مساء الورد والقداح حبايب ❤
اليوم نزلت قبل الوقت حتى ماتنتظرون كثر ..
وبارت البارحة راح اعوضكم بي الجمعة او السبت ..
متابعة ممتعة ..

//// البارت الحادي والعشرون /////
#بقلم_الكاتبة_شمس
( شمس السعـدي )

********* #ترانـيــم ***********

كم من ليالٍ ..
طال فيها الانتظار ..
نرسم الاحلام فيها .. الى ان يغدو النهار ..
فهل ستعود ؟؟ ام كنت حلما جميلا وانتهيت ..
سأنتظر عودتك دائماً..
لتمد لي يدك..وتأخذني إلى ذلك المكان..
سأنتظر... فهل ستعود ؟؟
خبأتُ لك كل الذكريات..ولم يبقى لي إلا الدموع
والحسرات..
إفتقدت قبلاتك..كلماتك ..أشتاق لعنادك المميت
وهمساتك ..
فهل ستعود ؟؟ ام ستتركني مع قطعة منك لنعيش وحدنا مآسي هذه الحياة !!

فرحت لما سمعت عزيز بخير .. هسا اقدر افرح بحملي وطفلي من عزيز .. بقيت اتلمس بطني وانا مومصدقة هوني اكو قطعة من حبيبي ..

حسيت نفسي احسن .. قلتلو عامر خلينا نطلع ..
عامر .. اي صار بس هاااا العصر نراجع دكتورة اخصائية الدكتورة گالت .

هزيت براسي وساعدتني لينا اقوم .. طلعنا من المستشفى للبيت لاقتني ام نور بباب البيت كانت عندنا .
- هلو عيني وينكم صار ساعة ادگ الباب ماكو ..
تحكي وعينها على عامر ..

- كنت مريضة واخذوني للمستشفى ..
- ها سلامتج .. الولد اخو زوجج مو يشبهة كلش ..
- اي عامر اخوي زوجي ..

فتحنا الباب .. دخل عامر ..
- وزوجج لسا مارجع من الدوام ؟؟
- لا عندهم هجوم ويمكن يتأخر .. وبعث اخوه يغشعنا .
- الله يساعدة ويحفظة .. يعني راح يبقى يمكم اخوه ؟؟
- مااعرف .. لكن حتى لو بقى فهو بيت اخوه ..
- اي صدگ .. لعد عيني لتطبخين وانتي مريضة اني راح ادزلكم ..

ماصدقت راحت ودخلت ..
عامر .. دخيلك ربي هاي شني من مرة بس تسأل ..
- صحيح بس هي طيبة وماتركتني ودايما تسأل عني ..
- ادخلي ارتاحي واني راح اجيبلكم شي تاكلوه ..
- لاتعب حالك عامر ام نور راح تبعثلنا اكل .
- ميخالف اروح اتسوگ واجي . 
- عدنا مامحتاجين شي. 
- ادري عندكم كلشي واعرف عزيز مايخليج محتاجة شي ..
يلة اني طالع مااتأخر ..

طلع عامر وانا دخلت للغرفة .. احس ريحتو بالغرفة وهمساتو وصوتو بأذني ..
ابتسمت واتلمست بطني ..
اغشع حبيبي هذي غرفتنا انا وابوك .. هوني كان يدللني وهوني عيشني احلى ايامي ..
كنت فرحانة كثير لكن حاسة في غصة بقلبي مااعرف ليش ؟؟
دخلت لينا .. اختي رايحة لنور اخذ الدروس منها ..
انتي ارتاحي مااتأخر عليكي ..

- روحي حبيبتي .. واي شي تسألك عليه ام نور لا تحكي ..
- اعرف اختي ..

بدلت ملابسي وطلعت للمطبخ ..
فتحت الثلاجة اندقت الباب .. اجت ام نور وبيدها صينية مليانة اكل ..

- ليش تعبتي حالك ام نور ..
- ماكو كل تعب احنة جيران وصرنا مثل الاهل .. يوم الي اتمرض انتي تراعيني ويوم الي انتي تتمرضين اني اراعيج ..
- شكرا ماقصرتي .  لينا عندكم ..
- اي عدنا . لاتخافين ابو نور لسا مااجة وماكو بس احنة بالبيت ..

بقت تدحق بالبيت ..
- لعد حماج وين راح ..
- نزل يتسوق النا ..
- هاااا . بس دادة اختج حلوة وشابة ديري بالج عليها ماتسمعين البلاوي الي كل يوم نسمعها ..
بعد ماكو امان ..

