صباح الخير حبايب ❤
(19)

#حكمـة_ذئب

#بقلم_شمس_السعدي

صفنا كلنا على البنية الجانت تضحك وتگول اني مرتة
تغيرت ملامح بتول وشهگت :
- شگلتي ؟
ردت عمتي حمدية بعد مااشرت البتول تصبر ..
- حبيبة انتي خاف غلطانة بالعنوان لو احد دزاج علينا ترى مهدي عندة اثنين نسوان هاي الجبيرة وتأشر على بتول وهاي بنت عمة الصغيرة ..

بقت تعاين عليه وصفنت :
- انتي هم مرتة ..
سكتت مارديت لان اصلا مايهمني اذا تزوج لو لا بس بتول ماجانت مثلي باردة طفرت من مكانها ..
- احجي ولج منو دزج علينا مهدي مايبدلني بوحدة مثلج الله العالم منين جاية ..

حجت المرة الوياها :
عيب خية شني هالحجي مثل ماانتي مرتة هي مرتة وصارله عاقد عليها ثلاث اشهر وهسا حبلة ومايرضى يعقد عليها محكمة يگلها اهلي مايدرون ..
سمعنا جده شيخ ويخاف الله ومايقبل بالظلم.

بتول لهنا ونفذ صبرها طفرت على البنية وملخت شعراتها الصفر تملخ ..
المرة تصيح وتدفع ببتول وتحامي بنتها :
ولج راح تكتلين الطفل وخري
وبتول ترد :
- اني اريد اكتله هاي اذا صدگ حامل ..
اعاين على بتول جانت بالگوة تاخذ النفس والوجه احمر من العصبية ورافعه ردنها لفوگ ولازمة شعر البنية وذيج تصيح ..
وعماتي لازماتها يدفعن بيها : لاتكتل الطفل وتبتلي ..
بس بتول ماتشوف بعينها من الغضب
مااعرف اذا اضوج عليها او لا بعد الي سوتة بيه
بس هي انكسرت مرتين مرة لمن اتزوجني مهدي ومرة هسا لكن هالمرة جانت كسرتها اكبر .من تزوجني مهدي جانت تعرفه مجبور من جدي وماجان يتگربلي ويحبها ومايقبل على زعلها ..
اما هسا فـ بالوكت الي جانت تريد ترجع علاقتها بي من جديد بعد ماجانت زعلانة ..
اتفاجأت بزواجه وعدم اهتمامة الها .. هسا عرفنا وين جان طول ذيج الفترة الغايب بيها ..

عمتي ماگدرت تسيطر على بتول وخافت على البنية ليصير بيها شي گالتلهن :
- خية اخذي بنتج وروحي منا بايعات روحجن امشي واني احجي وي ابوي ..
بالگوة گدرن يشردن من البيت البنية مكفوش شعرها
وگامت تركض بعباتها للشارع يلة لبستها وامها تحجي وتصيح :
- يالغبرة ذني يموتنج بيوم ويطرحنج ديري بالج تگعدين وياهن ..

گعدت بتول بوسط الهول ملخت شعرها وتلطم وتبجي اول مرة اشوفها بهيج حالة ..
واليكسر الگلب اكثر ابنها حمودي اتقرب يمها من شافها تبجي دفعته وانرگع بالگاع ..
ركضت اخذته وشلتها عنها.. وعمتي گامت تحجي عليها
- يالغبرة شعليه الطفل خطية وبعدين انتي شفتهمتي من السالفه خلي يجي مهدي وابوي وانشوف ..
عمتي لميعة بقت تلومها :
- كلة من ايدج كل يوم زعلانة ورايحة الاهلج وهو رجال هم يمل ويريد حضن مرة لاذيج تخليه يتگربلها وانتي زعلانة وين ينطي وجهة ..

صاحت بيها بتول : طبعا تدافعيله وتطلعين الصوج بيه غير ابنج محد حاس بناري محد وتضرب على رجلها
صارت عينها بعيني حجت :
- اتشمتي بيه يرضوة اجتج بماعون من ذهب .. الله لاينطيك يمهدي عبن خليت اليسوة والمايسوة يتشمت بيه ..
ضربتها عمتي لميعة على راسها : لاتدعين عليه
گامت بتول : والله ماابقى بالبيت والا احرمة من ولده

لزمتها عمتي لميعة : اگعدي يالغبرة عبالج يهتم هاي قبل هسا عندة مرة وطفل بالطريق شيسوي بيج
اگعدي هنا على جيادها انتي مرتة الاولى وام اولاده شعليج بالسلابات الاخذهن من تالي ..

