ﻻ .. ﺍﺣﺲ ﺭﺟﻠﻲ ﻣﺎﺗﺸﻴﻠﻨﻲ ﻣﻦ ﺍﻟﺨﻮﻑ ﻭﻫﻦ ﻣﺤﺎﻭﻃﺎﺗﻨﻲ ﻣﻦ ﻛﻞ ﺟﻬﺔ ..
ﺳﺤﺒﺘﻨﻲ ﻋﻤﺘﻲ ﻟﻤﻴﻌﺔ .. ﺍﻣﺸﻲ ﻭﻳﺎﻱ ..
- ﻭﻳﻦ
- ﺍﺧﺬﺝ ﻟﻠﺪﺍﻳﺔ ﺗﺸﻮﻓﺞ ..
- ﻣﺎﺍﺭﻭﺡ ﻛﻠﺸﻲ ﻣﺎﺑﻴﻪ ..
ﺿﺤﻜﺖ ﺑﺘﻮﻝ .. ﻭﻟﻴﺶ ﺧﺎﻳﻔﺔ ﺍﺫﺍ ﻣﺎﻣﺴﻮﻳﺔ ﺷﻲ .. ﻋﻴﻨﻬﺎ ﻋﻠﻰ ﺑﻄﻨﻲ .. ﻋﺒﺎﻟﻲ ﻛﺸﻔﺘﻨﻲ ﻟﺰﻣﺖ ﺑﻄﻨﻲ ﻭﺭﺩﺕ ﺍﻏﻄﻴﻬﺎ
ﺟﺎﻥ ﻋﻘﻠﻲ ﻭﺍﮔﻒ ﻭﻣﺎﺍﻋﺮﻑ ﺍﻓﻜﺮ ..
ﻓﺠﺄﺓ ﺍﺧﺘﻔﺖ ﺍﺑﺘﺴﺎﻣﺔ ﺑﺘﻮﻝ ﻭﮔﺎﻟﺖ .. ﺑﺲ ﻻﺣﺎﻣﻞ ﻭﻟﺞ
ﻫﻨﺎ ﺍﺣﺲ ﺍﻟﺪﻧﻴﺎ ﺍﻓﺘﺮﺕ ﺑﻴﻪ ﻭﺍﺧﺘﻨﮕﺖ ﻣﺎﺍﻋﺮﻑ ﺷﻨﻮ ﻳﺼﻴﺮ ﺑﻴﻬﺎ ﺣﺴﻴﺘﻬﻦ ﻛﺸﻔﻨﻲ .. ﻋﻴﻨﻲ ﻋﻠﻰ ﺍﻟﺒﺎﺏ ﺍﺭﻳﺪ ﻋﻤﺘﻲ ﺗﺠﻲ ﺗﻨﻘﺬﻧﻲ ﻣﻨﻬﻦ ..
ﺑﺲ ﺍﻟﻲ ﺩﺧﻞ ﺟﺪﻱ ﻭﻋﻤﻲ ﺻﺎﻟﺢ ﻭﻣﻬﺪﻱ ..
ﻣﻮﺗﻮﻧﻲ ﺗﻤﻮﺕ ﻣﻦ ﻏﻴﺮ ﻣﺎﻳﻔﺘﻬﻤﻮﻥ ﺷﻲ .. ﺑﺲ ﮔﺎﻟﺘﻠﻬﻢ ﻋﻤﺘﻲ ﻟﻤﻴﻌﺔ ﺍﻭ ﻣﺎﺩﺧﻠﻮﺍ ﺭﺿﻮﺓ ﺣﺒﻠﻪ ﻭﻣﺎﻧﻌﺮﻑ ﻣﻨﻴﻦ .. ﺷﺒﻌﻮﻧﻲ ﻛﺘﻞ ﻟﻮ ﻣﺎﺟﺪﻱ ﻳﺴﺤﺒﻨﻲ ﻣﻨﻬﻦ ﻭﻳﺨﻠﻴﻨﻲ ﻭﺭﺍﻩ ..
ﺑﻌﺪﻫﺎ ﺩﺧﻠﺖ ﻋﻤﺘﻲ ﺷﺎﻓﺘﻨﻲ ﺷﻤﺮﺕ ﺍﻟﻐﺮﺍﺽ ﻭﺍﺧﺬﺗﻨﻲ ﻟﻠﻐﺮﻓﺔ ﻭﻗﻔﻠﺖ ﺍﻟﺒﺎﺏ ﻭﻣﻦ ﺍﻟﺨﻮﻑ ﻣﺎﺍﺩﺭﻱ ﺑﺮﻭﺣﻲ ﻭﻭﮔﻌﺖ .. ﻣﺎﻭﻋﻴﺖ ﺍﻻ ﻋﻠﻰ ﺭﻭﺣﻲ ﺑﺎﻟﻐﺮﻓﺔ .. ﻭﻋﻤﺘﻲ ﺗﺒﺠﻲ ..
ﺍﺳﻤﻊ ﺻﻮﺕ ﻣﻬﺪﻱ ﻭﻋﻤﻲ ﺻﺎﻟﺢ ﻳﺼﻴﺤﻮﻥ ﻭﻳﺘﻬﺪﺩﻭﻥ
- ﻳﺎﺑﺔ ﺍﻧﻄﻴﻨﻴﺎﻫﺎ ﻧﻜﺘﻠﻬﺎ ﻭﻧﺨﻠﺺ ﻣﻨﻬﺎ .. ﺍﺑﻮﻫﺎ ﻣﺎﺕ ﻭﻣﺎﺍﺗﺤﻤﻞ ﺍﺣﻨﺔ ﻧﻐﺴﻞ ﻋﺎﺭﻩ .. ﻭﻫﺎﻱ ﺣﻤﺪﻳﺔ ﺗﺴﺘﺮﻟﻬﺎ ..
ﻟﺰﻣﺖ ﺑﻴﺪ ﻋﻤﺘﻲ ﻭﻫﻲ ﺗﮕﺮﺹ ﺑﻴﻪ ..
ﻣﻮ ﮔﻠﺘﻠﺞ ﻻﺗﻄﻠﻌﻴﻦ ﻫﺎﻱ ﻟﻤﻴﻌﺔ ﺷﻴﻄﺎﻥ ﻟﻴﺶ ﻃﻠﻌﺘﻲ ..
- ﻋﻤﺔ ﺷﺮﺍﺡ ﻳﺴﻮﻟﻲ .. ﻋﻤﺔ ﻭﺍﻟﻠﻪ ﻣﺎﺣﺠﻴﺖ ﺷﻲ ﻫﻦ ﻋﺮﻓﻦ ﻭﺣﺪﻫﻦ ..
ﺳﻤﻌﺖ ﺻﻮﺕ ﺟﺪﻱ .. ﻛﺎﻓﻲ ﺧﻠﻮﻧﻲ ﺍﻓﺘﻬﻢ .. ﺣﻤﺪﺩﺩﺩﺩﻳﺔ ﺍﻃﻠﻌﻲ ﻭﻟﺞ ﻻﺑﻴﺾ ﺍﻟﻠﻪ ﻭﺟﻬﺞ ﻋﺒﻦ ﺻﺨﻤﺘﻲ ﻭﺟﻬﻨﺎ .. ﺍﻃﻠﻌﻲ ﻓﻬﻤﻴﻨﺎ ﺍﻟﺴﺎﻟﻔﺔ ﻻﺍﻛﺴﺮ ﺍﻟﺒﺎﺏ ﻋﻠﻴﺠﻦ ..
ﻣﻨﺎﻙ ﻋﻤﺘﻲ ﻟﻤﻴﻌﺔ ﺗﺤﺠﻲ ﻭﺗﺰﻳﺪ ﺍﻟﻄﻴﻦ ﺑﻠﺔ .. ﺷﺘﻔﻬﻤﻚ ﻋﻤﻲ ﻣﺒﻴﻨﺔ ﺑﻄﻨﻬﺎ ﻛﺒﺮﺍﻧﺔ ﻭﺍﻟﻠﻪ ﮔﻠﺒﻲ ﻟﻌﺐ ﻣﻦ ﺗﺒﺴﺒﺴﻬﻦ ﻫﻲ ﻭﻋﻤﺘﻬﺎ ﺑﺎﻟﻐﺮﻓﺔ ﻭﺣﺪﻫﻦ ..
ﻟﻮ ﺣﻤﺪﻳﺔ ﺍﻟﺘﺤﺠﻲ ﺑﺎﻟﻤﺜﺎﻟﻴﺎﺕ ﻭﺍﻟﺼﺢ ﻭﺍﻟﻐﻠﻂ .. ﺗﺴﺘﺮﻟﻬﺎ ﻟﻮ ﺑﻨﺎﺗﻲ ﺍﺳﻢ ﺍﻟﻠﻪ ﺍﺳﻢ ﺍﻟﻠﻪ .. ﺟﺎﻥ ﻓﻀﺤﺘﻬﻦ ..
ﺻﺎﺡ ﺑﻴﻬﺎ ﺟﺪﻱ .. ﺍﺳﻜﺘﻲ ﻻﺍﮔﻀﻴﺞ ﻣﻨﺎ ﻋﺎﻟﻢ ﻓﻀﺤﺘﻴﻨﺎ
ﺭﺩ ﻋﻤﻲ ﺻﺎﻟﺢ .. ﻋﺴﺎﺱ ﻫﺎﻱ ﻣﻮ ﻓﻀﻴﺤﺔ ﻟﻮ ﻛﺒﺮﺕ ﺑﻄﻨﻬﺎ ﺷﺘﮕﻮﻝ ﻟﻠﻌﺎﻟﻢ ..
ﻣﺴﺤﺖ ﺩﻣﻮﻋﻬﺎ ﻋﻤﺘﻲ ﺣﻤﺪﻳﺔ ﻭﮔﺎﻣﺖ .. ﮔﻤﺖ ﻭﺭﺍﻫﺎ ﺭﺟﻌﺘﻨﻲ .. ﻫﺎﺝ ﺍﻟﻤﻔﺘﺎﺡ ﻣﻦ ﺍﻃﻠﻊ ﺍﻗﻔﻠﻲ ﺍﻟﺒﺎﺏ ﻭﻻﺗﺨﺎﻓﻴﻦ ﻟﻮ ﻋﻠﻰ ﺟﺜﺘﻲ ﻣﺎﺍﺧﻠﻲ ﻭﺍﺣﺪ ﻳﻔﻮﺗﻠﺞ ..
ﻃﻠﻌﺖ ﻗﻔﻠﺖ ﺍﻟﺒﺎﺏ ﺑﺴﺮﻋﻪ ﻭﮔﻌﺪﺕ ﺍﺑﺠﻲ ..
ﺳﻤﻌﺘﻬﺎ ﺗﺤﺠﻲ .. ﺷﺒﻴﻜﻢ ﺗﻬﺪﺩﻭﻥ ﻭﺟﻨﻜﻢ ﻣﺼﺪﮔﻴﻦ ﺭﺿﻮﺓ ﺗﻄﻠﻊ ﻣﻨﻬﺎ ﺍﻟﻌﻴﺒﺔ ..
ﻭﺍﻧﺖ ﺑﻮﻳﺔ ﻫﺎﻱ ﺗﺮﺑﺎﺗﻚ .. ﺻﺎﺡ ﺑﻴﻬﺎ ﻋﻤﻲ ﺻﺎﻟﺢ ..
- ﺷﺘﺨﺮﻃﻴﻦ ﻭﻟﺞ .. ﻟﻮ ﺑﺮﻳﺌﺔ ﻣﺎﺟﺎﻥ ﺧﺘﻠﺘﻴﻬﺎ ﻋﻨﺎ ﻭﻗﻔﻠﺘﻲ ﻋﻠﻴﻬﺎ ﺍﻟﺒﺎﺏ . ﻭﺧﺮﻱ ﻋﻨﻲ ﺧﻠﻲ ﺍﺷﻮﻑ ﺷﻐﻠﻲ ..
ﺩﻓﻌﺘﻪ ﻋﻤﺘﻲ .. ﻭﺧﺮ ﻏﺎﺩ .. ﺑﻮﻳﺔ ﻣﺎﺗﺤﺠﻲ . ﺍﻧﻲ ﺍﻓﻬﻤﻜﻢ ﻛﻠﺸﻲ ﺑﺲ ﺍﻫﺪﻭﺍ ..
