#اضعت_ربيع_عمري

#بارت15وما_قبل_الاخير

#بقلمي_سارة_المجيد

مساء الورد والقرنفل ع اغلى متابعين
🌷🌹🌷🌹🌷🌹🌷🌹🌷🌹🌷🌹🌷

جنة ..بس للاسف مجنت ادري المي ديمشي من جوايه 😔😔

لان قاسم خلال هل فترة بده يتغير عليه وكله هاملني وميتقربلي استغربت من هل شي ...جنت خايفه بس لا هم راجع لعلاقته بهدى
فديوم باليل جنت كاعدة اتصفح بالفيس وقاسم نايم جنت حيل ضايجة ....شفت مريم دخلت ع الخط ودزت رساله كتبت هلو رديت الها هلاوات .....

مريم .. اشلونج

جنة ..موزينه وضايجة حيل

مريم ..خير حبي اشبيج كولي احجيلي

جنة .. زوجي مادري اشبي

مريم ..ليش اشبي

جنة ..مادري صاير يبتعد عني هوايا ومن اروح يمه مايقبل انام بصفه يتركني ويروح لغرفة ثانيه

مريم ..ماسالتي اشبي ليش هيج يتصرف وياج

جنة ..بلي سئلته بس هو يكول تعبان من الشغل

مريم ...اي هاي هيه يمعودة عبالي صاير شي جبير

جنة ...اني حاسه اكو شي لان قاسم متغير هواي

مريم ..ضحكت وراها كتلها جنونه دزيلي صورة كف ايدج

جنة ..بتعجب ليش !!؟؟؟

مريم ...يمعودة هسه دزي وبعدين افهمج ديله هسه دزيها

جنة ...ماشي ياخبله ولو مااعرف شتسوين بس عادي هسه ادزلج والله دزيت الها صورة كف ايدي

مريم ..انتظري دقايق واجاوبج

جنة ...ماشي تركتها فد عشر دقايق دزتلي رساله وفتحتها وقريتها جانت كاتبه بيها زوجج مايحبج اكو وحدة ثانيه بحياته يموت عليها لهجي هاملج وانتي وزوجج ماراح تستمرون راح تنفصلون وانتي قدرج بيد ابنج جانت كلمات مو مفهومه وجانت كاتبه انتي مصيرج تنقتلين او تموتين نفسج

جنة ...كتبت الها ياستار شنو هالفال بنص ليالي وبعدين يافهيمه امنين جبتي هالمعلمومة

مريم ...قريت كف ايدج

جنة ...ضحكت كتلها يمعودة شنو هالخرافات هذا كله دجل ماعندي يقين بي اني 🙄

مريم ..مو خرافات وراح يطلع كل كلامي صحيح وهسه تشوفين بعينج

جنة ..مانكر صارت بيه خوفه كتلها وانتي اشلون تعرفين هشغلات

مريم ...اعرف من زمان وحدة علمتني وانطتني كتاب مال سحر والشعوذة

جنة ..اصخام 😨اني اهنا ماانكر صرت اخاف منها ومن كلامها بعدين ختمت وياها ورحت يم قاسم ردت انام يمه دفعني كال روحي لغير مكان نامي مكدرت انام بعد

ضليت افكر بكلام مريم وثانيا حجيت كل كلامها لقاسم

قاسم ..ضحكت وكتلها كله خرافات لتصدكين وبعدين اني موعيني زايغه هي تحب تجي يمي😏

جنة ...اني هنا انصدمت 😨كتله اوكف اوكف وين تجي يمك واشوكت

قاسم ..ها ...لالا بس هي مرات انتي من تروحين تجي تسال عليج واكولها ماكو اشويه توكف تشاقة ويايه وتروح

جنة ..ماحجيت شي سكتت بس مادري حسيت اكو شي غريب ديصير من وره ظهري شنو هل شي مادري بس لازم اعرفه

وراها جنت اشوفها بلخط نشط ماتراسلني كلت خلي اراسلها دزيت رساله جاوبتني

مريم ...هلا جنة اسفه والله جنت احجي ويااختي

جنة ...عادي وبعدين كتلها اني زعلانه عليج

مريم ..ليش ؟

جنة ...ليش ماتجيني مثل قبل

مريم ...والله امي ماتقبل

جنة ..هااا امج ماتقبل تجين يمي من اني بالبيت بس من ماموجودة اني بالبيت امج تقبل تجين😏

