••••

Do din se na uss ne ankhen kholi thi na kuch hrkat ki thi, bus jab bhi uski awaz sunta aesa lgta wo mjhe kaheen door se pukaar rhi... Wo chahti hay ke main usse bachaun uss andhere se jahan wo chalti chalti kho chuki hay aur wahan ka har kaala saaya usse uski rooh se bhi khaufzada kr rha tha... Wo kuch sochne smjhne ke qabil nahi tha, usse laga tha jese Allah ne uske sath kuch ghalat kya ho... Kuch bohat ghalat... Iss soch ke baad wo mayus hojata, sharam'saar apne hathon main apna munh chupaye zameen pr gir kr apne Allah se maafi mangta aur phir Usse mana kr kehta ke usse uski maahrit wapis chahye... Maahrit ka jism in do dino main apna rang kho chuka tha, uski ankhon ke gird aese gehre halqay prre huay thay jese wo sukun ki neend ke liye ek lmbe arse se tarsayi gyi ho, Do din pehle tw wo blkl thek thi... Unhe apna woh lamha bohat qeemti laga tha jb woh do jismon se aik rooh main muntaqil hogye thay, unki nazron pr ek dusre ke hi pheray thay, Amsterdam main guzre huay teen dino ke baad , do din pehle hi tw yahan Norway aye thay... Lekin ... Aesa bhi hoga ye kis ne socha tha?

Wo thndi shaam, uski zindagi ki sb se sard shaam thi...

••••

Ek aur Qudrati shahkaar, Lofoten Islands main maujud Northern lights aur Midnight sun ki dilkash aur purkashish ronaqain hmain pehle se hi mutasir kiye huay theen. Jab maine ye destination honeymoon ka socha tha tbhi meri pehli pasnd pr Norway aya tha, lekin herat ki baat ye thi ke hum yahan 3sri jagah ke bnisbat aye huay thay.Hum yahan raat ki khubsurti main Unstad ke jazeeray pr maujaun ki rawani ke saath larrne yani surfing ke liye aye thay, Safed barf se dhake huay chote pahar ke teelon ke beech samandar ka darja harart sirf 6°C tha jbke hawayen mazeed thandi aur khushk taqreeban 1°C pr theen.Chandni jesi barf , se dhaka hua wo beach koshish main tha ke hmari mohabbat se bhi haseen nazar aye.Aur uss pe thandi lehrain aur un se larte huay hum. Hum dono ne aik hi surfing board lya hua tha, aur wo mere agay apne dono hath hawa main phelaye lutf utha rahi thi. Aur main iss khushi se lutf utha rha tha jo wo mere samne taqreeban mere seene se lag kr apni saanso ki mehek se mjhe madhosh kr rhi thi. Uske reshmi baal thandi hawaon ke khilaf mere chehre pr apni inayat bakhsh rhe thay.

Mukhtalif rangon se ranga asmaan, raat ke andhere main mahaul ko ek ruhaniyat bkshay huay tha. Laal, Gulaabi, narangi, peelay, haray aur jamani rango ke khubsurat imtizaj Allah ki wahdaniyat ka khulaasa kr rhe thay.

Wahan pr hum ne camp lga lya tha aur Maahrit ke israr pr jo fish hum market se le kr aye thay unhe ab brf ke khaano se nikal kr aag pr senk rhe thay. Ye tajurba hm dono ke liye munfarid aur khaas tha kiunke hr guzrte lmhe ke sath hmari nazdeeqiya brhti ja rhi theen, kuch sangat mohabbat ki thi aur kuch anjane se jazbaaton ki daurr se bndhe huay pal thay.

Maahrit ko shyd ajkl srdi kuch zyada hi lgrhi thi, wo phir se kanp rhi thi.Maine ahistagi se brhte huay uske nazuk wajood ko apni banhon main bhara, aur wo besakhta mere seene se lipti apni dharkano ko betab hone se bchane ke liye gehri sansen le rhi thi.Maine pyaar se uske mathay ko chooma aur phir uska hath, apne hath ki khali jaghon main bhar diya. Jistrah se maine usse apne paas kya hua tha, nazdeeqyo ki tapish usse dheere dheere pighla rhi thi.

Bila'akhir subah ki kirnen jab uske masoom chehre pr parri tb main apni ghafil neend se toota. Uske sunehre baal uske rukhsaron se phisalte huay uske honton ko choomne ki gustakhi kr rhe thay.Jab maine usske husn ke taqub main jakra hua tha tb hi uski nend bedar hui aur wo mjhe kohni ke bal hath ko apne gaalon pr tikaye mjhe dekhne lagi,

" Aese kya dekh rhe ho, tumhari hi biwi hun tassali rkho. Chalo ab mjhe bhook lagrhi hay nashta krke hmain Nigardsgreen Glacier ke liyr nikalna hay. Kiunke mjhe hiking krni hay. "

Aur phir uss ne jldi se mere honto ko apne narm honto se milaya, wo ek lamha badqismati se bohat hi phurti se nikal gya. Baalon main hath pherte huay, maine sustane ke se andaz main angrai li.Yahan se Nigardsgreen tk ka safar kuch ghnto ka tha, wahan pohnchne ke baad hmain boat se glacier tk pohnchna tha. Glacier se ata hua paani blkl shafaf aur khubsurat neele rang ka tha. Maahrit ne apne hatho se pani ke kuch cheente mjh pr urraye aur phir maine bhi apna badla lya.Phir maine usse rok dya kiunke agar glacier pe pohnchne se pehle hi agar wo bheeg jati tw phir uski khuwahish poori na ho pati.

