Mond Pa mwen an
M pa bon moun! M pa bezwen pèsonn vin dim sa, mwen konnen sa deja. Vi pa m ranpli ak enpèfeksyon, men sa pa fè anyen, m chwazi li konsa! Pandan tout moun ap chache mete nan m yo nan yon paradi, mwen m pat ezite pran plezi m ak demon mwen yo, avantaj m te genyen, m pat kreye okenn lanfè, m pat bezwen okenn paradi non plis. M te senpleman nan mond pa mwen. Yon mond dwog, alkol, plezi, sèks, travay, lanmou, ak nan m mwen ki pat sispann fè plizyè moso sou chak 24è ki pase.Mond pa mwen an te gen kè m ki t ap bat pou Ifé,te gen lespri m ki te makonnen avèl e te gen evidans egzistans lan ki t ap ekri istwa mwen menm avèk li nan tout kwen ak rakwen kreyasyon lanati. Pat gen nou,se te mwen epi se te li. Li menm, yon ti bout fanm tou kout ki te charye peripesi lavi sou do l.Mond pa mwen an chaje ak trayizon, li chaje ak kè brize, li plen ak yon dividal desepsyon. Men sa ki pi di a, li te gen lanmò ak separasyon. M menm sispann konte konbyen fwa m mouri pou m reviv nan mond sa. E a chak fwa m pa sispann rekòmanse...…
