مساء العسل حبايب 💕

///// البارت الحادي عشر /////

#بقلم_الكاتبة_شمس

( شمس السعـدي )

********* #ترانـيــم ***********

هل سنتمكـن يومـا من جمع أجزائنـا وكأن جوفـنا وخارجـنا لم يتجزأ !!

رفعت راسي لعزيز وقلتلو .. شلون ماتت واشنو سبب الوفاة ووين كانت كل هذي الفترة قلـي ؟؟

-گومـي اگعدي هنا ع الكراسي وانطيني المستمسكات اسوي شهادة الوفاة ..

كنتو مااسمع اشنو يقول ولاواعية .. كل تفكيري عند امي وشكلها الي اغشعتها فيه ..
اشنو راح اقول للينا .. وانا ماقبلت تروح معانا تغشعها.  اكيد ماراح تسامحني طول حياتها ..

اااااه ياامي اااااه ليش تركتينا .. ليش ماانتضرتـي يوم واحد كان اغشعتكي وسمعت صوتكي ..
ليش ياااامي ..
اشنو الي صار ووصلكي الهاكذ حالة ..

بقيت مصدومة واحس دموعي عاندوا ومايقبلوا ينزلوا بس الانين يطلع مني وانا اتخيل اشنو صار بيها وشلون عاشت من دونا .
ياقلبي ياامي اكيد قتلك القهر علينا وكنتي تتوقعي انهم اخذونا او اغتصبونا او قتلونا.  
بقيت قاعدة واتكلم وحدي .. عزيز طول وانا عيني ع المكان الي فيه امي ..
تبعدنا امتار ومانقدر نضن بعضنا .. ولا نغشع بعض ..

بين حسراتـي واهاتـي وذكريات نسيت انا وين وليش هونـي قاعدة ..

فزعت من صوت عزيز وهو يقلي ..
كملت كلشي .. وخابرت جماعه منا يساعدونا بدفنها ..

-امي لازم تتغسل وتندفن ع تقاليدنا .. لازم نروح للكنيسه ونصلي عليها ..

-لاتشيلين هم .. انـي مااعرف بهاي السوالف .. بس الجماعه الي خابرتهم راح يتكفلون بكلشي .
راح اجيبلج مي واجي ..

راح واجة وانا مثل الجثة كل روح مابيه ..
-هاج اشربي شويه مايصير هيج .. ترى تعذبيها ..
دحقت فيه وقلتلو .. هذي امي امي . لو انت بمكاني اشنو سويت ..
قلي .. شهور وانا ناطرة خبر منها .. ولما تقرب لحظة لقائنا القاها ميتة ليش ليش ؟؟

فقدت وماسيطرت على حالي .
-اشششش كافي مو هيج .. منا مستشفى خلي تندفن واشبعي يمها بجي . 
بس انتي هسا لازم تدعيلها بالرحمة وتقرأيلها شي .. مااعرف انتو شلون عندكم ..
بس ع الاقل ادعي ..
-محتاجة البس اسود .. مااريد ادفن امي بملابس الوان ..
-مااعرف راح اطلع اشوفلج محل شي .. عادي اجيبلج صايه سودة ..
-هزيت راسي .. اي شي ..

راح ومارجع الا بعد ساعه .. بأيدو كيس ..
وقال .. روحي للصحيات البسي ولو مااعرف قياسج . 
لان الجماعه وصلوا حتى نروح ..

رحت للحمام بدلت ولبست شال اسود وطلعت ..
دحق بيه وقال ..
مو احسها ضيگة شوية لو ادري جايب اعرض ..

بقيت ادحق عليه بأستغراب .. انا مقهورة وهو يفكر بالملابس ضيقه او عريضه ..

لما اغشعني ادحق عليه .. قال .. يلة خلينا نروح مو مهم طلعنا امي من الثلاجة واخذناها ..
رحنا غسلنا جسمها بأيدي .. كان جسمها تعبان وكأنه ناشف من الدم وجهها اصفر .. وشفت اثار عملية ببطنها استغربت ..
والشك اكل قلبـي ..كملنا ورحنا للكنيسه وبعدها كملنا مراسيم الدفن كلها ..

