" Main rozana khirki par kharra, usse dekhta aur itna dekhta ke meri ankhain bhar aati magar main kuch nahi krskta tha. Mjhe usse lagao hone laga tha, aur iss baat ke liye main khud se larrne laga tha. Aesa lagta tha jese koi aurat bhi meri zindagi main ati hay tw wo mjhe meri maa ki trah chor jayegyi...
Ahista ahista din guzrne ke sath meri himmat barhne lagi aur phir main uska taqub krne laga, wo jahan jati main khamosh saye ki trah uske piche ho chalta...
Lekin woh jab apni jadui awaz main wo kalam prhti aur uske sur se mjh pr ek sakta taari hojata tha, khauf taari hone lagta aur qadam apne aap piche usse door hone lagte, main nahi janta tha ke aesa kiun tha.
Phir maine usse chits main baat krna shuru ki, jiska jawab wo nahi deti thi. Yahan tk ke main ek din usse milne uski maa ka doctor bhi bn ke gya, lekin meri wo mulaqat bhi lamhe bhar ki thi. Kiunke main nahi chahta tha ke wo ek jhooti shanakht se mjhe jane.Uske liye beshumaar rishte aye thay, jismai se Sajid bhi ek tha. Lekin wahan se mere paa ki nafrat ka aghaz hua tha. Sajid se main khud bhi nafrat krta tha lekin itni nahi ke uski jaan le lu. Lekin paa ne aesa kya tha wo uske jism pr hawi ho kr Azaan se milte aur usse ya phir kisi aur ko pata bhi na chalta.Lekin mjhe mehsus hogya tha ke paa ka bartao kuch badla badla sa hay.Sajid ko Azaan se door karne ke baad mjhe laga tha ke main kamyab hogya tha, lekin aesa bhi nahi tha.Kher.
Hmare drmyan mazhab ki deewaar thi aur ek makhlooq hone ki deewaar thi. Mazhab qabool krke maine pehli deewaar tw gira di phir baari thi dusri deewaar ko girane ki, yaani uss faasle ko tay krne ki jo hmain mukhtalif rkhta.
Uski mohabbat se eeman tak ka safar mere liye bohat mushkil tha.
Azaan mere jeene ka zarya ban chuki thi.
Phir ek roz Paa ne dubara aa kar meri mohabbat pr waar kya, goya mere dil pr unho ne uski izzat pr hmla kya tha. Ussi waqt se maine tahaya krlya tha ke main apni mohabbat aur apne eeman dono ki hifazat kruga chahe uske liye mjhe apne baap ke mukhalif kiun na kharra hona parre. Aur waqt ne mjhe yahi krne pr mjboor kya. Main Azaan ko le kr dusre shehar chala aya, aur phir hum ne apni zindagi ki shuruat wahan se ki. Hmari Maahrit ki pedaish bhi waheen hui.
Main apne gunaho ka kaffara apne watan ki khidmat krke jutana chahta tha, chuna che main ne army force join krli thi.Maahrit ke pede hone ke paanch saal baad mjhe aik aese mission pr jana parra jiske liye mjhe apni shanakht chupani bohat zruri thi aur jiske liye mera marna ehem tha, islye maine dunya ki naraz mai marne ka nataq kya aur jhooti khabar uss tak pohnchai. Main apni family se mustaaqil torr pr door hogaya tha. Meri ankhen meri beti ko dekhne ke liye tarasne lagi theen aur mere bazu, Azaan ko seene se lagane ke liye bechain thay magar main majboor tha apne farz ki khatir apni mohabbaton ko qurbaan krna tha. "

Sir ki daastaan sun kr meri ankh kab nam hone lagi thi pata hi nahi chala, mere hath pr palkon se tapke huay do ansoo jam gye thay.

