صباح الورد لعيونكم احبتي ❤

//// البارت الرابع والعشرون /////
#بقلم_الكاتبة_شمس
( شمس السعـدي )

********* #ترانـيــم ***********

الاشتياق....
حكاية..لايمكن شرحها في سطور...ولايحكمها زمان ومكان
ولايطفئهُ لقاء..

          أشــتــاگــلــك..
     بــس الــحـچــي الـمـضـمــوم
            الـك يـتـبـعـثــر.

اشتقت الك حبيبي .. صدقا تعبت من كثر ماانتقلت وتشتت ..
متى ارتاح والتقي فيك ونبعد عن العالم والناس ..
احس نفسي بدونو ضايعة ومااعرف اشنو اعمل ..

لازم اسمع كلام عامر واحافظ على ابني ..
لو بقيت بلا عقد راح ياخذو ابني ويسجلوه بأسم ايمان وعدنان ..

هالمرة .. راح امشي ورى عقلي واترك عواطفي ..
لازم احافظ على الثمرة الي حصدتها من حبي العزيز ..

جمعت اغراضي ورجعنا للعمارة ..
دخلت لاقتني ايمان كانت رايحة الاهلها لاسلمت ولاحكت ..
عامر .. وين رايحة ..
ايمان .. وانت شكو عندي رجل يحكمني خليكم انتو بالاميرة مالتكم الي مسويتكم طليان عندها ..
عامر .. الله يطيح حظج على هذا اللسان .. وربي العباد اذا رجعتي لهنا رجلج اگصها وعود خلي رجال منكم يواجهني .. ولي من وجهي يلة ..
هزت ايدها وراحت ..
علي .. والله لو مااكبر مني جا ادبتها ..
- رجاء عامر انا مالي خلق مشاكل اتركوها هي تعمل هاكذ لان انا اجيت ..
- خلي تولي انطيناها وجه هواي لما صعدت على اكتافنا ..

طلعت امو..
- ياهلا يمة شبيكم شكو ليش واگفين بالباب ..
استغربت من ردة فعلها ..
عامر .. خلي ندخل واسولفلج بعدين .. ميتين من الجوع شمسوية غدا ..
- شلون بامية وتمن تلوگ الهذا الحلگ ..
قبلها براسها وخلنا الغرفة الجدة ..
- هلا يمة نور البيت ..
حضنتها وبوستها ..
- اللهم صل على محمد وال محمد هاي ايامج موووو ..
- اي كم مرة صارت عندي اوجاع وقالو طلق كاذب ..

ضحكت الجدة ..
احنة نسميها تشلعات .. المرة من تدخل بشعرها تصير عندها تشلعات مال الطفل ووجع ..

تعاي يمي هنا اگعدي ارتاحي ..
سلمو عليها الولد ولينا ..
عامر .. سرور وين خلي تسويلنا غدا ..

نزلت سرور كانت تسبح .. سلمت علينا وحضنتنا مامصدقة لان اجينا ..
اتلمست بطني .. كبران حبيب عمتة شوكت يجي من هسا متلهفة عليه ..
علي .. اي حتى تسودنيه مووو
لينا .. اغشع مين يحكي هههههه
علي .. وانتي ماصدگتي موووو
ابتسمت على مناقرتهم ..
راحت لينا وسرور عملوا الغدا .. تغدينا ..
قالت الجدة…  اصعدن يمة ارتاحن تلگيجن تعبتن من الطريق ..

ردت خالة ام عدنان ..
- اوكفي عمة بس خلي اراويها شأشتريت الاسد ..
راحت ورجعت بيدها جنط فتحتهم ..
كانت فيها اغراض وملابس كثيرة .. كلشي يخطر ع البال مشتريتو ..
الصراحة مااتوقعت تعمل هاكذ خاصة بعد اتهامها الاخير لي ..

- وبعد اصعدي فوگ وشوفي جدة شنو اشترالة ..
فرحت للاهتمام ولانهم اشتروا كل هذي الاغراض تشكرت منها ..

