مساء الحب والسعادة حبايب 💕

///// البارت الثامـن /////

#بقلم_الكاتبة_شمس

( شمس السعـدي )

********* #ترانـيــم ***********

الباب مفتوح ..
وانا واقفـة ادحق في الشارع .
كل هذه الاراضـي والبيوت والبنايات حـولي .
لكـن احس نفسي واقفـة في المجهـول ..
حياتـي لاتُعرف لهـا بداية ولانهاية ..

احاول ابقى قوية لأجل لينـا .. لكن قلبـي يصرخ ويتمرد احسو ضدي يحاول يضعفنـي ويخلينـي استسلم ..

اصحي ترانيم !!
انتـي هوني مجبورة .. طلعوكـي من بيتكي ومدينتكي بالقوة ..
مالازم تستسلمي لقلبكي .. لامجال للعواطف في حياتكي ..

صحتني من تفكيري الخالة ام رماح ..
امي ياترانيم .. ياامي ..

ترانيم .. هااا خالة اسفة مااسمعتكي ..
ام رماح .. اشنو الي شاغل بالك ياابنيتي ..

ترانيم .. حاليا مايشغل بالي الا اهلي والوقت الي يجمعنا معاهم القدر ..
ام رماح .. ياامي وكلي امرك للرب هو الي بيدو ملكوت كل شئ ..

دخلت لينا وعمو ابو رماح ..
كانت فرحانة كثير وتقول .. رنوم اغشعي اشنو اشتريت الكي ..
كانت مشترية لي دفتر واقلام تعرفنـي اعشق الكتابة ..
لينا .. عجبتكي ..
ترانيم .. حبيبتي عجبني كثير .. وانتي اشنو اشتريتي ..
لينا .. انا اشتريت هذا الحجاب .. عمو ابو رماح قلي راح يليق على عيونكي ..
ترانيم .. اكيد راح يليق لكن انتي ماتحبي ليش اشتريتي
لينا .. حتى لو مااحبو .. لكن احنة ببلد واحد وكلنا اهل ولازم نحترم عادات وتقاليد غيرنا وخاصـة انو احنة عايشين بمدينتهم ..

كانت تدحق بعمو ابو رماح وتبستم ..
عرفت انه هذا كلامو ..
وهي حبتو لدرجة تسمع كلامو وتطبقو ..

ام رماح .. يلة خلونا نفتح الاكياس ونرتب الاغراض ..
ترانيم .. انا راح اخذ البرغل واطبخو بين مايستوي اعمل الحشوة ..

عملت البرغل وهدرتو على نار هادية..
تذكرت سراب لما تقول ..
اهدر التمن .. او هدري التمن على نار ناصية ..
اشتقتلك يااختي !!
كملت وبقينا نلف بيها انا وخالة ام رماح ..
وعملنا بصحون بلاستك وغلفناها بأكياس حفظ ..
خالة ام رماح .. ترانيم بنتي اخذي الكبة انتي ولينا على الحسينية الي يمنا ..
عندهم مجمدة .. 
عمو ابو رماح .. وصى على مجمدة بس اتأخرت بالتوصيل
اخذناهم ورحنا لناس كانو من الفلوجة اعتقد كلامهم مو مصلاوي مثلنا ..
رحبت فينا المرة واخذت الكبة..  وقالت ..

-انتو تشتغلوا بالمواد الغذائية ؟؟
-اي .
-انا من رأي تعملي صفحة ع الفيسبوك احسن .. انتي محد يعرفج هنا واكيد ماراح تستفادين ..
-عمي ياخذهم ع السوق ويبيعهم ..
وانا ماعندي انترنت ..
شكرتها ورجعنا ..

لينا .. اختي اشتاقيت السرور انتي مااستاقيتي الهم ؟؟
ترانيم .. شلون مااشتاق وعقلي مايقدر ينساهم ..
لينا .. اختي احنة ليش هربنا منهم ؟؟
ترانيم .. الحياة تتطلب هيكي .. انه لازم نترك اشياء ورانا حتى نقدر نعيش فيها ونقاوم ..
لينا .. اشنو هالحياة الي تخلينا مشتتين كل يوم بمكان ..
لو باقين بالموصل افضل ..

ترانيم .. لاتقولي هيكي .. لو باقين بالموصل كان انقتلنا او كل يوم يبيعوا بجسدنا وشرفنا من خسيس لخسيس ..

