بارت قصير مفاجئ .. متابعة ممتعة ❤

//// البارت الثامن عشر /////
#بقلم_الكاتبة_شمس
( شمس السعـدي )

********* #ترانـيــم ***********

- وهسا ماراح تگعدين ..
- قعدت قبالو ..
- وعدت لينا نحجي بهدوء .. تدرين كبرانة وماعرفتها من تحجي ..

ابتسمت .. طبعا تتغير الي اغشعتو كثير خلاها تنضج بسرعة ..

- ماحبيت شغلجن بالمول ..
- الي يحافظ على نفسو مايقدر اي احد يمسو ..
- يابة ادري بيج قوية بس الناس ماترحم الي يضحك بوجهج اليوم باجر يضحك عليج ..

- اغشع عزيز .. انا كنت هاكذ اثق بالناس بسرعة واصدق كلامهم .. لكن بعد الي حصل النا والظروف الي مريت فيها وحياتي مع اهلك علمتني كثير وقمت مااثق بأي انسان ..

- ادري اهلي شسوو .. سراب وابو رماح گالولي .. بس ماينطيج الحق تتركيني من غير ماافهم لو اعرف مكانجن ..
تدرين شصار بية .. من يخابرني ابوي ويگلي مرتك ماهي شاردة .
لو من ارجع وادور بالحسينيات .. واشوف شماتت العالم بيه .. كلها تگلي كسرت سمعتنا .. لو الناس من تعرف شتگول ..
ماهمني الناس ولاهمني الحجي الي همني نفسي جنت واثق بيج واگول بحياتي ماشفت مرة مثلها قوية وصابرة . الي صارلها يهد جبال وهي مانهدت ..
تالي اطلع غلطان والي جنت اشد ظهري بيها كسرتة وعبرت ..

مااتحملت كلامو وعتبو .. بكيت ..
وانا .. انا الي تركت كلشي ووثقت بيك . تحملت تحرش اخوك وكلام مرتو وامك .. واخرها تقرروا مصيري واجبر على زواج شكلي ..
-الزواج كان بموافقتج ..
- صحيح .. لكن مااتوقعت الاهانة فيه . وجدتك تقول زواج على الورق وماتتقربلها لاتفهمني خطأ . لو قالتو وراي ماكنت تضايقت ..
انا انسانة وعندي مشاعر . لكن مااحد فكر بمشاعري حتى انت ..
علاقتك مستمرة بمسرة ومكالماتك. وقدام عيني . تجريح امك لي وتطلب مني اتركك وجدتك توعدها انه تزوجك السوزان وانت تعرف وساكت ..

- منو گلج ساكت بس اني مااهتميت الحجيهن لان هالشي مايصير ..
- عزيز انت تروح شهر واكثر وتتركني الوحدي مافكرت اشنو اعاني .. كلما احاول اكون قوية يذكروني بأني غريبة وماانتمي الهم ..
يذكرون دايما انه احنة مستحيل ننجمع ولانكون البعض

- ليش انتي تردين نكون البعض ..
سكتت ..
- شفتي انتي نفسج ماتعرفين شتردين . وماالومج حقج تتشتتين وتخافين . والهذا السبب سكتت وماصارحتج ردتج تاخذين قرار بنفسج . رغم لمحت وحاولت اتقرب بس خفت تصديني وترفضيني .
ماردت اكون مستغل الوضعج ولاتگولين اشتريتنا بفلوسك .

ابتسمت .. لسا تتذكر ..
- ماانسى اي شي يخصج .. المفروض مااسامحج على سوايتج هاي .. بس لان اعرف الغلط مني هم مو بس منج . اني الي سكتت وضيعتج من ايدي ..

- يعني انت ..
- اي ترانيم .. اني احبج ترديني ارجعي وياي ماتردين خلي كلشي ينتهي هنا واليوم ..
- لكن انا مااقدر ارجع الاهلك مستحيل . لان اكيد ماراح يسكتو وانا تعبت مااقدر اواجه بعد ..
- يعني اذا گتلج روحي وياي البغداد واخليلج بيت ونعيش سوة . ترحين ؟؟
- راح تقدر تواجه اهلك وتعلن زواجنا ؟؟
- ليش مو بعينج . ليش محسستني مااگدر اخذ قرار لوحدي ..
- ماقصدي لكن اهلك رافضين زواجنا ..
- اهلي بعد الي صار مارحتلهم وباقي على المكالمات اطمنهم .. يعني مايهمني اذا قبلوا لا .
- انا اسفة عزيز خليتك بموقف محرج مع اهلك ..
- لاتخافين . ابوي نبه يگولون انه اني اخذتكم وانتقلنا البغداد خاف واحد من گرايبنا يسأل ..
وهسا شو ماعرفت اني شنو بالنسبة الج ..

