اسعد الله اوقاتكم بكل خير احبتي ❤
(16)

#حكمـة_ذئب

#بقلم_شمس_السعدي

يقودني اليكِ
                 شوقاً لا ينتهي
ويردني عنكِ
                جرحاً انتِ صاحبته

الووووو ..
الووووو انتِ رضاء .. صوت يقطع وبعيد جان بالكوة اسمعها ..
اي اني رضاء منو انتِ ..
ماعرفتيني…… اني امج !!

هنا توقف الزمن والوقت وكلشي بحياتي رجعت عشر سنين او اكثر للماضي ..
عبالك اليوم عافتني شفت ذيج الطفلـة الخايفة وهي متشبثة بأمها لكن گلبها مطمأن من امها عصرت ايدها خوف عليها ..

فجأة تفتح الام ايدها وتترك ذيج الايادي الصغيرة ..
تقف الطفلة بذهول وعينها على امها ..
لكن الام انانية فكرت بنفسها ومن حست هي بخطر تركت ايد بنتها وهربت .. اصوات ذيج الطفله وهي تركض وراها تصيح يمة لاتعوفيني يمة ..

كل شي صار بذاك اليوم رجع الذاكرتي وكأنه اليوم ..
جنت مخليه سماعة التلفون بأذني والواير مالتة ملوي گمت الوي بي اكثر من التوتر.. 
ماحجيت بس هي جانت تتوسل تسمع صوتي ..
بعد صمت دقايق والصوت يروح ويجي وساعة الخط يشبج وي غير خطوط ..
سألتها .. شلون انطاج گلبج عفتيني ..
بجت .. ولج اموت ومااعوفج بس مضطرة .. وهمزين مااخذتج جان متي بالمخيمات باردة وماكو اكل جهال هواي ماتت ماعفتج بطر امنتج عند ابوج ..
ضحكت .. ابوي ؟؟ ليش هو وينه ابوي ..
سكتت بعدها ردت .. ابوج وينة شني تزوج ؟؟
ضحكت .. اگلج صدگ شذكرج بيه ؟؟
وج منو كالج نسيتج بس تدرين فترة الحرب لسا گاطعين الخطوط وي العراق مانگدر نخابر وهسا يلة انفتحن ولا لحظة نسيتكم شاهد الله .. نار بگلبي تسعر
اريد اعرف اخبارج سولفيلي عنج ..
اعذريني مااگدر لان مااعرفج واخباري ماتهمج الاحسن ماتخابرين بعد اني جاوبتج بس ردت اعرف ليش عفتيني وشردتي . 
وهم مالگيت جواب يشفعلج ..
صاحت الو الو رضاء يمة لاتسديه اسمعيني خليني افهمج .. صوتها بدأ يخربط وصار بعيد استغليت الوضع وصحت الصوت راح ..
وسديته ..
اول ماخليت السماعه فوگ التلفون ..
گعدت بالگاع وابجي .. گمت اشهگ صوتها لسا يرن بأذني واختلط وي صوتي من جنت اركض وراها واتوسل بيها ماتعوفني ..
شگد اذتني ناس وسامحتها الا هي گلبي مايگدر يسامحها .. رغم حنين الها واشتاقيتلها بس الجرح الي عافته بگلبي بعده ينزف ..

اجت مرت هيثم گومتني على القنفة لان جنت واگفه يم الرف الي عليه التلفون ومن سديته گعدت بالگاع مهدود حيلي ..

سألتني .. هذي امج مووو؟؟ لان گالت من طهران اخابر وخاف ينگطع الخط .. وخالتي مرة سولفتلي عليج وامج شلون سفروها الايران وماشفتيها بعد ..

مسحت دموعي وگمت .. اذا خابرت بعد لاتصيحيلي گليلها ماتقبل ..
- بس خطيه ماشفتي صوتها شلون ملهوف ..
- ماتعرفيها هاي تأنيب الضمير مو لهفة ولا شوگ ..

طلعت من بيت ام هيثم البيتنا ..
تلگتني عمتي .. وين جنتي الباب مفتوح وانتي موش بالبيت گلبي اكلني عليج ..
شمرت روحي بحضنها وبجيت .. وج عمة هسا يلة ذكرتني صار كل هاي السنين ناسيتني مو هي الشمرتني بساحة البيت وراحت ..
لسا اتذكر شلون اركض وراها وابجي وهي صعدت السيارة وراحت مافكرت بيه ..
ليش هسا خابرتني ليش ..