عزيز اتكفل بكلشي والمصاريف حسيت بالثقل الي سببتو الو ...
راح اعتبر كل هذا دين اردو لما اشتغل ..
يمكن هذا قدرنا كل واحد منا يندفن بمكان ..
حتى اخي وابي .. مااعرف ان كانو ماتو او لا

بقيت عند قبرها ابكـي .. وموبايلي ماسكت ابدا .
صار العصر ونحنا ماخبرناهم الي صار ..
عزيز .. لازم نطمنهم لايبقى بالهم ..
ترانيم .. بس لايخبروا لينا ماتتحمل وانا ما يمها ..
عزيز .. راح اخابر سراب واوصيها لاتخافين ..

رجعنا على بغداد .. واحس نفسي كبرت سنين ..طول الطريق ساكته حتى عزيز حاول يأكلني واشترى اكل مااكلت ..
ماقدرت .  ببالي امي وشكلها والعمليه الي بجسمها .
التفتت على عزيز وقلتلو ..
عزيز امي اشنو سبب وفاتها ..

كان يسوق ..
-هااا هذا قضاء وقدر بعد شلج بالسبب ..
-عزيز قلي انا شفتها لما غسلنالها جسمها مو طبيعي وعندها عمليه ببطنها ..
-عمليتيش يمكن من زمان مال ولادة لو شو شنو ..
-عزيز انا مو طفله امي ولدتنا كلنا طبيعي .  وهذي عملية جديدة ولسا اكو خياط . قلي الحقيقة .. ولا اقلك عطيني شهادة الوفاة اغشعها .

وقف السيارة ودحق بية ..
ترانيم اني مااريد اضوجج انتي ليش مصرة تسوين هيج بنفسج . شتحصلين اذا عرفتي راح تتأذين اكثر ..

-خلينـي اتذى المهم اعرف وارتاح .
-طلع تقرير الوفاة وقلي ..
- هاج شوفيه .. بس لاتطلبين تفسير
فتحتو .. مكتوب السبب نزيف حاد بالرحم واثناء الاستأصال توفت ..

بقيت مصدومة .. اشنو يعني اشنو سبب النزيف ..
-ادري بيج ماترتاحين اذا ماتعرفين كلشي .
امج متعرضه لاغتصاب حاد .  وضرب وعنف ..
گدرت تهرب مع ناس مساعديها وموصليها للمخيمات . لهذا اثبت اسمها جديد هنا وگدرنا نعرف مكانها ..
بس هي مااتحملت وماراحت الطبيب او مستشفى اول ماحست بألم بقت تكابر الى ان زادت حالتها سوء ..

هو يحكي وانا اتخيل شكلها وحالها وهي تتوسل فيهم يتركوها وهم بكل وحشية يغتصبوها ..
ويضربوها .. ضيعوا ملامحها الجميلة .
امي كثير حلوة وصغيرة الي يغشعها يقول اختي موامي ..
وهسا شكلها كأنه كبرت سنين بهذي الاشهر ..
حسيت نفسي راح استفرغ من الي تخيلتو..
شلون قدرت تتحمل كل هذا الالم . 

وقف السيارة عزيز .. وقفها بسرعه .
نزلت استفرغت .. عطاني ماي .. غسلت وارتاحيت
مااتحملت ابكي مايفيد البكي ..

قمت اصرخ بلا وعي واضرب اي شي قدامي واسب واغلط ..
يامجرمين ياحقراء .. ليش ليش حرمتوني من امـي .
فقدت ساعتها وانهاريت .
وعزيز يحاول يهدأ بيه وانا مو بوعي ..
الى ان صرخ بوجهي بقوة ..

كاااافي اهدي فضحتينا ..
نزلت دموعي .. فضحتك .. لك هاي امي امي . لو امك عملو معها هاكذ اشنو تسوي اشنو تسوي ..
دفعتو وابتعدت عنو وعن السيارة ..
مشيت ومااعرف وين .. وهو يمشي وراي ..
ترانيم لاتصيرين طفله ارجعي ..
التفتت .. اتركني عزيز انت مو حاس بالنار الي بقلبـي

سحبنـي من ايدي حيل .. بحيث قربنـي منو كثير ..
كانت عيني تدحق بعينو ودموعي ينزلو ..
ماقدرت احكي لكن عيوني حكـو ..

