مساء العسل لعيونكم حبايب 💕

///// البارت السـادس /////

#بقلم_الكاتبة_شمس

( شمس السعـدي )

********* #ترانـيــم ***********

قاوم مادامت نبضات قلبك لم تتوقف !
قاوم مادامت أنفاسكـ لم تنقطع ..
قاومـ من عمق جرحك !
مادمـت قادرا على المواجهة ..
فكلنا قد مضينا في طريق شائك ..
تخلينا فيه عن كل الرغابِ !!

دخل عدنان من باب الحديقه ..
شفتو عملت نفسي اغسل الاكواب وانضف ..
اتقرب وهمس ..

شلونها زوجتي المستقبلية ع التعب .. وكان يبتسم ..
سمعت صوت التفتت بسرعه ..
واغشعت ايمان واقفة بباب المطبخ الي من جهة الصالة وكان تحدق بية بغضب ..
من الصدمة وقعت الكوب وانكسر من يدي !!

ايمان .. شعندج هنا لسا ؟؟
ترانيم .. منتضرة الضيوف يخرجو واغير الضماد لعمار
ايمان .. هااااا ريحتج بدت تطلع ..

ترانيم .. اشنو تقصدي ؟؟
ايمان .. لاتغشمين نفسج تعرفين قصدي .  تعال عدنان اريدك بشغلة ..
صعد معاها من غير اي كلام .. لكن فجاة سمعت اصواتهم عالية ..
هو يسكتها ويقلها .. منا عالم اسكتي ..

-اكيد سمعت كلامو .. مايهمني رأيها لكن لو عرفو اهلو اشنو راح يفكرو فية ..

طلع الكل واجة علي ..
ترانيم .. الناس راحت تگدرين تجين ..
دخلت عطيت الدوا الو وفتحلي جانب من رجلو ..
وعلي يساعدني ..
ضمدنا الجرح وغيرنا الضماد ..

عامر .. شبيج ضايجة ؟؟
ترانيم .. هااا مابية شي .
عامر .. الصبح شكلج غير لو انتي من النوع الي يغيم بالنهار ..

ابتسمت . لا بس يمكن تأثير النعاس ..
علي .. ذني كتلة تفائل مايغيمن ابد ..

ابتسمت الكلامو . لو يعرف هالقلب اشنو فيه والعقل اشنو يفكر .. ماكان قال هيكي ..
انا احاول اكون قوية .. لأجل اختي .  ولأجل الناس ماتدوس علينا وتمشي ..

لكن بداخلي اشعر بفراغ ووحدة قاسية .. بداخلي انثى محطمة مشتتة لااهل الها ولا سند ..
اتضاهر بالامل حتى اختي ماتيأس من رجوع اهلي ..
كل يوم اصبح واقول .. راح يتصل عزيز ويبشرني انه لقى اهلي ..
كملت .. وقلت الهم .
محتاجين شي اسويه .. قبل لاانام .
عامر .. لا اخذي راحتج تعبناج اليوم ..

غسلت ايدي وصعدت ..
سمعت ايمان بعدها تتناقر مع عدنان وتقلو .. لو اني لو هنة بالبيت مااتحمل وجودهن ..

غمضت عيني وكملت طريقي .. عجيب يابشر . قلت واخيرا لقيت الناس الي تحمينا وتراعينا ..
لحتى يتحدد مصيرنا ..
لكن اشنو صار ..
غباء شخص اناني .. متأكدة راح يحطم حياتنا ..

اخذت الموبايل من الشاحن . لقيت عزيز متصل
ماقدرت اتكلم معو بحالتي هذي ..
والوقت متأخر ..

فرشت فراشي ونمت ..
للصبح قعدت وكانت نضرات ايمان لي غريبة .
بس هادئة وطبيعية ..
مو بطبعها تكون هيكي ..
اتعجبت الهدوئها .. ياترى هل هذا هدوء ماقبل العاصفة !!
سراب .. ها رنوم شبيج ..
-مابية شي . بس احس راسي مصدع يمكن راح امرض
سراب .. سودة عليه واني هم تعبتج البارحة ..
تراتيم .. لاتقولي هيكي انتي اختي .

