#انكسار_فتاة_بريئه

القصه تتحدث عن فتاة يتم اغتصابها دون علمها بعد تخديرها من قبل حبيبها وابن خالتها قبل موعد زواجها من ابن عمها لكن لااحد يصدقها انها لاتعلم باغتصابها والكول يضن انها تعلم وبارادتها سلمت نفسها
user19194545

مساء الخير ع اجمل متابعين اتمنى لكم قراءه ممتعه

وهم راح اصير طماعه مثلكم 😎😎 مثل مطلبون مني بارت مفاجئ 😂😂😂راح اطلب منكم التصويت اذا عجبتكم القصه 😬😬

اتمنى تصعد بالمركز الاول بفضل تصويتكم ☺️☺️

#البارت 7

🍀🍀 انكسار فتاة بريئه 🍀🍀

🍀🍀 للكاتبه رونق 🍀🍀

كتلها شعندج كاعده لهيج وقت

انام هواي بالنهار وبالليل ابقى كاعده

وليش هالخربطه ليش متنامين بالليل مثل باقي الناس وبالنهار تكعدين

ملاك : من اول يوم رجعوا بي علي وزوجته

شدن ويايه هي واختها

وعليهن خباثه مو طبيعيه

وتتنغوص فوك راسي وخشمها يابس
هيج اشترالي وهيج سوالي

من يشوفني بالمطبخ يكعدن سويه

ويبقن يحجن ويذبن بسامير

مرات اضوج ومرات لا

اكول اذا اقرب الناس الي مصدكوني واتبروا مني

شلون اعتب ع الغربه

دائما انظف المطبخ بس اغيب شويه عنه الگيهن مخبثات وكالباته كلاب

وخاله ترزلني ودائما اكلها والله نظفت بس متصدكني

حيل بدن يضوجني واني مااكدر اشتكي

خاله كل مااحجيلها تكلي مااحب المشاكل

الشغل ذبنه عليه كوله وهم ماعندي مانع اهم شي مااطبخ لان حيل اضوج منه

بس بدت خاله وي الطبخ تخليني اني اطبخ وهي فوك راسي تعلمني
اني مااكدر اكول لا لخاله

تكولي اني ماالي خلك للمشاكل

كتلها صار خاله

بس هذا الحجي كوله من ماموجودين عمو وعلي وسجاد

بس من موجودين ويوم الجمعه والسبت اني اعيش ملكه

بس اني بيه طبع موحلو

بالليل ابقى كاعده وبالنهار انام لمن اخلص شغلي

ماعندي اي شي يلهيني حتى شاشه ماكو بالغرفه

علي صارله تقريبا شهر من رجع

مرات قليله الي اشوفه بيهن

اليوم جنت كاعده منعسانه ابد

اندك الباب

فتحته اتفاجات بعلي كبالي دخل وسد الباب
الصراحه بقيت مستغربه شعنده بهيج وقت وسد الباب

بعدين سالني سؤال ممتوقعته منه ابد

حاب اسالج سؤال بس اتمنى تحجين الحقيقه وبدون لف ودوران

حتى متجبريني اسوي شي ميعجبج

اتفضل اسال

جهاز لجين وين

شنو ..... ياجهاز .......