لينا .. اسكتي اختي لاتقولي هيكي ..
ترانيم .. لينا انتي كبرتي ولازم تكوني اقوى .. ورانا طريق طويل ..
واذا ماقطعناه بقوة .. يقطعنا ويدمرنا ..
اختي لاتيأسي لابد يوم من الايام يرجع كلشي لمكانو ..
مشت قدامي وهي مخنوقة بحسرتها ..
بعدك صغيرة ياعمري حتى تفهمي هذي الدنيا ..

ابو رماح .. بنتي ترانيم .. طلعيلي رقم صاحب المجمدة كتبلي اسمو ورقمو وقال روح والمجمدة تجي وراك ..

بعدو ماكمل كلامو ..
اتصل الرجال عليه ..
وقلو يطلعلو ع الشارع لأنو مايقدر
نزل المجمدة ..
ودخلها وياه للحسسنية ..

الرجال .. عمي هاي لاتشعلها هسا الى ان تستقر ..
ابو رماح .. اي اعرف ابني

الرجال يدحق بالمكان وقال ..
حارة هنا شنو ماعندكم مبردة ..

ابو رماح .. لا بس مراوح وماشية الحمد لله ..
الرجال .. اني عندي مبردة مستعملة اجيبها العصر الكم
ابو رماح .. شكرا لك ابني ماقصرتوا ويانا ..
الرجال .. ياعمي شمسوين هذا واجبنا .. وانتو اهلنا ..

ابتسمت الكلامو .. كنت اسمع عن شيم وغيرة الجنوب وماصدقت الا لما التقيت بعزيز واغشعت بعيني كرمهم و
وضيافتهم ..
ماانكر تصرفات عدنان ومرتو المزرية .. لكن مستحيل اقيس شخصين على جيل كامل ..
من الجدة الاحفادها ..

ابو رماح .. بنتي ترانيم .. انا راح انام ساعة وقعديني عندي شغل ..
ام رماح .. ليش ماتتغدا بالاول يارجال ..
ابو رماح .. مااشتهي ..
ام رماح .. اذا مااكلت انا ماراح اكل ..
ابو رماح .. وهو انا اقدر على زعلك ياجميل ..

شقد حلو غزلهم .. رغم كبر السن  الضروف الي مرو بيها كلها مااثرت عليهم ..

ليش اكو هيكي رجال بوقتنا هذا ..
تغدينا واغسلت الصخون ودخلت الغرفه انا ولينا ..
لينا .. اختي اريد موبايل اسلي نفسي باللعبة .
ترانيم .. لاتفتحيه ..
لينا .. ليش من اشنو خايفه ؟؟
ترانيم .. ماخايفه اكن مااريد احد يعرف مكانا ..

اخذة مخدتها وراحت نامت ..
طلعت الدفتر والاقلام ..
وبدأت اكتب رحلتي واحلامي عليها ..

دعونا نحلم ..
الحلم هو الشئ الوحيد الذي لايدفع به ثمن !!

-------------------------------------------
سراب ..
هسا شجاي يسون وشلون عايشات ..
عامر .. هنة عدهن فلوس ..
سراب .. اي عزيز انطاهن مصرف بس وين يكفي الهن
عامر .. هي من وين جابت رقم موبايلج ..
سراب .. اخذتة مني مرة ونسيت اگلها اتصلي عليه حتى احفظة عندي ..
الحمد لله دزتلي رسالة هسا وطمنتنا ..
علي .. اتصلي بلكي مفتوح ..
سراب .. هاي عاشر مرة اتصل وماكو..

اجت الجدة وهي تتكى على عكازها ..
-ولكم شمالكم گاعدين تولولون..  ماترحون تشوفون وتدوروهن اكيد ماطلعن من المحافظة ..

علي .. ليش هي المحافظة صغيرة جدة .. دورتهن بكل مكان ..
عامر… ننتظر عزيز ونشوف شيگول .. بس الي مدوخني شنو الي خلاهن يرحن منا ..

الجدة .. اكو غير امك وايمان هججن البنات منا .. عبن ماكو زلم توگفهن عند حدهن ..
ابوك ملتهي بشغلة والگيعان ..
واخوك مدمغ يباوع الحلگها ..

ضحكنا دخلت ايمان تخوزر بينا ..
-شو سكتوا من شفتوني ماتضحكوني وياكم ..

علي .. لا مو يمج بس خابرت ترانيم ولينا راح يرجعون لهذا فرحانين !!

