صباح الورد حبايب ❤
//// البارت السادس عشر /////
#بقلم_الكاتبة_شمس
( شمس السعـدي )

********* #ترانـيــم ***********

اشياء تقربنا من بعض وتحسسني بمشاعر اتجاهو ..
لكن لااعرف لما يوجد تناقض وصراع داخلي ..
اخشى ان اخطو خطوة للامام فأندم عليها فيما بعد ..

رجعت نمت ولاكأنه حصل شي ..
ثاني يوم صحيت من النوم كان نايم ..
نزلت لقيت سراب بالمطبخ والجدة وعمو قحطان يتروقوا ..
قلت صباح الخير ..
ردوا .. صباح النور .

الجدة .. يمة وين رجلج ؟؟
رديت .. نايم .
الجدة .. سودة علية يتعب تلگيه مانايم هيج نومة من شهر ..

في نفس اللحظة دخل عامر ..
اتفجأنا بجيتو وفرحنا..  اكثر من شهر وهو بعيد عنا ..

رفعت يدها الجدة واخذتو لحضنها ..
البيت كلو قعد الاجلو ..

عامر .. عزيز وين ..
قلتلو .. نايم تعبان .. لكن كيف ماسمع صوتك ..
رايحة اصحيه ..

صعدت للغرفة كان لاف نفسو بالبطانيه ونايم بعمق .
اتقربت منو .. عزيز عزيز ..

فزع من نومو مرعوب .. وينهم وينهم ..
اهدأ عزيز انت هوني بالبيت وانا ترانيم ..

مسح وجهو .. اعتذر بس لاهبطتج . اول مرة انام هيج نومتنا هناك كلها قلق بقلق ..

- ولايهمك انا الي اعتذر لأني صحيتك لكن عامر هوني ..
- يعني اجة ؟؟ بس اسبح وانزل .

انا حضرت ملابسك اسبح بين ماارتب الغرفة وننزل سوة ..
ابتسم وراح للحمام ..

رتبت الغرفة دخل شعرو مبلل ..
- عزيز جففو الجو بارد لاتمرض ..
- خايفة علية ؟؟
- وليش مااخاف انت عزيز علية ..
- اول مرة احب اسمي ..
ضحكت .. لاتراوغ جففو وانا نازلة سراب وحدها اروح اساعدها .
مسك ايدي .. مو على اساس ننزل سوة ؟؟
- انت تتأخر وعندي شغل ..
- اليوم عندج دوام ؟؟
- اي عندي ..
- جا اني اوصلج .
هزيت براسي وطلعت ..

قالت خالتي ام عدنان .. شوكت تطبخين تنظفين وانتي معلگة فوگ .. وهسا شوية تبدلين وتطلعين اشوف بعد ماتروح سراب يصير الشغل كلة علية ..

عامر .. يمة شبيج شني االحجي غير رجلها محتاجها فوگ ..
الجدة .. يمة ماتعرف امك تموت اذا ماتخرب گعدتنا ..
نزل عزيز ..
واني اگول البيت منور تالي عمور هنا ..
قام عامر وابتسم .. الضلع
- الغالي والله .
وتحاضنو .. لااراديا ضحكت حبهم البعض وخوتهم مختلفة ..

نزل عدنان وايمان .. سلموا عادي وقعدنا كلنا على السفرة ..
كملنا وبدأت انظف واساعد سراب ..
بعدها صعدت اغسل ملابس عزيز وملابسي ..
نزعت شراشف السرير اغسلهم ..
دخلت للحمام وكنت رافعة الدشداشة ..
حسيت حركة التفتت كان عزيز واقف ..
- شنو هاي ؟؟ غير تسدين الباب عليج وانتي تشتغلين ..
نزلت الدشداشة بسرعة ..
- لكن مااحد بالبيت والكل طلع للشغل وعامر نايم .
- حتى لو .. مااريد احد يشوفج غي..   وسكت

بقيت ادحق بعينو اتمنيت يقلي انا اغار عليكي او يقلي كلمة حلوة ..
لكن ماقال .. تركني وراح للغرفة ..