ﺭﺩ ﺟﺪﻱ .. ﺷﺘﻔﻬﻤﻴﻨﺎ ﻳﺤﻤﺪﻳﺔ .. ﺣﺠﺎﻳﺔ ﻭﺣﺪﺓ ﺍﺭﻳﺪ ﺍﺳﻤﻌﻬﺎ ﺍﻟﻲ ﮔﺎﻟﺘﺔ ﻟﻤﻴﻌﺔ ﺻﺪﮒ ﻟﻮ ﻻ .. ﺭﺿﻮﺓ ﺣﺒﻠﺔ ﻟﻮ ﻻ
ﺍﺗﻨﻬﺪﺕ ﻋﻤﺘﻲ .. ﺍﻱ ﺑﻮﻳﺔ ﺭﺿﻮﺓ ﺣﺒﻠﺔ ﻣﻦ ﺣﺴﻦ ..
ﺿﺤﻚ ﻣﻬﺪﻱ .. ﺷﺒﻴﺞ ﻋﻤﺔ ﺷﻨﻲ ﺷﺎﻳﻔﺘﻨﺎ ﻣﮕﺮﻧﻴﻦ ﻭﺗﻀﺤﻜﻴﻦ ﻋﻠﻴﻨﺎ .. ﻳﺎﺣﺴﻦ .. ﺣﺴﻦ ﻣﻦ ﻋﻘﺪ ﻋﻠﻴﻬﺎ ﺭﺍﺡ ﻋﺴﻜﺮﻳﺔ ﻭﻣﺎﺍﺟﺔ ﺍﻻ ﺑﺘﺎﺑﻮﺕ ..
ﻟﻮ ﻻﻥ ﺣﺴﻦ ﻣﻴﺖ ﺷﻤﺮﺗﻲ ﺍﻟﺸﻐﻠﺔ ﻋﻠﻴﻪ ﺣﺘﻰ ﺗﺨﻠﺺ ..
ﺣﺠﺖ ﻟﻤﻴﻌﺔ .. ﻭﺣﺘﻰ ﻟﻮ ﺣﺴﻦ ﺷﻤﺪﺭﻳﻨﺎ ﺍﺣﻨﺔ ﻟﻮ ﺍﻟﻨﺎﺱ ﺷﻨﮕﻠﻬﺎ ﺻﺎﺭﺕ ﺗﺨﺮﻣﺶ ﺑﺨﺪﻭﺩﻫﺎ .. ﺍﻧﻔﻀﺤﻨﺎ ﺑﻴﻦ ﺍﻟﻨﺎﺱ ﻭﺑﻨﺎﺗﻲ ﺑﻨﺎﺗﻲ ﺑﻌﺪ ﻣﻨﻮ ﺍﻟﻲ ﻳﺎﺧﺬﻫﻦ ﻭﺑﻨﺖ ﻋﻤﻬﻦ ﻋﺎﻳﺒﺔ ..
ﺭﺩﺕ ﻋﻤﺘﻲ .. ﺭﺿﻮﺓ ﻣﻮ ﻋﺎﻳﺒﺔ ﻟﻤﻴﻌﺔ .. ﺣﺴﻦ ﻣﻦ ﺧﻄﺒﻬﺎ ﻭﻫﻲ ﺗﺒﺘﻌﺪ ﻋﻨﺔ ﻫﻮ ﺭﺍﺩ ﻳﻌﻮﺩﻫﺎ ﻋﻠﻴﻪ ﻭﻳﻘﺮﺑﻬﺎ ﻭﺻﺎﺭ ﺍﻟﻲ ﺻﺎﺭ ﺑﺒﻴﺘﻜﻢ ﻭﺑﻮﺳﻄﻜﻢ ﻭﺍﻧﺘﻮ ﻣﺎﺣﺎﺳﻴﻦ .. ﻻﻥ ﻣﺤﺪ ﻣﻬﺘﻢ ﺑﻴﻬﺎ ﻭﺣﺪﻫﺎ ﻭﺻﻐﻴﺮﺓ ﻟﻮ ﺗﻤﻮﺕ ﻣﺎﺗﺪﺭﻥ ﺑﻴﻬﺎ ﺍﻧﺘﻦ ..
ﺑﻌﺪﻳﻦ ﻳﺒﻮﻳﺔ ﺣﺴﻦ ﻣﻮ ﻗﺒﻞ ﻣﺎﻳﺮﻭﺡ ﻋﺴﻜﺮﻳﺔ ﻛﺘﻞ ﺭﻭﺣﺔ ﻳﺮﻳﺪ ﻳﺘﺰﻭﺟﻬﺎ ..
ﺟﺪﻱ ﺳﺎﻛﺖ ﻭﻣﺎﺳﻤﻌﺖ ﺣﺴﻪ ..
ﻭﺣﺘﻰ ﺍﻟﻲ ﺧﺎﺑﺮﻧﻲ ﻭﺗﻮﺳﻞ ﺑﻴﻪ ﺍﻗﻨﻊ ﺍﺑﻮﻱ . ﻭﺍﻣﺔ ﻫﻢ
ﺭﻏﻢ ﺍﻟﻜﻞ ﻣﺘﻔﻖ ﺯﻭﺍﺟﻬﻢ ﺑﻌﺪ ﺍﻟﻌﺴﻜﺮﻳﺔ ..
ﺣﺠﻰ ﻋﻤﻲ ﺻﺎﻟﺢ .. ﺑﻮﻳﺔ ﻳﻌﻨﻲ ﺍﻧﺖ ﺧﺎﺷﺔ ﻫﺎﻟﺴﺎﻟﻔﺔ ﺑﺪﻣﺎﻏﻚ .
ﺭﺩﺕ ﻋﻤﺘﻲ .. ﻭﻟﻴﺶ ﻣﺎﺗﺨﺶ ﻳﺎﺍﺑﻦ ﺍﺑﻮﻱ . ﺷﻮ ﺭﺿﻮﺓ ﮔﺪﺍﻣﻜﻢ ﺑﺎﺏ ﺍﻟﺤﻮﺵ ﻣﺎﺗﻄﻠﻌﻪ .. ﻭﺑﻌﺪﻳﻦ ﻫﻲ ﺍﺻﻼ ﻣﺎﺗﻌﺮﻑ ﺷﻨﻲ ﺍﻟﻲ ﺻﺎﺭ ﻭﺷﻠﻮﻥ ﺣﺒﻠﺖ .. ﻣﻦ ﺳﻮﻟﻔﺖ ﻭﻳﺎﻫﺎ ﻛﻠﺸﻲ ﻣﺎﺗﻌﺮﻑ ﺣﺴﻦ ﻟﻌﺐ ﺑﻌﻘﻠﻬﺎ ﻭﻫﻲ ﻃﻔﻠﺔ ﻻﺍﻡ ﻭﻻﺍﺑﻮ ﻭﻻﻭﺍﺣﺪ ﻳﺮﺷﺪﻫﺎ ..
ﺍﻟﻄﻔﻞ ﻋﻤﺮﺓ ﺷﻬﺮﻳﻦ ﻭﻧﺺ ﻭﻣﻨﺎ ﻋﺸﺮ ﺍﻳﺎﻡ ﻭﺍﺣﺴﺒﻮﺍ ﺷﻮﻛﺖ ﺭﺍﺡ ﺣﺴﻦ ﻟﻠﻌﺴﻜﺮﻳﺔ ..
ﻭﺍﻧﺖ ﻳﺼﺎﻟﺢ ﻫﺎﻱ ﺑﻨﺖ ﺍﺧﻮﻙ ﻭﻋﻨﺪﻙ ﺑﻨﺎﺕ ﻣﺎﻳﺼﻴﺮ ﺗﻜﺴﺮ ﺑﻴﻬﺎ ﻭﺑﺸﺮﻓﻬﺎ ..
ﺻﺎﺡ ﻣﻬﺪﻱ .. ﻟﻴﺶ ﻫﻲ ﺿﻞ ﺑﻴﻬﺎ ﺷﺮﻑ .. ﻫﻲ ﺍﺻﻼ ﺻﺎﺭﺕ ﻋﺎﻳﺒﺔ ﻭﻋﺎﺭ ﻋﻠﻴﻨﺎ . ﺍﺫﺍ ﻣﺎﻧﺨﻠﺺ ﻣﻨﻬﺎ ﻭﻣﻦ ﺍﻟﻲ ﺑﺒﻄﻨﻬﺎ ﻧﻨﻔﻀﺢ ﺑﺎﻟﻮﻻﻳﺔ ..
ﺟﺪﻱ ﺳﻤﻌﺘﻚ ﻭﺳﻤﻌﺘﻨﺎ ﺗﺼﻴﺮ ﺑﺎﻟﮕﺎﻉ ..
ﻛﻞ ﻫﺬﺍ ﻭﺟﺪﻱ ﺳﺎﻛﺖ .. ﮔﺎﻡ ﻣﻦ ﻣﻜﺎﻧﺔ .. ﻛﻠﻤﻦ ﻳﺮﻭﺡ ﺍﻟﺤﺠﺮﺗﺔ ﻭﺍﻧﻲ ﺍﺗﺼﺮﻑ .. ﻭﻫﺎﺍﺍ ﺍﺫﺍ ﺳﻤﻌﺖ ﻫﺎﻟﺴﺎﻟﻔﺔ ﻃﺎﻟﻌﺔ ﺍﻟﺒﺎﺏ ﺍﻟﺤﻮﺵ ﺍﺫﺑﺢ ﺍﻟﻲ ﻃﻠﻊ ﺍﻟﺴﺎﻟﻔﺔ ﺑﻴﺪﻱ ..
ﺳﺎﻣﻌﻴﻦ ..
ﺻﺎﻟﺢ .. ﺑﻮﻳﺔ …
ﻣﻮ ﻭﻛﺘﻬﺎ ﻳﺼﺎﻟﺢ … . ﺧﻠﻮﻧﻲ ﺍﺧﺬ ﻗﺮﺍﺭ ﻭﺑﻌﺪﻳﻦ ﻧﺤﺠﻲ
ﻭﺍﻧﺘﻲ ﻳﺤﻤﺪﻳﺔ ﺍﺑﻘﻲ ﻳﻤﻬﺎ ﻻﺗﻌﻮﻓﻴﻬﺎ ..
- ﺍﺻﺒﻠﻚ ﻏﺪﺍ ﺑﻮﻳﺔ ؟؟
- ﻣﺎﺍﺷﺘﻬﻲ ﺭﺍﻳﺢ ﺍﻧﺎﻡ ..
ﺩﮔﺖ ﺍﻟﺒﺎﺏ ﻋﻤﺘﻲ ﻓﺘﺤﺘﻬﺎ .. ﺍﺩﺧﻠﻲ ﺟﻮﺓ ﺍﺭﻭﺡ ﺍﺳﻮﻳﻠﺞ ﻟﮕﻤﺔ ﻭﺍﺟﻲ ..
ﺭﺍﺣﺖ ﺣﻤﺪﻳﺔ ﻟﻠﻤﻄﺒﺦ ﻭﺳﻤﻌﺘﻬﻦ ﻳﺤﺠﻦ ﺑﺸﺮﻑ ﺭﺿﺎﺀ .. ﻭﻳﮕﻮﻟﻦ ﺍﻟﻌﺎﻳﺒﺔ ﮔﺎﻋﺪ ﺣﻀﻬﺎ ..
ﺷﺎﻓﻨﻬﺎ ﺳﻜﺘﻦ ﺍﻻ ﻟﻤﻴﻌﺔ .. ﻫﺬﺍ ﻳﻮﻣﻬﺎ ﻭﻣﻨﺘﻈﺮﺗﺔ ﻣﻦ ﺯﻣﺎﻥ
ﺗﺤﺠﻲ ﻭﻱ ﺑﺘﻮﻝ ﻭﺑﻨﺎﺗﻬﺎ ﻭﺗﺴﻤﻊ ﺣﻤﺪﻳﺔ ..
ﺍﻟﻲ ﺟﺎﻧﺖ ﻣﻄﻠﻌﺔ ﺻﻴﻨﻴﺔ ﻓﺎﻓﻮﻥ ﻭﻣﺨﻠﻴﻪ ﺑﻴﻬﺎ ﻣﺎﻋﻴﻦ ﺗﺼﺐ ﺗﻤﻦ ﻭﻣﺮﮒ ..