- ولج مني بس لا ماهين ..  وين شفتيها احجيلي ..
من البجي والخنگة مااگدر احجي ..
جرتني للبيت ..
جانن بتول وابنها يتريگون شافتني صفنت
- شبيها هاي مني وياها .. ووين جانت ؟
خزرتها عمتي حمدية .. اني وديتها البيت ام هيثم مالج شغل انتي ؟؟
دخلتني للغرفة عمتي وعدلت البردة لان باب ماكو
وين جنتي ؟
اخذت نفس ومسحت دموعي . عند بيت ام هيثم
جان وين شفتيها وشلون..
بس لاخابرت ؟؟
هزيت راسي .. اي من فتحوا الخطوط بينا هي تخابر على بيت ام هيثم تريدني بس ماتگلهم هي مني تخاف
وليش تخاف ؟؟
ماادري يمكن الخطوط متراقبة .. بس من سمعت صوتها ماادري شصار بيه ؟؟
- وهي وين بعدهي بإيران ..
- اي يمكن .. شمدريني اصلا ماحجيت وياها شي خليتها تحجي وطبگت التلفون ..

ضربت على رجلها .. ليش ولج هيج تسوين .. تلگين گلبها محروگ ومعناها مانستج ..
- لا نستني بس تريد تريح ضميرها . حتى رقم بيت ام هيثم ماناسيته واني ناسيتني ..
- ولج عمة انتي ام وتعرفين شلون الضنا غالي ..
- اي ام بس اذا غاب ابني عني دقيقه اتسودن اتمنى الموت قبل لايصيبه شي .. لو اني بمكانها ابيع اهلي وناسي علمود اولادي .. عمة انتي ماتعرفين الي بگلبي شني ..
هنا نار نار وتسعر بيه ( احجي واضرب على صدري بقبضة ايدي)

سكتتني .. كافي لايسمعنج .. بس اگلج ماسألتيها جابت لا ..
- ماادري ماسألت اصلا مافهمت شي من حجيها لان جنت بصدمة بس بقت تنطيني اعذار وتگلي همزين مااخذتج جان متي بالمخيمات من البرد .
ماتدري لو ماخذتني وميتة ولاعايشة واشوف الشفته

ضربتني عمتي على رجلي .. كافي اسكتي ..
ارتاحي هسا ولاتبينين الذني يرحن يفضحنا والوضع مو زين وتالي يطلعونا غوغائيين ..
بس اگلج رضوه خاف تصنتوا عليجن بالتلفون ويجون ياخذوج .. يمة اسم الله بقت تصفك بيدها وخايفة
طلعت وعافتني تلفلفت بالبطانية ونمت .. او جنت اتصنع النوم حتى محد يشوفني من ابجي واشهگ ..

حسيت بيد تمسح على راسي وبوسة انطبعت على گصتي ..
ام حكمت نايمة اليوم مو عوايدها خير يمة مريضة ؟؟
فتحت عيني ولگيت جمارة گلبي مگابلني ..
- هايمة اجيت من المدرسة ؟؟
- اي اجيت انطونا دروس شكثر واني جنت مجاز تكومن عليه ..
بس ماگلتيلي شبيج احس عيونج مورمة باجية شني ؟؟
- لاتشيل همي انت اني مابيه شي بس راسي يوجعني المهم ترفع راسي بدراستك وتروح للمتوسطة من الاوائل ..
ضحك .. ادعيناج ام حكمت .. ولو ماعبرت عليه هالسالفة بس ماراح اضغط عليج ..
اتقرب يمي كلش لزم ايدي وابسها .. يمة لاتگولين هذا صغير ومايفتهم ترى اني كبرت واعرف الدنيا شبيها
كلشي يضيگ خاطرج گوليه واني اسمعنج ..
بجيت مااتحملت اخذته الحضني وجن ابجي بحضن ابوي مو ابني ..
احس حكمت هو اهلي كلهم ..
خسرت اهلي والله عوضني بي .. ارتاحيت لمن بجيت وهو ماسألني ولا لح عليه .. خلاني براحتي ..
كل ظنه مشاكل بالبيت گعد يواسيني ..
گمت وياه بعد ماتوسل اگوم اتغدا ..
رحت للمطبخ اساعد عمتي جانت عمتي لميعة وسداد جايات من وداد وفرحانات جيف حامل ..