- بس انتي ماتعرفين عامر اشنو .. او يمكن ماعشتي مع ناس من الجنوب..
انا عشت معهم وعرفتهم . ناس طيبة وامينة .. انا بثق بعامر مثل عزيز .
مايرفعوا عينهم على بنت غريبه ويصونوها ويحافظوا عليها مثل اخواتهم ..
- اي صح حجيج بس الناس ماتنحزر ..
- الناس الرب خلقها مختلفة بأشكالها واطباعها . يعني مو كلها متشابهة اكو الزين واكو المازين ..

اندقت الباب فتحتها لقيت لينا.. 
- ها اختي شلون صرتي ..
- صدگ ماگلتيلي شبيج ..
ردت لينا..  اختي حامل ..
- ياصلوات واني ردت اسألج شعجب ماعندكم جهال لسا .  ودور خليتج تشيلين الصينية ..

- شكرا الكي . لاتخافي ماكانت ثقيلة ..
- لا عيني شلون مو ثگيلة . انتي بالاشهر الاولى لازم ماتشيلين ثگل وترتاحين ..
امانة اي شي تحتاجيه طبخ تنضيف گوليلي اني هم مثل اختج ..

- شكرا ام نور افضالكي ماانساها انا احب اشتغل والتهي بالشغل ..
استأذنت وطلعت ..
احس راسي يأذيني من كثر ماحكت.. لكن الحلو فيها كريمة كثير وتحب تساعد ..

لينا دخلت تدرس ..
وعامر تأخر .. الاكل راح يبرد . جهزتو ع الطاولة واتصلت بعامر ..
- الو عامر وينك منتظريك ع الاكل ..
- لاتنتظريني صارت شغلة عندي اكلو انتو…

قعدنا انا ولينا ناكل .. وعزلت العامر حصتو ..
كانت عيني ع الموبايل وكل مرة اتصل عسا وان يفتح موبايلو ويرد ..
اشتقتلك حبيبي وين انت .. وصوتك اشتقتلو كثير ..

رحت للغرفة نمت ولينا قالت انا اغسل الصحون .
سمعت صوت الباب قمت ..
كانت ساعة اربعة العصر ..
فرحت للحظة حسيت عزيز راح يدخل الغرفة ..
دخلت لينا ..
- اختي اخي عامر يقول جهزي نفسكي حتى تروحوا للدكتورة ..
- اعملي اكل الو ..
- مايريد قلتلو .. قال اكلت ..
- طيب اغير ملابسي وانتي ماتروحي معي ؟؟
- لا اختي عندي امتحان . اكيد ماتزعلي ؟؟
- لا حبيبتي ليش ازعل امتحانكي اهم . لكن اقفلي الباب بعد مانطلع وماتفتحي ..

قمت بدلت وغسلت وجهي ولبست شالي ..
لقيت عامر .. قاعد بالصالة .. ويكتب بموبايلو ومقهور ..

- عامر بيك شي ؟؟
رفع راسو .. هااا ماكو شي بس مشكلة بالدوام ضوجتني . اذا جاهزة خلينا نطلع ..
- اذا وجودك عندنا يسببلك مشكلة بالدوام روح انت وانا غير مرة اروح للدكتورة ..
- لا ابد مو يمج .. يلة خلينا نطلع ..
طلعنا اخذنا تكسي ..

- تعرفين دكتورة زينة ؟؟
- لا مااعرف ؟؟
- اوگفي خلي اسألج ..
اتصل مااعرف المنو.. وقال… اريد دكتورة نسائية زينة ببغداد دزولي الاسم برسالة..
كان كلامو غامض ..

ابتسمت .. معقولة عامر عندو حبيبة ومايقول ؟؟
اجتو الرسالة…
اعطى العنوان للسايق ووصلنا ..

كان حجز عليها كثير ..
السكرتيرة .. قالت .. مااعتقد تلحگون ع السرة لان الا حجز ..
عامر .. بس احنة مو منا ومستعجلين اذا تگدرين ترهميها ..

السكرتيرة .. عيني گلتلك تحب انتظر عدنا حجز هواي او شوف دكتورة ثانية…

عامر تعصب .. قلتلو خلص عامر خلينا ننتظر ..
- اگعدي هنا واني اتفاهم وياها اعرف سوالفهن ذني ..

قعدت وراح عندها طلع من جيبو عشر الاف ابتسمت وهزت راسها ..
تعجبت عليها .. قبل دقايق كانت تقول حجز ومايصير وهسا بالفلوس ابتسمت واقتنعت ..