- ﺍﻱ ﻓﻮﮒ ﻋﻴﺒﺘﻬﺎ ﺗﻮﻛﻠﻬﺎ ﺑﻴﺪﻫﺎ .. ﻭﻟﻮ ﻫﻲ ﻣﻨﻲ ﺍﻣﻬﺎ ..
ﺧﻠﺖ ﺍﻟﺼﻴﻨﻴﺔ ﻋﻠﻰ ﺍﻟﻄﺒﺎﺥ ﻭﺩﺍﺭﺕ ﻭﺟﻬﻬﺎ ..
- ﻟﻤﻴﻌﺔ ﺧﺎﻓﻲ ﺍﻟﻠﻪ ﻭﻻﺗﺰﻭﺩﻳﻦ ﺍﻟﻨﺎﺭ .. ﻻﻫﻲ ﻭﻻﺍﻣﻬﺎ ﺟﺎﺑﻠﻠﻨﺎ ﺍﻟﻌﺎﺭ ﻻﺗﺸﻤﺮﻳﻦ ﺑﺎﻟﺤﺠﻲ ..
- ﺍﻱ ﺍﺑﺪ ﻣﺎﺟﺎﺑﻠﻠﻨﺎ ﺍﻟﻌﺎﺭ .. ﻫﻲ ﺣﺎﻣﻞ ﻣﺎﻧﻌﺮﻑ ﻣﻨﻴﻦ ﻭﺍﻣﻬﺎ ﺑﺤﺠﺔ ﺗﺒﻌﻴﺔ ﺍﻟﻠﻪ ﺍﻋﻠﻢ ﻭﻳﺎﻣﻦ ﺷﺮﺩﺕ ..
ﺻﺎﺣﺖ ﺣﻤﺪﻳﺔ .. ﻟﻤﻴﻴﻴﻴﻌﺔ ﻋﻨﺪﺝ ﺑﻨﺎﺕ ﺧﺎﻓﻲ ﻋﻠﻴﻬﻦ ﻛﺎﺍﺍﺍﻓﻲ .
- ﻳﺎﻫﺎﻱ ﻋﻮﺩ ﺍﻧﺘﻲ ﻋﻤﺘﻬﻦ ﺗﺪﻋﻴﻦ ﻋﻠﻴﻬﻦ .. ﺑﺲ ﺍﻟﺤﻤﺪ ﻟﻠﻪ ﺑﻨﺎﺗﻲ ﻣﺮﺑﺎﻳﺎﺕ ﻣﻮ ﻋﺎﻳﺒﺎﺕ ..
ﺍﺧﺬﺕ ﺣﻤﺪﻳﺔ ﺍﻟﺼﻴﻨﻴﺔ ﻭﻃﻠﻌﺖ .. ﻭﺩﺗﻬﺎ ﺍﻟﺮﺿﺎﺀ ﻭﺭﺍﺣﺖ ﺗﺸﻮﻑ ﺍﺑﻮﻫﺎ ﺍﻟﻲ ﺟﺎﻥ ﻳﺼﻠﻲ ﻭﻳﺪﻋﻲ ..
ﺍﺑﺘﺴﻤﺖ .. ﺗﻌﺮﻑ ﺍﺑﻮﻫﺎ ﻣﺎﻳﺘﺼﺮﻑ ﺍﻱ ﺗﺼﺮﻑ ﻭﻣﺎﻳﺨﻄﻲ ﺍﻱ ﺧﻄﻮﺓ ﺍﺫﺍ ﻣﺎﻳﺴﺘﺨﻴﺮ ..
ﺑﺪﺍﺧﻠﻬﺎ ﻣﻄﻤﺄﻧﻪ ﺍﻧﻪ ﺍﺑﻮﻫﺎ ﻣﺎﻳﻈﻠﻢ ﺭﺿﺎﺀ ﺑﺲ ﺧﻮﻓﻬﺎ ﻣﻦ ﻟﻤﻴﻌﺔ ﻻﺗﻮﺯ ﺻﺎﻟﺢ ..
ﺩﺧﻠﺖ ﺗﻘﻨﻊ ﺭﺿﺎﺀ ﺗﺎﻛﻞ ﻛﻢ ﻟﮕﻤﺔ ﻋﻠﻤﻮﺩ ﺍﻟﻄﻔﻞ ﺍﻟﻲ ﺑﺒﻄﻨﻬﺎ ﻭﺭﺿﺎﺀ ﺭﺍﻓﻀﺔ ﻭﺧﺎﻳﻔﺔ ﻭﺗﺒﺠﻲ ﻣﺎﺗﺮﻳﺪﺓ .. ﻛﻞ ﻇﻨﻬﺎ ﻫﻮ ﺳﺒﺐ ﻣﺸﺎﻛﻠﻬﺎ ﻭﻣﻮﺕ ﺍﺑﻮﻫﺎ ..
ﺳﻤﻌﻦ ﺻﻮﺕ ﻫﺎﺩﻱ ﻭﻫﻮ ﻳﺪﮒ ﺑﺎﻟﺒﺎﺏ ..
ﻃﻠﻌﺖ ﺣﻤﺪﻳﺔ .. ﻫﺎﻱ ﺧﻮﻳﺔ ﺧﻴﺮ
- ﻳﺎﺧﻴﺮ .. ﺷﻠﻮﻥ ﻫﺎﻱ ..…… ﺗﺸﻤﺮ ﺗﻬﻴﻤﺔ ﻋﻠﻰ ﺍﺑﻨﻲ .. ﻟﻮ ﻻﻥ ﻣﻴﺖ ﻣﺎﻳﮕﺪﺭ ﻳﺪﺍﻓﻊ ﻋﻦ ﺭﻭﺣﻪ ..
ﺟﺎﻥ ﻣﻬﺪﻱ ﻭﺍﮔﻒ ﻭﺭﺍﻩ ﻭﺍﻟﻈﺎﻫﺮ ﻫﻮ ﺍﻟﻲ ﻗﺎﺭﻱ ﺑﺮﺍﺳﻪ
ﻋﻴﻨﻬﺎ ﻋﻠﻰ ﻣﻬﺪﻱ ﻭﺗﺤﺠﻲ .. ﺳﻮﺩ ﺍﻟﻠﻪ ﻭﺟﻬﻚ ﺭﻛﻀﺖ ﺗﺤﺸﻲ ﺑﺮﺍﺱ ﻋﻤﻚ .. ﺳﻤﻌﺖ ﺍﺑﻮﻱ ﺷﮕﺎﻝ ..
ﺭﺟﻌﺖ ﺣﺠﺖ ﻭﻱ ﻫﺎﺩﻱ ..
ﺧﻮﻳﺔ ﻟﻴﺶ ﺗﺸﻤﺮ ﺗﻬﻴﻤﺔ .. ﺍﺫﺍ ﻫﻲ ﻣﺮﺗﺔ ﺑﺸﺮﻉ ﺍﻟﻠﻪ .. ﻭﺣﺴﻦ ﻣﺮﺍﻫﻖ ﻭﻛﻞ ﻇﻨﺔ ﺣﻼﻟﺔ ﻭﺍﻟﻲ ﺳﻮﺍﻩ ﻣﺎﻫﻮ ﺧﻄﺄ ..
ﺷﻤﻌﺮﻓﺔ ﺭﺍﺡ ﻳﺮﻭﺡ ﻭﻣﺎﻳﺮﺟﻊ .. ﻻﺗﻈﻠﻤﻬﺎ ﺍﻧﺖ ﻫﻢ ..
ﻣﻦ ﮔﻠﺘﻠﻜﻢ ﺑﻌﺪﻫﻲ ﺗﻠﻌﺐ ﺑﻠﻌﺎﺑﺘﻬﺎ ﻻﺗﺰﻭﺟﻮﻫﺎ ..
ﺣﺴﻦ ﺩﮒ ﺭﺟﻞ ﻭﺗﺨﺒﻞ .. ﻋﻤﺔ ﻻﺗﻌﺮﺿﻴﻦ ﻣﻨﺎ ﻟﻤﻦ ﺍﻛﻤﻞ ﻋﺴﻜﺮﻳﺔ ﻻﻧﻬﺎ ﻣﺮﺓ .. ﻣﻮﻭﻭﻭ ﻫﺬﺍ ﺣﺠﻴﻪ ..
ﻭﻗﺒﻞ ﻻﻳﺮﻭﺡ ﻣﻮ ﺗﻐﻴﺮ ﻛﻼﻣﺔ ﻭﺧﺒﺼﻨﺎ ﺍﻻ ﻳﺘﺰﻭﺝ ..
ﻟﻮ ﻣﺎﺣﺲ ﺑﻐﻠﻄﺘﺔ ﻣﺎﻃﻠﺐ ﻫﻴﺞ ﻃﻠﺐ .. ﺍﻟﻲ ﺑﺒﻄﻨﻬﺎ ﺍﺑﻦ ﺍﺑﻦ ﻭﺭﻳﺤﺔ ﻣﻨﻪ ﻳﻤﻜﻦ ﺍﻟﻠﻪ ﺭﺍﺩ ﻳﻌﻮﺿﻚ ﺑﺮﻳﺤﺘﺔ ﻻﺗﺨﻠﻲ ﻭﺍﺣﺪ ﻳﻠﻌﺐ ﺑﻌﻘﻠﻚ ..
ﺭﺿﻮﺓ ﺗﺮﺑﺎﺗﻜﻢ ﻳﺨﻮﻱ ..
ﺗﻌﺼﺐ ﻣﻬﺪﻱ .. ﻋﻤﺔ ﺷﻮ ﺟﻦ ﺍﻟﺴﺎﻟﻔﺔ ﻋﻨﺪﺝ ﺳﻬﻠﺔ .. ﻓﻜﺮﻱ ﺑﺴﻤﻌﺘﻨﺎ ﺷﻨﮕﻮﻝ ﻟﻠﻌﺎﻟﻢ ..
- ﺍﻧﺖ ﻣﺎﻟﻚ ﺷﻐﻞ ﺑﺎﻟﻌﺎﻟﻢ ﺑﺲ ﻻﺗﺸﻤﺮ ﺑﺎﻧﺰﻳﻦ ﻋﻠﻰ ﺍﻟﻨﺎﺭ ﺍﻟﻘﺮﺍﺭ ﺑﻴﺪ ﺍﺑﻮﻱ .. ﻃﺒﻄﺒﺖ ﻋﻠﻰ ﻇﻬﺮ ﻫﺎﺩﻱ ..
- ﺭﻭﺡ ﺍﻧﺖ ﻟﻤﺮﻳﺘﻚ ﻣﺮﻳﻀﺔ ﻭﻫﺴﺘﻮﻛﻢ ﺭﺟﻌﺘﻮﺍ .. ﺍﺻﺒﻠﻜﻢ ﻏﺪﺍ ؟؟
ﺍﺷﺮﻟﻬﺎ ﻻ ﻣﺎﺍﺭﻳﺪ ﻣﺘﻐﺪﻳﻦ .. ﺭﺍﺡ ﻟﻠﻐﺮﻓﺔ ﻭﻫﻮ ﺍﺻﻼ ﺍﻟﺒﻲ ﻣﻜﻔﻴﻪ ﺑﺲ ﺿﻐﻂ ﻣﻬﺪﻱ ﺧﻼﻩ ﻳﺤﺠﻲ ..
ﺭﺿﺎﺀ .. ﺟﻨﺖ ﺍﺳﻤﻊ ﺍﻟﺤﺠﻲ ﻭﺧﺎﻳﻔﻪ .. ﻋﻤﺘﻲ ﻛﻠﻤﺎ ﺗﮕﻮﻡ ﺍﻟﺰﻡ ﺑﻴﻬﺎ ﺧﺎﻑ ﻳﺠﻮﻧﻲ .. ﺍﻟﻰ ﺍﻥ ﺻﺎﺭ ﺍﻟﻌﺼﺮ ﻭﺑﻴﻮﻣﻬﺎ ﻣﺤﺪ ﻃﻠﻊ ﻟﻠﮕﺎﻉ ﻣﻦ ﻭﺭﺓ ﺍﻟﻈﻬﺮ ..