Glacier tk pohnchne ke liye bohat mushaqat uthani thi kiunke hm iss cheez se waqif nahi thay, wahan pe maujud barf pe chalne ke auzar aur boots sath lene ke baad taqreeban 8 ghanto ka safar tha jo glacier ke nichle hisse se shuru ho kr dusre paar tk utarta tha. Barf ke teelon ka wo nazara paharon ke beech maujud nadi ko aur meri pari ko chaar chaand laga rha tha. Yahan pr maahrit ne ek halke neele rang ki gown pehni hui thi jo uske kamar ke gird chust aur peron ki janib se bohat loose thi.Wo kisi hoor se kam nahi lgrhi thi. Meri hoor. Jisse maine Allah se maang ke paaya tha. Mjhe apni qismat pr rashk araha tha. Bilatakuf mera sar glacier ke peron main sajde main jhuk gya, aur zuban se Subhana Rabbi Al'Aala jari hua. Maahrit josh main mjhse kafi agay nikal chuki thi aur main sirf usse apni nazron main hi qaid krne main msroof neeche kharra tha. Mjhe sajda krte huay dekh kr wo chonki.

" Iss tym? "

' Main apne Rabb ka shukr ada kr rha hun. '

" Aur wo kyun? "

' Allah ka shukr ada krne ke liye bhi koi wajah chahye kya?? '

Wo muskura kr sr hilate huay phir se upar chrhne lagi. Phir uska wajood meri ankhon se ahista ahista ojhal hone laga. Main bhi uske piche akhir barf ki choti pr chrhne laga. Boots pehenne ke bawjood aese lgrha tha jese zameen se thandi hawayen phoonk maar maar kr mere khoon ko jamane ki koshish kr rhi theen.Bila akhir main bhi wahan tk pohnch gya jahan Maahrit, zameen pr bethi hui apne hath main ek chota sa jhanda lya mera intezr kr rhi thi.

' Ye konsa... Jhanda hay... Mere dil main tw jhande gaar chuki ho iss glacier ko tw baksh do ab? '

Phoolti hui saans ko thamate huay maine apni baat uske samne rkhdi. Wo apni jagah se uthi aur mjhe la kr wo jhanda dikhane lagi.

" Ispe hum dono ka naam hay, maine socha karhai seekhi hay tw kisi achay kaam main bhi istemal krlu. "

Ye keh kr uss ne kandhay uchkaye aur meri traf apne hatho se likha hua wo jhanda pesh kya. Safed aur kaale rang ke dhaago se likhe hum dono ke naam gulaabi rang ke kapre pr bohat dilkash maloom ho rhe thay.

" Maahrit ka naam tmhare naam ke bghair adhoora aur siyaah sa hay. Tmhare naam ke jurrne ke baad mere naam ko tmhari roshni mili hay. Aur ye gulaabi rang ... Hmare pyar ki nishani hay. "

Aur phir uss ne apna hath mere hath ke saath late huay apni kamar ki traf rakh dya.

" Mehsoos kro... Yahan ... Jo wajood pal rha hay... Wo... Wo ... "

' Hmare gulaabi pyar ki nishani hay ? '

Maine herat aur khushi ke milay julay jazbaat ko ikhatta krte huay uska jumla mukammal kya, aur wo shrmaate huay apni palken niche jhukane lagi.

' Maahrit??? Tmhe pata hay main Allah ka shukr islye ada kr rha tha ke uss ne meri dua qabool ki aur mjhe tumse milaya. Ye dunya ke liye bohat tajubkhaiz ya mojzay wali baat hogi lekin mere liye tw jeseere khwabon ki taabeer hay. Kon janta tha ke main itna khushnaseeb huga ke meri khali si zindagi tmhare qadmon ki aahat sun ke yun jahan ki har soghaaton se bhar jayegi. Maahrit. Mjhe Tumse Mohabbat Hay,meri hoor, meri humnasheen, meri dilruba '

Kuch der yunhi ankhon se baatein krte huay phir hum ne apne pyar ka jhanda waheen gaar dya. Aur haathon main haath liye agay brhne lage.Kuch agay jane ke baad maine Maahrit ko apni baanhon main bhar lya tha, uske lakh mana krne pr maine inkar kya kiunke main chahta tha main usse apne seene ke qareeb mehsus kru.

Hmari agli jagah Saltstraumen Maelstroh thi, jo ke junoobi ilaqa Bodo ki jaanib tha. Ye dunya ki sbse mazboot aur khatrnak lehr mai bahane wala samandar tha, jiska ek whirlpool taqreeban shayad 5ft ki gehrayi rkhta tha aur usmain ye taqat thi ke wo apni traf aane wali cheezo ko tezi se baha kr apne andar jazb kr le. Paani main maujud neele aur sfed mojo ki milawat se bnte whirlpool ko ye bhi sharf haasil tha ke wo apni traf lubhata .Yahn aane ke liye humain jiss boat main bethna tha, uske liye lazmi tha ke survival suits pehnen.

Bila akhir chand mazeed maqamat ki ser ke baad hmare yahan ke safar ka ikhtitam hone wala tha, wo shaam Norway ke qiyam ki akhri shaam thi.

Aur shayad meri khushyon ki bhi...