مساء الحب والسعادة لعيونكم ..

///// البارت الثانـي عشر /////

#بقلم_الكاتبة_شمس

( شمس السعـدي )

********* #ترانـيــم ***********

عمـو ابو رماح .. بنتـي انـي رايح للفاتحـة المفروض امشي من البارحة ومارحت عيب اشنو يقولوا عليه وهم وقفتهم معي ماتنسى ..

ترانيم .. صحيح عمو .. انا لو ماحالة لينا كان رحت معك
ابو رماح .. لا يعرفون وضعجن أشنو .. انتـي قفلـي الباب ونامـي يم اخيتكـي مااتأخر ..

ترانيم .. وانت تعرف بيتهم ..
ابو رماح .. خابرت الولد وصفولـي المكان وراح اقول للسايق يوصلنـي ..

راح عمو ابو رماح وانا قعدت اتأمل بلينا الي هروبها للنوم صار سلاح للتغلب على اوجاعها والمـها ..

اتصل عزيز .. ماقدرت ارد وانا بالبيت طلعت بالحديقه ..
رديت ..
الو
شلونج
تمام .. انت شلونك ..
الحمد لله
اشنو ماتحظر الفاتحة .
مااگدر اخذ اجازة صعب وماصارلي فترة من اخذت ..
بس خابرت امـي وخوالـي وعزيتهم ..
لينا شلونها ؟؟
لينا تحاول تتغلب على حزنها بنومها .. حتى مااقدر احزن ولاابكي بسببها خايفه تتأثر او يصير بيها شي .

مااتحملت وحسيت شي يخنقنـي .. قلتلو ..
عزيز انا مخنوفة محتاجة اصرخ وابكي لكن مااقدر مااقدر

حاولي تطلعين الحزن الي بداخلج مايصير تكتمين تتأذين
كنت اسمعلو وهو يحكي ويخفف عني ..

سمعت صوت سيارة ..
قلتلو عزيز يمكن اجة عمو ابو رماح اروح اغشعو ..
عزيز .. لا تسدين الموبايل بقيه ..
ترانيم .. ليش ..
عزيز..  انتن وحدجن وگلتي هستوة راح مامعقوله بسرعه يرجع ..
ترانيم .. خوفتني ..

طلعت من الحديقة بأتجاه الملحق .. اغشعت عدنان يدق باب الملحق ..
عدنان ؟؟ اشنو تريد. .
-هااا اريد المفتاح مستعجل اريد اسبح وابدل واطلع ..
-انتضر هوني .

دخلت اخذت المفتاح وطلعت ..
لقيتو واقف قريب باب المطبخ ..
اخذتلو المفتاح ..
اخذو من ايدي وضغط عليها ..
كتمت صوتي وماقدرت احكي لان عزيز يسمع اكيد ..
لكن دحقت فيه بحقد ..
ابتسم وقال ..
صايرة اليفة وماتحجين ..
محتاجج بشغلة ..
ماحبيت عزيز يسمع كلامو التافه غلقت الموبايل ..
وقلتلو..  اشنو عندك
عدنان .. مو هنا جوة ..
ترانيم ..  قولو هوني ماادخل معك ..
عدنان .. براحتج ساعتها انتي الي تنظرين ..
كان يفتح بالباب ويحكي ..
انت اشنو تريد منا ..
تركتو ورحت ..

مسكني من ايدي سبق وان گتلج اريدج انتي..
طاوعيني احسن الج وخاصه هسا بعد محد الج يعني اني اكون الج سند وظهر يحميج ..
سحبت ايدي منو وقلتلو .. هاكذ سند مااريدو.
ضحك وقال .. سمعت رحتو للشقه اكيد شفتيها المسرة مرتة .. هاي تحدى الكل واخذها يعني مستحيل يطلگها هاي طبعا اذا ماعندج مانع تتزوحين عن شرج فأني اولى ع الاقل راح ادللج ومااتركج ولالحظة .

ترانيم .. انت ماتفهم قلتلك لا لا والف لا .. لاانت ولاعزيز خليها ببالك .. انا مااتزوج ولاافكر ارتبط اتركني بحالي ارجوك ..

اتقرب ابتعدت عنو ..
صدگـي ماتخلصين مني ابليج بلوة واخليهم ياخذون نضرة عليج ويطردوج مستعد اسوي كلشي واخذج بالقوة..