مو كلنه بدون لف ودوران

موبايلها مخليته بالمطبخ وره شويه لاكيته ماهو

وماكو احد اله مصلحه ياخذه غيرج انت

شنو افهم من كلامك اني الي اخذته

اكيد انت منو غيرج

اشو الكول عنده موبايله الخاص بي وارقى الاجهزه

انت الوحيده الي مانعيج من الموبايل
لهذا السبب سرقتي

احس بكلامه يذبحني ذبح

معقوله اني بالنسبه الك حراميه

اني متاكد مستعده كولشي تسوين حتى تتصلين بابن خالتج

اني لو اريده لابن خالتي جان شردت ويا من زمان

ومبقيت عندكم

ضربني راجدي

لج حقيره والله اذا فكرتي تهربين ويا راح تكون نهايتج ع اديه

وغلات ماما اله اكتلج بيدي

سكتت

وهسه كولي وين الجهاز

ماحجيت بقيت ساكته

بس الي اذاني اكثر بده يفتش الغرفه من فوك لجوه
احسه سجينه ودجني بكلبي

محجيت شي عفته ع راحته يدور

كلبها للغرفه كلاب

حتى جوه الفراش مالتي دور

الصراحه انتابني شعور الخوف اخاف تطلع لجين ضامته بغرفتي

بقيت اقره الفاتحه واهديها لام البنين

كون ميلگي بغرفتي

اخر شي كمل التفتيش ومالگه اي شي

الحمد لله رجع الدم بوجهي

الغرفه عباره عن هوسه خلاها

دموعي كامت تجري بدون مااسيطر ع نفسي

رجع گلي وين ضامته

بقيت ساكته

مو احجي وياج
بقيت ساكته بس دموعي زادن

اسمعي ملاك قسما بالله اذا مطلعتي للجهاز اله اندمج

يعني كوه تريدني اكول سرقته لجهاز زوجتك

ولا يهمك اني سرقته وضميته

حتى اخابر بي حبيبي

ضربني هالمره راجدي من صدوك حسيت الدنيا كامت تفتر بيه

يعني بكول وقاحه هيج تعترفين

بقيت ساكته

هسه طلعيلي الجهاز افضل الج

بس اني مو حراميه واسرقه للجهاز

وممعقوله عفت اجهزتكم كولكم واجيت لجهازها لزوجتك

اشو جهاز خاله 24 ساعه شامرته بالصاله

مفكرت اسرقه شمعنى جهازها لزوجتك الي سرقته
بس احب اكولك شي واحد

شكرا الك هواي ع هالجرح الجرحتني بي وطلعتني حراميه

ثقي بالله ورسوله اذا اتاكدت منج الجهاز عندج وتخابرين بي نهايتج ع ايدي

واكو شغله ثانيه كافي ساده الغرفه عليج 24 ساعه وبس يله اكل ونوم

بحجة تختفين من وجهي

من باجر تنزلين حالج حال البنات تنظفين وتتواجدين النهار كله جوه وعود بالليل اصعدي نامي وارتاحي

ممجبورات البنات يخدمن بيج حتى اكلج يصعدنه الج

عافني وطلع

كمت ابجي بحركه

ولك زيد صير مره وحده بحياتك رجال واعترف بالحقيقه

خلصني من هذا الوضع

وهذا الغبي الثاني من كول عقله اسرق الجهاز حتى اخابر زيد
اله تخبلت هو سبب دماري كوله