سراب .. تروحلج فدوة اخيتج .
ترانيم .. هههههه قبانو ..
سراب الوحيدة الي قادرة تهدأ اعصابي بكلامها ..
سراب .. تريگي واصعدي ارتاحي ماعندنا شي اليوم والبنات وياي وايمان واني هنا تطبخ ..
ولا اگلج .. روحي الغرفة عزيز ارتاحي وغوصي بعالم الكتب ادري بيج تحبيهن ماادري شلون ماتدوخون انتي و عزيز .  اني جنت اقرأ امتحان ادوخ ..

انطيت علاج عامر وسلمت ع الجدة وقعدت يمها لأنها تزعل وتعتب اذا مااشوفها ..
حسيتها تعلقت بينا وانا تعلقت فيها ..
لما تقعد وتحجي عن ايام زمانهم .  استمتع رغم ماافهم كثير على كلامها ..

صعدت الغرفة عزيز . اخذت الكتاب الي قرأت الو منو
ورحت على غرفة البنات ..

قعدت على سرير سراب .  اغشعت الموبايل ..
رسالة ساعة اربعة الفجر .
من عزيز كاتب .. ( خير شو ماكو صاير شي ؟؟ )
كتبتلو.  ( لاتخاف ماكو شي لكن مشغولين بعامر والبيت مليان ناس ماقدرت ارد عليك )

فتحت الكتاب وقعدت اقرأ .
صح بالبداية حبيتو لكن بعدها خفت منو ..

دخلت ايمان .. اسمعي ولج من البارحة مصبرة على روحي .. انتي شعندج تحومين على عدنان وقبلها على عزيز شتردين بالضبط ..

ترانيم .. انتي الي اشنو تردين . خلي زوجج يبعد عني مو انا ..
ايمان .. كلشي سولفلي . انتي الي تغويه .  والله الا افضحج وابين طينتج الهم .. مخدوعين بيج عبالهم ملاك بس مايدرون انتي شنو ..
ضحكتي على عزيز وخلتيه يجيبج بنصنا ومايدري هو جايب افعى الوسط بيتنا…

قمت من مكاني وقلت .. احترمي نفسك . مثل ماانا احاورك بأحترام انتي كذلك .
لاتقللي ادب ..

ايمان .. منو الي مامؤدبة يا…… يا خطافة الزلم . اجيتي خايفه من داعش .. لو مخليج الداعش حتى ترتاح دودوتج وتفوخ ..

مااتحملت ضربتها راشدي .. حاولت تضربني لزمت ايدها وانا اطول منها ماقدرت تهاجمني ..
لكن صوتها على اكثر وتصرخ ..

ضربت حالها ونزلت شعرها وقطعتو . وانا مصدومة من تصرفاتها ..
ترانيم .. انتي وحدة مريضة ..

صعدت سراب والبنات .  شكو شصاير. 
ايمان .. يابوية وينك تعال شوف بنتك .  ونزلت تبكي وتصرخ ..
سراب  .. شكو ليش هيج حالها ..
ترانيم .. اول مرة اشوف شخص مريض مثلها .. لكي ضربت روحها وملخت شعرها وتصرخ حتى تطلعني انا الغلطانة ..

سراب .. الله اليستر ماراح تعدي . نزلت وانا نزلت وراها لزمتني لينا ..
اختي اكيد راح يطردونا ..
-لاتخافي الي حمانا هو الي يسهلها ..
نزلت واغشعتها تبكي وقاعدة بالارض وفجاة اغمى عليها
عامر .. شكو ..
الجدة .. شبيها هاي انرعصت منو وياهة .
ام عدنان .. انتي شنو همجية شلون هيج تضربيها وتملخيها .. الي ادري بي .. الغريب يكون اديب .

ملكية .. سدي حلگج .. وخلي نفهم السالفه ..
ترانيم .. انا فعلا غريبة لمن مايوم نكرت الجميل الي عملتوه ولاقللت ادب ..

تصدقوا او لا .. هي الي هجمت علية بالغرفه .. وتهمتني بشرفي .  ماانكر اني ضربتها راشدي لكن حتى اسكتها عن الاتهامات الي اتهمتني فيها ..
لكن لأنها مريضه .
ضربت حالها وقطعت شعرها وسوت هيكي بنفسها حتى تتهمني وتطلعني من هوني ..