كملت وجففتهم وصعدت للسطح نشرتهم ونزلت ..
سراب .. اليوم بيت عمي عازميني على عشا واني مااريد اروح شلون ؟؟
- لازم تتعودي .. حاولي تتأقلمي معاهم .
- مو بيدي مااحبهم الشي الي مهون علية شوية هو ماراح اگعد وياهم ..
- مااعرف اشنو اقلك .. يمكن اقدارنا راح تعذبنا كثير .

صار الظهر بدلت وجهزت نفسي للدوام ..
نزلو لينا وسرور مبدلين ..
استغربت .. وين تروحو ..
سرور .. عزيز گال بدلن ماادري ليش ..
رجعت للغرفة ..
فتحت الباب لقيتو يبدل . ردت اطلع صاح .
- تعاي يابة شبيج تفزين مني شو لابس حتى القميص
- وين تروح انت والبنات ..
- هااا قصدج كلنا نروح مووو . مفاجأة مايصير اگول
- كلنا .. انا عندي داوم بالصيدلية ..
- لا اليوم ماكو خابرت محمد صاحبي وكلتله يستأذن من امة تنطيج اجازة ..
- تحكي الصدق .. عيب اشنو تقول علية .
- ماتقول ماتقول لاتخافين .
- تستهزأ بيه حضرتك ..
- ضحك .. لا والله بس الساني وحدة ينطق حجيجن على گد مامتشبع بي ..
وهسا ورانا طريق طويل لازم نروح ..
- لو ماخذين سراب معانا ..
- سراب معزومة عند بيت عمي هي واهلي واني تعذرت گلتلهم راح اخذ مرتي ونطلع ..
ابتسمت لما قال مرتي لكن ماحسستو ..

كمل وطلعنا ..
بالطريق موبايلو ماسكت وبكل مرة يرفضو ومايرد .
- ليش ماترد ؟؟
- مو مهم .. وسكت .

وصلنا بغداد رغم التعب وطول الطريق فرحت لما اغشعتها..
لكن حزنت لما تذكرت اخر مرة كنت فيها هوني ..
دخلتلها فرحانة لأني راح الاقي امي ..
وطلعت مقهورة بموتها وحسرتي عليها ..
لاارادياً نزلت دموعي ..

- شبيج ليش تبجين ؟
مسحت دموعي بسرعة ماحبيت يغشع ضعفي ..
تذكرت امي ..
- الله يرحمها ادعيلها بالرحمة اني جايبجن هنا ترتاحن وتغيرن جو لاتضوجين واشرلي على لينا ..
- وين رايحين ع شقتك ؟
- لا مو للشقة للفندق .. جايبات جناسيجن موو؟
- اي عندي بالجنطة .. وانتي سرور ..
- اي جبتها هاي بجنطتي ..

وصلنا للفندق حجز غرفة للبنات .. همستلو .. انا خليني مع البنات ..
دحق بعيني وقال .. وشتگليلهم اذا سألو ليش بقيتي يم البنات ..
- مااقدر اتركهم يباتو وحدهم ..
- لاتخافين راح احجز سويت ..

حجز صعدنا نرتاح .. البنات بغرفة ونحنا بغرفة ويفصلنا صالة صغيرة ..
الغرفة كانت سرير واحد كبير .. وماكو فراش نقدر نفرشوا ع الارض ..
قلتلو .. كيف راح ننام ..
- لاتخافين افرش بطانية وانام .. المهم خلينا نرتاح ونطلع ..
- انا ماانام اذا تحب انت نام لان تعبت طول الطريق تسوق ..
- زين اروح اسبح ..
دخل يسبح . رحت عند البنات يفكروا اشنو يلبسو ..
رجعت للغرفة لقيتو نايم .. والجو بارد . تقربت غطيتو وبقيت ادحق بملامحو..

وهو نايم قال .. حلووو موووو وابتسم ..
بسرعة سحبت نفسي وماحكيت شي ..
خجلت من كلامو ..

- اذا تردين تنامين تعاي هنا ماآكلج والله ..
- لا مانعسانة..

بقيت قاعدة ونعسانة بنفس الوقت الى ان غفيت واني قاعدة بمكاني ..
صحيت على عزيز وهو يغطيني فزعت من مكاني ..
- شبيج .. شبيج

كان قد حل الليل وغاب ضوء الشمس ..
- صار الليل ..
- اي والبنات مبدلات بس ماردت اگعدج شفتج نايمة .
- دقايق واجهز نفسي ..
- زين اني نازل جوة كملن ونزلن ..