ﮔﻌﺪ ﺟﺪﻱ ﻣﻦ ﺍﻟﻨﻮﻡ ﻭﺩﮒ ﺍﻟﺒﺎﺏ .. ﻓﺘﺤﺘﻬﺎ ﻋﻤﺘﻲ ﻭﺩﺧﻞ
ﺧﺘﻠﺖ ﻭﺭﺍﻫﺎ ﻣﻦ ﺍﻟﺨﻮﻑ ..
ﺍﺷﺮﻟﻲ ﺍﮔﻌﺪ ﺑﺼﻔﺔ .. ﺗﻌﺎﻱ ﺑﻮﻳﺔ .. ﺍﺩﺭﻱ ﺑﻴﺞ ﻣﺎﺗﻐﻠﻄﻴﻦ ﻭﻟﻮ ﺗﻌﺮﻓﻴﻦ ﺍﻟﺴﻮﻳﺘﻮ ﻏﻠﻂ ﻣﺎﺗﺴﻮﻳﻪ ..
ﻣﺎﺍﺩﺭﻱ ﺍﺣﺎﺳﺐ ﺍﻫﻠﺞ ﻟﻮ ﺍﻟﺰﻣﻦ ﻟﻮ ﺍﺣﺎﺳﺐ ﻧﻔﺲ ﻛﻠﻨﺎ ﻣﺎﻋﺮﻓﻨﺎ ﻧﺤﺘﻮﻳﺞ ﻭﻧﻌﻠﻤﺞ .. ﺑﺲ ﻣﻮ ﻣﻌﻨﺎﻫﺎ ﺭﺍﺿﻲ ﻋﻠﻰ ﺍﻟﻲ ﺻﺎﺭ ..
ﺣﺴﻦ ﻣﺎﺕ ﻭﻻﺯﻡ ﺗﺒﺮﻳﻠﺔ ﺍﻟﺬﻣﺔ ﺣﺘﻰ ﻳﺮﺗﺎﺡ ﺑﮕﺒﺮﺓ .. ﻭﺍﻧﺘﻲ ﺍﻣﺎﻧﺔ ﻣﺤﻤﺪ ﻋﻨﺪﻱ .. ﺑﺲ ﻗﺒﻞ ﻛﻠﺸﻲ ﺍﺭﻳﺪﺝ ﺗﺴﻮﻟﻔﻴﻠﻲ ﻛﻠﺸﻲ ..
ﺳﻜﺘﺖ ﻭﻣﺎﺍﻋﺮﻑ ﺷﺄﺣﺠﻲ .. ﺍﺷﺮﺗﻠﻲ ﻋﻤﺘﻲ ﺍﺣﺠﻲ ﺳﻮﻟﻔﺖ ﻛﻠﺸﻲ ﺍﻟﻰ …… . ﺳﻜﺘﻨﻲ ﻫﺬﺍ ﻫﻮ ﻛﺎﻓﻲ ﺭﺩﺕ ﺍﻓﻬﻢ ﺷﻲ ﻭﻓﻬﻤﺘﻪ .. ﺍﻟﻤﻮﺿﻮﻉ ﻫﺬﺍ ﻻﺯﻡ ﻳﻨﺴﺪ ﺍﺧﺬﺕ ﻗﺮﺍﺭ ﻭﺍﻟﻜﻞ ﺭﺍﺡ ﻳﻠﺘﺰﻡ ﺑﻲ ﻭﺍﻭﻟﻬﻢ ﺍﻧﺘﻲ ﻳﺮﺿﻮﺓ ..
ﺭﻭﺣﻲ ﺣﻤﺪﻳﺔ ﺻﻴﺤﻲ ﺍﺧﻮﺍﻧﺞ ﻭﺗﻌﺎﻱ .. ﺑﺲ ﺍﺧﻮﺍﻧﺞ ﻭﻣﻬﻴﺪﻱ ﻻﺗﺠﻲ ﻭﺣﺪﺓ ﻣﻨﻬﻦ .ﺭﺍﺣﺖ ﻋﻤﺘﻲ ﻓﺮﺣﺘﻬﻢ ﻭﺍﺟﻮ ..
ﻋﺎﻳﻦ ﺍﻟﻌﻤﻲ ﻫﺎﺩﻱ .. ﺩﺭﻳﺖ ﻣﻮﻭﻭ
ﻫﺰ ﺭﺍﺳﺔ ﻋﻤﻲ .. ﺭﺍﺩ ﻳﺤﺠﻲ ﻋﻤﻲ ﺻﺎﻟﺢ ﺳﻜﺘﺔ ..
- ﺷﻮﻓﻮﺍ ﻫﺎﻱ ﻛﻠﻜﻢ ﺗﺴﻤﻌﻮﻥ ﻭﺑﻠﻐﻮﺍ ﻧﺴﻮﺍﻧﻜﻢ ﻫﻢ . ﺍﻟﺴﺎﻟﻔﺔ ﺍﺫﺍ ﻃﻠﻌﺖ ﻣﺎﻳﺮﻓﻠﻲ ﺟﻔﻦ ﻭﺍﺫﺑﺤﻜﻢ ﻉ ﺍﻟﻘﺒﻠﺔ ..
- ﻭﻫﺎﻟﻤﺼﻴﺒﺔ ﺷﻨﻲ ﺣﻠﻬﺎ ﺑﻮﻳﺔ .. ﺣﺠﺔ ﻋﻤﻲ ﺻﺎﻟﺢ ..
- ﺭﺿﻮﺓ ﻻﺯﻡ ﺗﻠﺰﻡ ﻋﺪﺓ .. ﻫﻲ ﻣﺎﻟﺰﻣﺖ ﻻﻥ ﻣﺎﺧﺎﺵ ﻋﻠﻴﻬﺎ ﺑﺲ ﻫﺴﺎ ﺍﻟﻮﺿﻊ ﺗﻐﻴﺮ .. ﻭﻋﺪﺗﻬﺎ ﻟﻤﻦ ﺗﺠﻴﺐ ..
ﺍﻟﻮﻟﺪ ﺍﺑﻨﻪ ﺑﻌﺪ ﻭﻻﺯﻡ ﻳﺠﻲ ﻟﻠﺪﻧﻴﺎ ..
ﺣﺠﺔ ﻣﻬﺪﻱ .. ﺟﺪﻱ ﺷﻠﻮﻥ ..
- ﺍﻟﺸﻠﻮﻥ ﻫﺎﻱ ﻣﻦ ﺗﺠﻴﺐ ﻧﺤﺠﻲ ﺑﻴﻬﺎ .. ﺍﻟﻲ ﻳﺴﺄﻟﻜﻢ ﻫﺴﺎ ﮔﻮﻟﻮﺍ ﺑﻌﺪ ﺣﺴﻦ ﻋﻘﺪ ﻋﻠﻴﻬﺎ ﻣﻬﺪﻱ ﻭﺍﺗﺰﻭﺟﻬﺎ ..
ﺿﺤﻚ ﻣﻬﺪﻱ .. ﺷﻨﻲ ﺗﺮﻳﺪ ﺗﺨﻠﻴﻬﺎ ﺑﺮﺍﺳﻲ ﻫﺎﻝ ……
ﺻﺎﺡ ﺑﻲ ﺟﺪﻱ .. ﺍﻟﺴﺎﻧﻚ ﺍﮔﺼﺔ ﺍﺫﺍ ﺳﻤﻌﺖ ﺣﺠﺎﻳﺔ ﻣﻨﻚ
ﺍﻧﻲ ﺭﺍﺡ ﺍﺧﺬﻫﺎ ﻫﻲ ﻭﺣﻤﺪﻳﺔ ﻟﻠﺒﺮ ﻫﻨﺎﻙ ﻧﺒﻘﻰ ﺍﻟﻰ ﺍﻥ ﺗﺠﻴﺐ .. ﻭﻣﻦ ﺗﺒﻠﻎ ﺗﻌﻘﺪ ﻋﻠﻴﻬﺎ ﺑﺎﻟﻤﺤﻜﻤﺔ ﻭﻳﺘﺴﺠﻞ ﺍﻟﻮﻟﺪ ﺑﺄﺳﻤﻚ ..
ﺻﺎﺡ .. ﺍﺑﺪ ﻟﻮ ﺍﻣﻮﺕ .. ﻣﺎﺍﻟﻔﻲ ﻭﻟﺪ ﻣﺎﺍﻋﺮﻑ ﺍﺑﻮ ﻣﻨﻮ
- ﺍﺣﺘﺮﻡ ﻧﻔﺴﻚ .. ﺍﺑﻦ ﺍﺧﻮﻙ ﻫﺬﺍ .. ﻭﺑﻨﺖ ﻋﻤﻚ ﻭﺣﮓ ﺍﻟﻠﻪ ﻳﻤﻬﻴﺪﻱ ﻟﻮ ﺧﺎﻟﻔﺖ ﺣﺠﺎﻳﺘﻲ ﺍﻃﺮﺩﻙ ﻣﻦ ﺑﻴﺘﻲ ﻭﺍﺗﺒﺮﺃ ﻣﻨﻚ
ﺟﺎﻥ ﻳﻌﺎﻳﻦ ﻋﻠﻴﻪ ﺑﺤﻘﺪ ﻭﺟﻦ ﻳﺮﻳﺪ ﻳﺎﻛﻠﻨﻲ ﺑﻌﻴﻨﺔ ..
ﺧﻔﺖ ﻣﻨﻪ .. ﺗﻮﺳﻠﺖ ﺑﺠﺪﻱ ﻣﺎﻳﺨﻠﻴﻨﻲ ﺍﺗﺰﻭﺝ ﻣﻬﻴﺪﻱ ﻣﺎﺍﺭﻳﺪ ﺍﻋﺮﺱ ﺑﻄﻠﺖ .. ﻭﺧﺎﺻﺔ ﻣﻬﻴﺪﻱ ﻳﻜﺮﻫﻨﻲ ﻭﺑﺘﻮﻝ ﻭﺍﻣﺔ ﻳﻤﻮﺗﻨﻲ ..
ﺑﺲ ﺟﺪﻱ ﺻﺎﺡ ﺑﻴﻪ ﻭﺯﻣﺦ ﻋﻠﻴﻪ .. ﻣﺎﺩﺍﻡ ﺭﺍﺳﻲ ﻳﺸﻢ ﺍﻟﻬﻮﻯ ﻣﺤﺪ ﻳﻤﺴﺞ ..
ﺑﻴﻮﻣﻬﺎ ﺍﻟﺤﻮﺵ ﺍﻧﮕﻠﺐ ﻭﺑﺘﻮﻝ ﺗﺨﺒﻠﺖ ﻭﻟﻤﺖ ﻏﺮﺍﺿﻬﺎ ﻭﺯﻋﻠﺖ .. ﻭﺟﺪﻱ ﮔﺎﻟﻬﺎ ﺍﺫﺍ ﻃﻠﻌﺖ ﺳﺎﻟﻔﺔ ﺭﺿﻮﺓ ﻳﺒﺘﻮﻝ ﻣﺎﻟﺞ ﺭﺟﻌﺔ ﺑﻌﺪ ..
ﺑﻘﺖ ﮔﺎﻋﺪﺓ ﺗﺒﺠﻲ ﻭﺗﻤﻠﺦ ﺑﺮﻭﺣﻬﺎ .. ﺿﺠﺖ ﻋﻠﻴﻬﺎ ﺑﺲ ﻣﺎﺑﻴﺪﻱ ﺷﻲ .. ﻣﻬﺪﻱ ﻳﺮﺍﺿﻴﻬﺎ ﻭﻫﻲ ﺗﺪﻓﻊ ﺑﻲ ..
ﻭﻳﮕﻠﻬﺎ ﻭﺍﻟﻠﻪ ﻣﺎﺍﺭﻳﺪﻫﺎ ﻭﻻﺍﺟﻴﺴﻬﺎ ﻭﻣﻨﺎ ﻟﻤﻦ ﺗﺠﻴﺐ ﺍﻟﻠﻪ ﻛﺮﻳﻢ ..
ﺍﺧﺬﻧﺎ ﺟﺪﻱ ﻭﻭﺩﺍﻧﺎ ﻟﻠﺒﺮﺩ ﺑﺄﻃﺮﺍﻑ ﺍﻟﺴﻤﺎﻭﺓ ﺍﻟﺒﻴﺖ ﮔﺮﺍﻳﺒﻬﻢ ﻫﻨﺎﻙ ﺍﻟﺤﻴﺎﺓ ﻏﻴﺮ .. ﻋﻴﺸﺘﻬﻢ ﻣﺜﻞ ﺍﻟﺒﺪﻭ .. ﺗﻠﮕﻮﻧﺎ ﻭﻋﺰﻭ ﺟﺪﻱ ﺑﺤﺴﻦ ﻭﺍﺑﻮﻱ ﻭﻋﺘﺒﻮﺍ ﻻﻥ ﻣﺤﺪ ﮔﺎﻟﻬﻢ ..
