مساء الشووووق حبايب ❤

//// البارت الثالـث عشر /////

#بقلم_الكاتبة_شمس

( شمس السعـدي )

********* #ترانـيــم ***********

أحياناً تضعنا الظروف في مواقف صعبة ، ونجبر على اختيارٍ لا نريده ...

غالبا مانتسائل هل نحن نعيش بالفعل في هذه الحياة باختيارنا .. ام لاجبارنا على ان نعيش فيها ؟؟
هل نختار مانريده بأيدينا .. بملئ ارادتنا ؟؟ ام نجبر على الاختيار بسبب الظروف التي نعيش فيها ؟؟ وهل يسمى اختيار حينها ان كنا مجبرين على تنفيذه؟؟

تندمت لما وافقت .. رغم كنتو مضطرة .. لكن لما سمعت كلام امو واهلو ..
حسيت بالذل .. واتمنيت يدي تنشل ولااكتب كلمة موافقة ..

عزيز ..
گعدنا كلنا بالاستقبال وعمامي وابوي وجدتي كلهم حاضرين ..
حتى عدنان جاي رغم ماخليت عيني بعينة ولاشفتة لان ادري بروحي ماراح اگدر اسيطر على نفسي بعد سوايتة الشينة وي ترانيم ..

صاحت جدتي .. گوم عدنان وحب راس ابوك واطلب السماح منة ..
جاوبها عدنان بتعالي .. وليش اطلب السماح بشنو غلطت ..
ضحكت .. بعد عملتك الشينة وي امانة عدنا تنكر وتگول ماغلطت .

جاوبني بنتر .. امانتك انت مو امانتنا .. جبتها مدري منين مامنين وجبرتنا نتحمل وجودهن وتالي تغويني وبعدها تطلع هي الشريــ

بعدة ماكمل گطعت حجية .. صم حلگك لااتصرف وياك غير تصرف وانسى انت اخوي الجبير ..
- والله الي اشوفة انت الي صاير جبير وتنهى وتأمر بالبيت .. من اليوم الي عرفتك وانت مسيطر ع الكل وكلمتك الماشية ..

- ليش ماتگول الغل والحقد الي بداخلك هو الي يخليك تتصورني هيج ..
- وليش احقد قابل مكسراتي مثلك .. كل جايبلنا وحدة شكل وذيج الي ببغداد عايفها مانعرف شنو موقعها .
- كافي عدنان لاتختبر صبري ..

صاح ابوي بينا ..
كافي ولكم شو ماتحترمون الكبار الي گاعدة يمكم . خلوا احنة مامالين عينكم وجدتكم الي گاعدة شني ..

- خلهم يقحطان خلهم .. جليلين حيا ومايستحون اني صافنة اريد اشوف لوين يوصلون .. وياهو الي يربح بيهم بالنزاع ..

ضجت من حالي .. السموحة جدة اعتذر ..
عمي كريم .. كلة منك قحطان انت الي وصلتهم الهيج وخليتهم يتعاركون . لان من البداية فرقت بينهم وفضلت واحد ع الثاني ..
جدتي .. انت اسكت ولاتهيج النار اكثر ماهي هايجة ..
بلة حاسبت بنتك وابنك على عملتهم الشينة ..

- وليش احاسبهم .. ماسوو الا الصح .. بنتي فكرت ببيتها لايخرب واخوها مارد اختها وخاف عليها ..
وماظلمهن اخذهن المكان زين وامن عليهن ..
بس الشينة عليكم الي تفضلون الغربة على لحمكم ..

صاحت جدتي بصوت وضربت بعصتها ع الگاع ..
- تخسى ياابن بطني .. مو انت الي تعلمني الزينة والشينة .. ابوك بزمانة جان يگعدني بوسط المضايف ويشورني وياخذ رأي قبل ماياخذ راي الشيوخ ..
تجي انت هسا الي حجي ماتعرف تحجي وتعلمني شلون اتصرف ..

والله لو ابني جان گلت انت مو ابن الشيخ منذر الي جان يضيف الضيف ومايسألة انت منين وشعندك جاي

عدنان .. شيخ منذر الي ظلم اني وحرمها مني ومن ابوي موووو..

ابوي .. كم مرة اگلك امك الي ربتك .. وتعبت عليك ليش تصير ناقص وناكر للجميل ..
ابوي صح ماقبل على زواجي من امك بس اني ماقصرت وياها الاخر لحظة .
وماتركتها ابد لحد ماجابتك ..

ضحكت جدتي .. وتلومنا لان نشور عزيز ونسمع كلمتة لجن تجيب سوالفك لسوالفه لو عقلك العقلة .
انت من يوم الي اخذت ايمان وهي غاسلة عقلك غسل وسوالف النسوان كلها بحلگك ..
عمي كريم .. يمة شنو هالحجي ايمان شعليها ..
جدتي .. ايمان سوسة بلة نحسة وماتحب تشوف الناس متصافية ..