بس الصراحه حيل ضجت من تهمني هيج اتهام

اني متاكده هاي لعبه من عدها

اني لازم اكون حذره بس اطلع من الغرفه اقفلها للباب ورايه

ثاني يوم مارست يومي طبيعي بس هاي هدى

كول شويه وذبتلها حجايه

احسها تجيني بالعظم بس مابيدي شي ولا الي سلطه اجاوبها

وهاي اختها العوبه ل12 الظهر يله تكعد وكولشي متسوي

كملت طبخ الغده

استغليت وجود خاله بغرفتها

رحت الها دكيت الباب كالت ادخلي

هيه اتفاجات لان اول مره اسويها

كالت ها ملاك اكو شي
كتلها خاله امس علي طلب مني ابقى جوه لمن يصير الليل

عباله ابد ماانظف ولا اسوي شي

شمدريج

هو كلي كافي بس اكل ونوم

وانت تكوليلي اختفي من يجي

حايره هسه انفذ كلام منو ماادري

خاله اني مو قصدي شي من هيج اكولج

بس اخاف يشوفج هواي كدامه وانتوا عاقدين واخاف يتقربلج

لا خاله اني مو طفله واقبل بهذا الشي

علي صارت اله حياته الخاصه واتزوج واستقر

اني مستحيل اتقبله ك زوج الي

ومو قصدي غير شي وتفهميني غلط

بس اني ماعندي اي هدف بهاي حياتي بس احب اثبت برائتي
وبعدها اطلك منه

كالت خاله لعد انت حره شتسوين سوي

مدامج عاقله وفاهمه

واني علي هم راح احجي ويا وافهمه شكم شغله

اترخصت وطلعت

اني اليوم طبخت الغده سويت تمن احمر وسمك

بس من اجوي يتغدون عمو وخاله

اتفاجات بالتمن يمكن بي نص كيلو ملح

ممعقوله اني احط ملح هالكد

بقت خاله تحجي عليه

كتلها والله خاله طبخته طبيعي ومجان مالح ابد

بس من اجيتج وحاجيتج بعدها صار مالح

طفرن عليه اثنينهن الاخوات شنو قصدج وحده من عدنه حطت ملح

اني متهمتجن ولا جبت طاريجن
بس عمه والله هي قصدها واضح حتى منخليها تطبخ

لا والله خاله اني لو اريد مااطبخ جان كتلج

خاله وعمو كالو سدو الموضوع وذبوا للتمن

وسون غيره

اكلو بس السمك خاله وعمو

ورحت ذبيته التمن وطبخت

همزين كملته قبل ليجون الولد

الله ليوفق كول ظالم

هاي فوك مااخدمهن هيج يسون

اليوم قررت ابقى جوه وابد مااصعد لفوك

لليل يله حتى هم بلكي تتغير نومتي

وهم حضرت علي يتاكد من اني اخدم

من اجوي الولد هنه صبن عفتهن

اما بنات عمو كلش حبابات ويساعدني دائما بس بدون كلام ابيناتنه
اتغدن همين

اني استغليت الوقت كلت خلي اغسل الطارمه والكراج

طبعا اكلي حيل قل مو مثل قبل

هسه مااشتهيت اكول ابد

رغم ماجان الوقت ب3 ونص الظهر

بس مو مهم حاره لو لا

بديت اعزلها بالبدايه وبعدها بديت اغسل بيها

بهالاثناء اجه سجاد

گلي شنو الموازيج هسه بهالحر تغسلينها

عادي مو كولش حاره

كام يضحك لج اذا اب مو حاره لعد ياشهر الحار

عادي والله ميصير شي

ع راحتج خيتي كملي

صدك كملتها وجانت الدنيه مو حاره بس تسمط يمكن اذا اخلي بيضه تستوي
بس اني مااعرف الصراحه ليش اختاريت هيج وقت

يمكن لان الصبح ملتهيه بالطبخ والعصر لازم انظف

دخلت للمطبخ وجان اشوف المواعين مشمورات ع الكاونتر

جنت حيل فايره من الحر وشفت هذا المنظر متحملت

رحت للصاله كلت احاجيهن اني مو خدامه عدهن

ماالهن اثر معناها بدون قوسين انت غسليهن

يدرن بخاله نظيفه وتحب الترتيب

بس تلكيهن وسخات ترجع عليه اني

امري لاالله

غسلتهن بهالاثناء دخل علي

صبيلي جاي

ذبيت المواعين وغسلت اديه

حميته للجاي وصبيتله وحطيته كدامه

رجعت اغسل المواعين
گلي اني من كتلج انزلي ونظفي

مو معناها كتلج انتقمي من نفسج

يعني شنو من تغسلين الطارمه بهالحر

عود بطوله منج لو انت نظيفه

لا متوهمه اكيد

هذا غباء منج

سكتت بس بداخلي افور

وثانيه وبعد انت ماالج حق تغسلين مواعينه وانت اساسا مماكله ويانه

يعني بتصرفج هذا تردين تكبرين بعيني مثلا

هم سكتت وبقيت اعزل بالمطبخ

شنو انت ذابته كله ع الصامت

الصراحه حيل نرفزني بالحجي مالته بس مااكدر اجاوبه

اني اعتقد ماالي حق ادافع عن نفسي بهذا البيت

لان ماعندي سند حتى من انظرب لو انهان ماكو احد ياخوذ حقي
والحجيت والما حجيت نفس الشي