ﻭﻫﻢ ﺍﺻﻼ ﻣﺎﻋﺪﻫﻢ ﺗﻠﻔﻮﻥ ﺍﺭﺿﻲ ﻭﺍﺣﺪ ﻳﺘﻮﺍﺻﻞ ﻭﻳﺎﻫﻢ
ﺩﺧﻠﻨﺎ ﻳﻢ ﺍﻟﻨﺴﻮﺍﻥ .. ﺭﺣﺒﻦ ﺑﻴﻨﺎ ﻭﻋﻴﻨﻬﻦ ﺟﺎﻧﺖ ﻋﻠﻴﻪ ..
ﺳﺄﻟﻨﻲ ﺍﺫﺍ ﻣﺘﺰﻭﺟﺔ ﻟﻮ ﻻ .. ﻻﻥ ﺷﺎﻓﻦ ﺍﻟﺤﻠﻘﺔ ﺑﻴﺪﻱ .
ﺟﺪﻱ ﻭﻋﻤﺘﻲ ﻣﺎﮔﺎﻟﻮﻟﻬﻢ ﺍﻧﻲ ﺟﻨﺖ ﻣﺮﺕ ﺣﺴﻦ ..
ﻭﻣﻦ ﺳﺄﻟﻮﻧﻲ ﻭﻳﻦ ﺭﺟﻠﺞ ..
ﺟﺎﻭﺑﺖ ﻋﻤﺘﻲ .. ﺑﺎﻟﺠﻴﺶ ﻭﺍﺣﻨﺔ ﺟﺒﻨﺎﻫﺎ ﻭﻳﺎﻧﺎ ﺗﺘﻮﻧﺲ ..
ﺟﺎﻥ ﻏﺮﺽ ﺟﺪﻱ ﻳﺒﻌﺪﻧﻲ ﻋﻦ ﺍﻟﺒﻴﺖ ﻭﺍﻛﻤﻞ ﺍﻟﻌﺪﺓ ..
ﺑﻴﺘﻬﻢ ﺟﺎﻥ ﻣﻦ ﻃﻴﻦ ﻭﺍﻟﺴﻴﺎﺝ ﻣﻦ ﺧﻮﺹ .. ﺣﻼﻝ ﻫﻮﺍﻱ ﻭﮔﻴﻌﺎﻥ .. ﻣﻦ ﺷﻔﺘﻬﻦ ﻭﺍﺣﻨﺔ ﺟﺎﻳﻴﻦ ﺍﺷﺘﺎﻗﻴﺖ ﺍﻟﮕﺎﻋﻨﺎ ﻣﻦ ﻧﻠﻢ ﺍﻟﻤﺤﺼﻮﻝ .. ﺑﺲ ﮔﺎﻋﻨﺎ ﻣﺜﻞ ﺍﻟﺒﺴﺘﺎﻥ ﺟﺒﻴﺮ ..
ﻫﻢ ﮔﻴﻌﺎﻧﻬﻢ ﻣﻔﺘﻮﺣﺔ ﻭﺍﻟﺤﻼﻝ ﻳﺴﺮﺣﻮﻥ ﺑﻲ ..
ﻫﻨﺎﻙ ﺟﻨﺖ ﺣﺎﺑﺴﺔ ﺭﻭﺣﻲ ﻭﻫﻢ ﺍﺻﻼ ﻣﺎﻳﻄﻠﻌﻮﻥ .. ﺑﺲ ﻧﺴﻮﺍﻧﻬﻢ ﺍﻟﻜﺒﺎﺭ ﻳﺮﺣﻦ ﻳﺴﺎﻋﺪﻥ ﺯﻟﻤﻬﻦ ﻭﻳﺴﺮﺣﻦ ﺑﺎﻟﺤﻼﻝ ﻟﻮ ﻳﺤﻠﺒﻦ ﺍﻻﺑﻘﺎﺭ ..
ﺣﻴﺎﺗﻬﻢ ﺑﺴﻴﻄﺔ ﺑﺲ ﺣﻠﻮﺓ .. ﺍﻟﻮﺟﻮﻩ ﻛﻠﻬﺎ ﺗﻀﺤﻚ ﻭﻣﺎﻛﻮ ﻭﺍﺣﺪ ﻳﻐﻨﺪﺏ ﺑﺎﻟﻮﺟﻪ ..
ﻓﺮﺣﺖ ﻣﻦ ﺷﻔﺖ ﻋﻨﺪﻫﻢ ﺑﻨﺎﺕ ﺑﮕﺪﻱ ﻫﻮﺍﻱ .. ﻭﺍﺗﻌﺠﺒﺖ ﻫﻦ ﻣﺜﻠﻲ ﻭﺑﻌﻤﺮﻱ ﻭﻣﺨﻄﻮﺑﺎﺕ ﺍﻟﻮﻟﺪ ﺍﻋﻤﺎﻣﻬﻦ ﻭﻣﺘﺰﻭﺟﺎﺕ ﺍﻟﻬﻴﺞ ﻣﺎﺍﺳﺘﻐﺮﺑﻦ ﻣﻦ ﻋﺮﻓﻦ ﻣﺘﺰﻭﺟﺔ ..
ﻋﻤﺘﻲ ﺟﺎﻥ ﺑﺎﻟﻬﺎ ﻳﻢ ﻋﻤﻮ ﻓﺎﺭﺱ .. ﻭﻛﻞ ﻳﻮﻡ ﺗﻔﺰ ﻣﻦ ﻧﻮﻣﺘﻬﺎ ﺗﻠﻌﻦ ﺍﻟﺸﻴﻄﺎﻥ ﻭﺗﺴﺘﻐﻔﺮ ﻭﺗﺼﻠﻲ .. ﺍﺳﻤﻌﻬﺎ ﺗﺪﻋﻲ ﻭﺗﺒﺠﻲ .. ﺭﺑﻲ ﮔﻠﺒﻲ ﺗﻌﺐ ﻣﻦ ﺍﻟﻔﺮﺍﮒ .. ﻻﺗﻤﺘﺤﻨﻲ ﺑﻔﺎﺭﺱ ﺍﻣﻮﺕ ..
ﺑﻜﻞ ﻣﺮﺓ ﺍﺳﻮﻱ ﺭﻭﺣﻲ ﻧﺎﻳﻤﺔ ﻭﺍﺳﻤﻌﻬﺎ ﺗﮕﻌﺪ ﺑﺎﻟﻠﻴﻞ ﺗﺼﻠﻲ ﻭﺗﺒﺠﻲ ﻭﺗﻨﺎﻡ .. ﺍﺗﻌﺠﺐ ﻋﻠﻴﻬﺎ .. ﻟﻴﺶ ﻫﻴﺞ ﺗﺤﺒﻪ . ﻭﻟﻴﺶ ﺗﺨﺎﻑ ﻋﻠﻴﻪ ..
ﺟﺎﻧﻮ ﻋﺎﺯﻟﻴﻨﻲ ﺍﻧﻲ ﻭﻋﻤﺘﻲ ﺑﻐﺮﻓﺔ ﻭﺣﺪﻧﺎ ﻧﺎﺧﺬ ﺭﺍﺣﺘﻨﺎ .. ﻭﺟﺪﻱ ﺑﺎﻟﻤﻀﻴﻒ ﺍﻟﺒﺮﺓ ﻳﻨﺎﻡ .. ﺯﻟﻤﻬﻢ ﻣﺎﻳﺪﺧﻠﻮﻥ ﻟﻠﺒﻴﺖ ﺍﺑﺪ
ﺑﺲ ﺣﻴﺎﺗﻬﻢ ﺣﻠﻮﺓ .. ﺣﺘﻰ ﻣﺮﺿﻲ ﻣﺎﺣﺴﻴﺖ ﺑﻲ ﻭﻧﺴﻴﺘﺔ ﺍﺻﻼ .. ﺟﻮﻫﻢ ﻭﺍﻟﻄﺒﻴﻌﺔ ﻏﻴﺮﺕ ﻣﻦ ﻧﻔﺴﻴﺘﻲ ﻫﻮﺍﻱ ..
ﺻﺎﺭ ﺍﺭﺑﻌﻴﻦ ﺍﺑﻮﻱ ﻭﺭﺍﺡ ﺟﺪﻱ ﻟﻬﻨﺎﻙ ﻳﺴﻮﻳﻪ ﻭﺍﻧﻲ ﻭﻋﻤﺘﻲ ﺑﻘﻴﻨﺎ ﺑﺲ ﺑﻴﻮﻣﻬﺎ ﺻﻠﻴﺖ ﺍﻟﻪ ﻭﻗﺮﺃﺕ ﻗﺮﺁﻥ .. ﻃﻮﻝ ﻫﺎﻟﻔﺘﺮﺓ ﺧﺘﻤﺖ ﺍﻟﻘﺮﺁﻥ ﺍﻟﻪ ﻣﺮﺗﻴﻦ ﻻﻥ ﻣﺎﻋﻨﺪﻱ ﺷﻐﻞ ﻭﻋﻤﺘﻲ ﻣﺮﺍﺕ ﻣﺎﺗﺨﻠﻴﻨﻲ ﺍﺧﺘﻠﻂ ﺑﺎﻟﺒﻨﺎﺕ ﺧﺎﻑ ﻳﺰﻝ ﺍﻟﺴﺎﻧﻲ ﺑﺤﺠﺎﻳﺔ .. ﺟﻨﺖ ﻣﺨﻠﺼﺔ ﺳﺎﺩﺱ ﺍﺑﺘﺪﺍﺋﻲ ﺑﺲ ﺍﻋﺮﻑ ﺍﻗﺮﺃ ﻭﺍﻛﺘﺐ ﻛﻠﺶ ﺯﻳﻦ .. ﺣﺘﻰ ﺍﻟﻘﺮﺁﻥ ﺍﻗﺮﺍﻩ ﺑﻼ ﺍﺧﻄﺎﺀ ..
ﺭﺟﻊ ﺟﺪﻱ ﻣﻨﺎﻙ ﺑﻌﺪ ﻛﻢ ﻳﻮﻡ .. ﻭﺍﻟﺤﻠﻮ ﺑﻴﻬﻢ ﺍﺑﺪ ﻣﺎﻳﺪﺧﻠﻮﻥ ﺭﻭﺣﻬﻢ ﻭﻳﺴﺄﻟﻮﻥ ﻟﻴﺶ ﺍﺣﻨﺔ ﻫﻨﺎ ﻭﺷﻨﺴﻮﻱ ..
ﺍﺻﻼ ﻫﻢ ﻣﻜﻴﻔﻴﻦ ﺑﺠﺪﻱ ﻭﻳﮕﻠﻮﻟﻪ ﻣﻦ ﺍﺟﻴﺖ ﺷﻴﺨﻨﺎ ﺟﺒﺖ ﺍﻟﺨﻴﺮ ﻭﻳﺎﻙ .. ﺟﺪﻱ ﺟﺎﻥ ﺧﺎﻳﻒ ﻋﻠﻴﻪ ﻣﻦ ﻋﻤﺎﻣﻲ ..
ﻣﺎﺍﺩﺭﻱ ﻟﻴﺶ .. ﺑﺲ ﺳﻤﻌﺘﻪ ﺑﻴﻮﻡ ﺍﻟﻄﻠﻌﻨﺎ ﻣﻦ ﺑﻴﺘﻨﺎ ﮔﺎﻟﻬﺎ ﻣﺎﺍﺛﻖ ﺑﻴﻬﻢ ﺍﺧﺎﻑ ﻳﻐﺪﺭﻭﻫﺎ ..
