Nahar
_08_

"Ka san kwana biyu bani da wani kwanciyar hankali so abubuwa da yawa suna ta faruwa a company." Isma'il din ya fada, yana murda steering wheel din motar kan titin Nasarawa. Abokin nasa ne ya dube shi yaga yadda a hankali yake fadawa. Kai tsaye ba zaka ce ya rame ba amma in dai ka san shi, zaka ga alamar yadda idanun sa sukayi ciki ciki.

Cikin tausayin sa ya girgiza kai. "Ya kamata dai ace ta sarara maka. Ko ta bukaci zuwa gida ka bar ta. Give her some space saboda ta samu saukin radadin da take ji. It's not easy, ban ga lefinta ba because babu uwar da hankalinta ba zai tashi ba idan yaron ta ya bata. Balle kuma Aisha da sai da ta dandani infertility for a while. Tabbas abun da ciwo."

Shiru suka danyi kamar Isma'il din ba zai tanka ba sai kuma ya murmusa. "Ba zaka gane ba. Zargina fa take yi! Wai da sa hannu na suka bata. Can you imagine?"

"Lamarin mata sai su ai kuma sai munyi hakuri dasu. Yanzu dai ya ake ciki game da new department din da kake shirin budewa na company din?"

Isma'il girgiza kan shi yayi kamar hakan zai taimaka ya toshe sashen Aisha a yanzu. Amma ji yake muryarta tana yawo a kan shi. Sosai yake jin rashin dadi saboda rashin jituwar da ke tsakanin su. Amma sai ya hakura ya fara yiwa Muhyideen din bayani.

"Muna jiran approval ne daga SON. Burin Baba yaga mun fara natural drinks duk a watsar da wannan carbonated beverages din da basu da wani fa'idah. So nima ina ta kokari. Research department din mu ma sun dauki survey. Mutane da dama suna so su dena shan wannan lemukan amma sun kasa."

MJ ya yi dariya. "Toh ko wa zaka tambaya ai haka zai ce ma. Ni fa bana jin dadi in a rana ban sha lemo ba. Especially in an yi rana, sai na sha roba hudu ma."

"Sugar kills. Amma ba irin kisar da zaka gane ba. Either way ina fatan zaka zama one of our biggest customers. At least it's still a beverage but it will rather be nutritional as opposing to it's refreshing counterparts."

Kashe motar Isma'il yayi yayin da ya faka a gate din gidan marayun. A tare suka fito, MJ yana bashi amsa.

"Idea din ta matukar burge ni. Allah yasa a fara a sa'a." Da ameen ya amsa sannan ya bude booth yana kallon abokin sa.

"Taya ni shiga da kayan nan."

Nan sukayi ta shiga da siyayyar da Isma'il din yayi shekaran jiya amma bai samu kwarin gwiwan zuwa orphanage din ba. Kaya ne na sakawa na jarirai, da pampers da abincin da duk wani yaro zai bukata. Sai kuma kayan abinci normal wanda babba zai ci. Da su sabulan wanka da duk wani kayan amfanin yau da kullum.

Babban dalilin sa nayin hakan shine don ya ciyar da marayu wanda Allah ya sanya dumbun lada a cikin haka. Addinin musulinci ya nuna muhimmancin kula da maraya da kuma babban rabon da mutum yake samu ta sanadiyar yin hakan. Rabon da zai kai mutum ga zama makwabcin annabin rahama SAW a aljanna.

Sai da suka gama shigar da kayan sannan suka karasa ofishin Hajiya Talatu wadda da taimakon ta Isma'il ya dauko Nahar din daga orphanage. Wadda kuma duk karshen wata tana zuwa ta duba Nahar din. Don kuwa sai da taga Aishan ma tayi mata kafin tasa hannun karshe ta basu Nahar din.

Baya taba mantawa, wata rana ce kamar yadda ya saba zuwa duk karshen wata a bisa tarbiyyar da mahaifinsa ya masa. Ranar ya ganta a takure a waje daya yayin da sauran yara sa'anninta suke ta wasa. Haka kawai yaji ta shiga ransa, bayan sun yi magana da Aisha akan cewa tana son yar aiki sai kawai yaji kamar Nahar din ce ta dace. A lokacin ya shiga kokarin cike ciken takardu na tsawon lokaci kafin a amince a bashi ita.

Yanzu kuma da wani ido zai kalli Hajiya Talatu mace mai kiima da kula da amanar marayun? Ya san ana cewa masu kula da marayun basu da kirki, tabbas akwai nagari a cikin su akwai kuma mugayen.

Ba tare da ya ankara ba yaji hawaye ya cika masa ido. A karon farko da wani irin rauni da jin kunya ya mamaye shi.

Zama suka yi, suka gaisa kamar ko yaushe amma sai yaji harshen sa yayi nauyi sosai.

"Baka gajiya, Allah ya saka da alkhairi. Dafatan dai babu matsala daga bangaren Nahar?"

