#انكسار_فتاة_بريئه

القصه تتحدث عن فتاة يتم اغتصابها دون علمها بعد تخديرها من قبل حبيبها وابن خالتها قبل موعد زواجها من ابن عمها لكن لااحد يصدقها انها لاتعلم باغتصابها والكول يضن انها تعلم وبارادتها سلمت نفسها
user19194545

#البارت 16

مساء الخير ع اجمل متابعين اتمنى متحكمون ع علي لو اهلها بالظلم تعرفون لويش لان احنه بمجتمع شرقي والعراقي معروف عن غيره من الناس بغيرته

الكل متعاطف وي ملاك لان الكل عرف بيها بريئه من خلال متابعتنه للقصه

لكن هل ياترى لو كنا بمكان علي لو اهلها ومنعرف الحقيقه راح نسامحها لو لا

اني متاكده محد يصدكها تعرفون لويش لان الادله كلها ظدها ماعدها ولا دليل من صالحها والمشكله زيد مكاعد يعترف ولا كاعد يعوفها بحال سبيله

الحقيقه والواقع مو مثل القصص والخيال

اني متاكده من الدنيه اذا تضحك لبشر تضحكله هواي وتصعده لسابع سما

بس اذا عكست الدنيه وي شخص ادمره دمار وتنزله لسابع ارض وتصير ضده لمن الله يفرجها بيوم وهذا الشي مو غريب علينه بحياتنه اليوميه
اسفه ع الاطاله اتمنى لكم قراءه ممتعه

البارت 16

🍀🍀 انكسار فتاة بريئه 🍀🍀

🍀🍀 للكاتبه رونق 🍀🍀

ملاك : من رحنه للمول انجبرت اشتري اخذت دشداشه وحده واخذت شال وعطر ومعطر وشامبو لان ماعندي اصلا وشفت نفسي محتاجتهن