صفنت بوجهنا وگالت .. شعندهن جايات مو ولن ..
جدتي تخزر بعلي ..
وايمان ضاجت وصعدت ..

راح يخبلها وهي ماناقصة ..
-------------------------------------
ترانيم ..
العصر شغلنا المجمدة .. رغم الكهرباء قليل تجي ..
ام رماح .. اذا بقت الكهرباء هيكي تعبنا كلو يروح ..

ترانيم .. والحل ؟؟
ابو رماح .. بس يمشي شغلنا ونربح منه اشوفلي مولدة صغيرة بس للمجمدة ..
والي سوتنهن راح اخذهن واروح للسوگ ابيعهن احسن ممايخربن ويروح تعبنا ..

لينا .. اروح معاك ..
ابو رماح .. لا بنيتي انتي حلوة واخاف عليكي من العيون ابتسمت وقالت .. اريد اساعدكم الكل يشتغل الا انا ..

ام رماح .. ومن قالك ماتشتغلي .. انتي تساعدينا في غسل الصحون ..
لينا .. لاااااااا اشتغل اي شي الا الصحون ..

ضحكنا عليها..  الصحون مشكلة اغلب البنات ..

اخذ عمو ابو رماح الكبة بكارتون كبير ونزل للسوق يبيعهم .
بعد ماراح تفاجأت بسيارة بالباب ..
نزل اخو ايمان ..

- شنو تردين ترجعين البيت ابو عدنان ..
-ارجع ؟؟ ليش انا طلعت منهم لحتى ارجع بعد يومين ؟
انا اخذت قراري ومالي رجعة على ذاك البيت ..
-بس اختي تگول انتي خابرتي ومبلغتهم .. الاحسن تبقين هنا ..
-ههههههه لاتخاف اختك .. ماراح ارجع وانافسها على زوجها الجبان ..
-شتقصدين ؟؟
-اسألها وهي تقلك .. هااا بالمناسبة بخصوص الشغل الي طلبتو منها .. اشنو سويتو ..
-هاااا راح احاول اشوفلج صيدلية محتاجة مساعد او دكتور محتاج مضمد ..
-مو احاول لازم انا محتاجة للشغل ..

تركني وراح ..
رغم معرفتي انهم ماراح يلاقو الي شغل ..
لكن كنت متأملة !!

اااااه ياطريقي في الحياة .. كيف سيكون والى اين الوصول ..

دخلت ..
ام رماح .. ترانيم يابنتي .. ماتقيسي الي الضغط احس راسي يوجعني ..

اخذت الجهاز وقست الضغط ..
كان مرتفع كثير ..

-خالة ضغطك مرتفع .
-ليش هو شوقت نزل حتى يرتفع ..
- وليش ساكتة ..
-ياامي اشنو يصير بعد كل الي صار .. مايكفي اولادي بعيدين عني ومااعرف الهم طريق ..

حتى الموبايل مانستعملوا نقول خاف يتصلوا ويلقوه مشغول ..

-معقولة من اشهر وهمة مااتصلوا .
-هذا الي مخوفني وراعبني .. خايفه صاير عليهم شي ..
-اشنو اسمهم بلكي نلاقيهم بالمخيمات او مع النازحين ..
-وانتي اشنو تقدري تسوي ؟؟
-في صديق النا .. هو الي انقذنا اذا اعطيتو الاسماء عندو معارف يلاقوهم ..
-دخيلك ياربي .. هيكي واسمع خبر عنهم ..
اعطتتي الاسماء ..
اخذتهم وبعثت رساله العزيز وقلتلو لو عرفت عنهم اي شي قلي .. اهلهم قلقانين عليهم ..

بعثتها وتندمت !!
-انا اشنو سويت بلحظة غباء .. شلون اطلب منو هيكي طلب .. اكيد راح يقول انانية وتفكر بمصلحتها ..

بين ندمي وتأنيبي لنفسي ..
اتصل عزيز ..
بقيت مصدومة وادحق بالموبايل ..
واسم عزيز قبالي ..

اخذت نفس وفتحتو ..
-واخيرا ست ترانيم حنت علينا وفتحت الجهاز .. او يمكن لو مضطرة مافتحتيه موووو ؟؟
-شلونك عزيز ..
-انتي گولي شلوني .. شلون شخص عايش وروحة على كفة بأي وقت يمكن يستشهد ..
شخص كان يحس بمسؤولية اتجاه بلدة والناس الي ثقوا بي .. وتالي من غير كلام او مبرر تتركين كلشي وترحين ..
-انت ليش محسسني انه انا خنتك او خذلتك .. عزيز مااريد اكون جاحدة وناكرة للمعروف .
لكن انتو ماقصرتو ومامجبورين تتحملو مسؤليتنا اكثر
-هاااا طبعا .. الست ترانيم عندها كبرياء وماتتحمل احد يشيلها جميل ..