عمي كامل .. يمة هسا عوفونا من هالحجي .. النتيجة شنوو؟؟ تبقون للصبح هذا گال وهذا حجى ..

ابوي .. الحل .. يعتذر عدنان من البنات هو ومرتة وبعدها يشوفلة بيت ويستقر هو ومرتة واني مستعد اتكفل بكل المصاريف ..

كريم .. تطرد ابنك علمود غريبة .. اصلا المفروض هن يطلعن وهو اليرجع ..

اجتني رسالة ..
فتحتها من ترانيم كاتبة ( موافقة) ..
حسيت براحة ساعتها وهسا اگدر اتخذ اجراء ..

جدتي .. البنات امانة عدنا ومايطلعن الا المدينتهن ..
كريم .. اصلا وجودهن خطأ بالبيت بوسط الشباب اليوم عدنان غوتة باجر عامر لو علي الي مخلصها ضحك وسوالف وي اختها الصغيرة ..

تعصبت ومااتحملت كلامة عليهن وهو يعلي صوته اكثر واكثر حتى يسمعن ..

وگفت على حيلي وگلتلة ..
- عمي عندك بنات خاف ربك .. الطعن بأعراض الناس مو هين .. ومنا وجاي مااسمح الاي بشر يطعن بيهن ذني من اليوم امانتي الي ..
وترانيم راح تصير مرتي والي يحجي عليهن بكلمة اردها بضربة ..
الكل جان مصدوم بكلامي ..
عدنان .. گول هيج . هاي الهوسة كلها حتى تاخذها بعد عليمن تدور اخلاق صارلك ساعه وياي ..

جدتي .. اسكت ولك ليش تجيب عملتك الشينة الة .
قحطان .. يبوي مايصير هيج هذا قرار ماينوخذ بتهور والبنية منو يگول موافقة ..

كريم .. ههههههه يعني هذا الي تفكر بي . اذا البنية موافقة لو لا ..
مافكرت ياشيخ بالعالم شتگول لو عرفوا انت خاطب الابنك وحدة مسيحية لا من دينا ولا من ثوبنا ..

جدتي .. كريم اگعد اعوج واحجي عدل .. بحياتي مافكرت مثلك مادامها تعبد الله كلش كافي ..

التفتت علية .. بس يعزيز يمة تريث شوية البنات امانة وابوهن واخوهن مانعرف نهايتهم شني مانريد نسود وجهنا گبالهم .. ولااريد نضغط ع البنية ونجبرها ..

- مو اني الي اجبر مرة علية جدة .. ولو ماتوافق مااعقد عليها ..

عدنان .. انت صاير وقف شنو ؟؟ كل بنية تشوفها تعقد عليها وتستر عليها .. لو ذيج ماشبعتك اجيت الهاي

قبضت على ايدي حيل وردت اضربة لوما احترام جدتي وابوي وگف بعيني ..

كريم .. مو بكيفك انت .. فكر بأبوك وبينا شنگول للعالم اذا هيج خايف عليها وتريد تسترها زوجها الاي واحد
عزيز .. عمي وفر كلامك .. هاي گدام ابوي وجدتي . البنية راح اعقد عليها وتبقى بحمايتي والي يمسها او يفكر مجرد تفكير كانه مسني وساعتها ماارحم ..

جدتي .. سدو السالفة كافي .. وانت كريم اخذ عدنان وروحوا البيتك ..
عدنان .. يعني هذا حلج جدة تطلعيني من بيتي واهلي وتخلين عزيز يسيطر ويسوي الي يريدة ..
اصلا اني الي ماارجع ولااخليكم تشوفوني اذا تزوجها ..
زعل وطلع ..
وعمي كريم طلع وراه ضايج هم ومتعصب ..
عمي كامل .. اروح اشوفهم واحاول اهدأهم ..
بقينا بس اني وابوي وجدتي ..

جدتي تعاين علية ومنتظرة تفسير مني ..
- جدة لاتعاينين هيج .. هذا انسب حل .. مااگدر احافظ عليهن من الناس اذا مااصير مسؤول عنهن ..
- وانت ناوي تضيع شبابك علمود تحمي وتخاف على بنات الناس ..
شوكت تتزوج وتستقر مثل الناس امنيتي اشوف ولدك بحضني . الي بگدك عندهم اثنين وثلاث ..
حتى عدنان الله مافرحني بخلفتة ..