مريم ..احم شنو قصدج عبالج اجي يم زوجج لاعيني انتبهي

جنة ..ضحكت كتلها ماكلت هجي بس اشوف انخبصتي ودخلتي زوجي بالموضوع اشبيج 🙄 كامت تبجي بدموع التماسيح

مريم ...لا ولله موهجي بس بالي مومرتاح عندي مشاكل بالبيت اعذريني اني اسفه انفعلت عليج

جنة ..ماشي اني عاذرتج وراها جنت فديوم اني بالحمام اسبح وطلعت شفت زوجي ماكو رحت طلعت برة شفت واكف بالكراج يم سيارته ومدنك راسه لان جانت الدنيا المغرب اشويه ضلمه اهنا حسيت اكوشي جبير وحسيت خنكة وكلبي يدك لدرجة اشويه ويطلع من صدري رحت ع كيف سمعت ديحجي بهمس احبج هجي يكول
وراها شفته واكف وحاضن مريم ديبوسها من شفايفها وهي مغمضه وذايبه بين ايده اني اهنا شهكت شهكة قويه وضربت ايدي ع صدري

كلت مريم 😱 هما انخبصو واندارو عليه شافوني بس هيه مابقت بوجها قطرة دم
.... ولاعرفت اشتحجي وراحت ركض ....
وطلعت واني بقيت مصدومه بمكاني ....وقاسم هم مصدوم لان شفته يريد يحجي بس مايكدر
اجه بأتجاهي ...راد يحضني اني اهنا انهاريت دفعته من صدرة ....وكعدت اضرب واملخ بنفسي ....ورحت ركضت جوة اكسر الغراض البيت واصرخ ياجبان ....اشلون انطاك كلبك هجي تسوي بيه اني الي دمرت عمري وطفولتي وياكم واخذتو كل فرحتي ....

وهسه تخوني وياصديقتي هسه ادري ماخفت مني ومتخاف من رب العالمين

قاسم ..الموقف الي شافتني بي جنة اتمنيت الكاع تنشك وتبلعني صح غلطت بس مريم هيه الي جانت تغريني واني رجال مو نبي معصوم شسوي الشيطان غواني واخضعتلها ...ردت احظنها واهديها دفعتني وكامت اتملخ نفسها لايالله ليصير بيها شي خررب حظي شسويت اني ...طبيت وراها وكتلها ولج والله هي انطنتي مجال

حتئ كالت جنة جم مرة حاجيه يمي انو هي ماتحبك بس علمود ابنك باقي وياك جانت دوم من انتي تروحين لبيت اهلج تجي تجيبلي اكلات مادري ليش كرهتج صرتي بعيني وحدة ثانيه ماجنت اريد اشوفج

جنة ..باوعت عليه بعين كلها دم مسحت عيوني وكمت وكفت كتله هسه اني ماريد اشوفك اني كرهتك وهاي الحقيرة الا احرك بيتها ع راسها هي وحدة ساقطة كمت ركضت اطلع من البيت اروح لبيتهم هو ماقبل لزمني من خصري شالني بحظنه دخلني جوة كتله عوفني ماريدك بعد ياخاين

قاسم ..مااعوفج ..كافي لتسوين هيج الخاطر الله كافي الله يلعن الشيطان ...

جنة ...دفعته بكل قوتي ...عدنا باب من ورة وعدنا حوش وراني مخلين بي نفط وبانزين مال سيارة رحت ركض فتحت الباب وجريت بيدي جلكان بس ماعرفت بنزين لو نفط جريت وشلته ذبيته كله عليه من راسي لحد رجليه

جريت ايدي اخذ شخاطة ماحسيت الاسمعت صوت امجد من ورايا يبجي ويصرخ لااااااا ماما فدوة اروحلج لاتحركين نفسج اموت بدونج هاي كلمه من ابني خلتني اموت الف موته بدقيقه وحدة وراها قاسم هم سمع صوت امجد يبجي ويصرخ مفزوع من الموقف الي شافه مني

