#اضعت_ربيع_عمري

#بارت_11

#بقلمي_سارة_المجيد

مساؤؤؤ عسل صافي حبايبي
🌱🌹🌱🌹🌱🌹🌱🌹🌱🌹🌱🌹

قاسم .. جنة ماانكر من شفتها رجعت حبيتها 😓

جنة ..بصدمة وذهول سطر راسي سطر ....

قاسم ......وما انكر من شفتها اشتاقيتلها اكثر

جنة ..اهنا اني انصرعت وافترت بيه الدنيا ..مااعرف انقهر ع نفسي وع حياتي الي ضاعت لو ع زوجي الي ضيع حبه مثل مااني ضيعته كله بسبب اهالينا 😣  لو انقهر ع حياتي الي ماعرف شنو معناتها هسه ويا ...كتله واني شنو موقعي بحياتك هسه ..

قاسم ..انتي مرتي

جنة ... هه وهي حبيبتك صح وبعدها تركته ورحت نمت ومرت الايام هو مشغول بالتلفون يطلع برة يحجي لحد ساعه 2 بالليل ويله يرجع للغرفة واني وحدي بالغرفة الي مصبرني صلاتي ودعائي جنت دائما ادعي ربي يفرجها عليه لان فعلا اتحملت فوك طاقتي

وجنت دائما اخلي امل بداخلي انو هي نزوة بحياة قاسم يجي يوم ويمل منها بس جنت غلطانه مامل منها ابد مرات جان يجي يتقرب مني جنت اصدة ومااقبل لان نفسي ماتتقبله جان ياخذ حاجته مني بالغصب

لان جان يكول واذا احب وانتي مرتي الي حق عليج اسوي الاريده ..

جنة ..لا موبكيفك اني مو سلعة رخيصة اتشبع بيها غرائزك وشهوتك ..

قاسم ..انتي مرتي وواجب عليج طاعتي وغصبا عنج تنطيني حقي بيج
كزوج ..دفعتها ع الجرباية واجيت فوكاها وجتفت ايدها واخذت الي اريده منها وكمت رحت للحمام طبيت سبحت

جنة ..طكيت بجي حسيت نومته ويايه اغتصاب ..حقيش الي يحجه عنه الي ياخذه بالغصب ..حسيت روحي طلعت من جسمي بقيت مثل الجثة بلا روح كمت العن الوكت الي هيج سوا بيه ..

ماعندي احد اسند نفسي بي ..لا ام ولا اب ولا اخوان ولا حتى زوج .. حياتي صارت ع شرف الهاوية لو ما حرام انتحر واخلص من هل عيشة الغبرة ..

فهموني منو تتحمل الي شفته ..زوجي كدامي يخابر حبيبته وعيني عينك يكول اي احبها ويطلع وياها ويتصل بيها كله كدامي ..رغم هذا متحمله وجارعه الحنظل وساكته 😢 ..

ومرت الايام وهوه وهيه بعدهم يتواصلون ماتركوا بعض هي جانت اتداوم بكلية القانون وقاسم جان يجيبها وياخذها جان يكول بس تخلص دراستها اتزوجها ..

صارت عادي بالنسبه اليه جنت مجرد اله بالبيت بس اتحرك ما احجي ابد حياتنا صارت عبارة عن اكل وشرب ونوم ..

فد يوم جنت كاعدة اكلب بالتلفون وهوه اممدد يباوع ع التلفزيون دك تلفوني جانت بنت خالتي سلمت عليه وسألنا ع بعض كالت جنونه باجر تعالي من الصبح لبيت اهلج لان راح انسوي حفلة خطوبة لاخويا بيتكم لان هما بيتهم صغير وبيت البنيه شقة

ف كالوا نسويها بيتكم كلت ان شاءلله حبيبتي راح اجي اشويه فرحت كلت اشويه اشوف بنات خوالي وخالاتي واطلع من الجو الكئابة والحزن حجيت ويه قاسم ببرود كتله تكدر الصبح من تتطلع تاخذني وياك لبيت اهلي

قاسم ..باوعت عليها كتلها ليش شتسوين

جنة ..اظن سمعت مااكو داعي اعيد ...اصلا هو جان بالغرفة ويايه وسمع كوولشي بس يريد يحجيني

قاسم ..ماشي اخذج بس اكعدي من وكت حتى اذبج بطريقي ..

