#اضعت_ربيع_عمري

#بارت_17_تكملةالقصة

#بقلمي_سارة_المجيد
💔💔💔💔💔💔💔💔💔

مساء الخير عليكم احبتي
طبعا جنة حبت تكتب تكملة لقصتها من قبل لاتعرف بخبر امجد مريض بالسرطان ولحد هاي الدقيقة وكلتلي ضيفي بالقصة واني لبيت طلبها
تعالوا ويايه نقرأ تكملة قصة حياة جنة

جنة ..السلام عليكم ...احبتي 💔

روحي مخنوكه وحس تعبان حيل
ربي وانه الموت محتاجه شكثر
هاي دنيه شكد حقيره وياي ليش

كمت مااشهك نفس اشهك كبر

💔💔💔💔💔💔💔💔💔

راح ابدي احجيلكم اشلون وصلني خبر مرض أمجد الله يرحمه 😔💔

بيوم جنت بيت اهلي لان اني متعودة كل اسبوعين اروح ابات يمهم يومين وارجع ف جنت كاعدين ع اساس اليوم راح ارجع لبيتي وقاسم اجا عليه وجانت الدنيا مغرب ...

شفت اخويه الصغير الي اسمه محمود دخل البيت وسلم علينا بس شفت يباوع عليه بنظرة مكدرت افسرها ماعرفت مصدوم لو مقهور وعيونه مليانه دموع كلنا انتبهنا عليه ....

أمي ....سالت محمود اشبيك دخلت عليه وجهك اصفر

محمود ....ضل ارتبك وبعدين هم رجع باوعلي بس بسرعة دار وجها كال ماكو شي بس اتعاركت ويا ولد

جنة .....ماكدرت اصدك كلامه لان اعرفه من نظراته اذا بي شي هو راح بسرعه دخل لغرفته بس اني متحملت كلت اشوف هذا اشبي رحت دخلت عليه كتله محمود اشبيك اشو دخلت وجهك مايتفسر حجه بعصبية

محمود ..جنة ماكو شي كتلكم اتعاركت ويا ولد جنا نشاقه اني ماتحملت شقاه اتعاركت ويا

جنة .....امممم شو مادري احس مااصدكك مادري ليش وهاي سالفتك مو خالي لان كلبي انقبض من شفتك ...

رجع دار وجها عني كال ماكو شي والله لاتخلين بالج ويله اطلعي اخلي ابدل ملابسي سوة نفسه يبدل بملابسه حتى اطلع وطبعا طول مااحجي ويا احسه خانكته عبرة وعيونه مليانه دموع ..

بس تركته واني كلبي مقبوض ومادري ليش حسيت نفسي مقهورة وضايجة الا اشويه اختنك .....

وبعدها ...

قاسم .. يله جنة خلي نروح كافي صار المغرب خلي نوصل لبيت اريد ارتاح والله تعبان ..

جنة ..ماشي بس احظر جنطتي وابدل ونروح والله رحت بدلت وشلت جنطتي وبدلت لمجودي هم ورجعنا لبيت بس طول الطريق احس راح اختنك ..وضايجة

وقاسم ....كل دقيقه يسأل جنه اشبيج شو مو طبيعيه

جنة .....لا ماكو شي بس احس نفسي ضايجة ومخنوكة ...

قاسم ....ليش اخاف جنتي تريدين تبقين اكثر بيت اهلج واني اجيت رجعتج ....

جنة ....لا لا كافي صارلي يومين اهنا اني هم تعبت ردت ارجع ..وسكتنا ورجعنا لبيت بدلنا ورتبت غراضي ونظفت البيت لان جنت تاركته يومين وسويت العشا اكلنا وشربنا جاي وهم رجعت نظفت المواعين العشا ومسحت البيت وكعدت

قاسم ..اني راح انام

جنة ..ماشي ..
راح اكلكم شغله قاسم رجع نفس قبل اكل ونوم وشغل مايدري شي عني ولا عن ابنه واني تعبت طول الوقت اراقبه مثل طفل وبس ادور طرق اشلون اعدله خلص بعد كلبي خلص ماظل بيه حيل وياه شيسوي خلي يسوي عندي ابني يسوه الدنيا كلها الله يحفظه اليه

خلصت شغلي وكعدت وحدنا اني ومجود وقاسم نام ومجود اتمدد ع رجليه يتابع افلام الكارتون واني كعدت كلت اشويه اتصفح بالفيس ضوجة وخنكة ماتروح مني ..