ابوي .. عزيز يبوي مااريد ارفض خاف تگول اني ضدك لو ضد البنات .. بس يبوي حجي جدتك وعمامك صح
الناس هنا تدريها شني وشلون راح تأول حجي وتألف
واذا مو همة مرت عمك وايمان يفضحنا بالولاية وتطلع البنية عايبة وسترناها ..
- اكص السانة الي يجيب طاريهن بكلمة . وحق الله احسب جن الله ماخلقة ..
ولهذا الشي اريد اعقد عليها لان اعرف لاعماتي ولامرت عمي وايمان راح يرحمنهن ..
والحجي بينا يبوي ومااريدة يطلع . البنات ماصفالهن احد غيرنا ..

جدتي .. شتقصد ؟؟
- ابوهن واخوهن مكتولين من يوم الي اخذوهم داعش وماردت اگلهن واصدمهن وخاصه بعد ماماتت امهن .

ابوي .. لاحول ولاقوة الا بالله .. انالله وانا اليه لراجعون بس لازم يعرفن مايصير نضم عليهن ..

- مو وكتها بوية خلي ينسن مصاب امهن . مااتحمل اسمعهن وهن متأملات يلتقن بأبوهن وعايشات على هذا الامل ..

هااا جدة شو ساكتة شگلتي ..
جانت مدنگة راسها للگاع ولازمة عصتها بأثنين اديها.
رفعت عينها الي ..
اذا مااسمع بأذني البنية قانعة وموافقة مااحجي شي ..
روح صيحها وتعال ..

كنت قاعدة بالصالة بعد ماسمعت كلام عمو واخوه وهم يطعنوا بية ويعلوا اصواتهم ..
كانت نظرات امو وعماتو يغشعوني بحقد ..
وهم يسمعوا كلامهم ..

اشكر الرب ان لينا فوق مع سراب وماسمعت كلامهم ..
طلع عمو وعدنان من البيت ..
وعم الهدوء .. ماعاد سمعنا شي وكانو يتهامسو بالكلام
ام عدنان .. راح يتخاربون بسبب الي مايستحن ..
سراب .. يمة شنو هالحجي ؟؟

انفتحت الباب وصارت عينو بعيني .. نظراتو مليانة غضب ..
اشر بعينو وقال .. تعاي لجوة شوية ..

ام عدنان .. شكو شصار يمة فهمونا ..
عزيز .. يمة بعدين بعدين افهمج ..
- جا اني شني ناطورة خضرة .. شو كلشي يصير بالبيت اخر من يسمع اني ..

دحق بية وقال .. يالله بسرعه جدتي منتظرة ..
دخلت وخطواتي ثقيلة .. ورجلي ماتحملني ..

دحقت بيه الجدة وقالت ..
اگعدي جدة .. اگعدي اريد اخذ رأيج بشغلة ..

قعدت ..
- يمة انتن امانة عدنا .. والي يهمنا مانكسرجن لو نقصر بحقجن والي صار خلانا سود الوجه گدام الله وگدامجن

ولو مافهمت كلامها ..
- جدة لاتقولي هاكذ انتو ماقصرتوا معنا والي صار انتو مادخلكم بي ..
- ادري گلبج ابيض واعرفجن شنهي انتي واخيتج بس مايحميجن ومايسكت حجي الناس الا اذا صارت شغلة
وهالشغلة ماتصير الا برضاتج ..
- قولي جدة اسمعك
- يمة عزيز رايد يعقد عليج .. لاتخافين مانجبرج ولانگلج ادخلي الدينا ..
لان هو عقد ع الورق حتى نسكت حلوگ العالم .. وانتي بكيفج بعد ..

عزيز .. بس جدة اني گلت… .
قاطعتة ..
- اعرف الي تريدة بس هذا الي لازم يصير فهمتني ..
كانت تحكي بالغاز مافهمتها ..
وعزيز كان يحاول يقول غير كلام وهي سكتتو ..

دحقت بعزيز ..
- شوفي ترانيم الي ترديه يصير مالج دخل بكل واحد اذا موافقة گولي ولاتخافين من شي بعد ..

- وانت اشنو تقول عمي ابو عدنان .. الي يهمني تكون قانع وراضي ..
- يبوي هذا قراركم وماعلينا الا نتمنالكم الخير ..

حسيت كلامو مختلف عن شكلو ..
وكأنه صار امام الامر الواقع ..

هزيت رأسي وقلت .. موافقة .
كلمة موافقة فتحت حرب كبيرة مستحيل انها تخمد بسهولة ..

بعد ماعرفت امو .. قامت القيامة .. كانت تصرخ وتقول
قشمرتة بحسنها وضحكت عليه ..
ماكفاها خربت الاخوة وبعدت عدنان عن البيت هسـا جاي تاخذ ابني وعزوتي ..
شلون توافقون شلون . هي مو منا . شلون تصير مرتة وهي مسيحية فهموني ..
ابو عدنان .. كافي وحق الحق حجاية ثانية ارمي عليج الطلاگ وبدون رجعة . ولج فضحتينا من ابوج مات ماصيحتي هيج ..
اسمعوا كلكم .. هذا قرار عزيز وهو الي اختار . حجي زايد مااريد ..