طلع عامر ورجع ..
هاج هذا مي .. محتاجة شي اجيبلج ..
- لا شكرا ماقصرت .
- لاتگولين هيج .. اني بالباب واگف ..
حسيتو متضايق كثير .. اكيد مضايقيه بالدوام ..
كانت مرأة قاعدة يمي ..

- حامل لو مراجعة ؟؟
- حامل .
- الواضح هذا اول طفل الكم لان مهتم بيج كلش .
- اي اول طفل .. لكن هذا اخو زوجي مازوجي ..
- ياعيني لعد زوجج وين .
- زوجي عسكري .
- هنيالج على هيج حما .. لو شايفه حمويني بس الگطع والحقد عندهم ..

سكتت ماحكيت معاها واصلا مااعرف اشنو اقلها .. حقها ماتعرف حياتي كيف عشتها واشنو عانيت .
اشكر الرب على عزيز وعامر وسروب بحياتي ..

صاحت السكرتيرة اسمي قمت دخلت ..
الدكتورة .. اسمج يحلوة
قلتلها اسمي .
- اسمج غريب وحلو .. انتي مو من بغداد مووو؟؟
- انا من الموصل ..
- الله يساعدكم . يعني نازحين مووو ؟؟
- تقريبا ..
- لعد كشفيتج واصلة ..
- لا شكرا
- انتو تعتبرون ضيوف عدنا وهذا اقل واجب نقدمة الكم ..
- شكرا دكتورة . الشكر للرب زوجي مامقصر عني بشي .
- هنيالة عليج لعد ..
- انا الي محظوظة بي ..
- الله يحفظكم . الطاهر متزوجين عن حب . حامل لو مراجعة ؟؟
- حامل وهذا التحليل البارحة عملتو ..
- مبروك .. اشجعكم على ظروفكم والي تمرون بي وانتو تفكرون تسوون طفل ..

- الي صار قدر ومكتوب . مامعناها ندفن حياتنا .. وزوجي من اهل الجنوب تفكيرهم مختلف ويحبو الاطفال ..
- ياعيني شوقتيني اعرف قصتج انتي من الموصل وهو من الجنوب . الصراحة اول مرة تمر عليه قصة هيج .
- الرب جمعنا وخلاه بطريقي .. عرفتي ليش انا محظوظة فيه ..
- تحجين عنة بحب بس عيونج حزينة ليش ..
مااتحملت ودمعت عيني .. مسحتهم بسرعة قبل لا ينزلوا على خدي ..
- لانو طالع بواجب مايعرف انا حامل . كان نفسي ابشرو وافرحو ..
- الله يرجعة الج بالسلامة وتفرحيه وتفرحون بالنونو ان شاء الله.
شوفي حبيبتي هسا راح نشوف نبض الطفل . واكتبلج علاج ..
وشهر وترجعيلي .. بس هااا مو. معناها ماتجين نهائئ اذا حسيتي بأي شي ترجعين .

سمعت نبضو وابتسمت . ااااه ياعزيز وينك قطعة من تنبض بداخلي ..

الدكتورة .. هاااا سمعتي . الظاهر راح يكون بطل مثل ابوه. وابتسمت ..
هذا الدوا كتبتة ووراه كتبتلج موعد مراجعتج او في عند الحالات الطارئة قبل هذا الموعد ..

اخذت الباص وطلعت ..
دورت على عامر ماكو ..

صاحت السكرتيرة . عيني يحلوة كتبتلج الدكتورة موعد ..
هزيت براسي .. اي .
لعد انطيني اثبت الموعد يمي حتى من تجين تعتبرين حاجزة . وجان كلامها رقيق وابتسامتها عريضة ..
بينما من دخلنا معصبة وتعيط ع المراجعين ..

سجلت الموعد واخذت الباص وطلعت ..
لقيت عامر واقف يم الصيدلية ويحكي بالموبايل وهو معصب ولون وجهو متغير ..

اغشعني .. غلق الموبايل واجة ..
- ها بشري ؟؟
- كلشي تمام وهذا الدوا ..
- انطيني اجيبة واجي انتي اگعدي ارتاحي ..
- عامر بيك شي ؟ صاير شي ؟؟
- لا مو گتلج شغلة صايرة مضوجتني .
- وعزيز ماكو خبر عنو ..
- لا ماكو بس اني على تواصل وي المقر مالتة هم بخير .
راح يجيب الدوا وانا قاعدة ..
اتذكرت نبضو ابتسمت . اعذرني حبيبي فرحتي بيك ناقصة لان ابوك مايمي ويفرح معي ..
اتشوقت اسمع صوتو وابشرو ..