كلت اوووف اشبيه اليوم ياربي اشصارلي فجأة تركت الفون رحت اتوضيت وصليت وقريت اشويه قران ورجعت هم كعدت اتصفح ودخلت ع الماسنجر شفت اخوية كاعد نشط دزيتله ...

هلووو .ممد ....اني ادلعه اكوله ممد

هو هم ردلي هلو جانم ...((جانم يعني روحي))

جنه ..ممد الله عليك اشبيك اليوم شو مامرتاحه

محمود ....جنونه جانم والله ماكو شي كافي تلزكين بشغله من تشوفين ....

فعلا اني هجي من اريد اعرف شي اضل احوص والزك ابهاي الشغله لازم اعرفها ...

جنه ....ممد صدكني اعرفك اكثر من نفسك فدوة احجيلي اشصار وياك اليوم وهجي جان وجهك ...

ضليت انتظر مارد عليه واني تعبت من الانتظار متحملت كاعده على اعصابي انتظر رده هو غلس ....

كتله اني الك وين تروح مني اليوم الا اعرف ..كمت اخذت فوني طلعت بره لحوش خابرته يرن ومايجاوب وبالاخير كتبتله ...

ممد والله اذا ماجاوبت صدكني اطلع من البيت اجي اشوف اشبيك وداعت مجود اسويها رد عليه

محمود ....جنه اشبيج لزكتي كعدي وعقلي اشبيج ..

جنه ...ممد جاوب على اتصالي يله بسرعه ترى اعصابي تعبت .

والله شفته هو خابر وكبل جاوبت كتله ها شكو يله احجي

ممد.....شكو انتي اشبيج مليون مرة كلت ماكو شي

جنة ...ممد احجي وبدون تعصب يله ...سكت اشويه واخذ نفس وياحسره ...

محمود ....ماشي جنه راح احجيلي لان هوايا لحيتي واني تعبت منج بس اوعديني ماتتهورين

جنه ....لا يله هاديه بس احجي لا تقلقني

ممد....وين قاسم

جنه ....نايم ليش

ممد ....هجي بس سألت

جنه ....ديله احجي لاتغير الموضوع

ممد ...ماشي جنه أمجد مريض وبالسرطان 😔

جنه ....😲 شنوووووووووو اشكلت واشلون عرفت ومنو كلك وصحيح هالخبر لو لا كمت احجي بسرعه واتنفس بسرعه وعبره خانكتني واحجي ....

ممد....ولج اوكفي اوكفي اشبيج اخذتيني حاصل فاصل خليني احجي واهدي واتنفسي راح تختنكين ...

جنه ...هاديه بس احجي منو كلك واشلون عرفت فدوة

محمود ....اليوم شفتهم يم الدكتور رحت للدكتور علمود ايدي اول مادخلت العمارة شفتهم يريدون يطلعون هو واخو واخته جانت وياهم .....

ملاحظه ......طبعا اخويه الصغير من صغره يعرف أمجد ويحبه هم بس هو الوحيد يعرف علاقتي بأمجد وهو هم يحبه ويموت عليه هوايا يعزه يكول كلش فقير وخوش ولد مو بس اخوي يحبه المنطقه كلها تحبه والكل يشهد بأخلاقه وكرمه 😔

نرجع لاخويه .....

محمود .....شفتهم ديطلعون شافني اجا يمي سلم عليه واتصافحنا كتله ها مجود خير كال والله مريض واجيت لدكتور وانداريت شفت اخو هم سلمت عليه واخته واكفه على صفحة وتبجي ....