طلعت فستان طويل مخصر اعطتنياه سراب .
رتبت حالي وخليت الشال على راسي بدون مااخلي دبوس ..
نزلت مع البنات ..
كان يراقبني بخفية .. وماقدرت افسر نظراتو هل هي اعجاب ام لا ..

اشرلي .. شالج ..
- عزيز يخنقني الدبوس هوني مااحد يعرفنا خليني هاكذ ..
- مااتحمل .
- اشنو ؟
- احد يباوعلجن وانتي سرور لفي حجابج عدل ..
كان يقصدها او يقصدني ماعرفت ..
عدلت حجابي وطلعنا ..
قال .. خلونا نمشي للمطعم ومناك اخذجن للزوراء ..
تعشينا وبعدها رحنا للكنيسة .. وكانت مفاجأة بالنسبة لي فرحت حقيقة ..
صليت ودعيت وبكيت ..
تذكرت الاناشيد الي كنت ارتلها بالكنيسة مع ابي . حسيت حالي بمدينتي ..

تمنيت ابقى ومااطلع من الكنيسة ..
صعدنا للسيارة وعيني تدحق بها ..

قلتلو .. شكرا عزيز ماانسى الي عملتو الاجلي ..
عزيز .. لاتشكريني هذا واجبي ..
رحنا للزوراء لعبنا وتونسنا كنت مشغولة مع البنات . التفت مالقيت عزيز بقيت ادور عليه بعيوني ..
اغشعتو يتكلم مع بنت ..

اخذتني رجلي العندو .. عزيز ؟؟
التفتت .. ترانيم .. روحي يم البنات ..
دحقت بالبنت كانت تبكي .  هذي مسرة ..

صارت عينها علية وتدحق بية .. تزوجت هاي مووو
عزيز .. مايخصج روحي
مسرة .. الله لينطيج تعرفيني احبة وتدرين بي متزوجني ولفتي عليه واخذتيه ..
عزيز .. مسرررررة اسكتي ..
مسرة .. لا مااسكت لاعبالك لعبة بيدك شوكت ميعجبك تجيني ولمن تلگي احلى مني تعوفني ..
اني اعرف المن اروح ..
عزيز .. مسرة خلينا واحد محترم الثاني لاتخليني افقد صبري .. وانتي شعرفج اني هنا ..
مسرة .. اخبارك تجيني اول بأول عزيز .
كل هذا وانا واقفة مااقدر اقول شي ..
سحبني من يدي . روحي يم البنات هسا اجي ..

رجعت عند البنات وعيني مافارقتهم ..
اجة ضايج ومعصب ..
- كيف عرفت مكانك ؟؟
- ماادري وين سرور ؟
- صعدوا باللعبة .. انتظرهم ينزلون قال .. سرور هم خابرتوا احد وگلتولهم احنة بالزوراء ..

قلتلو .. اي انا قلت لسراب وسرور حكت مع امها من موبايلي ليش ؟؟
- جنت شاك وهسا عرفت ..
بقى طول السهرة هو ساكت ومعصب .. رجعنا للفندق تركنا وراح ..
غيرت ملابسي بقيت قاعدة اتصفح بموبايلي ..
كنت داخلة بقروب لأهل الموصل .. اغشعت بنت اعرفها تنشر وتعلق بالقروب ..
البنت صورتها تشبه بنت اعرفها واسمها ايضا .. دخلت الها خاص وسألتها طلعت صديقتي من ايام الاعدادية اسمها مروة .
فرحت لما عرفت اخبار احد اعرفوا .. قالت انهم طلعوا من الموصل بسرعه واستقروا بأربيل ..
سألتني عن اهلي وتأثرت وبكت لما حكيتلها عن حياتي والي صارلنا ..
اذا هي غريبة وهاكذ صار بيها .. قلبي كيف يكون وهو مفارق اعز ناسو ..
بكيت وانا احكي معاها الى ان نمت ..

قعدت بالليل لقيت عزيز نايم بطرف السرير ..
ياترى وين كنت ومتى رجعت ..

سحبت نفسي للطرف الثاني ونمت ..
ثاني يوم اصر نرجع للبيت بسرعة ..
رجعنا للبيت وكانت المفاجأة امامنا ..