رجع عامر وبيدو الدوا ..
اشرت السكرتيرة او الممرضة عليه ورجعنا للبيت ..
عزيز .. محتاجة شي ناخذة بطريقنا لان احتمال باجر اروح للدوام ارجع ..
- لا شكرا ..
تمشينا المطعم قريب اخذ عشا رغم قلتلو انا اعمل لكن ماقبل قال انتي ارتاحي ..
ابتسمت .. لاتدللني كثير اتعود ترى ..
ابتسم بثقل .. تمونين والله .. اهم شي يكون ولي العهد مرتاح ..

ابتسمت .. هنيالو على عمو… تعرف ابني محظوظ لان عندو عم مثلك ومثل علي ..
- علي الخبل يسودنة الج والله ..
- صحيح ذكرتني بعلي . ماطلع قبولو ..
- اي طلع جا ماتدرين . بس راح يداوم كلية اهلية ببغداد لان قبلوه معهد وهو مايقبل يداوم..  الاغبر سنتين بالسادس ماعرف يجيب معدل زين ..
- الي اغشعتو مايقدر يدرس لانو دايما يشتغل مع ابوك وعدنان ..
- اي هو هذا هم سبب .. عدنان يضغط عليه بالشغل وماينطيه مجال يدرس ..
يلة المهم طلع من السادس ..

كملت الطلبية . اخذناها واجر تكسي للبيت ..
فتحت الباب لينا .
- هااا اختي اشنو قالتلك الدكتورة ..
- كلشي تمام والطفل بخير وسمعت نبضاتو…
- ياااي المرة الثانية اروح معاكي واسمعو حبيتو من قبل مااغشعو ..
عامر .. هاج ليون هذا العشا رتبيه خلي تاكل لگمة وتاخذ علاج ..

تعشينا واخذت علاجي .. لينا دخلت تدرس عندها امتحان . وانا بقيت قاعدة يم عزيز لكن اغشعتو مشغول ماحبيت اضايقو .. قلتلو انا بالغرفة اي شي تحتاجو قول ..
فرشتلو وغسلت ملابسو وكويتهم .

دخلت الغرفتي وانا ادحق بمكان حبيبي ..
صار شهر وكأنه سنين مااغشعتو .. طلعت موبايلي من الجنطة ..

فتحتو .. وكتبت رسالة .
حبيبي ونور عيني اشتقت الك كثير . صار كم يوم وانت ماتراسلني . معقولة مااشتقت لي ..
عامر قال مشغولين لكن انا مابيدي اشتقت الك . وكأنه سنين ماحكيت معي ..
بالمناسبة . عندي مفاجأة الك . ماراح اقلك عليها الا اذا اتصلت احب تسمعها بصوتي ..
احبك كثير ياملاذي ..

اتنهدت وبعثتها ..
تذكرت سراب . انا كيف مابشرتها لسا ..
دقيت عليها رفضتو ..
معناها زوجها قاعد لسا ..

بقيت اتصفح بصور حبيبي واغشع ابتسامتو وكيف نايم وشعرو مبعثر ..
اريد ابني يطلع يشبهو . سمارو ملامحو عينو ونظراتو كلشي فيه اريدو يشبهك ..
مااعرف ليش حاسة الي ببطني ولد مابنت ..
اتصلت سراب وهي تحكي بصوت خافت ..
- الووو رنوم اعذريني فصلتة بس ماگدرت امير جان مانايم بعدة ..
- لاحبيبتي عرفت انو مانايم . شلونكي والبيبي شلونو..
- اوووف متعبني حيل .. انتي شلونج شو ماكو…
- اليوم كنت مشغولة مع ابن اخوكي وماقدرت اتصل ..
- ابن اخوي . ياهو ؟؟ بس لاااااا
- اي انا حامل سراب ..
- يعمري الف الف مبروك لو مو هذا نايم جان هوست من الفرح . وعزيز شسوة .
- لسا مايعرف غالق جهازو لان عندو واجب . لكن عانز هوني واخذني للدكتورة . لو ماهو هوني ماعرفت اشنو اعمل ووين اروح ..

- والله فرحتلج تستاهلين .. عليج الله گليلي من يدري عزيز شيسوي . واخيرا راح اشوف واحد من اخوتي ابو .. ومنو عزوز يمة اروحلة فدوة من هسا اتخيلة تلوگلة الابوة.