- انت اماني وملاذي وسندي .. تألمت كثير لما تركت اهلك وتعذبت اكثر ببعدك ..
- ياظالمة النفس وساكتة ..

- لكن عزيز مااقدر اعذب معي لينا اكثر. لينا كل يوم بمكان وخايفة عليها تتشتت ..
اتقرب مني .. انتو ابقوا هنا فترة بين ماارتب اموركم واخذكم .. مسك يدي . اذا على لينا اني اقنعها ..
حسيتو تقرب اكثر .. وهمسلي احبج ..

هناك سلاسل عشق تحاوطني.. ورياح شوقً تهب بي ..
بادلتو نفس المشاعر ..
سكت اللسان عن العتاب .  وضاعت الاحرف في ثنايا قلوبنا ..
ليرتسم الهوى على محيانا وعيوننا ..

- شوكت تصيرين مرتي مشتاقلج .
- يعني انا مرتك ..
- وعلى سنة الله ورسولو ..
- مااعرف اذا كان عقدنا صحيح ..
- اكيد صحيح اني سألت قبل لااخطو هالخطوة . مادام انتي مقتنعه وبرضاتج العقد صحيح ..
- طبعا راضية لكن ماتجبرني على ديانتي ..
- مااجبرج بس اريدج ترجعين تلبسين الحجاب وتلتزمين لاتعتبريه جبر بس اني اغار عليج ومااتحمل ..
- يعني الحجاب عندكم واجب ..
- طبعا واجب الله امر بالستر وغض البصر . 
بقوله تعالى ( وقل للمؤمنات يغضضن من أبصارهن ويحفظن فروجهن ولا يبدين زينتهن إلا ما ظهر منها وليضربن بخمرهن على جيوبهن ولا يبدين زينتهن إلا لبعولتهن أو آبائهن أو آباء بعولتهن أو أبنائهن أو أبناء بعولتهن أو إخوانهن أو بني إخوانهن أو بني أخواتهن أو نسائهن أو ما ملكت أيمانهن أو التابعين غير أولي الإربة من الرجال أو الطفل الذين لم يظهروا على عورات النساء ولا يضربن بأرجلهن ليعلم ما يخفين من زينتهن وتوبوا إلى الله جميعا أيها المؤمنون لعلكم تفلحون )

قعد يفسرلي الاية واشنو معناها .. الصراحة خلاني اقتنع بكلامو وحسيت دفو وايمان بكلامو ..

لااراديا قلتلو .. عزيز انا احبك .. سامحني لاني ماقدرت ولاعرفت قيمتك ..
اخذني الحضنو . هذا كلامج نساني كلشي لاتشيلين هم ..
بس اريدج تفتحين صفحة جديدة بحياتج . تنسين الماضي ونبدي من جديد .
تبطلن من المول .. واختج ترجع تدرس وانتي تگعدين معززة مكرمة ببيتج تنتظريني اجي وتستقبليني بضحكتج الحلوة ..

ابتسمت الو .. وحضنتو ..
همسلي .. لينا تتأخر ..
دحقت بوجهو ليش ؟؟
- جا يابة شني تردين العمر كلة تبقين مرتي ع الورق وضحك ..
غطيت وجهي من الخجل .. عزيز لاتخجلني ..
قبلني بخدي وقال .. مااجبرج على اي شي شوكت ماتشوفين نفسج جاهزة گولي ..

وهسا خليني اروح اجيب لينا مااحب وجودها هناك .
وانتي فهميها تنتبه الدراستها ..
-انت خبرها هي تسمع منك وتحبك ..

خليتو يطلع رتبت حالي وجهزت نفسي ..
نسيت كلشي وقررت ابدي حياة جديدة . مستحيل اقبل اخسرو بعد مارجعلي واعترف بحبو ..
اتصلت على سراب وبشرتها فرحت كثير .