سرور قعدتها بالمي على وجهها ..
وهي قامت بسرعه ..
جذابة . شتريد تگول . دخلت اسولف وياها وانبهها على تصرفاتها ولبسها وهي نزلت غلط بيه . 
وضربتني وسوت هيج بيه ..

ترانيم .. انا مامجبورة اكذب . وهذا الي قلتوا الي يصدق يصدق .. واذا انتي على حق قولي اشنو تهمتيني ..

سكتت وبقت تبجي .
الجدة .. ولج يمضروبة شعندج رايحتلها وتتحرشين بيها البنية صارلها شهر واكثر عدنا ماسمعنا حجت موزين ولاسمعنا حسها ..
انتي بنت ابني واعرفج السانج متبري منج . يله گومي غسلي واصعدي الحجرتج .. واذا سمعت هالحجي طالع الزلمتج والله اگضيج گضيان ..

ايمان .. هي هاي تاليتها جدة هيج تسوين وياي وتصفين وي الغريب عليه . 
اني اروح الابوي ياخذلي حقي ..

لبست عباتها وطلعت وهي تهدد وتتوعد ..
سرور .. راح تصير ملحمة ..
عامر .. يمة الحگيها الهاي الخبلة هسا تفضحنا بالشوارع لبست عباتها وراحت وراها ..

عامر .. خوية احسبيها علينا ..
البيت بيتجن واذا ماتشيلجن الگاع نخليجن على راسنا ..

ماقدرت اقول شي .. صعدت للغرفه ووراي لينا وسراب
سراب .. لينا روحي حبيبتي يم سرور اني هنا يمها..

نزلت لينا..
سراب .. سولفيلي السالفه شنو ..
ترانيم .. البارحة وانتي نمتي بقيت بالمطبخ وسويت شاي والخطار تأخروا بالطلعه ..
اجة عدنان وقال .  شلونها زوجتي المستقبليه من التعب بهذي اللحظة دخلت ايمان ..
ومااعرف اذا سمعتنا صعدوا الفوق واصواتهم طلعت وماعرفت اشنو قلها وصدقتوا ..
واجت الي وتقلي انتي تتحارشي فيه وكلام كثير عليه
وقالت لو باقي داعش ياخذك من ايد الايد كنتي ارتاحيتي انا مااتحملت ضربتها صدقيني اول مرة اتصرف هيكي بس لان تعبت ضغطت علية كثير ..
مااحترمت وجعي وذكرتني بأكثر شغله اكرهها بحياتي واكثر جرح بقلبي ..

سراب .. وهي طبعا رادت تردها الج بطريقه ثانيه اوووووف ماراح تسكت صدگي ..
ترانيم .. بس انتي لاتگولين سالفه الزواج .. يمكن مايصدقوني ويتهموني فعلا اني اتحرش فيه ..
وهو راح ينكر اكيد ..

سراب .. خلص لاتشيلين هم بس يجي ابوي يحلها .  انتي ابقي هنا لاتنزلين ..
لان اكيد راح يجي عمي ومرته وتصير هوسة ..

بقيت بالغرفه ..
بعد ساعه سمعت صوت .. ماحبيت اكون ضعيفه وابقى بمكاني وخاصة اختي تحت ..
خفت عليها ..
قمت رتبت حالي ولبست الشال ونزلت ..
مااحب احد يستضعفني او ياكل حقي ..

ام ايمان .. انتي شلون هيج تضربيها. 
قحطان .. ام احمد مااقبل تحجين وي ضيوفي هيج .. كريم سكت مرتك ..

الجدة .. كلمة زايدة بهذا الموضوع ماالكم دخلة للبيت .. تعرفوني كل شي اعرف العايل من عيونة ومااقبل بالظلم ايمان ماتنگحم وهي العالت بالبنيه ..
شو حاطة دوبها من دوب البنات .. ليش تغارن منهن ماادري عبالك گاعدات ببيتها ..