مااتحملت رفعت ايدي عليه .. مسك ايد وخلى ايدوا على فمي ورفعنـي باليد الثانيه وانا احاول ابعدوا عني ..
لكن هو اقوى واضخم مني ..

حاول يدخلنـي للبيت لكن كنت اقاوم .. وهو كاتم على صوتـي ..
فتح الباب حاولت الهرب مسكنـي من شعري ..
وانا اصرخ حتى لينا ماتسمعني الملحق بعيد عن البيت
بكيت الاول مرة وانا عينـي للسما واتوسل بالرب يحميني منو ..

سحبني من شعري للبيت ..
وراح يقفل الباب ..
محد يسمعج هنا ويضحك ..
قمت من مكاني ومااعرف وين اهرب ..
ركضت للحمام وقفلتو..
وهو يضرب بالباب ويقلي ..
انتي الي وصلتيني الهيج اني مو طبعي هذا بس ماسمعتي كلامي .. ليش اني شنو بيه يختلف عن عزيز
ليش عيونج من تباوعله .. كلها حب ومن تباوعلي تحتقريني ليش ويضرب ع الباب ..

قلتلو وانا اصرخ لانو اشرف منك ومايوم لمسني ولو بنضرة ..
انت حيوان حيوان ..

اني اعلمج من الحيوان ..
كان يصرخ ويضرد بالباب وانا ابكـي من الخوف ..
كيف راح اقاموا اشنو اسوي ..

احميني ياامي العذرا .. الرب يساعدنـي .. انقذونـي من هذا الوحش ..
سمعت صوت الباب تندق ..
فرحت .. اكيد عمو ابو رماح ..
صرخت بصوت عالي ..
عمو ابو رماح انا هوني انقدونـي ..
الباب تتكسر اكثر واكثر ..

سمعت صوت عامر وهو يصرخ ..
افتح ولك حيوان افتح ..

قعدت وانا ابكي .
اسمعي ولج اياج تحجين شي .. والله ادمرج ..

راح وبعدها سمعت صوت عامر وهو يتعارك معو . 
اندقت الباب فزعت من مكاني ..
-اني هوني عمك ابو رماح افتحي بنتي ..
فتحت الباب وذبيت روحي الحضنو ..
وانا ابكي ..

عامر اغشع شكلي . قال ..
هاي شمسوي بيها .. اااخ لو مااخوي الجبير جان عرفتك شلون تتعدي على بنات بأمانتنا ..
ولك انت شنو .. حيوان ..

عدنان .. اتأدب ولك ولاتتجاوز .. الي سويته برضاها بس من سمعتكم خافت ودخلت للحمام ..

ترانيم .. كذاب كذاب لاتصدقوا الرب شاهد علينا هو الي طلب المفاتيح وحاول يعتدي علية ..

عامر مااتحمل ضربة .. ولك هاي شكل وحدة راضيه ..
عدنان رجعلو الضربه وحسيتهم راح يتقاتلو بسببي ..
وعمو ابو رماح حاول يبعدهم عن بعض ..
ومايقدر ..

ماعرفت اشنو اعمل .. ركضت للملحق وقفلت الباب عليه
وانا ابكـي ..
ليش ليش كل هذا يصير بية ..
اشنو سويت حتى اتعاقب هاكذ ..

قعدت لينا اغشعتني خافت .. اشنو بكي اختي .
مسحت دموعي .. وقلتلها لاتخافي حبيبتي اتذكرت امي .
لينا .. انتي ماتبكي قدامي حتى ماانقهر .. روحي اغشعي حالك بالمرايه .. انا اسفه اختي بعد مااقهرك اعرف انكي تتحملي وتصبري حتى مااتأذى ..
سامحيني ..

حضنتها وابكي ..
ردت اتصل على سراب تذكرت الموبايل وقع مني بباب المطبخ او بالمطبخ مااتذكر ..

اكيد عدنان ماراح يسكت وراح يقلهم كلام عني ويصدقوه
اندقت الباب..
صرخت .  منوووو
-اني عمكي ابو رماح افتحي ..
فتحت واشرتلو مايحكي لينا صاحية ..

اغشعت عامر اتقرب النا ..
مااعرف شأگلج مستحي والله .. بس هذا يتعمد يسوي هيج مااعرف ليش دومة اعوج ..
هو يحكي وانا ساكتة ..

