مساء الجود ودهن العود ع عيونكم يا احلا قراء 🌹🌹🌹🌹🌹🌹🌹

#اضعت_ربيع_عمري

#بارت_التاسع

#بقلمي_سارة_المجيد

كلام من بطلة القصة

شايف من انته مكسور ومهموم وفوك كل هذا الضيم والقهر وكل يوميا تسمع اخبار جديدة بس شنو من أخبار هلكد ما بيها قهر وحزن تضطر تضل تضحك بدل ما تبجي بس تدرون هذا الضحك مشوراه قصير اذا كله بجي او قهر وداعتك يگلبي  كمت ما احس بالنغزات مالت گلبي  لان تعودت وبعد ما ابجي لان خلصت دموعي اضل صافن وساكت بس هلكد ما اكو حزن بداخلي ريكي ما اكدر ابلعه احس بي غصه واختنك ومن اوصل لكل طاقتي وبعد ما استحمل اضل اضحك اضحك اضحك لحد ما من ضحك تنزل دموعي 😣💔

جنة ..لا يالله 😱😱
يااااالله اشصار بيه بلحظتها حسيت جسمي انصرع مثل واحد وضربني بتوثية ع راسي لزمتني الباردة كل دم مابقه بجسمي ........معقووووولة خالتي تطعني
اااخ الله جمدت بمكاني. ..ودخلت رجفة بجسمي ماخفت لانهم دروا بعلاقتي بأمجد لا ..خفت من ردت فعل قاسم بعد مااتعلقت بي وتعلمت عليه خفت لا يصدك كلام خالتي ويسوي حياتي جحيم ع شغلة جانت من الماضي وراحت بفترة مراهقة

قاسم ..مانكر حجاية بشرى حزت بنفسي وشعلت بيه نار واحتركت حرك بس سحبت نفس عميق حتى اطفي ناري واهدأ كتلها اسمعي ولج زوجتي اشرف منج ومن الف وحدة مثلج مو مثل هاي الساقطة الي لزمتوها انتوا بنفسكم تخون اخويه هسه انتي جايه تدافعين عنها وتخربين سمعة بنت اختج ..اكيد انتي هم مثل هاي الساقطة

جنة ..من سمعت كلام قاسم غوركت عيني حسيت بسند لظهري شفته شلون يدافعلي ويفزعلي ..اهنا خالتي صارت متوحشة هجمت ع زوجي كدام اخوانه تغلط وتضرب بقاسم ......

بس قاسم دفعها لان كال انتي مراة ومااكدر امد ايدي عليج كدام زوجج بس اخوه الجبير صدمنا جان طابك وياخالتي

جهاد ..قاسم لو اتطلك مرتك لو تاخذها وتروح ماتبقئ بعد يمنا

قاسم ..اها يعني هيجي صارت كلكم صرتوا ويا هاي الساقطة ماشي زوجتي مااطلكها بس راح اروح واعوفكم

جنة ..اندار عليه شافني واني قطرة دم ماكو بوجهي من الصدمة الي اكلتها من خالتي الله لايوفقها وصخت سمعتني وخلت الكل يشك بيه ع شغلة صارت بالماضي كله بسبب امي وراها رحنا للغرفة ماحجه ويايه ..
بس قبل ماينام كال باجر اروح ادور ع بيت وخلاني ونام واني مكدرت انام كعدت بلكاع وكرفصت نفسي من القهر.

حجيت بكلبي ااااااخ يادنيا بس لو اعرف شمسويه هيجي دمرتيني وااااوف الي دمرني اهلي يعني مو غريب ..بقيت ابجي لحد ساعه 4الفجر وراها دخت رحت يم قاسم هو نايم مايدري دخلت جوة البطانيه ويا فز وشال راسه وباوع عليه ورجع نام ودار وجها ع الصفحة الثانية انطاني ضهره

اهنا عرفت زعل مني وصار شك بكلبه والرجال صعبه عليه يعرف مرته جانت تحب حتئ لو ماضي وراح بفترة مراهقة دعيت ربي يحلها ويفرجها عليه ويهدي زوجي ويطلع الشك الي بداخله وراها كعدنا الصبح ساعه 10 اتريكنا

قاسم ..كعدت الصبح جنت احس الدنيا تفتر بيه حسيت بركان وديتفجر بداخلي بلعت الغصة وسكتت ..باوعت ع جنة اختنكت ..الغيرة الي اشتعلت بداخلي شعوطتني اتشعوط ...كتلها اني طالع ادور بيت واذا واحد من عدهم دخل الغرفه طردي لاتحجين وياا احد فهمتي

جنة ..هزيت راسي بمعني اي وخلاني وراح .... كعدت بغرفتي مااكدرت اطلع ومحد منهم اجه يمي لحد ماصار الظهر رجع قاسم دخل كعد كتله ها اشسويت

قاسم ..مالكيت بيت ..اكو بس بعيد

جنة ..ليش انت وين داتدور

قاسم ..يم بيت اهلج لان ماريد تبقين وحدج بالبيت ..