Dan jim yayi kafin ya amsa. "Lafiya kalau Hajiya. Mun gode." Mamaki ya cika MJ amma ganin har Isma'il din ya mike yasa bai tanka ba.

"Masha Allah. Zan kewayo gidan a karshen watan nan in sha Allahu. Yarinyar ce da shiga rai, haka kawai nayi kewar ganin giftawar ta."

Murmushin karfin hali sukayi dukkan su, da kaji yadda suke ta faman 'hnm hnm, hehe' da washe hakora kaga marasa gaskiya amma da yake Hajiya Talatu bata sa komai a ranta ba, kwata kwata ma bata lura ba.

Ba shiri suka yi mata sallama suka nufi mota inda Isma'il din yake ta faman gumi kamar wanda yayi gudu me yawan gaske. Har ya kunna AC numfashin sa bai daidaita ba.

"Amma ba haka mukayi da kai ba."

Bai bashi amsa ba.

"Ban san yaushe ka fara karya ba."

"Man, what you did there was uncalled for."

MJ dai shi kadai yake kidan sa yayi rawar sa. Ya bude baki zai sake magana kenan Isma'il din ya daka masa tsawa.

"Ka ga malam bana son shishshigi! Shawara ce na yanke, nazo kuma na chanja. Ko kana da ja ne?"

Daga hannun sa MJ din yayi. "Take no offense, come on man ka bani mamaki ne kawai. Sannan kuma ina baka shawara ka gayawa Aisha a orphanage ka dauko Nahar ba wai daga kauye take ba. Matsalar karya itace, in kayi daya sai ka sake wata don ka rufe dayar. Yanzu in Hajiya Talatun tazo me zaka ce mata?"

Shirun da MJ yaji ya sanar dashi Isma'il ba zai tanka masa ba.

******

Cikin sati daya Nahar din ta soma sabawa da mutanen gidan ta hanyar gaishe su da kuma yin murmushi. Sai dai ko kadan bata cika magana ba. In kuma kana so kaji tana dariya sosai toh ita dai Haifah ne. Takanas aka mika kula da Haifah zuwa ga wata ma'aikaciya a gidan. Nahar din sai dai ta dauki Haifah don nishadi amma ba don reno ba. Da kyar ma aka barta ta dinga kwana a wajen ta.

Tsarin gidan na daban ne kuma cike yake da ka'idoji wanda take ji Sophy na yawan fada idan ta bita kitchen.

Zaman dakin isarta yake yi kuma an hana ta ko da daukan tsintsiya ne. So kawai sai ta tsiri shiga kitchen din taga yadda suke nasu girkin.

"In kina so naman ki ya dinga bayar da dandano na musamman sannan yayi saurin dahuwa, toh tun yana danyen zaki masa hadi sai ki dan sa mai. Ba ruwa ba fa o, sai ki sa shi a fridge yayi sanyi ko da na minti talatin ne. In kika fito dashi, it's well marinated sai ki sa ruwa kadan. In ma gasa wa zakiyi toh, cikin minti goma kin gama." Sophy din ce take koya mata yadda take sarrafa naman girkin da yake yiwa Nahar din dadi sosai.

"Meye merinit?"

"Wannan yaro! Marinate nace. Kamar nace ya tsumu."

"Toh." Har ta juya zata tafi sai ta juyo. "Nagode."

Bayanta Sophy tabi da kallo. Tambayoyi fal cikin ranta.

Fitar Nahar yayi daidai da shigowar Othman. Ba tare da ta hango shi ba, ya tsaya a gabanta.

"Ka ban tsoro."

Dariya yayi. "Kullum tsoro, kullum tsoro. Ya kike? Ya Asma?"

Maimakon yaji amsa daga gareta sai yaga idonta yana kyalli alamun kuka take son yi.

"Ni ina son ta a wajena." Ta fadi tana wasa da yatsun ta.

"Okay okay, mummy ta karbe ta ne saboda kar ki dinga gajiya saboda very soon zaki fara makaranta. Kin san makaranta ai ko?" Gyada mishi kai kawai tayi.

"Yauwa toh je ki dakin ki, zan sa a kawo miki ita. Kinji good girl?" Ba musu tayi sumsum ta wuce hanyar dakin shi kuma kawai ya tsinci kan shi da murmushin da bai san dalilin sa ba sannan ya nufi sashen mummy da tunani kala kala a ran sa. Yana daidai kofar dakinta ne yaji alamar waya take. Kamar ya juya amma sai ya tura kofar yaji ta tana magana a hankali amma yana iya jiyowa.

"Na sani Umaimah, so nake nasan yadda zanyi na raba ta da jaririyar nan. Ta hakan ne kadai kudurin mu zai cika. Ai babu yadda za'a yi na dauki yarinya na ajiye a gidana ba tare da wani plan a kasa ba. Yeah, _saufa tasma'i minni an qarib_" da wannan ta kashe wayar shi kuma Othman din yana shiga.

****

AeshaKabir
Rufaidah Yusuf.

Har yanzu dai littafin bai ma soma ba, introduction ne!