بتول تغسل الخضرة بالملح وتعاين عليه ..
- شبيج اليوم لازم وراج سالفه ..
التفتت عمتي حمدية جانت تگلي ابو زريدة او سمج زوري مثل مايسميه  البعض .. لان عمي هادي يحبه فشكو طبخة او اكلة يحبها عمي جانت عمتي تسويها

صاحتني تعاي گلي بمكاني ظهري وجعني .. جانت تريد تسحبني من يمهن ..
سألت عمتي لميعة .. شبي وجهج صاير شي ورانا ..
ردت بتول .. والله عمة شمدريني گعدت من النوم ماهي دور رجعت من برة تبجي وحالتها حاله ..
يگولن عند بيت ام هيثم شتسوي ماندري .. وتهز بجتفها ..

صفنت عليه عمتي لميعه .. شجنتي تصخمين ببيت ام هيثم شسوولج گولي ..
گلبي طاگ ومقهورة وذني ضغطن عليه اول مرة اعلي صوتي عليها .. شمرت الخاشوگة حيل بالطاوة طفر دهن عليه بس ماحسيت بحرگ گد ماگلبي محترك ..

ردت عليها بعصبيه .. كافي بس تنيشن وراي بجيت ليش بجيتي ضحكت ليش ضحكتي شتردن مني گولن
اي بجيت تذكرت عمي هادي وابوي وبجيت لان بعدهم راحت المحنة راحوا الزينين الهيج ابجي افتهمتن ..
صاحت بيه .. وسم شقصدج صالح مو زين تتمنيله الموت مووو..
عفت المطبخ وعمتي حمدية بقت تحجي عليها ..
عاينت الايدي كلها طفار جوي وصايرة حمرة ..
اجت عمتي وراي جايبة الشكر والماي خلتة على ايدي

- رضوة عمة شفتي اشكال وسكتي بگلبي اگول عفية عليها طلعت قوية وماانكسرت .. اني اشوف روحي بيج وافتخر لاتخلين شي يضعفج فكري بأبنج ..
تدرين كل شوية يعاين عليج بالمطبخ ويروح باله يمج خطيه ولج ..

هي تحجي واني صافنه على السگف الي ماملبوخ ومبين الشيلمان منه .
گامت .. اروح اكمل من نفرش السفرة اصيحج ..
گمت تثقين بالگوة من ايدي تحرگني ..
صليت واستغفرت ربي وگمت ..
لگيتهن يشيلن بالماعين .. ساعدتهن من غير احجي احس بعيونهن يعاينن عليه بس مااهتميت..

كملنا وگعدنا على السفرة .. جانت عيون جدي على مكان عمي هادي .. استغفر ربه وسم بأسم الله ..
سمينا وراه وبدينا ناكل انتبه ليدي .. شبيها ايدج بوية

رديت .. مابيه شي جدي بالطاوة طفر عليه دهن .
اتنهدت عمتي لميعة .. صايرة عصبيه وشمرت الخاشوگة ونجوت من ايدها يعني ..
خزرها عمي صالح .. وجدي مارد ولاجن سامعها ..
الي بي مكفيه ..

كملنا غدا وگمنا للبيت .. النسوان كل عصرية تجي تگعد وتاخذ من خاطرنا للمغرب ويرحن ..
خليت ورق بماعون قديم وحرگتهن حتى يضيع ريحة الزفر ..
دور شعلت بخور وكنست الهول ورتبت المنادر ..
رحت للغرفة شفت جدي نايم ويمة حكمت متلفلف ونايم ..
احس روحي باهتة . هم خليت مخدة وغطا ونمت..
واصلا محد گعدني يمكن عمتي موصيتهن مايگعدني ..
رمضان اوشك على القدوم .. في تلك الفترة اغلب البيوت حزينة ووضع البلد غير مستقر ..
بيت الحجي خضير مو مثل كل سنة برمضان اجوائهم ولمتهم . عائلتهم قلت بوفاة هادي وغياب اولاده الي رجعوا للدوام ..
وبأيام العطل يقضوها عند بيت جدهم بالناصرية ..
بين فترة وفترة يالله يجون يشوفون جدهم خضير جان دائما يعتب عليهم ويشكو جفاهم ..
بس ردهم الوحيد مانگدر بعد نعيش هنا وامنا وابونا ماكو كلشي يذكرنا بيهم ويأذينا جان مهون علينا غياب امنا هو وجود ابونا .. بس هسا اعذرنا جدي نوعدك بس نخلص كلياتنا نرجع ويمكن الذاك الوكت ..
يكون الزمن كفيل بنسيانا ..