تركهم وطلع .. وهسا عندي مشية طالع اني ..
الجدة .. الله وياك يمة . وانتن كافي الي اسمع حجاية منها ماتلوم الا حالها ..
روحن انتن لبيوتجن وانتي اهدي كافي كبرتي واولادج بطولج ..

ام عدنان .. اولادي ؟؟ ليش اني ام .. شو محد ياخذ رأي دوم انتي الي تاخذين قرارات عني . اصلا محد معتبرني بالبيت ..
وفوگ كل هذا تردين تزوجين عزيز وغصب عني وابوي تربتة رطبة بعدهي ..

- ومنو گالج راح نسوي حفلة وهوسة .. هو عقد يجي الشيخ يعقد وهاهي ..
- المهم يتزوج لو لا .. اني اربي واكبر ويجن مدري منين ياخذنهم ع الجاهز ..

ماحبيت اسمع اهانات اكثر .. صعدت فوق .. كان عزيز بغرفتوا والباب مفتوح ..

اغشعني اشرلي بيدو ..
تعاي احجي وياج ..
اتقربت لكن مادخلت ..
- تتوقع قرارنا صح ؟
- ليش مترددة .. مو حجينا بهذا الموضوع ..
- صحيح حكينا .. واصلا ماكو داعي للتوتر هو مجرد عقد ع الورق .. واكيد بيوم الي الاقي اهلي تفسخ هالعقد وكل شي يرجع الحالو ..
عزيز .. جدتي گالت ع الورق لان مارادت تجبرج…
قاطعتة…
- بالعكس اصلا وفرت علية الكلام لان كنت اريد اقلك انه يكون عقدنا شكلي ..

حسيتو ضاج .. هاهي الي ترديه بس لازم محد يعرف بزواجنا شكلي .. لان احنة هنا ولاية صغيرة ومعروفة واي واحد يسمع راح يطلع حجي شكال علية او عليج وهيج ماسوينا شي معناها ..

- اشنو قصدك نمثل نحنا متزوجين ..
- وتگعدين وياي بالغرفه هنا ..

ضحكت لااراديا .. انت اشنو تقول طبعا مستحيل ..
- شنو مستحيل حتى لو ع الورق انتي راح تتسمين مرتي يعني وجودج وياي وبنفس الغرفه حلال .
لاتخافين ماراح المسج وراح نبقى مثل مااحنة الى ان…… ..

- ليش ماكملت .. امممم كلامك صح . خلينا نمثل الى ان الاقي اهلي واروح ..
وهاكذ يكون اغلقنا افواه الناس لاهم يطعنوا بشرفي ولاهم يقللوا منك ..

عزيز .. اياج ترانيم مااحب المرأة الي تتطاول الرجولة مو لان مااگدر اخليج مرتي ..
الرجولة الي هي مستحيل اجبر مراة على شي مو برضاتها فاهمة ..
اني طالع .. راح اخلي اني وسراب ياخذنج للسوگ اشتري الي تحتاجيه واخذي حلقة وذهب ..
- مااريد ذهب اشنو اعمل بي ..
- اريد كلشي يمشي بأصولة عماتي يدورن الزلة ..

بقيت مصدومة بي .. يتعامل مع الموضوع ببرود
وكأنه طبيعي يتزوج بيوم واحد وبسرعة ..

سامحيني ياامي .. انتي بقبرك وانا اتزوج .. سامحني ياامي لأني مجبورة. لازم احافظ على نفسي واختي لحين ماالاقي حل واخلص من هذا الوضع ..

تذكرت لينا ..
الكل عرف الا هي ..
دخلت لقيتها تلعب لعبة بالموبايل ..
اغشعتني ابتسمت .. اختي اليوم مختفية تعبتي اكيد

اتقربت الها بأبتسامة ..
لينا حبيبتي… انتي راح تكبري ولما تكوني بعمري راح تفهميني ..
- اشنو بكي اختي قولي .. اكيد ضايقوكي تحت .. سمعت الخالة ام عدنان تصرخ ..

- لا حبيبتي ماضايقني احد .. لكن عندي خبر الك ..
عزيز طلب يتزوجني وانا وافقت ..

تركت كلشي بيدها وانصدمت .. تتزوجي ؟؟ وانا
- انتي اختي وحبيبتي راح تبقي بحضني العمر كلو
- لا راح تنسيتي راح ياخذك مني مثل مااخذو اهلي
- لينا اشنو هالحكي انا راح ابقى معك بنفس البيت
- لكن مابنفس الغرفة ..
- لينا… .
قاطعتني .. انتي انانية اختي تفكري بحالك وراح تتزوجي وتنسي اهلي وامي الي ماتت ..
تركتني وطلعت من الغرفة ..
اخذت نفس .. الرب يساعدني .. كيف راح اقنعها وانا نفسي مامقتنعة ..
دخلت سراب .. گلتيلها للينا شفتها نزلت ضايجة ..