ترانيم .. الظاهر فعلا وجودنا خطأ هوني ..
عامر .. لاتگولين هيج ليش منو دايسلجن على طرف وداعتج اخذلج حقج منه بس تخلص الفاتحة ..

ترانيم .. لو ماانتو الحقتو اشنو صار قلي .. اشنو صار ..
انا اقلك .. لو انا ميتة لو هو ..
لان مستحيل اخليه يلمسني وساعتها لو انا قاتلة حالي او قاتلتو ..

عامر .. عزيز جان حاس گلبه .. وطلب اخذ ابو رماح واوصله الجن لان وحدجن ..
يمكن يعرف بسوالف عدنان ..
-يعني عزيز الي اتصل بيك ؟؟
-اي هو ..
-عامر لاتقلوا شي..  هو بوضع مايسمح انه يفكر ويضوج عامر .. ماتعرفين عزيز .. حتى اذا ماگتله راح يبقى يشك مادام حس اكو شي غلط مايكذب احساسة..

واول وتالي لازم ابوي يعرف .. ويخلي حد اله ..
ابو رماح .. انا السبب ماكان لازم اطلع واترككم بهاكذ مكان وحدكم ..
وعد مااتركم لحظة..  بس لاتقهري نفسكي وادخلي اسبحي وارتاحي ..

استأذن عامر وراح .. دحقت سيارة عدنان ماموجودة معناه راح الرب ينتقم منو ..
اول مرة ادعي هاكذ على شخص ..

دخلت اسبح وانا اتخيل اشنو يصير لو مالحقوا ..
طلعت ادور على موبايلي ..
لقيتو عند عمو ابو رماح ..
قال اغلقتوا لان عزيز دق كثير وماقدرت ارد عليه واقلو شي ..

ولاانا قدرت افتحو وارد .. اتركتوا مغلق ..
لليل .. رجع عامر ومعو سراب ..
يمكن تعرف ..
اول مادخلت حصنتني وتواسي بيه ..

عامر .. گومن للبيت اني يمجن هنا وسراب ماراح تروح بعد للفاتحة . طلعنا حجة مالها خلگ ومريضه ..

يلة گومن ..
ترددت اقوم وحاولت ارفض لكن توسلات سراب ماخلتني اقدر ارفض ..
وعمو ابو رماح اشرلي الخاطر لينا ..
طلعت معاها ولينا ماسكة بيدي ..
دخلنا للبيت .
وانا اتخيل شلون سحبني من شعري ودخلني حسيت بشعور غريب . 
كرهت نفسي وجمالي الي صار لعنة بالنسبة لي ..
بكل مكان اغشع الي يدحق فينا بنضرات يشمأز منها البدن ..

خلينا لينا قاعدة بغرفه الجدة .. وطلعنا انا وسراب للمطبخ ..
مااتحملت وقلتلها كلشي ..
سراب .. الله لاينطيه .. عبالي عقل ونسى السالفه ..
ترانيم .. ليش انا شلون هربت وتركت البيت غير بسببو وسبب مرتو .  اصلا انا طلبت منها تساعدني وتهربني حتى اخلص من عدنان ومااسبب مشاكل ..
لو فعلا انا الي خليتو يتقربلي كان قبلت عرضوا وتزوجت بالسر .
لكن انا ماهاكذ ماهاكذ .
صحيح ✔ الدنيا عذبتني وسرقت احبابي واهلي مني لكن مستحيل ابيع نفسي وشرفي الاي احد ..

سراب .. كافي گطعتي گلبي والله گلبي حاس شردتن بسببه .. بس ماتوقعت هاي البومة تساعدجن ..
شلون ومنو اخذجن . 
ماكو غير احمد موووو ..

كان عامر واقف يتنصت علينا ..
دخل وهو يقول .  هسا تسولفلي كلشي .  وانتي حسابج بعدين سراب .
من شوكت وعدنان مخلي عينه عليها احجي ..

سراب حكتلو كل شي .. وهو يضرب بالباب ويتوعد ويهدد وكأنه عزيز قبالي ..
اذا عامر صار بي هاكذ عزيز اشنو يعمل ..
ترجيتو مايقول العزيز ..