جنة ..وكتها جان عمري 18سنه بعدها سكت قاسم ماحجه شي واني ضليت متمدد ع الجربايه وهو كاعد بس صافن مادري اسأله ع شنو ..ع سالفه اخو لو ع سالفتي صافن ..
لو ع سالفه يدور بيت اني هم حسيت راسي صار طبل

قاسم .. مكدرت اسكت اكثر لان نار دتاكل بيه راح انجن ..رفعت راسي وكتلها جنة صح كلام خالتج

جنة ..اني هنا دخلت برودة ورجفه بجسمي ومعدتي كامت تكلب من التفكير بقيت اتبلعم

قاسم .. شفتها انخطف لونها ....غمضت عيني واتنفست بعمق حتى لا اتهور ...ردت اتصرف بحكمة وعقلانية ..كتلها هااا شو ساكته

جنة ..رحت كعدت كباله كتله راح احجيلك كلشي بس قبل لااحجي اروح اتوضه واجيب المصحف واحلفلك عليه ع كل كلمة تتطلع مني مااجذب ودموعي تنزل ومنا احجي

قاسم ..بلا حلفان وبلا مصحف ولاتبجين فهميني كلشي لان البارحة خالتج من كالت هيجي حسيت بسجاجين دخلن بكلبي بس مابينت الهم ماردت تستغل ضعفي اكثر

جنة ..انهاريت بالبجي ادري ميستحق قاسم ينحط بهيج موقف كتله والله العظيم وداعت ابويه الي هو اغلئ شي عندي ماضي وانتهئ بفترة مراهقة والله راح من زمان وخلص كلشي لا شفته ولاشافني

قاسم ..شوفي مانكر دخل شك بكلبي بس بعدين كلت لا هي مو هيجي مراح تخوني لان انتي 24 ساعه كدامي ماشفت شي منج

جنة ..والله ولااخونك بحياتي قبل لااخاف منك اني اخاف عذاب رب العالمين

قاسم .. زين الله كريم وصار المغرب كتلها هواي ضايج مااكدر ابقئ بعد بهذا البيت ولادقيقه ولاراح اكدر اتركج وياهاي الوصخة

جنة ..شنسوي شنو الحل

قاسم ..كومي لمي غراضج دانروح نبقئ بيت اهلج كم يوم علما الكه بيت قريب عليهم اريد ابتعد عنهم بعد

جنة ..زين هسه دقايق واكون حاظرة ..لميت غراضي وملابسي ويا ملابسه خليتهم بجنطة جبيرة رحنا لبيت اهلي ..امي وابويه شافوني كالوا ها خير شنو الصاير كتلهم جايين نبقه جم يوم يمكم كالوا هلا بيكم وراها قاسم كعد حجالهم السالفة

ابويه ..هاي السالفة بيناتكم احنه ما نكدر ندخل بينك وبين اخوانك

قاسم ..لاياعمي بس هسه جبت جنة خليها يمكم علما الكي بيت قريب عليكم واني راح ارجع لبيتنا لحد مالكه بيت

ابويه ..اصبرو كم يوم بلكي تنحل لاتستعجل بقينا هناك ثاني يوم قاسم كال انتي ابقي اني ارجع لبيتنا بس الكي بيت اجي اخذج

جنة ..لا لتروح لاتخليني وحدي واذا رحت معناها ماتحبني بعد وتشك بيه

قاسم ..اشتحجين بابا اني مااشك بيج كتلج بس مو حلو ابقئ يم اهلج عيب ناس شيكولون عليه ..يوميه اجي امر عليج وان شاءلله ماتاخر بسرعه الكه بيت انتي ادعي الله يفرجها علينه ..