دحقت بها .. تعبت ياسراب تعبت
- يمعودة گولي يالله اصلا المفروض احنة متوقعين راح كلها ترفض وتصير ضدكم ..
- حاسة نفسي تسرعت !
- بس هيج راح الكل يسكت واولهم عدنان ومرتة . صيري قوية ولاتنهزين .. ادري طريقج صعب وخاصة امي لاعبالج بسهولة تستسلم وترضخ .
بس من اللحظة الي تعقدين بيها راح تتسمين مرت عزيز ومحد يدوسلج على طرف ..
- مسرة هم مرتو لكن الكل يذمها وهي عايشة وحدها ببغداد ..
- قصدج على ذيج .. فلاتقارنين نفسج بيها . ذيج عزيز الي بعدها ومارادها تختلط بأهلي ..
بس انتي الظاهر تختلفين لان مصمم يخليج تستقرين وتتربعين بعرشة الي هي غرفته .. كانت تحكي وتضحك ..

- ماقدرت احكي شي وهي تتوقع انه زواجنا حقيقي .
والجدة نبهت انه مانحكي  .. تضايقت كثير عزيز وعدني انه تكون فترة تعارف لكن الي اغشعتو انه الامور تمشي بسرعة ومو مثل ماقال ..

نزلت ادور على لينا لقيتها بالحديقة تسقي الزرع مع عمو ابو رماح ..
ابتسم وقال .. كيف حالها عروستنا .. تفاجأت .
- انت عرفت عمو .. اسفة لازم انت اول واحد تعرف لانك مثل ابي ..
- الشيخ ابو عدنان قلي واخذ رأي .. لأن الرجل يحترمني ويعتبرني مثل ابوكم ..
- وانت هاكذ بالنسبة النا .. واريدك تراضيني على بنت حلوة زعلانة علية ..
- لا لا الحلوة ماتزعل على اختها الكبيرة .. لكن هي ماخذة ع خاطرها شوي ..

كانت تدحق بية وعاملة نفسها مامهتمة ..
اتقربت منها واخذتها الحضني… بعدين راح تعرفني انه الي صار كلو المصلحتنا .. ومافي قوة ع الارض تقدر تفرقني عنك انتي روحي ومستحيل ابتعد عنكي ..

حضنتني بابتسامة بريئة على محياها الطفولي ..
سمعت صوت سراب ..
- خلينا ندخل حبيبتي ..
- انا راح ابقى هوني انتي ادخلي ..

تركتها عند عمو ابو رماح ودخلت ..
- يالله وينج مو ع اساس نروح للسوگ نشتري غراض .
عزيز راح يجي ..
- انا مالي خلق اروح .. روحي انتي بمكاني ..
- باعي راح يجي عزيز كون يلگانا جاهزين . امي مالها خلگ بس احنة نروح ..

- هفففف حاسة هذا اليوم ماراح يعدي ..
اجة عزيز وطلعنا بعد ماامو تعاركت معو وقالتلو لاانت ابني ولاانا اعرفك اذا تزوجتها ..
لكن هو ماكان يسمعها ..
- يالله خلينا نروح ..
- عزيز خلينا نتراجع مااريد تصير مشاكل بسببي ..
- مو عزيز الي يتراجع .. امشي ومالج علاقة ..
رحنا للسوق .. اخذلي حلقة وراد ياخذ ذهب ماقبلت هو كان عنيد وانا اعند منو ..
وصاحب المحل يدحق بينا ..

سراب .. كافي فضحتونا حتى الرجال يباوعلنا من وراكم ..
عزيز .. احجي وياها مو وياي ..
- انت ليش ماخذ الامور جد ونحنا زواجنا شكلي ..
- ابقي ذكريني كل شويه ذكريني ..
گومي براحتج ..

دفع فلوس الحلقة .. ونحنا طلعنا ..
كان معي طول السوق اخجلت اشتري اي شي كانت سراب تختار وتشتري ..
لان فعلا ماحاسة بشي ولاعندي رغبة .. حاسة بندمي وتسرعي لكن ماباليد حيلة ..

وينكي ياامي .. كانت تتمنى تغشعني عروس وتجهز لي
عزيز .. اذا كملتن خلنا نمشى ..
سراب .. وين رحت ..
عزيز .. بشغلة ..