ﻣﺮﺕ ﺧﻤﺲ ﺍﺷﻬﺮ ﺍﻟﺤﻤﻠﻲ .. ﻭﺍﻧﻲ ﻣﺎﻣﺮﺍﺟﻌﺔ ﺍﺑﺪ .. ﺍﻟﻄﻔﻞ ﺻﺎﺭ ﻳﺘﺤﺮﻙ ﻭﺍﻧﻲ ﺍﺧﺎﻑ ﻣﻦ ﺍﺷﻮﻑ ﺷﻠﻮﻥ ﻳﺘﺤﺮﻙ ﻣﺜﻞ ﺍﻟﺴﻤﺠﺔ ﻣﻦ ﺗﻠﺒﻂ ﺑﺎﻟﻤﺎﻱ .. ﺍﻭﻝ ﻣﺮﺓ ﺗﺤﺮﻙ ﺑﻴﻬﺎ ﮔﻌﺪﺕ ﻋﻤﺘﻲ ﺍﺑﺠﻲ ﻭﺍﮔﻠﻬﺎ ﻣﺪﺭﻱ ﺷﻨﻲ ﻳﺘﺤﺮﻙ ﺑﺒﻄﻨﻲ ..
ﺍﺟﺖ ﺑﻴﺒﻴﺘﻬﻢ ﺣﺴﻨﺔ ﺍﺳﻤﻬﺎ ﺗﻀﺤﻚ ﻋﻠﻴﻪ ..
- ﻭﺝ ﺟﺪﺓ ﻏﻴﺮ ﻫﺬﺍ ﺍﻟﻔﺮﺥ ﻳﺘﺤﺮﻙ .. ﺷﻤﺎﻟﺞ ﺗﺨﺎﻓﻴﻦ
- ﻟﻴﺶ ﻳﺘﺤﺮﻙ ﺑﺲ ﻻﻳﻮﮔﻊ ..
ﺿﺤﻜﺖ ﺍﻛﺜﺮ ﻫﻲ ﻭﻋﻤﺘﻲ .. ﺟﺎ ﻫﻮ ﻣﺸﻜﻞ ﺣﻴﻠﺔ ﻭﻳﻮﮔﻊ
ﻣﺎﺗﮕﻠﻴﻠﻲ ﺷﻠﻮﻥ ﻋﺮﺳﺘﻲ ﻭﺗﺤﻤﻠﺘﻲ ﺍﻟﺮﺟﻞ ﻭﺗﻀﺤﻚ ..
ﻣﻊ ﻣﺮﻭﺭ ﺍﻻﻳﺎﻡ ﺻﺎﺭﺕ ﺣﺮﻛﺘﺔ ﻣﺜﻞ ﺍﻟﻬﺎﺟﺲ ﺑﺤﻴﺎﺗﻲ ﺍﺫﺍ ﺳﺎﻋﺔ ﻣﺎﺍﺗﺤﺮﻙ ﺍﺗﺴﻮﺩﻥ ﻭﺍﺑﻘﻰ ﺍﺭﺍﻗﺒﺔ ﻟﻮ ﺍﺣﺮﻙ ﺑﻄﻨﻲ ﺣﺘﻰ ﻳﺘﺤﺮﻙ ..
ﺍﻧﻲ ﻣﺎﺍﻋﺮﻑ ﺍﺣﺴﺐ ﺑﺲ ﻋﻤﺘﻲ ﺗﺤﺴﺒﻠﺔ .. ﺑﻔﻀﻞ ﺍﻟﻠﻪ ﺣﺘﻰ ﺍﻟﺴﻜﺮ ﻣﺎﺗﻌﺒﻨﻲ ﻭﻋﻤﺘﻲ ﺟﺎﻧﺖ ﺧﺎﻳﻔﺔ ﻋﻠﻴﻪ ﻛﻞ ﻳﻮﻡ ﺗﮕﻠﻲ ﺧﻠﻲ ﻧﺎﺧﺬﺝ ﻟﻠﺪﻛﺘﻮﺭﺓ ..
ﻭﺍﻟﺠﺪﺓ ﺣﺴﻨﺔ ﻣﺎﺗﻘﺒﻞ ﻭﺗﮕﻠﻬﺎ .. ﻛﻠﻨﺎ ﻧﺤﺒﻞ ﻭﻧﭽﻴﺐ ﻣﺎﺭﺣﻨﺎ ﺍﻟﺪﺧﺘﻮﺭﺓ ﻳﻮﻡ . ﺭﺍﺡ ﺍﻧﻄﻴﻬﺎ ﺍﻋﺸﺎﺏ ﺍﺳﻮﻳﻠﻬﺎ ﺧﻠﻄﺔ ﻭﺍﻓﻮﺭﻫﺎ .. ﻭﻋﻠﻰ ﺭﻳﺠﺎﻫﺎ ﺗﺸﺮﺑﺔ ﻭﺷﻮﻓﻲ ﺷﻠﻮﻥ ﺗﺼﻴﺮ .. ﺟﻨﺖ ﺑﺎﻟﮕﻮﺓ ﺍﺟﺮﻋﻪ ﻣﺮ ﻭﺭﻳﺤﺘﺔ ﻣﻮﻃﻴﺒﺔ ﺑﺲ ﻋﻤﺘﻲ ﺗﺠﺒﺮﻧﻲ ﻭﺗﻜﺘﻠﻨﻲ ﺍﺫﺍ ﻣﺎﺍﻗﺒﻞ ..بيج قصص عراقيه حقيقيه من واقعنا.روعه الطائي
ﻣﺮﻥ ﺍﻟﺨﻤﺲ ﺍﺷﻬﺮ ﻭﺍﻧﻲ ﻣﺎﺍﻋﺮﻑ ﺷﻨﻮ ﺑﻴﻪ ﻭﻟﺪ ﻟﻮ ﺑﻨﻴﺔ ﺍﻟﺠﺪﺓ ﺣﺴﻨﺔ ﺗﮕﻮﻝ ﺑﻴﺞ ﻭﻟﺪ ﺟﻴﻒ ﺍﻧﻲ ﺍﻋﺮﻑ ﺍﻡ ﺍﻟﻮﻟﺪ ﺷﻠﻮﻥ ﺗﻜﻮﻥ .. ﻭﻋﻤﺘﻲ ﺟﺎﺑﺖ ﺻﻮﻑ ﻭﺗﺤﻮﻛﻠﻲ ﻫﺪﻭﻡ ﺍﻟﺤﻜﻤﺖ ﻻﻥ ﻣﻦ ﺣﺴﺒﺖ ﮔﺎﻟﺖ ﻳﺠﻲ ﺑﺎﻟﺸﺘﺎ .. ﻃﺒﻌﺎ ﻫﻲ ﺳﻤﺘﻪ ﻣﻦ ﻳﻮﻡ ﺍﻟﺤﻠﻤﺖ ﺑﺠﺪﻱ ﺣﻜﻤﺖ ﻭﻣﻦ ﺳﻮﻟﻔﺖ ﺍﻟﺠﺪﻱ ﺧﻀﻴﺮ ﻫﻢ ﮔﺎﻝ ﻧﺴﻤﻴﻪ ﺣﻜﻤﺖ ..
ﺷﮕﺪ ﻛﺮﻫﺘﺔ ﻟﻠﻄﻔﻞ ﺍﻭﻝ ﻣﺎﺣﺒﻠﺖ ﺑﻲ ﻭﻣﺎﺭﺩﺗﺔ ﺑﺲ ﻣﻦ ﺗﺤﺮﻙ ﺑﺒﻄﻨﻲ ﻭﺻﺎﺭ ﺟﺰﺀ ﻣﻦ ﺣﻴﺎﺗﻲ ﺍﺗﻌﻠﻘﺖ ﺑﻲ ﻭﮔﻤﺖ ﺍﺣﺴﺐ ﺷﻮﻛﺖ ﻳﺠﻲ ﻭﺍﺷﻮﻓﺔ .. ﻳﻤﻜﻦ ﻫﻮ ﻫﺪﻳﺔ ﻣﻦ ﺭﺑﻲ ﻳﻌﻮﺿﻨﻲ ﻓﮕﺪﺍﻥ ﺍﻫﻠﻲ ﻭﺍﺧﻮﻱ ﺍﻟﻤﺎﺷﻔﺘﺔ ..
ﺍﻟﺤﺮﺏ ﻣﺴﺘﻤﺮﺓ ﻭﺍﻟﻌﺮﺍﻕ ﻭﺿﻌﻪ ﻳﻐﻠﻲ ﺍﻛﺜﺮ ﻭﺍﻛﺜﺮ .. ﻭﻛﻞ ﺍﻟﻲ ﻋﻨﺪﺓ ﺍﻣﻞ ﺗﻨﺘﻬﻲ ﻓﻘﺪﺕ ﺍﻻﻣﻞ ﻻﻥ ﺻﺎﺭﺕ ﺍﻟﺴﻨﺔ ﺍﻟﺜﺎﻧﻴﺔ ﻭﻣﺎﺗﻐﻴﺮ ﺷﻲ .. ﺷﺒﺎﺏ ﻫﻮﺍﻱ ﺭﺍﺣﺖ ﻭﺣﺘﻰ ﺻﻐﺎﺭ .. ﺍﻳﺘﺎﻡ ﻛﺜﺮﺕ ﻭﻧﺴﻮﺍﻥ ﺗﺮﻣﻠﺖ .. ﺑﺎﻟﺒﺮ ﻣﺎﻧﺴﻤﻊ ﺷﻲ ﺯﻳﻦ ﻣﻮ ﻣﺜﻞ ﻣﺎﺟﻨﺔ ﻋﻨﺪ ﺍﻫﻠﻨﺎ ﻛﻞ ﻳﻮﻡ ﻧﺴﻤﻊ ﺟﺎﺑﻮ ﺷﻬﻴﺪ
ﺍﻟﺤﻴﺎﺓ ﻣﺴﺘﻤﺮﺓ ﺍﻟﺤﻤﺪﻳﺔ ﺑﺎﻟﻨﻬﺎﺭ .. ﻫﻲ ﻣﻦ ﺍﻟﻨﻮﻉ ﺍﻻﺟﺘﻤﺎﻋﻴﺔ ﺭﻭﺣﻬﺎ ﻣﺮﺣﻪ ﻭﺍﻟﻜﻞ ﻳﺤﺒﻬﺎ ﺣﺘﻰ ﺍﻟﺠﺪﺓ ﺣﺴﻨﺔ ﺍﺗﻤﻨﺘﻬﺎ ﺍﻻﺑﻨﻬﺎ ﮔﺎﻃﻊ ﻟﻮ ﻣﺎﻣﺘﺰﻭﺟﺔ ..
ﺍﻣﺎ ﺍﻟﻠﻴﻞ ﺍﻟﻬﺎ ﺟﺤﻴﻢ ﻭ ﻃﻮﻳﻞ .. ﻋﻴﻮﻧﻬﺎ ﻣﺸﺒﻮﺣﺔ ﻟﻠﺒﺎﺏ ﺩﻭﻡ ﺑﻠﻜﻲ ﺧﺒﺮ ﻳﺠﻴﻬﺎ ﻣﻦ ﻓﺎﺭﺱ ﺍﻟﻲ ﻃﻮﻟﺖ ﻏﻴﺒﺘﺔ ﻭﻣﺎﻣﺶ ﺧﺒﺮ ﻣﻨﻪ .. ﻛﻞ ﺍﻟﻠﻴﻠﺔ ﺗﺨﻠﻲ ﺍﻟﺒﻨﺎﺕ ﺩﺍﻳﺮ ﻣﺪﺍﻳﺮﻫﺎ ﻭﺗﮕﻌﺪ ﺗﺴﻮﻟﻔﻠﻬﻦ ﻋﻦ ﻋﺸﮕﺎﻫﺎ ﺍﻟﻔﺎﺭﺱ ﻭﺷﻠﻮﻥ ﻓﺘﺤﺖ ﻋﻴﻨﻴﻬﺎ ﻭﮔﻠﺒﻬﺎ ﻋﻠﻴﻪ .. ﻣﻦ ﻫﻲ ﺗﺤﺠﻲ ﻫﻴﺞ ﺍﻟﺒﻨﺎﺕ ﻛﻠﻬﻦ ﻳﺒﺎﻭﻋﻠﻠﻬﺎ ﻭﻳﺴﺮﺣﻦ ﻭﻳﺎﻫﺎ ﺑﻌﺎﻟﻤﻬﺎ ..