ردتها عمتي : ضبي السانج لميعة اذا رضوة سلابة انتي شني ..
خلصت عركة بتول دور عماتي بينهن ..
سكتت ورجعت للمطبخ ..سداد جانت تضحك : دور راح البيت يصير بس مغامرات هسا شيصير لو اخلص وارتاح من المشاكل

اندگت الباب اجة جدي وعمي والولد واحنة شغلنا ماكملناه لسا ومابقى شي الدورة السنة ..
سلم جدي ونزع شماغة انطانياه وگعد يم الصوبة
تلگتهم بتول تبجي وتلطم وجدي صافن عليها :
- ياستار شكو ولجن شصاير كلما نروح ونرجع تتلگنا بالمشاكل ..

ردت عمتي : بوية اليوم اجت مرة هي وبنتها بعدهي شابه وصغيرة .. وگالت هي مرت مهدي وحامل منه هم

شهگ جدي : شلون ؟
ووين مهدي لسا مااجة
- لا بعده
- ماسألتنها شلون وشوكت عرس
- والله بوية مافهمنا  بس هاي الكلمة ودور بتول ماخلتنا نفتهم السالفه وطلعن من البيت ومااظن يرجعن بعد
بين ماحضرنا العشا بس اني وسداد البيت كلة مخبوص بهاي السالفة
سمعت صوت مهدي گمت اقرأ ايات خفت على جدي والمصايب التجيه ..
جان حكمة يمي بالمطبخ علمود الفانوس جان يقرأ
ردت اطلع اشرلي يمة ارجعي عوفيهم مالنا شغل ..
هم اني رجعت كملت صب مسوين شوربة كبة وزلاطة
بس جنت اسمع حجيهم كله :

گال جدي : تعال يهدي اگعد
رد : خير جدي شكو
بتول مااتحملت عاطت : ياخاين الله لاينطيك متزوج عليه ..

هو سكت وبعدها رد : منيلج هالحجي جذب ماكو هيج شي ..
عمتي : البنية وامها اجن اليوم وگالن ومرتك حامل وانت ما ترضى تعقد عليها محكمة ..

صار يتلعثم ومايعرف يرد .. بس بتول ماانطتة مجال يحجي وفرغت كل الي بكلبها لمن صاح جدي وعمي عليها يلة سكتت
- اسكتي خلينا نفهم .. وانت منين هاي وشوكت اخذتها
رد : جدي والله مااعرف شلون ضحكت عليه وقشمرتني وخلتني اعقد عليها صاح بي جدي : وانت زعطوط كل الي تقشمرك تاخذها بعدة عمك سنة ماطالعة وانت حاير تتزوج وتتونس منين اصلها فصلها لو اخذتها ونسة وعبالك بنات العالم لعبة

مهدي : لا مو لعبة بس هي من البداية گلتلها متزوج وتعرف وضعي بس غدرتني وحبلت وتريد تلوي ذراعي الا اطلگها واعلمها شلون تجي من وراي ..

صاح جدي : اسمع ولك اذا طلعت صدگ حامل تجيبها وتجي الحوشك اني مااقبل الناس تحجي عليه من وراك اني عرفتك من صرت سايق گلت ماراح يكعد راحة ونسوان صاعدة نازلة ويصخم وجهي..

صاحت بتول : شنو يجيبها لهنا اگلب البيت والله مثل مااخذها يطلكها لو تحرم عليه شوفتي اني وجهالي

رد مهدي : جدي مااريدها المرة التلوي ذراعي مااريدها
بتول : يعني هذا الهامك لان لوت ذراعك مااستحيت مني ومن جهالك كل يوم ماخذلك وحدة تتونس وياها وتشمرها

صاح جدي بيها :شو انتي ماتعرفين تسولفين يله روحي الحجرتج .. وانت روح راضي مرتك لان ضلمتها ..
وبعدين نسولف بهاي السالفه ..
يلة صبولنا العشا بوية ..