كريم .. يمة مو هيج .. لازم اكو سبب .. ايمان تغار حقها بنات حلوات وشابات ومخليهن بوسط بيتكم وبي شباب اذا مو احنة الناس تحجي ..
مهما يكون حرام هيج ..
قحطان .. واني شلي بالناس مادام مقتنع ببيتي واهلة واعرفهم زين مالي دخل بواحد ..
البنات بناتي من اليوم ويبقن عايشات عندي لحد مانعرف مصير اهلهن ..

كريم… اذا هيح الحجي وماتخاف من حجي الناس .. خلص اعقدلهن على ولدك وانهي السالفه حتى ماتصير مشاكل ..

ام عدنان .. لا عيني شنو يعقد انتو ناسين حرام ومايصير الجدة .. وهو بقى عليج تحرمين وتحللين .

ترانيم .. اغشعهم وهم يقررون مصيرنا وكأنا جوراي عندهم .. مستحيل اقبل بـ هيكي شي ..
قلت الهم ..

احنة مو جوراي وتقررون مصيرنا .. اذا وجودنا مضايقكم فأحنة مستعدين نروح مخيمات او مكان نازحين ..
واصلا انا منتضرة اوراقنا يكملها عزيز حتى نروح من هوني ..
اعرف حملتوا همنا وشلتوا مسؤوليتنا لكن هذا مايعطيكم الحق تقررون عنا وتزوجونا بكيفكم ..

قحطان .. لا يبعد ابوج محد يتحكم بيجن مادام راسي يشم الهوا . ومااقبل اي احد يتدخل بشؤون بيتي بعدي وبعد امي ..
وانتي ايمان . بطلي الغيرة وحافظي على بيتج واذا عندج نية تخربيه روحي وي اهلج هاي الفترة ..
ايمان .. تطردني يعمي ..
ملكية .. مو يطردج بس هذا انسب حل انتي اگعدي عند اهلج بين ماتنتهي هاي الازمة ورجلج يمج ..

كريم .. بنتي مابايرة وبيت ابوها مفتوح .. مااتوقعت هيج ردك يخوي وانتي يمة خلصتي عمرج تفرقين من احفادج عندج ولد قحطان الهوا مايوم شفت حنيتج على ولدي ..

ملكية .. اوگف عوج واحجي عدل .. الديرة كلها تعرفني وتعرف عدلي .. ولك بزمن ابوك جانت الوادم تجي اني احكم بينها بشغلة الگيعان والمشاكل ..

كلكم قطعة من گلبي ..
بس الحق حق لو على رگبتي ..
ولو ابني كاتل اگول كاتل ..
المرة الثانية اذا تطاولت على اخوك لاانتي ابني ولااني امك ..

ام ايمان .. گومي يمة لمي غراضج بعد مالي طبة الهذا البيت ..
كريم .. شگلتي ايمان تجين لو لا ..

ايمان..  لا بوية مااترك بيت رجلي الغيري تتمختر بي ..
كريم .. براحتج بس بعد لاتشكين ..

طلعوا من البيت زعلانين .. وايمان تدحق فيه بغضب وصعدت الغرفتها ..

اعتذرت من ابو عدنان والجدة بسبب الي صار .. رغم انه ماالي ذنب .  لكن هذا قليل على وقفتهم معي ودفاعهم عني ..
حسيت انه وجودنا يسبب مشاكل ..
وانهم ظيبين معانا رغم كلشي .. وايمان مستحيل راح تتركنا بحالنا مادام قررت تبقى وكانت تدحق بخبث ..

تغدينا وكملنا .. رحت عطيت علاج عامر ..
وقعدت يمو بين مايكمل الفلاجين والبراستيول حتى اخليلو المغذي والابر .

كنت هادية نوعا مااا ..
عامر .. تحبين تسولفين ..
ترانيم .. لا ماكو داعي .. اصلا انا تعودت من الدنيا تلطش بية ..
عامر .. اهمليها اعتبريها غيرة نسوان ..
دخل علي وبأيدو كوب الشاي ..
قال .. حقها تغار .. اذا هي جكمة وگصيرة .. شافت الهيبة گدامها گامت ترافس بمكانها ..

