" Tum aur Main, Main aur Tum!
Khudara iss 'aur' ko nikalo "
~Unknown

Mera sar drd se bhaari tha, kmzori ne mjhe shiddat se jkra hua tha aur ankhen ro ro kr hlkan aur jlne lagi thi.

Saamer meri sachai ko apnane ke liye kuch akele waqt guzarna chahta tha, aur main uske khinchao aur be'rukhi pr shashud thi, dil soz tha.Ya phir wo shrminda tha ke uss ne mere maazi ko jaane bgher kis trah mjhe apne sath jorr lya tha.

" Ma'am, ap kuch khayegi nahi tw phir apko IV dena prega. Kya ap chahti hain, yunhi beemar aur hospital main leti rahen? "

Ek nurse ne akar mjhe narmi se tan'beeh krte huay kaha, mamma wahin pr theen aur kafi der se israr kr rhi theen ke main kuch kha lu ya atleast soup ya carrot juice hi pee lu, lekin mjhe jo halq main karwapan mehsus horha tha wo kisi aur cheez ki lazzat ko mehsus krne se inkar kar rha tha.

Mamma mere ziddipan se bezaar theen, aur wo chah kr bhi mjhe kuch kehne ke liye lab nahi khol pa rhi theen. Wo bhi wahi preshani main mubtila theen jismai main kafi der se ghul rahi thi. Mjhe ye gawara nahi tha ke mere jism main kisi aise insan ka gosha ho jo ke... Main kisi pr ungli bhi nahi utha skti thi, mera dard bhara maazi is baat ki ijazat mjhe nahi deta tha. Aur khaas kr jb ye muwaashra insan ko uske haal se nahi blke maazi se pehchanne main mash'hoor tha.

" Beta, apne baba ke liye hi sahi. Kuch tw kha lo? "

Ab mamma ne apni chuph se naata torra, aur mere paas soup ka bowl le kr agayeen. Ye soup dekh dekh kr mjhe matli hone lgi thi, musalsal yahan aane ke baad mjhe nosh framane yahi paish kya jata jese koi shahi drbari khana ho. Astaghfirullah.

' Mamma mjhe nahi khana ye, nahi peena soup. Ap chawal aur daal bhi le ayen main wo kha lugi magar ye soup nahi chahye pls. '

Munh basorte huay maine soup ko dekha aur phir mamma se kaha.

" Beta, theek hay main bana dugi tmhe kuch lekin pehle tum tndrust tw hojao. "

Pata nahi kitne din aur lagege, ke main normal insano ki trah normal khana khaugi. Ye peekha aur bina zaiqe ka nahi. Astaghfirullah. Mjhe chahye tha ke main khamoshi se chor dun ya zabt krte huay aur shukr se kha lu, magar nahi.

Kuch der main ek silver color ke gubare ke sath, bandhi hui ek chit mjhe milti hay aur shayad wo mamma ko dikhai nahi deti , kiunke wo mere brabar bethi mjhse wahi soup peene ke israr main lagi hoti hain.

Tum ye mat smjho ke main tumhe chor gya hoon,
Meri mohabbat kanch ke dhaago se nahi blke nylon ke mazboot dhaagon se buni hui hay,
Koi mamooli quwwat usse kmzor kr ke torr nahi skti.
Tum soup pee lo, main yaheen maujud hun.

Main apna sar yahan wahan ghuma kr dekhti hun lekin mjhe kaheen bhi wo nazar nahi aata. Uff, nazar bhi kese ayega! Meri shadi jinn se hui hay, ek jinn se !!

Ankhen bnd krte huay, do ghoont main mai apne halq main wo ajeeb sa bezaiqa soup utaar deti hu jispr mamma khush hokr mere sar pe pyar krti hain aur bowl dhone washroom ki traf brhjati hain. Utne main ek aur gubara, is baar golden rang ka urrte huay ain mere nazdeeq akar rukjata hay. Goya wo mere thamne ke intizar main adab se kharra hua ho.