عامر .. يمة ايوي وين ؟؟
- ابوك طالع عندة مشيه وعدنان وياه ..
- والشغل منو بي ؟؟
- العمال بس ..
- زين ارتاح ساعة وامشي بمكانهم ..

اخذت الغراض وصعدت للغرفة ..
لقيت سرير ازرق ومجرات لونهم ازرق بالغرفة ..
ابتسمت ..
قعدت ارتب اغراض اسد بالمجرات ..
دخلت لينا ..
- لينا حبيبتي اغشعي سرير اسد شلون حلو ..
- تحكي صدق اختي .. فرحانة بالسرير .. معناها ماراح يتركونا نرجع البغداد ..
وانا خلص تعودت واستقريت هونيك وصار عندي صديقات .. مااريد ارجع هوني ..
تركت كلشي بيدي ..
واتقربت منها ..
حبيبتي لينا .. تتذكري يوم الي دخلو داعش علينا ..
- وليش تذكرينا بهيج يوم ..
- لانكي لازم ماتنسي .. ان الرب دايما يسخر النا من يحمينا وانو قدرنا هاكذ ولازم نرضا .. برأيك لو اني مااقتنعت بقدري وماصبرت واتحملت ..
راح يكون حالي هاكذ ..
تشردنا من مدينتنا واخذنا داعش وباعنا لولا عزيز ينقذنا .. اجينا هوني وعشنا مع عادات غير عاداتنا مااتحملنا وهربنا ورجعنا القدر مرة ثانية ..
وامنا راحت وبعدها رحنا الاربيل وقلنا راح نرتاح ونستقر وماقدرنا وبعدها استقرينا ببغداد وتزوجت عزيز واقتنعت انو القدر رسملي هالطريق حتى بالاخير التقي بعزيز وارتاح ..
لكن ماارتحت وعزيز راح مني .. رغم كل الي صارلي مايأست وعندي امل يرجع .
وكل يوم اشكر الرب انو نجانا من داعش والي يعملو مع السبايا وانو حالنا احسن من حال كثير من النازحات رغم الي صار بينا .

لينا حبيبتي .. مااريدكي تضعفي ولازم نقاوم للنهاية ولما يجي اسد راح نكون ثلاثة .. واوعدك ماراح اخليكم تتعذبو اكثر .. حياتنا راح تتغير للاحسن لكن اريد منكي الصبر ..

- مااقدر اكون مثلكي اختي ..
- راح تكوني اقوى مني صدقي .. وبعدين لاتنسي اسد يريد خالتو تكون قوية وتحميه ماضعيفة ..
ابتسمت .. خليني اساعدكي بترتيب اغراضو ..

دخلت سرور ..
- رنوم عامر يگول العصر تروح السراب تشوفها اوصلها وارجع اخذها بعدين ..
- ياليت مشتاقة الها ولنونو كثير ..
لينا طلبت تروح معي ايضا .. اخترت كم قطعة ملابس من اسد اشتريتهم من بغداد . ولان صارو عندو كثير ملابس بعد مااشترتلو جدتو…

سراب ولدت وعاملة عملية ماتقدر تطلع ..
رحنا العصر اخذنا عامر لعندها ..
ترددت ادخل بسبب زوجها ..
لكن عامر طمني انو بالشغل مايرجع لليل ..
ماانكر الي قالقني ايضا وجود بيتها بصف بيت عمها .

لما اغشعتنا فرحت كثير ..
-رنوم اشتاقيت الج يابذات .. اتمنيتج يمي من ولدت ..
حملت ابنها ..
صغير وناعم ..
لينا فرحت وتقلي .. اختي اشتقت الاسد متى يشرف للدنيا ..
ضحكتنا ..
التفتت السراب ..
قوليلي زوجكي شلونو معاكي ..
- لا خية نعمة من الله . وخاصة من عرف بية ولد تغير .. لو من جبت مايخليني اجيس الورد يجيب سوزان تشتغلي والطبخ من البرة لو من اهلة ..
- واسراء وين ليش ماتساعدكي ..
- يوووه ماگتلج غير اسراء تعاركت وي بيت عمي ..
اوگفي خلي اسولفلج ..
مو ايمان وامها تخبلن بعد ماعزيز سودة عليه اختفة .. وامها توز براسها تگللها المصلاويث راح تاخذة منج ..
ورجلج عينة منها ..
ايمان تسودنت . وگامن يطلعن الصبح ويرجعن محملات بخورات وشغلات ..
عود عبالها تسطر عدنان بهاي السوالف ماتدري عدنان راضع وي ابليس ومايمض بي السحر ..