خلينا العشا بس محد اله شهية ياكل بس الشروبة شربوها وهاهي ..
اصوات بتول ومهدي ماهدأت النص الليل لمن مهدي اخذ بطانية وراح للديوانية ..
گاعدين بالغرفة وحكمت نايم من وكت دخل جدي
اني وعمتي ملتهين بالخياط
گعد يمنا : يراد اكمل الطابق الفوگ خو مانضل محبوسين كلنا هنا ؟
عاين عليه : خو مازعلانة بوية بسبب عملة مهيدي
ابتسمت : ليش اني معتبرتة رجل حتى ازعل واضوج اصلا مايهمني اذا عرس لو لا ..
واتمنى تطلگني منه وارتاح ..

ضاج من حجايتي : لا بوية عيب هالحجي ماعدنا مرة تتطلگ ومايصير گلتي مااريدة ولااريد گربه عذزتج لان مايستاهلج بس طلاگ لا اعذريني بعدج صغيرة والناس ماتسكت
سكتت ماگدرت احاجيه بعد مهدي بشغله بالسيارة وجان ياخذ ركاب سفرات وزيارات وجان متفق وي مرة يسموها حملة دار .. هاي المرة تجمع نسوان وعوائل من المنطق وتسجلهم وتاخذهم زيارات لو سفرات ودوم تأجر مهدي ياخذهم
مهدي الي ماجانت بگلبه بس بتول فتح عينة عليها وحبها واتزوجها حتى ماگدر يحب رضاء بسببها رغم رضاء اصغر منها واحلى بس حبه جان البتول الي ماقدرت هالحب وصارت كل يوم عركة وزعل وعلى كل سبب وكل شغلة ..
بفترة شغله بالسيارة تعرف على نسوان هواي وجان يخلص وياهن وكت لو لحظات عابرة ومرات يكتفي بالنظرات..
الى ان مرة صعدت وياه بنية تصير بنت الحملة دار اسمها وسن .. بنية رفيعة بس صاحبة عيون كبار وبشرة خمرية ومرتبة نفسها كلش مطولة اظافرها وكل مرة تصعد تصبغهن شكل ..
البنية مو صغيرة كلش والظاهر فايتها القطار وشافت نظرات مهدي وحبت تستغلهن ..
بكل زيارة وسفرة جانت تروح وي امها الى ان صارت النظرات كلام ومسكات يد واعجاب ..
تعلق مهدي بيها حيل وهنا بطلت تروح وي امها بعد رادت تجره الها وتوگعه بحبالها ..
وصدگ مرة مرتين الثالثة مااتحمل مهدي وسأل امها عليها ..المرة تعرف بغاية بنتها ردت عليه : ياخالة الناس گامت تحجي وانت الله يهديك ماتشيل عينك منها وابوها ماقبل تروح بعد وياي شتگول الناس علينا ..

بس مهدي مااستسلم وقرر يحجي وي امها يشوفها لان نيتة مو لعب وناوي يتزوجها ..
طبعا هو جانت عندة غير غاية ..
اخذتة البيتهم  وگالتله من الباب مانبقى هواي ..
وسن هالمرة طلعتلة سافرة والشعر نازل وملابس ضيقة وبارزة مفاتنها تخبل مهدي وگالها اني احبج اذا تقبلين بس نعقد لان اني متزوج واهلي مايرضون ..
طبعا بدون تردد وافقت وطلع ابوها اصلا متزوج ومو يمهم مهدي جايب عالم وجماعته على اساس اهلة ابوها حاضر العقد ورايح ..
وهيج مهدي حصل على غايتة بعد ماالام والبنت طبخنها صح من اول ليلة اشترط عليها مهدي اطفال ماكو بس هي اصرت تحبل حتى تضمن زواجها قانونيا
بس من عرف حبلت تسودن وگالها تذبيه اني ماخذج اريد ارتاح يمج مو حتى اخلف ويبدي التعب ..
رغم هي جانت مخبلتة بدلعها ودلالها ومن يجيها تنسيه حتى نفسه بس ماگدرت تقنعه بشغلة الطفل الى ان سألت على بيت اهلة وعرفت جدة منو وشنو .. اجت وهي متأملة راح تصير جنة هذا البيت ومرتة حالها حال الموجودة بس انصدمت من شافت رضاء وعرفت هاي مرتة هم .. صغيرة وحلوة وماناقصها شي جا شنو الخلاه يدور بنات برى بيتة ..