بس من وصلنه اتفاجات لكيت من ضمن الغراض علاكه

فتحتها لكيت ملابس كلت هاي ال لجين اكيد

بس من سالت علي كلي الج

كلت عيب ارجعها طبعا ذوقه يجنن مثل خاله

وسجاد انطاني علاكه حلويات اشكال بيها فرحت بيها لان دائما استحي

بقيت لوقت متاخر رتبت كول الغراض

سالته شحاب اسويلك غده
فاجأني من كلي اي شي من ايدج طيب

حيل افرحت وجان تشجيع الي

رغم ماجنت مااطبخ مااعرف واضوج منه

هسه لا حبيت الطبخ لان اشوف علي يمدح بطبخي

بقيت يوميه اطبخ شي شكل

حسيت بلجين هواي كاعد تضوج

وخاصه من يمدح بيه كدامها

مرات اتعمد اكل وياهم ع عناد لجين

تقرر العقد مالت اخويه اول يوم العطله يصادف جمعه

جنت حيل ضايجه واشوف لجين كدامي تجهز بنفسها

وتتعيقل فوك راسي

مرات احس روحي تطلع من الدنيا

ومرات اكول عادي هم اهلي الخسرانين

بالاخير بس يعرفون ابرائتي راح يتندمون
حيل مختنكه وضايجه

ابد مطلعت من الغرفه

افكر اكول هسه اخواتي واخواني وماما وبابا كلهم جايين

امنيتي يفكرون يشوفوني

شلون انطاهم كلبهم وهيج يسوون بيه

بجيت لمن مليت

حتى اكل مااكلت لان مااشتهي

بقيت بفراشي متمدده

بس افكر هسه عقدوا ..... لبسها الذهب ..... امي فرحانه

لو اخواتي .... زين منو تركص

منو فرحانه ..... هم احد منهم يفكر بيه

اكيد الكول نساني

جان اصعب يوم يمر عليه
فكرت لازم انتحر واخلص من الدنيا

واريح اهلي كولهم

فكرت كلت خل ابلع حبوب واخلص

بعدين كلت مراح اسوي شي

ااذي نفسي اروح لجهنم وهم برائتي متطلع

عيني ع الساعه

احسب لحضه لحضه شوكت يرجعون علي ولجين

حتى اسال علي عن اهلي

كلما اتذكر اكول لازم انساهم مثل منسوني

مينطيني كلبي افكر بيهم غصبا عليه

سمعت الباب ينفتح فرحت

كلت مااطلع باللحضه خاف لجين تشمت بيه وتفرح من تشوفني بهاي الحاله

كلت خل ابقى بالغرفه واسوي نفسي ممهتمه

بس اتفاجأت بالباب تندفر حيل
وعلي يصيح افتحي الباب

خفت خاف صاير شي

فتحته للباب وجان اتفاجأ بعلي عيوني حمر من العصبيه

دخل كبل وكام يصيح وضربني راجدي

ملاك انصحج نصيحه الجهاز الضامته طلعي

ياجهاز شبيك علي شدتحجي

لتغشمين نفسج لتكفريني طلعي الجهاز بسرعه

والله ماعندي اي جهاز

ضربني مره لخ

لتجذين

بده يدور بالغرفه مثل المخبل

لعب جوله بالغرفه

حتى جوه الجربايه وجوه الدوشك

ملاك لتختبرين صبري والله اخليج تتندمين
فهمني شصاير

لج كلبه حقيره لهسه ع اتصال انت والنذل ابن خالتج

والقران هالمره اكتلج بيدي وماارحمج

هاي شدتحي انت من كول عقلك اتصل بي

شنو اتخبلت

لج لتخبلين ملاك

بس كولي وين الجهاز

والقران ماعندي اي جهاز

لج انطاني تفاصيلج بالظبط

والله اي اتصال ماعندي وي بشر

تعالي خل افتشج خاف ضامته الجهاز

لهنا وكافي علي

عيب عليك هيج تسوي

وانت مو عيب عليج من تتصلين بي وادزين اله رسائل غراميه
هاي يارسائل والله العظيم ماعندي اي جهاز