-وداعتج اخذلج بثارها .. صدگـي مااخلي داعشي حي . اني راح التحق وكل يوم اصورلج راس واحد بيهم ..
مااخلي واحد بيهم يرتاح هالانجاس ..
بس اهدي اثنينة تعبانين ورانا طريق وتعب .. مايصير هيج تسوين فكري بلينا ..
صيري قويه الاجلها . 
وامج راحت للارحم منا كلنا ..
هو الي ياخذلها حقها ان شاء الله..
يلة تعاي صعدي ..

تركتو من غير مااحكي ورحت للسيارة صعدت ..
بقيت ساكته لكن قلبـي فيه نار ماتنطفي ..

وصلنا بالليل البغداد ..
-اليوم راح نبات هنا وباجر نرجع ..
لان اجازتي خلصت ولازم التحق ..

كل هذا وانا مااحكي اي شي .. مالي خلق للكلام ..
وصلنا للشقه..
فتحت الباب مسرة .. وكانت مستغربه حالي .
-شبيج شصاير ..
عزيز .. طلعيلها ملابس خلي تسبح . وترتاح ..
دخلت للحمام وقعدت ابكي وابكي لما ارتحت ..
سبحت وغسلت ملابسي وجففتهم ..

طلعت من غير مااقول اي شي .. دخلت للغرفه نشرت ملابسي وتغطيت ونمت ..
من التعب والتفكير التجأت للنوم حتى انسى ..

قعدت من الصبح .. اخذت ملابسي بدلت ورتبت شعري ..
اغشعت لوجهي بالمرايه .. احمر وبقع زرق لما ضربت ع وجهي لما اغشعت جسم امي ..

طلعت لقيت مسرة بالمطبخ ..
قلت صباح الخير ..
كان عزيز نايم بالصالة.. 
مسرة . . صباح النور .. البارحة ماگدرت اگلج البقية بحياتج . 
ترانيم .. شكرا ..
مسرة .. عزيز هم تعبان خطية سبح ونام ولسا ماگعد حتى للصلاة ماگعد. 

هي تحكي وانا غسلت وقعدت افكر اشنو راح اقول للينا
مسرة .. انتو هم تلبسون اسود .
ترانيم .. كل شخص وعاداتو .. عندنا بس وقت الدفن . لكن هذي امـي شلون ماالبس ..
مسرة .. وهسا وين ترحون راح تبقون ببيت عزيز
ترانيم .. مااعرف هسا ماافكر بس بأختي وشلون راح اخبرها ..

مسرة .. شلون ماتت ..
-ذكرتنـي وانا اريد انسى ..
غيرت الحديث وقلتلها .. راح اقوم اصحي عزيز .

مسرة .. لا انتي ارتاحي .. اني راح اگعدة واذا تحبين ابدي بالريوگ والجاي هذا يمج .
راحت تصحيه وانا بقيت ادحق بالاكل احس شهيتي مقطوعه مااقدر اكل .

دخل عزيز ومسرة بعدو ..
صباح الخير .. شلون صرتي ..
سحب الكرسي من الطاولة وقعد قبالي ..
ليش مسويه هيج بوجهج .
يله هسا من نطلع نشوف من اي صيدلية كريم لو شي تخليه ..
مسرة .. ليش مكبرها هو يروح وحدة ..
عزيز .. يله انتي تريگي من البارحة مااكلتي شي . حتى نروح ..
مسرة .. ابقى اليوم هنا .  اقصد ابقو .  لان شكلها تعبان ولازم ترتاح ..

دحق فيها وقال .. لا هناك ترتاح عند اهلي احسن واختها تحتاجها..
راح غسل وقعد ياكل .  صب شاي الي ..
-ع الاقل اشربي بس جاي ..
اخذت الشاي ومسرة تدحق بيه وكأنها ضاجت من اهتمامو ..
وهو عمل لفة صغيرة وقلي اكلي بس هاي الخاطري ..
اكلت شويه وتركتها وقمت .. مااقدرت اكمل ..
استأذنت وقلتلهم .. دايمة لكن اروح اجهز نفسي حتى نطلع ..
دخلت للغرفه قعدت ع السرير وانا افكر شلون راح اقضي العمر بهذا الم ..
حتى الابتسامة الي كنت احارب الناس فيها وابين نفسي قوية .. اختفت ومابين الا الحزن والانكسار ..