Tumhari izzat main kal bhi krta tha, aur aj bhi krta hun. Meri nzron main tumhari wahi jagah hay jo, pehle thi. Blke ye kehna ghalat hoga. Kiunke meri nazar main tum aur mo'atabar ho gyi ho.Kiunke Allah tumse mohabbat krta hay. Wrna har gunehgar ko Allah ka qurb hasil krne ka moqa nahi milta.

Ankhon ki nami ke saath muskurane ka alag hi maza hota hay, aur ye Saamer ne bohat asani se krdya tha.

' Saamer, samne ajao pls. '

Maine dil se ussko pukara, main chahti thi ke uske galay lg kr apne ansuon ko behne ka moqa du take meri ankhain sukun ki thandak paa saken.

Palak jhapakne ki deri main wo mere samne betha hua tha, aur ankhon main ankhen dale mjhe dekhe ja rha tha. Pata nahi wo katra rha tha ya phir mere izhar ka mutamanni tha.

Maine ishare se apne bazuon ko phela kar usse apni traf madu kya aur wo besakhta meri traf lapak gya.Aesa lagrha tha jese dunya ussi ke simt bus gardish kr rhi ho aur baqi sb be'maani ho. Mamma ke khansne pr hum mutawajja huay aur phir Saamer muskura kr mjhe maani'khez nzron se dekhne laga.

" Agar ap logon ka milna milana hogya ho tw phir jaldi se sb pack kro, tmhare discharge papers agaye hain beta. "

Mamma ne meri traf atay huay, Saamer ko mukhatib kya aur un dono ki baaton se aesa lgrha tha jese wo koi ander ki baat kr rhe haun.

" Jee jee, madam. Ap blkl fikr nahi kren. Main abhi sab krdeta hun. Papers sign krdu mai ya ap kregi? "

Saamer ne mamma ko visitor couch pe bithatay huay pucha.

" Zahir hay beta tum hi karoge na? Wo tw surgery ke waqt maine tumhari halat dekhte huay khud krdiye thay. Tab halanke yahan ki team ne aitraz bhi kya tha, magar phir mere israr pr razamandi de di thi. "

Waqt ke saath saath , saath rehne walon ka bhi pata chal jata hay ke wo apke saath hain ya bus ek hath ke faasle ki hadh tak saath hain.

Tqreeban ek ghnte ke ander meri khatir tawazo ka saaman pack hochuka tha aur ab baari thi mere pack hone ki, matlab abaya pehenne ki.

" Madam, ap... "

Saamer kuch kehne se shayad jhijak raha tha. Pata nahi kya kehna tha aesa, wese tw barra dilair bnta hay. Hunh.

" Haan kaho beta, kaheen tum ye tw nahi kehna chah rhe ke main kuch der bahir chali jaun? Tmhe privacy chahye tw bata do. "

Mamma ne mjhe cherne main kbhi koi qasar nahi chori thi.

" Nai wo.. Umm.. Kya ap... MainKehRhaThaKeApDriverKeSathChaliJayenPlsMainMaahritKoLeKarSathAjauga... Wo mjhe isse kaheen le kr jana tha. "

Saamer ne apni baat phurti se kahi aur phir nzren jhuka kr, blke mamma se nazren chura kr unke jawab ka intezar krne laga.

" Hmm. Main bhi wese yahi soch rhi thi. Tm log honeymoon ke liye kaheen gaye bhi nahi ho. Aesa kro, main Huzbaan se bat krleti hu. Tm log Pakistan ke Shumaali ilaaqon main chale jao. Sardiyon ka maza bhi ajayega aur apne watan ki khubsurti ko dil main basane ka bhi? "

Mamma ne Saamer ke kandhe ko thapthapate huay kaha aur phir meri traf dekh kr muskurane lagin, jese meri raye mang rhi hun. Mamma ki sweetness tw uff Allah!

Dil main tw mere bhi laddoo phoot rahe thay lekin main chehre se aur apne jazbat se blkl zahir nahi krna chahti thi, islye main ne pentra badalte huay awaz ko thora bhari kya aur unse kaha.

