-Volume O1-

"PAGHIKALIMOT SA KAGAHAPON"

Sa matag-adlaw nga atong pagkinabuhi niining kalibutana,
Klase-klase ug sari-saring mga problema ug mga pagsulay ang masinati ta,
Usahay, pagabiaybiayon, tamayon, bugalbugalan, inay pasakitan pa,
Ug adunay mga panahon nga kita gani pagalutoson pa.

Adunay mga panahon, nga kita walay kwarta,
Walay benti-senko sentavos ang mahulog, bisag ang pitaka balibalihon mo pa,
Usahay modungan pa ang balatian, kawalad-on, ug kagubot sa panimalay,
Ug daw ganahan nalang ka nga mohunong, ug imong kasing-kasing daw puno na sa mga pagmahay.

Apan, igsuon pagmata na!
Kay kining tanan nga imong naagian lumalabay ra,
Sama sa unos, kining tanan mawala ug matapos ra,
Ug sama sa baha, kining tanan moundang, ug igsuon, may paglaom pa ta.

Sa kagahapong walay samang kapait,
Sa kagahapong walay ma-i-kakumpara sa tumang mga kasakit,
Sa kagahapong daw walay paglaom,
Ug sa kagahapong walay makita nga kahayag, ug sa kangitngit daw kita gihapon nailalom,

Apan bukha pag-usab ang imong mga mata,
Ug niining higayona, ang kahayag mahikaplagan mo na,
Ang walay samang kapait sa kagahapon,
Ug ang tumang kapait sa kagahapon nga imong naangkon,

Karon, pagabaslan na ug walay samang kalipay,
Karon, sa imong kasing-kasing, mawagtang na ang imong mga pagmahay,
Dawata ang bag-ong paglaom, kusog, gugma ug kalinaw, sa walay paglangan,
Gikan ni Ginoong Hesus, ang tinubdan sa tanan,

Ayaw tuguti nga kanunay ug magpabilin kang ginapos sa mapait mong kagahapon,
Ayaw tuguti nga kanunay kang magpabilin nga mao ra sa gihapon,
Ayawg hikawi ang imong kaugalingon nga makasinati sa tinuod nga kagawasan,
Ug mas ayawg hikawi ang imong kaugalingon, nga makasinati sa tinuod nga kalipay, nga walay maikakumpara, bisan gani ang bililhon nga mga bulawan.

Karon, tikangi ang paghikalimot sa imong alimuot nga kagahapon,
Sama sa libro, taposa kini uban ang kasing-kasing nga malipayon,
Kay sama nga ang adlaw mosalop,
Ug ang kangitngit usab motak-op,
Dawaton ta ang nangagi, kauban ang nakat-unan ta sa kagahapon,
Ug andamon ta ang atong kaugalingon, sa paghimamat sa bag-ong kaugmaon.

@precisely_gem

*****
•| ang larawang nasa itaas ay hindi sa akin
•| it was obtained from the elements of Canva and was edited on the same app
•| all credits belongs to its rightful owner

***

Thank you for reading! See you sa susunod kong tula! ☺️

Don't forget to vote, comment, and share!
Love lots, pag-amping mo kanunay, and God bless everyone 💗