جنة ..ماشي ان شاءالله ..والله صار الصبح اخذني لبيت اهلي ورة اشويه اجوي كل اقاربنا بدينا نطبخ ونحظر الزينات والكوشه للعرسان اني وبنت خالتي اشويه نشتغل واشويه نتعارك ضحكنا وتونسنا خلصت الحفلة

كلش هلكنا خصوصا اني حسيت دخت من التعب بالليل اجه قاسم ورايه رجعت للبيت يومين اتمرضت مابيه حيل اكوم من الفراش خطيه مرت حماي ابتلت بيه

نسرين ..اكولج جنة اخاف حامل يولي

جنة ..لايمعودة ياحامل اني تعبت بالحفلة

نسرين ..زين اشوكت موعد الدورة مالتج

جنة ..ماعرف اشويه كعدت صفنت اتذكرت كتلها غايبه عليه 13يوم

نسرين ..ولج اكيد حامل

جنة ..لا كل مرة هجي تصير بيه اروح احلل يطلع ماكو شي ارجع فشلانه وهسه مامستعدة اروح اسوي تحليل وهم افشل 😔

نسرين ..لا والله العصر راح اخذج حتى تحللين لو ادري اسحلج الا اخذج اتسوين تحليل

جنة .. ماشي الله كريم ..والله صار العصر خابرت قاسم كتله اريد اروح للمستشفئ ويه مرت اخوك كال روحي رحنا اني وياها طلبت من ابو المختبر تحليل الحمل كال كعدي اسحب دم منج سحب دم كال انتظري نص ساعه لان جان ازدحام اكو هوايا ناس يمه

كعدنا انتظرنا ورة نص ساعه صاح بأسمي شفت انطاني ورقة تحليل بس ماكال شي بس طلب مني فلوس وانطيته لان رجال جان مخبوص ازدحام اخذت الورقة ورحت يم مرت حماي كتلها موكتلج راح افشل

نسرين .. ليش ماطلع شي

جنة ..يمعوده انطاني الورقة وطلب فلوس وبس ماحجه اي شي

نسرين ..خرررب يومج ولج غبيه روحي سألي الرجال مخبوص اكيد نسى غير انتي تسألين

جنة ... ها 🤔 ...داوكفي اروح اسأل رجعت كتله اخويه بلا زحمة انت انطيتي ورقة وماكتلي النتيجة شنو اخذ الورقة وباوع عليها كال مبروك اختي انتي حامل ..

اهنا اني عيوني دمعت من الفرحة لان جنت اتمنئ اسمع هالخبر وهالكلمة بالذات جنت محرومة منها 6 سنين كتله اخي انت متأكد يعني اني اخاف صاير عندك اشتباه يعني غير شخص كال لا هاي ورقتج وتحليلج انتي حامل اختي ..

ماعرفت اشصار بيه بلحظتها من الفرحة وكعت بالكاع واني ابجي اجت مرت حماي كومتني وتبجي ع بجيي والناس تباوع عليه من فرحتي نسيت اني بين الناس ماشفت اي احد كدامي وهاي احلللللئ فرحة بحياتي صارت ..

رجعنا للبيت واني رجليه ماتشيلني من الفرحة داحس اطير ماامشي ..بالليل اجه قاسم كال ليش رحتي للمستشفئ اشبيج من فرحتي نسيت كلشي الي سوا بيه نسيت هو يحب غيري ويريد يتزوجها كبل ابتسمت ماحسيت الا واني ذابة نفسي بحضنا ابجي

قاسم ..خير ولج شكو احجي ..

