⚠️major character death⚠️

Taehyung abhi abhi office se thaka haara ghar aaya hai. Ek to bhari garmi upar se office ka AC kharab, uske bhi upar boss ka khadoos ravaiya. Ek hi to zindagi hai bichare ki uspe bhi itne zulam.

Taehyung delhi ke saraswati colony ke flats me rehta hai, apne office ke marketing department me assistant manager hai. Ek hi dua hai bichare ki, kab vo khadoos manager job se hate, aur phir vo manager ban jae.

Pichle paanch mahino se apne boss ke bure samay ke aane ka hi wait kar raha hai taehyung, par bhagwan uski sun hi nahi rahe.

Uska to sar dard se phate jaa raha tha, delhi ki bhari garmi ne bichare ka paseena nikal diya. Apne kadmo ko kitchen me le jakar usne fridge se paani ki bottle nikali aur paani pikar apni pyaas bujhai tabhi ghar ke bahar se kisi ke gaane ki awaaz aayi.

Bohot hi acha gaa raha tha jo bhi tha, tabhi to thaki hui halat mein bhi taehyung ke paer awaaz ki taraf apne aap badh gaye.

Ghar ke bahar dekha to 3idiots ke joy ki tarah ek ladka railing par bethe hue hath me guitar leke gaana gaa raha tha.

"Give me some sunshine,

Give me some rain,

Give ne another chance,

I wanna grow up once again"

Jab uska gaana khatm hua to taehyung ne bhi taaliyan bajane me der nahi ki, bhale hi ek haat me bottle thi, phir bhi school ke bacche ki tarah bottle se taali baja raha tha.

"Bohot acha gaate ho tum" taehyung ne kaha.

"Thank you, mein to bas ese hi.." usne sharmake bola

"Kya naam hai tumhara?"

"Jeongguk. Jeon Jeongguk."

"Mein kim taehyung. Pehle to mene kabhi nahi dekha tumhe yahan"

Do saal ho gaye taehyung ko yahan rehte hue, par usne aaj tak iss ladke ko kabhi nahi dekha.

"Kaise dekha hoga? Tumhare sar me apne boss ke murder plans jo chal rahe hote hai, to phir mein kaise dikhunga?" Jeongguk ne guitar ko side me rakha aur taehyung ke samne aake khada hua.

"Han vo bhi theek-- TUMHE KAISE PATA??"

Jeongguk zoro se has pada "Mujhse kuch nahi chupta, iss floor ke chappe chappe pe nazar hoti hai meri"

"Watchman ho kya?"

"Nahi nahi bas ese hi…"

"Acha rehte kahan ho? Mene seriously aaj se pehle tumhe kabhi nahi dekha"

"Bas yahi, iss floor ke sabse last ghar me"

"Achaaaaaa"

"Kya acha? Tumhe sharam nahi aati? Padosi saamne khada hai, ye to nahi chai-coffee puch lun, bas khade khade 'achaaaaaa' kar rahe ho"

"Wah beta, ghar to tera bhi iss hi floor pe hai, tu nahi invite kar sakta mujhe?"

"Mera gaana sunte hue kaun aaya tha?" Jeongguk ne pucha

"Mein!"

"Mere liye taaliyan kaun baja raha tha?"

"Mein!"

"Meri tareef kaun kar raha tha?"

"Mein?"

"Han to invite bhi kaun karega?"

"Mein?"

"Good boy, ab chalo tumhare ghar" yeh keh kar jeongguk to ghus gaya taehyung ke ghar me.

Aur bichara taehyung bahar khade khade sochta reh gaya ki uske saath hua kya?

"ARE KAHAN REH GAYE?" Jeongguk ki awaaz aayi andar se.

"HAN YAAR AAYA"

=================

Taehyung ne dekha jeongguk ko usi ke ghar me raja ki tarah fael pasar ke bethe hue, matlab koi tameez hi nahi.

"Chai ya coffee?" Taehyung ne pucha.

"Kuch thanda nahi kya? Bohot garmi hai"

"Baraf hai, khaoge?"

"Sirf baraf?"

"Han to tumne thanda maanga, baraf to thandi hi hoti hai na?"

Ek minute ke liye silence. Dono ek dusre ko straight face se bas ghur rahe the…

Aur phir achanak dono has pade.

Bas baaki ka samay ese hi baato baato mein nikal gaya.

Taehyung thaka hua zarur tha, lekin jeongguk se baate karke use bohot acha laga. Finally use koi baat karne wala mila, aur jeongguk bhi bina kisi shikayat ke uski saari baate sun raha tha, jaise ki uske paas sunne ke liye aur kuch hai hi nahi.

Jeongguk ne phir se taehyung ko apne shabdo ke maya-jaal me fasaya aur dinner plan bhi usi ke ghar ho gaya.

Taehyung ko bura nahi laga. Kam se kam vo apne boss ke murder plans kisi ko suna to sakta hai?

Usne phir thoda bohot Jeongguk ka bhi suna. Jeongguk to abhi bhi college student hi tha. Uski life simple thi zyada kuch tha hi nahi bolne ko. Vo to bas taehyung ko hi sune jaa raha tha.