عامر .. علييييي مايصير مهما يكون مرت اخوك وبنت عمك ..
علي .. نسيت عامر مايحب الغيبة .. شلون نجيبها گبالنا ونغتابها براحتنا ..
بس خاف تگوم تلطم وتملخ بشعرها وتگول تحااارش بيه
عامر .. لا انت ماتجوز .  يااابة تعال اخذ هذا الهتلي يمك ضحكت لااراديا على مناقرهم ..

علي .. ههههههه واخيرا ضحكت . اضحكي يمعودة منو ابو باجر .
عامر .. الدنيا خلصانه اخيتي انتي . واني احسبيني اخوج الحبير واگلج .. طنشي ومعليج اكو الله ياخذ حق ..
ترانيم .. كلما اضوج وانقهر انه الدنيا شتتنا ورمتني انا واختي هوني .. انقهر واضوج ..

لكن لما اشوف الطيبة الي بقلوبكم وحبكم النا مثل اخواتكم هذا الشي يسعدني ويخليني اثق انه الناس داخلها صافي ونقي وماكو احد ولد شرير الكل ملاك لكن الضروف هي الي تغيير النفوس والناس. 

عامر .. طيبتنا استمديناها من برائتجن .. شفت نسوان هواي وانتي اخيتي لاعبالج ماحبيت ولاشفت ..
لاشفت اشكال ..
وماكو واحد مثلي حب بمراهقته وماافتخر بهذا الشي ابد لان جان طيش شباب .
وجنة نتراهن احنة وجماعتنا منو يحب اكثر ويكبل هو رجال ههههههه ..
لاتستغربين ..
بس كبرنا وعقلنا ..
المهم سالفتنا .. شگد شفت نسوان لدرجة خلتني اعرف البنيه من كلامها ونضرتها ..
بس الله شاهد ماشفت مثل طيبتجن وبرائتجن ..

رغم انتن ماجبورات تلبسن حجاب ..
الا انه احترامجن للبيت والمكان الي گاعدات بي والتزامجن بعاداتنا وحشمتجن زادت احترامي الجن ..

ترانيم .. لا هيكي كثير .. اخجلتني ..
علي .. بالعباس صارت طماطة ..
ترانيم .. ههههههه صرت بلسانو لعلي منو يخلصني بعد
عامر .. هذا ماخذ الدنيا هوبزة..  لو بي حظ جا راح اخذ مكاني والتحق بالحشد ..

علي .. والله ياريت بس امي ماتقبل وگالت اتبرأ منك اذا رحت .. اخوك تصوب وذاك بوسط الموت وانت هم تروح مني وضلت تبجي وتنعى وكسرت خاطري ..
كملت العلاج ..
وصعدت للغرفه ..

شفت البنات يلعبو لعبة بالموبايل وسراب نايمة ..
اخذت الكتاب ورحت الغرفة عزيز ..
رجعت الكتاب المكانو يمكن مالي نصيب اكملوا .. وبقيت اتصفح بالكتب ..
اخذت دفتر وقلم وقعدت اكتب كلام وهواجس وماحسيت على حالي ..

تركت الدفتر بالمجرات .. ورتبت كلشي بمكانو وطلعت ..
يمكن انا اخذت عليهم زيادة ..
ماكان لازم اتعلق هيكي ..
اذا اهلي الي ربيت عندهم وكبرت تركوني واخذتهم الدنيا مني ..
كيف اعتقد انه راح يدوم غيرهم لي ويبقى ..
عقلي كان يعطيني افكار وحلول لكن قلبي مو راضي يتقبلهم ..

اخترت الصمت خلال اليوم والعزلة كانت رفيقتي ..
حاولت سراب تخليني اطلع عن صمتي وسرور ولينا يضحكوني ..
لكن احس انه شي بداخلي سيطر عليه ..
لليل اجت لينا وبيدا .. الموبايل ..
رنوم اخي عزيز يتصل .