جنة .. اني حامل وخرني من حضنه كال صدك والله انتي حامل كتله اي والله يعني شفت الفرحة بعيونه وباسني

قاسم ..الف الحمدلله والشكر ياربي ..مبروك حياتي

جنة ..ومبروك الك هم راح تصير اب ..بعد صار فترة جان يعاملني زين مايحسسني بشي ترك مكالماته واتصالاته بالليل صار بس يكابلني بس ماعرف بالنهار شيسوي وجنت دوم ادعي انو يمل منها ويرجعلي ونعيش سوة

مر ع حملي ع خير الحمدلله وصار يوم الولادة رحت يم الدكتورة حتئ تفحصني وتفحص الطفل طبعا من كشفت عليه بالسونار طلع بيه ولد جهزت كلشي اله من ملابس وشغلات مال اطفال شكو شي حلو اشتريت اله وكله لون ازرك بس اسم ماحددنا

يوم الي رحت لدكتورة كالت جنة انتي مخلصة شهرج وراح تدخلين للعاشر مايصير تبقين هجي لازم هسه اتسوين دخول للمستشفئ لان نبض طفل كلش قليل اخاف يختنك متت خوف عليه كتلها دخيلج دكتورة سويلي جارة هاي فرحة عمري اموت اذا اخسره

الدكتورة ..... لاتخافين هسه روحي سوي دخول للمستشفئ بليل راح اجي اولدج بس لازم عمليه قيصيرية

جنة .....والله طلعنا من يم الدكتورة اني وامي كبل خابرت قاسم كتله وينك كال بالشغل كتله تعال بسرعه حجيتله كلام الدكتورة

قاسم ..اوكفي بمكانج ثواني اوصلج

جنة ..ف اجه كبل رحت جبت جنطة مال الطفل والغراض وملابس اليه جنت محظرتهن من دخلت بشهري وبطريقنا اخذنا اخته الجبيرة ورحنا اني وامي وزوجي وحماتي بالليل ..

الدكتورة اجت لبسوني ملابس العمليات ودخلوني للعملية ساعه 10 وب 11 طلعوني حسيت صوت قاسم يصيح باسمي جاوبته بالكوة من تأثير العملية والبنج جان كاعد بصفي وماسك ايدي وامي واخته واكفين فوك راسي

شفت ماكو طفل يمي خفت كلت وين ابني كالو لاتخافين خلوا بالخدج الصبح يجيبوا مابي شي ابنج لاتخافين

قاسم ..شنو راح نسمي ماعرف🤔🤔

جنة ..كبل طلع مني اسم امجد كتله اسمي امجد

قاسم .. هاي هيه راح نسمي امجد

جنة ....وراها ثاني يوم جابوا ابني شفته دمعت عيوني اخذته بحضني شفته اشكد صغير ودبدوب وابيض خدوده منفوخه اشكددد حلو جان شكله كتله انت فرحت عمري ماانسا هذا اليوم جبت ابني بتاريخ 2010/6/20 ومر فترة صار عمر امجد سنه و6 اشهر

جنت بيت اهلي اجه قاسم ياخذني شفت تلفونه يدك بأسم هدئ هو جان يرفض ماحجئ وياها صحيح من داخلي اتكطع بس مااكدر اسوي شي اذا الرجال خله شي براسه مستحيل يتركه

جان عندي امل يجي يوم يتركها بس طول هالشغلة وماتركها ابد ورة فترة باليل جنت انوم مجودي .قاسم جان برة اكيد جان يحجي بالتلفون بهاي الفترة جان حيييل مشغول واني قلبي مقبوض احس اكو شي ديسوي من ورايه بس مداعرف شنو

فدخل للغرفة اجه كعد يمي شفته كاعد بس صافن بوجهي باوعت عليه ببرود كتله شكو جاي تباوع عليه

قاسم ..بأبتسامه وبصوت حنية سلامتج ماكو شي حياتي

جنة ..من هالنبرة صوته عرفت عندة شي يريد يحجي كتله احجي الي عندك

قاسم ..بضحك اشلون عرفتي اريد احجي وياج

جنة ..امبين عليك ماكو داعي هالحنيه احجي صفن اشويه ولعب بلحيته اشويه

قاسم ..احم شوفي جنونة انتي تعرفين كلش زين اني جنت احب وحدة ومو بيدي جنت احبها حيل بس اهلي فرقونا

جنة .. جان يحجي واني بداخلي كله ديحترك كوه كامشة نفسي لا انفجر ..كتله بس انتوا هسه مع بعض مافترقتوا