' I.. I .. Salute you sir... I salute you. Allah apki mohabbat ko hmesha qaim rkhe. Aur apki beti... Uski hifazat ka waada main krta hun ap se... Main janta hun Allah hm sb ka negehban hay, magar bnksbat uske shohar hone ke aur usse mohabbat krne ke main uska khyal rkhuga har trah se. Aur bus apko kuch kehne ki zrurat nahi. Main smjh gya hun ke apke waalid sahab apni kamiyon ko tarashne ki koshish kr rhe hain. In sha Allah, sb theek hojayega. Ap befikr rahye. '

" Tumhara hone wala bacha ain mumkin hay ke hm jesa hi ho, kiuke Maahrit mera hissa hay. Aur choonke Maahrit ki shadi bhi ek hm jeso mai se hui hay, islye aesa ho skta hay. Aur agar aesa hay tw ye tm bhi jante ho ke mere paa bache ko kuch nahi krskege, haan magar uska nuqsan Maahrit ko hoga agar... Hum ne usse nahi bachaya tw... "

' Nahi Sir. Aesa nahi hoga. Agar mera bacha mjh jesa hi hay tw bhi aur agar nahi hay tw bhi, main dono soorat main pehle uski maa ki hifazat ki zimedari ka waada leta hoon ap se. '

Present,

Madam apne sar ko Maahrit ke shaano se lagaye nam ankhon ke saath us pr ayat-ul-kursi ki tilawat parh parh kr phoonk rhi theen, tw kabhi Surah baqarah ki tilawat karne lag jaatin.

Mjhe iss baat ka darr khaye ja rha tha ke agar ye bacha waqai jinn tha, tw phir iski pedaish jald hi mutawaqa hogi.Aik ajeeb sa khauf mjhe khal rha tha, smjh nahi araha tha ke main apna waada kese nibha pauga.

Achanak Maahrit ki unglyon ki hrkat ne mjhe mere khaul se azad kya, kiunke maine Maahrit ki unglyon apni unglyon main piroyi hui theen.

Uss ne ahista se apni ankhen kholin aur phir dabi si awaaz main pani manga. Madam ke chehre pr kuch herat aur kuch khushi ke milte julte jazbaat namudar huay thay. Unho ne jaldi se pani ka glass la kr uske honton se lagaya aur phir usse sahara dete huay bitha dya.

" Main ... Main kuch lati hun tmhare liye beta. Kuch mat bolna abhi, araam kro bus. Aur kuch sawal bhi mat krna. "

Madam ne apni laadli ko tanbeeh krte huay uthtay huay kaha. Unke jane ke baad maine kuch der tak yunhi maahrit ki ankhon main dekh kr baatein ki, jiske jawab main bus wo chup chaap ansoo bahane lagi.

' Maahrit, tmhe rone ki blkl zrurat nahi. Kuch nahi hua tmhe tm theek ho. '

" Tw ... Tw phir hum yahan kese. Amsterdam main jab hum wahan se wapas arahe thay, phir kya hua tha Saamer?? "

Maahrit ne khafgi se mjhse tafteesh krte huay pucha, main usse kese batata jo uske sath hua tha wo usse batane ke qabil nahi tha.

" Kuch nahi beta, ye umuman pregnancy ke shuru ke daur main hota hay. Bus tmhain weakness bohat zyada thi islye tm do din tk behosh rheen. Tmhe dekh kr ye bechara preshan hogaya islye mjhe bataya, tb maine isse yahan laane ka kaha. Sorry beta agar main ne tmhe... "

Shukar hay madam ne aakar baat smnbhal li wrna tw bus mere munh se nikal hi jata shayad ke uski halat ke piche uske maa baap ka ek purana dushman hay jo ab usse badla lena chahta hay.

Ab bus mjhe intizar tha ke main kisi trah Miss Gloria ko dhundu, jo ke Sir ki walda theen.Agar Sir ke walid ko koi qabu main la skta tha tw wo sirf unka bichra hua pyar tha.