رجعوا هو ولينا وكان جايب عشا معو ..
لينا .. اختي خلص قرروا اذا رجعنا ماعاد نطلع من بغداد . انا تعبت اريد استقر بمكان ..

عزيز .. اوعدج انه ماراح اخليج تتعبين بعد . وماراح اعوفكم ابد ..
حسيتها فرحت ..
اتصل جود وخبرتوا احنة راح نترك الشغل ونرجع البغداد حزن وقال انا اريد اخطب لينا قبل لتروحوا .
لكني قلتلو .. اختي صغيرة ووراها طريق طويل .
مااقدر احطم حياتها واشجعها ..
سامحني ..

سمعتني لينا .. اختي هذا جود .
اي حبيبتي هو . انتي بعد صغيرة وعمرك 15 سنة والعمر قدامك طويل مااريدك تندمي الاهم دراستك ومستقبلك .
لينا .. صحيح كلامكي اختي . يمكن هذي فترة مراهقة وتمر اشنو تقولي وابتسمت .
- انتي اعقل مراهقة اغشعتها بحياتي ..
حضنتها وشكرت الرب الي انقذني من غلطة كنت راح ارتكبها بحق اختي ونفسي ..

عزيز بعد العشا راح للفندق الي نازل فيه .. وقرر يرجع البغداد حتى يرتب امورنا ..

كنت فرحانة وانتظر اللحظة الي راح انجمع فيها مع حبيبي في بيت واحد ..
كان يبعث صور الشقق والبيوت ويقلي اختاري .
كل البيوت ايجارهم غالي ماحبيت اضايقوا قلتلو اجر شقة النا المهم تكون غرفتين ..

وبيوم فاجأني ورجع ياخذنا .. ودعت مروة الي حزنت وتضايقت لان راح ارجع .
وقالت راح تتندمي ماانكر خفت من كلامها لكن حب عزيز نساني الخوف كلو ..

لينا فرحانة ببداية السنة الدراسية الجديدة .
عاهدتها انا وعزيز انه مانتركها وماراح نخليها تتشتت معنا ..
كانت المدرسة قريبة من المجمع الي ساكنين بي ..
صعدت للشقة . وانا اغشع فيها تذكرت حياتي من يوم دخول داعش الى الان ..
كم مرة تهجرت وكم مرة هربت وتشتت . ياترى هل هذه النهاية .. وهل راح يكون استقراري هوني ..

التفت يداه حول خصري وهمساته تداعب اذني ..
اغمضت عيني لأبحر في سفينة خيالي 
ليعوم في دفئ مشاعري ورقة أوتاري
أغمضت عيني وأدركت حينها
أن رحلتي ليست ككل أسفاري
سأسافر بك على صهوة أحلامي
خذ أحاسيسي ومشاعري فهي ملكك من ألان حبيبي
اسرع يا قبطان سفينتي
وارحل بي لذلك الجبل العالي
لأرى بحار الشوق لبعيد غالي
هل سكنت امواجها!!
ام تزداد تهيجا لتلك الليالي..
ارجوك ابحر بعيدا ولا تلتفت لكل السفن
فهم قراصنة البحار لا يرأفون بحالك وحالي..

سحبني من يدي واخذني الغرفتنا ..
كانت بسيطة جدا لكنها جميلة ..
التفت الو ومسكت وجهو .. اسفة ع المصاريف الكثيرة بسببي ..
خلى ايدو على شفايفي ..
- فلوسي فلوسج ماكو فرق بينا . وبعدين اني الحمد لله عندي والله رازقني يعني ماتكلفت هواي .
المهم سعادتنا .. وتعاهديني اذا جمعتنا هاي الغرفة مايفرقنا الا الموت ..
- بعد الي عملتو وحبك لي .. ريت الموت ياخذني ولاافكر اتركك بيوم ..
- اسم الله عليج حبيبتي ..
نظفنا الشقة ورتبنا اغراضنا .. لليل انا كنت مشترية كم قطعة ملابس من اربيل ..
لبست وتجهزت لحبيبي .. وزوجي . ملاذي واماني ..
من هذي الليلة عرفت ان اختباري خلص وبدأت حياتي الجميلة ..

#بقلمي_الكاتبة_شمس
يتبع… .