اليوم: الجمعة.
التاريخ: 18.6.2021.
الساعة: 8:26 مساءً.

زمان كنت أكتم بالفعل كل مشاعري، وحتى عند الأشياء الكبيرة مثل الموت ما أبكي أو أتكلم، وبسبب هيك صرت أبكي أتفه الأشياء؛ ما عرفت أرتب شعري، انكسرت كاسة كلها عصير، موت شخصية خياليّة.

في البداية كنت اشوفني حساسة جدًا وحتى يلي حولي كانوا يتمسخروا علي بهي الشغلة، لكن بعد هيك صرت أشوف هالشيء وسيلة للتنفيس عن مشاعري. لما يصير شيء كبير بحياتي ما أعبّر عنه بشكل جيد، بالمقابل فورًا بروح بتابع شيء حزين حتى أبكي لو شوي، وهيك ارتحت.

بطلت أشوف هالشيء يوضح إني حساسة بل غيّرت نظرتي وصرته أشوفه أنه أنا عندي وسيلة أخرى للتنفيس عن مشاعري المكبوتة وهذا هو المهم بغض النظر عن الطريقة يلي استخدمتها.

وأنتو، هل تكبتوا مشاعركم ولا تظهروها؟

---
تخيلوا من الساعة خمسة الصبح للساعة تسعة الصبح وأنا أحاول أنام وما عرفت، بعرفش كيف نمت بالأخير، وصحيت الساعة ستة المسا، حرفيًا نظام يومي سيّئ جدًا!

سو الأشياء يلي سويتها اليوم إني قرأت من كتاب العادات الذريّة، والأشياء يلي بدي اسويها إني أعمل عقد للعيش بحياة صحية، كل 41 يوم أسوي شيء جديد -بما أنه حتى يصير الشيء عادة ويتعرّف عليها عقلك الباطني لازم تسويه لمدة 41 يوم-

أول 41 يوم: الامتناع عن تناول السكر، الخبز، المشي يوميًا لمدة خمس دقائق فقط، شرب الكثير من الماء، استخدام السرير فقط للنوم.
ثاني 41: يلي فوق، المشي يوميًا لمدة عشر دقائق، لعب الرياضة لمدة خمسة عشر دقيقة، التأمل لمدة خمس دقائق.

العقوبات لو ما سويتهم: لو جمعت فلوس رح أصير أحط نصهم بعلبة وبنهاية الشهر أو السنة بالكامل رح أتبرع فيهم. صح يبدو أنه مش عقاب لكن بالنسبة لوضعي عقاب، وأنا جد جاي عبالي اشتري كتب لهيك بدي ألتزم فيه! 😔

العقاب الثاني: حذف جميع مواقع التواصل الاجتماعي لمدة أسبوع.
العقاب الثالث: الامتناع عن سماع الأغاني أو حتى غنائها لمدة أسبوع.

بالنسبة لتاعت السرير فأنا حرفيًا طول يومي عليه، آكل، أدرس، أقرأ، أكتب عليه، كل شيء عليه. وقرأت أنه لو حاولت تستخدم السرير فقط للنوم رح يتحسن نظام نومك لأنه بصير بعقلك الباطني أنه إذا شاف السرير معناته هذا وقت النوم، لكن بما إني أسوي كل شيء عليه فهو مش مبرمج للنوم ولهيك نظامي سيّئ، سو لهيك بدي أغيّر من هالشيء.

إن شاء الله ألتزم فيه. *-*

أما لليوم ف رغم عجزي لكن رح ألبس الحذاء الرياضي وأمشي دقيقتين زي ما حكيت، وبعد هيك رح أبدأ أرتب الشغل للترجمة حتى لو ما اشتغلت اليوم يكون سهل علي أبدأ بكرا، وبعدها رح أتحمم إن شاء الله.

رح أصور لكم من كتاب العادات الذريّة شيء مهم للعادات.

بعتذر عالتصوير التبن لكن زي ما قلت الكاميرا عندي زفت. بتمنى هذا يساعدكم في بناء عادات جيدة والتخلص من عادات سيئة، بالنسبة لي رح استخدم هالشيء وإن شاء الله ينجح.

كمان؛ لما كنت بحاول أنام لقيت بوست عالفيس بوك بحكي عن بيع كتب وهيك، وفيو 100 كتاب ورواية، ف قلت لنفسي ليه ما أعمل تحدي إني أحاول أقرأ هالمية قبل نهاية السنة؟ يعني أنا آلردي قارئة من خمسة لعشرة كتاب منهم.

لهيك حمّلت كتاب فاتتني صلاة وإن شاء الله رح أبدأ فيه بس انتهي من العادات الذريّة -يلي هو واحد من المية-

حدا حاب يشاركني فيه؟ رح أحط رابط البوست بالتعليقات حتى تقدروا تشوفوه.

هنا الرابط.

---
حرق لبكرا:
-إنهاء كتاب العادات الذريّة.
-العمل بفريق الترجمة.
-ارتداء الحذاء الرياضي، المشي لمدة دقيقتين.
-القفز لمدة دقيقتين.
-اختيار مكان وبيئة للكتابة كوني زمان ما كتبت.
-ترتيب غرفتي لمدة دقيقتين.
-صوم اليوم بأكمله إن شاء الله.
-قراءة القرآن لمدة دقيقتين.

هل واضح إني رح أحلل قانون الدقيقتين؟ 😩

وأنتو شو حرقكم لبكرا؟

كونوا بخير إيميز، أحبكم. 🤎