عامر .. كافي ترانيم ..ماتصورت هيج ضعيفه .  الي اعرفه انتي ماتخافين شلون تسكتين وتخليه يتمادى ..
ترانيم .. انا موضعيفه ولاخايفه .  انا فقط حاولت مااهدم البيت الي اواني وحافظ علينا انا واختي ..
ماحبيت يصير بينكم مشاكل بسببي ..
وحتى سراب انا الي طلبت منها تسكت ..

عامر ...هذا من يوم الي عرف تسودن علينا وعبالك صرنا اعدائة الله لاينطيج ياايمان ..

ضرب الباب وراه وطلع ..
هسا اجي اقفلن الباب ..

راح ومارجع الا لليل ..
قال اتصل عزيز وسألني ليش ماتردين گلتله لينا اتخربطت واخذناها للمستسفى ..
خاف يخابرج ..
ولو هو شك وربط جية عدنان والكلام الي سمعه بينكم
وبعدها انغلق الخط ..
بس گتله ماكو شي اجينا لگينا عدنان ماخذ ملابس وطالع وترانيم يم لينا متخربطة بالملحق واخذناها بسرعه للمستشفى لكن اكيد ماعبرت عليه ..

لليل فتحت موبالي .. لقيت مكالمات كثير ورسائل ..
دقيت عليه رد بسرعه ..
وينج ليش هيج قلقتيني ..

ليش عامر ماقلك لينا مريضه. 
اي گالي بس مامقتنع .. عدنان شعندة وياج
اشنو تقصد . ؟؟
ترانيم اني مو طفل الحجي الي سمعته خلاني استغرب شنو الي بينكم حتى يتجرأ ويگلج هيج ..
ترانيم .. عزيز اشنو بيني وبينو .. اوعى على كلامك ..
عزيز .. هاهي براحتج .. يله في امان الله ..
وغلقه وهو ضايج ..
وكأنه يلوم بيه .. اشنو بيدي وانا الدنيا ضدي ..
كلما اقول انفتحت الابواب بوجهي الاقيها تنغلق اكثر واكثر .
اااااه ياامي اااااااه ليش تركتينا محتاجتكـي اكثر من قبل
صعدت لينا .. اختي ليش احسك مهمومة اشنو صاير قوليلي ..

ترانيم .. ماكو شي حبيبتي لاتتقهري ..
لينا .. اكيد اشتقتي الامـي مثلي ..
ترانيم .. ليش هو انا متى مااشتقت الها .. صورتها ماتروح من بالي ابدا ..
لينا .. ليش مااخذتي صورة الها مشتاقه كثير ..
سكتت عنها ومااعرف اشنو اقلها لو اغشعت الصورة الي عندي كانت خافت وانرعبت اكثر ..

اخذتها الحضني ونمنا .. مع انه خايفه من عدنان لايطلعلي بأي لحظة ..

لااكيد مايرجع بعد .. هوني عامر وعمو ابو رماح ..
وسراب ..

للصبح قعدت لقيت سراب بالمطبخ ..
-ها گعدتي رنوم .. شفتج تعبانه ماردت اگعدج ..
وابوي اجة بليل لهنا وراد يحجي وياج بس گتله نايمة اجلها ..
ترانيم .. ليش قلتولوا اكيد راح يصدق عدنان ..
سراب .. لا مستحيل ابوي مو من هذا النوع ولاتنسين اكو شهود عامر وابو رماح ..
واني هم سولفتله الي سواه بيج قبل هو ومرته ..
وشلون هربتج حتى تخلص منج ..

ترانيم .. اااااه اكبر غلط انه رجعت هوني .. كان لازم ابقى عند عمو ابو رماح بالحسينيه ..
سراب .. باعي رنوم انتي ماالج ذنب .. راح اگلج شغله ومنها تعرفين ليش عدنان هيج تصرفاته ..

ترانيم .. فعلا بودي اعرف ليش هاكذ يعمل ويغار من عزيز ..
سراب .. بس اوعديني هالسالفه تبقى سر بينا ..
ترانيم .. وعد .. لكن اذا تحسي فيها خطر لاتقولي ..
سراب .. لا هي الكل يعرفها اصلا ..
ابوي جان يحب وحدة قبل لايتزوج بنت عمة الي هي امي ابوه الشيخ اقصد جدي منذر ..
خطب امي الة .. وجبرة عليها ..
بس ابوي يحب ذيج البنيه .. هي يتيمة وبنت فلاح عندنا جان ..
جدي من شاف ابوه مصر يخطبله بنت عمة وهددها يفصله من العشيرة اذا نزل كلمتة ..
راح واتزوج الي يحبها عقد سيد بس ومحد يعرف هالشي بس عمامي وعماتي ..