اخذتو منها ومترددة ..
رديت .. الووو
ياهلا هيج مليتي مني وصارلج يومين ماتردين عليه . لو استاذ عامر ماخذ مكاني وتفضفضين وتحجين وياه .
-اشنو تقصد ..
-هيج ماكو شي .  صوتج غريب صاير شي ..
-لا ماكو شي .. بس نعسانه ..
-ساعه عشرة هسا مو عوايدج .
- يمكن ارق لان اسهر كثير بالفترة الاخيرة .
-اعرف جاي تعانين ضغوطات . بس تحملي الخاطري احنة عبرنا شوط كبير وتخلصنا وطلعتن من داعش ماتگدرين تتحملين كلام فارغ ومشاكل تافهة..
-بالعكس انا مرتاحة هوني . لكن فراق اهلي طول . وانا احس بتأنيب الضمير . هم مفقودين وانا مرتاحة واضحك وحياتي مستمرة ..

-يمعودة گولي يله .. قابل نوگف الدنيا لو نموت . هواي من عدنا ضيعوا احباب واهل بس الكل استمر لان هي هاي الحياة .  عبارة عن استمرارية مثل القطار ..
اذا وقفنا راح يفوتنا واحنة نبقى بمكانه تايهين ..
صحيح اكو بيها محطات . بس الها وقت محدود نتوقف ونرتاح ونستعيد قوتنا ونستمر بعدها بالطريق ..
-انت شلون تتحمل تعيش هيكي بعيد عن اهلك ..
-اهلي بداخلي وبگلبي وبعقلي .. بس اكو امور اهم وناس محتاجتنا اكثر ..
يعني لو مابعدي عن اهلي ماكان شفتج وعرفتج وهسا جاي نسولف ..

ابتسمت ..
-ها شو سكتنا ..
-اليوم ماعندي مزاج ويمكن راح تضوج معاي ..
-بالعكس بس مااريدج تضوجين .. الامل والتفاؤل حلو
لو ما اكو امل كان مااتحملنا الي عايشيه هسا ع الساتر وفوگ التراب وحياتنا بخطر ..
بس لان عدنا امل ينتهي كل هذا بيوم وننتصر ماكنا قاومنا وگدرنا نكمل ..
لازم نقاوم ترانيم .. مادام نبض گلبنا مستمرة ونفسنا يصعد وينزل ..
لازم مانستسلم ونتراجع ..
ترانيم .. شكرا الك عزيز ..
-عفوا بس ليش تشكريني .
-قول اشنو الي مااشكرك عليه .. تعلمت منك كثير ..
سامحني اذا ضايقتك بيوم ..
او سمعت كلمة جرحتك . 
الرب يحفظك ويسعدك بحياتك ..

عزيز .. لا لا لا اوگفي مااريد اسمع هذا الحجي . اولا مابينا شكر هذا واجبي ..
وثانيا .. ليش احسج جاي تودعيني ..

نزلت دموعي مسحتها وقلتلو .. ماكو خبر عن اهلي .
عزيز .. غيري غيري الحديث .  لا لسة بس اوراقكم راح يجيبوهن حتى تدور تصير عندجن جناسي ومستمسكات ..
ترانيم .. شكرا الك . يلة ماراح اخليك تسهر وانت تعبان
عزيز .. حاس اكو طردة بالموضوع . يله مااضغط عليج بس باجر ماكو اعذارر..

ترانيم .. خلي بالك من نفسك ..
عزيز .. ان شاء الله..
غلقتو واتنهدت . قمت حتى ادخل للبيت ..
لقيت عدنان قبالي ..
تركتو وردت ادخل . سحبني من ايدي للمر الخلفي ..
دفعتو من صدرو وهددتو ..
اذا لمستني مرة ثانيه اقتلك فاهم ..

عدنان .. لا لا لا مااصدگ هالجمال والرقه الهم گلب يكتلون ..
ترانيم .. ابعد عني خلي ادخل للبيت . 
عدنان .. شو صارلج ساعه تسولفين بالموبايل ماگلتي اريد ادخل للبيت ..

ترانيم .. انت مريض مثل مرتك .. لاعبالك نسيت الي قلتو المرتك وكيف خليتها تحقد عليه .
عدنان .. واذا ماسمعتي كلامي راح تنضرين اكثر صدگيني اريد مصلحتج ..
ايمان ماراح تسكت .. وراح تبقى تنگ الى ان تهجج منا
اسمعي كلامي وخليني اخذج بعد باجر بالليل ونروح منا ..