- اشنو قصدكي ..
- خية تريد تلطشة وتخليه خاتم بأصبعها .. اسراء من سمعت تعاركت وياها وگالتلها تردين تخربين بيت اهلي . گامت ايمان لافتها على اسراء وگالت الابوي تسويلكم سحر ..
واختلفن الجانن حبايب ..
گوم احمد اخذ اسراء وطلعوا بيت وحدهم مااتحمل ..
حتى الي مايجن زعلانات بس وكت ماجبت وراحن ..
وراحت تتبجبج العدنان .. وذاك صدگها وگطع رجل اسراء من بيت اهلي .
بس هي تروح وكت عدنان ماهو ..

- مااعرف اشنو اقول .. لكن ايمان سبب شتات البيتين وخرابهم ..
- عاش السانج .. مو اگول الامي تگلي معليج لاتتدخلين ورجلي هم يگلي لاتتدخلين ومعليج ..
ومادامة زين وياي مااريد اخرب علاقتي بي ..
تردين الصدگ رنوم ..
شگد جنت ماراضية بي ولامقتنعه وعصبيته عليه وحتى بوشية لبسني .. بس هسا من شفت حنيتة وخوفة عليه وشلون يداريني لو كلمة احبج الي اسمعها اول مرة منه .. غيرتني ..
صرت احسب حساب العشرتي وياه ..
والله بعدة محد يفيدني كل واحد كاين بكونة منو بحالي ..
- سراب لاتحكي هاكذ ماافهم كثير .. لكن كلامك صح مايفيد المرأة الا زوجها وابو بيتها ..
اغشعي الي صارلي بعد عزيز .. وكيف الدنيا ظلمتني وبقيت خايفة على ابني منها ..

- گولي يالله .. عامر خوش عامر والله وادري بي مايعوفكم سواء رجع عزيز او لا ..
- مااريد اقطع الامل .. اتمنى يرجع ويربي ابنو بيدو ..

اندقت الباب خفت زوجها رجع ..
- لاتخافين ابو محمد مايجي هسا ..
- فتحت لينا الباب .. قالت اجة اخي عزيز ..
لبست حجابي ..

سلم على سراب وقال ..
يلة خلينا نروح للبيت وبطريقنا اخذج للبساتين شويه هاي وصية جدتي گالت فررها وخليها تتحرك ..

ردت عليه سراب .. ابقوا تعشو يمي اليوم ..
- لاحبيبتي غير مرة ..
- اني بعد كم يوم ويطلع اربعيني واجي يمج هناك ..
- ياليت محتاجتكي كثير

طلعنا من بيتها واتمشينا على طريق البساتين ولمزارع ..
تذكرت عزيز لما اغشعني انا وعمو ابو رماح بالبستان ..

قالو .. هذي وردة موصلية .. ابتسمت ..
خلعت حذائئ من رجلي .. ونزلت حافية ع الزرع كان رطب. 
حسيت ببرودة تتغلل بقدمي ..
غمضت عيني وامشي . من انا صغيرة احب هذا الشعور ..
بقيت امشي واتذكر كلامو .. واحس الهوا يلفح وجهي ويهمس بأذني ..
سمعت صوت عامر .. ام اسد خاف مو زين عليج الگاع رطبة ..
وانا امشي احكي .. جربوا هالشعور معي صدقوني ترتاحو ..
خلعو وعملو مثلي ..
- هههههه اختي ياااي تتذكري لما كنا صغار كنتي تعملي هاكذ ..
- اذا اجة واحد منا وشافني شيگول عليه .. وفوگاه مطاوعجن واسوي مثلجن ..
التفتت .. اشنو شعورك ..
- مااعرف بس حلو ..
- اغشعت . ماقلتلك ..