جدي انجلط وتمرض مااتحمل ..
رجع ابوي بعد ماجدي تمرض ..
وصار امام الامر الواقع .. وتزوج بنت عمة ..
مرتة ذيج .. تمرضت وهي حامل من القهر بعد ماابوي گطع بيها .. ويجي بالسر بسبب جدي الي جان رافض زواجهم وشرط عليه يطلگها بس ابوي ماطلگ..
وبقى وياها الى ان ولدت عدنان وماتت ..
دفنها ورجع للبيت وبيدة عدنان ..
امي ماقبلت تتكفله بعد ماابوي سولفلهم السالفه وانه امة ماتت ومابقاله احد غيرة ..
بس جدتي گالت لا .. يبقى ويتربى هنا ويتسجل بأسمج سواء رضيتي او لا ..
ومحد يگلة هو ابن بنت الفلاح ..
راح ينعرف هو ابنج ..
امي شويه شويه كام يكسر خاطرها وبدأت تعتني بي وتداريه الى ان تعلقت بي ..
ربته وتعبت عليه ومافرقتة عن واحد منا ابد وانتي تشوفين شلون تعزة ..

هالسر محد يعرف بي حتى احنه ..
الى ان خطبو عدنان الايمان ..
ايمان سامعه السالفه من امها وراحت گايلتله على كلشي ..

هو تخبل واجة واجه ابوي وجدتي وامي ..
امي تبجي وتگله انت ابني اني ربيتك بس هو نكر كل رباتها وگالها بس ماحبتيني مثل عزيز ..
ولاسويتوا الي مثل عزيز ..

ومن هذا اليوم اشتعلت نار الغيرة بين عدنان وعزيز وصار يكره عزيز وكأنه منافس اله .
وشنو يريدة عزيز هو يگول اريدة يعني بالمختصر يتحجج على اقل شي .

ترانيم .. مو مصدقة ابدا .. لو قالولي هذي حكايه مااصدق .. معقوله .
صح هو انحرم من امو لكن الله عوضوا بأمكي والكل يحبو .
يمكن يحس انه غير مرغوب فيه . احساسو صعب ويحتاج وقت حتى يتأقلم ..
هسا عرفت ليش دايما يقارن حالو بعزيز ..

ااااه سراب كل واحد همو شكل ..
سراب .. عوفينا من هاي السالفه .  ماگتلج ابوي راح ينصبوه شيخ بعد جدي ..
العشيرة كلها اختارتة ..

ترانيم .. يستاهل هو شخص محترم وعادل الرب يوفقو
سراب .. اي بس وياي لا ..
ترانيم .. لسا ماكو خبر منو ..
سراب .. ابد من يوم الي گال انتي تخليتي عني وتمشين ورى اهلج بعد ماعرفت شي عنه ..

يعني شيريدني اشرد من اهلي واسود وجههم .  لو اموت مااسويها وانزل راس ابوي واخواني . 
لو يحبني ينتظر ويصبر مو يتخلى .

ترانيم .. لو اتخلى فهو مايستاهلك .  المهم انتي وفيه الو والرب يساعدكم وتتخطوا هالمحنة ..

مر كم يوم والكل رجع للبيت بعد ماصار عمو قحطان هو الشيخ ..
عمل عزيمة كبيرة وعزم الشيوخ .. بيومها اجة عزيز .
اول مااغشعني كان وجهو ثقيل ..
سلم ع الكل وحتى لينا وتركني وصعد ..

حسيت اكو شي .. او عدنان وصلوا كلام خلاه هاكذ يدحق بيه ..
معقولة عدنان بسبب طرد عمو قحطان الو هاكذ عمل وشوه صورتي قدامو ..

تذكرت الي صار من يومين ..
دخلت سراب وقالت ..
ترانيم اجو اهلي كلهم وابوي يريدج جوة ..
نزلت سلمت ع الجدة ..
الخالة ام عدنان مو معهم ..

عمو قحطان .. بوية ترانيم ابقي هنا .. وانتي سراب صيحي عدنان وتعاي ..
البقية اطلعوا ..
عامر انت ابقى ..