- كافي راح ابكي ..
- ليش تبجين افرحي . وهاي الله عوض صبركم ..
- فرحانة كثير لكن مااعرف ليش قلبي مقبوض وحاسة نفسي مخنوقة كثير ..
- گولي يالله ماكو شي ان شاء الله.. المهم يعني راح يصيرون اولادنا اعمارهم متقاربة تقريبا ..
- اي فرق شهرين بينهم ..
- من هسا اذا بنية الي ..
- ليش اكو احسن منكي واعطيها .
- راح اصير عمة والله مامصدگة .. شبيج مافرحت بحملي بگد مافرحتلج .. ديري بالج على نفسج وعلاجج وعامر يمج بين مايرجع عزيز ..
- ماقصر عامر معي من البارحة معانا ..
- خير اخوج قابل منخي . يلة حبيبتي روحي ارتاحي وباجر اخابرج لايگعد ويشوفني اخابر هسا عبالة اخابر الصاحبي ههههه .

غلقتو منها . ونمت .
صحيت الصبح مالقيت عامر بفراشو . يمكن راح للدوام من الصبح .

دخلت الغرفة لينا ..
لينا قومي الساعة سبعة… فزعت من نومها بسرعة .
غسلت وبدلت بين ماعملتلها ريوق . ماقبلت تاكل لان متأخرة .
جبرتها تاكل فاكهة ع الاقل تتنشط ..
واعطيتها فلوس تشتري ..
قبلت بطني وقالت . شلونك ياحلو . اكبر بسرعة وتعال حتى نلعب سوى ..

ابتسمت .. ليون شلونك انتي انشغلت بحالي ونسيت اسألك ..
- لاتخافي عليه انا زينة وخاصة بعد ماداومت .
- اريدك دايما تضحكي وماتحزني ..
حضنتني وطلعت ..

رتبت البيت وعملت غدا ..
اشتهيت دولمة صار زمان ماعملتها ..
وانا الف بيها اندقت الباب ..
كانت ام نور .
- صباح الخير .
- اهلا ام نور صباح الانوار .. تفضلي.
- اجيت اطمأن عليج محتاجة شي ..
- لا ماعندي شي .
اغشعتني اعمل دولمة ..
- اليوم مسوين دولمة .. دولمة موصلية مووو
- اي .
- لعد راح اساعدج وانتي علميني شلون اسويها ..

قعدت تلف معي ..
صدگ زوجج هم يخابرج شلونها الاوضاع يمهم . البارحة بالاخبار .. گالوا .
محاصرين مجموعة من الجيش والحشد الشعبي محبوسين بمنطقة مدري شسمها نسيت . ويطالبون الحكومة تساعدهم ..

تركت كلشي بيدي وحسيت جسمي يرجف ..
دحقت عليها .. وين بالضبط .
- والله ماادري دادة . هو يتواصل وياج مووو؟
- لا صارلوا كم يوم مغلق جهازو ..
- يااا وساكتة . شلون الج گلب .
- اخو زوجي اتصل وطمني عليه قال مابي شي .
- ها زين .. الله يحفظة ان شاء الله والله ابو نور يسولف بأخلاقة ومن سمع ضاج وخاف عليه .
تركتها تحكي وقمت ..

البيت بيتك . اروح اخابر واجي ..
دخلت للغرفة .
اتصلت بعامر مشغول ..
بعثت رسالة .. عامر اشنو هذا الخبر جارتنا قالت . داعش محاصر مجموعة من الجيش والحشد صحيح هذا الخبر ؟؟

دقايق ورجعلي خبر .. اي صحيح بس لاتخافين مو يم عزيز . عزيز بغير منطقة ..
اخذ نفس وقعدت ع السرير .  الشكر للرب كنت خايفة .

طلعت من الغرفة لقيت ام نور مكملة القدر كلو لافتو..
- هااا دادة بشري ..
- يقول عزيز مامعاهم ..
- الحمد لله. يلة دادة هاي كملت لف الدولمة . واذا استوت دزيلي ماعون من شكلها متت عليها .
وراح ادزلج مقلوبة مسوين احنة اليوم ..

طلعت وانا بالي عند كلامها وكلام عامر ..
كلامها قلقني وكلام عامر طمني رغم كنت اريد احكي معو وافهم منو لكن اكيد مشغول ومايقدر يحكي ..