لو خايفه انه يجي يوم ولازم ترديه ..
-لاابدا .. انا مو هيكي يمكن انت الي ماعرفتني ..
-لا انتي الي ماعرفتينا .. احنة بالجنوب الي يجي عدنا ضيف ونحسبة من اهل بيتنا .. ويطلع من غير وداع او كلام ومن غير علمنا .
هاي تعتبر اكبر اهانة النا ..

هاااا شو سكتـي ..
بقيت ساكتة لأن ماعندي رد الو .. معو حق بكل كلمة قالها .. لكن مايعرف السبب الحقيقي وراء طلعتي من البيت ..

وينج ترانيم حاجيني ..
-انا معك ..
-گولي وين مكانج خلي ادز الولد ياخذوج ..
-عزيز لاتضغط علية ماارجع ..
-ليش ؟؟ انطيني سبب مقنع ..
-بدون سبب هيكي ..
-هذا هو ترانيم براحتج ..
هسا عندي شغل مااگدر اطول ..

غلق الموبايل وهو ضايج مبين ..
اشنو بيدي عليك .. مااريد احملك هم فوق همك وتعبك والحرب الي عايشها ..

رجع ابو رماح فرحان لأن اتفق مع سوبر ماركت ياخذ منو اشنو نسوي .
قالو حتى اذا معجنات بيتزا .. او فطائر احنة ناخذ منكم
تشجعنا وفرحنا ..
واخيرا راح ينجح المشروع .. ونوقف على رجلنا ..

ام رماح .. اي بس ماعدنا فرن شلون راح نشتغل. 
ترانيم .. هفففف مافكرت فيها ..
ابو رماح .. ولايهمكم انتو اشتغلوهم وانا اتفق مع فرن يشويهم النا .. بين مانستلم فلوس ونربح نشتري فرن ..

ام رماح .. الله مايحير عبدو ..
ابو رماح .. والنعم بالله ..

يعجبني فيهم صبرهم وتفائلهم وثقتهم وايمانهم بالرب الي يغير طريقهم نحو الاحسن دايما ..

بدينا نعمل كلشي يخطر على بالنا .. ونجهز انواع الاكلات ..
كثرت الطلبات ..
وعمو ابو رماح كان هو الي يتكفل بتوصيلهم ..
رغم كبر سنو .. الا تحسو بأول شبابو ..
رجال يحب الحياة والكفاح ..

اما خالة ام رماح .. فكان عندها امل انه راح يجي يوم تلتقي بأولادها ..
فتحت الموبايل عسى وان اكو خبر عنهم من عزيز ..

لكن ماكو اي رسائل .. فقط سراب متصلة كثير ..
ماكان عندي رصيد كفاية ..
رنيت الها وقطعتو ..

بسرعة اتصلت علي وهي تقول .. ولج بذات ليش هيج بالي يم التلفون كل شوية اگول راح تخابر منو الي شاغلج عنا .
ترانيم .. ابدا ماكو احد يشغلني .. لكن بديت اشتغل والرب ساعدنا وشغلنا ماشي كثير ..
سراب .. شنو تشتغلين ..

ترانيم .. فتحت مشروع اكلات وطبخ .. مع ناس طيبين وكانوا اكثر من اهل النا ..
وهسا الامور احسن .. ماتعرفي اشنو حاسة وانا اكسب فلوس من تعبي ..

سراب .. ربي يرزقج حبيبتي .. يعني لسا ماتگولين وين انتي ..
ترانيم .. لاتضغطي علية سراب .. خليني اقدر اتصل واحكي وياكي ..
انتو اشنو الوضع عندكم بالبيت .
سراب .. اي غيري الحجي غيريه اعرف كلش زين منو ورى هروبج منا وانتي ماتقبلين تحجين ..
ترانيم .. سراااااب !!
سراب .. سكتت خلص . بس الكل مشتاقلجن .. ماعدا ايمان طبعا تضوح من نگول راح ترجعن وعلي مايسكت هههههه يحرگ بروحها ..
والا كلنا نريدجن ..
حتى جدتي وتعايرنا بيج ..
وتگول لو تمارين هنا جا ماعافتني وكل يوم تقيس ضغطي وتنطيني علاجي ..