قعدت وكأني قاعدة بمحكمة ..
وجهو مايتفسر ومالي الغضب عينو ..
قال .. بوية والله مستحي منج ومااعرف اودي وجهي عنج .. لجن احنة مو من شيمنا نخلي عينا على امانه عدنا وانتي والله حاسبج مثل بناتي انتي واخيتج ..

الهيج ماقيدتجن وخليتجن بالبيت وي ولدي واهلي ..
لان اعرف تربيتي ماتخطي ولايخلون عينهم على عرضهم ..
والي صار من عدنان وبعد ماسمعت من عامر وسراب وعمج ابو رماح خلاني اخلي راسي بالطين ..
اني صرت شيخ والناس تشهدلي بعدلي وتالي هيج يصيو ببيتي ..

ترانيم .. لكن انت مالك ذنب .. انا المفروض ماكان ارجع بعد الي صار..
الجدة ..  ليش ماگلتي بوكتها ونكسرلج راسه .. والله عرفت اكو شي ورى طلعتجن ..
بس مااتوقعت هالساقط هيج يسوي ..
ومرته واحمد حسابهم بعدين ..
ترانيم .. عمي اغلقوا الموضوع .. انا واختي راح نغشع مكان ونعيش فيه وانا اشتغل ونعيش ..

قحطان .. لا بنتي انتي واختج گلتلجن ماتطلعن الا للموصل بعد التحرير ..
الي يطلع هو الي ماعرفت اربيه والي دللناه وگلنا مكسور خاطر تالي تمرد ..

دخل عدنان وكان يدحق بنضرة غضب ..
شتريد بويه ..

قحطان .. تعرف شأريد لو شمااحجي وياك مايفيد الحجي ..
اخذ مرتك واطلعوا من البيت .. الابن الي مايصون عرضي وراي مو ابني واتبرأ منه ..

عدنان .. يعني تصدگها وتجذبنـي .. ذاك اليوم اجت وخربت بيتنا .
هي الي غوتني واني رجال صدگت بيها وعبالي صدگ تحبني .. هي لو شريفه ماطلبت اتزوجها بالسر..

ترانيم .. كذاب .. كذاب .. هو الي طلب مني ..

اتقرب بأتجاهي . مسكو عامر .. وابوه ضربو ..
اطلع من بيتي بسرعه شوكت ماتنعدل وتعرف خطأك بعدها گول عندي خطأ ..

عدنان .. هسا گمت تحجي بالاخلاق والشرف . 
ليش من عفت امي ورحت تزوجت ماگلت اخلاق وشرف
قحطان .. تأدب ولك .. ماتركتها الاخر لحظة .. وامك هي الي ربتك وتعبت عليك .. بس الحقد تارس گلبك وماغزر بيك الربا ..
اطلع عدنان لااخلي طلقه براسك ..
فضحتني ولك اطلللللع ..

صار صراخ وضرب وطرد ..
وانا الوم بنفسي .. لو ماتجينا هوني ماصار الي صار..

طلع عدنان بسرعه وايمان تسب وتغلط وتقول . 
تبيع ابنك عمي علمود هاي…… ..كم مرة شفتها وحذرتها بس صوجي مافضحتها بذيج الليله الي شفتها تغويه بالمطبخ ..

بقيت مصدومة على كذبها وافترائها ..
سراب .. كافي ايمان .. لو صدگ جان فضحتيها مو هربتيها وخفتي لاصدگ عدنان يتزوجها ..

قحطان .. عبالي بنت اخوي تصونين بيتي ومثل بناتي طلعتي حية والتفيتي علينا ..
عدنان لو ماانتي ماجان صار هيج ولااتغير ..
بس لاتصدگين تقرين براسه راح يبقى الج وگولي عمي گالها ..

ايمان .. اني طالعه وخلي الغربه تفيدكم ..
صعدت جمعت اغراضها وطلعت. 

البيت صار عبارة عن مشاحنات وكلام وصراخ ..
ماهمني الا لينا الي واقفة ع الدرج وسمعت كلشي ..
اعتذرت منهم وصعدت الها ..
لينا
-اشنو اختي .. ليش انا اخر من يعلم دائما كلشي يصير بحياتي انا اقلك .. ولما اسألك اشنو فيكي ماتقولي ..
-حبيبتي غصب عني صدقيني مو بيدي .. ماردت اخليكي تنقهري وانتي اصلا مقهورة..
-انا كرهت الدنيا كلها .. الكل يخدع ويحقد ليش هاكذ صرنا ليش ليش ..