ثاني يوم انطى جدي قرارة وگالة تعقد عليها بالمحكمة وتعلن زواجك منها بعد ماحمدية تاخذها ويرحن يتأكدن من حملها بالمستشفى مااريد اظلم بنت العالم حتى لو اخذتها تتونس بس گدام الله والناس هي مرتك ولازم تتحمل مسؤوليتها ..

عمتي راحت وياه وبتول تفرفح وتخبلت تالي راحت البيت ام هيثم وخابرت اهلها يجون ..
باجر دورة السنة وعمتي راحت وي مهدي الخفيفي كامل وعلى اساس هي تسوي حلاوة التمن وراحت بعد ما جدي گالها ..
عمتي لميعة مافارغة وحايرة ببتول الي كل شوية تريد تذب نفط على روحها وتحرگها لو اجت وسن للبيت .

جازفت وگلت خلي اسويها اني واوزعها هم يلة نلحگ
صدگ سويتها حسب مااشوف عمتي تسويها جنت دوم اعاين عليها من تطبخ ..
رغم خايفه تخرب بس طلعت طيبة وثخينة وصافية اني احبها صافية مو محببه ..
صبيتها بماعين صغار وعلى كل ماعون خفيفية واطراف الجدر گعدنا اني وسدن اكلناها احب جاب الجدر .
سداد هالفترة زينة ولان ماعندها احد احسها تريد تترقب وتسولف وياي ..
واحنة بالمطبخ ناكل يجعل الجدر سألتني :
- شو انتي ماتغارين على مهدي مثلها .. كسرت گلبي من البارحة لليوم موتت روحها ..
رديت :
يمكن لان هي تحبه وانصدمت بي .. اني ماحبيته او ليش اجذب جربت احبه واهتم بي بس اخوج دمر هذا الحب قبل لايبدي وموته ..
مااعرف ليش حجيت الها بس يمكن جنت محتاجة احجي وافرغ الي بداخلي ..
اتنهدت : الله العالم لو اجت ذيج الثانية شيصير البيت يمكن ساحة معركة ..
بس صدگ وين راح تگعد ..
- سمعت جدي راح يطلع عمال للطابق الفوگ يكملة والجوة عود بعدين من يصير عندة ..
خطية هالفترة مضنوك وماعندة بس شيسوي..
فوگاها الجو بارد ..
قاطعتني سداد : اي بس جدي گاله جيبها لهنا بعد ماتعقد محكمة وين ينامون ..
- ماادري هسا عود خلي يجون والله كريم ..
گمنا اني وياها لبسنا عباياتنا واخذنا ماعين الحلاوة بصواني ووزعناها على العالم وگلنالهن باجر بالثنتين القراية .. حسب حجي عمتي ..

رجعنا لگينا عمتي مبلشة بالثواب .. لان باجر جمعة وجدي راد يسوي الثواب ليلة الجمعة اثوب ..
سألناها على مهدي ومرتة الجديدة..
هزت راسها وجانت تشرب ماي .. اي حامل الها ثلاث اشهر ..
سألتها سداد : يعني شنو راح يجيبها لهنا
- اي گاله جده بعد دورة السنة رتب امورك وجيبها ..

سكتنا وعمتي بقت تحجي علينا لان ماثارمين الحشو التهينا بالحلاوة من ضاگتها تسودنت عليها تگلي انتي ماخذة نفسيتي بالطبخ ..

اجت وداد للظهر وسولفتلها سداد تخبلت وتعاركت وي امها تگلها :
- شأگول لعيالي اخوي حابلة وحدة وحبلة منه ..
صاحت بيها عمتي لميعة :
خاف راح اعوفكم واهج كافي عليه ذيج المسودنة راح تموت روحها مو فارغتلجن ..

عمتي حمدية ردت : يلة فضني عوفن الحجي مانلحگ بعد.. تگابلنا كلنا على الثواب حتى غدا ماتغدينا ركض بركض اجو كرار وحيدر ولليل التمت الزلم صبينا وكملنا ..
ورى الثواب بقوا اهل بتول وصار حجي وي مهدي وجدي وتالي اخذوا بتول وطلعوا ومهدي گالها اذا طلعتي مالج رجعه بعد بس هي عاندت وراحت ..
مااتحملت حبيبها وزوجها يكسرها مرتين لكن المرة الثانية كانت اكبر واقوى ..