دفعتوا ودخلت .  واحد وسخ وخسيس ..
دخلت مرعوبه وماانكر خفت ..
عدنان مصمم يخرب حياتي ..
وخفت ليكون يسوي هيكي الاختي وتخاف تخبرني ..
الاوهام والتخيلات مافارقتني حتى حلمت انه يعتدي عليه وانا اصرخ وابكي ومحد يسمعني ..

قمت مفزوعة من نومي ..وقررت اخلي حد لهذا الموضوع ..
الصبح .. قعدنا وتريقنا وكملنا ..
الكل انشغل بشغلوا ..
خليت الدوا العامر ..
وصعدت بعد مااتأكدت ماكو احد فوق بس ايمان ..
رحت لغرفتها وقفت بالباب .. غمضت عيني ودقيتها .
فتحتها ..
اغشعتلي وقالت .. خير ياطير شرايدة ..

ترانيم .. ممكن احكي معك ..
ايمان .. وشنو بينا حتى تحجيه..
ترانيم .. عدنان ..
ايمان .. هاااا شبي .. شتقصدين .
ترانيم .. لاتخافي اني جاية اعقد اتفاق وياج انتي تردين تخلصين منا . وانا اريد راحتي اما واختي ..

ايمان .. ادخلي ..
دخلت وكنت متأكدة ماكو احد يساعدني بهيكي موضوع غير ايمان . لأنها مستعدة كلشي تسوي حتى تخلص منا

ايمان .. اي سولفي ..
ترانيم .. بشرط تسمعيني للاخير وماتقاطعيني ..
ايمان .. وتتشرط فوگاها .. سولفي هلي نفهم
ترانيم .. عدنان طلب يتزوجني .
ايمان .. شنوووو جذابه انتي الي عارضه عليه هيج شي هو گالي .
ترانيم .. وانتي صدقتيه .  يعني لو انا عرضت عليه هيكي شي كنت جاية هسا اطلب منك تهربيني من هوني ..
ايمان .. اهربج ؟؟ شلون
ترانيم .. انا واختي ماعدنا احد ومااعرف المكان هوني بالعمارة .  ومحتاجة احد يساعدني واذا طلبت من اي شخص غيرك ماراح يقبل نطلع لاننا امانة عزيز .
وعدنان مضايقني كثير وانطاني مهلة البعد باجر وماعندي غيرك يساعدني ..
ايمان ..شوفي اذا طلعتي تجذبين عليه ماتلومين الا نفسج ..
ترانيم .. مايهمني ان صدقتي او لا .. الي يهمني احافظ على نفسي واختي . 
ايمان .. ووين اوديجن . اني هم مااندل ..
ترانيم .. احنة مانقدر نطلع لمكان ماعدنا هويات .. ساعدينا نروح لمكان النازحين . 
واحد تثقين فيه يوصلنا ويساعدنا ..

ايمان .. انتضريني للظهر اشوف اخوي هو ضمن منظمة مساعدة النازحين ..
احجي وياه وارجعلج خبر ..

ترانيم .. وبعد طلب ؟؟
ايمان .. شنو بعد ..
ترانيم .. يرتبلي شغل بأي صيدلية او مكان لازم اشتغل واصرف علية وعلى اختي ..
ايمان .. اشوفة .. بس ها مااريد اي احد يحس ومو تورطيني وتگولين اني هربتج ..

واذا رجعتي او شفتج متواصله وي عدنان ماتلومين الا حالج ..
ترانيم .. اطماني انا اريد انهزم من هوني بسبب ماادحق بوجهو .. بس انتي عجلي .. لان مااريد ابقى الباجر هوني الفجر انا واختي نطلع ..

ايمان .. هذا هو . هسا اخابرة واشوفه وين واروح الاهلي حتى افهمة ..
طلعت من غرفتها ومتعجبه على حالي اول مرة تتفق معي ..

نزلت لتحت وحبيت اقضي وقت مع الجدة وسراب وسرور لأن اغيد اشبع منهم قبل لااتركهم ..
سراب .. رنوم اليوم مزاجج احسن .. خليج هيج لان اني استمد الامل والقوة منج ..
ترانيم .. سراب دايما خليكي هيكي لاتتغيري .. الضحكة تلوق الكي كثيغ ..