قاسم ..تمام لكيتها بعد سنين من ورا زواجنا اني وانت ..ومااكدر الزم كلبي مايحبها ومايشتاقلها

جنة ..ااااااخ ياعالم يادنيا تعالوا اشهدوا ع الي ديصير بيه ولكم داموت ومحد يحس بيه شسوي احرك روحي هسه 😭😭.. سحبت نفس عميق واتنهدت بحركة ..كتله هسه شنو المطلوب مني احجي اريد انام تعبانه

قاسم ..احم راح احجي اني خطبتها قبل جم يوم

جنة ..😨😨
اتوقفت كل معالم وجهي حسيت الدم وكف بجسمي مادري حسيت بخدر بجسمي انصدمت من كلامه ماجنت متوقعه يصير هلكد اناني ومايفكر بيه او بأبنه بس هم ماكدرت احجي الي بكلبي

كتله مالي حق احجي هسه شكوله راح يكول اني رجال والشرع محللي 4 وبعدين كلت بنفسي صح مقهوره منه بس هم حقه هاي حب عمرة سكتت هوايه بعدين فزيت ع صوته

كال هااا وين صفنتي داحجي وياج كتله خلص الحجي وصلتني الاشارة كافي اريد انام تعبانه واالف مبروك تستاهلون كل الخير عفته ونمت ..

مانمت بس سويت نفسي نايمه بس من داخل مكطعه مصدومة ومقهورة احشائي محتركة اشكد حاولت انام ماكدرت هو هم ماجان يكدر ينام بس يتكلب بفراشه اشلون اتحرك يكوم يكعد يسال ها مانايمه مااجاوبه

وبعدين رحت اخذت منوم ورجعت بمكاني انطيته ضهري وبعدين حسيت اجه حظني من ورة ويلعب بشعري واني كارهة لمساته

قاسم ..مادري حسيت انكسر كلبي ع جنة بس شسوي هذا حب عمري وماكدر افرط بي مرة ثانية بعد ما لكيته ..اتقربت منها ونمت وراها وحظنتها وبقيت العب بشعرها ردتها تهدأ شوية فجا اندارت عليه صرخت بوجهي صرخة فززتني 😕

جنة ..دفعته عني وصرخت بوجها كتله عوفني ولاتلمسني روح لمرتك وحبيبتك

قاسم ..بس انتي هم مرتي

جنة ..اعرف بس مو حبيبتك مو بنت كلبك اني مجرد خدامة عصب عليه

قاسم ..لزمتها من زندها بعصبية كتلها ترئ اشك حلكج اذا كلتي ع نفسج خدامة افتهمتي

جنة ..وخر ابتعد عني دفعته من صدرة ورجعت خليت راسي جوة البطانيه ماحجيت ويا بعد وماحسيت ع نفسي نمت ..

ومن يومها ماحجيت ويا يجي للبيت ياكل ويشرب يطلع برة ويرجع بنص الليل وراها مااتحملت الوضع كلت اشلون اشوفهم بعيني يتحاجون وباجر يجيبها يخليها كدام عيني

واشلون اكدر اتخيلها يحظنها ويبوسها وخصوصا هي جانت حبيبة كلبه اختارها فكرت زين كلت هاي هية اعوفهم يعيشون ويابعض اني اروح بيت اهلي ابقئ خدامة جوة رجلين بابا وماما

ولااذل نفسي اكثر من هاي نمنا باليل الصبح شفته طلع لشغل وراها كعدت لملمت غراضي وملابسي وملابس ابني انتظرت يصير ساعة 10 حتى اخابر بابا يجي ورانا كعد مجودي سويتله ريوك وبدلت ملابسه والله صار ساعة 10 كمت خابرت بابا كتله تعال ورايا

بابا ..ليش بنتي خير اكو شي

جنة ..من تجي تعرف بس فدوة الله يخليك تعال

بابا ..تمام هسه اجي بنيتي حظري نفسج

جنة ..ورة نص ساعه دك تلفوني شفته بابا جاوبته كال طلعي اني بالباب كتله تمام كتله لامجد روح جدو اجه جان يحب ابويه حيل من سمع هجي كبل ركض واني شلت

جنتطي وقفلت الباب رحت انطيت المفتاح لمرت حماي كتلها من يجي قاسم كوليله جنة راحت خلي يجيب مرته وحبيته بمكاني ....