ثاني يوم من غبشة اخذنا مهدي بسيارتة للنجف زرنا عمي وخطية حيدر وكرار ناموا على الگبر ويگلوله يابة مشتاقيلك ضعنا بلياك وهالشي ضوج جدي وقرر يزوجهم ويجمعهم من جديد ببيتة .

رجعنا تعبانين ساعه 12 الظهر وعدنا قراية بـ 2 يدوب لحگنا تغدينا ورتبنا البيت وبخرناه بدت تجي النسوان
تجمعت النسوان والعلويات كلهن اجن ..
بجيت من گلبي والملة تقرأ .. تذكرت امي وابوي وفراگهم .. بقيت افكر بأمي معقولة بعد ماتخابر حتى بيت ام هيثم بعد مايدزون علية ..

بعد ماكملت القراية كعدت يم مرت هيثم ومسك بوسطنة حليانة وكبرانة صايرة بالرابع وصعب عليها الرياضيات گلتلها خلي تجي يدرسها حكمت شاطر
ردت :لا عيني ام حكمت اني احبج وحكمت هم احبه ولد معدل وحباب بس ابوها حريص ومنبه ماتطلع اذا بيها مجال يوم الجمعه يجي يمنا بالديوانية ويدرسها واني يمهم ..
رديت عليها : اگلة وارجعلج خبر ولو ادريه يستحي
بعدين جبتها سوالف وسألتها على امي اذا تخابر بعد ..
جاوبت وهي تمتمت :
والله ماادري شأكلج هي جانت تخابر ونردها تال هيثم ماقبل وگال العمتي تگلها ماتخابر بعد .. وبعد ماندري بيها ..
رديت عليها : لا حقكم هم يخاف عليكم
ردت : بس عمتي گالتلها عندج وليد وفرحت وگامت تبجي كسرت گلبنا وعمتي اتعذرت منها وگالتلها لاتخابرين بعد الخطوط متراقبة وهي هم بعد ماخابرت
مااعرف ليش ضجت جنت صح ماارد عليها من تجيني مسك تگلي بس جنت احس بأحساس حلو من اعرف مخابره ..
يلة يمكن هذا الي لازم يصير وهيج احسن الي والها
او يمكن العمر كلة مانلتقي بعد وتبقى بس ذكرياتنا

مر كم يوم مانحس الا مهدي جايب وسن وجنطة بيده شايلها بقينا صافنين ..
اشرلها ركضت باست ايد جدي سحبها وگال استغفر الله
بس عمي صالح وعمتي لميعة ماقبلوا تسلم عليهم ..
سلمت علينا وردينا عادي ..
اشرلها مهدي تدخل الغرفة بتول فارغة ..
جدي عاين على مهدي .. باجر اكدلي على العمال خلهم يطلعون يبلشون ولو راح يبدي رمضان ..
بس هو كامل بس لبخ ويصبون الگاع والشبابيك ..
وعود انت اصبغلك غرفة واگعدوا بيها حتى ترجع مرتك ذيج ..
رد مهدي : بس جدي
اشرله : اشششش انت تسكت وماتحجي وعود اوصيك كل يوم جيبلك وحدة وگول هاي مرتي ..

سكت مهدي ومارد وراح دخل وراها ..
الوضع هادي والبيت كل واحد بمكانة .. وسن جانت تحاول تكسب جدي وعمتي مااعرف شني غايتها حتى وياي تسولف وتضحك ..
ومرة سألتني : شو مااشوف مهدي يبات يمج
جاوبتها : اني زوجته على الورق بس .. حسيتها فرحت وارتاحت ..
مر كم يوم وبدت ننظف بالغرفة واسمر بالغراض الزايدة رغم هي مو غرفتها وعمتي لميعة تعاركت وياها وگالتلها .. بعد ماتنامين بيها افرشي بالديوانية ونامي لاعبالج صاحبتها ماترجع ..ترى بتول مرتة الاولى وام اولادة..
وسن ضاجت ومن هنا بدت المشاحنات بينهن ..
وسن نادرة ورغم حملها تگعد من الصبح تنظف وتساعد عمتي ومرات من تشوفنا نخيط لو نشتغل تكعد يمنا بحجة تتعلم ..