أمجد ..... محمود الله جابك عليه والله جنت محتاج شوفتك اريد فد طلب منك اصير ممنون منك اذا سويته الي

محمود .....كول امرني اذا اكدر ليش لا خير احجي

أمجد .....جنة

محمود .....اشبيها كول امجد شتريد واشبيك مهموم قلقتني

أمجد ..... محتاج اشوفها فدوة واسمع صوتها 💔

محمود ...خير أمجد كول طبعا من قلقي ماعرف اشلون ماحسيت كتله شكو امجد جنة بيتنا هسه يكول هجي كلت

أمجد ....الله عليك فدوة خلي اروح اشوفها اخر طلب مني واخر مرة اريد اشوفها واسمع صوتها

محمود ...سحبني من ايدي كال يله ممد خلي اروح اشوفها وكفته اوكف امجد وين تريد تشوفها هي متزوجة فدوة اتركها خلي تعيش حياتها وانت عيش حياتك كافي هاي مو حب هاي عذاب دمار كافي امجد اصحى

أمجد ....خلي اشوفها داكولك هاي اخر مرة والله ولك كلبي نار باجر عمليتي اريد اسمع صوتها واشبع من عيونها اكولك اخر طلب افهمني وحس بيه الله يخليك ...😔

محمود ....شفته هجي كلبي صار نار هوايا انقهرت بس كلت اشبيك امجد ياعمليه خير خوفتني وليش تكول هذا اخر طلب ....

أمجد ...ممد اني مريض بالسرطان وباجر اروح لسليمانيه واسوي عمليه اخاف اموت وتبقى حسرة بكلبي صوتها ووجها .

محمود ...طبعا هوايه انقهرت وانصدمت من كال بمرضه بكلبي فكرت كلت اكيد جنه هم راح تموت من القهر ..اااوف امجد ماعرف شكولك بس امرني اذا محتاج اي شي اني موجود ....

امجد ....اي محتاج جنه اخر مرة يله اني رايح اشوفها ماتحمل بعد ...

محمود ....راد يمشي لزمت ايده اوكف امجد فدوة لاتسوي هجي لاتسببلها مشكله زوجها بيتنا هسه الله يخليك موكته من سمع اسم زوجج

أمجد .....من كال زوجها يمها حسيت ناررر بركان بكلبي لك انهاريت وللللللللللللللك يازوج يازوج جنة مالتي بس محد يستاهلها ...

من عصبيه والقهر والغصة كام يدفر بالكراسي بالمجمع ويصرخ بالكوة سكتنا وهدينا اني واخو واخته كتله فدوة امجد لاتسوي هجي ادري انت تحبها بس اكيد ماتريد تسببلها مشكله ...

امجد .....طول عمري خايف عليها ولله واحبها لو مااخاف عليها جان من زمان خربت حياتها واخذتها بس ماحبيت اصير اناني اخرب حياتها علمود بس اسعد نفسي بس داكول اخر طلب يمكن اموت وتبقى غصة بكلبي اخاف اموت تبقى منفوسه لان روحي ونفسي بيها ماكدر ماكدر ع الاقل ارحمو كلبي وسوولي هالطلب ..😔💔

ماشي ممد بس راح اكلك امانه بركبتك تكولها تخابرني باجر الصبح اريد ادخل للعمليه واني مرتاح احلف تكول الها

محمود ....اوووف اوووف ماشي تدلل بس امجد جنه اذا تسمع راح تنقهر

امجد ....فدوة لااني اعرف اشلون اخليها ماتنقهر اموت ومااقهرها هي روحي اكو احد يقهر روحها

محمود ....ااااااااخ بكلبي مادري شكول الي فرقكم وخلاكم بهالعذاب كتله اوف امجد اوف شنو هالحب كافي فدوة انسى انسى وعيش حياتك يا ما ياما حبو وافترقوا وشافوا حياتهم وانت صير واحد من هذول

امجد ....شنسى شنسى هااا انسى طيبة كلبها لو انسى ترافتها لو انسى برائة عيونها وجها لو صوتها لحد هسه بأذني يوميه انام صوتها بأذني وعيونها كبال عيوني واحلم بيها واحجي وياها هااااا شنسى ....

محمود ....اوف ماشي حبيبي تدلل راح احجي وياها واخليها تحجي وياك كال بس وعد رجال هااا تكولها كتله اي والله راح اكول انت امنتني بعد هاي هيه ...

ورجعت شفتج بس ماتجرئت احجيلج خفت تبين عليج وزوجج يمنا وهم خايف عليج من القهر ...