' Nahi mamma. Aesi koi baat nahi hay. Saamer yaqeenan abhi ki baat kr rha hoga. Hum ajayege, agar apko aitraz na ho. Kyun hain na Saamer? '

Maine usse ghoorte huay kaha, ke wo meri haan main haan milaye. Lekin wo Saamer hi kahan jo meri taang khenchne ka aik bhi moqa hath se jane de!

" Ahahaha, jee jee madam. Apki beti blkl sahi keh rhi hay. Main bus aese hi kehrha tha, choonke ye hospital ke boring khano se azaad hogyi hay tw sochrha tha ke isse icecream khila kr wapas le aun. "

Mamma ne hum dono ki traf dekha aur phir kuch soch kr khil'khila ke hans pree.

" Hahaha, haan haan beta maine kab tumhe kuch mana kya hay? Jao jao, ghoomo phiro. Tumhari hi biwi hay. Mjhe kiun aitraz hoga. Aur haan honeymoon ka koi program ho tw mjhe bata zroor dena. "

Mamma ne hum dono ko ankh maarte huay kaha aur phir apna naqab durust krke bahar ki traf jane lagin. Saamer ne shoppers hath main pkr liye thay aur wo unhe gaari main bithane ke liye unke sath bahar chla gya tha.

Main apne bed pe bethi, apna scarf theek kr rhi thi utne main ek nurse ne akar mjhe safed phoolon ka guldasta pesh kya aur ajeeb andaz se muskurate huay apna sr hila kr bahar chali gyi. Main usse puch bhi nahi payi ke ab ye kis ne dya hay kiunke Gerard tw mar chuka tha. Kaheen ye...
Nahi nahi, Gerard ne tw kaha tha ke uss ne Zulaym ki wo halat krdi hay ke wo mere qareeb ane ki door door tak nahi sochega.

Mere sochon ka bandh kisi ke mjhe kandhe se hilane se hua, aur mere samne Saamer kharra mjhe aur phir unn phoolon ko dekh rha tha.

' Saamer wo main... Ye phool... '

Uss ne phoolon ka guldasta lya aur unhe apne hathon ke lams se chua aur phir apni khushbu ussmai bharte huay mjhe pakrane laga. Ab wo apne guthne ke bal betha mjhse mera hath mang rha tha. Ye sab ek ajeeb manzar lag rha tha, mjhe samjh nahi araha tha ke main muskuraun ya phir rowu.

' Saamer ye tm kya kr rhe ho? Ye phool phenk do... '

Saamer ne apne hathon ki traf nazron se ishara kya ke main apna hath uss pr aitebar krte huay sama du, aur maine yahi kya.Uska hath mere hathon main perfectly fit hota tha jese kisi puzzle ke tukre apas main milne wale haun tw tasweer ko mukammal bna dete hain.Wese hi, uska aana meri zindagi ko mukammal bana chuka tha.

" Ye phool pyaar ki nishaani hain, inhe phenk kr pyaar ki toheen mat kro. Inhe maine chua hay. Iss ki pankhurion main mere lams samaye huay hain, iski mehek main meri khushbu hay. Kya tum ab bhi isse nahi logi? "

' Lekin Saamer. '

Saamer ne guldasta se ek phool alag kya aur usse mere honto pe chuph ke pegham ke sath rkhdya.

Main uski ek ek ada pr fida horhi thi, mjhe pyar nahi hona tha lekin horha tha. Mjhe dubara nahi jeena tha, lekin main jee rhi thi. Ek nayi zindagi thi jo mjhe Allah ne inayat ki thi.

" Chalen Maahrit? "

' Kahan? '

" Honeymoon pe aur kahan! "

Uss ne mere dono gaalon pe ahistagi se chooma, phir maathay ko chooma, phir dono ankhon ko aur phir labo ke paas akar thehr gya...

" Phir kabhi sahi "

Aur phir mera naqab neeche krke mere humraah hospital ke bahar chalne laga. Na janay wo mjhe kahan le ja rha tha, lekin yaqeen tha ke safar khushgawar hoga.