-هي هاي حياتنا حبيبتي مو كل الناس زينة ولاكلها سيئة -لكن انا تعبت اختي .. خلينا نعيش بس انا وانتي . 
بعد الي سمعتو قمت اخاف حتى من علي لما يمزح معاي ويضحك ..
-لا حبيبتي علي مثل اخوكي لاتشكي فيه وهو طيب كثير
بالقوة قدرت اقنعها انه الناس مو كلها متشابهة بالطباع والتصرفات ..
حياتنا عبارة عن تجارب ..
بكل مرحلة النا تجربة ولازم نخوضها وننجح فيها ..
واذا رسبنا مو معناها نهاية العالم ..
لازم نقوم ومانتوقف ونستمر حتى ننجح ..

لكن حياتي تجاربها صعبه .. وبكل مرة اخسر فيها مع ذلك ماقطعت الامل امه بيوم انجح واجتمع ما ابي واخي ونعيش سوى ..

الرجوع للحاضر ..
لما اغشعت تصرفات عزيز معي .. بقيت افكر واسأل نفسي الاف الاسئلة ..

الكل مشغول بالمطبخ مع انه ام عدنان وعماتو مايحكو معي ومصدقين انا السبب ويحملونـي مسؤوليه طرد عدنان ..

ماانكر انا نفسي حزنانة ع الي صار ..
علاقه عمو قحطان بأخوه ابو ايمان خربت ..
لكن اشنو ذنبي اذا عدنان حاول يعتدي عليه وماصان الامانه الي عندو ..
كم مرة قلتلهم نروح من هون ومقبلوا حتى الجدة قالت
مااحجي وياج ولااعرفج اذا فتحتي الموضوع بعد ..

طلعت من المطبخ ..
نزل عزيز لابس دشداشه ودخل للاستقبال من غير مايحكي كلمة ..

انا ولينا قاعدين عند الجدة بالغرفه ..
بقى ساعة ..
وطلع ..
اجة الغرفه الجدة ..
قعدوا يتهامسوا بالكلام ..

والي عرفتو انه بعد الغدا عمامو يريدو يصالحو عدنان مع ابوه وعمو ابو ايمان هم يجي ويتناقشو ..
والجدة تقلو .. اذا اجو اريدك تهدأ مانريد ننفضح بين العالم ابوك شيخ والعيون صارت عليه خلي كلشي ينحل بالهدواة…
واني هم راح احظر الجلسة ..
مااعرف ليش قلبي نغزني وحسيت بخوف ..
وخاصه لما سمعت عزيز يقول ..
اذا اجة اكسر راسه .

طلع من الغرفه معصب .. وصل للباب التفت واشرلي براسو .
صعد وانا بقيت بمكاني ..
اشنو اعمل اروح او لا ..
شلون اروح والبيت كلو ناس ..
وعماتهم وبناتهم اشنو يقولو لو اغشعوني صاعدة بعدو

بقيت قاعدة وماقمت.  
اجت رساله الموبايلي ..
فتحتها ..
كاتب .. اذا ماتجين انزل اصيحج گدام الكل ..

استغربت هذا شلون يحكي معي هاكذ ..
صعدت بخفيه ..
دقيت الباب فتحها ..

وانا واقفة قلتلو ..
البيت ملينا ناس ماناقصني كلام اشنو تريد ..

-والله وخايفه من حجي الناس مووو
-اشنو تقصد انتبه الكلامك ..
-انتي الي انتبهي التصرفاتج لو ماسكوتج عنه ماتمادى بس لان سكتي تصور انتي راضيه وتتدللين ..
-عزيز احترم حالك شلون تحكي معي هاكذ ..
صوتج واياج تتجاوزين .. النار الي بداخلي اطلعها بيج قبل لااطلعها بي فاهمة ..
ادخلي بسرعه خلي احجي العندي ..

دخلت غلق الباب ..
باعي ترانيم حسابج بعدين شگد گلتلج سولفيلي ماحجيتي واني من يوم الي گالي عامر لسا احس نار شابه بيه وجازفت ونزلت بسببج. 
عدنان اني اخذلج حقج منه ..
بس هيج ماراح تخلصين والناس ماتسكت ..
لازم نخلي حل ونسكت الحلوگ ..