تفاجأت لما اغشعت مسرة بالبيت .
عزيز .. شتسوين هنا اني شگلتلج البارحة ..
مسرة .. ماگلت شي بس طلگتني ومن غير شهود وبحالة عصبية وهذا كلة يبطل الطلاق ..

طلع عمو قحطان .. عزيز يبوي البنية ماعندها احد ..
عزيز .. مايهمني انطيتها بيت ومحل واهلها تحسنت علاقتها بيهم . حتى لو جنت اعطف عليها بس بعد مؤمراتها من وواي وي عدنان مااريدها ..

- عدنان شبي ..
- طلعت تتواصل وي عدنان من وراي ويوصللها اخباري هيج مرة مااريدها وهي اصلا ماصارت بحياتها مرة الي .
مسرة .. وترانيم مرتك .

الكل صفن عليها ..
كملت كلامها .. ليش ماتحجي ترانيم مرتك لو هم مثل حالي ..
ام عدنان .. شتقصد هاي ماتحجي ..
عزيز .. اطلعي برة اطلعي شگد جنت استخطيج بس هسا طلعتي من عيني خلي يفيدج عدنان الي قواج عليه ..
وهاي گدام الكل .. انتي طالق طالق طالق ..
هو عقد سيد بينا وخلص راح .
وهسا ارجعي البغداد ولاتفكرين بيوم تعتب رجلج العمارة بعد اكسرها الج ..

بقت تبكي وقالتلي .. لاتنتظرين ع الفاضي عزيز يخليج تتعلقين بي وتحبي وتالي يشمرج مثل ماشمرني ..

طلعت واجة عدنان يدحق بيها . هاي منوو؟
عزيز .. على اساس تغشم روحك موو هاي مسرة الي تتآمر عليه وياها وتوصللها حجي واني اگول شمدريها شيصير هنا وشلون عرفت متزوج ..
من غير الجذب الي ملفقة ..

عدنان .. ماجذبت بشي كلشي صدگ . بعدين البنية هي تخابرني وتتوسل علمودك وانت اصلا ماتستاهلها دومك محظوظ بالنسوان .

عمو قحطان .. كافي ولك شسويلك ماتگلي انت شنو . شلون تسلط وحدة مثل هاي على اخوك اني اريد تخلص سالفتها وانت تجيبها النا ..

عدنان .. وشعليها البنية ماتحجون وي ابنكم الي ماكو اي شي يردعة ..
ام عدنان .. الي گالتة صدگ لو جذب فهموني ..
الجدة .. وانتي اجت من حانبج لزگتي بالسالفة ..

مااتحملت كلامهم صعدت الفوق واخذت لينا معي. غيرت ملابسي ..
استغربت من سراب مااغشعتها بالبيت هي وايمان .
نزلت جهزت الغدا من غير مااحكي اي شي ..
دخلت الخالة ام عدنان .. سولفيلي شني السالفة .
- اي سالفة ؟؟
- اسمعي ولج مو اني انتظر يوم يوم اشوف طفل بحظن اولادي وبعدين تطلع لعبة ..
- ومنو قال لعبة هي حكت وانتي صدقتيها ..
- باجر تطلع ريحتها وساعتها والله اگلب البيت على روسكم ..
رجعت سراب من السوق هي وايمان اشتروا الذهب وكانت حزينة ومقهورة .
مااعرفت اواسيها ولا اواسي حالي ..

بقيت ايام وانا مبتعدة عن عزيز يحاول يفسر لي قلتلو صدق مايهمني الامر هذي حياتك وانت حر ..
حتى سراب ابتعدت عني وكانت حايرة بحزنها وهمها يكفيها نقعد نحكي ونفضفض لكن مامثل الاول ..

التجأت المروة احسها تفهمني لانها من مدينتي وصديقتي وتفهمني ..

خالة ام عدنان بقت وراي كل شهر يمر ومااحمل تحكي وتقول انا شاكة كلام البنية صح ..
زادت شكوكها وبيوم اجت وقالتلي ..
عرفت كلشي . الله لاينطيج ابني راح يحطم نفسة وشبابة بسببج .. اهلج وماتو بعد شعندج باقية عدنا ..