Jeongguk ne ghadi ki taraf dekha tab use pata chala subah ho gayi. Aaj to puri raat hi taehyung ke ghar bita di.

"Oh god, subah ho gayi, sorry mere chakkar me tum so bhi nahi pae" jeongguk ne maafi maangi.

"Kya baat hai, mujhe bhi pata nahi chala, and it's okay, mujhe to aadat hai raat raat bhar jagne ki, all thanks to my boss" taehyung ne phir irritation se bola.

Lekin isse pehle vo phir apna rant shuru kare jeongguk ne use rok diya "tumhare boss ke zulm ki kahani shayad agli baar, abhi jaana hoga mammi aati hi hogi"

"Mammi?"

"Han, mammi ke aane waqt ho gaya hai" jeongguk ne ek ajeeb si smile ke saath ghadi ko dekha.

"Tumhari mammi bahar gayi hui thi kya? Tumne bataya nahi?"

"Mein akela rehta hun, aaj hi ke din mammi mujhse milne aati hai, saal mein ek baar"

"Oh--phir to tumhe jaana chahiye, esi opportunity nahi jaane de sakte"

"Yes, chalta hun. Phir milenge" kehkar jeongguk ne apna guitar uthaya aur jaldi se chala gaya.

Taehyung ne bhi office jaane ke liye ready hona shuru kiya.

Ek ghante baad jab vo bahar aaya to usne socha "jaane se pehle jeongguk se milta jaun"

Apne bag ko kandhe par chadakar usne floor ke sabse last room ki taraf kadam badhae.

Room khula hua tha, usne andar jhank kar dekha to ek aunty thi wahan.

"Namastae aunty, aap jeongguk ki mammi hain na?"

Un aunty ne confusion se taehyung ko upar se neeche tak dekha aur pucha "han lekin tumhe kaise pata?"

"Aapki shakl se, jeongguk bilkul aap par gaya hai. Vaise mein bhi isi floor par rehta hun, kim taehyung"

"Vo to thik hai par tum yahan kaise? Jeongguk ko kaise jaante ho tum"

"Kaisi baate kar rahi hai aunty, hum ek hi building me rehte hai ek hi floor par, jaante to honge hi na. Han vo baat alag hai ki mein aapke bete se kal hi mila hun pehli baar" taehyung ko hasi aai par aunty ke chehre par sirf confusion hi thi.

"Kya bol rahe ho beta, mere bete jeongguk ki to teen saal pehle car accident me maut ho chuki hai"

Taehyung ki aatma uska sharir chod ke jaa chuki thi. Use lag raha tha aunty pagal ho gayi hai. Lekin jab aunty ne ishara kiya ghar ki ek deewar par to taehyung jeete-jee marr gaya. Uss deewar par jeongguk ki photo lagi hui thi, jis par haar chada hua tha, neeche likha hua tha...

"01-09-1997 --- 08-06-2016"

Aaj hi ki date thi vo. Bas saal hi teen saal pehle tha

Tabhi aunty ne bola…

"Jeongguk yahi par padta tha, lekin teen saal pehle aaj hi ke din uska car se accident ho gaya tha jab vo college jaa raha tha. Vo uske college ka akhri din tha. Apni graduation cerem--" jeongguk ki mammi ro padi "-uski koi galti nahi thi, vo gaadi wala hi sharab peekar gaadi chala raha tha, sharab pee usne BETA KHOYA MENE"

Taehyung ne to imagine bhi kar liya pura accident ka scene aur bas uske bhi ansu nikal aae. "Log samajhte nahi aunty, unki ek galti ki kisi masoom ko bohot badi saza mil sakti hai. Na jaane roz kitne accident hote hai india mein, jinme marne wale ki koi galti bhi nahi hoti"

"Mein aaj hi ke din roz yahan aati hun, harr baar esa lagta hai ki mein apne jeongguk ke paas aayi hun. Mujhe esa lagta hai ki mera beta yahin hai"

Tabhi taehyung ne jeongguk ko dekha, vo vahin khada tha apni maa ko rote hue dekh raha tha chup chap harr saal ki tarah, aur khud bhi ro raha tha harr saal ki tarah.

Uski nazar taehyung par padi, bas dono ek dusre ko dekh rahe the aur ro rahe the. Jeongguk ne ek "sorry" bola jiski awaaz kisi ko sunai nahi di, akhir kudrat aur kismat ke aage kiski chalti hai.

Bas apne haat ko uthakar, ek dusre ko haat hilakar, bina kuch kahe hi "alvida" keh diya dono ne ek dusre ko.

Aur phir jeongguk hawa me gayab ho gaya. Jiske baad taehyung zor se ro pada, vahin par beth kar taehyung aur jeongguk ki maa dono ro rahe the.

==THE END==

This chapter, This story ends here.

I cried😭 Am still crying😭

I killed jeongguk again😭, but i felt on him this role suited more in this story rather than taehyung.

Bhagwan ne apna badla le liya😭. Mene taehyung ko chitiyon se katwaya tha, chitiyon ne mujhe kaat liya.

Ek nahi, do nahi, bohot saari😭😭😭😭