جنه..... طبعا داسمع حجي اخوي هو جان يحجي واني دموعي تجري عليه لان مايستاهل هالشي مني ومظل بيه حيل كعدت بنص الحوش بجيت وجسمي خدر من الخبر والكلام وتوسلات امجد لخوي حتى يكولي بس احجي ويا كعدت بجيت بجيت معرفت شسوي احتاريت صار حرب بين عقلي وقلبي لان عقلي يكول خلي لاتخابري عوفي خلي ينسى وخلي بلكي يكرهني ويعيش حياته وقلبي يكول لااااااا روحي احجي وضليت هجي لصبح ...

مانمت طبعا من الصدمه والقهر كلساع افكر بي اكول هسه دخل العمليه هسه يطلع او اخاف مايطلع زين اذا صار عليه شي شسوي ياترى انقهر عليه لو مااهتم لااااا اسم الله عليه والله ماكدر صح احنا ابعاد واني عايشه حياتي بس مااكدر انساه افضاله وكف ويايا صار اليه صديق وصديقه ام واب واخ واخت اتمرمر من شغل لشغل بسببي بس يجمع فلوس ونتزوج وكل همه يسعدني واخذ ضربه من امي وذلوا وهانوا هو واهله ....

بعدها انتظرت لظهر بس شنو احسس كل دقيقه تمر عليه سنة كل دقيقه اكول راح اخابر وبعدين اخاف واتراجع جنت كاعده موبايل بيدي شفت اخويه خابرني ..كال ها جنو شتسوين ماحجيتي وياامجد كتله لا

محمود .....اني خابرته هسه اخوه جاوبني كال بعده بالعمليه من الصبح دخلوا لحد هسه ماطلع ...انتظره بس يطلع واني اطمنج ...

جنة ...بجيت بجي ماصايرة ابد
كتله لاخويا فدوة ممد من يطلع ويصحى خابرني وسوي جماعي ميخالف راح احجي ويا كال تدللين هو اني كل دقيقه اخابر كتله ماشي يله انتظر ...

جنة ....طبعا اشكد كرهت نفسي بهاي اللحظه كلت خاف هسه مايطلع من العمليه واني لاخابرته ولاشفته اووووف ياربي شسوي حرت والله حرت خايفه عليه وخايفه ع نفسي حياتي تخرب وخايفه من عقاب رب العالمين شلت راسي لسماء واني ابجي اوووووووف ربي ارحمني ولله مااذنبنا من حبينا من كل كلبنا ربي هو جان اول شخص بحياتي من بعد اهلي يارب ارحمني شنو من القلب خلقت بينا ياربي طبعا اني بيه طبع اذا ماتعرفون عرفوها هسه من احب شخص يعني موشرط تكون حبيب لا حتى لو صديقه من احبه خلص بعد اصير اتعلق بيه كلش فراكه يموتني موبيدي هذا شي والله ابدددددد....

ظليت لحد ماانتظرت اني اكول انتظرت بس كل دقيقه اخابر اخويه ف ها اشصار يكول جنة اصبري كتلج اني كبل اخابرج والله انتظري هلكت من البجي والانتظار وطول الليل مانايمه ماعرف اشلون نمت وماحسيت ع نفسي فجاة فزيت ع صوت ابني يكول ماما كومي تلفونج كل دقيقه يرن ..

كعدت مثل المخبله ركضت ع التلفون شفت اخويا مخابرني يمكن اكثر من ٥٠ مرة مادري شصارت بيه كلبي راد يوكف هلكد ما يدك سريع واريد ادور ع اسم اخويا ماالكه هو كدامي هلكد مااتوترت وبيدي اريد اتصل شفته هو اتصل كال ها جنو لج وينج كل دقيقه اخابرج كتله نمت وماحسيت فدوة اشصار ..

كال لج طلع طلع وبده يصحى وسامع كايلين اله جنة تريد تحجي وياك مخبلهم بس يريد يتصلون عليج كتله خابر فدوة اريد احجي ويا كال ابقي بالخط هسه اسوي مكالمه جماعيه واحجي بس فدوة بلا دموع خطيه ارحمي تعبان كتله ماشي ..

بين مااخويه يتصل اني مسحت دموعي وشربت ماي كلت خلي اقوي نفسي لان اعرفه يحس عليه من النفس الي اخذه خليت تلفون بأذني سمعت صار صوت وهوسه وشه بعدين سمعت اخويه يكول جنو احجي وياج بلخط يبوووو هالحجي حسيت صارت بيه هبوط لان ماسامع صوته من اخر لقاء ااااااااااااخ 😭

اني اهنا انخرست اريد احجي مااكدر حتى تيهت كلمه الوو مااعرف شحجي بس سمعت صوت يكول جنتي كافي تاخذين نفس ولج راح تموتين بس بصوت تعبان ..