ﻭﻳﻤﻜﻦ ﻛﻞ ﻭﺣﺪﺓ ﺑﻴﻬﻦ ﺗﺘﺨﻴﻞ ﻋﺎﻟﻤﻬﺎ ﺍﻟﺨﺎﺹ .. ﻭﻣﻨﻬﻦ ﺭﺿﺎﺀ ﺍﻟﻲ ﮔﺎﻣﺖ ﺗﺤﺲ ﺑﺎﻟﻤﺸﺎﻋﺮ ﺍﻟﻲ ﺗﺤﺠﻴﻬﺎ ﻋﻤﺘﻬﺎ ﻫﺎﻻﺷﻬﺮ ﻛﺒﺮﺗﻬﺎ ﻭﻭﻋﺘﻬﺎ ﺍﻛﺜﺮ ﻟﻠﺪﻧﻴﺎ .. ﺗﺘﺬﻛﺮ ﺣﺴﻦ ﺩﺍﺋﻤﺎ ﻻﻥ ﺑﺲ ﻫﻮ ﺍﻟﻲ ﺟﺎﻥ ﻳﻨﻄﻴﻬﺎ ﻫﻴﺞ ﻣﺸﺎﻋﺮ .. ﺗﺒﺘﺴﻢ ﻣﻦ ﺟﺎﻥ ﻳﺸﺘﺮﻳﻠﻬﺎ ﻭﻳﺨﺎﻑ ﻋﻠﻴﻬﺎ .. ﺑﺲ ﻣﻦ ﺗﺘﺬﻛﺮ ﺍﻟﺨﻮﻑ ﺍﻟﻲ ﺳﺒﺒﻪ ﺍﻟﻬﺎ ﻭﺷﻠﻮﻥ ﺍﻟﻜﻞ ﻇﻠﻤﻬﺎ ﻭﻋﻤﻬﺎ ﻭﻣﻬﺪﻱ ﺷﻠﻮﻥ ﻛﺘﻠﻮﻫﺎ ﺑﺴﺒﺒﻪ .. ﺗﺨﺘﻔﻲ ﺍﻻﺑﺘﺴﺎﻣﺔ ﻭﺗﻜﺮﻫﺔ ﻟﺪﺭﺟﺔ ﺗﮕﻮﻡ ﻣﻨﻬﻦ ﻭﺗﻨﺎﻡ ﺑﻔﺮﺍﺷﻬﺎ ﺣﺘﻰ ﻣﺎﺗﺴﻤﻊ ..
ﻧﻔﺲ ﺣﺎﻟﺔ ﺣﻤﺪﻳﺔ .. ﺳﻌﺪﻳﺔ ﺑﻨﺖ ﺍﻟﺠﺪﺓ ﺣﺴﻨﺔ ﺍﻟﻲ ﻣﺎﺧﺬﻩ ﺍﺑﻦ ﻋﻤﻬﺎ ﻭﻫﻢ ﺭﺍﺡ ﻟﻠﺠﻴﺶ ﻭﺑﺎﻟﻬﺎ ﻳﻤﻬﺎ .. ﻫﺴﺘﻮﻫﺎ ﺣﺎﻣﻞ ﻣﻦ ﺭﺍﺡ ﻭﺟﺎﺑﺖ ﻭﻫﻮ ﻣﺎﻛﻮ ..
ﺗﺤﻮﻟﺖ ﺫﻳﺞ ﺍﻟﻤﺸﺎﻋﺮ ﻭﺍﻟﺒﺴﻤﺔ ﺍﻟﺤﺰﻥ ﺑﻌﺪ ﻣﺎ ﺳﻌﺪﻳﺔ ﺣﺠﺘﻠﻬﻦ ﺷﻠﻮﻥ ﺗﺸﺘﺎﻗﻠﺔ ﻭﺗﺤﻠﻢ ﺑﻲ ﻭﺗﮕﻌﺪ ﺗﻠﮕﻴﻪ ﻣﺎﻫﻮ ﺑﻔﺮﺷﺘﺔ .. ﻳﺎﺗﺮﻯ ﻛﻢ ﻭﺣﺪﺓ ﻣﺜﻞ ﺳﻌﺪﻳﺔ ﻭﺣﻤﺪﻳﺔ ﻭﺣﺘﻰ ﺭﺿﺎﺀ .. ﺍﻟﻲ ﺍﺧﺬ ﻣﻨﻬﻦ ﺍﻟﻘﺪﺭ ﺣﻴﺎﺗﻬﻦ ﻭﺳﻌﺎﺩﺗﻬﻦ ..
ﻟﻜﻦ ﻟﻼﺳﻒ ﻫﺬﺍ ﺟﺎﻥ ﺣﺎﻝ ﺍﻛﺜﺮ ﺍﻟﺒﻨﺎﺕ ﺑﺬﺍﻙ ﺍﻟﻮﻛﺖ ..
ﺑﻌﻤﺮ ﺻﻐﻴﺮ ﻟﻮ ﺗﺘﺮﻣﻞ ﻟﻮ ﻳﺘﺄﺳﺮ ﺯﻭﺟﻬﺎ ﻭﺗﺒﻘﻰ ﻣﺨﻠﺼﺔ ﺷﺒﺎﺑﻬﺎ ﺗﻨﺘﻈﺮ ﻭﻫﻲ ﺑﺎﻻﻋﺮﺍﻑ ﻣﺎﺗﺪﺭﻱ ﺣﻴﺎﺗﻬﺎ ﻟﻠﺠﻨﺔ ﻟﻮ ﻟﻠﻨﺎﺭ ..
ﻣﺮﺕ ﺍﻻﺷﻬﺮ ﻭﺟﺪﻱ ﺑﻘﻰ ﻣﺎﺑﻴﻦ ﻫﻨﺎﻙ ﻭﺍﻟﮕﺎﻉ ﻭﻣﺎﺑﻴﻨﺎ ..
ﻛﻠﻤﺎ ﻳﺮﻭﺡ ﺗﺪﺯ ﻋﻤﺘﻲ ﺣﻤﺪﻳﺔ ﻭﻳﺎﻩ ﻃﺎﺭﺵ ﻟﻌﻴﺎﻟﻬﺎ ﺑﻠﻜﻦ ﻋﻤﻲ ﻓﺎﺭﺱ ﺟﺎﻱ ﻟﻮ ﺩﺍﺯﻟﻬﺎ ﻣﻜﺘﻮﺏ ..
ﻣﺮﺓ ﻣﻦ ﺍﻟﻤﺮﺍﺕ ﻣﺎﺍﺗﺤﻤﻠﺖ ﻭﺭﺍﺣﺖ ﻭﻱ ﺟﺪﻱ .. ﺑﻘﻴﺖ ﺍﻧﻲ ﺑﺎﻟﺒﺮ .. ﺗﻌﻮﺩﺕ ﻋﻠﻰ ﺍﻟﺒﻨﺎﺕ ﻭﺣﺒﻴﺘﻬﻦ ﻭﺍﺻﻼ ﻫﻤﺔ ﻣﺎﻣﻘﺼﺮﻳﻦ ﻭﻳﺎﻱ .. ﻭﺟﺪﺓ ﺣﺴﻨﺔ ﺗﺤﻴﺮ ﺷﺘﺴﻮﻳﻠﻲ ﺣﺘﻰ ﺍﺗﻐﺬﻯ ..
ﺑﺲ ﻣﻦ ﺭﺍﺣﻮﺍ ﺟﺪﻱ ﻭﻋﻤﺘﻲ ﺍﺣﺲ ﮔﻠﺒﻲ ﺭﺍﺡ ﻭﻳﺎﻫﻢ ﺧﺎﺻﺔ ﻋﻤﺘﻲ ﺣﺴﻴﺘﻬﺎ ﺍﻣﻲ ﻭﺭﺍﺣﺖ ﺍﻭ ﻳﻤﻜﻦ ﺍﻛﺜﺮ .. ﺗﻌﻠﻘﺖ ﺑﻴﻬﺎ ﻛﻠﺶ ﻫﺎﻟﻔﺘﺮﺓ .. ﻭﺗﻌﻮﺩﺕ ﻋﻠﻰ ﻭﺟﻮﺩﻫﺎ ﻳﻤﻲ
ﺭﺍﺣﺖ ﻭﺭﺟﻊ ﺑﺲ ﺟﺪﻱ .. ﻃﻠﻌﺘﻠﺔ ﺑﺒﺎﺏ ﺍﻟﺤﻮﺵ ﻻﻥ ﻣﺎﻳﮕﺪﺭ ﻳﺪﺧﻞ ﻧﺴﻮﺍﻥ ﻭﺯﺣﻤﺔ ..
- ﻋﻤﺘﺞ ﺑﺎﻟﻬﺎ ﻳﻢ ﺭﺟﻠﻬﺎ ﻭﻣﺎﻗﺒﻠﺖ ﺗﺠﻲ ﺍﻻ ﺗﺸﻮﻑ ﺧﺒﺮﻩ ﺷﻨﻲ ..
- ﻭﺷﻠﻮﻥ ﺗﻌﺮﻑ ﺧﺒﺮ ﻋﻨﺔ ..
- ﺍﻫﻠﻪ ﻋﻨﺪﻫﻢ ﻧﺎﺱ ﻳﻌﺮﻓﻮﻫﻢ ﺑﺎﻟﺪﻭﻟﺔ ﺭﺍﺡ ﻳﺴﺄﻟﻮﻥ ﻋﻨﻪ ﻭﺑﻠﻜﻦ ﻳﺠﻴﺒﻮﻥ ﺧﺒﺮ ﺯﻳﻦ ..
ﺍﻧﺘﻲ ﺷﻠﻮﻧﺞ ﻳﺒﻌﺪ ﺟﺪﺝ .. ﻭﺣﻜﻤﺖ ﺷﻠﻮﻧﻪ ﻛﻮﻥ ﻣﺎﻣﺘﻌﺒﺞ ﺑﺎﻟﻲ ﻳﻤﺞ ﺑﺲ ﺗﺪﺭﻳﻦ ﻣﻮ ﺑﻴﺪﻱ ﺯﺣﻤﺔ ﺍﮔﻠﻬﻢ ﺍﺭﻳﺪ ﺍﺷﻮﻓﻬﻦ ﺑﺲ ﺍﺧﺒﺎﺭﺝ ﺗﻮﺻﻠﻨﻲ ﻣﻦ ﺣﺠﻴﺔ ﺣﺴﻨﺔ ﻣﻦ ﺗﻄﻠﻊ ﺗﺴﺮﺡ ﻟﻮ ﺗﺤﻠﺐ ﺍﻟﺤﻼﻝ ﺍﻧﺸﺪﻫﺎ ﻋﻠﻴﺞ ..
ﺑﺎﺱ ﺭﺍﺳﻲ ﻭﺭﺟﻌﺖ ﺩﺧﻠﺖ .. ﻓﺮﺣﺎﻧﺔ ﺑﺨﻮﻑ ﺟﺪﻱ ﻭﺣﻤﺎﻳﺘﻪ ﺍﻟﻲ .. ﻟﺴﺎ ﺍﺗﺬﻛﺮ ﺷﻠﻮﻥ ﺣﻤﺎﻧﻲ ﻣﻨﻬﻢ ﻭﺣﻀﻨﻲ ..
ﻟﻮ ﻣﺎﻫﻮ ﺟﺎﻥ ﻫﺴﺎ ﺍﻧﻲ ﻣﻴﺘﺔ .. ﻣﺮ ﺷﻬﺮﻳﻦ ﻭﺻﺮﺕ ﺑﺎﻟﺴﺎﺑﻊ ﻭﻋﻤﺘﻲ ﻣﺎﻛﻮ .. ﺑﻘﻰ ﺑﺎﻟﻲ ﻳﻤﻬﺎ ﺍﻟﺠﻮ ﺑﺪﺃ ﻳﺒﺮﺩ ﻭﻫﻨﺎﻙ ﺍﻟﺒﺮ ﻣﻜﺸﻮﻑ ﻭﺑﻴﻮﺕ ﻣﻜﺸﻮﻓﺔ ﻭﻃﻴﻦ .. ﺣﺴﻴﺖ ﺭﻭﺣﻲ ﻣﺴﺘﺒﺮﺩﺓ .. ﺟﺎﻧﻦ ﻳﺸﻌﻠﻦ ﺑﺎﻟﺤﻮﺵ ﻣﻨﻘﻠﺔ ﻭﻳﺘﺪﻓﻮﻥ ﻋﻠﻴﻬﺎ ﺟﻬﺎﻟﻬﻢ ﻭﺑﻴﺘﻬﻢ ﻣﺘﻌﻮﺩﻳﻦ ﻋﻠﻰ ﺍﻟﺠﻮ ..