ترانيم .. واشنو رأيك الحل ..
عزيز .. تتزوجيني ..

هو قال هاكذ وانا بقيت مصدومة .. هذا اشنو يتوقعني يخلص عدنان وهسا هو ..

ضحكت بسخرية وقلتلو .. وليش تعتب على عدنان ماانت مثلو ..

ضرب ع الطاولة بقوة وقال ..
لاتقارنيني بي فاهمة .. اني اريد احميج من الناس ومنه لو بيدي كتلته بس هذا اخوي ..
لكن اذا صرتي بذمتي محد راح يحجي ..

-اممممم قصدك مثل مسرة ..
-مسرة شنو ؟؟ منو گلج ..
-مو مهم منو قلي المهم اني مستحيل اكون مثلها وانت مامجبور تحميني ..

لااهلك ولاتقاليدك ودينك يسمحلك ترتبط بيه ..
ولا انا راح اسمح اكون مثل ماتتوقع انت واخوك ..
للاسف كنت اتصور انت ملاذي واماني لكن ماتفرق عن غيرك ..
انا بس تهدأ الاوضاع راح اخذ اختي ونروح من هوني واشتغل ونعيش ..

حاولت اطلع صار قدامـي ..
انتي غلطانه .
افگس عيوني اذا تباوعلج بغير نضرة .
شوفيهن زين ..
ولج اني اخاف من عيوني عليج ..
وانتي تقارنيني بعدنان ..
لو تقارنين نفسج بمسرة ..
مسرة مايربطني بيها شي مثل الي يربطني بيج ..

-ليش اشنو الي يربطنا استاذ عزيز ..
-جبروتج وعنادج وقوتج هاي الي تربطني بيج .. من سمعت صح ضجت وانقهرت بس گلبي مابي اي شك اتجاهج لان صرت اعرفج اكثر من روحي ..
شوكت تحسين وگلبج الظالم يحن ..

-عزيز ..
-گولي
-مااقدر .. انا طريقي كلو عثرات يكفيني اقوم واقع الوحدي ..
مااقدر اجازف وادخل فيه مع شخص ثاني .. اذا وقعت معاه ماراح اقدر اوقف مرة ثانيه ..

-مااريد اكون استغلالي واجبرج .. بس صدگيني المصلحتج والحمايتج ..
اليوم عمامي يجتمعون .. خلينا ننهي كلشي ..
-مسرة تحبك تعرف ..

-مايهمني وسبق وان گلتلها واصلا حجيت وياها وطلبت ننفصل وتشوف حياتها وگلتلها الشقه والصالون يبقن الج يعني ماكو شي بعد يخليج ترفضين ..
واذا مامتأكدة من مشاعرج ماراح اضغط عليج .
فكري او اعتبري هاي فترة خطوبه منا لمن يهدأ الوضع وصدگي ساعتها احترم قرارج لو مهما يكون ..
تركتوا وطلعت من غير مااقول اي كلمة .
ماانكر اكو مشاعر متجهة ناحية عزيز بس خايفه الدنيا علمتني مااثق ..
خايفه ليكون حالي من حال مسرة ..
او اتندم على اختياري العمر كلو ..

بين عقلـي وقلبي . متاهات وماكان مني الا اخذ رأي سراب هي الوحيدة الي تفهمني ..
وكان ردها ..
-مااگلج طريقج سهل .. وراح تعانين .. بس ع الاقل راح تصيرين بحماية عزيز ومحد يگدر يدوسلج ع طرف ..
ترى عزيز يحبج بس هو مو من النوع الي يظهر مشاعرة
ومثل ماگالج اعتبريها فترة خطوبة وحاولي تتقربين منه اكثر ..
-وهسا اشنو اسوي ..
-خلصوا غدا وراح يگعدون .. دزيله رساله وخليه ياخذلج حقج ويرجع كرامتج ..
بدون تفكير .. كتبت رسالة وقلتلو .. موافقة ..
وكان هذا قراري لبداية جديدة ولطريق جديد بحياتـي ..

#بقلمي_الكاتبة_شمس
يتبع… .

حبايب لاتنسوا التصويت بلنجمة