تركت كلشي وكعدت بالكاع بمكاني ابجي وادك والطم اكول ياربي اشسويت ولاواحد دخل بحياتي اتهنيت وياه يعني لازم يخونني من كد لطم ودك فقدت ماحسيت بشي بعدين فتحت عيني اشويه بس جنت بالكوة افتحها جنت احس شايله شي ثكيل ع راسي واحس كلشي بجسمي يوجعني

فتحت عيني وشفت اهلي وقاسم وابني كلهم فوك راسي هلكد ماباجين عيونهم صاير دم كالو الحمدلله فتحتي عينج اول شخص باوعت عليه هو ابني اجه ركض عليه وحضتنه كتلهم شكو وشجابني اهنا كالو صارلج اسبوع بالغيبوبه لان ارتفع ضغطج وصار بيج انهيار عصبي

هلكد ماانفعلت وانصدمت ماشفت شي كدامي هلكد ماكسرت الغراض واذيت نفسي من الوجع الي بگلبي وراها صرت زينه اشويه رحت لبيت اهلي مارجعت لبيتي هو هم ماعندة عين يحجي شي بقيت اسبوع وراها اتحسنت خابرته كتله تعال اليوم بيت اهلي اريد اشوفك

قاسم ...دقايق واني يمج

جنة ..والله عاد اجه كعد يم ابويه وامي واخويه الصغير كاعد ويانه كمت وكفت كتله ماريدك بعد طلكني هو انصدم بس ماعرف اشيحجي بس امي وابويه عصبوا عليه كالو شبيج اتخبلتي ماعدنا ابنيه تتطلك

وبعدين لحد هسه احنا ماعرفنا اشصارلكم باوعت ع قاسم شفت هو هم يباوع عليه بس ماعرف شيكول وشنو السبب كتلهم ماريده لان هاملنا ومايصرف علينه وكل مااكوله شي يتعارك ويايا تعبت من عندة

ماكلت الهم بسبب الخيانه ومادري ليش هجي كلت وراها اهلي كالو هذا مو سبب هسه تروحين تشيلين اغراضج وتروحين شفت اخويه يغمزلي يعني سوي الي يكولون عفتهم وطلعت شفت اخويه اجه ورايه

محمود ..حبيبتي جنة روحي لخاطر بابا لان طول ماجنتي بالمستشفئ هو جان مقهور ويرتفع عده السكر والضغط ابتلينا وياج وويا هسه لاتكسرين كلمتة وروحي حتى ماينقهر موزين عليه

جنة ..سمعت هيجي من اخويه كعدت جريت حسرة وكمت سويت مثل ماكالوا ورجعت لبيتي بس بقينا مثل الاغراب هو بغرفة واني بغرفة عشنا شهور هجي ابعاد عن بعض بس مرات اني نايمه احس ايد فوك خصري افتح عيوني اشوف قاسم حاضني وديبوس بيه ويشمني مرات جنت حتئ اشوف دمعته قبل ماندخل لعام 2019 جنت كاعدة وياامجد نلعب ونضحك جنت اركض ورة امجد فجأة طلع كبالي قاسم كبل حظني اني دفعته كتله وخر جرني من ايدي كال لازم تكعدين خلي احجي وياج

قاسم ..شوفي والله والله جنة هاي جانت دوم تجيني وتلطش بيه ومرة كتلها من الباب جنة ماموجودة وراها كامت من تجي تجيبلي اكل او كيك والله ماعرف ليش صرت اكرهكم انتي وابني او مرات تحجي عليج تكول هي ماتحبك

جنة ..هي هم كالت عليك زوجج مايحبج او يحب غيرج لهجي هاملج

قاسم ..ايا حقيرة الساقطة ولج والله عفتها والله طردتها حتئ ضربتها كتلها اذا اشوفج اتعتبين باب بيتي اموتج وافضحج تروحين فدوة لمرتي

جنة ..اريد اروح احجي وياخالتها

قاسم ..حبيبي عوفيها بداعتي خلي تولي اوعدج مااهملج ولااتقرب لاي احد غيرج وعد شرف والله بس انتي سامحيني وجربيني اذا شفتي شي غلط مني شتسوين سوي بيه بعدين امجد هم كال ماما سامحي رجعوا لبعض مثل قبل اكعدوا اضحكوا والله صاير البيت يخنك والله مرات اشوف بابا بالحوش كاعد يبجي عليج سامحي لخاطري😢😢