ماراد يضغط عليهم وخلاهم براحتهم ..
حمدية جانت على حالها كلما تسمع بأسير رجع ..
تبقى تحوس وتاكل بروحها الى ان ينامون تروح تركض تسأل وتتوسل بالاسير يتذكر ..
تنطيه مواصفات فارس وتحلفه يتذكر .. بس هو يبقى صافن بوجهة وكأنه مايعرف لهجتها او بعالم ثاني ..
كل اليجي هزيل وتعبان ومصدوم ..
تالي اهلة يملون من اسئلتها ويطردوها گد ماتتوسل وتلح ..
سحبها رجال مرة وگالها خوية ترى مو كلهم بنفس المعسكر اكو معسكرات هواي .. وهناك من التعذيب والجوع الواحد اهلة مايتذكرهم مو دور واحد وياه..
ارجعي البيتج وانتظري الفرج لين مايرجعون اسرى غيرهم ..

رجعت خايبة الامل مثل كل مرة .. ورضاء منتظرتها بالباب حتى تفتحلها خاف تدگ الباب ويسمعوه ويگعدون ..

رضاء ..
شفت خيالها من جوة الباب .. فتحته بسكتة واخذتها للديوانية حتى محد يحس ..
جدي هالفترة ينام بالغرفة لان باردة بالديوانية ..
گعدت بالگاع هي وعبايتها وشهگت .. ولج رضوة اريد اموت لااني الاعرفة ميت واگعد ابجي عليه واقرالة قرآن ولاادري بي عايش وانتظرة بأمل ..
لطمت وبجت وملخت شعرها .. الشعر الاسود الي تتخلله خصل بيض رفيعة ..
وعلامات الكبر البيت على وجهها من القهر والبجي ..
بعدهي شابة بالعشرينات عافها وراح وهسا هي شارفت على نهاية الثلاثينات..
سنين وهي تتمنى يصير عندها طفل وتفرحة بي وتالي ماصار ورجلها راح ..
دوم جانت تگول لو عندي طفل جان انسني بوحدتي وعوضني عن كل هذا الضيم وع الاقل مابقيت انتظره وحدي ..

ماجان عندي شي يواسيها بس حضني حضنتها وهي تبجي مثل ماتواسيني وتحضني .. مااعرف الحب شلونه بس اگدر احس بلوعه الفراگ ..

كل واحد عنده هم شكل بهاي الدنيا .. الوضع تأزم هالفترة والمحلات خسرن ومهدي بعد خسارتهن قرر يعوف الشغل وياخذله باص مرسيدس النقل الركاب للسفر وسياحة او زيارات وهيج شي ..

جدي جان حاس بخسارة المحلات سببهن مهدي الي عاف جدي بأصعب ايام وراح ..
سأله جدي عن السيارة ومنين جاب فلوسها وبذاك الوكت وهيج نوع من السيارات غالي وخاصة موديل التسعينات ..

بس مهدي گدر يتهرب وگال
الفلوس من خالي واني اسوق بيها ونصير شراكة بالربح
سكت جدي وماگدر گدام جهاله يگله انت بايگني فوض امره لله ..
وسد المحلات مؤقتا لان مابقى بس هو وعمي صالح
ويادوب يلحگون ع الگاع رغم شغلوا وياهم فلاليح حتى احنة ماصرنا نروح مثل قبل ونلم المحصول ..
كل شي تغير بمرور الوكت ..

بيتنا بعدة ناقص والجهال دوام والمصرف مايلحگ ..
فوگاها حصار قرر جدي يرجع المحلات بعد شهرين ..
ويحولهن محلات مخضر وجانت توها العطلة بادية ..
بيوم گاعدين هو وسيد هاشم بالگهوة وسائله اذا يعرفله  واحد امين يشغله بالمحلات .. ويكون شريك وياه ..
ضحك سيد هاشم وگاله ..
طلبك عندي ابن اخوي مصطفى اثق بي مثل سيد علي وانت تعرفه كلش زين ..
عنده كم فلس ويريد يأجر محل يشتغل بي تعب من العلوة وهوستها .. اذا تريد احجي وياه واخليه يجيك وتتفقون ..
جدي وافق لان يعرف السادة شني وسيد مصطفى يصير رجل العلوية فاطمة حماة وداد هم حبابه كلش وفقيرة بس مو مرحة مثل زينب صارت صديقتي ومرات تجينا واروحلهم ..

بعد مااتعشينا راح جدي يرتاح بالغرفة بين ماكملنا شغل
رحت للغرفه لگيت جدي يحجي وي حكمت بموضوع وجان حكمت صافن وحاير ..