رجعنا للبيت ..
دخلنا الغرفة الجدة .. طلعت سراب الاغراض للجدة تغشعهم كانت تبتسم ..
- مهناية بنيتي يوم الي تجهزين العرسج من صدگ وتفرحين ..
ردت سراب .. ياجدة قابل هذا الزواج جذب .. غير الفرق مابي لازفة ولاحفلة ..
- انتي مالج شغل لاتدققين مو كلشي لازم تعرفنة ..
عزيز تركنا بعد مادخلنا البيت ..
اجت سرور ولينا يقلبوا بالاغراض ..
دخلت ام عدنان كانت رابطة راسها بحجاب ..
اغشعتنا قالت ..
ارتاحيتي هسا بالعافية عليج اشبعي بي . بس لاعبالج زواجة الدهر .. تحلمين ..

ردت الجدة .. خايبة شگلت اني .. يمكن راسج مأثر على السانج روحي نامي وارتاحي روحي ..

سراب .. خلونا نصعد الغراض ونسوي عشا راح يجي ابوي والولد ..

صعدنا الاغراض .. ونزلت مع سراب .. جهزنا العشا
دخل علي .. مبروك ياب .. ولو اني اخر من يعلم بس فرحتلج وربي .. واخيرا راح يتغير نسلنا ويصير حلو

سراب .. هههههه دسكت لايجي عزوز ويشوفك تتغزل مرتة ..
علي .. ليش حرام اتغزل بخيتي .. هسا لو لينا جبيرة جان اخذتها الي وهيج صدگ يتغير النسل مية بالمية

كح عامر وعزيز وراه .. طفر من مكانو…
عامر .. هاااا شبيك شو خفت ..
علي .. لاياب ليش اخاف .. والله لو ماجدي هستوة ميت جان سويت حفلة هنا وللصبح ..
بالله صارلنا شگد منتظرين زواج عزوز وتالي يصير سكتاوي ..

عزيز .. بقيت انت وعامر عود نسوي بعرسكم حفلة
عامر .. لا اني اعفوني .. مالي خلگ هالسوالف ..
واصلا راح التحق بعد شعندي متزوج ورابط بنت العالم وياي مدري شيصير مايصير بية ..
عزيز .. ها نويت تلتحق ..
عامر .. اي يخوي الحمد لله صرت زين بعد شكو ..

فرشنا السفرة وكانت عيون عزيز تدحق بية لكن ماكنت ابادلوا النظرات ..
ماانكر كان في شي يشدني الو قبل هاليوم .. لكن لما وافقت على الزواج حسيتو غريب عني وقربي منو موترني ..

ابو عدنان .. اسمعوا بوية هاي گاعدين كلنا على العشا وامي شاهدة ..
باجر يجي الشيخ يعقد ..
لاهوسة ولاعزيمة .. بس اذا اسمع حجاية بالبيت وهوسة كائن من يكون مالة گعدة بالبيت بعد ..

بعدها ترانيم تصير بنتنا وحالها من حال بناتي .. وانتي ياام عدنان لازم تتعودين على هالوضع . يعني راح تصير مرت ابنج شلون جنتي تعاملين ايمان تعامليها .
فاهمة ..

هي سكتت وماردت ..
لكن ماكان عاجبها كلامو وانا عاذرتها .. كنت اتمنى اقلها الزواج شكلي واطمنها لكن خفت ماتسكت ويمكن تفضحني ..

لازم اسكت واتحمل .. بين ماالاقي اهلي وانهي كلشي واروح ..
لليل قالت سراب جدتي تريدج ..
نزلت ..
- تعاي جدة ادخلي واقفلي الباب ..
قفلتها واتقربت منها ..
- اسمعي بنيتي محد يدري الزواج ع الورق ومااريد احد يدري .. عزيز دوم بالدوام يجي يومين تخلصوهن شلون ماكان واني اعرفكم اثنينكم عاقلين وواعين ..
وهسا اريدج تاخذين غراضج كلها ترتبيها بغرفتة وگدام العالم انتي مرتة ..

- لكن…
- ماكو لكن ومدري شنو اني اعرف شي وانتي تعرفين شي .. امشي وراي ومعليج .. باجر تلگيهن كلهن مكومات هنا ويردن يعرفن السالفه شني ..
لاتخلين لزمة على روحج .. اني نيتي احافظ عليجن ومحد يصونج انتي واخيتج غير عزيز ..

لاول مرة يعجز لساني عن الرد .. وكأن هناك سلاسل تقيد فمي وجسمي وتكبت داخلي فتمنعني عن الكلام .

هزيت راسي بالرضا وقمت ..
لقيت عزيز ع الدرج .. نزل لما اغشعني ..
تعاي وياي ..
طلع للحديقة .. طلعت معاه ..