ترانيم .. ههههههه بوسيها الي امانة ..
سراب .. عامر اتحسن بس معاند يريد يرجع يداوم وامي ماتقبل وضايجة والبيت كئيب ..
وفوگاها علي هم يريد يلبي الفتوى ويروح يگول جماعتي مو اقل مني وراحو كلهم ..
ترانيم .. الرب يحفظهم .  مو جديدة البطولة عليهم .. بعد مااغشعت الي عملو عزيز مااستغرب .
الا صدق اشنو اخبارو ؟؟

سراب .. مانعرف عنه شي .  دايما جهازة مغلق واذا اتصل مايطول دقيقة ويغلقة ..
ترانيم .. الرب يحفظو .. انا طولت عليكي ورصيدكي راح يخلص ..
سراب .. فدوتج الرصيد وصاحبتة ..
ترانيم .. حبيبتي ..
سراب .. سلميلي على لينا وبوسيها الي ..
غلقتو منها وبالي يم عزيز ..
ليش مايتصل اكيد زعلان ..

قمت نضفت الغرفة والغرفة الكبيرة ..
عمو ابو رماح من يوم الي اجينا .. اشترى ستاير وعملهم مثل السياج قدام الحسينية ..
حتى محد يغشعنا ..
فكنت اغسل قدام الباب حتى يبرد ونفرش ونقعد فيه ..
في نازحين يجو يمنا ويقعدو يحكو ويشكو همهم البعض .
خالة ام رماح كل الي يسأل عنا تقول قريباتي ..

هموم النازحين كثيرة .. والكل يسرد همو ووضعو .  كل شخص منا الو عزيز وغالي تاركو بالموصل او الي مات والي هرب ..
مثل حالنا واكثر ..
لما نغشع مصايب غيرنا تهون علينا مصيبتنا ..

لينا لقت بنت بعمرها وترافقو ..
وكانت فرحانة ..
وقالت .. اختي ارجوكي مو كلما اتعلق بأشخاص نبتعد عنهم .. لأن انا تعبت ..
-ياروح اختكي ..  مااقدر اوعدكي واخلف .. لأن طريقنا في هالحياة مو بيدنا ومانعرف القدر اشنو مخبيلنا ..
حسيتها تضايقت وتذمرت ..

تعمدت اترك الموبايل مفتوح ومااغلقوا ..
لكن عزيز اختفى وبطل يسأل عنا ..
حقو وماالومو ..
والاحسن هيكي مايفكر بينا .
يكفي الي هو بي ..

ابو رماح .. بنتي ترانيم .. اتصل علية شخص اعرفو كلفتو اذا يعرف احد يحتاج طلبيات عزومة لو حفلات. 
وطالب منا 100 صحن فطائر وسمبوسة وكباب وتنوعي للصحن ..
ترانيم .. فهمت قصدك لكن ماعدنا صحون ..
ابو رماح .. انا رايح اشتري ..
وباجر من الصبح بلشو بيهم حتى يكملو ع الوقت ..

حضرت الاغراض كلها والي ناقص كتبتو بورقة حتى يشتريها النا عمو ابو رماح ..

راح للسوق واحنة منتضرين ..
رجع حالو ماعجبني ..
ام رماح .. اشنو بيك ياابو رماح ..
-ماقدرت اشتري اي شي .  فلوسي ضاعو بالسوق .
حسيت وجهو تغير ومرسوم عليه خيبة الامل ..
يركض من هوني لهوني طول النهار حتى يبيع ويكسب ونعيش .
وبعدها يضيع تعبو كلو ..
قهرني ومابقى عدنا فلوس .
كل الي نحصل عليه . 
يادوب يكفي اكلنا ونشتري اغراض للطلبيات ..

{ غالبا مانتعثر بحياتنا بخيبات امل كثيرة .. لكن القوي هو من يتغلب عليها بالصبر والامل }

تذكرت السلسال الي برقبتي. 
نزعتو .. وسحبت اسمي منو ..
وضميتو بالجنطة ..
اخذت السلسال ..
وقلتلو .. خذ هذا السلسال عمو بيعو واشتري بثمنو الاغراض. .

ام رماح .. لا يبنتي هذا الك مايصير ..
ترانيم .. وليش انتي لما بعتي ذهبك ماقلتي هيك .. احنة هوني كلنا بنفس المصير .
لازم نصير ايد وحدة ونوقف مع بعضنا ..