فضلت السكوت احسن

تعاي فهميني التمن شنو فلمه ليش ذبيتي بالزبل

هم مجاوبته

يمكن احجي وي حايط اكوم اصعد لغرفتي ارتاح احسن

عافني وطلع

بقيت ارتب بالمطبخ

بعدها صعدت سبحت ونزلت

كملت الصاله ورحت للحديقه الخلفيه كلت خلي اعزلها وانظفها

بيها كراسي وطبله ومسويلها ضل كولش حلوه ومرتبه

كملتها وردت ادخل وجان اشوف علي كبالي مبدل يريد يطلع

شعندج هنا شتسوين

داانظف

وانت عكس الناس اله بهيج وقت يله تنظفين
لو عندج غير غايه وتستغلين الوقت والعزله

حيل ضجت حجيت ويا بهدوء

يعني شلون استغل الوقت

مثلا اواعدلي واحد يجيني بهيج وقت

انت ليش لو ذابته ع الصامت لو من تحجين حجيج ينرفزني ويخليني اطلع من طوري

لعد بعد مااحجي افضل

ابقه ع راحتك اجفص ابطني وخربط بالحجي

وعد مني مراح اجاوبك ع اي شي

وانت حر شتفسر تصرفاتي فسرهن

عفته وردت ادخل لجوه

جرني من ايدي وخلاني بمستواه

بس بعدني ممكل الحجي مالتي

ماالج حق تعوفيني وادخلين واني ممكل حجيي

اسفه عبالي كملت
مره ثانيه اذا لمحتج بالحديقه متلومين اله نفسج

وممنوع تنظفين الحديقه لو شيصير

مفهوم

اوك

عافني ودخل اني هم دخلت لجوه

عمو طلع ويا وسجاد هم طالع

ذنيج الحيايه بغرفهن

لكيت خاله كاعده

كتلها خاله علي هيج وهيج كلي

لعد عوفيها للحديقه خل تولي

اخلي نرمين لو حنين يسونهن

والمواعين مالتهم ابد متغسليهن لو يبقن شهر ع الكاونتر

صار خاله

اصعدي ارتاحي
كلت بس اصعد انام ومااريد انام هسه

كتله لليل واصعد حتى انام فرد مره

انظفلكم غرفتكم

لا خاله عوفيها مبيها شي

روحي ارتاحي

والله اريد الهي نفسي مااكدر اصعد

بكيفج

دخلت واتفاجأت بغرفة عمو

تخبل ومرتبه حيل ونظيفه

متحتاج ترتيب بس نظفت الكاع ومسحتها

دخلت للحمام ردت انظفه

لكيته نظيف ومرتب بشكل

اي ملابس وسخه ماكو

خلصتها وطلعت
طلعت لكيت نرمين وحنين جوه

يحضرن بالعشه

والحبابات بعدهن فوك

لكيتهن يحجن عليهن

ويكولن لخاله

ميصير هيج شنو مدللات

كولشي ميسون

تكلهن خاله

اني احجي وياهن بس مااحب المشاكل ياماما

اني اخلي ابوجن يحجي وي اخوتجن اثنينهم خلي واحد منهم يطلع ابيته

دخلت لجوه الكول سكت

اتوضيت وصليت المغرب والعشا

بعدها سويتلي لفه بس الي قبلهم

اتعشيت وصعدت
نضفت غرفتي ودخلت سبحت مره لخ

الجو حيل حار

علي : من شفت ملاك لليوم اموري كلها اتخربطت

ابد مااميز بعد الصح من الغلط

ولا اعرف الحقيقه من الكذب

اني المفروض بصفتي محامي مااتهم الشخص كبل لازم اجمع الادله يله احكم ع القضيه كلها

بس وي ملاك كاعد اتهمها بدون دليل قاطع

مااعرف هل الجهاز عدها لو لا

عقلي يكولي اكيد عدها وتحتاجه

بس گلبي يكول العكس

دخلت لغرفتها وفتشتها وملكيت اثر للجهاز

وبعدها صحيح طلبت منها تتواجد جوه ومتتقيد بينه

جان هدفي اخليها تتاقلم ويانه وهم تصير كبالنه

بس هي افتهمتني غلط
كامت تظغط ع نفسها وهذا الشي حيل زعجني

بس الزعجني اكثر من لكيتها بالحديقه الخلفيه

بالي راح لبعيد اكيد دتخابر وراحت للحديقه الخلفيه حتى تاخذ راحتها

بس من رحت للمكتب افكر اكول زين اني شكيت بيها تخابر

ليش متروح لغرفتها وتقفلها عليها

احسن من الحديقه ومعرضه باي وقت احد يدخل عليها

طبعا هواي عقلي مشوش ومدا اعرف الصح من الغلط

امي حجت ويايه كلتلي ميصير نسوانكم كاعدات ويتامرن

وهاي المسكينه تنفذ بدون متعترض

وخل يكون بعلمك مو تاكل وتنام

بس اكو غيرها من ياكل وينام

اشو حتى الطبخ كامت اطبخه بمكاني
بس ذني الحيايه ميكعدن راحه

مخليات ملح للتمن

واظطرت ملاك تذبه بالزبل

ميصير هيج ياماما

اتوضحتلي الصوره

وطلبت من ملاك ابد متغسل المواعين بعد

رحت للمكتب رجعت بالليل وجانت ماكو

صبونه العشا واتعشينه بس ملاك ولا لمحتها ابد

عفتها قررت بعد ماعليه بيها

ثاني يوم كذلك لكيتها كاعده وتنظف