رجعت لينا فرحانة كانت زينة بالامتحان ..
فرحتلها ع الاقل هي تفرح وتتحسن حالتها ..
بعثلي ابن ام نور مقلوبة واعطيتو دولمة…
وقعدنا انا ولينا نتغدا ..

- تعرفي اختي المدرسات كلهم يحبوني .. وصار عندي صديقات كثير .. اكثر من سنة مافرحت هاكذ . لكن لينا تزعل لان احكي مع بنات غيرها . وتقول لاتصادقي غيري ..
ذكرتني بسرور اشتقت الها . اذا رجع اخي عزيز اقلو يجيب سرور العندنا ..

صحيح هو ليش تأخر هاكذ ..
- مااعرف حبيبتي نسيتي انتي لما كنا عند اهلوا يبقى شهر واكثر بدوامو ..
- اي صحيح لكن اشتقنالو..
- انا الي راح اموت واغشعو ..
اتقربت مني .. حاسة بيكي حتى ماتضحكي بغيابو ..
ادعيلو وصلي للرب ..
- اريد اروح للكنيسة وادعيلو ..
- لما يجي اخي عامر نقلوا ياخذنا انا اريد ادعي الابي والاخي يرجعو ..

بقيت مصدومة من كلامها .. نسيت انها ماتعرف ..
ومااقدر اقلها لان اعرفها ماراح تتحمل .  موت امي اثر فيها كثير وتعب نفسيتها ..
خايفة اخسرها اذا عرفت ..
انا مااتحملت خبر موتهم . وصار عندي انهيار وبكيت الليل مع النهار لما سمعت .
وبقيت الوم بعزيز وزعلتو وتركت كلشي وطلعت ..
هي اذا سمعت اشنو راح يصير بيها ..

وعيت على حالي وهي تقلي ..
- اختي اختي اذا رجعو كيف راح يعرفوا مكانة…
- هاااا انا قلت العزيز دايما يسأل عنهم . وذا عرف خبر راح يخبروه . لان هو موصي كذا شخص عنهم ..

- واخي اذا وعد يوفي متأكدة…
قامت تساعدني بالمطبخ وبعدها راحت نامت .
بقيت انا واقفة عند الشباك وادحق بالجو .. كان غائم رغم الحو حار بعدو ..

هاكذ جو احسو يقبض قلبي ..

لليل نمت من بعد ماابكيت من شدة اشتياقي الو والصوتو.. 
حلمت فيه . كان عزيز مسجون بمكان مجهول يشبه الحفرة.. واحاول اساعدو واصرخ لكن مايسمعني ..
فزعت من نومي .. صرت اخاف كثير من احلامي لان اغلبها تتحقق .. رغم ماامن كثير بيها .
لكن بالفترة الاخير احس ان احلامي مختلفة ..

قمت واخذت شمعة الامنا العذرا وصليت ودعيت الرب يحفظو ويحميه ..

مر كم يوم وعزيز ماكو خبر عنو .. زادت شكوكي وخوفي ..
وكلام ام نور عن الوضع والاخبار ..
خوفني اكثر ..
عامر كلما اتصل فيه مايرد ويبعثلي رسالة ..
ليش مايرد واشنو صاير حتى مايقبل اسمع صوتو ..

ماكان عندي الا اتصل بسراب واحاول اسمع خبر عنو
اتصلت والغريب ردت بسرعة ..
- ها رنوم شلونج صحتج شلونها والطفل وضعة شنو ..
كانت تسأل كثير ومتوترة ومااعطتني فرصة ارد ..

- اعطيني فرصة احكي انا زينة والطفل زين . لكن متضايقة كثير . عامر اتصل عليه مايرد ..
- عامر هنا ..

استغربت .. عامر عندكم . شلون وهو قال من انزل اجيكم ..
- هااا ماادري بس هو وصل قبل ساعات وتعبان .
- وينو اتصل عليه مايرد وانا قلقة على عزيز. صارلو اسبوع مااعرف عنو شي . سراب راح انجن واحلامي مزعجة ..
سكتت ..

- سراب ليش ساكتة قولي شي يطمني . حاسة صاير شي وماتقولي .
عامر ليش اجاكم . وانتي متوترة ..

- لا بس ..
- اشنو قولي ماعاد اقدر اوقف على رجلي ..
- جدتي مريضة وحالتها خطرة..
- سلامتها . اشنو بيها ..
- ماادري هسا هي بالمستشفى ..
- ااااه ليش مانسمع فقط الاخبار السيئة ..
انا راح اخلي ابو نور يسألي اي احد يعرفوا.  ماعد اقدر اتحمل ..
- اهدي شبيج مو زين ع الطفل .. عزيز اذا رجع راح يضوج من يشوفج هيج اني جنت استمد قوتي منج رنوم لاتضعفين ابد لو مهما يصير ..