بدأ رمضان وهي طول النهار رغم حامل بس ويانا وتركض الجدي تجيبله الطشت والماي يتوضى حتى لاحظت عمتي حمدية بدت تحبها ..
نكمل فطور توگف وياي ع الماعين وبعدين تروح الغرفتها تطلع عروس السبعة ..
حتى مهدي بعد مايبات برة البيت .. وهي تدلعة وتدلل عليه بس من يشوفني يأشرلها تسكت عباله اضوج لو انقهر ..
كمل رمضان واصرت عمتي ننزع الاسود ونزعناه ..
جدي جبر مهدي يراضي بتول ويجيبها للبيت ..
اجت اول يوم العيد ..
من فاتت علينا بقينا مصدومين .. مو بتول الي نعرفها مضعفة روحها صاير جسمها حلو وكاصة شعرها مدرج وكاصة گذلة ومشسورتها صفح وصابغة الشعر والمكياج طوخ رغم ماتخلي  مكياج هي ..
تعجبنا من شفناها وحسيت بحيرة مهدي الي واگف بنصهن واثنينهن يتنافسن عليه ..
بس هالمرة زاحت الكفة البتول لان ماشايفها صار شهر ومتغيرة .. اما وسن فبدأ حملها يتعبها وكبرت بطنها
فبقت هي جوة واشترالها مهدي غرفة بمكان غرفة بتول وصعد غرفة بتول فوگ ..
من رادت تدخل بتول الغرفتها اشرلها مهدي ..
غرفتج فوگ .. استغربت وضاجت ..
بس مارادت تسوي مشكلة من اول يوم ..
صعدت لفوگ هي واولادها ..
بين ماحضرنا الريوگ المتعودين عليه بالاعياد ..
استغل مهدي الفرصة وصعد وراها ونزل الجهال الي جانوا فرحانين بالطابق الفوگ طبعا جان مرتب واحلى من الطابق الجوة لان گعدنا بي وبعد ماكامل حتى بيبان مابي وخلينا بردات وهسا يلة شكلوا البيبان ..
جدي خلة العندة كله ع الطابق الفوگ لان جان يفكر بكرار وحيدر يريد يزوجهم ويجبهم لهنا ..

بتول من نزلت جانت نضحك وتهز بشعرها ..
مهدي الغرف الفوگ خلي نفرش وحدة منهن الجهال
قاطعها جدي : الغرف الفوگ وحدة الكرار ووحدة الحيدر ..
ردت عمتي لميعة : شني ناوين يرجعون ..
رفع راسه جدي ورد : ليش مو بيتهم هذا ؟
سكتت كلها ومحد حجة ..

جدي يحاول بكل الاشكال يجمع العائله ومايخليها تتطشر .. ولهيج يدوس على گلبه ويتحمل ..
من اول ليلة بدأت المشاحنات بين بتول ووسن .. بس مهدي ختمها وگالهن :
لاتسودنني اليوم عند بتول وباجر عندج وسن وهيج راح نبقى بين يوم ويوم مااريد  مشاكل بعد ..

هذا الحجي جان انتصار بالنسبة البتول الي اجت مستعدة للحرب ومانعرف شناوية بس الي مريحيني انها شالتني من راسها وصارت بطريقها وحدة اخطر مني ولازم تزيحها ..
وخاصة بعد ماعرفت الي ببطنها ولد واحتمال يهدد
مستقبل ولدها..

بيوم اني وعمتي بالمطبخ سمعت صوت صراخ ركضنا برة شفنا وسن مددة بالكاع وتصيح من الوجع ..
ركضت عمتي الها وهي تسألها شبيج ؟
جاوبت وهي تصيح من الوجع بتول دفعتني جنت صاعدة اشر الهدوم ..
بس بتول نكرت وگالت اصلا ماجنت فوگ جنت يم عمتي بالديوانية وشهدت عمتي لميعة وياها وحلفن مانعرف اذا جان صدگ لو جذب ..
اخذتها عمتي للمستشفى ولحكهم مهدي ..
الدكتورة وصتها تنام على ظهرها الاشهر الباقية لان الطفل الله ستر ومابي شي بس مهدد بالاسقاط ..اخذها مهدي يم امها ترتاح واخذلها ملابسها وصار بين يوم ويوم يروح يمها ..
بتول ضاجت لمن سمعت الطفل مابي شي ..
واصرت تحبل مرة ثانية بعد ماكل يوم ماخذة عمتي لميعة ورايحات للمستشفى تشوف شني العلة البسها
رغم عدها نعمة جهال بس هي تريد تجيب الولد الرابع المهدي ..وعبالك عندهن منافسة ياهي التجيب ولد اكثر ..