ابو رماح .. بشرط ترحين انتي وياي وتشهدين على بيعه
ترانيم .. اني ثقتي بيك كبيرة ..
ابو رماح .. حتى لو .  اني اريدج ترحين ..

اخذنا تكسي ورحنا للسوق .. كانت الشمس راح تغيب ..
بعنا السلسال . جاب سعر لابأس بي ولو اعرف سعرو اغلى لكن مضطرة ع البيع ..

وبسرعة رحنا اشترينا الاغراض والصحون ورجعنا ..
بالطريق للمكان الي قاعدين فيها ..
اغشعت عيادة الطبيب وصيدلية ..
جذبت نضري ..

بقينا الليل كلو سهرانين .. كملنا كلشي وخليناه في المجمدة ..
ودخلت ارتاح ..
بقت عيني ع الموبايل ..

قلقت ..
فتحتو ادحق فيه .. لقيت رسالة ..
فتحتها .. سراب بعثتلي رصيد برسالة .
ابتسمت .. وين اكو هيكي انسانة مثل الاخت واكثر ..

اما عزيز ماعرفت شي عنو الا الاخبار الي اسمعها من سراب .. حتى الناس الي كلفتو يسألي عنهم ..
مارد خبر او رسالة ..
بدأت المدارس والناس تداوم .. الا لينا الي كسرت قلبي وهي تغشع الناس الي راجعة من المدرسة والي رايحة

لينا .. اختي انا مايصير اداوم هوني ..
ترانيم .. حتى لو يصير حبيبتي ماعدنا مستمسكات او وثيقة الكي ..

لينا .. يعني راح ابقى هيكي ..
حسيت بقهر عليها ..

اشنو بيدي عليكي واحنة الي عايشين غربة في بلدنا ..
لااهل ولااحد بقى النا ..
وحتى حقوقنا ضايعـة ..
لو ماهذي الناس الطيبـة ..
كنا في خبر كان !

تذكرت العيادة الي شفتها ..
بعد ماكملت شغلي واغشعت خالة ام رماح تعبانه ..
بدلت تنورة وقميص ولفيت شالي واخذت لينا وطلعنا ..

دخلت للصيدلية ..
لقيت وحدة قاعدة .. سلمت وسألتها عن شغل او يحتاجو مساعدة في الصيدلية ..
دحقت بيه من فوق التحت وقالت ..
انتي نازحة ؟؟

استغربت من سؤالها ..
_اي انا من الموصل ..
بدون اي مقدمات وحتى ماتسأل اي شي ..
قالت .. اعتذر ممحتاجين وحدة ..
ابتسمت وقلتلها .. متحتاجون لو لأن الي واقفة قدامك نازحة من الموصل ..

يااختي مو كل اصابعك سوة ..
واحنة بلد واحد ..
كثير ناس ساعدونا هوني ..
لكن فعلا بكل مكان تلاقي الجيد والسيئ .

-شتقصدين .. گتلج منحتاج شنو هاللغوة الزايدة ..
- كل شخص يعكس اخلاقو ..

دخل رجال .. شكو شصاير. .
-ماكو شي دكتور ..
-محتاجة شي اختي ..
ترانيم .. لا شكرا دكتور .. مااحتاج صدقات ..
الدكتور .. مافهمت شنو قصدج ..

البنت -دكتور اجت محتاجة شغل وگلتلها ماعدنا وبقت تتطاول ..
ترانيم .. بـ أشنو تطاولت لو سمحتي .. انتي الي لما سمعتي بية نازحة طردتيني من هوني وكأني فايروس ..
وخفتي منوو..
الدكتور .. شنو هالحجي انتو ع راسنا ..
ترانيم .. اسفة دكتور طبعا مااقصد الكل لا اكو كثير ناس وقفوا معنا هوني ..
ومرة ثانية اعتذر اذا سبب مشكله الكم ..

اشرت للينا نطلع ..
صاح وراي ..
اوگفي اختي ..
التفتت ..
احسبيها علية .. واذا محتاجة شغل اني عندي مذخر محتاجين عمال ..
ترانيم .. انا مو عاملة .. عندي شهادة معهد طبي ..
شكرا لتفكيرك ..
حاول يتكلم ..
ماانطيتو فرصة. تركتو ومشينا ..
لينا .. اختي ليش يعاملونا هيكي ..
ترانيم .. ماعليكي اختي يوم من الايام تنحل ويخلص الشتاء ويجي الربيع ..

