Nokorin Ya Ing Ginu?

Anyang malati ku dimdam ke i Ma ku
"Ala ta namang kanan" ana kang Tatang ku
At mekibat ya "E bali ing Ginu ing mibala kekatamu".
At anang Ma ku "Nokorin ya ing Ginu?"

Agad kung megsadya at meko ku keng bale,
At tsaka ku minta kareng tawu keng marangle
At kitang ku karela, "Ikit ye pu ba ing Ginu?"
"Pantunan ke pu uling pantunan neng Ma ku."

Tiknangan da ing saka at linawe da ku ngan                             
Ot meyli na lang meyli ali ku ayntinjan,
At tsaka da sinabi "Nak, magbalik ka kang Ma mu"
"At pakisabi mu kaya ala ya keni ing Ginu."

Tinangu na ku mu at tsaka ku la likwan,                             
Anyang ginulut ku, meyli lang mas masikan
King pali ning aldo at keng kakung kapagalan
Sinilung ku sagli ketang kantung tindahan.

"O nokorin ka ba't inang?" ana na ning Manang
"Keta pung marangle, atin ku pung payntunan."
"King makanini kapali, ninung payntunan mu?"                   
"Payntunan ke pu ing Ginu uling payntunan neng Ma ku."

Meyli yang masikan at linawe ku kaya,
Oneng ala kung dimdam anjang nanung saya,
Magtaka kung lalawe anyang kaya ku dimdam,
"Nang, nung ating Ginu, e ku ne kailangan ing tindahan!"

At kanta ku kitang, "Nung ala pung Ginu, ot payntunan neng Ma ku?"
Anyang mekibat ya, mayli ne na naman
Ana, "Nak, magbalik ka kang Ma mu,"
"At pakisabi mu kaya, kalokwan ya ing Ginu!"

At tsaka ya meyling ayling mas masikan,
Pero kabang mayli ya kanta ku apansinan,
Ing kayang halakhak alang halung tula,
Bagkus at nang kalangi at ating halung gaga.

At tsaka ke likwan uling kabud ku metakutan,                            
Tinawid kung dalan papunta ketang pampang,
Siguru ing Ginu ali ne man kalokwan,
At baka sakali karin ke apantunan.

At tsaka kula ikit retang matwang manasan,
Linapit ku karela tsaka ku la kitnangan,
"Balu yu pu ba nung nokorin ya ing Ginu?"
"Pantunan ke pu uling pantunan neng Ma ku."

Kabud la tinuknang keng karelang gagawan
Linawe da ku ngan at meyli lang masikan
At tsaka la mekibat, "Nung atin man Ginu o Nang,"
"Ot pilan na kaming bulan alang ayakwang asan?"

"Anya anak, magbalik ka kang Ma mu"
"At kauli mu kaya, ini ing sabyan mu"
"Ma, e mu ne pantunan ing Ginu kasi e ya tutu"
"Sadya ya mung kwentu para keng malating kalupa ku".

At tsaka la meyling ayling alang tula,
Kareng salita da, kabud ku mipagaga,
Melabug ngan ing dalan kareng kanakung luwa,
At eku na balu ing pauli o papunta.

At keng kakung takut tsaka ku pinulayi,
Oneng keng dalumdum mas lalu kung melili,
Pilit kung mamawus keng malati kung gulisak,
Oneng bukud keng takut, ala ng mekibat.

Linukluk ku keng dalan at tsaka ku ginaga,
At anyang suku na ku kabud tin megsalita,
"Nak, nanung melyari ot ika mung dili?"
"Ot makalwal ka pa keng oras ay ni?"

Tinuknang kung ginaga at tsaka ku tinalanga,
At ikit ko reng mata ning matwang magsalita,
At anyang tiniman ya kanta ke akilala,
Ing bukut a manlimus kekaming banda.

At tsaka ku mekibat "Pantunan kepu ing Ginu uling pantunan neng Ma ku",
"Oneng ala Ya kanu keni at e Ya kanu tutu",
"At tsaka ku ginaga at kanta ku melili",
"At na pa kadalumdum at tsaka akung dili".

Bala ku mayli ya rin kalupa da reng aliwa,
Oneng keng pakibat na keta ku mebigla,
"Nak, ing Ginu kayabe ta ya mu",
"Kayabe me pane at kayabe neng Ma mu".

Kinwa na ku gamat at tsaka kami linakad,
Ana, "Tuki da na ka tsaka da ka atad" ,
Kanta ku akutang "Nung kayabe ke ing Ginu ot e ya papakit?",
Ing pakibat na, "Ot balu mung ting hangin anjang ala kang akakit?"

"Ot kapag matudtud  ka ali mu man kukutang?"
"Nung migising ka pa ba keng kinabukasan?"
"Ot keng bawat panisnawa ali ka mang-alangan?"
"Na ita na ing tawli mung kapanisnawan?"

"Ninu ing magpadalang uran kareng tanaman?"
At para deng keng marangle atin la apangan?"
"Ninu ing manibala keng karagatan?"
"At para deng manasan atin lang apanakitan?"

"Ninu ing magpadalang tawung sasali?",
"At para i Manang atin ya a-abli?",
"Atsu ya ing Ginu keng aslagan at albugan",
"Keta at keni, keng kayli at wanan".

"Atsu ye ing Ginu kareng lugar a masala"
"At keng madalumdum mas lalu me akilala"
"Atsu ya ing Ginu kareng makapadurut keka"
"Lalu na kareng tawu na lulugud keka"

"Kutnangan meng masalese tsaka na ka pakibatan"
"Oneng minsan ing pakibat ali mu ayntinjan"
"Kapag ikang dili tsaka na Ka abayan"
"Nung malili ka man, siguradu na Kang pantunan"

Meyari yang sasabi tsaka ya tiniman
"Awni na ing bale yu, keni da na ka lakwan"
Pinulayi ku pauli at ikit ke i Ma,
At keng sobrang saya, kinawul keng sadya.

Keng muwa ng pamangutang megkwentu ku kaya,
At anyang kitang na nung  ninung malugud a matwa,
Tinuru ke ing wanan oneng kabud ne mu ala,
At ali ku ne ikit manibat pa kanita.