من اجيت صاحني جدي ..
تعاي رضوة بوية .. اريد اخذ رأيج اني شغلت المحلات ودخلت شريك بي ويانا سيد مصطفى ابن اخو سيد هاشم بس هم حلالي ومالي لازم اكو من لحمي يلزمة
ومالگيت الا حكمت يلزم الحساب ومادام العطله اجت وماكو دراسة عنده وتردين الصدگ اني لو ماادري بي ذيب وماينخاف عليه من السوگ والثعالب البي مااخلي المحلات بيده ..
هااا بويه شتگول شو ساكت هاي گدام امك جاوبني
رد حكمت .. بس جدي اني مااريد اخوتي ياخذون نظرة عليه لو ابوي يزعل جيف اخذت مكانه ..

ضحك جدي .. وليش يزعل هذا حلالي واني الي اقرر مني يلزمة ولان انت قوي بالحساب خليتك ..

هز راسه .. بكيفك يجدي الي تريده يصير .. المهم تكون متطمن ومرتاح..

اخذ نفس جدي وهو لازم سبحته يسبح گال نتوكل على الله ..
عاين عليه حكمت وجن عيونه بيهن حيرة .. هزيت راسي اله وابتسمت ابتسم ..
اعرفه مايريد يخسر اخوته ويخليهم يحقدون عليه ..
وصدگ من سمعوا تسودنوا وهو ضاج لان جان خايف من هاي اللحظة وصارت ..
رزاق تعارك وياه : ليش انت جدي خلاك تلزم المحلات موش احنة اني جنت وي ابوي اشتغل وعندي خبرة
بس لاقريت براس جدي وقشمرته ادريك لوگي دوم لازگ وياه..

ضاج حكمت واستغفر ربه .. رزاق انت اخوي واكبر مني مااريد اتجاوز بالحجي .. بس هذا قرار جدي واني ماگلتله شلون تريدني من يكلفني جدي اگله لا ..

دفعة حيل وهدده .. اني الك مثل ماخلاك جدي الا اخليه يطردك ..

بتول اجت تصيح عليه وتگلي ضبي ابنج لااخلي مهدي يموته مو گاعد يزاود ولدي على حلالهم ..

سكتت وماحجيت وياها وحكمت انكسر خاطرها ويسألني : يمة ليش هيج اخوتي وياي ليش ؟

جان مهدي مو دوم بالبيت لمن اشتغل بالسيارة صار يسافر هواي للمحافظات لو بالمركز يشتغل ..
ومن يجي تعبان ماله خلگ الاي شي ..

بس انصدم من شاف حكمت يشتغل وي السيد بمحلات جده .. وگدر يقنعه بلين وحنيه انه يخلي رزاق يشتغل وياه ..
حكمت ماصدگ ابوه عامله بحب وحنية.. وگدر يقنع جدة يشغل رزاق وياه ..

مهدي من شافنا كل واحد ضايع بهمة اقترح علينا
ياخذنا زيارة للنجف ونزور اهلنا بالگبور ..
حضرنا متاع وثاني يوم من الفجر رحنا .. جانت بتول تتباهى بسيارة رجلها وتريد تسمعني
مهدي راح ياخذنا للشمال واعدني والبغداد مادام عدنا سيارة وين مااريد اروح ..

مااهتميت وجان بالي يم ابوي راح اروح ازوره واشبع منه .. اول ماوصلت وقريت اسمه ذبيت روحي على گبره وفرغت همي يمة ..

سولفتله عن امي وگلتله ماتدري بيك ميت عبالها متزوج ..
امي بعد مخابرتها الاخيرة صارت كل فترة تخابر وبيت ام ميثم يدزولي مسك بس مااروح الي فهمته من مرت هيثم..
انه هيثم ضايج ومقرر يغير الخط لان هو بالامن ويخاف على مركزة وخاصه المكالمات تبين عندهم وخطوط ايران مشبوهة ..

يمكن هيج احسن حتى تبطل تسأل عني وتنساني ..
رحت زرت حسن وعرفت عليه حكمت جان بطرف الساني اريد اگله هذا ابوك بس خفت وشي منعني ..

كملنا زيارة المگابر وجدي راح يم بيبيتي فرغ همة كله يمها وجان يعاتبها ويبجي ..
هااا يفخرية اخذتيهم مني وارتاحيتي جا ماحن گلبج عليه وتاخذيني معقولة ماسامحتيني لسا ..