رجعنا للحسينية .. لاانكر كنت متفائلة القي شغل ..
واساعد خالة وعمو ابو رماح وانا اشوفو رجال كبير ويركض من مكان لمكان ..
حسيت نفسي ثقل عليه اجينا ..
كان هو ومرتو ياكلو الي عندهم ومرتاحين .

دق موبايلي تفاجأت ..
عزيز ؟؟
بقيت ثواني ورديت ..
-الو .
-الو شلونج ترانيم ..
-انا بخير انت شلونك ..
-عايش برحمة الله .. اگلج منين تعرفين ذولة الي انطتيني اسمائهم ..

-ليش اشنو بيهم ..
-ليش تردين على سؤالي بسؤال .
-ناس طيبين عايشة معاهم ..
-عجيب ؟
-اشنو العجيب ..
-بنتهم ماكو خبر عنها واحتمال مهاجرة الله اعلم ..
لكن ابنهم وعائلته متجندين مع التنظيم ..

لما قال هيكي انصدمت ..
معقولة .. اذا عرف عمو ابو رماح وخالة .. راح يموتو من القهر ..
حاولت اغمض ثواني حتى اقدر استوعب الي اسمعو ..
عزيز .. شبيج ترانيم ..
ترانيم .. افكر بأهلو يموتو لو سمعو .. لو تغشعهم ناس طيبين كثير ..
وامو تموت لحتى تسمع خبر عنهم ..

عزيز .. مو شرط ابنهم لازم يطلع يشبههم .. ويخلق من ظهر العالم فاسد والعكس صحيح ..
ترانيم .. عزيز اتأكد اكثر يمكن يطلع الكلام مو صحيح ..
عزيز .. لا اتأكدت .. بس اجبار او لا مااعرف المهم جاي يقاتل وياهم ويطلع وي التنظيم ضد الجيش ..
ترانيم .. مااقدر استوعب مااقدر ..
عمو ابو رماح ساعدنا كثير وامو مريضة لو يعرفون ابنهم مع داعش اشنو راح يصير بيهم ..

ام رماح .. منووو قصدج وي داعش .. رماااااح
ترانيم .. اغشعتها واقفة وراي وسمعت كلامي ..
قلتلو لعزيز .. عزيز راح اقفل الخط ..

غلقتو ..
ام رماح .. قولي ابني وين .. ومنو الي قلك يشتغل مع داعش ..
ترانيم .. مااقصد ابنك شخص ثاني نحكي عنو…
ام رماح .. اني سمعت كلامك كلو ..
ترانيم .. تعاي اقعدي خالة ..
ام رماح .. مااقعد قولي لي الكلام الي اسمعتو كذب .. قولي لي انه ابني الي حملتو ببطني وولدتو وكبرتو وزوجتو .. ماخان بلدو وطعن اهلو من ظهرهم ..
قولي يابنتي قولي ..
كانت تحكي وتبكي ..

لأول مرة احس نفسي عاجزة ..
ومو قادرة اريح قلبها ..
صعب انه احد من اهلك تلاقيه خاين ويحارب اهلو وبلدو
كنت ابكي معاها وتفكري عند اخي وابي ..
معقولة اهلي مثلو وعزيز مايقول خايف على مشاعري ..

-لامستحيل .. ابي مايعمل هيكي لو يموت .. واخي سليمان كذلك ..

استوقفني كلام خالة ام رماح وهي تضرب على رجليها وتندب حضها ..
-ابد مااصدگ .. كل الدنيا تخون الا رماح ..
رماح هذا سندي ربيته على ايدي .. مايسويها .
انتي ماتعرفيه .. فقير وخلص عمرة يكد ويشتغل ويتعب الاجلنا ..

بعدها غيرت كلامها وقالت ..
-اي بس اذا عايش ليش ماخابرنا لسا .. ليش واحنه عينا ع الموبايل وننتظر منهم خبر ..
واختة وين .. وين راحت ..

-اعتقد هاجروا .. زوجها مطلعهم الخارج العراق ..
-ياويلي يما .. اربي واتعب وتالي اصفى وحيدة .. وحدة هاجرت وتركتني وواحد خاين وماصان التعب والربى ..