لتحلفين ملاك والقران اخليج تتندمين ع الساعه الي نولدتي بيها

اتقرب عليه يريد يفتشني

علي رجاءا لتتهور ولتهيني بهاي الطريقه

لا بالعكس مااهينج بس اريد احافظ ع كرامتي الباقيه

مخليتني طرطور تتصلين وتتراسلين بحبيبج من وره ظهري

علي البيه مكفيني رحمه لوالديك عوفني بحال سبيلي

والله اليوم افتشج واكلب الدنيا عليج لمن اعرف الجهاز وين ضامته

شنو انت يهودي ومتصدكني

وحق كول نبي مرسل وحق الامام الحسين اي جهاز ماعندي

ولا مراسلتلي شخص

ميهمني هذا الحجي تعاوني ويايه احسن
خل تفتشني لجين مو انت

لا اله اني بنفسي

حيل ضجت واحتقرته بنفس الوقت

بده يفتشني جسمي كوله تقشعر

حسيت بذل مو طبيعي

دموعي كامت تجري

يمشي ادي بجسمي كوله

يابه وغلات امي وابويه اذا لكفت الجهاز عندج نهايتج ع ايدي

شمرني حيل ع الحايط

تركني وطلع

كرهت نفسي وكرهت علي وكرهت زيد

مااعرف شيدزله زيد وهيج يتصرف ويايه

بس المفروض منه يثق بيه ويصدكني

اليوم جان اسوء يوم بحياتي
سمعت الباب الخارجيه انطبكت

طلعت دخلت للحمام ابجي واسبح احس بنفسي اريد انفجر

والله لو مااخاف من ربي جان انتحرت ولا هالذل

الله ليوفقك زيد

هسه مو تزوجت شتريد مني بعد

حياتي ودمرتها ومستقبلي همين

بقيت يمكن ساعه او اكثر

بعدين هدئت شويه طلعت

جنت حيل جوعانه بس ماالي خلوك اكل

رجعت للغرفه نشفت شعري

بعدها رحت اتوضيت وقفلت باب الغرفه عليه

قريت قران وصليت ودعيت ربي يفرجها عليه

اتمنى تنكشف حقيقة زيد وسجى

صار الليل طفيت حتى الضوه الي بالغرفه
جنت حيل مكتأبه وروحي طالعه من الدنيا

بعدها حسيت بالباب انفتحت واجوي سمعت صوت لجين بس تضحك وتسولف بصوت عالي

ادري بيها تريد تغثني

ماتدري بيه اني روحي طالعه ومغثوثه وممحتاجه بعد مغثه

حتى الساعه مااعرف بيش بس من الجوع مااكدر انام

حتى حلويات ماعندي خلصن

فتحت الثلاجه لكيت بس فواكه

اخذت تفاحه واكلتها

فتره واندك الباب عليه

اكيد علي مفتحته ولا الي خلوك احجي ويا

بقه يدوك بالباب

حجه افتحي الباب ادري بيج كاعده

لتخليني اكسره للباب
رحت ذبيت مي ع وجهي

كمت فتحته الباب بس عيوني مورمات من البجي

دخل ..... فتح الضوه

شعندج قافله الباب

حابه تاخذين راحتج وتتراسلين ع راحتج

رجاءآ علي لتحجي هيج

يعني وين قابل ضامته الجهاز

اشو الغرفه فتشتها واني همين

روح صيح لجين خل تفتشني زين

اسكتي لا اكصه لسانج

سكتت بعد محجيت شي

روحي اتعشي

عفته يحجي بوحده رحت لفراشي وانطرحت

وغطيت حتى وجهي

هو اتخبل
جر البطانيه حيل

اني مو احجي وياج

ممعقوله تريد تجبرني ع شي

مااشتهي ولا اريد اكول

لاغصبا ماعليج تكومين تاكلين

وباب الغرفه اذا قفلتي عليج اكفر بيج

ممنوع تقفلينه ولا لحضه

اوك .... اكو اوامر ثانيه

اطلعي كدامي اتعشي

اعتقد الحجي مالتي واضح مااحب اعيده مره لخ مااشتهي

واني هم حجي واضح ومااحب تعانديني

روحي اتعشي وبلا لغوه زايده

لخاطر الله ومحمد عوفني بحالي البيه مكفيني

واني من اجوع عود اطلع وااكول ممانعني احد
عافني وطلع

رجعت لفراشي بس ابجي

بعدها نمت

الصبح كعدت لكيتهم بعدهم نايمين لان صادف سبت

جنت حيل جوعانه

حميتلي خبزه واكلت قشطه بس احس اللكمه كوه تنبلع

مكدرت اكل هواي لكمتين وكمت

بلشت بالغده

سويت مرك باميا مجمده من خاله

وجهزت التمن

كعد علي

كال صباح الخير

اتجاهلته ولا كانو اسمعه حيل ضايجه منه

طلع جبن وقشطه من الثلاجه
رحت حميت اله خبزه وحميت الجاي

حطيتهن كباله محجه شي

طفيت المركه ونصيت التمن ورحت لغرفتي

ماعندي حل غير النوم واكثر المرات ماانام بس اتكلب بالفراش

عفت الباب مفتوح ادري يشك بيه

وره شويه حسيت بالباب انفتح

علي : من جنت يم اهلي واجتني الرسائل وفتحتهن

اتخبلت اله شويه

من زيد كاتبلي لويش عايفين حبيبتي بوحدها بالبيت

متخاف عليها

اذا انت متخاف عليها اني لا اخاف عليها

وخل يكون بعلمك الك مهله منا لمن يقبط ع العقد مالتكم سنه

الطلكتها بالتي احسن زين ع زين
والمطلكتها اخوذها من كدام عيونك ونسافر

احنه متفقين ع كولشي اني وحبيبتي

وخل يكون ابالك احبها واموت عليها

وهي تحبني وتموت عليه

وكلتلي منتظره ابن عمو يطلكني حتى نتزوج اني وياك

ولتصدكون تكدرون تفرقونه

ها وخل يكون بعلمك دير بالك اتاذيها

لان والله اخليك تتندم ع الساعه الي نولدت بيها

عقلي طار يعني ع اتصال ابينهم

وتبيع ثكل براسي

اكيد جهاز لجين عدها

اني كاعد وبالي يمها واكول خطيه

وطلعت مكيفه بطلعتنه تاخذ راحتها

عفت كلشي ورجعت للبيت

اعتذرت منهم كتلهم خابرني ولد صديقي بالمستشفى حيل متخربط
رجعت للبيت ولكيتها بالغرفه