اتصل علي يسأل عنا .  قلو على مكانا بسيارتة ابوه .
نزل .. شنو هالشعور الحلو .. وي الغروب عمي هنيالكم

- عزيز يحب هاكذ جو ..
علي .. خو الاخت هنا ماخذة راحتها ورافعه ملابسها ..
هووووو لايشوفج واحد نزلي ملابسج ..
- وانت اشنووو صاير مزعج كثير ..

- ههههههه يابة اذا اني مزعج فأنتي عنودية كلش ..
- اختي خلينا نروح تضايقت. 
ضحك عامر .. وهمسلي .. ذولة وراهم سالفة بالمستقبل وگولي عامر گال ..
ابتسمت ورجعنا للبيت ..

كان عمو ابو عدنان وعدنان بالبيت ..
لمااغشعني تقرب وسلم عليه وقبلني براسي ..
- يابوية ريحة الغالي وابن الغالي منورين البيت والله .
- شكرا عمو…
حكى عدنان .. شلونج ام اسد متغيرة ..
كح عامر .. سكت ..

ام عدنان .. يمة يلة حتى نجهز العشا وهاي عمج جاب معلاگ اليوم علمودج ..
بدلن وتعالن بسرعة…
صعدت للغرفة بدلت ونزلت ..
كانت نظرات عدنان ماتفارقني .. نزلت ايمان من فوق ..
عامر تعصب .. هاي شجابها هنا مو. گلت اذا دخلت اكسر رجلها ..

صاح فيه ابو .. عامر شلون تحجي هيج واخوك واگف
عدنان .. خليه بوية عامر الظاهر حلالة الدور ويريد ياخذ مكان عزيز بكلشي وعينة عليه ..

عامر .. عدنان لاتخربط بالحجي .. مرتك المؤدبة تگول الحمويها وولد عمها .. انتو طليان ..
ترضاها يبوي ..

ايمان .. عمو والله ماقصدي طلعت مني هيج بعد ماصيح عليه وهاني كدام اليسوة والمايسوة…

ابو عدنان .. احترمي نفسج ولج .. هواي صايرة تتمادين. اني انطيت ببنتي علمودج ولاعبالج مصدگ سوالفج ترى اني فار الدواوين كلها واعرف البشر من عينة .

ايمان .. ماتحجي عدنان ماتشوفهم يهينون بيه وانت ساكت .. المصلاويه كل يوم شاردة ومصخمة وجهم وجابت طفل مدري منين مايحجون عليها .
والشريفه يركضون وراها ..

صاح عامر وعمو سوى .. ايمااااان ..
عدنان .. ياغبية على هذا الحجي اعتذري منها بسرعه وبوسي راس ابن عمج ..
ايمان .. لو اموت مااسويها ..
عدنان .. اذا ماسوتيها مالج گعدة بالبيت ..
قلتلو .. اتركها انا مايهمني كلامها اصلا .. لان ماهي الي تقيمني .. المهم ثقتي بنفسي تكفي ..
تركتها ورحت الغرفة الجدة ..

سمعت صوتها وبكيها وبعدها صعدت الغرفتها وبعدها عدنان .
حتى ع العشا مانزلت ..
تعشينا وعمو يغصبني ع الاكل وانا مااقدر اكل الكبد كثير .. نفسي ماتتقبلو ..

نقذتني الجدة بسؤالها .. يمة هسا باجر يعقدون ان شاء الله..
عمو .. اي يمة اتفقت وي القاضي وكال جيتهم روتينية ..
دحق بيه .. فهمج عامر مووو ..
هزيت براسي ..

ثاني يوم .. لبست جبة وحجاب حتى ماتبين بطني كثير . وطلعنا للمحكمة رغم الكل احسو يدحق فينا ومستغرب وضعي ..