ااااه ياربي اااااه ..
طول اليوم هي تولول وتبجي ..
مسحت دموعها وقالت ..
-اسمعي بنيتي .. مااريد عمك يسمع بهذا الكلام .. انا اعرفو يموت مايتحمل ..
خلي قهري الي هو كافي تعبه طول النهار..
ماعندي احد غيرة ..
ابوس يدج لاتگوليله ..
حضنتها وابكي ..
لاتقولي هيكي خالة .. انا اصلا ماكنت ناوية اقلك لو ماانتي سمعتي ..

هالشي مو بيدنا .. انا اهلي فقدتهم ومااعرف شي عنهم كلنا تشتتنا وابتعدنا عن احبائنا ..
ادعي يكون كذب هالكلام والرب يخلصنا من هذا الفايروس الي احتل بلدنا ..
ادعي الرب نرجع ويلتم شملنا مع اهلنا ..

ام رماح .. اااااه ياليت لو ماسمعت خبر عنهم .  ياليت لو باقية انتظر العمر كلو ..
حاولت اهدأها لكن دون جدوى ..

من اغشعت ابو رماح اجة .. سكتت وعملت نفسها نايمة
ابو رماح .. شلونك بنيتي .. اشنو خالتك نايمة بيها شي .

ترانيم .. لا مابيها شي يمكن تعبت من لف الكبة ..
ابو رماح .. الله يساعدجن ..
رحت صحت لينا ورجعنا ..
لقيتو يتوضى ويصلي ..
كملت العشا وخليتو ..
ابو رماح ماقبل ياكل الا تقعد ام رماح .. وبالقوة اقنعها تاكل شوية ..
بعدها رجعت نامت ..
سويت شاي وقعدنا نشرب .. كانت تغشعلي وحاسة بعيونها كلام ..
ابو رماح .. انا راح انام بنيتي قفلي الباب اذا دخلتو للغرفة ..
قفلت الباب وبالي عند خالة ام رماح ..
اخذت جهاز الضغط ..
ولينا اخذت موبايلي ودخلت للغرفة ..
مرات احنة ننام معاهم لأن اكو مبردة الي اهداها النا الرجال صاحب توصيل المجمدات ..

عمو ابو رماح نام بسرعه من تعبو .  وانا اخذت ايد ام رماح وقست ضغطها .
كان مرتفع .. بسرعة اخذت مي ودواها ..
-قومي خالة اشربي دواكي ..
-فتحت عينها وقالت .. مثل ماوصيتك لاتقوليلة ولاتتركيه وحدو ..

كلامها اثر بية كثير .. لدرجة تأنيب الضمير ..
انا شلون هيكي خليتها تسمع .  المفروض مااخليها تحس او تسمع شي ..
لو صارلها شي انا شلون اقدر اسامح نقسي ..

كانت لينا غافية والموبايل بيدها. 
سحبتو منها خالص شحن .
خليتو ع الشحن ونمت ..

مااصحيت الا على صوت ابو رماح وهو يبكي ..
فزعت من نومي مثل المجنونة ..
لقيتو حاضن ام رماح ويبكي ويقلها لاتتركيني منو الي بعدج .. انتي الي مصبرتني على فراگ ولدي. 

ركضت الها اخذت اديها وفحصتها كان جسمها مثل الثلج واضح انها ميتة من ساعات ..
هو كان يريد يقعدها للصلاة .
كان شكلو وهو حاضنها ويبكي .. يقطع القلب ..
دموعي ماوقفوا وانا حاسة بالذنب ..
كلو بسببي كلو بسببي ..

طلعت لينا على اصواتنا .. وهي تبكي ..
اشنو بيها خالة ام رماح ليش تبكون ..
قمت وحضنتها بسرعه وقلتلها ..
لاتخافي حبيبتي روحي للغرفه ..
لينا .. خالة ام رماح ماتت .. ماتت موووو. وهي تبكي وتصرخ ..
ماقدرت اهدأها حضنتها وقعدنا نبكي سوا ..
ماتت وهي بعيدة عن بيتها ومدينتها واهلها واولادها ..
ماتت ومااتحملت انه جزء منها يطلع خاين ..
الرب يرحمك ياخالة .
والرب يسامحني لأني السبب في موتك ..
اتصلت على عزيز وانا ابكي مااتحملت .
سمعت صوتو بكيت اكثر وانا اقلوا انا السبب عزيز ماتت بسببي ..
عزيز .. الوووو ترانيم شبيج ليش تبجين صاير شي گولي خوفتيني الووووو الووووووو ..

#بقلمي_الكاتبة_شمس
يتبع……..