- اشنو تقصدي ؟؟
- عزيز ماراد يگلج لايقهرج اخوج وابوج ماتو وشبعوا موت .. عوفي ابني وروحي انتي واختج خليه يعيش حياتة حرام عليج ..
خليني ازوجة وافرح بأولادة ..

انا مصدومة وهي تضغط علية .. كلامها شل عقلي وتفكيري احس عيوني غوشت وماعدت اغشع شي ..

قعدت على صوت سراب .  شبيج رنوم شصاير ..
اشكر الرب لينا بالمدرسة وماسمعت ..
ماحكيت شي لكن الصدمة مازالت ببالي ..

اتصلت بعزيز بسرعة ..
رد
عزيز صحيح اهلي ماتوا .. ليش ماقلتلي ليش عصبت وصرخت وانفعلت وهو يحاول يفهمني ماسمحتلوا ..
قلتلو . مااريد اسمع اي شي عنك . انت خسرتني .. خليتني عايشة بأمل يرجعوا وتسليت بية . وحبستني بقيدك وسجنتني مثل ماسجنت مسرة ..

عزيز .. اسمعي لاتخبليني .. انتي مو مثلها . انتي غالية عندي والله وخوفي عليج خلاني اسكت ماردت تضوگين لوعة الفراگ مرتين ..

خليتو يحكي وغلقت الموبايل ماقدرت اسمع كلامو وصوتو قعدت ابكي بلا وعي ..

راسلت مروة وانا ابكي .. قعدت تواسيني وتهدأ بية .
- ترانيم اذا تحبين تعاي هوني انتي واختكي غيروا جو وارتاحوا .. اهلج كنت متوقعة ماتوا لان مستحيل يكون بيد داعش ويتركوهم ..
ترحميلهم وادعيلهم .. اختج مالها غيركي لاتضعفي ..

بعد ماهدأت نزلت ..
لقيت ايمان تضحك وتستهزأ بية .. والله شايخة ورافعه خشمج وطلعتي اصلا مالامسج ..
فكري زين اذا رجال ومرة بغرفة وحدة مقفولة عليهم ومايتقربلها شنو معناها ؟؟

وامو تقول .. والله الا ازوجة من باجر .
الجدة .. هو مو صوجج صوج قحطان الي سولفلج عبالة عندة مرة مثل النسوان تحفظ سرة ..
ام عدنان .. يعني عاجبج حفيدج يبقى هيح معلگ لاولد ولاسند .. لاحظيت بالاول والثاني مخلصها يستر ببنات العالم وناسي نفسة ..
خليها على ذمتة مااحجي بس من باجر تخطبيلة ..

الجدة .. مو ابوج صارلة كم شهر توفى شلون تزوجيه
ام عدنان .. مثل مازوجتيه هاي تزوجيه الثانية .. بنت عمة سوزان موجودة اخطبيها الة . لا والله مااسكت وافضحكم ..
الجدة .. اسكتي ولج لاعبالج اني هين عليه خلي تطلع سنة ابوج واسويلة زفة شكبرها والي يشاور عليها ياخذها ..
بس خلي تخلص هالحرب الطرگاعة ويستقر هنا ..

اسمع وما مصدقة .. وانا اشنو بحياتهم قدامي وعلى مسامعي يخططون يزوجوه وانا مااحد واساني او سألني كيف حالك ولاخجلو مني او خافو على مشاعري ..

ياترى غلطت لان ماسلمت قلبي ونفسي الو .. ولا اشكر الرب اني ماامنت ووثقت بي ..
صعدت وانا تائهة بذكرياتي من يوم دخول داعش الى ان وصلت لهوني واستقريت ..
وكأني بمتاهة وبممرات ضيقة وتضيق اكثر بكل يوم اقضيه هوني ..
لازم اكون قوية ومااضعف .. لازم اقرر اشنو اعمل واشنو مصيري انا واختي ..

هل عرفت لمااخشى القرب منك .. ولما اهرب بكل لحظة تجمعنا .. لأنني لاتحمل نار عشقك العقيم ..
قررت الهروب لكـي لااحترق بذلك الجحيم .. لكني اعرف بأن نار البعد عنك اشد حرارة من نار حبك ..
#بقلمي_الكاتبة_شمس
يتبع… .

حبايب اعرف البارت قصير بس هذا الي گدرت اكتبة الكم اعذروني ❤