القاضي كان يسألني وانا اتخيل عزيز قبالي ..
اتمنيت هو معي وانا اقول موافقة واوقع على عقدنا ..
مااهتميت كم خلو مهر واشنو عملو وشلون زوروا..
المهم عندي ابني يتسجل بأسم ابوه ومايضيع حقو ومستقبلو ..

طلعت كان عامر وراي قال .. مبروك ..
دحقت فيه .. مبروك لو كان عزيز معي هذي الورقة ماتعني عندي اي شي ..
بقدر مايعني لي العقد الي عملتو معاه ..
سكت ومارد .. رجعنا للبيت ..
الكل يبارك على اشنو مافهمت .. حتى العقد بقى عند عامر رغم الي عرفتو انهم عملوه بتاريخ متأخر ..

صعدت بيومها حزينة…  اقلب بصورو وابكي ..
عيني على ملابس ابني ..
ااااه ياعزيز .. الاشتياق يذبح .. تعبت متى ترجع وتكحل عيني برؤياك ..

مر كم يوم وانا كل يوم اتحرك واشتغل .. اخذتني ام عدنان للدكتورة قالتلها .. وضعي زين والطفل كذلك ..

بيوم كنت فوق ارتب ملابسي كنت دخلتهم من الحبل ..
وانا طالعة من الغرفة ..
دخل عدنان وقفل الباب وراه ..
البنات تحت وماكو احد فوق .. ماحبيت احد يغشعنا ويفهمني خطأ ..

-عدنان اطلع من هوني والا اصرخ ..
- مايهمني .. اتقرب اكثر وانا ارجع ورى ..
كم يوم منتظر اختلي بيج .. لاعبالج فرحانة زورو ورقة واعتبرتي نفسج مرت عزيز قانونيا..
الي يزور هيج ورقة يگدر كلشي يسوي ..

كان يدحق بيه من فوق التحت .. صايرة تخبلين والحمل زادج حلا ..
- احترم حالك شلون تحكي معي هاكذ انت ناسي انا مرت اخوك ..

- اخوي راح مات .. شوكت تقتنعين عزيز بعد مايرجع . بيج خير فكري المستقبلج .. ابوي اذا عاندتي راح ياخذ الطفل منج ويطردج انتي واختج ..
اني شاريج يبنت الناس واذا وافقتي ابنج ابني يصير وادللة دلال .  حتى عامر مايحميج ولاتشوفيه مسكين هم عينة منج ويحاول يتقربلج ..
- كافي راح استفرغ بسببك انت شلون تفكر الناس ماكلها مثلك .. عامر الي تحكي عنو مايوم دحق بيه ولالمسني مثل ..

دفعتو قوي حاولت اخلص منو وافتح الباب ..
سحبني من يدي بقوة ورماني ع السرير ..
حسيت بضربة ومغص قوي ..
عصرت بطني وقعدت بالارض ..

اتقرب مني .. شبيج تأذيتي والله ماقصدي شو خلي اشوفج .. قرب ايدو منو ..عضيتو بلاوعي . طلعت قهري والمي كلو فيه ..
حسيت اسناني انغرزت بلحمو..
ماقدر يصرخ لكن سحب يدو قوي وطلع ..
فتح الباب وطلع بسرعه وانا قمت من الم احاول انزل التحت ..
دخلت ايمان وهي معصبة .. شجنتو تسوون هنا ..
ماقدرت احكي معاها ولاارد ..
عدنان يسحب بيها ..
وهي تقول .. شسويتلها .. ليش لازمة بطنها وعاضتك بيدك .. احجو لا والله افضحكم فضيحة ..
دفعتها وطلعت ..
مااهتميت الهم ونزلت بهدوء حتى احد يساعدني ..
كان المي اهون عليه من جرح قلبي بعد عزيز وعيون الي مايرحموا ..
لو كنت موجود ياحبيبي كنت اخذت لي حقي منو..

#بقلمي_الكاتبة_شمس
يتبع…..
حبايب اعتذر ع التأخير هذا الي گدرت اكتبة . لان انحذف البارت ورجعت كتبت من جديد واني مريضة .. ان شاء الله اعوضكم باجر