بجانا كلنا بالگوة شالوه من الگبر عمي ومهدي ..
رحنا للامام تغدينا وصلينا الظهر وزرنا ورجعنا للبيت
مهدي وعدنا بزيارات وسفرات مو بس هاي ..
يمكن ارتاحينا شوية وغيرنا جو وارتاحت نفسيتنا
رجعنا من التعب للفراش گبل نمنا للعصر يلة گعدنا
لگيت حكمت سودة علية مبدل وطالع للمحل من غير مايگعدني ..

گمت اساعد عمتي عندها خياط وماتلحگ ..
اندگت الباب لن العلوية بناتها رحبنا بيهن ودخلن ..
عندهن خياط ..
جابتها سوالف وبعدين بقت تمدح بحكمت ..
تگول سيد مصطفى يسولف بي يگول ماشايف طفل بذكائه كلشي يسجلة وتعماله حلو وكاسب الناس بحيث المخضر اللهم صلي نجيبة منا يخلص منا ..
والماعندة ينطيه ويگله روح ويدفعه منه .. من يحجي وياه السيد يگله جدي يگول دوم ارحموا من في الارض يرحمكم من في السماء ..
حتى سيد علي مرات يروح يمهم ويشوفه هيج متسودن عليه ويگله انت البنين ماتصير الغيرها وهذا يستحي ..
ضحكت ..
وعمتي لميعة .. لا عيني بنين صغيرة من هسا تخطبولها
ومالگيتوا الا حكمت ..

صفنت بوجهها العلوية .. وشبي حكمت رجال من هسا اشوفج هواي تفرقين بين ولد ابنج مايصير هيج ام مهدي حرام ..

سكتنا كلما وعمتي لميعة ماعرفت تحجي بعد من الفشلة ..
رادت نغير الحديث سألتها عن وداد
جاوبتها العلوية .. زينة نايمة على ظهرها دوم تگول الجدة گايلتلها حالتج مو زينة صدگ ؟؟
ردت عمتي لميعة .. هاااا اي صدگ خطيه خلي كم شهر تتركد على روحها اتحملوها ..
العلوية جاوبتها .. جا شعدنه احنة دادة البنات مامخلياتها من قبل ماتحبل مو دور هسا حبلت ..
عاينت عليه ..
يله عيني رضوة قيسي للبنات خلي نمشي مناك عمتي مريضه ومايمها احد لاتگعد ..
وهااا يستحن يحجن يردن مثل دشداشتج السودة المخيطتها ..
ابتسمت .. صار من عيوني .. اخذت قياسهن وكملت ..
العلوية وعمتي يسولفن والعلويات واني طلعنا للطارمة منتظريهن ..
انفتحت الباب صار بوجهنا كرار خطية جاي من بغداد النا گبل ..
وبملابسة العسكرية .. استحى من شاف البنات دور رقيه واگفه بالباب انرطم بيها ..
صار طماطة من الخجل وهي هم استحت ودنگت
وزهراء وحوراء بسرعه دارن وجهن ..
اعتذر وسلم ودخل للديوانية كبال الباب بسرعه ..
طلعت العلوية سلمن وطلعن ورقيه طماطة صارت وايدها ترجف ..
من سدت الباب عمتي وراهن .. گلتله اطلع راحن ..
التفتت عمتي .. بسم الله ويامن تحجين ..
ضحكت بساعتها عبالها احجي وي جن ..
فتح كرار باب الديوانية وطلع شهگت عمتي ..
- يمة بعد عمتك تعال احبنك حضنته وتبوس بي وتشمة
وهو يضحك ..
ويگلها : عمة والله ماطاير يمج هنا ..
سألته شوكت اجيت ..
جاوبتها .. هستوه بس من شاف العلويات استحى وراح للديوانية ..
ضحك ودنگ ..
سلم عليه وسأل على حكمت ..
- بالمحلات
- سمعت صاير رجل اعمال حجي خضير الصغير
ضحكني ..
عمتي ماانطته مجال يتنفس .. دخلته وحضرت الحمام گالتله اسبح بين مااسويلك عشا ..
شني مشتهي ..
ضحك كالها مشتهي دولمة من ايدج صار شگد ماماكلها
تخبلت من گالها ..
دزت بشار على ورگ وبسرعه حفرت الخضروات وثرمت اللحم واللية ..
بساعة كملتها وخلتها ع النار وطبعا كلنا ساعدناها بالثرم واللف بس تبقى نفسها بالطبخ والروايح مختلفة ..