طبعا هما جانوا كلهم يعرفون بالسالفة بس ماجانوا يحجون من عاتبت مرت حماي ليش ماكالتلي كالت خفت عليج وخفت من المشاكل ....

خليت زوجج يحجيلج ف من انطيت المفتاح لمرت حماي كالت جنة اعقلي ولج لاتصيرين غبية تنطيهم مجال اكعدي ع كلبه ....خلي يصرف عليج وع ابنج ليش تاخذين القهر لاهلج

جنة ..حقج مكاعد تحسين الي اني احسه ولا تعرفين بالنار الكايدة بداخلي  ولج نسرين اني داموت باليوم الف مرة

نسرين ..وداعتج حاسة بس ولج شنو ذنب ابنج تبعدي عن ابوه

جنة ..ياابو هوه وينه اشو ملتهي بالحب والزواج ..عفتها ومشيت رحت ويه بابا طول الطريق ساكته بابا بس يسال اشبيج اشصاير بينكم ماحجيت شي خانكني العبرة كتله خلي نوصل واحجي مااكدر هسه والله

وصلنا كعدت حجيت الهم السالفة امي ماكالت شي بس بابا كال خلي يولي عوفي وكعدي يمنا واني اربي ابنج ماما جانت هوايا تخاف من لسان عيالها عمامي وعماتي لان هي لكته واختارته الي حتئ اتزوجني

فخافت هسة الكل ياكل راسها ماشجعتني ع الطلاك دوم تنصحني ارجع لزوجي لخاطر ابني بس ماسمعت منهم ظليت يمهم يومين وقاسم لاخابر ولااجه وراها اجوي اخوانه وزوجاتهم وياهم قاسم

كتله ماريد ارجع روح شوف حياتك ويه حبيبتك واذا ع ابنك مااحرمك منه لتخاف بين فترة فترة تعال شوفه وهسه اطلب منك طلب كدام الكل

قاسم ..شنو ؟!

جنة ..قاسم طلكني ماريدك بعد

قاسم ..جنة انتي شدتحجين ....رجعي والله مااخليج تحسين بيها ومااجيبها يمج تبقئ يم امها لان ماعدهم احد اخوانها كلهم متزوجين وطالعين بس هي وامها بالببت ف مااجيبها يمج

جنة ..هه يمي او يم امها ماعليه مو هاي مشكلتي اخر كلام عندي طلكني مااريدك عفتهم رحت واخذت ابني رحت لغرفتي ابني ظل يبجي يريد ابوه لان هوايه يحبه ومتعلق بي

مرت الايام ابني تمرض كل مايسمع صوت السيارات يركض مثل المخبل يكول بابا يروح يشوف ماكو احد ...
يكعد يبجي يم الباب وابويه خطيه يوميه جان ياخذ ابني يطلعه برة حتئ مايضوج ورة فترة اني هم اتمرضت بين فترة وفترة جان يصير عندي الم بمعدتي ويضرب بضهري جان ينكطع نفسي من الوجع

مر شهور ع هالسالفه وجان بين فترة وفترة مرت حماي بس تخابرني جانت دائما تكول يمكن الله اخذ حوبتج لان اعتقد خربت السالفة لحد هسه مامتزوجين بس محد يعرف السبب

لان قاسم كتوم مايحجي اسراره لاهله فد يوم بليل نيمت ابني حسيت راح اتكطع من الم بمعدتي بعد مااكدر اتنفس نفس عبالك الم ولادة كلششش قوي من الوجع ضليت ابجي واصرخ ع صوتي

الكل اجه اخواني وبابا وماما كالوا شبيج كلت ماعرف لحكوني راح اموت من الوجع والله بابا ع سريع شغل سيارة واخويه شالني بحظنه واخذوني للمستشفئ ساعة 1 بالليل