- ليش حاسة من كلامكي صاير شي ثاني وماتقوليلي ..
- شوفي مايهون عليه اضم عليج وانتي ميتة عليه وتردين تسمعين شي عنه .. بس عامر نبهني مااحجي وگال لاتگوليلها ابد بس مااگدر انتي مرتة ومن حقج تعرفين ..

قعدت بالارض احس رجلي ماتحملني .. تذكرت الغيوم السودة وسجن عزيز وحالتو ..
ماعدت اغشعت شي قدامي ..

قعدت على صوت ام نور ولينا تبكي يمي ..
ام نور .. شبيج دادة..  قست ضغطج هسا هابط كلش . وانتي حامل موزين گومي ابو نور نزل يشغل السيارة خلي ناخذج للمستشفى ..

بقيت ادحق بيهم واريد اتذكر الي صارلي ..
قومتني لينا وانا لسا مصدومة ومااعرف اشنو بيني ..
لبستني الشال وخلت على جسمي الجبة ..
قفلت الباب وكانت لازمتني من يد وام نور من يدي الثانية..

احس نفسي بس جسد روح مابيه وعيوني قدامها ضباب ماتغشع شي ..
صعدت للسيارة ..
وفزعني صوت ابو نور ..
ها خوية شلونج سلامتج شبيج ؟؟

تذكرت كلام سراب وهي تقلي .. رنوم عزيز مختفي ومانعرف خبر عنه ادعيلة يرجع .. داعش حاصروهم وبعدها اختفت الاخبار ومانعرف اذا عايشين لو ميتين ادعيلة كون عايش ويرجعلنا بسلامة ..

التفت للينا ودحقت ..
عزيز عزيز مختفي .. عزيز مانعرف عنو شي ..
قالت .. اختي اهدي اشنو بي اخي عزيز منو. الي قالك

- مااتحملت ونسيت انا وين ومين يمي..  صرخت صوت حسيتو طلع من روحي مامن فمي ..
عززززززيز لاتتركني عزززززيز مابي شي . انا حاسة مستحيل يكون بي شي وابقى مرتاحة ..

ام نور .. سودة علية دادة اهدي لاتسوين بروحج هيج فكري بالطفل حرام عليج ..
جان گالي حاس هو وياهم .. مو گلتلك ابو نور ..
ابو نور .. لا لاينطي هيج حكومة كم يوم محاصرين ماعرفوا ينقذوهم ..

عساها بحظهم وبختهم ..
صرخت .. لاتقولو هاكذ . عزيز مستحيل يقبل بالهزيمة راح يرجع انا متأكدة يرجع اي ..
هو ضحى بنفسو وانقذ ناس كثير ماراح يقدر ينقذ حالو ..

حسيت عيوني عمو وماعاد اغشع بيهم ..
نرلوني وقعدوني على كرسي ودخلوني ..
اعطوني مغذي وابرة حسيت جسمي ارتخى والساني ثقل . اريد ابكي واحكي ماقدرت ..

قعدت وام نور ولينا عندي ..
لينا .. اختي شلون صرتي .. اتصلت سراب واخي عامر يريدو يتطمنوا عليكي. .

مااهتميت .. انا اريد عزيز .
كل لحظة اتخيلو يدخل من الباب وابتسامتو بوجهو .
مالحقت ابشرو بأبنو ..
تذكرت بليلة زواجنا وهو يقلي ..

رنومتي .. اريد دستة اطفال .. مااريد تبخلين علية بطفل اني كبرت واريدهم يكبرون سوة ..
ضحكت وقلتلو ..
حبيبي خلينا نتونس لاحقين نعمل الدستة .. ساعتها كنت اضحك واخذ كلامو بمزح .
خليه يجي واغشعو بعيني كل الي يريدو اعملو.. بس لايتركني ..

صوتو كان بأذني .
وعيوني تدور على صورتو ..
لا عزيز لا .. لاتختبرني هيج اختبار .  الصدمات الي اغشعتهن بحياتي هواي .. واذا اتحملتهن وصبرت لان انت موجود بحياتي وتقويني ..