جنة ..مكدرت احجي شي علمود ابني كتله سامحتك ثاني يوم ماطلع لشغل كال كومي بدلي نروح اشويه نطلع كتله اخذ ابنك ورح مابيه حيل كام طفر عليه يبوسني ويحضني ويشتمني يكول وج مشتاق لريحتج وحظنج الدافي ههههه

قاسم ..جنت حييل مقهور لان هيج سويت بجنة ادري متستاهل خطية ردت ارجعها لحظني كتلها كومي اطلعكم مقبلت جريتها وحظنتها جنت مشتاقلها كثير ميت ع حظنها عصرتها عصر بحظني وبقيت ابوسها واشمها يممممه مريتي شكد احبج يرحنلج سبع فدوات الي يكرهنج ..بداعتي سامحيني ماتحمل هجرج الي 😭😭

جنة ... مكدرت اقسى عليه اكثر بعدين سامحته لان احبه وهم لخاطر ابني ماريدة ينقهر وراها رحنا لسوك الذهب

قاسم ..اوكفي هسه اجي ..اجيب شغلة موصي عليها صاحبي ..رحت للصياغة يم ولد صديقي صايغ كتله غراضي حاضره صديقي كال اي
جنة ..بقيت انتظره راح جاب صندوك اصغير فتحها بي 6 سوارت ذهب ومحبس وتراجي انطانيا كال هاي هديتج مال رأس سنه وهم جان عيد ميلادي براس السنه 😂 شفتهم حيل عجبوني جانوا كلها خليجي ورحنا لسوك اشترينا ملابس واخذلنا ايس كريم ورجعنا لبيت

ورة فترة سمعت من ابن خالت مريم انو مريم اتزوجت وراحت وقاسم صار مثل قبل واحسن بعد هسه يموووت عليه وهل مرة كتله اذا شفتك مسوي شي غلط كبل اقتلك وادفنك بالحديقة حتئ تصير يمي وماتبتعد هو يضحك ويكول صار اني بين ايديج شتسوين سوي بيه انتي حرة 😂😍

طبعا من رجعت لبيتي ورة مااكتشفت زوجي قاسم يخوني ويا صديقتي وسامحته بس بشرط كلت بعد ماكو موبايل وتنطيني كل حساباتك واقفهلم وتضمنلي حقي ....لان بصراحة فقدت الثقة بيك وماجاي اصدك اي احد بيكم

لان دائما انجرح من اقرب شخص اليه

قاسم .. اجيت يمها وجنت احوص اريدها وهيه مطنكرة عليه يربي شسوي هههه كتلها صاااار حبيبي ماشي يجرالج اخذي كلشي بس رجعي جنة الحلوة وسمعيني صوتج وضحتكج اي شي تردين اسويلج

جنة ..اي اي شي

قاسم ..اي أي شي

جنة ..اذا هجي عندي طلبين واذا سويتهن راح اسامحك ..

قاسم .. امممم شنو 🤔

جنة ..اول شي اريد اترجعلي كل ذهبي الي بعته الك وعلئ ذوقي هل مرة لان مال النيشان مااختاريته اني 😒

قاسم ..ماشي موافق يدلل الحلوو مالتي 😉
وشنو ثاني طلب

جنة .. اريدك تاخذني ع كربلاء لان كل مرة اشوفها بالتلفزيون واشوف اشلون الاجواء هناك وحلوة تجنن ضلت بكلبي اطلع
واروح اشوفها

قاسم ..ماشي راح اخذج وبعدين اجيج بصفها حضنتها بقيت امد ايدي ع جسمها وع صدرها وانفعلت 😍 ضليت بس اعصرها بحظني وابوسها واشمشم بيها بس دفعتني 😣

جنة ..مجنت مستعدة انطي نفسي لان عملته اتدك بكلبي بعدها دفعته كتله ماكو شي هسه لحد ماتسويلي الي اريدة

قاسم ..شنو جنو يعني ماتثقين بيه مو وعدتج اسويلج كلشي

جنة ..اي ولله ماكو ثقه واسفه موضوع الثقه انمسح من يمي مااكدر اثق بعد وخصوصا انت

قاسم ..مو عدتج بعد

جنة ..صح وعدت بس ماجاي اصدك ماتسوي بعد مكسورات 😒😒

قاسم ..ولله خلص بعد مااسوي وداعت عيونج توبت

جنة ..ميخالف خلي انتظر واشوف 🙄

قاسم ..اووف منج ولو كلبي متشعوط عليج ويريدج بس ميخالف راح تشوفين وهسه انتي بس تعالي نامي بحضني كلشي ماريد