ﺟﺎﻧﻮﺍ ﺧﺎﻳﻔﻴﻦ ﺍﻟﻮﺿﻊ ﻳﺰﻳﺪ ﻭﺍﻟﻨﻔﻂ ﻳﻨﮕﻄﻊ ﻓﺤﺴﺒﻮﺍ ﺣﺴﺎﺑﻬﻢ ﻭﻳﺘﺮﺳﻮﻥ ﺩﺑﺎﺕ ﻛﺒﺎﺭ ﻭﻳﻀﻤﻮﻫﻦ ..
ﺑﻄﻨﻲ ﻛﺒﺮﺕ ﻭﺍﺣﺲ ﺭﻭﺣﻲ ﺳﻤﻨﺎﻧﺔ .. ﺑﺲ ﺍﻟﺒﻨﺎﺕ ﻳﮕﻠﻠﻲ ﺣﻠﻴﺎﻧﺔ ﺍﺣﻠﻰ ﻣﻦ ﺍﻟﻀﻌﻒ .. ﻭﺟﻬﺞ ﻣﺘﻔﺢ .. ﺟﻨﺖ ﻣﺘﻮﻗﻌﺔ ﻫﺎﻱ ﺍﻛﺒﺮ ﻫﻤﻮﻣﻲ ﺍﻟﺤﻤﻞ ﻭﺍﻟﻲ ﺻﺎﺭ ﻗﺒﻞ ﺍﺷﻬﺮ
ﺍﺷﺘﺎﻗﻴﺖ ﺍﻟﺤﻮﺷﻨﺎ .. ﻭﺍﻻﺑﻮﻱ ﻛﻠﺶ .. ﻣﻴﺘﺔ ﻋﻠﻴﻪ ﻭﺑﺎﻻﺷﻬﺮ ﺍﻻﺧﻴﺮﺓ ﻫﻮﺍﻱ ﺍﺣﻠﻢ ﺑﻲ ﻭﻣﺎﻫﻲ ﻋﻤﺘﻲ ﻳﻤﻲ ﺗﻔﺴﺮﻟﻲ ﺍﻟﺤﻠﻢ .. ﺟﺎﻧﺖ ﺍﺫﺍ ﻣﻮ ﺯﻳﻦ ﺗﮕﻮﻝ ﻣﺎﺍﻓﺴﺮﻩ ﻻﻥ ﻳﺘﺤﻘﻖ .. ﺍﺷﺘﺎﻗﺘﻴﻠﻬﺎ ﻛﻠﺶ ..
ﻃﻠﻌﺖ ﺍﺩﺯ ﻃﺎﺭﺵ ﺍﻟﺠﺪﻱ ﻣﻦ ﺍﻟﺠﻬﺎﻝ .. ﺍﺷﻮﻓﻬﻦ ﻳﺴﻮﻟﻔﻦ ﺑﻮﺳﻂ ﺍﻟﺤﻮﺵ ﻭﻳﮕﻮﻟﻦ ﺧﻄﻴﺔ ﻣﺎﺗﺴﺘﺎﻫﻞ ﻣﺒﻴﻨﺔ ﺗﺤﺒﻪ ﺟﺎﻧﺖ .. ﺍﺳﻤﻌﻬﻦ ﻳﺴﻮﻟﻔﻦ ﻭﺟﻦ ﻳﻘﺼﺪﻥ ﻋﻤﺘﻲ .. ﺗﺨﺒﻠﺖ ﻭﻣﺎﺿﻞ ﻋﻨﺪﻱ ﻋﻘﻞ ﺗﺴﻮﺩﻧﺖ .. ﮔﻠﺖ ﻋﻤﻲ ﻓﺎﺭﺱ ﺟﺎﺑﻮﻩ ﺷﻬﻴﺪ ﻫﺎﻟﻌﻤﺘﻲ ﻣﺎﺍﺟﺖ ﻭﻃﺎﻟﺖ ﻏﻴﺒﺘﻬﺎ ..
ﺗﺬﻛﺮﺕ ﺍﺑﻮﻱ ﻣﻦ ﻣﺎﺕ ﻭﻛﺴﺮﺗﻲ ﺑﻌﺪﺓ .. ﺍﺟﺘﻤﻌﺖ ﺍﺣﺰﺍﻧﻲ ﻛﻠﻬﺎ ﻭﻻﻥ ﻣﺎﻟﺤﮕﺖ ﺍﺣﺰﻥ ﻋﻠﻰ ﺍﺑﻮﻱ ﻭﺍﺷﺒﻊ ﺑﺠﻲ ﻃﻠﻌﺖ ﻗﻬﺮﻱ ﻭﺣﺰﻧﻲ ﻛﻠﻪ ﺑﻴﻮﻣﻬﺎ .. ﺍﻟﻰ ﺍﻥ ﺣﺴﻴﺖ ﺷﻲ ﻳﻮﮔﻊ ﻣﻨﻲ ﻭﺍﻟﺒﻨﺎﺕ ﻻﺯﻣﺎﺗﻨﻲ ﻭﻳﺤﻠﻔﻦ ﻣﺎﻛﻮ ﺷﻲ ﻭﻣﺎﻣﺎﺕ ..
ﻣﻦ ﺣﺴﻴﺖ ﺑﻤﺎﻱ ﻭﮔﻊ ﺯﺍﺩ ﺧﻮﻓﻲ ﻭﺍﻟﺒﺠﻲ ﻋﻠﻰ ﺭﻭﺣﻲ ﻧﺴﻴﺖ ﻋﻤﺘﻲ ﻭﻋﻤﻲ ﻓﺎﺭﺱ ﻭﺧﻔﺖ ﻋﻠﻰ ﺍﻟﻄﻔﻞ ..
ﮔﻤﺖ ﺍﺻﻴﺢ ﻳﻤﻜﻦ ﺑﻠﺖ ﻋﻠﻰ ﺭﻭﺣﻲ ﻣﺎﺍﺩﺭﻱ ﺷﺒﻴﻪ ﻭﺯﺍﺩ ﺍﻟﻮﺟﻊ ﻋﻨﺪﻱ ﻭﺟﻦ ﺭﻭﺣﻲ ﻃﻠﻌﺖ .. ﺭﻛﻀﻦ ﺻﺎﺣﻦ ﺍﻟﺠﺪﺓ ﺣﺴﻨﺔ ﺍﺟﺖ ﺗﺮﻛﺾ ﺍﻭﻝ ﻣﺎﺷﺎﻓﺘﻨﻲ ..
- ﻭﻟﺞ ﻫﺎﻱ ﺗﻄﻠﮓ ﺍﻟﺤﮕﻠﻲ ﺑﻤﺎﻱ ﺣﺎﺭ .. ﻭﺍﻧﺘﻲ ﻳﻤﺔ ﺗﻌﺎﻱ ﺗﻤﺪﺩﻱ .. ﻓﺮﺷﺖ ﺟﺮﺟﻒ ﻋﻠﻰ ﺍﻟﻔﺮﺍﺵ ﻭﺍﻧﻲ ﺑﺲ ﺍﺑﺠﻲ ﻭﺍﺻﻴﺢ ﻣﻦ ﺍﻟﺨﻮﻑ ﻭﺍﻟﻮﺟﻊ ﺍﺛﻨﻴﻨﻬﻦ ..
ﺳﻤﻌﺖ ﺳﻌﺪﻳﺔ ﺗﺤﺠﻲ .. ﻳﻤﺔ ﺑﻌﺪﻫﻲ ﺑﺎﻟﺴﺎﺑﻊ ﺧﻄﻴﺔ ..
- ﻭﺷﻌﻠﻴﻬﺎ ﻣﻮ ﺍﺧﻮﺗﺞ ﺍﺛﻨﻴﻨﻬﻢ ﺍﺳﺒﻌﻴﻪ ﻭﻫﺴﺎ ﺷﻜﺒﺮﻫﻢ .. ﺭﺣﻤﻬﺎ ﺻﻐﻴﺮ ﻣﺎﻳﺘﺤﻤﻞ ﻭﺍﻟﻈﺎﻫﺮ ﺍﻟﻄﻔﻞ ﺟﺒﻴﺮ ..
ﻳﻠﺔ ﻫﻤﻦ ﺍﺩﻳﺠﻦ ﺑﺴﺮﻋﻪ ﻭﻋﺎﻭﻧﻨﻲ ..
ﺧﺒﺼﺘﻬﻦ ﺑﺎﻟﺼﻴﺎﺡ ﻭﺭﻭﺣﻲ ﺻﺎﺭﺕ ﻳﻢ ﺟﺪﻱ . ﻻﻥ ﺑﺲ ﻫﻮ ﻳﻤﻲ .. ﺍﺭﻳﺪ ﺟﺪﻱ ﺟﻴﺒﻮﻟﻲ ﺟﺪﻱ ..
ﻭﺍﻟﺠﺪﺓ ﺗﻀﺤﻚ ﻋﻠﻴﻪ ﻭﺗﮕﻠﻲ .. ﻭﻳﻨﺔ ﺍﺟﻴﺐ ﻳﺨﺎﻳﺒﺔ ﺣﻴﺮﻱ ﺑﺮﻭﺣﺞ ﻭﺳﺎﻋﺪﻳﻨﻲ ﻻﺗﻜﻀﻴﻦ ﺍﻟﻄﻔﻞ ﺭﺧﻲ ﺭﻭﺣﺞ
ﻣﺎﺍﻋﺮﻑ ﻛﻠﺸﻲ ﻭﻻﺍﻓﻬﻢ ﺷﺘﺤﺠﻲ ﻣﻦ ﺍﻟﻮﺟﻊ ..
ﺍﺣﺲ ﺻﻮﺗﻲ ﺭﺍﺡ ﻣﻦ ﺍﻟﻌﻴﺎﻁ ﻭﺳﻌﺪﻳﺔ ﺧﻠﺖ ﺧﺎﻭﻟﻲ ﺑﺤﻠﮕﻲ ﻋﻴﻮﻧﻲ ﻳﺒﺠﻦ ﻭﺣﺪﻫﻦ .. ﺍﺗﺨﻴﻞ ﺍﻣﻲ ﻳﻤﻲ ﻭﻻﺯﻣﺔ ﺍﻳﺪﻱ .. ﻭﻳﻨﺞ ﻳﻤﺔ ﺭﺍﺡ ﺍﻣﻮﺕ ﻭﻣﺎﺷﺎﻳﻔﺘﺞ .. ﻓﺘﺤﺖ ﻋﻴﻨﻲ ﻭﺟﻦ ﺍﺑﻮﻱ ﻻﺯﻡ ﺭﺍﺳﻲ ﻭﻳﻬﺪﺃ ﺑﻴﻪ .. ﺍﺭﺗﺎﺣﻴﺖ ﻣﻦ ﺷﻔﺘﻪ .. ﻭﺟﻦ ﺍﮔﻠﻪ ﺍﺧﺬﻧﻲ ﻭﻳﺎﻙ ﻣﺎﻳﻘﺒﻞ ﻳﻬﺰ ﺑﺮﺍﺳﻪ ﺑﺎﻟﺮﻓﺾ .. ﺑﻌﺪﻫﺎ ﻣﺎﺣﺴﻴﺖ ﺑﺸﻲ ﺍﺣﺲ ﺭﻭﺣﻲ ﻃﻠﻌﺖ ﻭﻧﻔﺴﻲ ﺍﻧﮕﻄﻊ .. ﺑﺲ ﺟﻨﺖ ﺍﺳﻤﻊ ﺻﻮﺗﻪ ﻣﻦ ﻳﺒﺠﻲ ..
ﻃﻠﻌﺖ ﺍﺧﺮ ﻛﻠﻤﺔ ﻣﻨﻲ .. ﺍﻟﻄﻔﻞ ﺯﻳﻦ؟؟ ..…… ﺑﻌﺪﻳﻦ ﺫﺍﺑﺖ ﺭﻭﺣﻲ !!
# ﺑﻘﻠﻤﻲ _ ﺍﻟﻜﺎﺗﺒﺔ _ ﺷﻤﺲ
ﻳﺘﺒﻊ ….
ﻻﺗﻨﺴﻮﻥ ﺍﻟﺘﺼﻮﻳﺖ ﺣﺒﺎﻳﺐ ..