غسلت ملابسه وطلعت اشرهن .. طلع وراي .
شلونج رضوة مهدي شلونه وياج
ابتسمت .. عادي مايهمني اصلا ..
وليهمج عندج حكمت ينشد الظهر بي هزيت راسي وضحكت ..
شوكت ناوين تگلوله ؟؟
اتنهدت .. ماادري خايفه من الاثنين .. اذا گلتله اخاف عليه ينكسر واذا ماگلت اخاف يكبر ويضوج مني ..

جتف ايده وگال :
مايكرهج مستحيل انتي جنتي اله ام وابو وهو متعلق بيج ..
عاينت عليه وضحكت .. ولاعرفتك استاذ كرار كبران وصاير تسولف ..
ضحك .. هههه هاي عليها حشم شني مااعرف احجي اني ..
ضحكت .. لا حشاك بس ماجنه نگعد ونسولف سوة ابد
اتنهد .. الوكت اغبر خوية يتمنا وخلانا وحيدين ..
تدرين اجي علمود جدي والا اني حالف ماادخل هالبيت بس يقهرني جدي من يكول نستوني انت واخوك ..
صح البيت متغير بس الذكريات باقية ..
مااتذكر بس طفولتنا حلوة بي بعد ماحسيت توفى تغير كلشي وراحت حلات البيت ..
اتنهدت..  اي والله حقك من الحرب كلشي تغير بحياتنا ردت اغير الحديث سألته ..
يلة شوكت تخلص كليه وتتزوج ..
ضحك مابقى شي راح اخلص بس شني شايفتلي مرة ؟؟
تذكرت العلويات ..
شني رأيك بالعلوية رقيه..

عكف حاجبه .. ياعلوية .. بس لاهاي الي انرطمت بيها اسكتي شگد عيب استحيت..
يعني ذني بنات سيد هاشم اخوات سيد علي ؟؟
- اي هنة حبابات كلش ..
ضحك الله يستر عليها كلتي اسمها رقية موو ؟؟
ضحكت هااا شبيك شو گمت تفكر بالاسم ..
ضحك هو هم ..
طلعت سداد عاينت علينا وخزرتنا ودخلت ..
اشر .. هاي شبيها ؟؟
- معليك بيها تعودت عليهن ..
سألني .. بس صدگ مو نفسهن الخطبهن جدي النا وتالي رفضوا ..
اي همة بس لان ..
لان شني ؟؟

بعدني ماحجيت .. دخل جدي وحكمت وعمي صالح ورزاق ..
شافوا كرار فرحوا سلموا عليه ودخلوا ..
رحت للمطبخ نكمل العشا اجة حكمت سابح وينشف بشعره .. يمة اريدج بسالفه ..
عفت كلشي ورحت وياه ..
دخلنا للغرفة ..
يمة اريدج اگلج شي .. رزاق يمكن يمد ايده للوارد
شهگت وانت شمدريك شفته بعينك ..
- لايمة استغفر الله بس اني من اكعد عيني ع الناس التشتري واعرف كل واحد شگد اخذ واشكر ربي ع النعمة بس من اجي احسب الوارد اشوف اكو نقص احس مو مثل مابعنا ..

لايمة هو كله رزق لاتشك بأخوك . خليه سند الك واكسبه ..
هز راسة وطلعنا ..
التمينا على السفرة وجدي فرحان بكرار وجن عمي گاعد
اني اشبه بحسن وجدي يكول لا ابوهم من صغره ..

بقى يومين عدنا وجان يطلع وي جدي وهو مرات يخلصها نوم .. ومن يكعد اسويله حلاوة لو كيك يكيف على هيج اكلات العصر ..

سألني تدرين صار يومين افكر بالعلوية ..
ضحكت .. قصدك رقيه..
رقية رقية بقى يردد بأسمها .. صح ماشايف بنات هاي بحياتي بس اول ماشفتها عجبتني صارت طماطة من الخجل احب الخجل بالبنية والعيون البريئة والدافية
جنت اگول ماكو بس رضوة هادية بالكون على ماشفت بنات خوالي والسانهن بس من شفت هالبت اختلف الوضع صرتي انتي بالمرتبة الثانية ..
ضحكت هاااا بعتني ..
شفت سداد تروح وترجع ورانا مااعرف شبيها لاهي گاعدة يمنا ومشاركتنا السوالف ولاهي رايحة بغرفتهم

سألني .. صدگ ماگلتيلي ليش اهلهن رفضونا..
جاوبته .. كالوا بعدهن صغار وانتو جنتو توكم مخلصين سادس هم حقهم هز براسه واخذ قطعه كيك خلاها بحلگة ورفع الاستكان شرب جاي ..
باجر يرجع حضرت ملابسة .. مهدي جان موجود بيومها
اول مرة يدخل غرفتنا بعد مابنينا البيت ..
شافني اسفط بجنطة كرار وعمتي مسويتلة كليجة ومعجنات ياخذهن وياه ..
عاين عليهن وگال .. والله مهتمة بي ..
- غير ابن عمي ..
- ابن عمج لو اخو حبيب الگلب وعم ابنج وبعدة شاب وراح يصير ضابط وگلتي اقشمرة واتطلگ وهيج اخلص واخلص ابني ..