Maahrit:
Few months later,

Kamre main maujud sannate ka faida uthate huay maine dabe qadmon se khidki ki traf rukh kya. Mamma mjhe kb se ajeeb ajeeb cheezen khila rhi theen jab ke mera man, padosi ke pairr pr taaze kache aam.. Ah.. Unhe dekh kr hi munh main paani agaya, meri raal tapak rhi thi.

" Maahrit main janta hun ke tum kya soch rhi ho! Aesa krne ki blkl bhi kat sochna. "

Saamer ne achanak se akar mjhe preshan krdya. Uss ne apne dono hath meri kamar ke gird lapete aur apni thori mere shaane pr rkh kr srgoshi krne laga,

" Main le aata hun tumhe jo chahye. "

Aur phir uss ne apna hath meri ankhon pr phera aur dekhte hi dekhte tqreeban pados ke pairr se saare aam khali hochuke thay, aur wo sb hmare kmre ke table pr sajay huay thay.

" Apni beghum ke liye main itna tw kr hi skta hun. "

Aur shaukhia andaz main aik hath seene ki traf laate huay, dusra hath apni kamar ki piche le gya. Maine muskura kr uske gaalon ko chooma aur apne nishane ki traf barrhne lagi.

Kuch hi minton main wo saare aam khatam krchuki thi aur Saamer mjhse lutf andoz hote huay dekh rha tha

' Aese kya dekh rhe ho? '

" Dekh raha hun ke tum ne mere  bghair saare aaam khud kha liye. "

Bed se uthta hua wo mere paas akar beth gya aur mere honton pr laga hua aam ka raas apne angoothay se saaf krne laga.Aur phir bina kisi tanbeeh ke apne hont meri thori pr jama dye.

" Bohat meetha hay. "

Ankho ke sahare ussne mjhe chera aur phir wipes se mere honto ko saaf kiya aur phir meri gaud main apna sar rkhdya. Mjhe usse pata nahi kese mohabbat hogyi thi, uski har adaa pr dil krta tha bas khud ko nichawar krdu.Maine apni unglyan uske baalon main pherin aur phir usse mukhatib hui.

' Saamer tm ne mjhe aj tk nahi bataya, ke kya hua tha Amsterdam main? Mjh par kisi ka saaya tha na? '

Mjhe iss baat ka darr tha, ke kaheen mere sath jo hua tha uska asar kaheen bachay pr na ho kiuke tab wo uski nasho numa ke ibtidai din thay.

" Ah.. Maahrit, tum pr jo jinn sawar hua tha wo .. Wo tmhare baba aur mamma ka purana dushman tha, main ye nahi bata skta ke wo kon tha lekin ab wo tmhe nahi satayega kiunko usko jo chahye tha wo haasil hogya hay. "

' K.. Kya chahye tha usse mjhse? '

" Tumse nahi. Kisi aur se. Aur iske liye tum chaho tw mera shukrya ada krskti ho. "

' Tum ne kya kia? Mjhe tafseel se batao Saamer kya baat hay? '

" Bus yun smjhlo ke maine do pyaar krne waalon ko taqdeer se larr kr milaya hay. "

-----------------------------------------------------------

Assalam.o.Alaikum readers,

Mjhe pata hay ap blkl bhi mera novel pasnd nahi krte,
Aur main koi Umera Ahmed nahi hun lekin phir bhi unsab ka shukrya jo isse iss qabil smjhte hain ke ye prhi jaye :)

Past ka tazkira karne ka ye maqsad tha kiunke jo kuch baatein Deewaar ki novel main adhuri ya bemaani lagti thee wo yahan par maine koshish ki hay ke clear hojaye. Mere pas time nahi hota ke main purane chapters review kru dono book se aur agay kuch uss hisab se likhu. Lihaxa agar kuch smjh se bahir baat lage ya aesa lage main kuch miss kr rhi hu ya ghalat lkh rhi hu tw pls comment main zroor batayen. Shukrya!!