لكن هسا مستحيل اكون قوية .. المرة الفاتت وقعت من الهاوية وانقذتني هالمرة تعتبر نهايتي ومااحد يگدر ينقذني ..
بقيت الليلة بالمستشفى لان ضغطي ساعة ينزل وساعة يصعد ماثابت ..
والدكتورة گالت موزين ع الطفل .. اذا بقيتي هيج تخسريه ..

ساعتها خفت على ابني وحاولت اهدأ ..
عزيز راح يرجع ومااريد يضوج او يزعل اذا عرف مااقدرت احافظ على ابنو ..

رجعت بكيت .. مابيدي . فكرة انو عزيز بخطر تحطمني
ماانكر كنت اموت الف موتة على اهلي ..
وتأذيت وتعذبت بفراقهم ..
لكن حاسة انو عزيز شي ثاني .. عشقي الو فاق كل المقاييس .. وخاصة بالايام القليلة الي عشنا فيها حبنا وكأن قصة حبنا من سنين طويلة ..

من الادوية والتعب غفيت ..
حسيت بيدو تلامس وجهي ..
وكأن طيفه زارني ..
اقتحم قلبي.. سكن أوردتي وشراييني ..
بات يجري مع دمي يأبى مفارقته ..
جانبي كنت أو بعيداً ..
لم أعد أشعر بأني وحيدة ..
فأنت منذ ذلك اليوم الذي عرفتك فيه اصبحت داخلي ومعي ..
أشعر برائحتك دوماً تعطر الهواء من حولي ..
يدك تلمس يدي تمشي معي في كل خطوة أخطوها ..
لم أعد أخاف من أي شيء .. فهمسك يحيطني كل لحظة خوف ..
مهما علا حولي الضجيج صوتك مستوطن في أذني ..
عيناي امتلأت بملامح أعشقها لا ترى شيئاً سواك ..
فليبقَ طيفك داخلي .. وليبقى همسك حولي لايتركني ابدا ..
صحيت بالليل عطشانة ..
طلبت ماي .. قامت لينا وسندتني ..
وام نور كانت نايمة بالارض فارشة ..

وعيت على حالي .. ليش ام نور نايمة هوني ..
- ماقبلت تروح قلتلها انا ابقى ماقبلت . واصرت تبقى معنى . وطلبت من عمو ابو نور فراش ومخدة من البيت ..
- يعطيها العافية .. موبايلي عندكي ؟؟

- اي كل شوية يتصل اخي عامر وسراب يتطمنو عليكي
وقال باجر من الصبح يمكم ..
- انتي عندك مدرسة باجر ..
- مو مهم المهم انتي تكوني بخير .. اختي مااتحمل من بعدك اعرف انكي تحبي اخي عزيز كثير لكن انا ماعندي احد غيركي لاتعملي بنفسكي هاكذ ..
اخي عزيز راح يرجع لاتخافي ..
انا فرحت انه ارتاحينا وعائلتنا تكبر وابي واخي يرجعوا والنونو راح يفرحنا .
لكن الي صار رجعني للواقع انه حياتنا وحظنا العاثر ماراح يشوفو النور ..

- كافي لينا .. لاتزوديها عليه صيحي الدكتورة .. خلي تقيس ضغطي اذا زين حتى نطلع من الصبح مااريد ابقى هنا اريد انتظر عزيز ببيتي لايجي ..

بقت لينا تدحق بيه ..
- ليش تدحقي بيه لاتخافي ماانجنيت .. انا راح ابقى انتظروا العمر كلو وماراح ايأس ..
صار الصبح اتصلت ام نور بأبو نور وطلعنا للبيت ..
لينا مارادت تروح للمدرسة لكن انا قنعتها وام نور قالتلها ماراح تتركني ..
بعثت رسالة السراب طمنتها وقلتلها طلعت للبيت ..

ساعات واندقت الباب .. انا كنت نايمة وحاضنة ملابسو واتخيلو نايم بحضني مثل قبل ..
دقت ام نور باب الغرفة ودخلت ..
- ترانيم اجة اخو رجلج ورجال جبير وياه .. اني رايحة للبيت انظفة واطبخلهم واجي اي شي ترديه گوليلي ..

طلعت ام نور وانا قمت خليت الشال على راسي .. ومتأملة اسمع خبر يفرحني عن عزيز ..
طلعت من الغرفة وتفاجأت بعمو ابو عدنان قبالي مع عامر .. بقيت مصدومة بوجهو .. الي كان عبارة عن ملامح غاضبة وتعبانة ..

#بقلمي_الكاتبة_شمس
يتبع……