دخلت مسرة .. ترانيم ولو وضعج مايسمح .. بس حاستج تتدللين هواي على عزيز . وتحاولين تقربيه منج ..
لاتنسين احنه متزوجين وعندي امل يصير الي ..

رفعت راسي الها وقلت .. مسرة انتي شلون تفكري . انا بأي حال واتدلل ..
لاتخافي ماكو شي من الي ببالكي ..

-اي ادري لان اعرف مستحيل تنجمعون انتو مختلفين بكلشي وحتى اهلة مستحيل يوافقون بس حبيت انبهج خاف تنصدمين ..

قمت من مكاني وقلتلها .. اروح اغشع عزيز اذا كمل .  وانتي شكرا الك لحسن ضيافتك ماقصرتي معي ..

طلعت .. لقيت عزيز منتضرنـي .
-يله كملتي نروح ..
-يي
-مسرة محتاجة شي..
-لا مشكور مامقصر وياي انت ..

طلعنا وهي صاحت وراه .. عزيز بس اريدك بشغله
رجع للشقه وانا كملت طريقي ونزلت ..
نزل وراي بسرعه .. فتح السيارة وصعدنا .
كملت طريقنا كلو بصمت ماحكيت ولاكلمة…
كل الي ببالي امي ولينا شلون راح اقابلها ..

الطريق طويل والتفكير صعب .. احس وكأنه حجرة واقفـة بقلبي ..

عزيز .. جوعانة ؟؟ اخذلج شي تاكليه ..
ترانيم .. ماجوعانة .. بس اذا ممكن ماي ..

نزل اشترى ماي من الطريق وصعد ..
كملنا طريقنا بعدها قلتلو ..
عزيز مااريد احد يعرف امـي شلون ماتت .. وخاصه لينا
لينا حساسة ويمكن ماتتحمل وتنهار ..
عزيز .. لاتوصين حريص انتي لو ماتعاندين هم مااگلج ..

رجع الصمت بينا ..
هو ابدا ماضغط عليه او تكلم ..
صار الظهر وصلنا البيت ..

دخلت وانا احمـل خيبات الامل وآهاااات القلـب وحسراته
لاقتنـي سراب .. بكت وحضنتني مااتحملت وقعدت ابكي في حضنها محتاجة احد يواسيني وابكي بحضنو. .
طلعت من هونـي فرحانة وكـلي امل القاها رجعت فاضية اليدين ..
وخسرتهـا للابد ..
سراب .. سودة عليه لسا اتذكر شكلج من طلعتي شلون فرحانه وهسا شصاير بيج ..
عزيز .. كافي خليها تدخل ترتاح ..
مسحت دموعي وقلتلها وين لينا ..
سراب .. لينا فوگ نايمة .  البارحة تخربطت من سمعت ..
عزيز .. وليش گلتولها ..
سراب .. مو احنه هاي ايمان .
عزيز .. وينها ايمان ماتبطل سوالفها وگام يصيح ..
صحت وراه .. عزيز اتركها اول وتالي لينا تعرف ..

دخلت الصاله بعد ماالكل طلع على صوت عزيز ..
قدمولـي التعازي وعمو قحطان قال ..
-بوية منا وجاي انت بناتنا وماتطلعن منه الا ع الموصل بعد التحرير ..

والجدة حضنتني وتبكي معـي ..
كلهم يسلمو وانا بالي عند لينا ..
الي سمعت صوتنا ونزلت تركض ..
وهي تصرخ .  ليش مااخذتوني معكم ليش . 
ليش ماتت ومااغشعتها ليش ..
ترانيم بحياتي ماراح اسامحك .  انتي الي ماقبلتي اروح انتي ..
رحت العندها واخذتها الحضنـي لكن بقت تصرخ وتدفع بيه وتقلي .. مااسامحك مااسامحك .  كان بودي اشمها وابوسها قبل لتغادرنا ..

بعدها رمت نفسها بحضني وقعدنا نواسي بعض .
-اشلون شكلها بعدها حلوة لو تغيرت من قهرها علينا . اكيد ماتت لانها بقت وحيدة مااتحملت بعدنا ..
ابي واخي سوة واحنا سوة وهي وحيدة ..
ااااااه يااااااامي ..