مهدي بعد ماعطلوا الجهال گال اخذكم سفرة للشمال الجو حلو هناك ..
فرحنا كلنا لان جنا محتاجين هيج سفرة نغير بيها جو دز على حيدر وكرار هم ويانا وبيت السادة راحوا منهم سيد علي ووداد والعلويات العلوية مرت سيد هاشم بقت يم العلوية الجبيرة لان حالتها كلش تعبانة

طبعا هاي جانت غاية جدي وخطة عمتي حمدية ورأي اني ..
يوم الي كان العمتي كرار شاف العلوية رقية وعجبته عمتي فرحت وگالت شفايتلي ياخذون العلويات ويرتاحون ..
حجت وي جدي وجدي طلب من مهدي ياخذهم وياه وعمتي قنعت العلوية يرحن العلويات ويانا وگالتلها بأمانتي واني يمهن ..
وخابر على كرار وحيدر لأجدادهم يجون ..
عمتي لميعة ماراحت لان مفاصلها توجعها وهم بقت يم جدي وعمي صالح ووسن هم ماراحت بقت عند اهلها ..

خلصنا خمس ايام هناك جانت من احلى ايامي ..
لاحظت عين كرار تدور على العلوية رقية الي جانت لافه نفسها بالعباية وداخلة بالماي تتحس برودتة وبصفها رگية ..
العلويات هم مثلي ابد مايطلعن ..
اكو واحد يعرفة مهدي من شقلاوة .. استقبلنا ببيتة هو وامة واخواته عايشين ..
شفت عينة على سداد الي نزعت العباية ماقبلت تلبسها بس الحجاب ..

سداد جانت تباوع عليه وفرحانة بنظراته لان اول مرة تحس بهيج احساس راح يصير عمرها سبعة وعشرين سنة وهي مامجربه هالشعور جانت دائما تباوع النسوان مهدي بحسرة من تشوفهن يبدلن ويعدلن ..
هالشعور تجدد عندها لمن لاحظت نظرات الولد عليها رغم هو مو صغير ويمكن بعمر مهدي بس ماهمها العمر المهم تتزوج وخاصه هو من شقلاوة وهالشي فرحها اكثر ..جانت مادة رجليها بالماي وتتخيل حياتها هنا شلون تكون رغم بيتهم بسيط بس هي قانعة وراضية ..
ام الولد الي اسمة راكان جانت عينها عليها والثانية جانت هادية ومطيعة بشكل الى ان قبل لاتخلص السفرة حجت وي حمدية عليها وخطبتها..
بس حمدية اخذتها بضحك وماعبالها السالفه صدگ..
اما كرار مانزل عينه منها رقية لاحظت نظراته الها توترت وكعدت وجانت عينها على اخوها سيد علي لايلاحظ ويتعارك ..
بس سيد علي جان ملتهي يلاعب بنين هو وحكمت ووداد شايلة بنتها صغيرة وترضع لان اجتها بنية ثانية وسمتها اية ..
ضاجت من جابت البنت الثانية بس سيد علي ابد ماضاج وجان فرحان بيهن ..

رضاء :
شفت كرار شلون يعاين على رقية .. ورقية كل شوية ترفع عينها وتنزلها من الخجل ..
گعدت يمها وسألتها : جدي ناوي يخطبج الكرار شني رايج ..
ضحكت العلوية ودنگت .. وهنا عرفت هي موافقة ..
رحت اريد احجي وي كرار وانطيه البشارة..
سألته بالاول .. كرار انت شناوي ؟
جاوب : نيتي صافية يرضوة گلبي متعلگ وهايم ومايحلها الا الزواج .. ضحكت من سمعت رده
رفعت راسي شفت مهدي يمنا وفاتح عينة بوسعهن سحب كرار وضربة وكرار يريد يفهمة بس ذاك مايفهم وفضحنا گدام العالم ..
#بقلمي_الكاتبة_شمس
يتبع ..