Ako'y Nalilito

Ako'y nalilito
Sapagkat ibang kulay ang nakikita ko.
Pula ang sabi ng puso,
Ngunit ang isip nama'y asul ang reklamo.

Ako'y nalilito sapagkat kakaibang kulay ang nakikita ko;
Marangya, ngunit simple lamang kung tingnan;
Masaya, ngunit tila mapanglaw rin minsan;
Nakahihilo, ngunit nagpapakalma rin naman.

Ako'y nalilito sapagkat iba ang nakikita ko,
Hindi mawari, walang masabi,
Ibang kulay ang nakikita ko,
Nasaang panig nga ba ako?