كان صوت صراخها يبكي الحجر ..
وتقول تيمت وانا صغيرة وماشبعت منها ..
حسيتها تعبت وبقت ترجف بين ايدي ..
مااعرفت اشنو اسوي .
سراب .. تلاحگوها هاي البارحة هيج صار بيها .. وصكت على سنونها واغمى عليها ..
من اغشعت حالتها قمت اصرخ ..
الحقوا اختي راح تموت . خلونا ناخذها للمستشفى

الجدة.. اقرأولها ايات بسرعه ..
خليناها ع الارض وعزيز يقرأ على راسها وسراب تغسل بوجهها وتفركو ..
وانا مصدومة من حالتها ..

حسيتها هدأت وبدأ الدم يرجع لوجهها ..
وقامت تتحرك وتسمعنا ..
الجدة .. شيلوها هنا الغرفتـي خلوها ترتاح ..
اخذها عزيز وقعدنا بالغرفه ..

بقينا كلنا يمها لما صحت .. اغشعتني وسحبت نفسها الحضني وتبكي ..
-اشششش حبيبتي يكفي اذا بقيتي هاكذ راح تتعذب . ادعي الرب يرحمها ويجمعنا معها ..

اتنهد عزيز وقال .. وين امي ..
عمو قحطان .. امك يم جدك مريض كلش ..
عزيز .. ليش شبي .
قحطان .. اول البارحة دز عليه ووصانا كلنا .. الله يشافيه عزيز .. الهاي الدرجة… بس اسبح وارتاح اروح اشوفه لان باجر التحق ..

قحطان ... وهذا عامر هم يريد يلتحق احجي وياه ..
الجدة .. خلو البنات يرتاحن . وانتو كملوا سوالفكم بالهول ..
يمة سراب جيبي غدا الاخواتج خلي ياكلن لگمة ويرتاحن ..
ترانيم .. ماجوعانة جدة
لينا .. وانا ماجوعانة .. اختي احكي عن امي شلون اغشعتيها ولحقتي عليها او لا ..
ترانيم .. مالحقت عليها .. كانت ميتة .. مخليها بالثلاجة
لينا .. يعني كانت باردة والجو بارد شلون مافكرو فيها تبرد .. ااااه ياامي اتمنى اموت هاللحظة واروح وراكي ..
ترانيم.. اشششش لاتقولي هاكذ مامستعدة افقد احد ثاني غير امي .. انا تعبت فاهمة .. ولسا ابي واخي مانعرف مصيرهم ..
لينا .. ليش عندكي امل يرجعوا ..
ترانيم .. الرب يجمعنا .  نامي انتي وارتاحي ..
لينا .. انا اريد البس اسود مثلكي ..
ترانيم .. انا ماالبسو كثير .. وانتي تعرفي امي تكرهو واكيد ماتحب تغشعنا لابسينو ..

نامت لينا وانا طلعت ..
لقيت الجدة نايمة ع القنفه ..
قعدتها تنام بالغرفه ..
الجدة .. لايمة مرتاحة اني هيج ينطيج العافيه بس اذا تعزيني روحي اكلي لگمة ..
ترانيم .. انا اذا جعت اكل ..

صعدت اغشع سراب لقيت ايمان نزلت ..
مساع جنت نايمة من اجيتن البقية بحياتج ..
هزيت براسي ومشيت ..
ايمان .. ع الاقل ردي بس هو صوجي ..
مااهتميت ومشيت للغرفه ..
لقيت سراب ترتب ملابسها . اغشعتني قالت
-ها رنوم اني لسا متغدية منتضرتج ..
-ماجوعانة..
-ازعل والله اذا مااكلتي .. واني مااكلت علمودج ..
ع الاقل شاركيني ..
سرور .. واني هم شو جعت ..
نزلنا للمطبخ . حمت الاكل وقعدنا ع الطاولة ..
اكلت قليل وقلتلها خلص مااقدر ..

سراب .. ابوي گال نطبخ ثواب الامج . مااعرف اذا عندكم هيج عادة…  بس حبيت تشاركيني وتطبخين وياي هم تنسين شويه وهم يتقبل بسرعه لان هي امج هااا ..