ولا كانو شي صاير

ضربتها وجنت مو بوعيي اتصرف

كلبت الغرفه كلاب مااله اثر الجهاز

بعدها كلت اكيد تضمه بصدرها ردت افتشها ورفضت

من رفضت اتخبلت كلت اكيد ضامته

صممت اله افتشها طلبت مني من تجي لجين تفتشها اني رفضت

منا لمن تجي لجين اكيد تضمه بغير مكان

اتقربت عليها

بديت افتش بيها بس دموعها تنزل ع خدها

مدري شصار بيه

بس لازم مااضعف كدامها

ميصير بذمتي وتتصل بحبيبها

تعتبر اكبر خيانه
بس العجيب بالامر مااله اثر الجهاز ابد

دخت عفتها ورجعت لاهلي

وره فتره خلصت الحفله واليوم عطلناهم راح يباتون يمنه بيت عمي

عجيب امرهم بيت عمي

محد سالنه ع ملاك لا اخواتها ولا اخوتها

يعني من صدك حاسبيها ميته

شلون اذا طلكتها مااعرف

بس يمكن اتخبل اذا اتزوجها ابن خالتها

اهلي مقبلو نرجع اله وره العشه

بقيت بس ع اعصابي

بالي كله يم ملاك

ساعه اكول استعجلت بتصرفي والبنيه ماعدها جهاز وهذا ابن خالتها جذاب

ساعه اكول لا صدك عدها جهاز وتستاهل السويته بيها
كملنه العشه وهاي لجين خبيثه ادري بيها ماتريد نروح من وكت

اترخصت من اهلي ورجعت للبيت

لكيت البيت هدوء

المطبخ مابي اي علامه للطبخ

اكيد لهسه مماكله

وحلويات يجوز ماعدها

من فتره ماجايب الها

لازم باجر اجيب الها حتى من متاكل اطمأن عليها

حيل متغيره وضعفانه بشكل لان اكلها قليل واضح عليها

بدلت وبعدها نمت وي لجين وسبحت

لكيت لجين نايمه

كلت خل اكوم اخليها تاكل

دكيت الباب هواي ومفتحتها اني متاكد كاعده بس متريد تفتح الباب
كتلها لو تفتحي لو اكسره للباب

فعلا فتحته ودخلت شعلت الضوه

عيونها حمر و حيل وارمات

اكيد باجيه هواي

حاولت وياها تاكل بس رفضت

واتجاهلتني ونامت حيل عصبت

اتمالكت اعصابي وماضربتها

بعدين رفضت تطلع عفتها ورحت نمت

ثاني يوم جان سبت وماكو دوام

بقيت نايم لوقت متاخر

كعدت الساعه ب11

لكيت ريحة الاكل طالعه

دخلت للمطبخ

سلمت بس مردت السلام
عفتها مااريد اضغط عليها

طلعت ريوك الي وهي حمت الخبز والجاي

عافتني وطلعت راح للغرفه

كملت ريوكي

ورحت كلت ادخل احجي وياها واعلمها ع الغلط الي دتسوي

لكيت الباب مفتوح

وهي لافه حتى وجها بالبطانيه

كعدت بصفها وحجيت

اسمعيني ملاك الي دتسوي غلط بغلط

حتى لو اني وياج متزوجين بس ع ورق ميصير تخونيني وي واحد غيري

اوعدج و وعد شرف بس تقبط السنه النه باي وقت اطلبين الطلاك راح اطلكج

وبعدها تحبين تزوجين ابن خالتج غيره ميهم

بس لازم تحافضين ع شرفج وشرفي بهاي الفتره
اتمنى تفتهمين كلامي وياريت الجهاز اطلعي وينسد الموضوع

تدرين بيه اني ضد العنف اتجاه المرأه بس هذا الشي الوحيد الي يطير عقلي من راسي واتمنى تفتهميني