جنة ..ان شاءالله ياربي يسهل امرنه ويفرج علينه ..خلاني  وراح العصر جنت كاعدة وياامي سمعت صوت سيارة قاسم لان اعرف صوت سيارته كبل كمت فتحت الباب شفته بالفعل هو نزل من سيارة شفت اجه انصدمت من شوفته جان ملابسه كلها دم 😨 كتله شكو شصاير بيك منو سوا بيك هجي

قاسم ..اشبيج فوتي ولاتخافين ماكو شي ..تعاركت وياخواني الكل اتهجم عليه علمود هاي الادبسز ..كله من جوة راس خالتج هاي المشاكل

جنة ..يعني ضروبك

قاسم ..يريدوني اطلكج يله اخوي يعوف زوجته

جنة ..لطمت ع صدري واشهكت كتله وانت اشكلت

قاسم ..شوفت عينج يعني تضاربت وياهم علمودج عفتهم واجيت

جنة ..مر كم يوم والحال ع ما هوه عليه وراها راح قاسم لكه بيت خابرني كلي اتحظري راح اجي اخذج تشوفين البيت لكيت بيت قريب عليكم كتله زين هسه دقايق واتحظر

ابويه ..شنو شيريد زوجج

جنة ..كال لكيت بيت هسه يجي ياخذني اروح اشوفه

ابويه ..كعدي لتبدلين اشوف خلي يجي

جنة .. والله اجه قاسم شافني مامبدلة كال ليش ماجهزتي نفسج لحد هسه

ابويه ..اني ماخليتها

قاسم ..ليش عمي

ابوية ..اشبيك ابني انت من كل عقلك تخلي زوجتك وحدها بالبيت وبعدها اصغيرة وبعدين انتو ماعدكم غراض البيت غير غرفة نومكم

قاسم ..عمي مو مشكله راح اشتري

ابوية ..لا ابني عندي غرفة فوك بيها غراض زايدة روحو نظفوها وجيبوا غراضكم وكعدوا بيها لحد ماالله يفرجها

قاسم ..معارضت عمي لان صدك الي حجاه شلون نكعد ابيت فارغ مابي غراض وهم ماكدر اعوف جنة وحدها بالبيت وهيه صغيرة كتله ماشي عمي ان شاءلله الله يحفظك ويوفقك وبعدها كمنا نضفنا الغرفة بيت عمي وجبنا غراضنا وكعدنا وياهم كل من اهلي قاطعونا بعد

جنة ..الحمدلله ارتاحينه من كعدت يم اهلي ..بس ورة فترة سمعنا مرت اخو مهزومة من البيت ومحد يدري وينها و ويه منو رايحه خلت سمعتهم بالكاع وهما تندموا لان طردوا اخوهم علمود وحدة وصخة  ........وصخت سمعتهم واحنا اهنا عشنه ويا بيت اهلي يوم من الايام امي كالت انتي ليش ماتروحين لدكتورة اتشوفين ليش ماصار عندج حمل كلت والله هو ماراد مني طفل وبعدين اني اول ماتزوجت كله ملتهيه بالمشاكل والصراحة اني احب الاطفال راح احجي ويه قاسم وااشوفه شيكول

امي ..الله كريم يمه

جنة ..يوم من الايام جنه كاعدين اني وقاسم كتله اريد اروح لدكتورة تشوفني ليش ماحبلت لحد هسه صارلي متزوجه سنه ونص

قاسم ..ها يمعودة شلج بدوخة الراس بعدين انتي بعدج طفله

جنة ..توسلت بي لحد ماقنعته اروح اراجع الدكتورة

قاسم ..بس بشرط

جنة ..شنو هل شرط 😕

قاسم ..ماانطيج فلوس الدكتورة

جنة ..لعد اشلون اروح ماتدري فحوصات وعلاج ينرادله كومة فلوس

قاسم ..انتي عندج يوميتج اجمعيها وروحي بيها للدكتورة 😒

جنة ..بله هاي هم فلوس ليش انت اشكد تنطيني قابل هو 2000 دينار يومية

قاسم ..والله هذا الي عندي عجبج عجبج واذا ماعجبج هاي هم اكطعها عليج

جنة ..ماشي ماريد منك شي هو راح وخلاني ونام طبعا بعد ماخالتي كشفت علاقتي با امجد كدامهم هو من ذاك اليوم متغير عليه بس اني جنت اقنع نفسي اكول لاخطيه يمكن علمود اهله مقهور لان طردوا بسبب مرت اخوهم هو جان دائما يكول مااريد طفل راسي بارد جنت انقهر اكوله لعد ليش اتزوجتني اني اريد اجيب اطفال اريد اصير أم احب الاطفال هوايه ومن ذاك اليوم جنت اجمع فلوس واحرم نفسي من كلشي بس علمود اروح اتعالج