هزيت براسي .. بس خلينا ناخذهم للفقراء والنازحين يمكن الله راحمنا ومخلينا عندكم بس غيرنا حسرتو ع الاكل ماشفتي الناس بالمخيمات يبكو ..
ااااه ياامي شلون قضيتي هذيكي الايام ..
سراب .. الله يرحمها ..
ترانيم .. سراب انتي ماتعرفيها .. امي انسانه جميله ورقيقة .. ماتتحمل .. والي صارلها صعب احد يتحملو ..
لما اغشعتها مااعرفتها كأنها موامي ..
وحدة ثانية ..

تعرفي كانت تقلـي انتـي اقوى منـي ..
دايما توصيني بالقوة وتقلـي لاتكونـي ضعيفه مثلـي كانت تغشع العذاب من جدتـي وتسكت ماتحكي ..
الى ان ماتت جدتي هي ذاقت انواع العذاب منها وابي مايعرف ماكانت تقلو ..
تخاف على مشاعرو وهو يتعب من الشغل ..
حتى الطفل الاخير بعد لينا جدتـي وقعتو منها بسبب جبروتها وظلمها ..
وماعرفنا الى لمن ماتت جدتي ..
وكنت دايما الومها واقلها ليش سكتـي عن حقك .. ليش ماحكيتي الابي ..

وعيت على حالي وقلت لسراب .. اعتذر ازعجتكي بحياتنا
سراب .. لابلعكس .. حبيتها الامج اكثر ..
شوكت ماتردين تسولفين وتحسين نفسج مخنوگة احجي ..
ترانيم .. انا لازم اشتغل .. ماابقى هاكذ وخاصه بعد ماحصلت على المستمسكات كلها ..
واغشع طريقه لترجع لينا للدراسة حتى تنسى وتتلهى ..
سراب .. الله كريم .. خلينا نگوم نبلش بالطبخ ..

طبخنا وكملنا وخليناه بحافظات واخذة علي يوزعه للفقراء والنازحين ..
سمعت صوت عمو ابو رماح بالحديقه يصيح بأسمي ..
ركضت الو ..
قابلتو وقعدت ابكي ..
وهو يواسي بيه .. طلع فلوس من جيبو وقال هاي الكي ماقبلت اخذ ..
لكن قال هذي حصتكي من الارباح ..

اخذتهم ورحت السراب عطيتها الفلوس وقلتلها انا اخجل اعطيهم العمو قحطان لان ماياخذ مني ..

سراب .. ليش هو اكو فرق بينا انتي من عدنا وبينا ولاابوي ولاعزيز وجدتي يقبلون ..
دخلت ايمان للمطبخ .. هاي شنو طابخات ..
سراب .. ثواب الام ترانيم ..
ايمان .. بس مايصير الثواب غير اهل الميت يسوله خو مو الناس الغربه ..

سراب .. ايمااااان ..
ترانيم .. لا صحيح ✔ الي قالتو .. واصلا انا عطيتها الفلوس السراب قبل لاتقول ..
اشرت السراب تاخذهم..
وصبيت اكل للينا وطلعت ..
قعدتها ماقبلت تاكل .. والجدة قالتلها مايصير تنامي بعد راح يصير المغرب ..
اكلت قليل ..

رجعت الصحون وغسلتهم نزل عزيز .  بين مايجهزوا البنات العشا ..
استغليت الفرصه ورحت وراه للحديقه .
اغشعني طلعت بعدو ..
التفتت .. هااا شلون صرتي ولينا شلونها ..
هزيت راسي . بمعنى احسن وقلتلو ..
عزيز انا محتاجة شغل ضروري ..

عقد حاجبو وقال .. ليش اكو واحد مقصر عنجن ..
ترانيم .. لا طبعا بس انا اريد اعتمد على حالي ماراح نبقى طول العمر هونـي ..

عزيز .. وشنو الي استجد هسا ..
ترانيم .. وثيقتي ومستمسكاتي معي كلها .. واقدر اقدم بأي مكان حتى لو بعقد ..

تنهد وقال .. ماشي انتضرينـي اشوفلج عرف يمشيها .. وراح احجي وي ابوي هم يساعدج ..
والذاك الوكت مااريدج تفكرين بأي شي .
تشكرتو ودخلت .
صاح وراي وقال ..
ترانيم مااريد اروح بالي يمج .. شكلج ماعاجبني ..