ماكو اي جواب منها

مستحيل نايمه اني متاكد كاعده

ملاك .... ليش ماكو جواب

وخرت البطانيا وجانت تبجي

اسمعني من الاخير ثق بالامام علي لو يبقى بس زيد بالدنيا هم مااقبل بي

وبالنسبه الك الطلكتني والماطلكتني نفس الشي ميفرق

لان اني مستحيل افكر بزواج لو اموت

واكو شغله ثانيه والصدكتني والمصدكتني ميهم

ماعندي لا جهاز ولا عندي اتصال باي شخص

اني راح احاول اصدكج اتمنى هذا حجيج يطلع صحيح

بس الي اريده منج لتكطعين الاكل
الاكل مااله علاقه بالزعل

بس علي تدري نذليت هواي ومن منو

من اقرب الناس الي

اني لو مااخف الله جان مو كطعت الاكل

جان انتحرت واريحكم مني

ادري بنفسي وصمة عار عليكم وع اعصابكم متحمليني

بس مابيدي شي

ثق بالله والرسول بيوم التثبت برائتي راح اريحكم مني للابد وهذا اعتبره وعد مني

حتلو اروح لنار جهم اني قابله تدري لويش

حتى ماانطيكم فرصه تعتذرون مني لان اكيد راح تتندمون

الصراحه دخت بحجيها هواي

معقوله تطلع بريئه

شراح يكون موقفنه كدامها
تحجي وتبجي

عاقبتوني عقاب قاسي

مااعتقد بعد هالعقاب راح اكدر اشتهي الاكل

بس انت هم كاعد تعاقبين نفسج من متاكلين

اني من اجوع اكيد اكول

ع راحتج بس اتمنى تفكرين بالحجي الي كتلج علي

عفتها وطلعت كعدت بالصاله

وجنت دايخ حسبه تاخذني وحسبه ترجعني

اذن الاذان شفتها طلعت من الغرفه

اتوضت ورجعت

رحت كعدت لجين

بعدها اتغدينه ورحت للمكتب

كال بابا نرمين بالعطله ياخذوها لمن تتخرج

كلي جيبها ملاك ومن يجون بيت عمك اخذها لبيتك

كتله لا يابه خليها يمي واستقرت
اخاف يجون فجأه مترهم بعد

الصراحه اني اتعودت عليها وع لمساتها بالبيت ونظافتها وطبخها

كلي لعد جيبها باجر وي البنات اذا حبت تبات خليها واذا رادت ترجع بكيفها

تدلل يابه من اروح للدوام اجيبها ويايه

كلي وشوف متطلب اجازه حتى نروح للنجف من الصبح لليل

الله كريم

رجعت بالليل لكيت لجين بس ع الموبايل

يمكن كولشي متسوي

لكيت ملابسي الاغلبيه مو نظيفه

كمت اصيح عليها كتلها شنو شغلج من الصبح لهسه

اشو لا تنظفين ولا اطبخين وكلت ميخالف

بس ملابسي شلون رايج هم اخلي ملاك تغسلهن

شدعوه عليك ياحبيبي
شدعوه عليك ياحبيبي

هسه اكوم اغسلهن الك بس اهدئ

ميصير هيج اذا تبقين هيج ارجعها لملاك لبيت اهلي

وارجعي مثل قبل

اهووو ياعلي هسه اني شمسويه قابل

اشو حتى مااحجي وياها مثل مكلت ولا اتقرب عليها

واذا ع الملابس هسه راح اغسلهن

كالت خل نتعشه وراها اغسلهن الك

طلعنه لكينه ملاك تسوي بالعشا

شاويه اجنحه وتكلي كباب

خلت الاكل كبالنه

طبعا عيونها حمر من البجي اكيد

طلبت منها تكعد تتعشه رفضت

بقت تخدر بالجاي وتغسل المواعين
كملنه العشه

طلبت من لجين تغسل الملابس لان ادري بيها تنسه

كلت لملاك جهزي نفسج باجرادزج لاهلي

من اروح للدوام اخذج وياي

الله كريم ......