- شبيج ضايجة.. جدتي گالت شي ضوجج
- بالعكس كلامها صحيح .. عزيز عندي طلب
- گولي
- نحنا ماراح نبقى العمر كلو مرتبطين .. انا اريد اشتغل وأقف على رجلي ..
- اذا هذا الشي يريحج .. صار . بس لاتضوجين جاي اشوفج اليوم ذبلانة…  معقولة ارتباطج بيه زاعجج
- الي زاعجني القوانين الموجودة بالحياة والي لازم نطبقها بحذافيرها ونلتزم فيها ..
ليش منو الي وضعها وليش مجبروين انه ننفذها ..
- هي هاي فلسفة الحياة .. اذا ردنا نستمر ونقاوم لازم نتنازل لكن مانضعف .. ومانعرف الله شكاتبلنا من هذا الشي .. لازم نجرب ونعرف وبعدها نقرر اما التوقف او الاستمرار ..
كان كلامو الغاز وتلميح ..
- يالله گومي نامي ولاتفكرين اليوم تعبتن من الغدا والهوسة .. وهاااا نسيت اگلج . الصبح راح تجي غرفة جبيرة وجديدة ..
- ليش؟؟ وغرفتك ..
- حتى لو كان زواجنا شكلي ماتحب احد ينتقص منج ويعيرج لان الناس عليها الظاهر ..
اريدج تدخلين على غرفة جديدة ..

ابتسمت .. الواضح انت ماخذ الامر جد ..
- خلينا نمثل ونتخيل لو هم حرام ..
ضحك ودخل ..

تمنيت يكون كل هذا حلم واصحى منو ..
صعدت للغرفة نمت من التعب ..
ثاني يوم من الصبح سمعت حركة فوق ..
صحينا ..
فتحت سراب الباب ..
علي .. امشن دخلن منا ولد تنزل بالغرفة ..
سراب .. يمكن جابوا الغرفة الجديدة لان نزلوا غرفة عزيز القديمة ..

بداخلي حزنت .. لان كانت هالغرفة غالية عليه .
كملوا وطلعنا ..
عزيز .. تعاي شوفيها حلوة ..
اتقربت .. انبهرت كانت كبيرة وفخمة .. لونها فضي .
قلتلوا .. والمكتبة وين ؟؟
عزيز .. طلعتها بعدين اشوفلها مكان ..
- اتركها بالغرفة لاتطلعها ..
- هاهي مثل ماتردين .. هسا نضفنها وافرشنها ورتبي غراضج بيها ..

اسمع امو من تحت وهي تدعي علية وتقول .. عسا الله لايمهلج بيها ان شاء الله ولاتشوفين عليها الخير .
سراب تحاول تهدأني وتعتذر ..
والجدة تسكتها وماتقبل تحكي ..
رتبنا الغرفة وفرشتها سراب والجدة اعطتني بطانيات وفراشات وفرشات هدية ..
وكأنه راح تكون غرفة عرسان حقيقية ..

اخذت ملابسي ارتبها ..
دخلت سراب وبيدها ملابس عزيز ..
- رنوم اروح اسوي غدا ماالحگ وامي گامت تحجي رتبي وياج ملابس عزيز ..
وخاصة ملابس الدوام يريدهن وحدهن ..

اخذت ملابسو كانو مثل المسطرة بالترتيب ..
رتبتهم بيدي ورتبت عطورو الي كانت حوالي اكثر من عشرين نوع وشكل ..
مااغشعت رجل هاكذ عندو عطور وادوات حلاقة ..
يوم عن يوم اكتشف شي جديد فيه ..

حسيت بوجودو خلفي ..
التفت ..
- الله يساعدج محتاجة شي ..
- لا تقريبا كملت لكن ملابس مااعرف ذا تريدهم هاكذ او لا ..
دحق بيهم وقال .. عاشت ايدج خوش ترتيب ..
اعتبري هالغرفة الج لاتتقيدين بيها ..
اني خطار عندج هههههه كل فترة اجي يومين وارجع يعني انعم الله اذا استضفتيني هاليومين ..

ضحكت .. راح تبقى غرفتك وانا الضيفة فيها .. لاتنسى ماراح ابقى العمر كلو هوني ..
اتنهد وقال .. يالله كومي تغدي وارتاحي تعبتي اليوم
نزلنا تغدينا .. امو زعلانة مااكلت ..
كملنا غدا ونظفنا ..
سراب .. يالله يعروس اصعدي اسبحي حتى اسرحلج شعرج ..
- ماكو داعي ..
- شنو ماكو داعي الليلة ليلتكم .. بعد لازم تجهزين نفسج ..

اخذت نفس وسحبتها من ايدها ..
- سراب مااقدر اخبي عنج .. لكن لازم يبقى بينا وماتقولي الاحد ..
- شنو خوفتيني .
- احنة زواجنا شكلي يعني ماحقيقي واتجهزلوا . وهذا طلب الجدة انه مانقول الاحد ..
- شنو هو لعب . جا شلون راح تبقون بغرفة وحدة
- هذا الي مضايقني رغم عزيز وعدني انه مايلمسني ولايجبرني على اي شي ..
- والله مااعرف شأگلج . بس ضوجتيني معناها اهلي مايردون هالزواج ووافقوا لأجل عزيز والا جانت جدتي جبرتكم تتزوجون وتشوف جهالكم ..