عاينت عليه .. انت شتمخرط .
لزم ايدي حيل .. المن ولج ..
وخر عني لا مامريض ماتفكر هيج..
ضحك .. العصرية كلها يتغازل بيج
هاي منو گالك سداد ..
شكد مرضى .. حتى الاخو يسولف وي اخته تحوروها شنو انتو ..
صم حلگي .. شوفي ولج اني مهدي حتى لو ماترديني مااطلگج اخليج هيج معلگة واهجرج ..
واصلا منو يعاين على وحدة ماتجيب بزر بس يردون يگضون وكت وياج ..
تفيت عليه وفقدت من عايرني .. اطلع اطلع الله لاينطيك تعايرني كله منك غير ..
مريض عبالك الناس كلها مثل..  ولك اني اشرف منك ومن كل واحد يحجي عليه ..
تسودنت بيومها وفقدت .. البيت كلة التم عليه ..
جدي صاح بي شبيك وياها ..
مايصير رجال يحاسب مرتة بس شو هي مستگوية مااعرف منو داگلها صدر ..
طرده جدي من الغرفة وحكمت كابلني .. يمة شسوالج ابوي..
اجة كرار .. جدي ادخل ..
طلع جدي عوفوها ترتاح وبعدين اشوف شبيها ..
طلعوا كلهم بقيت بس اني وعمتي سولفتلها وابجي ..
تسودنت كامت بسرعه وراحت السداد ضاربتها وذيج ماساكته وامها وياها ..
وطلعني صدگ عندي شي بس ماذكرن اسم كرار .. حتى من رجعت ابجي من خابرتني امي وتهمني طالعه مدري وين واجيت ابجي وهواي سوالف مطلعات ..
بقيت صافنه على مكرهن ..
جدي عاط بيهن وسكتهن وهددن اذا جابن سيرتي بالعاطل راح يكون مصيرهن غير .
كرار هم ماسكت .. وگايللهن بعدجن على هالنگرة من جنت زغير لسا نفس المشاكل شوكت تتهدون ..
وعمتي لميعه عايطة بي وكايلتله لاتتدخل انت هي البلاوي كلها منك ..
زعل وراح للديوانية .. وثاني يوم من الفجر طالع من غير محد يدري بي حتى ماگعدنا ودعنا ..
عمتي حمدية ضاجت وبقت محاربتهن ..
تگول يردن يشردنا كلنا ويصفالهن البيت ..
مر كم يوم واني مااحجي وي احد بس عمتي جدي
جانت ضحوية وعندي شغل على المكينة ..
اندگت الباب وسمعت ولد بالباب يحجي وي عمتي ..
- خالة الحگي اولادكم تعاركوا بالسوگ ودمايتهم تتجارى ..
تسودنت .. طلعت ورى عمتي تدور على عباتها ..
عمة شكو گليلي ..
هي جانت مثل التايهة ماتعرف شتسوي .. ولج يگول حكمت ورزاق تكاتلوا بالسوگ واحد دمه الثاني ..
اروحلهم وادز طارش لبوي ..
من سمعت هيج ذابت روحي وگعدت بالگاع يمة وحيدي راح ..
ومناك بتول تصيح وتغلط وتدعي على حكمت ..
من سمعتها تدعي مااتحملت ..
كافي لاتدعين .. الدعوة ترجع عليج يغبرة .. وبعدين ابني لليوم ماطلعله حس شو شسواله ابنج ادري بي شراني ومايحبة ..
تخبلت بتول من حجيت عليها ..
ولزمتني ملختني تملخ .. وسداد تفك بينا عمتي لميعة لبست عباتها وركضت ورى عمتي..
مابقى بس احنة .. نامت فوگاي وتضرب وابنها محمد يعاين علينا ويضحك عباله جاي نلعب لو نتشاقة ..
وخرت مني لمن سمعت صوت مراة تصيح مات مات الولد يغبرات وينجن !!
رجف جسمي وانقبض گلبي والدنيا ظلمت بعيني ..

#بقلمي_الكاتبة_شمس
يتبع……