فحصوني وشدولي المغذي وضربوني ابر طلع عندي التهاب وحصو بالمرارة رجعنا ع البيت ثاني يوم ابويه اخذني للاخصائي دكتور كال لازم عمليه وتشيلين المرارة ماكو اي جارة علاج مايفيد وياج

رجعنا لبيت واني خايفة من العملية وابني صغير بعده ياربي شسوي هسة بعدين ابويه كال بنتي اعقلي اشويه وخلي نخابر لزوجج ع اقل يجي يوكف وياج و ويه ابنه فكري بابنج من تدخلين للمستشفئ يظل بدون اب وام ع اقل اذا ابوه ويا مايحس بنقص

فكرت كلت كلام بابا صح اني ماكاسر ظهري غير ابني كتله الي تشوفه صح سوي فخابروا زوجي ثاني يوم اجه من الصبح
رحت صعدت ويا رحنا للمستشفئ

مااخذت ابني ويانه لان جان نايم خطيه ماصحيته خليته يم ماما طول طريق اني ساكته مااحجي شي ووجهي ثكيل عليه دايرته بصحفة الجام مالت السيارة هو بس يريد يحجي كل دقيقة يسال شتحسين اشلون صار وياج هجي واني اجاوبه ع كد السؤاله واسكت احجي ويا ببرود

ف وصلنا للمستشفئ رحنه للاستعلامات انطينه الورقة مال الدخول الي جبناها من الدكتور جان كاعد بي رجال جبير كتب اسمي واسم الدكتور

المهم خلص معامله مال الدخول كال لزوجي انطيني فلوس تأمينات زوجي انطاها وانطانا رقم الغرفة الي انام بيها وهم من يطلعوني من عمليه يجيبوني بغرفتي

جان كله ردهة نسائية خلصنا كلشي كلت للرجال هسه ارجع للبيت باجر صبح اجي لان مااكدر ادخل من هسه ماجايبه غراضي وعندي ولد صغير بالبيت

كال مومشكله روحي بس باجر تجين قبل ساعة 7 كتله مومشكله وكال لاتاكلين ولاتشربين شي من الليل كتله زين ورجعنا لبيت اهلي وقاسم نزل ويايه اشويه كعد وياابنه ولعبه وراح

قاسم ..باجر اجي وراج من وكت واجيب اختي ويايه حتى نخلي امجد يم امج وانتي لازم تجي وياج وحدة حتى تبقه وياج بالمستشفى اني رجال مايقبلون ادخل وياج

جنة ..ماشي بكيفك ..وراح قاسم واني رحت حضرت كم قطعة ملابس احتاجها وامي انطتني بطانيات وشغلات حظرته وطول الليل مانمت كعدت وخليت ابني بحظني ينام لصبح

جنت ابوسه واشمه ومرات ابجي وادعي ربي يسهل عمليتي ارجع سالمة لابني كلت ماانام ابد خلي اشبع من ابني اخاف اموت ومااشبع منه صار ساعه 6 خليت ابني بصف امي وغطيته وبوسته ابوسه وابجي

ورحت اتوضيت وصليت وحظرت كلشي وبدلت ملابسي شفت تلفوني يدك شفته رقم قاسم كلت اكيد وصل جاوبته

قاسم ..طلعي يله اني بالباب

جنة ..طلعت شافني ونزل اخذ مني الغراض خلاهن بصندوك السيارة وجانت اخته وياه سلمت عليها وصعدت لسيارة

رحنه وصلنا للمستشفئ واخذنا الغراض كلها خليناها بغرفتي بالمستشفئ جانت ردهة خاصة وراها نزلنا بالمصد .....

رحنا باتجاه غرف العمليات انطيتهم فايل مالتي شافو اسمي واسم الدكتور الي يسويلي عملية ونوع العمليه .....

كالوا روحي منا اكو صاله انتظار تبدلين ملابسج وتنتظرين الئ ان نصيح بأسمج تفوتين بغرفة العمليات كلت تمام انطاني ملابس مال العمليه دخلت جوة لصاله انتظار ......