ف رحنا اني وامي ع الدكتورة جانت اسمها ايمان صباح بكركوك كلش خوش دكتورة سوتلي سونار وفحوصات وتحاليل كالت بنتي انتي عندج هورمونات وعندج تكيس ع المبايض سالتني ع الدروة كتلها والله دكتورة الدورة مالتي مخربطة كالت اي من الهورمونات انطتني علاج ابر ومنشطات وحبوب مال تنظيم الدورة جانت تكولي لازم كل شهر تجين يمي

ف مر سنه اني كل شهر اجي واروح ماكو شي ومنا امي هم كامت تغثني انتي زوجج بخيل مايشتريلج شي وشوفي ملابسج وشوفي حالج اوووووو جانت ادردم عليه

كتلها شسويله كل ماكوله انطيني يكول ماعندي من اجيبلج وبعدين مو انتي الي لكيتي وعجبج وزوجتيني اله

امي ..اي صح اني زوجتج اله بس ماكو هيج هو شكد بخيل

جنة .. صار بعد شسوي هسه يعني وبعدين يمكن صح ماعندة هو يشتغل تكسي شغلة مو هلكد جنت اسكتها لان مابيه حيل المغثة ورة فترة حماتي اختهم الصغيرة اتزوجت اني انقهرت حيل كلت اتزوجت واني بعيدة عليها ورة زواج حماتي بسنه سمعت حماي الصغير خطب فد يوم اجه قاسم من الشغل اتعشينا ويا اهلي وصعدنا لغرفتنا شفته صافن كتله اشبيك

قاسم ..اليوم شفت اخواني ويازوجاتهم واختي الجبيرة

جنة ..وين شفتهم

قاسم ..يم المحكمة

جنة ..زين همه شافوك

قاسم ..اي بس انداريت انطيتهم ضهري بس اخويه الصغير ماتحمل اجه يمي وباسني هذا بالذات ماكطعنا لان يحبني هوايه كلي قاسم باركلي خطبت  اني فرحتله باركتله وبوسته

علي ..عود تعال لعرسي عن قريب

قاسم ..الله كريم خوية

جنة ..قاسم شفت العروسة هم حلوة

قاسم ..اي اجتي سلمت عليه
يعني وصغيرة هيجي بكدج

جنة ..الله يتمملهم ع خير زين وخوانك الكبار ماحجيت وياهم

قاسم ..لا ولااحجي

#القصة_بقلم_سارة_المجيد

جنة ..طبعا ماريد قاسم يكاطع اهله لان مهما يكون الاهل عزوة وسند واشكد حاولت ويا ايرجع الماي لمجاريها ماقبل كلي انتي ماعليج ولاتدخلين نسيتي خالتج اشلون فضحتج كدامهم هسه هما يموتون منج لان كالوا طلكها وماطلكتج

جنة ..سكتت وعوجت حلكي 😏 ورحت كعدت اباوع ع التلفزيون هو كبل خلاني وراح نام طبعا بقينا بيت اهلي سنتين هو كلش اتغير صار بارد ويايا بمشاعره وبكلامه ماجنت اسمع منه كلمة حلوة ولاشفت منه لاحظن ولااحترام صار كلش بعيد عليه جان بس يكضي حاجاته ويايه ويشبع غريزته بيه ويلف راسه وينام بعد فترة اخوه اتزوج هو خابرنا وعزمنا بس ماقبل نروح

قاسم ..جنة اني ما احاجي ويه اي واحد منهم لان العرس بالبيت ومااروح هذاك البيت ولااحجي ويااخواني ف مانروح

جنة ..قاسم هسه قابل شكو العالم عزمونه خلينه نروح ونحظر عرس اخوك خطية ..