بس ذابته ع الصامت ابد متحجي

بقيت ع هذا المنوال

من الصبح لليل هي جوه

بس قبل لانجي بالليل تختفي
وراها الخميس وطلبنه منهن يحضرن نفسهن

الكول جهز نفسه

ملاك عيوني يراقبنها غصبا عليه

طلعنه وجهزنه السيارات

وبدوا الكل يصعد

بس الصراحه متوقعته لملاك تروح بسيارة سجاد

المفروض تصعد ويايه حيل ضجت

صعدوا ويايه ابويه وامي ولجين

وسيارة سجاد هو وزوجته وملاك ونرمين وحنين

نمشي بنفس المستوى اثنينه سياراتنه عاليه

مرات تصير سيارته بصفنه اباوع عليها بغير عالم

ولا يمهم ابد

وصلنه للكراج وخلينه السيارات وقطعنه الوصل ورحنه للفندق

احنه حاجزين
قريب كولش ع العباس سلام الله عليه

انطونه المفاتيح مالت الغرف

الكول الغرفه ام نفرين بس البنات ام 3

احنه بطابق والبنات بغير طابق لان ترتيب الغرف هيج حسب عدد الاسره

اتفقنه نغسل ونرتاح ونروح نزور ونصلي المغرب والعشا هناك

فعلا استقرينه بالغرف اني سبحت وبدلت وطلبت من لجين تغسل ملابسي

ورايه هي دخلت

جهزنه اثنينه

خابرت سجاد هم كال جاهزين

وابويه كذلك

بعدين اتصلت بنرمين كالت انتظرونه لحضات

وره شويه نزلن ورحنه نزور اول شي دورنه ع مكان طبعا بصعوبه نلكي لان حيل ازدحام اليوم خميس
بعدين قررنه ندخل سويه ومن نطلع هنا نلتقي

اول شي زرنه الامام الحسين ع

وبعدها طلعنه طبعا قبل البنات وامي

بقينه ننتظر وره شويه اجني بس ملاك من دونهن العيون حمر

صار الليل طبعا

اجه سجاد وكال حصلتلكم مكان تعالو نرتاح شويه

وفعلا مكان بين الحرمين

استقرينه بي

راحن البنات زارن وبعدهن احنه رحنه

ملاك : صعدت وي سجاد بسيارته

طبعا علي ماجنت عندي ويا مشكله يعني مااكرها وهم ماعندي شعور اتجاها

بس هسه بده ياذيني بتصرفه والحجي مالته

يعني يشك بيه بدون داعي

بده حقد بكلبي ينولد اتجاها
صعدت وي البنات

والكول يحجي ويضحك بس اني احس بنفسي بغير عالم

خطيه سجاد يحاول يخليني احجي واضحك

بس اني فاركتني الضحكه من يوم الي خسرت شرفي بي

وصلنه ورحنه للفندق

وبدينه نسبح لان الجو حيل حار كول الي تدخل تغسل ملابسها وتطلع

اتاخرنه عليهم شويه

بعدها رحنه نزور

من دخلت للامام الحسين ع انفجرت بالبجي

الكول صافن عليه حتى بنات عمو

حجيت بيني وبين نفسي كتله اني مظلومه مااريد شي من هالدنيه بس برائتي

اطلبها منكم انتم اهل البيت

وبعدها مو مهم اموت ابقه عايشه

طلعنه للعباس ع هم كذلك

حيل ارتاحيت وحسيت بنفسي كانو نولدت من جديد

رجعنه للمكان نفسه طبعا اني وبنات عمو وحدنه والزوج الاخوات بوحدهن

كعدنه وجنه منتظرين خاله حتى نروح للمطعم نتعشى

اني عيني ع الناس اشوفها كولها ناس طبيعين ويضحكون ويسولفون

يمكن اني الوحيده الي حياتي معقده ويمكن من المستحيل بيوم راح اكدر افرح لو اضحك

الشخص الوحيد الي من سابع المستحيل اسامحه بيوم هو زيد

وسجى هم من المستحيل اسمامحه

لان همه الوحيدين الي سببوا دماري

كمت احسدها الي تمشي بطولها وي اهلها

رغم قسوتهم اهلي بس حيل مشتاقتلهم

اني هسه شعوري اصعب بهواي من الي يموتله عزيز ع قلبه

ع الاقل اذا شخص فقدله عزيز يكدر يأيس منه ويكول من المستحيل بيوم التقي بي لو احجي ويا بس بالحلم وهم مو اكيد يشوفه بالحلم

بس اني اختلف

صحيح مفاركتهم بس هم ع قيد الحياة وباستطاعتي اشوفهم ويشوفوني بس مااكدر اضمن النتيجه اذا التقينه بيوم

اصعب شعور فراق الاهل ومو اي اهل

اهلي الي دللوني ويحبوني وعمرهم مايوم غثوني لو سمعوني حجايه

فجأه اصير بالنسبه الهم ميته

شعوري صعب اوصفه

فاصله عن العالم كله

بس عيوني تباوع ع الناس

وكمت احسدهم كلهم لان حياتهم طبيعيه

اني دا افكر وجان تنقطع سلسلة افكاري من لمحت شخص عمري ممتوقعه راح اشوفه هنا وجان جسمي يبدي يرجف من فوك لجوه وجان يصير مقابيلي .......

توقعاتكم حبايبي منو هذا الشخص الي راح تلكي ملاك