ابتسمت ابتسامة خفيفة وقلت .. لاتشيل همي روحي واخذلي بثار امي ..
عزيز .. بعون الله نسحگهم سحگ ..
ثقتـي يوم بعد يوم تزيد بعزيز ..
اما لينا فحالتها مخوفتنـي .. كل شويه تتذكر امي وتصرخ ويغمى عليها ..

كم مرة اخذناها للمستشفى يقولوا مرضها نفسي مو جسدي ..
اما انا فصوت امـي مايفارقنـي وصراخها واتخيل شكلها وهمة يعذبوها ويغتصبوها ..

مثل صوت البنات الي كنا نسمعو بالموصل من البنات الي يغتصبوهم ..
وافزع مرعوبة وخايفه .. يمكن هسا ارتاحت ولو بقت عايشة تبقى تتعذب طول عمرها والكوابيس ماتفارقها ..
مااقدر اتكلم وافضفض همـي والي شفتو بأمي لأي شخص ..

مر كم يوم والبيت هادئ . مابي بس نحنا البنات .. والبقية كلهم راحوا لبيت اهل ام عدنان .
حالتو صعبة كثير ..

فأنا والبنات ناكل اي شي وننام مخلصيها نوم ..
وعزيز كل يوم يتصل ويبشرني بكم داعشي قتل وكيف ويحكي بحماس وانا افرح لما اسمع كلامو ..

قلتلو .. عزيز اعرف انك تحب وطنك واهلك لكن وطنك واهلك والي يحبوك محتاجيك اكثر ..
لاتغامر بنفسك . تفرحني لما تقلـي قتلنا هاكذ عدد منهم لكن خوفي عليك اكبر من فرحـي ..

ضحك وقال .. يعني تخافين عليه .. ترانيم اني شنو بالنسبة الج ..
ترانيم .. انت بطلـي وملاذي .. واخـي .
عزيز .  هاااااا يلة اترخص اروح ارتاح ..
غلقو بسرعه وعرفت انه زعل لما قلتلو اخـي . 
صح انا معجبة فيه .. لكن مااقدر اعترف وخاصه بضروف مثل ضروفي ..
احنة حياتنا مختلفه عن بعض .. ودينا مختلف وعاداتنا وتقاليدنا وكلشي بينا يبعدنا عن بعض ..

والاهم هو متزوج .. ودينا يمنع هذا الشي ..
والسبب الاكبر من كل هذا .. هو ابي واخي .. عندي امل الاقيهم بيوم ومااريد افكر بأشياء تبعدنـي عنهم ..
انا عندي اختبار بالحياة اهم من الحب والزواج ..
اعذرنـي عزيز .. اقسو عليك وارفضك الان .. افضل من اخيب املك واخسرك فيما بعد .

سمعت صوت صراخ وعياط .. فزعت من مكاني وبالي عند لينا. 
نزلت اركض لعند لينا واغشعت سراب تبكي ..
اشنو بيكي ..
-جدي توفى هسا .. حضنتني وهي تبكي ..
قعدت اوسيها وابكي معاها على فراق امي ..
هي تبكـي على جدها وانا بكائي وعزائـي الوحيد هي امـي ..
قالت ..لازم احضر غراضنا ونروح .. راح يجي عدنان ياخذ ايمان من اهلها ويمرون علينا ياخذونا ..
اجت ايمان تبكي .. وحضنت البنات ..
هو ايضا يقرب الها ويكون جدها ..

انا خفت على لينا من الصوت وهي تنرعب ..
سراب .. انتي خليج يم لينا لاترحن خاف تشوف الصياح وراح يسون عراضه ورمي تروح تنهبط ..

ترانيم .. لا خلينا هوني راح نروح عند عمو ابو رماح بين ماترجعوا ..
اخذت لينا وطلعنا .. اجة عدنان يركض ..
-وين رايحات ..
-عند عمو ابو رماح ..
-هاااا جا سراب انطيهن المفتاح عندهن خاف نجي نحتاج شي ..
عطتني سراب المفتاح رغم اني رفضت لكن عدنان اصر ..
وبعدها صعدوا للسيارة وراحوا ..

#بقلمي_الكاتبة_شمس
يتبع......