قاسم ..جنة سدي السالفه كتلج ماروح وانتهى الموضوع .. هذول اهلي ومو اهلج اني ماريدج تتقربين منهم خلي يولون هذوله مايحبوج عوفيهم احنا كاعدين بيت اهلج معززين مكرمين نسيتي مشاكل بيتنا من اول يوم من اجيتي يمي ف اابتعدي عنهم وسكتي

جنة ..اقنعني بكلامه بعد فترة ابويه شايف اخوه حاتم الي هو زوج خالتي ف بابا كايل لاخوه صالحوا اخوكم خطية هو مقهور وكذا
حاتم .. بس ابو عامر احنه اتصالحنا ويه اخوي

ابويه ..بصدمة ومتعجب 😨 لعد ليش من يكعد ويانا بس مقهور ويحجي عليكم

حاتم ..شوف اكلك شغلة ابوعامر طردوا لقاسم او فهموا بنتكم جنة تلح عليه حتى يرجع لبيتنه

بابا .. ليش مدافهم

حاتم ..اني افهمك هذا اخويه طماع واني اعرفه كلش زين شاف انتو تصرفون عليه وع بنتكم فاهذا شي عجبه باقي يمكم لان احنه والله كلناله اذا ترجع تعزل لوحدك يعني ننطيك غرفتك وجزء من المطبخ وتعيش محد اله دخل بيك ..

هوه سكت وراح ف اجه شاف يمكم انتو كله تصرفون عليهم ف مرتاح يمكم

بابا .. بقيت صافن شنو يعني قاسم ديستغلنه مداصدك ..

جنة ..فديوم هو جان بالشغل جنه كاعدين اني وبابا وماما ابويه كال جنة زوجج اتصالح ويا اخوانه كتله لاولله اشكد احايل واتوسل مايقبل

بابا ..ضحكت باستهزاء كتلها بابا انتي نايمه والماي تمشي من جواج وماتدرين

جنة ..فتحت عيوني كتله ليش بابا سامع شي

بابا .. اي بنتي زوج خالتج شافني هذاك اليوم كال احنه اتصالحنا ويه قاسم بس هو اهنا مستفاد من عدنا لهجي مايروح لبيت اهله

جنة ..اوووف طبعا حسيت صبوا عليه ماي حار وحركوني كتله معقولة يجذب عليه ويكول علمودج مااحجي وياهم لان كالوا اطلكج كتله خلي يجي يصير خير

بابا ..لا بنتي لاتكولين اي شي اسكتي

جنة ..اشلون يبقئ هجي بس يستفاد ونايم براسك ..

ابويه ..بنتي احجي ويا ولحي عليه واذا ع مشاكل لاتخافين هسه بعد ماتزوجت حماتج وحماج قسموا البيت يعني خالتج ماتكدر بعد تسويلج شي انتي الج شغلج واكلج

جنة ..ماشي راح الح عليه يوميه وفعلا جنت يوميه الح عليه نرجع جان يعصب ويغلط ويحجي وينام ماكدرت عليه يوم من الايام بابا راح حجه ويازوج خالتي كال اله بنتي هوايه تلح عليه مايفيد واحنه ما نكدر نكول شي لان اذا حجينه راح يفهمنا غلط ونخاف يحقد علينا وع بنتي فانتوا شوفوا حل

زوج خالتي ..ماشي اني راح احلها

جنة ..وراها اجه ابن خال قاسم من الموصل لان بيت خاله بالموصل ابن خاله رجال جبير زوجي هوايا يحبه ويسمع كلمته اجا بيت اهلي حجه وياقاسم قنعه والله المهم اخيرا اقتنع وراها كال باجر من وكت كعدي حتئ نروح ننضف غرفتنا ونرتبها ونرجع اني هوايا فرحت

بالرغم اني ماشفت راحة والفرحة بهذاك البيت بس يضل بيتي والله ثاني يوم رحنا لبيتهم شفت خالتي ماخذه ركن من البيت مسويه مطبخ كلش الصغير الها ومخليه طباخ وكاونتر خاص الها

ودخلت للمطبخ شفته عادي نفس مطبخنا مامتغير بي شي جاي امشي اباوع ع كل ركن بالبيت شفت وحدة طلعت من الغرفه الي بصف غرفتي لابسه تراك وشعرها جان قصير لركبه اميشه شعرها هي بكدي تقريبا عرفت هي هاي العروسة مرت حماي الصغير اجت بوستني واني هم باركتلها طبعا مار ع زواجها 3 اشهر سلمنا ع بعض اشويه جانت حبابه وراها رحت نظفت غرفتي رتبتها خلصت واجه قاسم

وللحكاية بقية ..

اعذروني البارت قصير لان اليوم رحت لاهلي ومحتفلين بعيد الام وكذا ومحبيت اخليكم منتظرين كتبت هل بارت عسريع ونزلته الكم 
احببببكم جثييير متابعيني 😍😘

#يتبع ...

#سارة_المجيد🎀