جانت بي غرفة صغيرة مال تبديل الملابس رحت جوة نزعت ملابسي ولبست ثوب مالت العمليه رحت انطيت لملابسي لاخت قاسم من فتحت الباب شفت قاسم واكف يم الباب وصافن شافني وباوع عليه جان اكو بعيونه حزن

قاسم ..مانكر جنت خايف ع جنة حسيت بقهر بداخلي دعيت الله يرجعها سالمة من العملية الخاطر ابني باوعت عليها والحزن ترس وجهي كتلها لاتخافين من العملية عمليتج بسيطه وماتخوف واني يمج مااعوفج

جنة ..سكتت اني ماحجيت شي انطيت ملابسي الهم دخلت كعدت بالصاله انتظر يصيحون بأسمي كاعدة وتذكرت كلام قاسم يكول اني يمج ومااعوفج حسيت بخنكة كمت بجيت بحركة .....

وراها اجت ابنيه انتي جنة وعمليتج رفع المرارة كتلها اي كالت يله كومي دكتورج جاهز ودينتظرج كمت مشيت وياها .....

بس احس اسحل نفسي بالكوة رجيله مادتشيلني من الخوف وصلت لغرفة الدكتور .....كال ها جنة جاهزة كتله اي دكتور وبعدها اتمدت ع السرير ..الدكتور بدة يحجي ويايا ويشاقه حتئ اطلع من الجو الخوف والتوتر وبعدها ضربوني ابرة مال تخدير.......

بعدها ماحسيت شي الا واني اريد افتح عيوني مااكدر من البنج وحسيت بالم طلعت روحي ضليت 3 ساعات اتوجع واصرخ مع العلم هيه عمليه بسيطة بس جان جسمي تعبان ماجنت اتحمل اي وجع وبعدها انطوني مسكنات .....

وقاسم راح جاب الدكتور كال دكتور من طلعت من العمليه لحد هسه متوجعه

الدكتور ..اي شي عادي لان جسمها حيل ضعيف مدتحمل اي شي من جوة تعبانه 3 مرات الكانونه نزفت بيدها وغيرناها

جنة ..وصار العصر اشويه اتحسنت صح عندي وجع بس احسن من الصبح جنت اموت من الوجع وبعدها اجوي ماما وبابا وجابوا ابني وقاسم شاله بحظنه دنكه حتئ ابوسه لان مااكدر اخلي بحظني بقوا ساعه يمي كالو لازم نطلع مايخلون اي احد يفوت بس مرافق ويا المريضه واني مرافقتي اخت زوجي ..

قاسم ..يله حبيبي اني هم اطلع مايقبلون ابقئ لان الردهة نسائيه وهم اروح اشويه ابقئ يم مجودي حتئ مايحس بوحدة

جنة ..ماشي الله وياكم راحوا كلهم ورة المغرب نمت لان جنت تعبانه وقبل بيوم من عمليه هم مانمت فالممرضات انطوني علاج مسكنات نمت اشويه بعد حسيت اسمع صوت رجال يمي .....

فتحت عيني شفت قاسم كاعد بصفي وماسك ايدي ويحجي ويااخته شافني فتحت عيني اندار عليه

قاسم ..ها حبيبي اشلون صرتي

جنة ..الحمدلله زينه ودرت وجهي ع صفحة الثانيه وسحبت ايدي من ايده هو رجع بالكوة سحب ايدي نزل راسه يم راسي خله عيونه بعيوني

قاسم ..ضوجتني  بتصرفها رجعت سحبت ايدها وكتلها غصبن ماعليج تبقئ ايدج بيدي انتي الي وبس افتهمتي

جنة ..ضحكت باستهزاء كتله هه وحبيبة قلبك وين عفتها😏

قاسم ..ماعندي حبيبة غيرج انتي مرتي وحبيبتي وام ابني

جنة ..عكدت حاجبي باستغراب كتله ليش وهدى شنو

قاسم ..ماكو لاهدى ولاغيرها انتي وبس بحياتي اني تركتها

جنة ..انصدمت من كلامه عدلت كعدتي كتله شنوو لاتكول تركتها علمودي

قاسم ..لاليش الكذب مو علمودج صارت مشكله بيناتنه شفتها ماتصلحلي

جنة ..شنو السبب ؟؟!!

وللحكاية بقية ..

#يتبع ...

#سارة_المجيد🎀