- حقهم وماانقهر منهم .. لاانا راضية ولاهم ليش نضحك على نفسنا ..
- والى متى تبقون هيج ..
- الى ان يهدأ الوضع وارجع لمدينتي واهلي ..

سراب .. حتى لو .. هم گومي سبحي وبدلي وعدلي ع عنادهم والا ناخذ صور بعد ..
وفعلا .. جبرتني البس فستان منها وسرحت شعري ونزلنا ..
طلبت من عزيز انو يراضي امو وياخذ رضاها ..
لقيتها قاعدة بالصالة وماتحكي .. وهو قاعد يمها ..
اغشعني استغرب وابتسم ..
تعاي ترانيم .. سلمي على امي واخذي رضاها ..
رحت سلمت عليها وقبلتها لكن سلامها كان ثقيل ودارت وجهها للجهة الثانية ..
غمزلي بعينو انه اتحمل ..
ابتسمت بمعنى لاتهتم ..

دخل علي وقال .. اجة السيد ابوي يگول خلي تجي جدتك وامك وترانيم تلبس عباية وتجي ..
اعطتني سراب عباية ..
لبستها ودخلت ..
كان عمو كامل وعامر حاضرين .
وعمو ابو رماح الي نزلت دموعو لما اغشعني ..
قعدنا كلنا ..

وكان السيد يقرأ ايات قرآنية ..
وانا كنت افكر بأمي . اتمنيت تكون معي وتغشعني
ولا ابي الي كان يقول لو يقفوا الخطابة طوابير مااقبل واعطيكي للي يعرف قدرك ويثمنك بالذهب ..
لكن الحقيقه انا وحدي .. تلتف علية الاساور من كل جانب .. وفي كل مرة اجد نفسي وحيدة داخل تلك الاسوار ..

فزعت على صوت السيد وهو يقول قولي نعم انت وكيلي ..
بقيت صافنة مااعرف اشنو اقول ..
عزيز .. ارجعي رددي الجملة الي گالها ..
رددتها من غير ماافهمها ..
مايمهني اي شي ولاكيف الطريقه الي تزوجت فيها لان عارفة انها امور شكلية ..

قال .. مبروك بالرفاه والبنين ..
قام عزيز وسلم على اهلو ..
الجدة .. تعاي خلي احبنج يجدة .. اشرت لي اسلم على ام عدنان سلمت عليها تركتني وراحت ..
سلم علي وعامر وباركوا النا ..
حضني عمو ابو رماح ..

سحبني عزيز وهمس .. بعد مااريد تحضنيه رجال غريب كل شويه وحاضنته عبالك ابن عمج الربعي ..
انصدمت .. ليكون مصدق اللعبة ..
صاح عمو ابو عدنان .. تعاي بوي بعد صرتي بنيتي .
باس راسي واعطاني ورقة وقال .. هذا نگوطج بوية ولو المفروض اكثر بس صارت بسرعه ..

طلعنا للصالة .. سلمت لينا والبنات وحضنوني ..
وعزيز يضحك ويقول .. كافي كتلتن مرتي ..
همستلو .. مو كأنه عجبتك لعبة الزواج ..
ابتسم وهمس .. هذا الشي مايغير انتي فعلا مرتي وغمزلي ..

تعيشنا كلنا سوى .. حضروا عماتو يباركو وكانه مجبورين حتى اسراء .. سلمت على اخوها وماسلمت علية ..
الكل كان مجبر ع الحضور .. مجرد ماكملوا العشا الكل راح على بيتو ..
بعد ماكانوا ناطرين كلمة من عزيز حتى يتأكدوا ويقتنعوا بزواجنا ..
- يالله لهنا ونودعكم اني ومرتي .. تعبت اليوم .. ولاتنسون اني عريس استأذن ..
انصدمت من كلامو .
امو بكت وحضنتو ..
الجدة .. يمة اخذ مرتك وروح اليوم ليلتكم معليك بينا
علي .. عمي شمنتظر غير لو اني منك حتى عشا مااتعشا اخذها واشلع ..
عزيز .. هههههه سرسري ..

شرلي ومد ايدو الي .. ماعرفت اشنو اعمل اتقرب مني واخذ يدي وسحبني ..
مشيت معاه بلا وعي ويدي بيدو لحد مادخلنا الغرفة ..

#بقلمي_الكاتبة_شمس

يتبع… .

هلا حبايب اعتذر ع التأخير . بس الحمد لله توفقت بدعائكم الي والكتاب راح ينطبع ..
اما بخصوص ترانيم راح يرجع النشر يومي ماعدا الجمعه والسبت احبكم ❤