كملت شغلها وراحت للغرفه

احسها مثل الورده الذابه

رجعت للغرفه وخبرت لجين ع باجر

كالت لو توديني لبيت اهلي لو لبيت اهلك

خفت تسوي مشاكل وي ملاك

كتلها اوديج يم اهلج

كالت وغداك

اروح يم اهلي اتغده واطلع وي ابويه للمكتب

اخذني وياك لخاله ابقى يمها
بكيفج .... بس بداخلي ماراضي

نمنه وثاني يوم كعدت وكعدت لجين وياي

ملاك يمكن لهسه نايمه

طلبت من لجين تروح تكعدها مقبلت

رحت اني دكيت الباب ماكو

فتحت الباب ودخلت لكيتها نايمه مثل الملاك

بس لابسه الحجاب حتى وهي نايمه

كتلها ملاك .... ملاك .....

طفرت مثل المخبله

هاي شبيج اكعدي

اسفه اخذتني النومه

عادي مصار شي بعد وكت

كومي جهزي نفسج

عيونها حيل مورمات اكيد هم من البجي وهم من السهر واضح عليها
عفتها وطلعت رحت للمطبخ

بالنسبه ال لجين لو تموت متفكر تسويلي ريوك

رحت طلعت قشطه وعسل

اجت ملاك سوت جاي

صبتلي شربت جانت جاهزه ماعدها شي اله لجين

رحت للغرفه كتلها فضيها وكتي راح

بعدها دزيتهن لاهلي

رجعت الظهر سالت ماما ع البنات

كالت فوك

ولجين .... فوك همين يم هدى

اصلا مشفتها من اجت لهسه

اكول ماما لويش متخليها تراجع الدكتوره ع طفل

مو اخذتها لاحسن دكتوره ابغداد وانطتها علاج

ممتوازين شوكت ماالله راد يصير ان شاء الله
بس والله ياامي حيل متعبتني ياريت تحجين وياها

شبيها ماما

والله ملابسي كلهن وسخات لو اتعارك وياها تغسلهن لو لا

وجنت الاكل كله جاهز وانت تدرين

بس هسه من اجتي ملاك لليوم ارتاحيت

كمت اكل بالبيت اكل نضيف وطيب

والله ياماما العود متگيسه من الكاع

البيت كله ع ملاك

حتى المواعين الناكل بيهن تخليهن ع ملاك تغسلهن

رجعت الظهر سالت ماما ع البنات

جنت مرتاحه حيل من جانت ملاك يمي

البنيه نضيفه ومرتبه عكس ذني

بس اروح لخالك احجي ويا
ماما صاحت البنات

نزلت ملاك والبنات

صبن غده واتغدينه ولجين اخذت غده لهدى وصعدت وياها

كملنه وكلت لحنين صبيلي جاي

صبتلي شربت بقينه شويه

ورحنه للمكتب

لليل رجعت اتعشينا

وملاك ويانه عيوني تراقبها

تاكل مثل العصافير تنقش تنقش

كملنه العشه وصبو جاي

كتلهن ملاك ولجين جهزن نفسجن خل نروح

كال ابويه عوفها ملوكه خليها يم البنات

شفتها فرحت

بهاي الاثناء اجتي رساله فتحتها
لكيتها من زيد كاتب بيها

لج حبيبتي ملوكه فدوه اروحلج حاولي تقنعي للمزعج وابقي يم بيت عمج

لج مشتاق بكد رحمة الله اريد اشوفج بالكام

صارلي اسبوع مشايفج گلبي طك عليج

ولتگوليلي مو كتلك لابسه فستان بصلي

مااقبل مااقتنع الى اشوفج حبي

واذا مقبل اللزكه حاولي تفتحين كاميرا حتلو بالحمام من ترحين لبيته

وره ثواني تم الحذف اكيد اتوهم من دزها الي

بس الله راد يفضحهم

ركزت ع ملابسها صدك لابسه فستان بصلي

اني تخبلت عقلي وكف بس حاولت اتمالك اعصابي

يعني شنو تنطي تفاصيل حياتها كلها

وين تروح وشتاكل وشتلبس
مااريد اتهور كدام ابويه وامي واخواتي

بس اليوم ارتكب جريمه بحقها اكيد

وجان ....... يخلص البارت .... 😂😂😂😂

وجان تبدي معاناة ملاك الحقيقيه

الي راح كله يهون بس القادم اصعب بهواي اكثر من ماتتوقعون

انتظروني بالبارت القادم