سراب .. مدام انت مگابلتني راح دوم اضحك .. ولج حتى جدتي ماتعصب علينا مثل قبل وبس تضحك ..
خو لينا بحث اخر .  وخاصه اذا اجتمعت هي وعلي وسرور ..
البارحة عامر طردهم گالهم رجلي گام توجعني من الضحك ..

ترانيم .. الله يسعدكم دايما ماقصرتوا معنا وكنتو اكثر من اهل بالنسبة النا .
سراب .. يبوووو مااحب هيج حجي اضوج . 
ولج لو بيدي مااخليجن تطلعن منا العمر كلة .
طلعت ايمان لابسة عبايتها ..
سراب رايحة الاهلي اذا واحد سأل عليه ..
ومادحقت عليه مثل كل مرة ..

سراب .. اللهم صل على محمد وال محمد  .. اليوم هادئة وعاقله الله يهديها ..
والله خايفه من هذا الهدوء ..
حاولت اسوي نفسي مامنتبهة الكلامها ..

خلصت اليوم كله مع جدة ملكية والبنات .. وبعدها اجو ناس خطار عندهم ..
وماطلعوا للعصر ..
رجعت ايمان .. صعدت الغرفتها ..
بعدها اشرت الي من السلم وقالت ..
تعالي ..
حاولت ماالفت الانتباه وصعدت ..
دخلت الغرفه البنات وهي اجت وراي ..

-اشنو عملتي ؟؟
- باعي حجيت وي احمد وقنعته بس يبقى بينا سر حتى للمستقبل كلشي يصير ماتگولين لااني ولااخوي ساعدناج -تمام قولي ..
-باجر من الصبح تحضرن غراضجن وتنزلن .. بس يرمش عليه اجي اگعدجن ..
هو يرتبلجن مكان بين النازحين ويسجل اسمجن ..
-والشغل ..
-هسا الشغل بعد خلي يشوف ويسأل .. وهو اصلا راح يخليجن بمنطقة قريبة ع المناطق السكنية والسوگ ..
يله هسا اروح لايشكون بيه .. وانتي مثل ماگتلج ..

انتضرت الليل ..رحت للغرفة بهدوء جمعت ملابسنا واغراضنا وطلعت الفلوس الي عزيز اعطاهم لي ..
واخذتهم الغرفة عزيز ..
بقيت الليل كله بغرفتو .. كتبت رسالة لسراب ..
ورحت للفراش نمت ..
اذن الاذان ..
دق منبه موبايل سراب ..
قعدت صلت ورجعت نامت ..

وانا النوم غاب من عيني ..
طلعت الرسالة وخليتها ع الطاولة .. وفوقها الشاحن .
دخلت ايمان ..
اشرتلها تطلع ..
قعدت لينا بهدوء ..
كنت خايفه سراب تقعد تغشعنا ..
سحبت الشالات واخذتها لغرفه عزيز. .

لينا .. اختي نعسانه ..
ترانيم .. بسرعه غسلي وخلينا نروح ..
لينا .. وين نروح ..
ترانيم .. بعدين افهمك هسا مااقدر افهمك لايقعدوا ويغشعونا ..
لبسنا ونزلت اغراضنا بسرعه ..
نزلت ورانا ايمان ..
طلعت الاخوها قدامنا ..
كلمتو .. وبعدها قالت ..
يله اطلعن بسرعه .. نزل هو اخذ غراضنا
وقال .. اصعدن بالسيارة ..

صعدنا .. وانا كنت ادحق بالبيت .  هذا البيت الي دخلتو غريبة وهسا اطلع منو وكأني مهجرة من مدينتي ..
ليش مكتوب النا نعيش عمرنا كلو مشردين ..
سامحوني ..
سامحني عزيز لاني ماسمعت كلامك ..
سامحيني سراب لأني خذلتكي ..
لكن هذا الي لازم يصير ..
وجودنا من الاول عندكم خطأ ..
احنة ماننتمي لهوني ولاراح ننتمي !!
حركت السيارة وراحت .. وراحت معاها كل ذكرياتي ..

#بقلمي_الكاتبة_شمس
يتبع……

رأيكم بالقصة للان وتوقعاتكم حبايب ..
ولاتنسون التصويت للقصة وللمسابقة 😘