من سمعت منه هالحجي انفجرت بالبجي بس ماطلعت صوت صرت اضرب بيدي ع حلكي بس اسكت بعدين كال كافي لج فديت دموعج لج عيونج لونه راحت اخذت نفس كتله اشلونك امجد

امجد .....ااااخ لج هسه صرت زين صوتج دواي بعد مااخذ دوا بس هو يحجي واني ابجي بلا صوت ماريده يحس بس هو وييين والله يحس كلشششششش بيه فرق بين امجد وقاسم بين السما والكاع

المهم حمدلله ع سلامتك كال انتي سلامتي وكل حياتي ونفسي واوكسجيني 💔

جنة ....😭 كاااافي فدوة كافي جم مرة صرت اكول امجد انساني اني عايشه حياتي بيتي ويا زوجي وابني كال ابنج مجود غمضت عيوني قوي وخذت نفس قوي لان داحس اختنك ردت اشويه اقسي عليه ولو كلبي ماينطيني بس لصالحه حتى ينسى ويعيش كتله امجد فدوة اني نسيت حبنا وعشت حياتي وياابني وزوجي احبهم كال اعرف واعرف هسه تحبين زوجج

امجد ....جنه اني مراح اكولج حبييني لا حبي زوجج وحبي ابنج ومن حقج هالشي مراح اكولج شي بالعكس اني فرحانه بيج لان غيرج شوفي شيسون بس انتي نظيفه وطاهرة لج انتي ملاك ماكو مثلج بس اني اضل احبج وتعرفين ليش مااتزوج حتى حبج مايروح من قلبي مااريد ادخل احد بقلبي غيرج والحمدلله لحد هسه يحقلي احبببببببج وراح اعيش ع ذكرى حبج لاخر نفس عندي وهاي وعد كدامج وكدام اهلي وكدام الله ...
بس جنه فدوة اريد منج اخر كلمتين

جنه .....شنو

امجد ....الاولى كولي بعدني احبك بس بكلبي لان اخر لقاء انتي كلتي اكرهك ومااحبك بعد صحيح هالحجي

جنة ....بكلبي كتله لا مو صحيح بس اذا اكولها اي احبك اعذبك واذا ماكلتها هم اعذبك ياربي حيره حبيت اغير الموضوع ماجاوبته كتله شنو طلبك الثاني

امجد ....جر حسرة ...كال ماشي طلب ثاني مو طلب وانما وصية فدوة جنة اذا متت تجين بنفسج تدفنين الحلقة الي يمج وشي ثاني تروحين لبيتنا اكو شغلات الج

جنة ...متت من كلامه كتله فدوة لاتكول هجي انت راح تصير زين وتكوم وتعيش حياتك

امجد ..جنتي اوعديني تسوين الي كتلج عليه

جنة ..كأنما جان يعرف راح يموت كتله اوعدك واهنا اخوه اخذ التلفون منه وبعدين سمعت اخوه يبجي كال جنه فدوة سوي الي يريده لان المرض منتشر بجسمه

اااااااخ ياالله اهنا متت من البجي لان صارلي ساعه حابسه انفاسي انفجرت فد مرة بجيت اااااااااخ ياالله ليش هجي ليشششش هذا المرض الا بهذا الانسان اووووف شنو ذنبنا تعاقبنا هجي ..

اخوه كال فدوة جنه ارحمي حالج وارحمي كتله لاخوه احبه ولله احبه بس ماحبيت اكول اله كال اعرف يله راح اروح يمه هسه وانتي لاتخابري بعد خلي تصير اخر مكالمه هسه راح يرتاح واخوج يتواصل ويانا ننطي اخباره يوصله الج كتله تمام وسديت الخط ...