جنة ..اجا حظني حييل كتله كافي والله اختنكت

قاسم ..اذا انتي صايرة كتكوته شسويلج

جنة ..غير من ضيمكم ومن قهركم ..طبعا هوايا ضعفت هل فترة وراها نمنا وهو حاظني مر فترة يوميه اكول ها اشوكت تسويلي طلبي كل يوم يكول باجر

والله ماعندي مجال من الصبح اطلع لشغل وارجع بلليل يعني ماتشوفين كلت ماعليه بيوم عطلتك تاخذني

قاسم ..الله كريم

جنة ..وبعدها اني التهيت ويا البيت والشغل ويا ابني وجنت الهي نفسي بالنت واقراء قصص مرات نسيت الح عليه بعد علمود الذهب

وهو هم جان دوم مشغول ويا شغلة وسيارته الئ ان فديوم امجد ابني كال بابا اريد ملابس جديدة واني هم كلت والله اني هم رايدة كم قطعة الملابس

قاسم ..ماشي باجر اتحظرو العصر اجي وراكم واخذكم لسوك

جنة ..ماشي ثاني يوم اتحظرنا وهو هم اجا اخذنا لسوك اشتريت ملابس لامجد وهم اليه وراها كملنا كلشي اخذنا لسوك الذهب ونزلنا كلت ليش نزلتنا اهنا

قاسم ..عندي شغله يم ولد صديقي تعالو ويايا لاتبقون وحدكم بالسيارة

جنة ..رحنا وياه ودخلنا محل صايغ الولد جان صديقه وشافه كام اتصافحوا وسلموا ع بعض بعدها قاسم كال للولد حظرت الغراض الي طلبتهن منك كال اي حاظر جاب صندوك مربع انطاها لزوجي وهو هم انطاها اليه كتله شنو هاي

قاسم ..طلبج فتحي وشوفي اذا عجبج اخذي واذا ما عجبج غيري والله فتحته وشفته جان فعلا حلوين ذوقه بالا ختيار الذهب عجبوني بس الحلقة ماعجبتني لان اني من بعت ذهبي حتئ الحلقة بعتها اله ف كلت الحلقة ماعجبتني كال ماشي غيريها والله غيرتها واخذنا الذهب وطلعنا كتله شو ما انطيت فلوس الذهب

قاسم ..منطي من زمان

جنة ..ورجعنا لبيت وبعدها صار زين ويايا اي شي نريده كبل يجيبها النا ورة اسبوع كال خلي نطلع لكربلاء شتكولين كتله الله صدك تحجي يعني راح تاخذني

قاسم ..اي اخذج ورة يومين اتفقنا نطلع

قاسم ..اذا تردين خابري اخوج الصغير هم بلكي يجي ويانا ع الواهس يغير الجو

جنة ..ماشي هسه اخابر رحت خابرت اخويه كتله باجر الصبح نطلع لكربلاء تجي ويانا كال اي اجي كتله لعد تعال من هسه ابقئ يمنا حتئ الصبح كبل منا نطلع كال ماشي ورة نص ساعه شفت امي تخابر كلت الو

امي ..وين تروحون باجر

جنة ..لكربلاء ان شاءالله

امي ..بله انتو مجانين وين تروحون الدنيا مو امان ونوب مرت اخوج ماباقيلها شي راح تولد

جنة ..مرت اخويه الوسطاني طبعا كتلها والله هاي حلمي اريد اشوف كربلاء وماطالعه بحياتي بأي مكان خلي ع اقل هسه اتونس

امي ..واذا مرت اخوج جابت بهل يومين شنسوي

وللحكاية بقية ..

انتظروني باجر ان شاءالله والبارت الاخير من القصة
راح انشوف التغييرات الجذرية لقاسم وجنة كونوا بألانتظار بنفس الموعد ..
احبببكم جثيير متابعيني وراح اشتاقلكم من هسه 😢😢

#يتبع ....

#سارة_المجيد🎀