ومشيت ايامي كله افكر بكلامه وبالي يمه حاولت اشغل نفسي بيتي ويا ابني وزوجي ويا صديقاتي وبديت اكتب قصص فعلا كدرت الهي نفسسي مراح اكلكم نسيت لاااا بس اتناسيت الموضوع فقط بالنهار اما بالليل 😔 من اخلي راسي ع المخده كل ايامنا وسوالفنا

وكلامه ومرضه يمرر كدام عيني افكر وابجي وانام جنت دوم اخلي راسي جوة المخدة حتى من ابجي محد يحس بيه وضليت فترة هجي لحد مايوم اجا هاليوم الاسود الي دمر قلبي لاااا شنو دمره والله تحطمت حسيت الدنيا اسودت بعيني 😣

فد يوم كعدت من الصبح اني بنفسي اتعجبت اشبيه شو كلبي معصور مابيه حيل اتنفس شو اليوم بس افكر بأمجد شنو شبي معقوله صارله وبعدين ارجع اكول لالااااا اسم الله شنو هالتفكير اسم عليه لااكيد معدتي موتمام لان قبل يومين جنت مريضه بمعدتي صار بي نزيف ف كلت يمكن مرض هجي احس ..

زين اذا مرض توجع معدتي وعقلي وكلبي اشبيهم ديفكرون بأمجد لهيت نفسي لحد الليل وتعبت واخذت علاج بس وجع كلبي مايروح وصرت اختنك واضوج وتجيني بجي بلا سبب اروح يم زوجي اكله كلبي ديوجعني اريد ابجي مادري اشبيه يكول شسويلج غير انتي مريضه روحي اكعدي بالحوش ابجي وهسه تصيرين زينه باوعتله هجي 😒

واخذت موبايلي وكعدت بالحوش وفعلا انفجرت بالبجي واحس انفاس امجد قريبه عليه ولله ولله ولله حتى شميت عطره قريب مني اتصفحت بالفيس وبعدين كلت خلي اراسل اخويه احجي ويا يروح يجيبلي اخباره اتعجبت اخويا مافاتح نت وحتى اليوم كامل طالع من النت اخابره ع الرقم مايجاوب كلت اكيد هسه لو يجي ويا حبيبته او نايم لان خطيه تعبان هم يشتغل وهم يدرس ..

بقيت هجي وحاولت اروح انام قبل لاانام صليت وقريت قران كلت بلكي ارتاح ونفس الشي اجيت غمضت عيني واقرا ايات ماادري اشلون غفيت نمت ساعه وفزيت شفت حلم وهل حلم حيل خوفني وقلقني شفته بالحلم عرسه ولابس قاط ابيض وهوسه واني هم رايحه لعرسه وفرحانين اله وحتى خواته فرحانات ويركصون بس هو لا جان مهموم وجه شاحب ولحيته طولانه 😔😭

واني تكولون عرسي هلكد فرحانه ويمكن حتى اكثر من خواته وخليت ايدي ع كلبي يمممه اكيد صايرله شي ليش هجي احلم بي وافكر بي ورجعت بجيت وحاولت اتصل باخويه هم ماكو مادري لحد اشكد كعدت ورجعت غفيت من التفكير والبجي ونفس الحلم شفته بهل ليله السودة 😣

الصبح كعدت من ال5 الفجر بعد مانمت وراها زوجي كعد سويتله ريوك اكل وبدل وطلع لشغل ضليت كاعده بالمطبخ لحد ماصارت ساعه 8 والتلفون بيدي كاعده اتصفح شفت اخويه اجا لخط دزلي هلو جنو مثل المخبله كبل خابرته كتله وين جنت ممد راح اموت

محمود ...ليش حياتي اشبيج

جنه ...ممد فدوة اريد اخبار امجد

ممد...ليش عمري اشسامعه......(طبعا ديحجي بس صوته حييييييل تعبان)

جنه .....ماسامعه شي بس من البارحه مادري ليش افكر بي وكلبي ديوجعني اخاف صايرله شي

محمود ....سكتت اشويه وبعد يعني اش صايرله مثل شنو شنو تريدين تعرفين جنه

جنه ....ممد اشبيك شو هجي تحجي ويايه داكلك كلبي نار عليه

ممد ....جنه انتي حلمانه بي وهجي صايره بيج لووووو .....سكت وسمعت شهكاته

جنه ....شنوووو ممد اشبيك لو شنووو كوووووول احجي فدوة ممد اشبيك ليش ساكت

محمود .... 😔

وللحكاية بقية ...

انتظروني باجر ان شاءالله بنفس الوقت وتكملة القصة

يتبع ...

#سارة_المجيد🎀